ប្រវត្តិហេតុទី២ ៣:១-១៧
៣ បន្ទាប់មក សាឡូម៉ូនចាប់ផ្ដើមសាងសង់វិហារជូនព្រះយេហូវ៉ា+នៅក្រុងយេរូសាឡិមលើភ្នំម៉ូរីយ៉ា+ ជាកន្លែងដែលព្រះយេហូវ៉ាបានលេចមកជួបដាវីឌជាឪពុកគាត់+ គឺកន្លែងដែលដាវីឌបានរៀបចំទុកនៅទីលានបញ្ជាន់ស្រូវរបស់អូណាន+ជាជនជាតិយេប៊ូស។
២ គាត់បានចាប់ផ្ដើមសង់វិហារនៅថ្ងៃទី២ ខែទី២ ក្នុងឆ្នាំទី៤នៃរាជ្យរបស់គាត់។
៣ គាត់បានសង់វិហាររបស់ព្រះពិតនៅលើគ្រឹះដែលមានបណ្ដោយ៦០ហត្ថ ទទឹង២០ហត្ថ+ តាមខ្នាតប្រវែងចាស់។*
៤ សាលដែលនៅជាប់ខាងមុខវិហារមានបណ្ដោយ២០ហត្ថ ស្មើប្រវែងទទឹងវិហារ ហើយមានកម្ពស់១២០។* នៅផ្នែកខាងក្នុងសាល គាត់បានស្រោបដោយមាសសុទ្ធ។+
៥ គាត់ស្រោបវិហារដោយក្ដារយូនីពើ ហើយពីលើក្ដារនោះគាត់ស្រោបដោយមាសសុទ្ធ។+ បន្ទាប់មក គាត់ឆ្លាក់ក្បាច់ដើមលម៉ើ+និងលម្អដោយខ្សែច្រវាក់មាស។+
៦ បន្ថែមទៀត គាត់បានដាំត្បូងមានតម្លៃ+នៅក្នុងវិហារ។ ឯមាស+ដែលគាត់បានប្រើនោះ គេបានយកមកពីស្រុកផាវែម។
៧ គាត់បានស្រោបវិហារដោយមាស រួមទាំងធ្នឹម ជញ្ជាំង ទ្វារ និងក្ដារកំណល់ទ្វារ។+ គាត់ក៏បានឆ្លាក់រូបចេរូប៊ីននៅលើជញ្ជាំងទាំងនោះដែរ។+
៨ គាត់បានធ្វើបន្ទប់បរិសុទ្ធបំផុត+ ដែលមានបណ្ដោយស្មើនឹងទទឹងវិហារគឺ២០ហត្ថ ហើយក៏មានទទឹង២០ហត្ថដែរ។ គាត់ស្រោបបន្ទប់នោះដោយមាសសុទ្ធ៦០០ថាលិន។*+
៩ ឯទម្ងន់មាសដែលប្រើសម្រាប់ធ្វើដែកគោល គឺ៥០ហ្សេគិល។* ចំណែកបន្ទប់ខាងលើវិញ ក៏បានត្រូវស្រោបដោយមាសដែរ។
១០ បន្ទាប់មក គាត់បានធ្វើរូបចេរូប៊ីនពីរ សម្រាប់ដាក់នៅក្នុងបន្ទប់បរិសុទ្ធបំផុត ហើយគាត់ស្រោបចេរូប៊ីនទាំងនោះដោយមាស។+
១១ ប្រវែងស្លាបរបស់ចេរូប៊ីនទាំងពីរ+ គឺ២០ហត្ថ។ ស្លាបម្ខាងរបស់ចេរូប៊ីនទី១មានប្រវែងប្រាំហត្ថ ហើយចុងស្លាបម្ខាងរបស់ចេរូប៊ីននោះទល់នឹងជញ្ជាំង។ ឯស្លាបម្ខាងទៀតក៏មានប្រវែងប្រាំហត្ថដែរ ហើយចុងស្លាបចេរូប៊ីននោះទល់នឹងចុងស្លាបម្ខាងទៀតរបស់ចេរូប៊ីនទី២។
១២ ស្លាបម្ខាងរបស់ចេរូប៊ីនទី២មានប្រវែងប្រាំហត្ថ ហើយចុងស្លាបម្ខាងរបស់ចេរូប៊ីននោះទល់នឹងជញ្ជាំង។ ឯស្លាបម្ខាងទៀតក៏មានប្រវែងប្រាំហត្ថដែរ ហើយចុងស្លាបចេរូប៊ីននោះទល់នឹងចុងស្លាបម្ខាងទៀតរបស់ចេរូប៊ីនទី១។
១៣ រូបចេរូប៊ីនទាំងពីរឈរត្រដាងស្លាប ដែលមានប្រវែងសរុប២០ហត្ថ ហើយមុខចេរូប៊ីនទាំងនោះបែរទៅបន្ទប់បរិសុទ្ធ។
១៤ គាត់ក៏ធ្វើវាំងនន+ពីក្រណាត់ពណ៌ខៀវ ពណ៌ស្វាយ ពណ៌ក្រហម និងពីក្រណាត់សាច់ល្អ ហើយប៉ាក់រូបចេរូប៊ីននៅលើវាំងនននោះ។+
១៥ បន្ទាប់មក គាត់ក៏ធ្វើសសរស្ពាន់ពីរ+សម្រាប់ដាក់បញ្ឈរនៅមុខវិហារ។ សសរនីមួយៗមានប្រវែង៣៥ហត្ថ ហើយក្បាលសសរនីមួយៗមានប្រវែងប្រាំហត្ថ។+
១៦ គាត់បានធ្វើកម្រងច្រវាក់ដាក់លើក្បាលសសរ ហើយធ្វើផ្លែទទឹម១០០ ដាក់លើកម្រងច្រវាក់នោះ។
១៧ គាត់បានដាក់បញ្ឈរសសរទាំងពីរនៅមុខវិហារ។ មួយនៅខាងស្ដាំដៃ* គាត់ឲ្យឈ្មោះថាយ៉ាគីន* មួយនៅខាងឆ្វេងដៃ* គាត់ឲ្យឈ្មោះថាបូអូស។*
កំណត់សម្គាល់
^ តាមធម្មតាមួយហត្ថស្មើនឹង៤៤,៥សង់ទីម៉ែត្រ។ ប៉ុន្តែ អ្នកខ្លះគិតថា«ខ្នាតប្រវែងនៅសម័យមុន» សំដៅលើមួយហត្ថវែង ដែលស្មើនឹង៥១,៨សង់ទីម៉ែត្រ។ មើលសេចក្ដីពន្យល់បន្ថែម ផ្នែកខ១៤
^ ខ្នាតប្រវែងមិនប្រាកដ
^ មួយថាលិនស្មើនឹង៣៤,២គីឡូក្រាម។ មើលសេចក្ដីពន្យល់បន្ថែម ផ្នែកខ១៤
^ មួយហ្សេគិលស្មើនឹង១១,៤ក្រាម។ មើលសេចក្ដីពន្យល់បន្ថែម ផ្នែកខ១៤
^ ឬ«ទិសខាងត្បូង»
^ មានន័យថា«សូមឲ្យព្រះយេហូវ៉ាតាំងឡើងយ៉ាងមាំ»
^ ឬ«ទិសខាងជើង»
^ ប្រហែលជាមានន័យថា«ដោយកម្លាំងខ្លាំងក្លា»
