សំបុត្រទី២ជូនចំពោះធីម៉ូថេ ១:១-១៨
១ ពីខ្ញុំ ប៉ូល ជាសាវ័ក*របស់គ្រិស្តយេស៊ូដោយបំណងប្រាថ្នារបស់ព្រះ ស្របតាមសេចក្ដីសន្យាអំពីជីវិតដែលអាចទទួលបានតាមរយៈគ្រិស្តយេស៊ូ។+
២ ជូនចំពោះធីម៉ូថេ កូនជាទីស្រឡាញ់៖+
សូមឲ្យអ្នកបានប្រកបដោយគុណដ៏វិសេសលើសលប់ សេចក្ដីមេត្តាករុណា និងសេចក្ដីសុខសាន្តពីព្រះដែលជាបិតា ព្រមទាំងពីគ្រិស្តយេស៊ូដែលជាម្ចាស់របស់យើង។
៣ ខ្ញុំអរគុណព្រះដែលបានឲ្យខ្ញុំបំពេញកិច្ចបម្រើពិសិដ្ឋជូនលោកដូចបុព្វបុរសរបស់ខ្ញុំ ដោយមានសមត្ថភាពវិនិច្ឆ័យដែលមិនផ្ដន្ទាទោស ហើយទាំងយប់ទាំងថ្ងៃ ខ្ញុំតែងតែនឹកឃើញអ្នកជានិច្ចពេលខ្ញុំអធិដ្ឋានអង្វរព្រះ។
៤ ពេលដែលខ្ញុំនឹកឃើញទឹកភ្នែករបស់អ្នក ខ្ញុំចង់ជួបអ្នកខ្លាំងណាស់។ បើខ្ញុំបានជួបអ្នកមែន ខ្ញុំនឹងមានអំណរក្រៃលែង។*
៥ ព្រោះខ្ញុំចាំអំពីជំនឿដែលគ្មានពុតត្បុតរបស់អ្នក+ ជាជំនឿដែលឡូអ៊ីសជាជីដូនរបស់អ្នក និងអឺនីសជាម្ដាយរបស់អ្នក មានមុនអ្នក ហើយជាជំនឿដែលខ្ញុំជឿជាក់ថាអ្នកក៏មានដែរ។
៦ ដោយហេតុនេះ ខ្ញុំសូមរំលឹកអ្នកឲ្យបន្តមានចិត្តខ្នះខ្នែង*ក្នុងការប្រើអំណោយដែលអ្នកបានទទួលពីព្រះពេលខ្ញុំបានដាក់ដៃលើអ្នក។+
៧ ព្រោះឫទ្ធានុភាពបរិសុទ្ធ*ដែលព្រះផ្ដល់ឲ្យយើង មិនធ្វើឲ្យយើងមានចិត្តកំសាកទេ+ តែធ្វើឲ្យយើងមានកម្លាំង+ សេចក្ដីស្រឡាញ់ និងការដឹងខុសត្រូវ។
៨ ដូច្នេះ កុំអៀនខ្មាសក្នុងការផ្សព្វផ្សាយអំពីលោកម្ចាស់របស់យើង+ ឬអៀនខ្មាសដោយសារខ្ញុំជាអ្នកទោសដើម្បីលោកឡើយ តែចូរត្រៀមខ្លួនទទួលទុក្ខលំបាក+ដើម្បីដំណឹងល្អ ដោយពឹងផ្អែកលើឫទ្ធានុភាពរបស់ព្រះ។+
៩ លោកបានសង្គ្រោះយើង ហើយបានហៅយើងមកដើម្បីឲ្យធ្វើជាអ្នកបរិសុទ្ធ+ មិនមែនដោយសារការប្រព្រឹត្តរបស់យើងទេ តែដោយសារគោលបំណងនិងគុណដ៏វិសេសលើសលប់របស់លោក។+ ព្រះបានសម្រេចចិត្តផ្ដល់គុណដ៏វិសេសលើសលប់នេះដល់យើង តាមរយៈគ្រិស្តយេស៊ូតាំងពីយូរលង់ណាស់មកហើយ។
១០ ប៉ុន្តែឥឡូវ គុណដ៏វិសេសលើសលប់នេះបានត្រូវសឲ្យឃើញច្បាស់ ពេលដែលគ្រិស្តយេស៊ូជាអ្នកសង្គ្រោះយើងបានលេចមក+ លោកជាអ្នកដែលបានបំផ្លាញសេចក្ដីស្លាប់ឲ្យសាបសូន្យ+ ហើយបានបើកបង្ហាញឲ្យយើងដឹងតាមរយៈដំណឹងល្អ+អំពីជីវិត+ដែលមិនអាចខូចទៅ+
១១ ព្រោះនោះជាមូលហេតុដែលខ្ញុំបានត្រូវតែងតាំងឲ្យធ្វើជាអ្នកផ្សព្វផ្សាយ ជាសាវ័ក និងជាអ្នកបង្រៀន។+
១២ ដោយសារកិច្ចការនេះ ខ្ញុំរងទុក្ខលំបាក+ តែខ្ញុំមិនអៀនខ្មាសទេ។+ ព្រោះខ្ញុំស្គាល់ព្រះដែលខ្ញុំបានជឿ ហើយក៏ជឿជាក់ថាលោកអាចរក្សាការពារអ្វីដែលខ្ញុំបានផ្ញើទុកនឹងលោកដរាបដល់ថ្ងៃនោះ។+
១៣ ចូរកាន់ខ្ជាប់គំរូនៃពាក្យដែលមានប្រយោជន៍+ដែលអ្នកបានឮពីខ្ញុំ ដោយមានជំនឿនិងសេចក្ដីស្រឡាញ់ ដែលមកពីការរួបរួមជាមួយនឹងគ្រិស្តយេស៊ូ។
១៤ ចូររក្សាការពារបញ្ញើដ៏ល្អប្រសើរនេះ តាមរយៈឫទ្ធានុភាពបរិសុទ្ធដែលស្ថិតនៅក្នុងយើង។+
១៥ អ្នកដឹងហើយថាមនុស្សទាំងអស់នៅខេត្តអាស៊ី*+បានបែរចេញពីខ្ញុំ រួមទាំងភីកេឡឺសនិងហឺម៉ាជីនីសដែរ។
១៦ សូមឲ្យព្រះជាម្ចាស់របស់យើងបង្ហាញសេចក្ដីមេត្តាករុណាដល់អូណេស៊ីផឺនិងពួកអ្នកផ្ទះរបស់គាត់+ ពីព្រោះជាច្រើនដង គាត់បានធ្វើឲ្យខ្ញុំមានកម្លាំងចិត្តឡើងវិញ ហើយគាត់មិនដែលអៀនខ្មាសដោយសារខ្ញុំជាប់ច្រវាក់ទេ។
១៧ ផ្ទុយទៅវិញ ពេលដែលគាត់នៅក្រុងរ៉ូម គាត់បានស្វះស្វែងរកខ្ញុំទាល់តែឃើញ។
១៨ សូមឲ្យព្រះយេហូវ៉ា*ជាម្ចាស់របស់យើងបង្ហាញសេចក្ដីមេត្តាករុណាដល់គាត់នៅថ្ងៃនោះ។ អ្នកដឹងច្បាស់ហើយអំពីជំនួយទាំងអស់ដែលគាត់បានផ្ដល់ឲ្យនៅក្រុងអេភេសូរ។
កំណត់សម្គាល់
^ ភាសាក្រិច«អាប៉ូស្តូឡូស»មានន័យថា«អ្នកដែលត្រូវគេចាត់ឲ្យទៅ»
^ ឬ«អំណរដ៏ពោរពេញ»
^ ន័យត្រង់«មានសកម្មភាពជានិច្ចដូចភ្លើងដែលឆេះសន្ធោសន្ធៅ»
^ ឬ«ចិត្តគំនិត»
^ មើលនិយមន័យពាក្យ«អាស៊ី»
