សៀវភៅសាំយូអែលទី១ ២៨:១-២៥
-
សុលទៅជួបគ្រូខាបនៅក្រុងអេនដោ (១-២៥)
២៨ នៅគ្រានោះ ពួកភីលីស្ទីនប្រមូលពលទ័ពដើម្បីធ្វើសង្គ្រាមនឹងពួកអ៊ីស្រាអែល។+ ដូច្នេះ អាគីសនិយាយទៅដាវីឌថា៖ «អ្នកនិងពួកបុរសរបស់អ្នកត្រូវចេញទៅសមរភូមិជាមួយនឹងខ្ញុំ»។+
២ ដាវីឌតបទៅអាគីសថា៖ «លោកជ្រាបច្បាស់ហើយថា យើងខ្ញុំដែលជាអ្នកបម្រើរបស់លោកនឹងធ្វើយ៉ាងណា»។ អាគីសប្រាប់ដាវីឌថា៖ «បើដូច្នោះមែន ខ្ញុំនឹងតែងតាំងអ្នកឲ្យធ្វើជាអង្គរក្សការពារខ្ញុំរហូតតទៅ»។+
៣ ចំណែកសាំយូអែល គាត់បានទទួលមរណភាព។ ឯជនជាតិអ៊ីស្រាអែលទាំងអស់បានយំសោកនឹងគាត់ ហើយពួកគេបានបញ្ចុះសពគាត់នៅក្រុងរ៉ាម៉ាជាស្រុកកំណើតរបស់គាត់។+ រីឯសុលវិញ គាត់បានបំបាត់ចោលគ្រូខាប និងគ្រូទាយចេញពីស្រុកអ៊ីស្រាអែល។+
៤ ឥឡូវ ទាហានភីលីស្ទីនបានប្រមូលផ្ដុំគ្នា រួចចេញទៅបោះទ័ពនៅក្រុងស៊ូណែម។+ ដូច្នេះ សុលក៏បានប្រមូលទាហានអ៊ីស្រាអែលទាំងអស់ទៅបោះទ័ពត្រង់ភ្នំគីលបោដែរ។+
៥ ពេលសុលឃើញជំរំទ័ពភីលីស្ទីន គាត់ភ័យញាប់ញ័រក្នុងចិត្តជាខ្លាំង។+
៦ សុលបានអធិដ្ឋានសុំជំនួយពីព្រះយេហូវ៉ា+ តែព្រះយេហូវ៉ាមិនឆ្លើយតបនឹងគាត់សោះ ទោះជាតាមរយៈសុបិន តាមរយៈយូរីម*+ ឬតាមរយៈអ្នកប្រកាសទំនាយក្ដី។
៧ នៅទីបំផុត គាត់បង្គាប់ពួកអ្នកបម្រើថា៖ «ចូរទៅរកស្ត្រីម្នាក់ដែលចេះខាប+ រួចខ្ញុំនឹងទៅជួបនាង»។ ពួកអ្នកបម្រើតបទៅសុលថា៖ «នៅក្រុងអេនដោ មានស្ត្រីម្នាក់ជាគ្រូខាប»។+
៨ ម្ល៉ោះហើយ សុលបានក្លែងខ្លួនដោយស្លៀកសម្លៀកបំពាក់ធម្មតា ហើយចេញទៅជួបស្ត្រីនោះនៅពេលយប់ជាមួយនឹងអ្នកបម្រើពីរនាក់។ សុលនិយាយទៅនាងថា៖ «ខ្ញុំចង់ដឹងអំពីអនាគត ដូច្នេះសូមនាងប្រើវិជ្ជាខាបរបស់នាង+ ហៅបុគ្គលម្នាក់ដែលខ្ញុំនឹងប្រាប់នាង»។
៩ ក៏ប៉ុន្តែ ស្ត្រីនោះនិយាយទៅគាត់ថា៖ «អ្នកច្បាស់ជាដឹងនូវអ្វីដែលសុលបានធ្វើហើយ។ គាត់បានបំបាត់ចោលគ្រូខាប និងគ្រូទាយចេញពីស្រុកអ៊ីស្រាអែល។+ ចុះហេតុអ្វីអ្នកប៉ុនប៉ងដាក់អន្ទាក់ខ្ញុំឲ្យត្រូវស្លាប់ដូច្នេះ?»។+
១០ ឮនាងនិយាយដូចនោះ សុលស្បថឲ្យនាងដោយនូវនាមព្រះយេហូវ៉ាថា៖ «ខ្ញុំស្បថដោយនូវនាមព្រះយេហូវ៉ាជាព្រះដ៏មានជីវិតរស់នៅថា នាងនឹងគ្មានទោសក្នុងរឿងនេះឡើយ!»។
១១ ដូច្នេះ នាងក៏សួរថា៖ «តើចង់ឲ្យខ្ញុំខាបអ្នកណាមកឲ្យអ្នក?»។ សុលឆ្លើយថា៖ «សូមខាបសាំយូអែលមកឲ្យខ្ញុំ»។
១២ ពេលស្ត្រីនោះឃើញ«សាំយូអែល»*+ នាងស្រែកឡើងយ៉ាងខ្លាំង ហើយនិយាយទៅសុលថា៖ «ហេតុអ្វីលោកបោកបញ្ឆោតខ្ញុំដូច្នេះ? លោកជាសុល!»។
១៣ ស្ដេចសុលនិយាយទៅនាងថា៖ «កុំខ្លាចឡើយ។ សូមប្រាប់ខ្ញុំ តើនាងឃើញអ្វី?»។ ស្ត្រីនោះឆ្លើយទៅសុលថា៖ «ខ្ញុំឃើញបុគ្គលម្នាក់ដូចជាព្រះមួយរូបកំពុងចេញពីដីមក»។
១៤ ភ្លាមនោះ សុលសួរនាងថា៖ «តើគាត់មានរូបរាងដូចម្ដេច?»។ នាងឆ្លើយថា៖ «គាត់ជាបុរសវ័យចាស់ម្នាក់ ចេញមកទាំងពាក់អាវវែងគ្មានដៃ»។+ សុលដឹងភ្លាមថាគាត់ជា«សាំយូអែល» ដូច្នេះសុលក៏ក្រាបមុខដល់ដីបង្ហាញការគោរព។
១៥ រួចមក «សាំយូអែល»សួរសុលថា៖ «ហេតុអ្វីបានជាអ្នករំខានខ្ញុំដោយហៅខ្ញុំមកដូច្នេះ?»។ សុលឆ្លើយថា៖ «ខ្ញុំមានទុក្ខធ្ងន់ណាស់ ពីព្រោះពួកភីលីស្ទីនជិតមកធ្វើសង្គ្រាមនឹងខ្ញុំហើយ។ ចំណែកឯព្រះវិញ លោកបានបោះបង់ចោលខ្ញុំ ហើយមិនព្រមឆ្លើយតបមកខ្ញុំសោះ ទោះជាតាមរយៈអ្នកប្រកាសទំនាយ ឬតាមរយៈសុបិនក្ដី។+ ហេតុនេះហើយបានជាខ្ញុំហៅអ្នកមកសួរថា តើខ្ញុំគួរធ្វើយ៉ាងណា?»។+
១៦ «សាំយូអែល»និយាយថា៖ «បើព្រះយេហូវ៉ាបានចាកចេញពីអ្នក+ ហើយក្លាយទៅជាសត្រូវរបស់អ្នក ចុះហេតុដូចម្ដេចបានជាអ្នកមកសុំយោបល់ពីខ្ញុំ?
១៧ ព្រះយេហូវ៉ាផ្ទាល់នឹងធ្វើតាមពាក្យដែលលោកបានប្រកាសទុកជាមុនតាមរយៈខ្ញុំថា ព្រះយេហូវ៉ានឹងដកហូតរាជាណាចក្រចេញពីដៃរបស់អ្នក រួចប្រគល់ទៅឲ្យបុរសម្នាក់ទៀត គឺដាវីឌ។+
១៨ ព្រះយេហូវ៉ាធ្វើបែបនេះចំពោះអ្នកនៅថ្ងៃនេះ ដោយសារអ្នកមិនធ្វើតាមប្រសាសន៍របស់ព្រះយេហូវ៉ា។ ម្យ៉ាងទៀត អ្នកមិនបានសម្លាប់ជនជាតិអាម៉ាលេក+ដែលបានធ្វើឲ្យលោកខឹងទេ។
១៩ ព្រះយេហូវ៉ានឹងប្រគល់អ្នកនិងជនជាតិអ៊ីស្រាអែលទៅក្នុងកណ្ដាប់ដៃពួកភីលីស្ទីន+ ហើយនៅថ្ងៃស្អែក អ្នក+និងកូនប្រុសៗរបស់អ្នក+នឹងនៅជាមួយនឹងខ្ញុំ។ ម្យ៉ាងទៀត ព្រះយេហូវ៉ានឹងប្រគល់ទាហានអ៊ីស្រាអែលទៅក្នុងកណ្ដាប់ដៃពួកភីលីស្ទីន»។+
២០ គ្រាន់តែឮសម្ដីរបស់«សាំយូអែល»ភ្លាម សុលភ័យខ្លាចយ៉ាងខ្លាំង ហើយផ្កាប់មុខដល់ដី។ សុលគ្មានកម្លាំងកំហែងក្នុងខ្លួនសោះ ព្រោះគាត់មិនបានបរិភោគអស់មួយថ្ងៃមួយយប់មកហើយ។
២១ ពេលដែលស្ត្រីជាគ្រូខាបនោះចូលមកជិតសុល នាងឃើញថាគាត់ជ្រួលច្របល់ក្នុងចិត្តជាខ្លាំង។ នាងនិយាយទៅគាត់ថា៖ «ខ្ញុំជាអ្នកបម្រើរបស់លោក បានប្រថុយជីវិត+ធ្វើតាមបង្គាប់របស់លោកហើយ។
២២ ឥឡូវ សូមលោកស្ដាប់ខ្ញុំសិន។ សូមអនុញ្ញាតឲ្យខ្ញុំធ្វើនំប៉័ងមួយដុំជូនលោកបរិភោគ ដើម្បីលោកអាចមានកម្លាំងធ្វើដំណើរទៅវិញ»។
២៣ ប៉ុន្តែ សុលបដិសេធថា៖ «ខ្ញុំមិនបរិភោគទេ»។ ទោះជាយ៉ាងណាក៏ដោយ អ្នកបម្រើពីរនាក់របស់សុលនិងស្ត្រីនោះអង្វរសុលម្ដងហើយម្ដងទៀត។ នៅទីបំផុត សុលព្រមស្ដាប់ពួកគេ គាត់ក្រោកពីដីមកអង្គុយនៅលើគ្រែ។
២៤ ស្ត្រីនោះមានកូនគោធាត់មួយ ដូច្នេះនាងប្រញាប់យកវាមកសម្លាប់។ រួចនាងយកម្សៅមកច្របាច់ ហើយដុតធ្វើជានំប៉័ងឥតដំបែ។
២៥ ក្រោយពីចម្អិនរួចរាល់ នាងអញ្ជើញសុលនិងអ្នកបម្រើរបស់គាត់ឲ្យបរិភោគ។ លុះបរិភោគហើយ ពួកគេចាកចេញទៅវិញនៅយប់ដដែលនោះ។+
