ចូរចាំយាម!
ការបាញ់រះនៅសាលារៀន តើគម្ពីរចែងយ៉ាងណា?
នៅថ្ងៃទី២៤ ខែឧសភា ឆ្នាំ២០២២ មានសោកដនាកម្មមួយដ៏គួរឲ្យរន្ធត់បានកើតឡើងនៅក្រុងតូចមួយឈ្មោះយូវ៉ាឌី ក្នុងរដ្ឋតិចសាស់ សហរដ្ឋអាម៉េរិក។ យោងទៅតាមសារព័ត៌មានមួយ(The New York Times) បានរៀបរាប់ថា៖«ខ្មាន់កាំភ្លើងម្នាក់បានបាញ់សម្លាប់ក្មេងៗអស់១៩នាក់ និងគ្រូបង្រៀន២នាក់ . . . នៅសាលាបឋមសិក្សារ៉ប»។
គួរឲ្យសោកស្ដាយណាស់ ព្រឹត្តិការណ៍ដ៏គួរឲ្យតក់ស្លុតនេះបានកើតឡើងជាញឹកញយ។ សារព័ត៌មានមួយទៀត(USA Today) បានរាយការណ៍ថាគ្រាន់តែនៅសហរដ្ឋអាម៉េរិកប៉ុណ្ណោះ «មានករណីបាញ់រះអស់២៤៩ដងដែលបានកើតឡើងនៅក្នុងសាលារៀនកាលពីឆ្នាំមុន។ ចំនួននេះមានច្រើនជាងឆ្នាំណាៗទាំងអស់ បើគិតតាំងពីឆ្នាំ១៩៧០មក»។
ហេតុអ្វីព្រឹត្តិការណ៍ដ៏គួរឲ្យរន្ធត់ទាំងនេះបានកើតឡើងដូច្នេះ? តើយើងអាចធ្វើយ៉ាងណាពេលមានរឿងអាក្រក់បែបនេះ? តើមានហេតុណាមួយឲ្យយើងជឿថាអំពើឃោរឃៅនេះនឹងលែងមានទៀតឬទេ? គម្ពីរមានចម្លើយចំពោះសំណួរទាំងនេះ។
ហេតុអ្វីពិភពលោកនេះកាន់តែឃោរឃៅឡើងៗដូច្នេះ?
គម្ពីរចែងថាសម័យយើងជា«គ្រាចុងក្រោយបង្អស់» គឺជាគ្រាដែលមនុស្សជាច្រើន«គ្មានសេចក្ដីស្រឡាញ់តាមធម្មជាតិជាមនុស្ស» និងមានចិត្ត«កាចសាហាវ»។ នេះមានន័យថាពួកគេនឹងប្រព្រឹត្តឃោរឃៅព្រៃផ្សៃ។ មនុស្សបែបនោះនឹង«ប្រព្រឹត្តអាក្រក់កាន់តែខ្លាំងឡើងៗ»។ (ធីម៉ូថេទី២ ៣:១-៥, ១៣) ដើម្បីស្វែងយល់ថែមទៀត សូមអានអត្ថបទដែលមានចំណងជើងថា«តើគម្ពីរបានទាយអ្វីខ្លះអំពីរបៀបគិតគូរនិងការប្រព្រឹត្តរបស់មនុស្សនៅសព្វថ្ងៃនេះ?»។
មនុស្សជាច្រើនឆ្ងល់ថា‹ម្ដេចក៏ព្រះអនុញ្ញាតឲ្យរឿងដ៏គួរឲ្យតក់ស្លុតដូចជាការបាញ់រះនៅសាលារៀនកើតឡើងដូច្នេះ?›។ ដើម្បីស្វែងរកចម្លើយពីគម្ពីរ សូមអានអត្ថបទដែលមានចំណងជើងថា«ហេតុអ្វីបានជាមនុស្សល្អជួបរឿងអាក្រក់ដូច្នេះ?»។
តើយើងអាចធ្វើយ៉ាងណាពេលមានរឿងគួរឲ្យតក់ស្លុតបែបនេះកើតឡើង?
«អ្វីៗទាំងអស់ដែលបានត្រូវសរសេរទុកជាមុន បានត្រូវសរសេរទុកដើម្បីណែនាំយើង ដើម្បីឲ្យយើងមានសេចក្ដីសង្ឃឹម . . . និងការសម្រាលទុក្ខពីបទគម្ពីរ»។—រ៉ូម ១៥:៤
គោលការណ៍គម្ពីរអាចជួយលោកអ្នកបាន ទោះជាយើងរស់នៅក្នុងពិភពលោកដ៏ឃោរឃៅនេះក៏ដោយ។ ដើម្បីទទួលព័ត៌មានថែមទៀត សូមមើលទស្សនាវដ្ដីភ្ញាក់រឭក! ដែលមានចំណងជើងថា«តើពេលណានឹងលែងមានអំពើឃោរឃៅទៀត?»។
ដើម្បីទទួលយោបល់ខ្លះដែលឪពុកម្ដាយអាចជួយកូនៗឲ្យបំបាត់អារម្មណ៍ភ័យខ្លាចដែលមកពីការឮនិងឃើញព័ត៌មានរន្ធត់ សូមអានអត្ថបទដែលមានចំណងជើងថា«តើព័ត៌មានរន្ធត់អាចមានឥទ្ធិពលយ៉ាងណាទៅលើកូនរបស់អ្នក?»។
តើពេលណានឹងលែងមានអំពើឃោរឃៅទៀត?
«គាត់នឹងរំដោះពួកគេឲ្យរួចផុតពីការសង្កត់សង្កិននិងអំពើឃោរឃៅ»។—ចម្រៀងសរសើរព្រះ ៧២:១៤
«ពួកគេនឹងដំដាវធ្វើជាផាលនង្គ័ល ហើយដំលំពែងធ្វើជាដង្កាវវិញ។ ប្រជាជាតិមួយនឹងមិនលើកដាវច្បាំងនឹងប្រជាជាតិមួយទៀតឡើយ ហើយពួកគេក៏មិនរៀនធ្វើសឹកសង្គ្រាមទៀតដែរ»។—មីកា ៤:៣
ព្រះនឹងសម្រេចអ្វីដែលមនុស្សជាតិមិនអាចធ្វើបាន។ រាជាណាចក្ររបស់លោកដែលនៅស្ថានសួគ៌ នឹងបំផ្លាញគ្រឿងអាវុធទាំងអស់ ហើយនឹងបំបាត់ចោលអំពើឃោរឃៅ។ ដើម្បីរៀនថែមទៀតអំពីអ្វីដែលរាជាណាចក្ររបស់ព្រះនឹងសម្រេច សូមអានអត្ថបទដែលមានចំណងជើងថា«ក្រោមរាជាណាចក្រព្រះ‹នឹងមានសេចក្ដីសុខជាបរិបូរ›»។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើខ្ញុំអាចរកពាក្យដែលសម្រាលទុក្ខខ្ញុំក្នុងគម្ពីរបានទេ?
គម្ពីរអាចសម្រាលទុក្ខមនុស្សជាច្រើនដែលកំពុងជួបនឹងវិបត្តិផ្លូវចិត្តនិងស្ថានភាពពិបាក។
ការពន្យល់ខគម្ពីរ
ការពន្យល់ខគម្ពីរ ចម្រៀងសរសើរព្រះ ២៣:៤ «ទោះជាខ្ញុំដើរក្នុងជ្រលងងងឹតសូន្យសុងក៏ដោយ»។
ទោះជារាស្ត្ររបស់ព្រះកំពុងជួបការពិបាកបំផុតប្រៀបដូចជាភាពងងឹតសូន្យសុងក្ដី តើតាមរបៀបណាពួកគេបានទទួលការថែរក្សានិងការពារពីលោក?
សេចក្ដីបង្រៀនសំខាន់ៗក្នុងគម្ពីរ
ហេតុអ្វីព្រះអនុញ្ញាតឲ្យមានទុក្ខវេទនា?
មនុស្សជាច្រើនឆ្ងល់ថាហេតុអ្វីពិភពលោកនេះពោរពេញដោយការស្អប់គ្នានិងទុក្ខវេទនាច្រើនម៉្លេះ។ គម្ពីរមានចម្លើយដែលធ្វើឲ្យលោកអ្នកអស់ចម្ងល់ ហើយក៏សម្រាលទុក្ខផងដែរ។
