យេរេមា ២៦:១-២៤
២៦ នៅដើមរាជ្យយេហូយ៉ាគីម+ជាកូនយ៉ូសៀសដែលជាស្ដេចស្រុកយូដា មានពាក្យមកពីព្រះយេហូវ៉ាដូចតទៅ៖
២ «ព្រះយេហូវ៉ាមានប្រសាសន៍ថា៖ ‹ចូរទៅឈរនៅឯទីធ្លាក្នុងបរិវេណវិហារព្រះយេហូវ៉ា ហើយប្រកាសប្រាប់បណ្ដាជនដែលរស់នៅក្នុងក្រុងទាំងឡាយក្នុងទឹកដីយូដា ជាពួកអ្នកដែលមកគោរពប្រណិប័តន៍ខ្ញុំជាយេហូវ៉ានៅឯវិហារ។ អ្នកត្រូវប្រាប់ពួកគេតាមពាក្យទាំងអស់ដែលខ្ញុំបានបង្គាប់ កុំឲ្យបាត់មួយម៉ាត់ឡើយ។
៣ ប្រហែលជាពួកគេនឹងស្ដាប់ ហើយបែរចេញពីផ្លូវទុច្ចរិតរបស់ខ្លួនក៏មិនដឹង។ បើពួកគេធ្វើដូច្នោះមែន នោះខ្ញុំនឹងប្រែគំនិតមិនធ្វើឲ្យមានសេចក្ដីវេទនាធ្លាក់ទៅលើពួកគេដោយសារតែអំពើអាក្រក់របស់ពួកគេឡើយ។+
៤ ចូរប្រាប់ពួកគេថា៖ «ព្រះយេហូវ៉ាមានប្រសាសន៍ដូច្នេះថា៖ ‹បើអ្នករាល់គ្នាមិនព្រមស្ដាប់ខ្ញុំ ហើយកាន់តាមច្បាប់*ដែលខ្ញុំបានដាក់នៅមុខអ្នករាល់គ្នា
៥ ហើយមិនព្រមស្ដាប់ពាក្យរបស់ពួកអ្នកប្រកាសទំនាយជាអ្នកបម្រើខ្ញុំ ដែលខ្ញុំបានចាត់ឲ្យទៅឯអ្នករាល់គ្នាម្ដងហើយម្ដងទៀតទេ+
៦ នោះខ្ញុំនឹងធ្វើឲ្យវិហារនេះទៅដូចជាស៊ីឡូរដែរ+ ហើយខ្ញុំនឹងបំផ្លាញក្រុងនេះ ហើយប្រជាជាតិនានានៅផែនដីនឹងយកក្រុងនេះសម្រាប់ដាក់បណ្ដាសា›»›»។+
៧ ឯពួកសង្ឃ ពួកអ្នកប្រកាសទំនាយ និងបណ្ដាជនទាំងអស់ ពួកគេក៏បានឮពាក្យសម្ដីរបស់យេរេមានៅក្នុងវិហារព្រះយេហូវ៉ាដែរ។+
៨ ដូច្នេះ ក្រោយពីយេរេមាប្រកាសតាមបង្គាប់ទាំងអស់របស់ព្រះយេហូវ៉ារួច នោះពួកសង្ឃ ពួកអ្នកប្រកាសទំនាយ និងបណ្ដាជនទាំងអស់ បានមកចាប់គាត់ ហើយនិយាយថា៖ «អ្នកឯងនឹងស្លាប់ជាមិនខាន!
៩ ហេតុអ្វីក៏អ្នកឯងប្រកាសទំនាយក្នុងនាមព្រះយេហូវ៉ាថា៖ ‹វិហារនេះនឹងទៅដូចជាស៊ីឡូរ ហើយក្រុងនេះនឹងត្រូវបំផ្លាញចោល គ្មានមនុស្សរស់នៅទៀត›ដូច្នេះ?»។ ពេលនោះ បណ្ដាជនទាំងអស់បានមកចោមរោមយេរេមានៅក្នុងបរិវេណវិហារព្រះយេហូវ៉ា។
១០ ពេលពួកអ្នកគ្រប់គ្រងបានឮពាក្យទាំងនោះ ពួកគេក៏បានចេញពីវិមានស្ដេចមកឯវិហារព្រះយេហូវ៉ា រួចអង្គុយនៅខ្លោងទ្វារថ្មីនៃវិហារព្រះយេហូវ៉ា។+
១១ បន្ទាប់មក ពួកសង្ឃនិងពួកអ្នកប្រកាសទំនាយបាននិយាយទៅកាន់ពួកអ្នកគ្រប់គ្រង និងបណ្ដាជនទាំងអស់ថា៖ «បុរសនេះសមនឹងស្លាប់+ ព្រោះគាត់បានប្រកាសទំនាយទាស់នឹងក្រុងនេះ ដូចអ្នករាល់គ្នាបានឮផ្ទាល់ត្រចៀកហើយ»។+
១២ រួចមក យេរេមាបាននិយាយទៅកាន់ពួកអ្នកគ្រប់គ្រង និងបណ្ដាជនទាំងអស់ថា៖ «គឺព្រះយេហូវ៉ាទេដែលបានចាត់ខ្ញុំឲ្យមកប្រកាសទំនាយទាស់នឹងវិហារនិងក្រុងនេះ។ ខ្ញុំនិយាយពាក្យទាំងនោះតាមបង្គាប់លោកទេ។+
១៣ ដូច្នេះ ចូរកែខ្លួនហើយឈប់ប្រព្រឹត្តអាក្រក់តទៅទៀត។ ចូរស្ដាប់បង្គាប់ព្រះយេហូវ៉ាជាព្រះរបស់អ្នករាល់គ្នាទៅ នោះព្រះយេហូវ៉ានឹងប្រែគំនិតមិនធ្វើឲ្យមានសេចក្ដីវេទនាធ្លាក់មកលើអ្នករាល់គ្នាដូចលោកមានប្រសាសន៍ទេ។+
១៤ ចំណែកខ្ញុំវិញ ខ្ញុំនៅក្នុងកណ្ដាប់ដៃអ្នករាល់គ្នាហើយ។ ចូរប្រព្រឹត្តដល់ខ្ញុំតាមដែលអ្នករាល់គ្នាយល់ថាល្អនិងត្រឹមត្រូវចុះ។
១៥ ប៉ុន្តែ ចូរចាំថាបើអ្នករាល់គ្នាសម្លាប់ខ្ញុំ នោះអ្នករាល់គ្នានឹងនាំឲ្យខ្លួននិងក្រុងនេះ ព្រមទាំងពួកអ្នកក្រុង មានទោសចំពោះឈាមរបស់ជនស្លូតត្រង់ហើយ ព្រោះតាមពិតគឺព្រះយេហូវ៉ាទេដែលបានចាត់ខ្ញុំឲ្យមកប្រកាសពាក្យទាំងនេះដល់អ្នករាល់គ្នា»។
១៦ បន្ទាប់មក ពួកអ្នកគ្រប់គ្រងនិងបណ្ដាជនទាំងអស់បាននិយាយទៅកាន់ពួកសង្ឃនិងពួកអ្នកប្រកាសទំនាយថា៖ «បុរសនេះមិនសមនឹងស្លាប់ទេ ព្រោះគាត់ប្រកាសប្រាប់យើងក្នុងនាមព្រះយេហូវ៉ាជាព្រះនៃយើង»។
១៧ បន្ថែមទៀត ពួកបុរសចាស់ទុំខ្លះបានក្រោកឡើង ហើយនិយាយទៅកាន់ពួកជំនុំទាំងមូលថា៖
១៨ «នៅគ្រាហេសេគា+ជាស្ដេចស្រុកយូដា មីកា+ជាអ្នកក្រុងម៉ូរ៉ាស៊ីតក៏ធ្លាប់ប្រកាសទំនាយដល់អ្នកស្រុកយូដាដែរថា៖ ‹ព្រះយេហូវ៉ានៃបណ្ដាកងទ័ពស្ថានសួគ៌មានប្រសាសន៍ថា៖
«ស៊ីយ៉ូននឹងត្រូវភ្ជួររាស់ដូចជាវាលស្រែក្រុងយេរូសាឡិមនឹងទៅជាគំនរបាក់បែក+ឯភ្នំដែលមានវិហារព្រះនឹងទៅដូចជាទីខ្ពស់នៅក្នុងព្រៃ»›។+
១៩ «តើស្ដេចហេសេគានិងអ្នកស្រុកយូដាបានសម្លាប់មីកាឬ? ស្ដេចហេសេគាបានកោតខ្លាចព្រះយេហូវ៉ា ហើយអង្វរសុំក្ដីមេត្តាពីព្រះយេហូវ៉ា មែនទេ? ម្ល៉ោះហើយ ព្រះយេហូវ៉ាបានប្រែគំនិតមិនធ្វើឲ្យមានសេចក្ដីវេទនាធ្លាក់លើពួកគេដូចដែលលោកមានប្រសាសន៍ទេ។+ មើល! យើងហៀបនឹងនាំអន្តរាយដ៏ធំធ្លាក់មកលើខ្លួនហើយ។
២០ «ហើយក៏មានបុរសម្នាក់ទៀត បានប្រកាសទំនាយក្នុងនាមព្រះយេហូវ៉ាដែរ គឺយូរ៉ាយ៉ាជាកូនសិមម៉ាយ៉ាដែលជាអ្នកក្រុងគារីអាតយារីម។+ គាត់បានប្រកាសទំនាយទាស់នឹងក្រុងនេះនិងទឹកដីនេះ ដូចយេរេមាបានប្រកាសដែរ។
២១ ឯស្ដេចយេហូយ៉ាគីម+ និងពួកទាហានខ្លាំងក្លារបស់គាត់ ព្រមទាំងពួកអ្នកគ្រប់គ្រង ពួកគេក៏បានឮសេចក្ដីប្រកាសរបស់យូរ៉ាយ៉ាដែរ។ ដូច្នេះ ស្ដេចយេហូយ៉ាគីមប៉ុនប៉ងសម្លាប់គាត់។+ ពេលយូរ៉ាយ៉ាឮរឿងនោះ គាត់ភ័យខ្លាចជាខ្លាំង ហើយក៏រត់គេចខ្លួនទៅស្រុកអេហ្ស៊ីប។
២២ បន្ទាប់មក ស្ដេចយេហូយ៉ាគីមបានចាត់អេលណាថាន+ជាកូនអាកបូរ និងបុរសមួយចំនួនឲ្យទៅចាប់យូរ៉ាយ៉ាពីស្រុកអេហ្ស៊ីប។
២៣ ក្រោយមក ពួកគេបាននាំគាត់ពីស្រុកអេហ្ស៊ីប មកប្រគល់ឲ្យស្ដេចយេហូយ៉ាគីម ហើយស្ដេចបានសម្លាប់គាត់ដោយដាវ+ រួចបោះសាកសពគាត់ទៅក្នុងផ្នូររបស់ជនសាមញ្ញ»។
២៤ ប៉ុន្តែ អាហាយខាម+ជាកូនសាផាន+ គាត់បានការពារយេរេមា ដើម្បីកុំឲ្យគេប្រគល់គាត់ទៅឲ្យបណ្ដាជនសម្លាប់។+
កំណត់សម្គាល់
^ ឬ«ការណែនាំ»
