តើគម្ពីរចែងយ៉ាងណាអំពីការខ្វះស្បៀងអាហារនៅសព្វថ្ងៃនេះ?
«គ្មានអ្នកអត់ឃ្លានឡើយ»។ នេះជាអ្វីដែលពួកអ្នកដឹកនាំពិភពលោកចង់ឲ្យកើតឡើងដើម្បីដោះស្រាយវិបត្តិដ៏ធំបំផុតរបស់មនុស្សជាតិ ពោលគឺការផ្គត់ផ្គង់អាហារដល់មនុស្សគ្រប់គ្នានៅផែនដី។ a ប៉ុន្តែ តើនឹងមានគ្រាមួយដែលពិភពលោកនេះលែងមានការអត់ឃ្លានទេ? តើគម្ពីរចែងយ៉ាងណា?
គម្ពីរប្រាប់ទុកជាមុនអំពីការខ្វះស្បៀងអាហារនៅសព្វថ្ងៃនេះ
គម្ពីរប្រាប់ទុកជាមុនថានឹងមានការខ្វះស្បៀងអាហារនៅសម័យយើង គឺជាគ្រាមួយដែលហៅថា«គ្រាចុងក្រោយបង្អស់»។ (ធីម៉ូថេទី២ ៣:១) ព្រះមិនមែនជាអ្នកធ្វើឲ្យមានការខ្វះស្បៀងអាហារទេ ផ្ទុយទៅវិញលោកបានព្រមានយើងអំពីរឿងនេះ។ (យ៉ាកុប ១:១៣) សូមកត់សម្គាល់ទំនាយពីរក្នុងគម្ពីរ។
«នឹងមានការអត់ឃ្លាន . . . ពីកន្លែងមួយទៅកន្លែងមួយ»។ (ម៉ាថាយ ២៤:៧) ទំនាយនេះបានទាយថានឹងមានការអត់ឃ្លាននៅកន្លែងជាច្រើន។ ជាពិសេសថ្មីៗនេះ ក្រុមអ្នកសិក្សាអំពីរបៀបផលិតនិងចែកចាយស្បៀងអាហារបានរាយការណ៍ថា៖«ស្ថានភាពក្នុងពិភពលោកស្ដីអំពីការអត់ឃ្លាននិងការខ្វះអាហារដែលមានជីវជាតិ គឺកាន់តែធ្ងន់ធ្ងរឡើងៗ»។ b មនុស្សរាប់រយលាននាក់នៅក្នុងប្រទេសជាច្រើន មិនមានស្បៀងអាហារដែលពួកគេត្រូវការទេ។ គួរឲ្យសោកស្ដាយណាស់ នេះបាននាំឲ្យមនុស្សជាច្រើនបាត់បង់ជីវិត។
«មើល! ខ្ញុំឃើញសេះមួយសម្បុរខ្មៅ ហើយអ្នកដែលជិះសេះនោះមានជញ្ជីងនៅដៃ»។ (ការបើកបង្ហាញ ៦:៥) ក្នុងទំនាយនេះ សេះនិងអ្នកជិះនោះតំណាងឲ្យការអត់ឃ្លាននៅគ្រាចុងក្រោយបង្អស់។ c ជញ្ជីងនៅដៃរបស់អ្នកជិះនោះគឺជាការថ្លឹងស្បៀងអាហារដែលមានកម្រិត។ កាលដែលអ្នកជិះសេះចេញដំណើរ មានសំឡេងមួយបន្លឺឡើងថាតម្លៃស្បៀងអាហារនឹងឡើងថ្លៃជាខ្លាំង ហើយសំឡេងនោះព្រមានកុំឲ្យខ្ជះខ្ជាយស្បៀងអាហារ។ (ការបើកបង្ហាញ ៦:៦) វិបត្តិនេះកំពុងកើតឡើងពិតមែននៅទូទាំងពិភពលោក ដោយសារមនុស្សរាប់ពាន់លាននាក់មិនអាចរកទិញឬគ្មានសមត្ថភាពទិញអាហារដែលមានជីវជាតិ។
តើតាមរបៀបណាការខ្វះស្បៀងអាហារនឹងលែងមានទៀត?
ពួកអ្នកជំនាញបាននិយាយថាអាហារដែលផែនដីយើងផលិតបាន គឺច្រើនជាងសេចក្ដីត្រូវការរបស់មនុស្សគ្រប់គ្នាដែលរស់នៅផែនដីទៅទៀត។ ដូច្នេះ តើមានកត្តាអ្វីខ្លះដែលធ្វើឲ្យខ្វះស្បៀងអាហារ? តើគម្ពីរចែងថាព្រះយេហូវ៉ា dដែលជាអ្នកបង្កើតនឹងដោះស្រាយបញ្ហាទាំងនេះយ៉ាងដូចម្ដេច?
បញ្ហា៖ រដ្ឋាភិបាលនានាមិនអាចបំបាត់ចោលភាពក្រីក្រនិងវិបត្តិសេដ្ឋកិច្ចដែលបណ្ដាលឲ្យមនុស្សមានភាពអត់ឃ្លាននោះឡើយ។
ដំណោះស្រាយ៖ រដ្ឋាភិបាលមិនល្អឥតខ្ចោះរបស់មនុស្ស នឹងត្រូវជំនួសដោយរដ្ឋាភិបាលមួយដ៏ល្អឥតខ្ចោះគឺរាជាណាចក្ររបស់ព្រះ។ (ដានីយ៉ែល ២:៤៤; ម៉ាថាយ ៦:១០) សព្វថ្ងៃនេះ មនុស្សក្រីក្រជាច្រើនតែងតែគ្មានអាហារបរិភោគគ្រប់គ្រាន់ តែនៅក្រោមរាជាណាចក្រព្រះបញ្ហានេះនឹងផ្លាស់ប្ដូរទាំងស្រុង។ គម្ពីរចែងអំពីលោកយេស៊ូដែលជាស្ដេចនៃរាជាណាចក្រព្រះថា៖«គាត់នឹងស្រោចស្រង់ជនក្រីក្រដែលស្រែករកជំនួយ ព្រមទាំងសង្គ្រោះមនុស្សទន់ទាបនិងមនុស្សគ្រប់រូបដែល គ្មានអ្នកណាជួយ។ . . . ផែនដីនឹងមានស្រូវជាបរិបូរ ចំណែកនៅតាមកំពូលភ្នំវិញនឹងមានស្រូវហៀរហូរ»។—ចម្រៀងសរសើរព្រះ ៧២:១២, ១៦
បញ្ហា៖ សង្គ្រាមនាំមកនូវការបំផ្លិចបំផ្លាញនិងវិបត្តិសេដ្ឋកិច្ច។ ជាលទ្ធផល នេះធ្វើឲ្យមនុស្សពិបាករកបានអាហារចាំបាច់ដែលពួកគេត្រូវការ។
ដំណោះស្រាយ៖ «[ព្រះយេហូវ៉ា]នឹងធ្វើឲ្យផែនដីទាំងមូលលែងមានសង្គ្រាមទៀត លោកបំបាក់ធ្នូ ហើយកម្ទេចលំពែង លោកដុតរទេះចម្បាំងចោលទាំងអស់»។ (ចម្រៀងសរសើរព្រះ ៤៦:៩) ព្រះនឹងបំផ្លាញគ្រឿងអាវុធនិងមនុស្សដែលបង្កឲ្យមានសង្គ្រាម។ ជាលទ្ធផល មនុស្សគ្រប់គ្នានឹងអាចទទួលបានអាហារល្អៗយ៉ាងងាយស្រួល។ គម្ពីរសន្យាថា៖«សេចក្ដីសុចរិតនឹងមានកាន់តែច្រើនឡើង ហើយសេចក្ដីសុខនឹងមានជាបរិបូរ»។—ចម្រៀងសរសើរព្រះ ៧២:៧
បញ្ហា៖ វិបត្តិអាកាសធាតុនិងគ្រោះមហន្តរាយធម្មជាតិបានបំផ្លាញដំណាំនិងសត្វជាច្រើន។
ដំណោះស្រាយ៖ ព្រះនឹងកាន់កាប់ទៅលើកម្លាំងធម្មជាតិ ហើយលោកនឹងធ្វើឲ្យស្ថានភាពមានអំណោយផលសម្រាប់ដំណាំលូតលាស់ល្អ។ គម្ពីរចែងថា៖«[ព្រះយេហូវ៉ា]ធ្វើឲ្យខ្យល់ព្យុះស្ងប់រម្ងាប់ រលកសមុទ្របានស្ងាត់ស្ងៀមទៅ។ . . . លោកធ្វើឲ្យតំបន់ស្ងាត់ជ្រងំក្លាយជាបឹងបួ ហើយធ្វើឲ្យដីប្រេះក្រហែង ប្រែជាប្រភពទឹកវិញ។ លោកឲ្យអ្នកដែលមានការអត់ឃ្លានអាស្រ័យនៅទីនោះ . . . ពួកគេសាបព្រោះគ្រាប់ពូជលើដីស្រែ ហើយដាំចម្ការទំពាំងបាយជូរ អ្វីទាំងនោះបង្កើតផលច្រើនសន្ធឹក»។—ចម្រៀងសរសើរព្រះ ១០៧:២៩, ៣៥-៣៧
បញ្ហា៖ មនុស្សលោភលន់និងពុករលួយផលិតអាហារដែលបង្ខូចសុខភាពឬស្ដុកទុកស្បៀងអាហារសម្រាប់ខ្លួន ជាហេតុដែលបណ្ដាលឲ្យអ្នកឯទៀតខ្វះស្បៀងអាហារ។
ដំណោះស្រាយ៖ រាជាណាចក្រព្រះនឹងដកចេញជនមិនទៀងត្រង់និងពួកអ្នកពុករលួយ។ (ចម្រៀងសរសើរព្រះ ៣៧:១០, ១១; អេសាយ ៦១:៨) គម្ពីររៀបរាប់ថាព្រះយេហូវ៉ាជា«[ព្រះដែល]ផ្ដល់យុត្តិធម៌ដល់ពួកអ្នកដែលត្រូវគេបោកប្រាស់ លោកឲ្យអាហារដល់អ្នកដែលស្រេកឃ្លាន»។—ចម្រៀងសរសើរព្រះ ១៤៦:៧
បញ្ហា៖ មួយភាគបីនៃស្បៀងអាហារពិភពលោកបានត្រូវប្រើយ៉ាងខ្ជះខ្ជាយឬខូចខាតជារៀងរាល់ឆ្នាំ។
ដំណោះស្រាយ៖ ក្រោមរាជាណាចក្រព្រះ អ្នកដែលមើលខុសត្រូវស្បៀងអាហារនឹងចែកចាយស្បៀងអាហារយ៉ាងត្រឹមត្រូវ។ ពេលលោកយេស៊ូនៅផែនដី លោកមិនខ្ជះខ្ជាយស្បៀងអាហារទេ។ ជាឧទាហរណ៍ នៅពេលមួយលោកបានធ្វើការអស្ចារ្យដោយផ្ដល់អាហារដល់ក្រុមមនុស្សជាង៥.០០០នាក់។ ក្រោយមក លោកបានបង្គាប់ពួកអ្នកកាន់តាមលោកថា៖«ចូរប្រមូលអាហារដែលនៅសល់ កុំឲ្យខាតបង់អ្វីឡើយ»។—យ៉ូហាន ៦:៥-១៣
ដោយសាររាជាណាចក្រព្រះនឹងបំបាត់ដើមហេតុនៃការអត់ឃ្លាន នោះមនុស្សទាំងអស់នឹងមានអាហារល្អៗជាបរិបូរ។ (អេសាយ ២៥:៦) ដើម្បីដឹងថាពេលណារាជាណាចក្រព្រះនឹងធ្វើឲ្យរឿងនេះកើតឡើង សូមមើលអត្ថបទចំណងជើងថា«តើរាជាណាចក្ររបស់ព្រះនឹងគ្រប់គ្រងលើផែនដីនៅពេលណា?»។
a របៀបវារៈឆ្នាំ២០៣០ ស្ដីអំពីការអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ ដែលត្រូវបានអនុម័តឆ្នាំ២០១៥។
b របាយការណ៍រួមចេញដោយអង្គការស្បៀងអាហារនិងកសិកម្មនៃអង្គការសហប្រជាជាតិ មូលនិធិអន្តរជាតិសម្រាប់កិច្ចអភិវឌ្ឍន៍លើវិស័យកសិកម្ម មូលនិធិអង្គការសហប្រជាជាតិដើម្បីកុមារ កម្មវិធីស្បៀងអាហារពិភពលោករបស់អង្គការសហប្រជាជាតិ និងអង្គការសុខភាពពិភពលោក។
c ដើម្បីរៀនថែមទៀតអំពីអ្នកជិះសេះទាំងបួនក្នុងសៀវភៅការបើកបង្ហាញ សូមមើលអត្ថបទចំណងជើងថា«អ្នកជិះសេះទាំងបួន តើពួកគេជាអ្នកណា?»។
d យេហូវ៉ាជានាមរបស់ព្រះ។ (ចម្រៀងសរសើរព្រះ ៨៣:១៨) សូមមើលអត្ថបទចំណងជើងថា«តើព្រះយេហូវ៉ាជានរណា?»។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើអ្វីជាសញ្ញាសម្គាល់នៃ«គ្រាចុងក្រោយបង្អស់» ឬ«ទីបញ្ចប់ពិភពលោក»?
គម្ពីរបានប្រាប់ទុកជាមុនអំពីព្រឹត្តិការណ៍ផ្សេងៗដែលរួមគ្នាជាសញ្ញាសម្គាល់នៃគ្រាចុងក្រោយបង្អស់។
សេចក្ដីបង្រៀនសំខាន់ៗក្នុងគម្ពីរ
តើរាជាណាចក្ររបស់ព្រះជាអ្វី?
ក្នុងអំឡុងកិច្ចបម្រើផ្សាយរបស់លោកយេស៊ូនៅផែនដី លោកបានបង្រៀនអំពីរាជាណាចក្រព្រះច្រើនជាងប្រធានបទផ្សេងទៀត។ អស់រាប់រយឆ្នាំមកហើយ អ្នកកាន់តាមលោកអធិដ្ឋានឲ្យរាជាណាចក្រនោះបានមកដល់។
ប្រធានបទឯទៀត
សេចក្ដីសង្ឃឹមដ៏ពិតប្រាកដកំពុងរង់ចាំអ្នក
ហេតុអ្វីសេចក្ដីសន្យាទាំងប៉ុន្មានដែលមានក្នុងគម្ពីរខុសពីសេចក្ដីសន្យាផ្សេងៗនិងការព្យាករណ៍របស់មនុស្ស?
