ចូរចាំយាម!

គ្រោះរាំងស្ងួតដ៏ធ្ងន់ធ្ងរ តើគម្ពីរចែងយ៉ាងណា?

លេង

កាលពីថ្ងៃទី៧ ខែកញ្ញា ឆ្នាំ២០២២ សារព័ត៌មានមួយបានរៀបរាប់ថា៖«ប្រទេសចិនរាយការណ៍ថាឆ្នាំនេះគឺជាឆ្នាំដែលក្ដៅជាងគេ ហើយជារដូវក្ដៅដែលស្ងួតបំផុតលើកទី៣ក្នុងប្រវត្តិសាស្ត្រ»(The Guardian)។
កាលពីថ្ងៃទី២៦ ខែសីហា ឆ្នាំ២០២២ ព័ត៌មានUN បានរៀបរាប់ថា៖«តាមការព្យាករណ៍អាកាសធាតុបានរាយការណ៍ថាប្រទេសខ្លះនៅទ្វីបអាហ្វ្រិក នឹងមានគ្រោះរាំងស្ងួតយ៉ាងខ្លាំងអស់រយៈពេលប្រាំឆ្នាំបន្តបន្ទាប់គ្នា»។
កាលពីថ្ងៃទី២៣ ខែសីហា ឆ្នាំ២០២២ ព័ត៌មានBBC បានរាយការណ៍ថា៖«នៅទ្វីបអឺរ៉ុបមានគ្រោះរាំងស្ងួតយ៉ាងខ្លាំងរហូតដល់២ភាគ៣នៃទ្វីបនោះ ហើយក្នុងអំឡុង៥០០ឆ្នាំ នេះទំនងជាគ្រោះរាំងស្ងួតដ៏ខ្លាំងបំផុត»។

អ្នកជំនាញជាច្រើនបានព្យាករថាគ្រោះរាំងស្ងួតបែបនោះនឹងបន្តមាន ហើយនឹងមានកាន់តែខ្លាំងឡើងៗ។ តើមានសេចក្ដីសង្ឃឹមនៅថ្ងៃអនាគតទេ? តើគម្ពីរចែងយ៉ាងណា?

ទំនាយគម្ពីរអំពីគ្រោះរាំងស្ងួត

គម្ពីរប្រកាសទុកជាមុនអំពីសម័យយើងថា៖

«នឹងមាន . . . ការអត់ឃ្លាន . . . ពីកន្លែងមួយទៅកន្លែងមួយ»។—លូកា ២១:១១

តាមធម្មតា ពេលមានគ្រោះរាំងស្ងួត មានការអត់ឃ្លាន ហើយការអត់ឃ្លាននឹងនាំឲ្យមនុស្សរងទុក្ខហើយស្លាប់។ អ្វីទាំងនេះបានធ្វើឲ្យទំនាយក្នុងគម្ពីរក្លាយជាការពិត។—ការបើកបង្ហាញ ៦:៦, ៨

មូលហេតុដែលមានគ្រោះរាំងស្ងួតកាន់តែខ្លាំងឡើង

គម្ពីរប្រាប់អំពីមូលហេតុសំខាន់មួយដែលបណ្ដាលឲ្យមានគ្រោះរាំងស្ងួតកាន់តែខ្លាំងឡើង។ គម្ពីរចែងថា៖

«មនុស្ស . . . គ្មានសមត្ថភាពតម្រង់ជំហានរបស់ខ្លួន»។—យេរេមា ១០:២៣

នេះមានន័យថាមនុស្សមិនអាច«តម្រង់ជំហាន[របស់ពួកគេ]» ពោលគឺមិនអាចគ្រប់គ្រងខ្លួនឯងបានឡើយ។ ការសម្រេចចិត្តមិនល្អរបស់ពួកគេច្រើនតែបណ្ដាលឲ្យមានគ្រោះរាំងស្ងួតនិងការខ្វះទឹក។

អ្នកវិទ្យាសាស្ត្រភាគច្រើនយល់ស្របថា អ្វីដែលមនុស្សបានធ្វើគឺបង្ខូចពិភពលោកទាំងមូល ហើយជាលទ្ធផលនាំឲ្យមានគ្រោះរាំងស្ងួតនៅទូទាំងពិភពលោក។
សកម្មភាពរបស់មនុស្សលោភលន់និងគោលនយោបាយដែលមិនបានគិតវែងឆ្ងាយ បានបណ្ដាលឲ្យមានការបំផ្លិចបំផ្លាញព្រៃឈើ ការបង្ខូចបរិស្ថាន និងការប្រើប្រាស់ធនធានធម្មជាតិមិនត្រឹមត្រូវ។ ជាលទ្ធផល នាំឲ្យបាត់បង់ប្រភពធនធានទឹក។

ប៉ុន្តែ គម្ពីរផ្ដល់សេចក្ដីសង្ឃឹមដល់យើង។

តើមានសេចក្ដីសង្ឃឹមនៅថ្ងៃអនាគតទេ?

គម្ពីរសន្យាថាព្រះនឹងដោះស្រាយវិបត្តិខ្វះធនធានទឹក។ តើតាមរបៀបណា?

១. ព្រះនឹង«បំផ្លាញពួកអ្នកដែលកំពុងបង្ខូចផែនដី»។ (ការបើកបង្ហាញ ១១:១៨) លោកនឹងដកចេញនូវដើមហេតុមួយដែលបណ្ដាលឲ្យខ្វះធនធានទឹក ពោលគឺមនុស្សអាក្រក់និងលោភលន់ ដែលបង្ខូចបរិស្ថាន។—ធីម៉ូថេទី២ ៣:១, ២
២. «ដីដែលហួតហែងនឹងក្លាយទៅជាបឹង»។ (អេសាយ ៣៥:១, ៦, ៧) ព្រះនឹងធ្វើឲ្យការខូចខាតដែលបណ្ដាលមកពីគ្រោះរាំងស្ងួតបានល្អឡើងវិញ ហើយធ្វើឲ្យផែនដីនេះទៅជាសួនឧទ្យានដែលមានធនធានទឹកគ្រប់គ្រាន់។
៣. «លោកថែរក្សាផែនដី លោកធ្វើឲ្យផែនដីបង្កើតភោគផលល្អៗយ៉ាងបរិបូរ»។ (ចម្រៀងសរសើរព្រះ ៦៥:៩) ដោយសារព្រះឲ្យពរ នោះផែនដីនឹងមានអាហារល្អៗជាបរិបូរ ព្រមទាំងមានទឹកស្អាតសម្រាប់មនុស្សទាំងអស់។

ដើម្បីស្វែងយល់អំពីមូលហេតុដែលបម្រែបម្រួលអាកាសធាតុ បានសម្រេចតាមទំនាយក្នុងគម្ពីរ សូមអានអត្ថបទដែលមានចំណងជើងថា«ផលវិបាកពីបម្រែបម្រួលអាកាសធាតុ តើគម្ពីរចែងយ៉ាងណា?»។

ដើម្បីស្វែងយល់ថែមទៀតអំពីសេចក្ដីសង្ឃឹមក្នុងគម្ពីរ សម្រាប់ថ្ងៃអនាគត សូមអានអត្ថបទ ដែលមានចំណងជើងថា«តើអ្នកណានឹងស្រោចស្រង់ផែនដី?»

ដើម្បីស្វែងយល់អំពីរបៀបដែលគម្ពីរអាចជួយលោកអ្នកស៊ូទ្រាំនឹងការពិបាកដែលបណ្ដាលមកពីបម្រែបម្រួលអាកាសធាតុ សូមអានអត្ថបទដែលមានចំណងជើងថា«តើតាមរបៀបណាគម្ពីរអាចជួយលោកអ្នកឲ្យប្រឈមនឹងបម្រែបម្រួលអាកាសធាតុ?»