ចូរចាំយាម!
ការបាញ់ប្រហារដ៏រន្ធត់មានពាសពេញពិភពលោក តើគម្ពីរចែងយ៉ាងណា?
ក្នុងអំឡុងខែកក្កដា ឆ្នាំ២០២២ មានករណីបាញ់ប្រហារដ៏គួរឲ្យរន្ធត់បានកើតឡើងនៅទូទាំងពិភពលោក ដូចជា៖
នៅថ្ងៃទី១០ ខែកក្កដា ឆ្នាំ២០២២ សារព័ត៌មានមួយបានចុះផ្សាយថា៖«មានឃាតកម្មមួយបានកើតឡើងទៅលើអ្នកនយោបាយដ៏ល្បីម្នាក់នៅក្នុងប្រទេសជប៉ុនគឺអតីតនាយករដ្ឋមន្ត្រីជប៉ុនស៊ីនហ្សូ អាបេ។ ព្រឹត្តិការណ៍នេះបានធ្វើឲ្យកក្រើកប្រទេសជប៉ុននិងពិភពលោកទាំងមូល នេះគឺដោយសារនៅប្រទេសជប៉ុនមិនសូវមានបទឧក្រិដ្ឋសាហាវឃោរឃៅប៉ុន្មានទេ ហើយនៅទីនោះច្បាប់ក្នុងការប្រើប្រាស់អាវុធក៏មានការរឹតបន្ដឹងដែរ»(The Japan Times)។
កាលពីថ្ងៃទី៤ ខែកក្កដា ឆ្នាំ២០២២ សារព័ត៌មានទាន់ហេតុការណ៍មួយបានផ្សាយថា៖«ប្រជាជនដាណឺម៉ាកបានភ្ញាក់ផ្អើលយ៉ាងខ្លាំង ពេលដែលខ្មាន់កាំភ្លើងម្នាក់បានបាញ់សម្លាប់មនុស្សអស់បីនាក់នៅផ្សារទំនើបមួយក្នុងក្រុងកូប៉ិនហាក»(Reuters)។
នៅថ្ងៃទី១០ ខែកក្កដា ឆ្នាំ២០២២ សារព័ត៌មានមួយទៀតបានចុះផ្សាយថា៖«នៅអាហ្វ្រិកខាងត្បូង បុរសមួយក្រុមបានបាញ់រះនៅក្នុងក្លិបរាត្រីមួយក្នុងក្រុងសូវីតូ ដែលបណ្ដាលឲ្យមនុស្ស១៥នាក់ស្លាប់»(The Guardian)។
កាលពីថ្ងៃទី៥ ខែកក្កដា ឆ្នាំ២០២២ កម្មវិធីព័ត៌មានមួយបានផ្សាយថា៖«នាថ្ងៃទី៤ ខែកក្កដាជាថ្ងៃបុណ្យជាតិនៅសហរដ្ឋអាម៉េរិក មានការបាញ់រះដ៏សាហាវបានកើតឡើង ដែលបណ្ដាលឲ្យមនុស្សជាង២២០នាក់បានស្លាប់»(CBS News)។
ហេតុអ្វីយើងជឿថាអំពើឃោរឃៅនឹងលែងមានទៀត? តើគម្ពីរចែងយ៉ាងណា?
អំពើឃោរឃៅនឹងលែងមានទៀត
គម្ពីររៀបរាប់ថា យើងកំពុងរស់នៅ«គ្រាចុងក្រោយបង្អស់» ជាគ្រាដែលមនុស្សប្រព្រឹត្តសាហាវឃោរឃៅ ព្រៃផ្សៃ និងគ្មានមេត្តា។ (ធីម៉ូថេទី២ ៣:១, ៣) ដោយសារអំពើឃោរឃៅបែបនេះ នាំឲ្យមនុស្សរស់នៅដោយភាពភ័យខ្លាច។ (លូកា ២១:១១) ប៉ុន្តែ គម្ពីរសន្យាថាមានគ្រាមួយដែលអំពើឃោរឃៅនឹងលែងមានទៀត ហើយមនុស្ស«នឹងរស់នៅកន្លែងដែលមានសន្តិភាព ហើយអាស្រ័យនៅកន្លែងដែលមានសុវត្ថិភាពនិងសេចក្តីសុខសាន្ត»។ (អេសាយ ៣២:១៨) តើតាមរបៀបណាអំពើឃោរឃៅនឹងលែងមានទៀត?
ព្រះនឹងដកមនុស្សអាក្រក់ ហើយបំផ្លាញចោលគ្រឿងអាវុធទាំងអស់។
«ចំណែកឯជនទុច្ចរិត ពួកគេនឹងត្រូវកាត់ចេញពីផែនដី»។—សុភាសិត ២:២២
«[ព្រះ]នឹងធ្វើឲ្យផែនដីទាំងមូលលែងមានសង្គ្រាមទៀត លោកបំបាក់ធ្នូ ហើយកម្ទេចលំពែង លោកដុតរទេះចម្បាំងចោលទាំងអស់»។—ចម្រៀងសរសើរព្រះ ៤៦:៩
ព្រះនឹងបំបាត់ចោលនូវដើមហេតុដែលនាំឲ្យមានអំពើឃោរឃៅ ដោយបង្រៀនមនុស្សឲ្យរស់នៅជាមួយគ្នាដោយសុខសាន្ត។
«ពួកវានឹងមិនធ្វើទុក្ខ ឬបង្កគ្រោះថ្នាក់អ្វីនៅលើភ្នំបរិសុទ្ធរបស់ខ្ញុំឡើយ ព្រោះផែនដីនឹងពេញទៅដោយចំណេះរបស់ព្រះយេហូវ៉ា ដូចជាទឹកពេញពាសសមុទ្រដែរ»។—អេសាយ ១១:៩
សូម្បីតែនៅសព្វថ្ងៃនេះ ព្រះកំពុងបង្រៀនមនុស្សនៅទូទាំងពិភពលោកឲ្យឈប់ប្រព្រឹត្តអំពើឃោរឃៅទៀត ហើយក៏ឈប់ប្រើគ្រឿងអាវុធទៀតដែរ។ លោកបង្រៀនពួកគេឲ្យ«ដំដាវធ្វើជាផាលនង្គ័ល ហើយដំលំពែងធ្វើជាដង្កាវវិញ»។—មីកា ៤:៣
ដើម្បីរៀនថែមទៀតអំពីសេចក្ដីសន្យារបស់ព្រះដែលថាពិភពលោកនឹងលែងមានការភ័យខ្លាចទៀត សូមអានអត្ថបទដែលមានចំណងជើងថា«តើពេលណាយើងអាចរស់នៅដោយមិនភ័យខ្លាច?»។
ដើម្បីស្វែងយល់ថែមទៀតថាពេលណាអំពើឃោរឃៅនឹងលែងមានជារៀងរហូត សូមអានអត្ថបទដែលមានចំណងជើងថា«សេចក្ដីសុខសាន្តនៅផែនដីនឹងមានជារៀងរហូត!»។
លោកអ្នកក៏ប្រហែលជាចូលចិត្តដែរ
សេចក្ដីបង្រៀនសំខាន់ៗក្នុងគម្ពីរ
ហេតុអ្វីព្រះអនុញ្ញាតឲ្យមានទុក្ខវេទនា?
មនុស្សជាច្រើនឆ្ងល់ថាហេតុអ្វីពិភពលោកនេះពោរពេញដោយការស្អប់គ្នានិងទុក្ខវេទនាច្រើនម៉្លេះ។ គម្ពីរមានចម្លើយដែលធ្វើឲ្យលោកអ្នកអស់ចម្ងល់ ហើយក៏សម្រាលទុក្ខផងដែរ។
