តើគម្ពីរចែងយ៉ាងណាអំពីកង្វះធនធានទឹកនៅទូទាំងពិភពលោក?
យើងទាំងអស់គ្នាត្រូវការទឹកស្អាតដើម្បីរស់។ ប៉ុន្តែ អគ្គលេខាធិការនៃអង្គការសហប្រជាជាតិ លោកអង់តូនីញ៉ូ គុថេរិស បានព្រមានថា៖«យើងកំពុងប្រឈមនឹងកង្វះធនធានទឹក ដោយសារពិភពលោកទាំងមូលត្រូវការទឹកកាន់តែច្រើនឡើងៗ»។ មនុស្សរាប់ពាន់លាននាក់នៅទូទាំងពិភពលោក កំពុងខ្វះទឹកស្អាតសម្រាប់ប្រើប្រាស់។
Strdel/AFP via Getty Images
តើយើងនឹងមានធនធានទឹកគ្រប់គ្រាន់សម្រាប់មនុស្សទាំងអស់ឬទេ? តើយើងត្រូវតែដោះស្រាយកង្វះធនធានទឹករហូតឬ? តើគម្ពីរចែងយ៉ាងណា?
តើគម្ពីរសន្យាយ៉ាងណាអំពីធនធានទឹក?
គម្ពីរចែងថានឹងមានគ្រាមួយដែលកង្វះធនធានទឹកនឹងលែងមានទៀត។ ផ្ទុយទៅវិញ នឹងមានទឹកស្អាតជាបរិបូរ។
«ឯតំបន់ស្ងាត់ជ្រងំនឹងមានទឹកផុសឡើង ហើយតំបន់វាលទំនាបនឹងមានផ្លូវទឹកហូរខ្វាត់ខ្វែង។ ដីដែលហួតហែងនឹងក្លាយទៅជាបឹង ដីដែលប្រេះក្រហែងនឹងប្រែទៅជាប្រភពទឹក»។—អេសាយ ៣៥:៦, ៧
ហេតុអ្វីយើងអាចជឿសេចក្ដីសន្យានេះ? សូមពិចារណាអ្វីដែលគម្ពីរចែងអំពីលក្ខណៈពិសេសមួយនៃផែនដីដែលបានត្រូវគ្រោងបង្កើត។
តើគម្ពីរចែងយ៉ាងណាអំពីផែនដីនិងវដ្ដទឹក?
«[ព្រះ]មិនបានបង្កើតផែនដីឲ្យនៅទទេនោះទេ តែបានបង្កើតផែនដីជាទីអាស្រ័យនៅវិញ»។—អេសាយ ៤៥:១៨
ដោយសារព្រះបានបង្កើតផែនដីសម្រាប់ទ្រទ្រង់ជីវិត នោះលោកបានរៀបចំដំណើរការក្នុងធម្មជាតិដើម្បីបង្កើតឲ្យមានធនធានទឹកជាបរិបូរ។
«[ព្រះ]បង្ហួតទឹកឡើងទៅលើ ឲ្យកើតជាចំហាយ ហើយក្លាយទៅជាកំណក រួចទៅជាតំណក់ទឹក។ រួចពពកបង្អុរភ្លៀងចុះមកស្រោចស្រពលើមនុស្សគ្រប់ប្រាណ»។—យ៉ូប ៣៦:២៧, ២៨
បើនិយាយឲ្យស្រួលយល់ ពាក្យនេះពណ៌នាអំពីការគ្រោងបង្កើតរបស់ព្រះសម្រាប់ដំណើរការក្នុងធម្មជាតិ វដ្ដទឹក និងប្រព័ន្ធផ្គត់ផ្គង់ទឹក។ ទឹកបានហួតពីផ្ទៃដីនិងពីសមុទ្រ ប្រមូលផ្ដុំជាពពក រួចធ្លាក់ចុះជាទឹកភ្លៀង។ នេះគឺជាការផ្គត់ផ្គង់ធនធានទឹកស្អាតដល់មនុស្សនិងសត្វ។—អ្នកទូន្មាន ១:៧; អេម៉ុស ៥:៨
«នោះខ្ញុំនឹងធ្វើឲ្យមានភ្លៀងធ្លាក់តាមរដូវ ហើយដីនឹងបង្កើតផលជាបរិបូរ ព្រមទាំងដើមឈើនៅក្នុងស្រុកនោះនឹងមានផ្លែយ៉ាងច្រើន»។—ច្បាប់លេវី ២៦:៤
ព្រះបានសន្យាឲ្យពរដល់ជនជាតិអ៊ីស្រាអែលពីបុរាណក្នុងការធ្វើកសិកម្ម។ លោកផ្គត់ផ្គង់ធនធានទឹកជាទៀងទាត់ដល់ពួកគេ ដើម្បីឲ្យពួកគេប្រមូលបានភោគផលជាច្រើន។ លោកដឹងថាដើម្បីឲ្យដំណាំលូតលាស់ល្អ គឺត្រូវការទឹកភ្លៀងគ្រប់គ្រាន់និងនៅពេលត្រឹមត្រូវ។
អ្វីដែលព្រះបានធ្វើសម្រាប់ជនជាតិអ៊ីស្រាអែលសម័យបុរាណ លោកក៏នឹងធ្វើសម្រាប់ផែនដីទាំងមូលនៅថ្ងៃអនាគតឆាប់ៗខាងមុខដែរ។ (អេសាយ ៣០:២៣) ប៉ុន្តែ ដំណាលគ្នានោះ នៅកន្លែងជាច្រើនក្នុងពិភពលោកកង្វះធនធានទឹកមានកាន់តែច្រើនឡើង ហើយក៏មិនសូវមានភ្លៀងធ្លាក់ដែរ។ តើគម្ពីរចែងយ៉ាងណាទៀតអំពីដំណោះស្រាយនៃកង្វះធនធានទឹក?
តើតាមរបៀបណាកង្វះធនធានទឹកនឹងលែងមានទៀត?
គម្ពីរចែងថា ព្រះនឹងដោះស្រាយបញ្ហាផ្សេងៗដែលប៉ះពាល់ដល់ផែនដី រួមទាំងកង្វះធនធានទឹកនៅសព្វថ្ងៃនេះដែរ ហើយលោកធ្វើដូច្នោះតាមរយៈរាជាណាចក្ររបស់លោក។ (ម៉ាថាយ ៦:៩, ១០) រាជាណាចក្រព្រះគឺជារដ្ឋាភិបាលមួយនៅស្ថានសួគ៌ ហើយរាជាណាចក្រនេះនឹងគ្រប់គ្រងផែនដីទាំងមូល។ (ដានីយ៉ែល ២:៤៤; ការបើកបង្ហាញ ១១:១៥) បន្ថែមទៅទៀត រាជាណាចក្រព្រះនឹងបំបាត់ចោលដើមហេតុនៃកង្វះធនធានទឹកជាបញ្ហាដែលរដ្ឋាភិបាលមនុស្សមិនអាចធ្វើបាន។
បញ្ហា៖ បម្រែបម្រួលអាកាសធាតុក៏ជាចំណែកមួយធ្វើឲ្យវដ្ដទឹកដំណើរការខុសប្រក្រតីដែរ ហើយវាបង្កឲ្យមានផលវិបាកផ្សេងៗ ដូចជាភាពរាំងស្ងួតធ្ងន់ធ្ងរ និងទឹកជំនន់ធំៗ ដែលបណ្ដាលមកពីភ្លៀងធ្លាក់យ៉ាងខ្លាំងឬកម្ពស់ទឹកសមុទ្រកើនឡើង។
ដំណោះស្រាយ៖ រាជាណាចក្រព្រះនឹងធ្វើឲ្យបរិស្ថានធម្មជាតិមានស្ថេរភាពឡើងវិញ ដើម្បីឲ្យផែនដីអាចទ្រទ្រង់ជីវិតបន្តទៅទៀត។ ព្រះបានសន្យាថា៖«មើល! ខ្ញុំកំពុងធ្វើអ្វីៗទាំងអស់ថ្មី»។ (ការបើកបង្ហាញ ២១:៥) ដីដែលស្ងួតហួតហែងនឹងមានទឹកស្អាតជាបរិបូរ ហើយអ្វីៗដែលមានជីវិតនឹងលូតលាស់ឡើងនៅគ្រប់ទីកន្លែង សូម្បីតែកន្លែងដែលគ្មានមនុស្សរស់នៅក៏ដោយ។ (អេសាយ ៤១:១៧-២០) បន្ថែមទៅទៀត ក្រោមការគ្រប់គ្រងរបស់លោកយេស៊ូដែលជាស្ដេចនៃរាជាណាចក្រព្រះ លោកនឹងកាន់កាប់ទៅលើកម្លាំងធម្មជាតិ។
ពេលលោកយេស៊ូនៅផែនដី លោកបានធ្វើឲ្យខ្យល់ព្យុះស្ងប់ស្ងាត់ ហើយការអស្ចារ្យនេះគ្រាន់តែជាភ័ស្តុតាងមួយដែលបញ្ជាក់ថា លោកបានទទួលឫទ្ធានុភាពពីព្រះ។ (ម៉ាកុស ៤:៣៩, ៤១) ក្រោមការគ្រប់គ្រងរបស់លោកយេស៊ូគ្រិស្ត មហន្តរាយធម្មជាតិនឹងលែងមានទៀត។ មនុស្សនឹងរស់នៅដោយសុខសាន្តនិងមានសុវត្ថិភាព ព្រោះពួកគេមិនភ័យខ្លាចថាមានគ្រោះមហន្តរាយណាឡើយ។
បញ្ហា៖ មនុស្សដែលមានចិត្តលោភលន់និងអ្នកដែលមិនចេះគិតវែងឆ្ងាយ បានបំពុលបរិស្ថាន ហើយធ្វើឲ្យប្រភពទឹកកខ្វក់ រួមទាំងទឹកទន្លេ បឹងបួ និងអាងស្តុកទឹកផ្សេងៗ។ ជាលទ្ធផល នាំឲ្យមានកង្វះធនធានទឹកស្អាតកាន់តែខ្លាំង។
ដំណោះស្រាយ៖ ព្រះនឹងសម្អាតផែនដី ហើយធ្វើឲ្យសមុទ្រ ទន្លេ បឹងបួ និងដីស្អាតឡើងវិញ។ ផែនដីនឹងក្លាយទៅជាសួនឧទ្យាន។ គម្ពីររៀបរាប់ជាលក្ខណៈកំណាព្យថា៖«តំបន់ស្ងាត់ជ្រងំនិងតំបន់ហួតហែងនឹងអរសប្បាយ វាលរហោស្ថាននឹងត្រេកអរ ហើយមានផ្ការីកស្គុសស្គាយ»។—អេសាយ ៣៥:១
ចុះអស់អ្នកដែលមិនខ្វល់នឹងបរិស្ថានធម្មជាតិឬមិនខ្វល់មនុស្សឯទៀត តើនឹងមានអ្វីកើតឡើងចំពោះពួកគេ? ព្រះបានសន្យាថា៖«បំផ្លាញពួកអ្នកដែលកំពុងបង្ខូចផែនដី»។—ការបើកបង្ហាញ ១១:១៨; សុភាសិត ២:២១, ២២
បញ្ហា៖ មនុស្សកំពុងប្រើប្រាស់ធនធានទឹកតាមរបៀបមិនត្រឹមត្រូវ គឺដោយខ្ជះខ្ជាយទឹក។ ពួកគេប្រើទឹកច្រើនជាងបរិមាណដែលផែនដីផ្គត់ផ្គង់ឲ្យ។
ដំណោះស្រាយ៖ រាជាណាចក្រព្រះនឹងធ្វើឲ្យបំណងប្រាថ្នាលោក«សម្រេចនៅផែនដី» មិនមែនបំណងប្រាថ្នារបស់មនុស្សដែលគិតតែប្រយោជន៍ខ្លួននោះទេ។ (ម៉ាថាយ ៦:៩, ១០) រាជាណាចក្រព្រះនឹងផ្ដល់ការអប់រំដ៏ល្អបំផុតដល់ពលរដ្ឋនៃរាជាណាចក្រនោះ។ អេសាយ ១១:៩ ចែងថា៖«ផែនដីនឹងពេញទៅដោយចំណេះរបស់ព្រះយេហូវ៉ា»។ a ពេលដែលមនុស្សទទួលចំណេះដឹងខ្ពង់ខ្ពស់ និងមានសេចក្ដីស្រឡាញ់ដ៏ជ្រាលជ្រៅចំពោះព្រះ ព្រមទាំងចំពោះអ្វីៗដែលលោកបានបង្កើត នោះពួកគេនឹងថែរក្សាផែនដីនិងធនធានធម្មជាតិឲ្យនៅស្រស់ស្អាត។
ដើម្បីស្វែងយល់ថែមទៀតអំពីអ្វីដែលរាជាណាចក្រព្រះនឹងសម្រេច សូមអានអត្ថបទដែលមានចំណងជើងថា«តើរាជាណាចក្រព្រះនឹងសម្រេចអ្វីខ្លះ?»
ដើម្បីដឹងអំពីរបៀបដែលផែនដីនឹងត្រូវប្រែក្លាយទៅជាសួនឧទ្យាន សូមអានសៀវភៅអេសាយ ជំពូកទី៣៥។
ដើម្បីរៀនថែមទៀតអំពីគោលបំណងរបស់ព្រះសម្រាប់ផែនដីនិងមនុស្សជាតិ សូមមើលវីដេអូហេតុអ្វីព្រះបានបង្កើតផែនដី?
a យេហូវ៉ាជានាមរបស់ព្រះ។ (ចម្រៀងសរសើរព្រះ ៨៣:១៨) សូមមើលអត្ថបទដែលមានចំណងជើងថា«តើព្រះយេហូវ៉ាជានរណា?»។
លោកអ្នកក៏ប្រហែលជាចូលចិត្តដែរ
ចូរចាំយាម!
គ្រោះរាំងស្ងួតដ៏ធ្ងន់ធ្ងរ តើគម្ពីរចែងយ៉ាងណា?
តើបញ្ហានៅក្នុងពិភពលោកនេះអាចដោះស្រាយបានទេ? តើមានសេចក្ដីសង្ឃឹមនៅថ្ងៃអនាគតទេ?
សំណួរនិងចម្លើយពីគម្ពីរ
តើគម្ពីរចែងយ៉ាងណាអំពីគ្រោះមហន្តរាយធម្មជាតិ?
តើពួកគេទទួលទោសពីព្រះឬ? តើព្រះជួយជនរងគ្រោះដោយមហន្តរាយធម្មជាតិឬទេ?
សេចក្ដីបង្រៀនសំខាន់ៗក្នុងគម្ពីរ
តើរាជាណាចក្ររបស់ព្រះជាអ្វី?
ក្នុងអំឡុងកិច្ចបម្រើផ្សាយរបស់លោកយេស៊ូនៅផែនដី លោកបានបង្រៀនអំពីរាជាណាចក្រព្រះច្រើនជាងប្រធានបទផ្សេងទៀត។ អស់រាប់រយឆ្នាំមកហើយ អ្នកកាន់តាមលោកអធិដ្ឋានឲ្យរាជាណាចក្រនោះបានមកដល់។
ប្រធានបទឯទៀត
ផលវិបាកពីបម្រែបម្រួលអាកាសធាតុ តើគម្ពីរចែងយ៉ាងណា?
តើព្រះដែលជាអ្នកបង្កើតយកចិត្តទុកដាក់ចំពោះភពផែនដី និងមនុស្សដែលរស់នៅលើផែនដីឬទេ?
