ហាបាគុក ១:១-១៧
១ ហាបាគុក*ជាអ្នកប្រកាសទំនាយបានទទួលការបើកបង្ហាញពីព្រះឲ្យឃើញក្នុងគំនិត។ គាត់ប្រកាសដូចតទៅ៖
២ ឱព្រះយេហូវ៉ាអើយ! តើឲ្យខ្ញុំស្រែកសុំលោកជួយដល់កាលណាទៅទើបលោកព្រមស្ដាប់?+
តើត្រូវឲ្យខ្ញុំសុំជំនួយដល់កាលណាទៀត ទើបលោកជួយខ្ញុំឲ្យរួចពីអំពើឃោរឃៅ?+
៣ ហេតុអ្វីបានជាលោកឲ្យខ្ញុំឃើញអំពើខុសឆ្គងយ៉ាងនេះ?
ហេតុអ្វីក៏លោកបណ្ដោយឲ្យមានការជិះជាន់សង្កត់សង្កិនដូច្នេះ?
ហេតុអ្វីមានការបំផ្លាញនិងអំពើឃោរឃៅដូចនេះ?
ហេតុអ្វីមានការឈ្លោះប្រកែកទាស់ទែងគ្នាច្រើនបែបនេះ?
៤ ច្បាប់គ្មានសុពលភាពហើយគ្មានអ្នកណាប្រកាន់យុត្តិធម៌។
ព្រោះមនុស្សទុច្ចរិតព័ទ្ធជុំវិញមនុស្សសុចរិតហេតុនេះហើយបានជាគ្មានយុត្តិធម៌ឡើយ។+
៥ «ចូរមើលប្រជាជាតិនានាដោយយកចិត្តទុកដាក់ចុះ!
ចូរសម្លឹងមើលដោយនឹកអស្ចារ្យនិងស្ញប់ស្ញែងក្នុងចិត្តព្រោះនឹងមានអ្វីមួយកើតឡើងនៅគ្រារបស់អ្នកជាអ្វីដែលអ្នកនឹងមិនជឿឡើយ ទោះជាគេប្រាប់អ្នកក៏ដោយ។+
៦ ព្រោះមើល! ខ្ញុំនឹងជំរុញចិត្តពួកខាល់ដេ+ជាប្រជាជាតិដ៏កាចសាហាវនិងមិនចេះគិតវែងឆ្ងាយ។
ពួកគេសម្រុកចូលវាតទីទឹកដីដើម្បីចាប់យកទឹកដីរបស់អ្នកឯទៀត។+
៧ ពួកគេគួរឲ្យខ្លាចខ្លាំងណាស់ពួកគេកំណត់យុត្តិធម៌ និងអំណាចគ្រប់គ្រង*ដោយខ្លួនគេផ្ទាល់។+
៨ សេះរបស់ពួកគេរត់លឿនជាងខ្លារខិនហើយសាហាវជាងឆ្កែចចកនៅពេលយប់ទៅទៀត។+
សេះចម្បាំងរបស់ពួកគេបោលសម្រុកទៅមុខគឺបោលមកពីកន្លែងឆ្ងាយ។
ពួកគេចុះមកយ៉ាងលឿនដូចឥន្ទ្រីឆាបចំណី។+
៩ ពួកគេទាំងអស់គ្នាតាំងចិត្តមកធ្វើអំពើឃោរឃៅ។+
ពួកគេតម្រៀបគ្នាដើរតម្រង់ទៅមុខ ដូចជាខ្យល់ពីទិសខាងកើត+ហើយពួកគេប្រមូលពួកឈ្លើយដូចជាប្រមូលខ្សាច់។
១០ ពួកគេចំអកឲ្យបណ្ដាស្ដេចហើយឡកឡឺយឲ្យពួកមន្ត្រីជាន់ខ្ពស់។+
ពួកគេចំអកមើលងាយកន្លែងរឹងមាំទាំងប៉ុន្មាន+ពួកគេលើកដីឡើងដើម្បីចូលវាយដណ្ដើមយកក្រុង។
១១ បន្ទាប់មក ពួកគេសម្រុកទៅមុខដូចជាខ្យល់ព្យុះ ហើយឆ្លងកាត់ស្រុកនោះប៉ុន្តែ ពួកគេនឹងមានទោស+ព្រោះពួកគេចាត់ទុកកម្លាំងរបស់ពួកគេថាមកពីព្រះរបស់ខ្លួន»។*+
១២ ឱព្រះយេហូវ៉ាអើយ! តើលោកមិនមែនជាព្រះតាំងពីយូរលង់មកហើយទេឬ?+
ឱព្រះដ៏បរិសុទ្ធរបស់ខ្ញុំអើយ! លោកមិនចេះស្លាប់ឡើយ។*+
ឱព្រះយេហូវ៉ាអើយ! លោកបានតែងតាំងពួកគេឲ្យធ្វើការវិនិច្ឆ័យ។
ឱថ្មដារបស់ខ្ញុំអើយ!+ លោកបានតែងតាំងពួកគេឲ្យដាក់ទោស។*+
១៣ ភ្នែកលោកបរិសុទ្ធក្រៃលែងមិនអាចមើលអ្វីដែលអាក្រក់ទេហើយលោកមិនអាចទ្រាំមើលអំពើទុច្ចរិតឡើយ។+
ប៉ុន្តែ ហេតុអ្វីលោកអនុញ្ញាតឲ្យមានមនុស្សក្បត់ដូច្នេះ?+
ហេតុអ្វីលោកនៅស្ងៀមពេលដែលមនុស្សទុច្ចរិតលេបត្របាក់អ្នកដែលសុចរិតជាងពួកគេ?+
១៤ ហេតុអ្វីលោកធ្វើឲ្យមនុស្សដូចជាត្រីនៅក្នុងសមុទ្រនិងដូចសត្វក្នុងសមុទ្រដែលគ្មានអ្នកគ្រប់គ្រងយ៉ាងនេះ?
១៥ អ្វីទាំងអស់នេះ គាត់*ទាញឡើងដោយផ្លែសន្ទូចគាត់ទម្លាក់អួនចាប់ពួកគេហើយប្រមូលពួកគេដោយសំណាញ់។
ហេតុនេះហើយបានជាគាត់អរសប្បាយយ៉ាងខ្លាំង។+
១៦ ម្ល៉ោះហើយ គាត់ជូនគ្រឿងបូជាដល់អួននេសាទរបស់គាត់ហើយដុតគ្រឿងបូជាឲ្យផ្សែងហុយឡើងជូនដល់សំណាញ់របស់គាត់ដោយសារអ្វីទាំងនោះគាត់មានអាហារល្អៗ និងអាហារប្រណីតៗ។
១៧ តើគាត់នឹងយកពួកគេចេញពីអួនរហូតឬ?*
តើគាត់នឹងបន្តសម្លាប់ប្រជាជាតិនានាដោយគ្មានមេត្តាឬ?+
កំណត់សម្គាល់
^ ប្រហែលជាមានន័យថា«ការឱបយ៉ាងស្និទ្ធ»
^ ឬ«កិត្តិយស»
^ ឬប្រហែលជាមានន័យថា«កម្លាំងរបស់ពួកគេគឺជាព្រះរបស់ពួកគេ»
^ ឬប្រហែលជាមានន័យថា«យើងនឹងមិនស្លាប់ឡើយ»
^ ឬ«ឲ្យប្រដៅតម្រង់»
^ នេះសំដៅលើពួកខាល់ដេជាសត្រូវ
^ ឬប្រហែលជាមានន័យថា«តើគាត់ចេះតែហូតដាវរហូតឬ?»