សៀវភៅលូកា ៥:១-៣៩
៥ នៅគ្រាមួយ បណ្ដាជនកំពុងស្ដាប់លោកយេស៊ូបង្រៀនបណ្ដាំរបស់ព្រះនៅក្បែរបឹងកេណិសារ៉ែត។* ពេលនោះ បណ្ដាជនខំប្រជ្រៀតគ្នាចូលទៅជិតលោក។+
២ ខណៈនោះ លោកឃើញទូកនេសាទពីរចតនៅមាត់បឹង តែពួកអ្នកនេសាទបានឡើងពីទូកទៅលាងអួនរបស់ពួកគេ។+
៣ លោកក៏ចុះក្នុងទូកមួយរបស់ស៊ីម៉ូន ហើយសុំគាត់ឲ្យចេញទូកទៅឆ្ងាយបន្តិចពីមាត់បឹង។ រួចលោកអង្គុយចុះ ហើយចាប់ផ្ដើមបង្រៀនបណ្ដាជនពីក្នុងទូកនោះ។
៤ លុះបង្រៀនរួចហើយ លោកក៏ប្រាប់ស៊ីម៉ូនថា៖ «ចូរទៅកន្លែងដែលមានទឹកជ្រៅ ហើយទម្លាក់អួននៅទីនោះ»។
៥ ក៏ប៉ុន្តែ ស៊ីម៉ូនតបវិញថា៖ «លោកគ្រូ យើងបានខំប្រឹងអស់មួយយប់ តែចាប់មិនបានអ្វីសោះ។+ ប៉ុន្តែ ខ្ញុំនឹងទម្លាក់អួនតាមប្រសាសន៍លោក»។
៦ ពេលទម្លាក់អួនតាមប្រសាសន៍លោក ពួកគេចាប់បានត្រីច្រើនសន្ធឹកណាស់ រហូតដល់អួនរបស់ពួកគេចាប់ផ្ដើមធ្លាយ។+
៧ ដូច្នេះ ពួកគេធ្វើសញ្ញាឲ្យដៃគូរបស់ពួកគេដែលនៅក្នុងទូកផ្សេងទៀតមកជួយ។ អ្នកទាំងនោះក៏មក រួចពួកគេដាក់ត្រីពេញទូកទាំងពីរ គឺត្រីច្រើនដល់ម្ល៉េះបានជាទូកហៀបនឹងលិច។
៨ ឃើញដូច្នេះ ស៊ីម៉ូនពេត្រុសលុតជង្គង់នៅមុខលោកយេស៊ូ ហើយនិយាយថា៖ «លោកម្ចាស់ សូមចេញពីខ្ញុំទៅ ពីព្រោះខ្ញុំជាមនុស្សមានភាពខុសឆ្គង»។
៩ ព្រោះក្រោយពីចាប់បានត្រីច្រើនដូច្នេះ ស៊ីម៉ូនពេត្រុសនិងអស់អ្នកដែលនៅជាមួយនឹងគាត់ បាននឹកអស្ចារ្យក្នុងចិត្តក្រៃលែង
១០ ហើយកូនប្រុសពីរនាក់របស់សេបេដេ គឺយ៉ាកុបនិងយ៉ូហាន+ដែលជាដៃគូរបស់ស៊ីម៉ូន ក៏នឹកអស្ចារ្យដែរ។ ប៉ុន្តែ លោកយេស៊ូមានប្រសាសន៍ទៅស៊ីម៉ូនថា៖ «កុំខ្លាចឡើយ។ ចាប់តាំងពីឥឡូវនេះទៅ អ្នកនឹងនេសាទមនុស្សវិញ»។+
១១ ដូច្នេះ ពួកគេបានអុំទូកមកដីគោកវិញ រួចទុកអ្វីៗទាំងអស់ចោល ហើយទៅតាមលោក។+
១២ នៅគ្រាមួយផ្សេងទៀត ពេលលោកនៅក្រុងមួយ មើល! មានបុរសម្នាក់កើតឃ្លង់ពេញខ្លួន! កាលដែលបុរសនោះឃើញលោកយេស៊ូ គាត់ក៏ទៅជិត រួចក្រាបគោរពលោក ហើយអង្វរថា៖ «លោកម្ចាស់ បើលោកចង់ធ្វើឲ្យខ្ញុំជាស្អាត លោកអាចធ្វើបាន»។+
១៣ ដូច្នេះ លោកក៏លូកដៃទៅពាល់គាត់ ហើយពោលថា៖ «ខ្ញុំចង់ធ្វើឲ្យអ្នកជាស្អាតមែន! សូមឲ្យជាស្អាតចុះ»។ រំពេចនោះ ជំងឺឃ្លង់បានបាត់ពីខ្លួនគាត់ទៅ។+
១៤ រួចមក លោកបង្គាប់បុរសនោះកុំឲ្យប្រាប់អ្នកណាឲ្យសោះ ហើយលោកបានប្រាប់ទៀតថា៖ «ដោយសារអ្នកបានជាស្អាត ចូរទៅបង្ហាញខ្លួនដល់ពួកសង្ឃ ហើយជូនគ្រឿងបូជាដូចដែលច្បាប់ម៉ូសេបានបង្គាប់+ ដើម្បីឲ្យពួកសង្ឃអាចឃើញថាអ្នកបានជាស្អាតហើយ»។+
១៥ ប៉ុន្តែ ដំណឹងនោះបានឮសុសសាយ រួចមនុស្សបានមូលគ្នាជាក្រុមធំៗ មកស្ដាប់លោក ហើយសុំលោកធ្វើឲ្យពួកគេជាសះស្បើយពីជំងឺ។+
១៦ ទោះជាយ៉ាងនោះក៏ដោយ ជារឿយៗ លោកទៅកន្លែងដាច់ឆ្ងាយពីគេដើម្បីអធិដ្ឋាន។
១៧ នៅថ្ងៃមួយ ពេលលោកកំពុងបង្រៀន ពួកផារិស៊ី*និងពួកអ្នកបង្រៀនច្បាប់* ដែលមកពីគ្រប់ភូមិនៃស្រុកកាលីឡេនិងតំបន់យូឌា និងពីក្រុងយេរូសាឡិម ក៏អង្គុយនៅទីនោះដែរ ហើយព្រះយេហូវ៉ា*បានឲ្យឫទ្ធានុភាពដល់លោកយេស៊ូ ដើម្បីធ្វើឲ្យមនុស្សជាសះស្បើយ។+
១៨ មើល! មានបុរសស្លាប់ដៃស្លាប់ជើងម្នាក់ដេកនៅលើគ្រែស្នែង ហើយពួកអ្នកដែលសែងគាត់ កំពុងរកផ្លូវនាំគាត់ចូលទៅក្នុងផ្ទះនោះ ដើម្បីដាក់គាត់នៅមុខលោកយេស៊ូ។+
១៩ ប៉ុន្តែ ដោយសារមានមនុស្សច្រើនកកកុញ ពួកគេមិនអាចរកផ្លូវនាំបុរសនោះចូលទៅក្នុងបានឡើយ។ ដូច្នេះ ពួកគេក៏ឡើងទៅលើដំបូល រួចបើកក្បឿង ហើយសម្រូតគាត់លើគ្រែស្នែង ចុះនៅខាងមុខលោកយេស៊ូតែម្ដង។
២០ ពេលលោកឃើញជំនឿរបស់ពួកគេ លោកមានប្រសាសន៍ទៅបុរសស្លាប់ដៃស្លាប់ជើងថា៖ «ការខុសឆ្គងរបស់អ្នកបានត្រូវអភ័យទោសឲ្យហើយ»។+
២១ ឮដូច្នេះ ពួកអ្នកជំនាញខាងច្បាប់និងពួកផារិស៊ីចាប់ផ្ដើមរិះគិតក្នុងចិត្តថា៖ «តើអ្នកដែលកំពុងនិយាយប្រមាថព្រះនេះជាអ្នកណា? ក្រៅពីព្រះ តើអ្នកណាអាចអភ័យទោសចំពោះការខុសឆ្គងបាន?»។+
២២ ប៉ុន្តែ លោកយេស៊ូបានជ្រាបអំពីអ្វីដែលពួកគេកំពុងរិះគិត។ លោកក៏សួរថា៖ «ហេតុអ្វីអ្នករាល់គ្នារិះគិតបែបនេះ?
២៣ តើមួយណាស្រួលជាង? និយាយថា៖ ‹ការខុសឆ្គងរបស់អ្នកបានត្រូវអភ័យទោសឲ្យហើយ› ឬនិយាយថា៖ ‹ចូរងើបឡើង ហើយដើរទៅចុះ›។
២៤ ក៏ប៉ុន្តែ ខ្ញុំចង់ឲ្យអ្នករាល់គ្នាដឹងថា កូនមនុស្សមានអំណាចនៅផែនដីដើម្បីអភ័យទោសចំពោះការខុសឆ្គង»។ រួចលោកមានប្រសាសន៍ទៅកាន់បុរសស្លាប់ដៃស្លាប់ជើងថា៖ «ខ្ញុំប្រាប់អ្នកថា ចូរងើបឡើង យកគ្រែស្នែងរបស់អ្នក ហើយទៅផ្ទះចុះ»។+
២៥ រំពេចនោះ គាត់ក៏ងើបឡើងនៅមុខពួកគេ ហើយយកគ្រែស្នែងរបស់គាត់ត្រឡប់ទៅផ្ទះវិញ ព្រមទាំងសរសើរតម្កើងព្រះ។
២៦ បណ្ដាជនគ្រប់គ្នារំភើបចិត្តក្រៃលែង ក៏ចាប់ផ្ដើមសរសើរតម្កើងព្រះ ហើយពួកគេបានកោតស្ងើចជាខ្លាំង ដោយនិយាយថា៖ «ថ្ងៃនេះ យើងបានឃើញការអស្ចារ្យណាស់!»។
២៧ បន្ទាប់ពីនេះ លោកបានចេញទៅ ហើយឃើញអ្នកយកពន្ធម្នាក់ឈ្មោះលេវី កំពុងអង្គុយនៅកន្លែងយកពន្ធ។ លោកមានប្រសាសន៍ទៅគាត់ថា៖ «ចូរមកតាមខ្ញុំ»។*+
២៨ ឮដូច្នេះ លេវីក៏ទុកអ្វីៗទាំងអស់ចោល ហើយក្រោកឡើងទៅតាមលោក។
២៩ រួចមក លេវីបានរៀបចំពិធីជប់លៀងដ៏ធំមួយនៅផ្ទះរបស់គាត់។ ក្នុងពិធីនោះ មានអ្នកយកពន្ធមួយក្រុមធំ និងអ្នកឯទៀតកំពុងអង្គុយរួមតុជាមួយនឹងពួកគាត់។+
៣០ ឃើញដូច្នេះ ពួកផារិស៊ីនិងពួកអ្នកជំនាញខាងច្បាប់ ចាប់ផ្ដើមរអ៊ូរទាំដាក់ពួកអ្នកកាន់តាមលោកថា៖ «ហេតុអ្វីអ្នករាល់គ្នាផឹកនិងបរិភោគជាមួយនឹងអ្នកយកពន្ធនិងអ្នកប្រព្រឹត្តអំពើខុសឆ្គងដូច្នេះ?»។+
៣១ លោកយេស៊ូតបឆ្លើយថា៖ «មនុស្សដែលមានសុខភាពល្អមិនត្រូវការគ្រូពេទ្យទេ តែអ្នកដែលឈឺ ទើបត្រូវការគ្រូពេទ្យ។+
៣២ ខ្ញុំមិនបានមកដើម្បីហៅមនុស្សសុចរិតទេ តែបានមកដើម្បីហៅអ្នកដែលប្រព្រឹត្តអំពើខុសឆ្គងឲ្យប្រែចិត្តវិញ»។+
៣៣ ពួកគេជម្រាបលោកថា៖ «ពួកអ្នកកាន់តាមយ៉ូហានតមអាហារជាញឹកញយ ថែមទាំងអធិដ្ឋានអង្វរសុំ ហើយពួកអ្នកកាន់តាមពួកផារិស៊ីក៏ធ្វើដូច្នេះដែរ។ ប៉ុន្តែ ពួកអ្នកកាន់តាមលោកបែរជាផឹកនិងបរិភោគទៅវិញ»។+
៣៤ លោកយេស៊ូមានប្រសាសន៍ទៅពួកគេថា៖ «អ្នករាល់គ្នាមិនអាចបង្ខំមិត្តភក្ដិរបស់កូនកំលោះឲ្យតមអាហារទេ ដរាបណាកូនកំលោះនៅជាមួយនឹងពួកគេ មែនទេ?
៣៥ ក៏ប៉ុន្តែ នឹងមានគ្រាមកដល់ ពេលដែលកូនកំលោះ+នឹងត្រូវគេពង្រាត់ចេញពីមិត្តភក្ដិ ហើយនៅគ្រានោះពួកគេនឹងតមអាហារ»។+
៣៦ លោកក៏លើកឧទាហរណ៍មួយទៀតថា៖ «គ្មានអ្នកណាកាត់ក្រណាត់ពីសម្លៀកបំពាក់ថ្មី យកមកប៉ះសម្លៀកបំពាក់ចាស់ទេ។ បើធ្វើដូច្នេះ ក្រណាត់ថ្មីនឹងធ្វើឲ្យសម្លៀកបំពាក់ចាស់រហែក ហើយក្រណាត់ថ្មីនោះក៏មិនសមនឹងសម្លៀកបំពាក់ចាស់ដែរ។+
៣៧ ម្យ៉ាងទៀត គ្មានអ្នកណាយកស្រាថ្មីមកដាក់ក្នុងថង់ស្បែកចាស់ទេ។ បើធ្វើដូច្នោះ ថង់ស្បែកនឹងធ្លាយ ស្រាក៏ហូរចេញអស់ ហើយថង់ស្បែកក៏ត្រូវខូចដែរ។
៣៨ ផ្ទុយទៅវិញ គេដាក់ស្រាថ្មីក្នុងថង់ស្បែកថ្មី។
៣៩ អ្នកណាដែលពិសាស្រាចាស់ មិនដែលចង់ពិសាស្រាថ្មីឡើយ ព្រោះអ្នកនោះនិយាយថា៖ ‹ស្រាចាស់មានគុណភាពល្អជាង›»។
កំណត់សម្គាល់
^ នេះសំដៅលើសមុទ្រកាលីឡេ
^ នេះសំដៅលើច្បាប់ដែលព្រះបានឲ្យជនជាតិអ៊ីស្រាអែលតាមរយៈម៉ូសេ
^ ផារិស៊ីគឺជានិកាយដ៏ធំមួយនៃសាសនាយូដានៅសតវត្សរ៍ទី១ គ.ស.
^ ក្នុងខនេះ ពាក្យថា«មកតាមខ្ញុំ»សំដៅលើការក្លាយជាអ្នកកាន់តាមលោកយេស៊ូ
