អេម៉ុស ៩:១-១៥
៩ ខ្ញុំបានឃើញព្រះយេហូវ៉ា+ស្ថិតនៅលើទីបូជា ហើយលោកមានប្រសាសន៍ថា៖ «ចូរវាយក្បាលសសរទៅ នោះកំណល់ទ្វារនឹងរង្គើជាមិនខាន។ ចូរកាត់ក្បាលនោះទៅ ហើយខ្ញុំនឹងប្រហារពួកអ្នកដែលនៅសល់ដោយដាវ។ គ្មានអ្នកណាម្នាក់អាចរត់រួចឡើយ សូម្បីតែខំព្យាយាមរត់គេចយ៉ាងណា ក៏គេចមិនរួចដែរ។+
២ ទោះជាពួកគេជីកចុះទៅក្នុងផ្នូរ*ក្ដី ក៏ខ្ញុំនឹងយកពួកគេចេញពីទីនោះ។
ទោះជាពួកគេឡើងទៅលើមេឃក្ដី ក៏ខ្ញុំនឹងនាំពួកគេចុះមកក្រោមវិញ។
៣ ទោះជាពួកគេលាក់ខ្លួននៅកំពូលភ្នំកើមែលក្ដីក៏ខ្ញុំនឹងរកពួកគេឃើញ ហើយចាប់ពួកគេ។+
ទោះបើពួកគេពួនខ្លួននៅបាតសមុទ្រឲ្យផុតពីភ្នែកខ្ញុំក្ដីក៏ខ្ញុំនឹងបង្គាប់ពស់ឲ្យទៅចឹកពួកគេដែរ។
៤ ទោះជាពួកគេត្រូវពួកសត្រូវចាប់យកទៅធ្វើជាឈ្លើយក្ដីក៏ខ្ញុំនឹងបង្គាប់ដាវ ឲ្យទៅប្រហារពួកគេដែរ។+
ខ្ញុំនឹងសម្លឹងមើលទៅពួកគេដោយបំណងអាក្រក់ មិនមែនបំណងល្អឡើយ។+
៥ ព្រោះព្រះយេហូវ៉ាជាម្ចាស់ដ៏ឧត្ដមបំផុត និងជាព្រះនៃបណ្ដាកងទ័ពស្ថានសួគ៌គឺលោកហើយដែលពាល់ស្រុកនោះដើម្បីឲ្យស្រុកនោះរលាយទៅ+ ហើយឲ្យអ្នកស្រុកយំកាន់ទុក្ខ។+
ស្រុកនោះនឹងឡើងដូចទន្លេនីលហើយស្រកទៅដូចទន្លេនីលក្នុងស្រុកអេហ្ស៊ីប។+
៦ ‹លោកដែលសង់ជណ្ដើរនៅលើមេឃ ហើយបង្កើតដំបូលលើផែនដីថែមទាំងប្រមូលទឹកពីសមុទ្រ ដើម្បីស្រោចស្រពទៅលើផ្ទៃផែនដី+នាមលោក គឺយេហូវ៉ា›។+
៧ ‹ឱបណ្ដាជនអ៊ីស្រាអែលអើយ! ចំពោះខ្ញុំ តើអ្នករាល់គ្នាមិនមែនដូចជាកូនចៅជនជាតិគូសទេឬ?›។ នេះជាសេចក្ដីប្រកាសរបស់ព្រះយេហូវ៉ា។
‹តើខ្ញុំមិនបាននាំពួកអ៊ីស្រាអែលចេញពីស្រុកអេហ្ស៊ីប+និងនាំពួកភីលីស្ទីនចេញពីកោះក្រេត+ ហើយនាំពួកស៊ីរីចេញពីទឹកដីគាទេឬ?›។+
៨ ‹មើល! ខ្ញុំជាយេហូវ៉ាជាម្ចាស់ដ៏ឧត្ដមបំផុតកំពុងសម្លឹងមើលរាជាណាចក្រដែលពេញទៅដោយអំពើខុសឆ្គងនោះហើយខ្ញុំនឹងបំផ្លាញរាជាណាចក្រនោះឲ្យសាបសូន្យចេញពីផែនដី។+
ប៉ុន្តែ ខ្ញុំនឹងមិនបំផ្លាញពូជពង្សយ៉ាកុបទាំងស្រុងឡើយ›។+ នេះជាសេចក្ដីប្រកាសរបស់ព្រះយេហូវ៉ា។
៩ ‹ព្រោះមើល! ខ្ញុំកំពុងចេញបញ្ជាហើយខ្ញុំនឹងរែងពូជពង្សអ៊ីស្រាអែលក្នុងចំណោមប្រជាជាតិនានា+ដូចគេរែងគ្រាប់ស្រូវនៅក្នុងកញ្ច្រែង មិនឲ្យក្រួសធ្លាក់ទៅដីឡើយ។
១០ រាស្ត្រខ្ញុំដែលជាអ្នកប្រព្រឹត្តអំពើខុសឆ្គង នឹងស្លាប់ដោយដាវគឺពួកអ្នកដែលនិយាយថា៖ «សេចក្ដីវេទនានឹងមិនធ្លាក់មកលើយើងឬមកក្បែរយើងទេ»›។
១១ ‹នៅថ្ងៃនោះ ខ្ញុំនឹងសង់ខ្ទមដាវីឌ+ដែលបានរលំឡើងវិញខ្ញុំនឹងបិទប្រហោងជញ្ជាំងហើយកន្លែងដែលបាក់បែក ខ្ញុំនឹងជួសជុលឲ្យស្អាតវិញខ្ញុំនឹងសង់វាឡើងវិញឲ្យដូចនៅគ្រាដើម+
១២ ដើម្បីឲ្យពួកគេអាចយកអ្វីជារបស់ពួកអេដំដែលនៅសេសសល់+ព្រមទាំងអ្វីជារបស់ប្រជាជាតិនានាដែលបានត្រូវហៅដោយនាមរបស់ខ្ញុំ›។ នេះជាសេចក្ដីប្រកាសរបស់ព្រះយេហូវ៉ាដែលកំពុងធ្វើការនេះ។
១៣ ព្រះយេហូវ៉ាប្រកាសថា៖ ‹មើល! ថ្ងៃនោះនឹងមកដល់គឺកាលដែលអ្នកច្រូតកំពុងប្រមូលផល អ្នកភ្ជួររាស់ក៏មកភ្ជួរហើយកាលដែលគេកំពុងសាបព្រោះ អ្នកជាន់ផ្លែទំពាំងបាយជូរក៏មកជាន់ផ្លែ។+
នៅលើភ្នំនឹងមានស្រាផ្អែមស្រក់ចុះ+ហើយនៅទីទួលនឹងមានស្រាហូរចេញមក។+
១៤ ខ្ញុំនឹងប្រមូលបណ្ដាជនអ៊ីស្រាអែលជារាស្ត្រខ្ញុំដែលជាប់ជាឈ្លើយឲ្យត្រឡប់មកវិញ+ហើយពួកគេនឹងសង់ក្រុងដែលបាក់បែកឡើងវិញ រួចរស់នៅទីនោះម្ដងទៀត។+
ពួកគេនឹងដាំចម្ការទំពាំងបាយជូរ ហើយផឹកស្រាទំពាំងបាយជូរពីចម្ការនោះ+ពួកគេនឹងដាំដំណាំ រួចបរិភោគផលផ្លែពីដំណាំនោះ›។+
១៥ ‹ខ្ញុំនឹងដាំរាស្ត្រខ្ញុំនៅលើទឹកដីរបស់ពួកគេហើយពួកគេនឹងមិនត្រូវដករំលើងចេញពីទឹកដីដែលខ្ញុំបានប្រគល់ឲ្យពួកគេម្ដងទៀតឡើយ›។+ នេះជាប្រសាសន៍របស់ព្រះយេហូវ៉ាជាព្រះនៃអ្នករាល់គ្នា»។
កំណត់សម្គាល់
^ ឬ«ហ្ស៊ីអូល»សំដៅលើផ្នូរទូទៅរបស់មនុស្សជាតិ។ មើលនិយមន័យពាក្យ«ផ្នូរ»
