ជំរឿនបណ្ដាជន ២៣:១-៣០
២៣ បន្ទាប់មក បាឡាមបានប្រាប់បាឡាក់ថា៖ «ចូរសង់ទីបូជា៧នៅទីនេះ+ ហើយរៀបចំគោឈ្មោល៧ក្បាល និងចៀមឈ្មោល៧ក្បាលឲ្យខ្ញុំផង»។
២ ភ្លាមនោះ បាឡាក់បានធ្វើតាមបង្គាប់បាឡាម ហើយនៅលើទីបូជានីមួយៗ ពួកគេជូនគោឈ្មោលមួយនិងចៀមឈ្មោលមួយជាគ្រឿងបូជា។+
៣ រួចមក បាឡាមនិយាយទៅកាន់បាឡាក់ថា៖ «ចូរចាំនៅក្បែរគ្រឿងបូជាដុតរបស់លោកសិន។ ឯខ្ញុំវិញ ខ្ញុំនឹងទៅឆ្ងាយបន្តិច។ ប្រហែលជាព្រះយេហូវ៉ានឹងមកជួបខ្ញុំ ហើយអ្វីណាដែលព្រះបើកបង្ហាញដល់ខ្ញុំ ខ្ញុំនឹងប្រាប់ដល់លោក»។ ដូច្នេះ គាត់ក៏ឡើងទៅលើទួលមួយ។
៤ ក្រោយមក ព្រះបានលេចមកជួបបាឡាម+ ហើយគាត់បានជម្រាបលោកថា៖ «ខ្ញុំបានដំឡើងទីបូជា៧ ហើយនៅលើទីបូជានីមួយៗ ខ្ញុំបានជូនគោឈ្មោលមួយនិងចៀមឈ្មោលមួយជាគ្រឿងបូជា»។
៥ ព្រះយេហូវ៉ាក៏ណែនាំអំពីអ្វីដែលបាឡាមត្រូវនិយាយ ហើយលោកប្រាប់ថា៖+ «ចូរត្រឡប់ទៅបាឡាក់វិញ ហើយប្រាប់គាត់តាមសម្ដីរបស់ខ្ញុំ»។
៦ ដូច្នេះ បាឡាមបានត្រឡប់ទៅវិញ ហើយឃើញបាឡាក់និងពួកមន្ត្រីជនជាតិម៉ូអាប់ទាំងអស់កំពុងឈរនៅក្បែរគ្រឿងបូជាដុត។
៧ រួចបាឡាមក៏ពោលពាក្យជាកំណាព្យថា៖+
«បាឡាក់ជាស្ដេចស្រុកម៉ូអាប់បានហៅខ្ញុំមកពីតំបន់អេរ៉ាម+គឺពីតំបន់ភ្នំភាគខាងកើត ដោយប្រាប់ថា៖
‹ចូរមកដាក់បណ្ដាសាយ៉ាកុបឲ្យខ្ញុំ។ ចូរមកផ្ដន្ទាទោសអ៊ីស្រាអែល›។+
៨ តើឲ្យខ្ញុំដាក់បណ្ដាសាពួកអ្នកដែលព្រះមិនបានដាក់បណ្ដាសាម្ដេចនឹងបានទៅ?
តើឲ្យខ្ញុំផ្ដន្ទាទោសពួកអ្នកដែលព្រះយេហូវ៉ាមិនបានផ្ដន្ទាទោសម្ដេចនឹងកើត?+
៩ ខ្ញុំបានសម្លឹងមើលពួកគេពីលើផ្ទាំងថ្ម។ ពីលើទីទួលខ្ញុំបានឃើញពួកគេ។
បណ្ដាជននេះនៅដាច់ដោយឡែកពីគេ+ ហើយមិនឡូកឡំនឹងប្រជាជាតិឯទៀតទេ។+
១០ តើអ្នកណាអាចរាប់លម្អងធូលីរបស់យ៉ាកុបបាន+សូម្បីតែពួកអ៊ីស្រាអែល១ភាគ៤ ក៏គ្មានអ្នកណារាប់បានផង?
សូមឲ្យខ្ញុំស្លាប់ដូចជនទៀងត្រង់ទាំងនេះចុះសូមឲ្យជីវិតខ្ញុំបញ្ចប់ទៅដូចពួកគេដែរ»។
១១ បន្ទាប់មក បាឡាក់បាននិយាយទៅបាឡាមថា៖ «ហេតុអ្វីក៏អ្នកធ្វើដូច្នេះចំពោះខ្ញុំ? ខ្ញុំបានហៅអ្នកឲ្យមកដាក់បណ្ដាសាពួកសត្រូវរបស់ខ្ញុំ តែអ្នកបែរជាឲ្យពរពួកគេទៅវិញ!»។+
១២ បាឡាមតបថា៖ «តើខ្ញុំមិនត្រូវនិយាយតាមប្រសាសន៍របស់ព្រះយេហូវ៉ាទេឬ?»។+
១៣ បាឡាក់ក៏និយាយបន្តថា៖ «សូមទៅកន្លែងមួយទៀតជាមួយខ្ញុំ។ ពីកន្លែងនោះ អ្នកអាចឃើញពួកគេដែរ តែគ្រាន់តែមួយផ្នែកប៉ុណ្ណោះ។ នៅទីនោះ សូមដាក់បណ្ដាសាពួកគេឲ្យខ្ញុំផង»។+
១៤ ដូច្នេះ បាឡាក់បាននាំបាឡាមទៅវាលសូភីម ដែលស្ថិតនៅតំបន់ខ្ពង់រាបពីសកា។+ ពួកគេបានដំឡើងទីបូជា៧នៅទីនោះ ហើយពួកគេបានជូនគោឈ្មោលមួយនិងចៀមឈ្មោលមួយជាគ្រឿងបូជា នៅលើទីបូជានីមួយៗ។+
១៥ រួចបាឡាមក៏ប្រាប់បាឡាក់ថា៖ «ពេលខ្ញុំទៅជួបព្រះនៅទីនោះ សូមលោកចាំនៅក្បែរគ្រឿងបូជាដុតរបស់លោកសិន»។
១៦ ក្រោយមក ព្រះយេហូវ៉ាបានលេចមកជួបបាឡាម ហើយណែនាំអំពីអ្វីដែលគាត់ត្រូវនិយាយ។ រួចលោកប្រាប់ថា៖+ «ចូរត្រឡប់ទៅបាឡាក់វិញ ហើយប្រាប់គាត់តាមសម្ដីរបស់ខ្ញុំ»។
១៧ ដូច្នេះ បាឡាមបានត្រឡប់ទៅវិញ ហើយឃើញបាឡាក់និងពួកមន្ត្រីជនជាតិម៉ូអាប់កំពុងឈរចាំនៅក្បែរគ្រឿងបូជាដុត។ បាឡាក់បានសួរគាត់ថា៖ «តើព្រះយេហូវ៉ាបានប្រាប់អ្នកអ្វីខ្លះ?»។
១៨ រួចបាឡាមក៏ពោលពាក្យជាកំណាព្យថា៖+
«ឱបាឡាក់អើយ! ចូរក្រោកឡើង ហើយស្ដាប់ចុះ។
ឱកូនស៊ីបព័រអើយ! ចូរស្ដាប់ខ្ញុំ។
១៩ ព្រះមិនដូចជាមនុស្សដែលចេះកុហកនោះទេ+ហើយក៏មិនដូចជាកូនមនុស្សដែលងាយប្ដូរគំនិតនោះដែរ។+
ពេលលោកមានប្រសាសន៍អ្វីមួយ លោកនឹងធ្វើឲ្យកើតឡើង មែនទេ?
ពេលលោកចេញវាចាហើយ លោកនឹងធ្វើឲ្យសម្រេចជាក់ជាមិនខាន មែនទេ?+
២០ មើល! ខ្ញុំមកទីនេះដើម្បីជូនពរលោកបានឲ្យពរពួកគេហើយ+ ខ្ញុំមិនអាចផ្លាស់ប្រែវិញឡើយ។+
២១ លោកមិនបណ្ដោយឲ្យអ្នកណាប្រើវេទមន្តទាស់នឹងយ៉ាកុបទេហើយក៏មិនអនុញ្ញាតឲ្យអ្នកណាបង្កបញ្ហាដល់អ៊ីស្រាអែលដែរ។
ព្រះយេហូវ៉ាដែលជាព្រះរបស់គាត់ កំពុងនៅជាមួយនឹងពួកគេ+ពួកគេស្រែកយ៉ាងកងរំពងលើកតម្កើងលោកជាស្ដេច។
២២ ព្រះនាំពួកគេចេញពីស្រុកអេហ្ស៊ីប។+
ចំពោះពួកគេ លោកប្រៀបដូចជាស្នែងគោព្រៃ។+
២៣ គ្មានគ្រូវេទមន្តណាអាចដាក់អំពើទៅលើយ៉ាកុបបានទេ+ហើយក៏គ្មានគ្រូទាយណាអាចទស្សន៍ទាយប្រឆាំងនឹងអ៊ីស្រាអែលដែរ។+
នៅពេលនេះ គេអាចថ្លែងអំពីយ៉ាកុបនិងអ៊ីស្រាអែលថា៖
‹ចូរមើលការអស្ចារ្យដែលព្រះបានធ្វើចុះ!›។
២៤ បណ្ដាជននេះនឹងងើបឡើងដូចតោដូចតោដែលក្រោកឈរ ពួកគេនឹងក្រោកឈរដូច្នោះដែរ។+
តោនឹងមិនដេកឡើយ ទាល់តែវាបានស៊ីចំណីវានឹងមិនលង់លក់ទេ ទាល់តែហុតឈាមសត្វដែលវាចាប់បាន»។
២៥ បន្ទាប់មក បាឡាក់បាននិយាយទៅកាន់បាឡាមថា៖ «បើមិនដាក់បណ្ដាសាពួកគេ ក៏ហីទៅចុះ តែកុំឲ្យពរពួកគេយ៉ាងនេះឡើយ»។
២៦ បាឡាមបានតបទៅវិញថា៖ «ក្រែងខ្ញុំជម្រាបលោកហើយតើថា៖ ‹ខ្ញុំនឹងនិយាយតាមតែប្រសាសន៍របស់ព្រះយេហូវ៉ាប៉ុណ្ណោះ›»។+
២៧ បាឡាក់បាននិយាយបន្តថា៖ «សូមទៅកន្លែងមួយទៀតជាមួយខ្ញុំ។ ប្រហែលជាព្រះពិតពេញចិត្តឲ្យអ្នកដាក់បណ្ដាសាពួកគេពីទីនោះ»។+
២៨ ដូច្នេះ បាឡាក់បាននាំបាឡាមឡើងទៅលើកំពូលភ្នំពេអរ។ ពីទីនោះ ពួកគេអាចមើលឃើញយេស៊ីម៉ូន។*+
២៩ រួចបាឡាមបានប្រាប់បាឡាក់ថា៖ «ចូរសង់ទីបូជា៧នៅទីនេះ ហើយរៀបចំគោឈ្មោល៧ក្បាល និងចៀមឈ្មោល៧ក្បាលឲ្យខ្ញុំផង»។+
៣០ ដូច្នេះ បាឡាក់បានធ្វើតាមបង្គាប់បាឡាម ហើយនៅលើទីបូជានីមួយៗ គាត់បានជូនគោឈ្មោលមួយនិងចៀមឈ្មោលមួយជាគ្រឿងបូជា។
កំណត់សម្គាល់
^ ឬប្រហែលជាមានន័យថា«វាលខ្សាច់ឬតំបន់ស្ងាត់ជ្រងំ»