សុភាសិត ២:១-២២
២ កូនអើយ បើកូនទទួលយកសម្ដីរបស់ឪពុកហើយប្រមូលបង្គាប់របស់ឪពុក ទុកដូចជាទ្រព្យមានតម្លៃ+
២ បើកូនប្រុងត្រចៀកស្ដាប់ប្រាជ្ញា+ហើយផ្ចង់ចិត្តរៀនឲ្យមានសមត្ថភាពវែកញែក+
៣ បើកូនស្រែករកការយល់ដឹង+ហើយបន្លឺសំឡេងរកសមត្ថភាពវែកញែក+
៤ បើកូនសង្វាតរកអ្វីទាំងនោះដូចរកប្រាក់+ហើយបន្តព្យាយាមដូចរកកំណប់ទ្រព្យ+
៥ នោះកូននឹងបានយល់អត្ថន័យនៃការកោតខ្លាចព្រះយេហូវ៉ា+ហើយកូននឹងរកឃើញចំណេះអំពីព្រះ។+
៦ ព្រោះព្រះយេហូវ៉ាជាអ្នកផ្ដល់ប្រាជ្ញា។+
ចំណេះនិងសមត្ថភាពវែកញែកសុទ្ធតែចេញពីមាត់របស់លោក។
៧ លោកប្រមូលប្រាជ្ញាទុកសម្រាប់មនុស្សទៀងត្រង់លោកជាខែលសម្រាប់អស់អ្នកដែលដើរដោយចិត្តស្មោះឥតងាករេ។+
៨ លោកនៅមើលផ្លូវឲ្យអស់អ្នកដែលប្រព្រឹត្តដោយយុត្តិធម៌ហើយលោកនឹងការពារមាគ៌ារបស់មនុស្សដែលស្មោះត្រង់ចំពោះលោក។+
៩ យ៉ាងនេះ កូននឹងបានយល់សេចក្ដីសុចរិតនិងយុត្តិធម៌គឺកូននឹងបានស្គាល់ផ្លូវល្អសព្វគ្រប់។+
១០ ពេលប្រាជ្ញាចូលក្នុងចិត្តរបស់កូន+ហើយចំណេះធ្វើឲ្យកូនសប្បាយចិត្ត+
១១ នោះសមត្ថភាពរិះគិតនឹងរក្សាកូន+ហើយសមត្ថភាពវែកញែកនឹងឃុំគ្រងកូន
១២ ដើម្បីជួយការពារកូនកុំឲ្យដើរផ្លូវខុសនិងជួយកូនឲ្យជៀសចេញពីមនុស្សដែលនិយាយអាក្រក់+
១៣ ដើម្បីជួយកូនឲ្យរួចពីពួកអ្នកដែលលះចោលផ្លូវទៀងត្រង់ទៅរកផ្លូវងងឹត+
១៤ ដើម្បីសង្គ្រោះកូនពីពួកអ្នកដែលត្រេកអរធ្វើអំពើខុសឆ្គងពីពួកអ្នកដែលសប្បាយចិត្តប្រព្រឹត្តអំពើអាក្រក់
១៥ ពីពួកអ្នកដែលប្រព្រឹត្តវៀចវេរនិងពីពួកអ្នកដែលមានកលល្បិច។
១៦ ប្រាជ្ញានឹងជួយកូនឲ្យជៀសផុតពីស្ត្រីមិនល្អ*និងពីសម្ដីលួងលោមរបស់ស្ត្រីដែលប្រព្រឹត្តអំពើប្រាសចាកសីលធម៌។*+
១៧ នាងជាស្ត្រីដែលបោះបង់ចោលប្ដី*ដែលបានរួមរស់ជាមួយគ្នាតាំងពីនាងនៅក្មេង+ហើយនាងភ្លេចពាក្យសច្ចាដែលនាងបានធ្វើជាមួយនឹងព្រះ។
១៨ ព្រោះការទៅផ្ទះរបស់នាងដូចជាការទៅរកសេចក្ដីស្លាប់ហើយផ្លូវទៅផ្ទះរបស់នាងគឺជាផ្លូវទៅកាន់ទីបញ្ចុះសព។+
១៩ អស់អ្នកដែលបានរួមដំណេកជាមួយនឹងនាង គ្មានអ្នកណាបានត្រឡប់មកវិញឡើយហើយក៏គ្មានអ្នកណាបានមកឯផ្លូវទៅកាន់ជីវិតវិញដែរ។+
២០ ហេតុនេះ ចូរកូនដើរតាមផ្លូវរបស់មនុស្សល្អហើយបន្តដើរតាមគន្លងរបស់មនុស្សសុចរិត+
២១ ព្រោះមានតែមនុស្សទៀងត្រង់ប៉ុណ្ណោះដែលរស់នៅផែនដីជាដរាបហើយអ្នកដែលគ្មានកន្លែងបន្ទោស*នឹងអាស្រ័យនៅទីនោះជារៀងរហូត។+
២២ ចំណែកឯជនទុច្ចរិត ពួកគេនឹងត្រូវកាត់ចេញពីផែនដី+ហើយមនុស្សក្បត់នឹងត្រូវបំផ្លាញឲ្យសាបសូន្យទៅ។+
កំណត់សម្គាល់
^ ន័យត្រង់«ស្ត្រីប្លែកមុខ»។ តាមមើលទៅនេះសំដៅលើស្ត្រីដែលមិនធ្វើតាមខ្នាតតម្រាសីលធម៌របស់ព្រះ
^ ន័យត្រង់«ស្ត្រីបរទេស»។ តាមមើលទៅនេះសំដៅលើស្ត្រីដែលមិនធ្វើតាមខ្នាតតម្រាសីលធម៌របស់ព្រះ
^ ឬ«មិត្តជិតស្និទ្ធ»
^ ឬ«អ្នកដែលរក្សាចិត្តស្មោះឥតងាករេ»
