ចូរចាំយាម!
ការផ្ទុះអំពើហិង្សាខាងនយោបាយ តើគម្ពីរចែងយ៉ាងណា?
ថ្មីៗមានអំពើហិង្សាទាក់ទងនឹងនយោបាយកាន់តែច្រើន។ ហេតុនេះ មនុស្សនៅទូទាំងពិភពលោកមានការព្រួយបារម្ភជាខ្លាំង។
នៅប្រទេសម៉ិកស៊ិក អ្នកឈរឈ្មោះខាងនយោបាយ៣៩រូប បានត្រូវគេធ្វើឃាត ហើយរឿងបែបនេះមានកាន់តែច្រើនជាងពេលមុនៗទៅទៀត។ មិនត្រឹមតែប៉ុណ្ណោះ អំពើហិង្សាដែលទាក់ទងនឹងនយោបាយក៏មានច្រើនដែរ។ នេះបានធ្វើឲ្យប្រជាជនភ័យតក់ស្លុត និងបំបែរអារម្មណ៍ពីការបោះឆ្នោត សម្រាប់ឆ្នាំ២០២៣-២០២៤។
ថ្មីៗនេះនៅអឺរ៉ុប មានហេតុការណ៍ហិង្សាជាច្រើនដែលទាក់ទងនឹងនយោបាយ រួមមានការប៉ុនប៉ងសម្លាប់នាយករដ្ឋមន្ត្រីស្លូវ៉ាគីដែលបានកើតឡើងកាលពីថ្ងៃទី១៥ ខែឧសភា ឆ្នាំ២០២៤។
រីឯនៅសហរដ្ឋអាម៉េរិកវិញ ក៏មានរឿងដ៏កក្រើកមួយបានកើតឡើងដែរ គឺនៅថ្ងៃទី១៣ ខែកក្កដា ឆ្នាំ២០២៤ អតីតប្រធានាធិបតីដូណាល់ ត្រាំ បានត្រូវគេប៉ុនប៉ងធ្វើឃាត។
ហេតុអ្វីមានអំពើហិង្សាដែលទាក់ទងនឹងនយោបាយច្រើនម្ល៉េះ? តើនោះអាចមានទីបញ្ចប់ទេ? តើគម្ពីរចែងយ៉ាងណា?
ការបែកបាក់គ្នាខាងនយោបាយបានត្រូវប្រកាសទុកជាមុន
គម្ពីរបានប្រកាសទុកជាមុនអំពីគ្រារបស់យើងដែលជា«គ្រាចុងក្រោយបង្អស់»ថា មនុស្សជាច្រើននឹងមានរបៀបគិតគូរដែលបណ្ដាលឲ្យខ្វែងគំនិតគ្នានិងអំពើហិង្សា។
«នៅគ្រាចុងក្រោយបង្អស់នឹងលំបាកខ្លាំងណាស់។ ព្រោះមនុស្សនឹង . . . រមិលគុណ គ្មានភក្ដីភាព . . . មិនព្រមស្រុះស្រួលគ្នា . . . កាចសាហាវ . . . ជាអ្នកក្បត់ ធ្វើតាមទំនើងចិត្ត មានមោទនភាពហួសហេតុពេក»។—ធីម៉ូថេទី២ ៣:១-៤
បន្ថែមទៅទៀត គម្ពីរបានប្រកាសទុកជាមុនថាអំឡុងគ្រានេះមានការចលាចល ដូចជាប្រជាជនបះបោរប្រឆាំងនឹងរដ្ឋាភិបាលនិងមានការវឹកវរខាងនយោបាយជាដើម។ (លូកា ២១:៩) ប៉ុន្តែ អំពើហិង្សានិងការបាក់បែកគ្នាខាងនយោបាយនឹងមិនមានរហូតទេ។
ទីបញ្ចប់នៃអំពើហិង្សាខាងនយោបាយ
គម្ពីររៀបរាប់ថា ព្រះនឹងឲ្យរដ្ឋាភិបាលរបស់លោកដែលនៅស្ថានសួគ៌គ្រប់គ្រងជំនួសរដ្ឋាភិបាលទាំងអស់វិញ។
«ព្រះនៃស្ថានសួគ៌នឹងតាំងរាជាណាចក្រមួយឡើងដែល . . . នឹងបំបាក់បំបែក ថែមទាំងកម្ទេចរាជាណាចក្រ[ឯទៀត]ទាំងអស់នោះឲ្យសាបសូន្យទៅ ហើយមានតែរាជាណាចក្រនេះប៉ុណ្ណោះនឹងស្ថិតស្ថេរជារៀងរហូត»។—ដានីយ៉ែល ២:៤៤
រាជាណាចក្រព្រះនឹងធ្វើឲ្យមនុស្សមានសាមគ្គីភាព ហើយធ្វើឲ្យមានសន្តិភាពពេញពិភពលោក។
អ្នកដែលគ្រប់គ្រងរាជាណាចក្រនេះ គឺលោកយេស៊ូគ្រិស្ត។ លោកបានត្រូវហៅថា«ម្ចាស់នៃសេចក្ដីសុខសាន្ត» ហើយលោកនឹងធ្វើឲ្យ«មានសេចក្ដីសុខសាន្តជានិច្ច»។—អេសាយ ៩:៦, ៧
សូម្បីតែឥឡូវ អ្នកដែលរស់នៅក្រោមរាជាណាចក្រនោះកំពុងរៀនអំពីរបៀបរស់នៅដោយសន្តិភាពជាមួយគ្នា។ ហេតុនេះហើយ គម្ពីរចែងថា៖«ពួកគេនឹងយកដាវរបស់ខ្លួន ដំធ្វើជាផាលនង្គ័ល ហើយយកលំពែង ដំធ្វើជាដង្កាវវិញ។ ប្រជាជាតិមួយនឹងមិនលើកដាវច្បាំងនឹងប្រជាជាតិមួយទៀតឡើយ ហើយក៏មិនរៀនធ្វើសង្គ្រាមទៀតដែរ»។—អេសាយ ២:៣, ៤
ដើម្បីរៀនថែមទៀត សូមអានអត្ថបទដែលមានចំណងជើងថា«តើរាជាណាចក្ររបស់ព្រះនឹងសម្រេចអ្វីខ្លះ?» និងទស្សនាវីដេអូតើរាជាណាចក្ររបស់ព្រះជាអ្វី?