ជំរឿនបណ្ដាជន ២:១-៣៤
-
ជំរំបានត្រូវរៀបចំតាមក្រុម ហើយក្រុមនីមួយៗមានបីកុលសម្ព័ន្ធ (១-៣៤)
២ ព្រះយេហូវ៉ាបានមានប្រសាសន៍ទៅកាន់ម៉ូសេនិងអេរ៉ុនថា៖
២ «ចូរឲ្យបណ្ដាជនអ៊ីស្រាអែលបោះជំរំតាមក្រុមដែលបានត្រូវកំណត់ឲ្យ គឺមួយក្រុមមានកុលសម្ព័ន្ធបី។+ ពួកគេត្រូវបោះជំរំត្រង់កន្លែងដែលមានសញ្ញាសម្គាល់នៃវង្សត្រកូលរបស់ពួកគេរៀងៗខ្លួន។ ពួកគេទាំងអស់ត្រូវបោះជំរំជុំវិញត្រសាលជំនុំ ហើយបែរមុខទៅទីនោះ។
៣ «កុលសម្ព័ន្ធបីដែលបោះជំរំនៅប៉ែកខាងកើត គឺទិសថ្ងៃរះ មានកុលសម្ព័ន្ធយូដាជាអ្នកនាំមុខ។ មេដឹកនាំកុលសម្ព័ន្ធយូដា គឺណាសូនជាកូនអាមីណាដាប។+
៤ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៧៤.៦០០នាក់។+
៥ កុលសម្ព័ន្ធអ៊ីសាខារត្រូវបោះជំរំក្បែរពួកគេ ហើយមេដឹកនាំកុលសម្ព័ន្ធនោះ គឺនេថានេល+ជាកូនសួអា។
៦ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៥៤.៤០០នាក់។+
៧ ឯកុលសម្ព័ន្ធសេប៊ូឡូន ក៏ត្រូវបោះជំរំនៅក្បែរពួកគេដែរ ហើយមេដឹកនាំកុលសម្ព័ន្ធនោះ គឺអេលាប+ជាកូនហេឡន។
៨ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៥៧.៤០០នាក់។+
៩ «ចំនួនពលទ័ពដែលកុលសម្ព័ន្ធយូដាដឹកនាំ សរុបទាំងអស់គឺ១៨៦.៤០០នាក់។ ពួកគេត្រូវចេញទៅមុនគេបង្អស់។+
១០ «កុលសម្ព័ន្ធបីដែលបោះជំរំនៅប៉ែកខាងត្បូង មានកុលសម្ព័ន្ធរូបេន+ជាអ្នកនាំមុខ។ មេដឹកនាំកុលសម្ព័ន្ធរូបេន គឺអេលីសឺ+ជាកូនសេដេអឺ។
១១ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៤៦.៥០០នាក់។+
១២ កុលសម្ព័ន្ធស៊ីម្មានត្រូវបោះជំរំក្បែរពួកគេ ហើយមេដឹកនាំកុលសម្ព័ន្ធនោះ គឺសេឡូមៀល+ជាកូនស៊ូរីសាដាយ។
១៣ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៥៩.៣០០នាក់។+
១៤ ឯកុលសម្ព័ន្ធកាដ ក៏ត្រូវបោះជំរំនៅក្បែរពួកគេដែរ ហើយមេដឹកនាំកុលសម្ព័ន្ធនោះ គឺអេឡាយអាសាប+ជាកូនរូអាល់។
១៥ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៤៥.៦៥០នាក់។+
១៦ «ចំនួនពលទ័ពដែលកុលសម្ព័ន្ធរូបេនដឹកនាំ សរុបទាំងអស់គឺ១៥១.៤៥០នាក់។ ពួកគេត្រូវចេញទៅទី២។+
១៧ «ពេលណាត្រូវរើត្រសាលជំនុំ+ ក្រុមពួកលេវីត្រូវដើរនៅកណ្ដាលក្រុមឯទៀត។
«កុលសម្ព័ន្ធទាំងអស់ត្រូវធ្វើដំណើរតាមលំដាប់លំដោយ ដូចដែលពួកគេបោះជំរំដែរ+ គឺតាមក្រុមរបស់ខ្លួនដែលមានកុលសម្ព័ន្ធបីនោះ។
១៨ «កុលសម្ព័ន្ធបីដែលបោះជំរំនៅប៉ែកខាងលិច មានកុលសម្ព័ន្ធអេប្រាអ៊ីមជាអ្នកនាំមុខ ហើយមេដឹកនាំកុលសម្ព័ន្ធនោះ គឺអេលីសាម៉ា+ជាកូនអាំម៉ាយហ៊ូត។
១៩ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៤០.៥០០នាក់។+
២០ កុលសម្ព័ន្ធម៉ាណាសេ+ត្រូវបោះជំរំក្បែរពួកគេ ហើយមេដឹកនាំកុលសម្ព័ន្ធនោះ គឺកាម៉េលាល+ជាកូនភេដាសឺ។
២១ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៣២.២០០នាក់។+
២២ ឯកុលសម្ព័ន្ធបេនយ៉ាមីន ក៏ត្រូវបោះជំរំនៅក្បែរពួកគេដែរ ហើយមេដឹកនាំកុលសម្ព័ន្ធនោះ គឺអាប៊ីដាន+ជាកូនគីឌីអូណាយ។
២៣ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៣៥.៤០០នាក់។+
២៤ «ចំនួនពលទ័ពដែលកុលសម្ព័ន្ធអេប្រាអ៊ីមដឹកនាំ សរុបទាំងអស់គឺ១០៨.១០០នាក់។ ពួកគេត្រូវចេញទៅទី៣។+
២៥ «កុលសម្ព័ន្ធបីដែលបោះជំរំនៅប៉ែកខាងជើង មានកុលសម្ព័ន្ធដាន់ជាអ្នកនាំមុខ ហើយមេដឹកនាំកុលសម្ព័ន្ធនោះ គឺអាហាយអ៊ីសឺ+ជាកូនអាំមីសាដាយ។
២៦ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៦២.៧០០នាក់។+
២៧ កុលសម្ព័ន្ធអេស៊ើរត្រូវបោះជំរំក្បែរពួកគេ ហើយមេដឹកនាំកុលសម្ព័ន្ធនោះ គឺផាគាល+ជាកូនអូក្រាន។
២៨ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៤១.៥០០នាក់។+
២៩ ឯកុលសម្ព័ន្ធណែបថាលី ក៏ត្រូវបោះជំរំនៅក្បែរពួកគេដែរ ហើយមេដឹកនាំកុលសម្ព័ន្ធនោះ គឺអាហាយរ៉ា+ជាកូនអេណាន់។
៣០ ពលទ័ពរបស់គាត់ដែលមានឈ្មោះក្នុងបញ្ជីគឺចំនួន៥៣.៤០០នាក់។+
៣១ «ចំនួនពលទ័ពដែលកុលសម្ព័ន្ធដាន់ដឹកនាំ សរុបទាំងអស់គឺ១៥៧.៦០០នាក់។ ពួកគេត្រូវចេញទៅក្រោយគេបង្អស់+ តាមក្រុមរបស់ខ្លួនដែលមានកុលសម្ព័ន្ធបីនោះ»។
៣២ ពលទ័ពអ៊ីស្រាអែលដែលបានត្រូវចុះបញ្ជីតាមវង្សត្រកូល សរុបទាំងអស់គឺចំនួន៦០៣.៥៥០នាក់។+
៣៣ ចំណែកពួកលេវីវិញ ពួកគេមិនបានត្រូវរាប់បញ្ចូល+ក្នុងចំណោមបណ្ដាជនអ៊ីស្រាអែលឯទៀតទេ+ គឺដូចដែលព្រះយេហូវ៉ាបានបង្គាប់ម៉ូសេ។
៣៤ ដូច្នេះ បណ្ដាជនអ៊ីស្រាអែលបានធ្វើតាមបង្គាប់ទាំងអស់ដែលព្រះយេហូវ៉ាបានប្រាប់ម៉ូសេ។ នេះជារបៀបដែលពួកគេបោះជំរំនិងរើជំរំតាមក្រុមរៀងៗខ្លួនដែលមានកុលសម្ព័ន្ធបី គឺតាមក្រុមគ្រួសារ និងតាមវង្សត្រកូល។+