បទទំនួញ ១:១-២២
א [អាល់ឡេហ្វ]*
១ ពីមុននាងជាក្រុងដែលមានមនុស្សច្រើនកុះករ ឥឡូវនាងបែរជាអង្គុយនៅឯកា!+
នាងធ្លាប់តែមានបណ្ដាជនច្រើន បើប្រៀបធៀបជាមួយនឹងប្រជាជាតិឯទៀត តែនាងបានក្លាយជាស្ត្រីមេម៉ាយវិញ!+
នាងធ្លាប់ជាម្ចាស់ក្សត្រីក្នុងចំណោមខេត្តទាំងឡាយ តែនាងបែរជាត្រូវគេបង្ខំ ឲ្យធ្វើការយ៉ាងលំបាក!+
ב [បេត]
២ នៅពេលយប់នាងយំឥតឈប់+ ទឹកភ្នែកនាងហូរជោកថ្ពាល់។
ឥតមានគូស្នេហ៍ណាម្នាក់របស់នាង មកសម្រាលទុក្ខនាងឡើយ។+
មិត្តសម្លាញ់ទាំងអស់បានក្បត់នាង+ ពួកគេក្លាយជាសត្រូវរបស់នាង។
ג [គីមេល]
៣ យូដាបានត្រូវចាប់យកទៅជាឈ្លើយ+ នាងរងទុក្ខវេទនា ហើយក្លាយជាខ្ញុំបម្រើដែលត្រូវគេធ្វើបាបយ៉ាងសាហាវ។+
នាងត្រូវស្នាក់អាស្រ័យក្នុងចំណោមប្រជាជាតិនានា+ នាងគ្មានសេចក្ដីសុខទាល់តែសោះ។
ពួកអ្នកបៀតបៀនទាំងអស់បានដេញទាន់នាងក្នុងពេលដែលនាងរងទុក្ខលំបាក។
ד [ដាលេត]
៤ ផ្លូវទៅកាន់ស៊ីយ៉ូនកំពុងកើតទុក្ខ ព្រោះតែគ្មានអ្នកណាមកពិធីបុណ្យ។+
គ្រប់ទាំងទ្វាររបស់នាងបានបាក់បែក+ ឯពួកសង្ឃកំពុងដកដង្ហើមធំ។
ពួកស្ត្រីវ័យក្មេង*របស់នាងកំពុងសោកសង្រេងហើយនាងឈឺចាប់ខ្លាំងណាស់។
ה [ហេ]
៥ ពួកសត្រូវរបស់នាង ឥឡូវបានក្លាយជាម្ចាស់នាងវិញ។ ពួកខ្មាំងរបស់នាងគ្មានទុក្ខព្រួយឡើយ។+
ព្រោះព្រះយេហូវ៉ាបាននាំឲ្យនាងជួបទុក្ខវេទនា ដោយសារនាងបានប្រព្រឹត្តអំពើរំលងជាច្រើន។+
កូនរបស់នាងបានត្រូវពួកខ្មាំងសត្រូវចាប់យកទៅធ្វើជាឈ្លើយ។+
ו [វ៉ោ]
៦ ភាពរុងរឿងទាំងអស់បានចេញពីកូនស្រីស៊ីយ៉ូនហើយ។+
ពួកមន្ត្រីរបស់នាងប្រៀបដូចជាក្ដាន់ដែលរកវាលស្មៅមិនបាន
ហើយពួកគេដើរទៅទាំងអស់កម្លាំង កាលដែលគេចខ្លួនពីពួកអ្នកដែលដេញតាមពួកគេ។
ז [ហ្សាយីន]
៧ ក្នុងថ្ងៃដែលយេរូសាឡិម*ជួបទុក្ខវេទនា ហើយគ្មានផ្ទះសម្បែងនោះនាងក៏នឹកដល់វត្ថុទ្រព្យមានតម្លៃទាំងប៉ុន្មានដែលនាងធ្លាប់មានជាយូរយារមកហើយ។+
ពេលបណ្ដារាស្ត្ររបស់នាងធ្លាក់ទៅក្នុងកណ្ដាប់ដៃសត្រូវ នោះគ្មានអ្នកណាជួយនាងទេ។+
ពួកសត្រូវបានសើចចំអកឲ្យនាង ពេលឃើញនាងដួលចុះ។+
ח [ហេត]
៨ យេរូសាឡិមបានធ្វើអំពើខុសឆ្គងច្រើនក្រៃលែង។+
ហេតុនេះ នាងក្លាយជារបស់ដ៏គួរឲ្យស្អប់ខ្ពើម។
អស់អ្នកដែលធ្លាប់គោរពនាង ឥឡូវបែរជាប្រមាថមើលងាយនាងព្រោះពួកគេឃើញនាងអាក្រាត។+
នាងថ្ងូរសោកសៅ+ ហើយបែរចេញដោយអាម៉ាស់។
ט [ថេត]
៩ សំពត់របស់នាងស្មោកគ្រោកនាងមិនបានគិតដល់អនាគតរបស់នាងទេ។+
នាងដួលចុះក្នុងស្ថានភាពដ៏គួរឲ្យរន្ធត់។ គ្មានអ្នកណាមកសម្រាលទុក្ខនាងឡើយ។
ឱព្រះយេហូវ៉ា សូមមេត្តាមើលទុក្ខវេទនារបស់ខ្ញុំផងព្រោះសត្រូវបានលើកតម្កើងខ្លួនហើយ។+
י [យ៉ូដ]
១០ សត្រូវបានរឹបយកទ្រព្យមានតម្លៃទាំងអស់របស់នាង។+
នាងបានឃើញប្រជាជាតិនានាចូលក្នុងទីបរិសុទ្ធរបស់នាង+
ពួកគេជាអ្នកដែលលោកបានបង្គាប់មិនឲ្យចូលក្នុងចំណោមរាស្ត្ររបស់លោក។
כ [កាប]
១១ បណ្ដារាស្ត្ររបស់នាងកំពុងដកដង្ហើមធំ ពួកគេស្វែងរកអាហារបរិភោគ។+
ពួកគេបានឲ្យរបស់មានតម្លៃដូរយកអាហារដើម្បីរស់តទៅទៀត។
ឱព្រះយេហូវ៉ាអើយ សូមមើល! ខ្ញុំបានក្លាយជាស្ត្រី*ដែលឥតបានការ។
ל [ឡាមេត]
១២ អស់អ្នកដែលដើរកាត់ផ្លូវនេះ តើពួកអ្នកគ្មានអារម្មណ៍អ្វីសោះឬ?
ចូរមើលទៅ! តើមានអ្នកណាឈឺចាប់ដូចខ្ញុំទេ?
ព្រះយេហូវ៉ាបានធ្វើឲ្យខ្ញុំរងទុក្ខវេទនាក្នុងថ្ងៃនៃកំហឹងរបស់លោក។+
מ [មេម]
១៣ លោកបានចាត់ភ្លើងពីស្ថានសួគ៌ឲ្យមកឆេះឆ្អឹង+ទាំងអស់របស់ខ្ញុំ។
លោកលាតសំណាញ់សម្រាប់ទាក់ជើងខ្ញុំ។ លោកបង្ខំខ្ញុំឲ្យត្រឡប់ទៅវិញ។
លោកបានធ្វើឲ្យខ្ញុំក្លាយជាស្ត្រីដែលគេបោះបង់ចោល។
ខ្ញុំឈឺពេញមួយថ្ងៃ។
נ [នុន]
១៤ ការរំលងរបស់ខ្ញុំប្រៀបដូចជានឹម លោកបានចងដោយដៃរបស់លោកផ្ទាល់។
រួចលោកដាក់នឹមនោះលើ កខ្ញុំ ហើយកម្លាំងរបស់ខ្ញុំក៏ខ្សោះអស់ទៅ។
ព្រះយេហូវ៉ាបានប្រគល់ខ្ញុំទៅក្នុងកណ្ដាប់ដៃរបស់ពួកអ្នកដែលខ្ញុំមិនអាចតស៊ូបាន។+
ס [សាមេក]
១៥ ព្រះយេហូវ៉ាបានកម្ចាយពួកបុរសខ្លាំងក្លារបស់ខ្ញុំឲ្យចេញអស់ពីខ្ញុំ។+
លោកបានកោះហៅក្រុមមនុស្សឲ្យមកប្រហារពួកយុវជនរបស់ខ្ញុំ។+
ព្រះយេហូវ៉ាបានជញ្ជ្រំកូនក្រមុំបរិសុទ្ធនៃយូដា* គឺលោកជញ្ជ្រំពួកនាងនៅកន្លែងសម្រាប់ជាន់ផ្លែទំពាំងបាយជូរយកទឹកធ្វើស្រា។+
ע [អាយីន]
១៦ ខ្ញុំយំដោយសារអ្វីៗទាំងនេះ+ ទឹកភ្នែកខ្ញុំហូរសស្រាក់។
ព្រោះមនុស្សដែលអាចសម្រាលទុក្ខខ្ញុំ ឬអាចផ្ដល់កម្លាំងដល់ខ្ញុំ ក៏នៅឆ្ងាយពីខ្ញុំ។
កូនប្រុសៗរបស់ខ្ញុំអស់សង្ឃឹម ដោយសារតែសត្រូវបានវាយឈ្នះ។
פ [ភេ]
១៧ ស៊ីយ៉ូនបានលាតដៃទៅ+ តែគ្មានអ្នកណាម្នាក់សម្រាលទុក្ខនាងទេ។
ព្រះយេហូវ៉ាបានបង្គាប់សត្រូវទាំងអស់ដែលនៅជុំវិញយ៉ាកុបឲ្យវាយប្រហារគាត់។+
យេរូសាឡិមបានក្លាយទៅជាអ្វីដែលគួរឲ្យស្អប់ខ្ពើមចំពោះពួកគេ។+
צ [សាដេ]
១៨ ព្រះយេហូវ៉ាធ្វើដូច្នោះគឺសុចរិត+ ដោយសារខ្ញុំមិនបានធ្វើតាមបង្គាប់លោក។+
ជនជាតិទាំងឡាយអើយ ចូរស្ដាប់ ហើយមើលការឈឺចាប់របស់ខ្ញុំផង។
ពួកស្ត្រីវ័យក្មេង*និងពួកយុវជនរបស់ខ្ញុំបានត្រូវចាប់យកទៅធ្វើជាឈ្លើយហើយ។+
ק [ឃូហ្វ]
១៩ ខ្ញុំបានស្រែករកគូស្នេហ៍របស់ខ្ញុំ តែពួកគេបានក្បត់ខ្ញុំ។+
ពួកសង្ឃនិងពួកបុរសចាស់ទុំរបស់ខ្ញុំបានស្លាប់នៅក្នុងក្រុងអំឡុងពេលដែលពួកគេស្វែងរកអាហារដើម្បីរស់តទៅទៀត។+
ר [រ៉េស]
២០ ឱព្រះយេហូវ៉ា សូមមេត្តាមើលចុះ ខ្ញុំរងទុក្ខពន់ពេកក្រៃ។
ក្នុងខ្លួនខ្ញុំ*រមួលនៅមិនសុខ។
ចិត្តខ្ញុំសែនឈឺរកថ្លែងពុំបាន ព្រោះខ្ញុំពិតជាបានបះបោរប្រឆាំងយ៉ាងខ្លាំង។+
នៅខាងក្រៅផ្ទះមានដាវចាំសម្លាប់+ ឯនៅខាងក្នុងផ្ទះក៏មានសេចក្ដីស្លាប់ដែរ។
ש [ស៊ីន]
២១ មនុស្សបានឮខ្ញុំដកដង្ហើមធំ តែគ្មានអ្នកណាមកសម្រាលទុក្ខខ្ញុំទេ។
សត្រូវទាំងអស់បានឮអំពីអន្តរាយរបស់ខ្ញុំ។
ពួកគេសប្បាយចិត្តខ្លាំងណាស់ ដោយសារលោកនាំឲ្យខ្ញុំជួបរឿងបែបនេះ។+
ប៉ុន្តែ គង់មានថ្ងៃមួយដែលលោកនឹងធ្វើចំពោះពួកគេដូចដែលលោកបានប្រកាសទុក។+ នៅថ្ងៃនោះពួកគេនឹងបានដូចជាខ្ញុំ។+
ת [ថាវ]
២២ សូមលោកមើលទង្វើអាក្រក់ទាំងអស់របស់ពួកគេ ហើយសូមលោកដាក់ទោសពួកគេយ៉ាងធ្ងន់+ដូចដែលលោកបានធ្វើចំពោះខ្ញុំ ដោយសារការរំលងទាំងអស់របស់ខ្ញុំ។
ខ្ញុំដកដង្ហើមធំច្រើនដង ហើយចិត្តរបស់ខ្ញុំឈឺផ្សាខ្លាំងណាស់។
កំណត់សម្គាល់
^ ជំពូកទី១-៤ ជាបទទំនួញឬជាកំណាព្យដែលផ្ដើមដោយតួអក្សរហេប្រឺ
^ ឬ«ស្រីក្រមុំបរិសុទ្ធ»
^ សព្វថ្ងៃនេះហៅថាហ៊្សេរុយសាឡិម
^ នេះសំដៅលើយេរូសាឡិម
^ នេះសំដៅលើស្រុកយូដា
^ ឬ«ស្រីក្រមុំបរិសុទ្ធ»
^ ន័យត្រង់«ពោះវៀនខ្ញុំ»