រូថ ៣:១-១៨
៣ នៅថ្ងៃមួយ ណាអូមីជាម្ដាយក្មេកនិយាយទៅរូថថា៖ «កូនស្រីអើយ ម្ដាយនឹងរកបុរសម្នាក់ឲ្យរៀបការជាមួយនឹងកូន+ ដើម្បីកូនអាចមានទីពឹងពំនាក់។*
២ បូអូសជាសាច់ញាតិរបស់យើង។+ គាត់ជាអ្នកដែលបានឲ្យកូនធ្វើការជាមួយនឹងពួកនារីៗរបស់គាត់។ យប់នេះ គាត់នឹងទៅរោយស្រូវបាលីនៅទីលានបញ្ជាន់ស្រូវ។
៣ ដូច្នេះ ចូរកូនទៅជម្រះកាយ ហើយលាបប្រេងក្រអូប រួចស្លៀកពាក់ចេញទៅទីលានបញ្ជាន់ស្រូវចុះ។ ប៉ុន្តែ កូនមិនត្រូវឲ្យគាត់ឃើញឡើយ ចាំរហូតដល់គាត់ពិសាអាហារពិសាស្រាហើយ។
៤ ពេលគាត់ចូលដេក កូនត្រូវចំណាំកន្លែងដែលគាត់ដេក។ បន្ទាប់មក ចូរកូនទៅកន្លែងនោះ ហើយបើកក្រណាត់ដែលដណ្ដប់ជើងគាត់ ហើយដេកនៅទីនោះចុះ។ គាត់នឹងប្រាប់កូននូវអ្វីដែលកូនគួរធ្វើ»។
៥ រូថតបវិញថា៖ «កូននឹងធ្វើតាមសម្ដីទាំងអស់ដែលអ្នកម្ដាយប្រាប់កូន»។
៦ ម្ល៉ោះហើយ រូថចេញទៅទីលានបញ្ជាន់ស្រូវ ហើយធ្វើតាមពាក្យសម្ដីទាំងអស់របស់ម្ដាយក្មេក។
៧ ក្រោយពីបូអូសពិសាអាហារពិសាស្រាដោយចិត្តសប្បាយរីករាយហើយ គាត់បានចូលទៅដេកនៅក្បែរគំនរស្រូវ។ ពេលនោះរូថដើរលបៗចូលទៅជិត ហើយបើកក្រណាត់ដែលដណ្ដប់ជើងគាត់ រួចដេកនៅទីនោះ។
៨ លុះដល់ពាក់កណ្ដាលអធ្រាត្រ បូអូសភ្ញាក់ឡើងទាំងញ័រខ្លួន ហើយងើបមកឃើញស្ត្រីម្នាក់កំពុងដេកនៅចុងជើងគាត់។
៩ គាត់សួរថា៖ «តើអ្នកជានរណា?»។ នាងឆ្លើយថា៖ «ខ្ញុំគឺរូថជាអ្នកបម្រើលោក។ សូមឲ្យខ្ញុំដណ្ដប់ក្រណាត់របស់លោកផង ព្រោះលោកជាអ្នកមានសិទ្ធិលោះ»។+
១០ ឮដូច្នោះ បូអូសនិយាយថា៖ «កូនស្រីអើយ សូមព្រះយេហូវ៉ាឲ្យពរនាង។ លើកនេះនាងបានបង្ហាញសេចក្ដីស្រឡាញ់ដ៏ស្មោះត្រង់ ខ្លាំងជាងលើកមុនទៅទៀត+ ព្រោះនាងមិនបានទៅរកបុរសក្មេងៗ ទោះជាបុរសនោះជាអ្នកក្រឬជាអ្នកមានក៏ដោយ។
១១ ដូច្នេះ កូនស្រីអើយ កុំភ័យព្រួយឡើយ! ខ្ញុំនឹងធ្វើតាមសម្ដីទាំងអស់របស់នាង+ ដោយសារគ្រប់គ្នាក្នុងក្រុងនេះដឹងថានាងជាស្ត្រីល្អប្រសើរម្នាក់។
១២ ពិតមែនតែខ្ញុំជាអ្នកមានសិទ្ធិលោះ+ តែមានអ្នកមានសិទ្ធិលោះម្នាក់ទៀតដែលជាសាច់ញាតិជិតជាងខ្ញុំ។+
១៣ យប់នេះ សូមនាងដេកនៅទីនេះសិន។ ព្រឹកស្អែក ខ្ញុំនឹងទៅជួបគាត់ ហើយបើគាត់ចង់លោះនាង សូមឲ្យគាត់លោះនាងចុះ។+ ប៉ុន្តែ បើគាត់មិនចង់លោះនាងទេ ខ្ញុំសូមស្បថដោយនូវនាមព្រះយេហូវ៉ាជាព្រះដែលមានជីវិតរស់នៅថា ខ្ញុំនឹងលោះនាងដោយផ្ទាល់។ ឥឡូវ សូមនាងដេកនៅទីនេះរហូតដល់ព្រឹកចុះ»។
១៤ ម្ល៉ោះហើយ រូថក៏ដេកនៅចុងជើងគាត់រហូតដល់ព្រឹក។ នាងបានក្រោកឡើងពេលមេឃទៀបភ្លឺ មុនមនុស្សឯទៀតមើលមុខគ្នាស្គាល់។ រួចបូអូសពោលថា៖ «មិនត្រូវឲ្យអ្នកណាដឹងថាមានស្ត្រីចូលមកទីលានបញ្ជាន់ស្រូវឡើយ»។
១៥ គាត់និយាយថែមទៀតថា៖ «សូមត្រដាងអាវក្រៅរបស់នាងមក ហើយកាន់ឲ្យជាប់»។ ដូច្នេះ នាងក៏ត្រដាងអាវរបស់នាង រួចគាត់ដាក់ស្រូវបាលី៦រង្វាល់*ក្នុងអាវនោះឲ្យនាងយកទៅ។ ក្រោយមក គាត់ធ្វើដំណើរចូលទៅក្រុង។
១៦ ពេលរូថត្រឡប់ទៅជួបម្ដាយក្មេកវិញ ម្ដាយសួរនាងថា៖ «តើយ៉ាងដូចម្ដេចហើយកូនស្រី?»។ រូថក៏រៀបរាប់ប្រាប់ម្ដាយនូវអ្វីទាំងអស់ដែលបូអូសបានធ្វើដើម្បីនាង។
១៧ នាងបន្ថែមថា៖ «គាត់បានឲ្យស្រូវបាលី៦រង្វាល់នេះមកខ្ញុំ ដោយនិយាយថា៖ ‹សូមកុំទៅឯម្ដាយក្មេកនាងវិញដោយដៃទទេឡើយ›»។
១៨ រួចមក ណាអូមីនិយាយថា៖ «ចូរកូនរង់ចាំសិន ទាល់តែដឹងថារឿងនេះទៅជាយ៉ាងណា។ បូអូសនឹងមិននៅស្ងៀមទេ លុះត្រាតែគាត់ចាត់ការគ្រប់យ៉ាងឲ្យបានរៀបរយនៅថ្ងៃនេះ»។
កំណត់សម្គាល់
^ ន័យត្រង់«មានទីសម្រាក»
^ ប្រហែលជា៦សៀ ឬប្រហែលជា៤៤លីត្រ។ មើលសេចក្ដីពន្យល់បន្ថែម ផ្នែកខ១៤
