ចូរចាំយាម!
ឆ្នាំ២០២២ជាឆ្នាំដ៏ច្របូកច្របល់ តើគម្ពីរចែងយ៉ាងណា?
ក្នុងអំឡុងឆ្នាំ២០២២ យើងឧស្សាហ៍ឮព័ត៌មានអំពីសង្គ្រាម បញ្ហាសេដ្ឋកិច្ច និងគ្រោះមហន្តរាយធម្មជាតិ។ មានតែគម្ពីរប៉ុណ្ណោះដែលអាចពន្យល់អំពីអត្ថន័យពិតនៃព្រឹត្តិការណ៍ទាំងនេះបាន។
អត្ថន័យពិតនៃព្រឹត្តិការណ៍ក្នុងឆ្នាំ២០២២
ព្រឹត្តិការណ៍ផ្សេងៗនៅចុងឆ្នាំនេះបានបញ្ជាក់ភ័ស្តុតាងកាន់តែច្បាស់ថែមទៀតថា យើងកំពុងរស់នៅគ្រាមួយដែលគម្ពីរហៅថា៖«គ្រាចុងក្រោយបង្អស់»។ (ធីម៉ូថេទី២ ៣:១) គ្រានោះបានចាប់ផ្ដើមនៅឆ្នាំ១៩១៤។ សូមកត់សម្គាល់ព្រឹត្តិការណ៍ថ្មីៗដែលស្របនឹងអ្វីដែលគម្ពីរបានប្រាប់ទុកជាមុនអំពីគ្រារបស់យើង ដូចជា៖
«សង្គ្រាម»។—ម៉ាថាយ ២៤:៦
«ឆ្នាំ២០២២ជាឆ្នាំដែលមានសង្គ្រាមដ៏គួរឲ្យរន្ធត់ម្ដងទៀតនៅទ្វីបអឺរ៉ុប»។ a
សូមមើលអត្ថបទ«រុស្ស៊ីវាយលុកអ៊ុយក្រែន»។
«ការអត់ឃ្លាន»។—ម៉ាថាយ ២៤:៧
«ឆ្នាំ២០២២ជាឆ្នាំដែលមានការអត់ឃ្លានដែលស្មានមិនដល់»។ b
សូមមើលអត្ថបទ«សង្គ្រាមនៅប្រទេសអ៊ុយក្រែនធ្វើឲ្យមានការខ្វះស្បៀងអាហារនៅទូទាំងពិភពលោក»។
«រោគរាតត្បាត»។—លូកា ២១:១១
«ជំងឺស្វិតដៃជើងបានកើតមានម្ដងទៀត ដំណាលគ្នានោះ ជំងឺអ៊ុតស្វាក៏កាន់តែរីករាលដាល ហើយជំងឺកូវីដ-១៩ បន្តធ្វើទុក្ខដល់មនុស្សយ៉ាងខ្លាំង។ ស្ថានភាពនេះបញ្ជាក់យ៉ាងច្បាស់ថាជំងឺឆ្លងទាំងនេះមានគ្រោះថ្នាក់យ៉ាងណា ហើយធ្វើឲ្យមនុស្សរងទុក្ខខ្លាំងប៉ុនណា»។ c
សូមមើលអត្ថបទ«មនុស្ស៦លាននាក់បានស្លាប់ដោយសារជំងឺកូវីដ»។
«ឃើញអ្វីដែលគួរឲ្យខ្លាច»។—លូកា ២១:១១
«នៅរដូវក្ដៅ ក្នុងឆ្នាំ២០២២ ជាឆ្នាំដែលមិនអាចបំភ្លេចបាន ព្រោះមានបញ្ហារលកកម្ដៅ គ្រោះរាំងស្ងួត ភ្លើងឆេះព្រៃ និងទឹកជំនន់ ដែលបណ្ដាលឲ្យមានការបំផ្លិចបំផ្លាញយ៉ាងសម្បើម។ ជាលទ្ធផល មនុស្សរាប់ពាន់នាក់បាត់បង់ជីវិត ហើយមនុស្សរាប់លាននាក់នៅទូទាំងពិភពលោកបាត់បង់ផ្ទះសម្បែង»។ d
សូមមើលអត្ថបទ«កម្ដៅកើនឡើងខុសពីធម្មតានៅទូទាំងពិភពលោក»។
«ចលាចល»។—លូកា ២១:៩
«ប្រជាជនមានការខឹងសម្បារយ៉ាងខ្លាំងអំពីបញ្ហាសេដ្ឋកិច្ច ជាពិសេសទាក់ទងនឹងទំនិញឡើងថ្លៃ ហើយនោះនាំឲ្យមានបាតុកម្មធំៗប្រឆាំងនឹងរដ្ឋាភិបាល នៅឆ្នាំ២០២២»។ e
សូមមើលអត្ថបទ«ទំនិញឡើងថ្លៃនៅទូទាំងពិភពលោក»។
តើនឹងមានអ្វីកើតឡើងនៅឆ្នាំក្រោយ?
គ្មានយើងណាម្នាក់ដឹងប្រាកដអំពីអ្វីដែលនឹងកើតឡើងនៅឆ្នាំ២០២៣ទេ។ ប៉ុន្តែ អ្វីដែលយើងដឹងគឺថាមិនយូរទៀត រាជាណាចក្រព្រះឬរដ្ឋាភិបាលនៅស្ថានសួគ៌នឹងធ្វើឲ្យមានការផ្លាស់ប្ដូរយ៉ាងធំនៅផែនដី។ (ដានីយ៉ែល ២:៤៤) រដ្ឋាភិបាលនេះនឹងបំបាត់ចោលនូវដើមហេតុដែលនាំឲ្យមនុស្សរងទុក្ខវេទនា ហើយរដ្ឋាភិបាលនេះនឹងធ្វើឲ្យប្រាកដថាបំណងប្រាថ្នារបស់ព្រះបានសម្រេចនៅផែនដី។—ម៉ាថាយ ៦:៩, ១០
យើងសូមលើកទឹកចិត្តលោកអ្នកធ្វើតាមយោបល់របស់លោកយេស៊ូគ្រិស្តឲ្យ«ចាំយាម»ជានិច្ច ដើម្បីដឹងថាព្រឹត្តិការណ៍ពិភពលោកកំពុងកើតឡើងតាមទំនាយគម្ពីរឬយ៉ាងណា។ (ម៉ាកុស ១៣:៣៧) សូមទាក់ទងយើងដើម្បីស្វែងយល់ថែមទៀតអំពីរបៀបដែលគម្ពីរអាចជួយលោកអ្នកនៅសព្វថ្ងៃនេះ និងអាចជួយលោកអ្នកនិងក្រុមគ្រួសារឲ្យមានសេចក្ដីសង្ឃឹមពិតសម្រាប់អនាគតដ៏ភ្លឺស្វាង។
a អត្ថបទសមាគមសារព័ត៌មានចំណងជើងថា«ឆ្នាំ២០២២ជាឆ្នាំដែលមានសង្គ្រាមដ៏គួរឲ្យរន្ធត់ម្ដងទៀតនៅទ្វីបអឺរ៉ុប» សរសេរដោយជីល ឡឡេស ចុះថ្ងៃទី៨ ខែធ្នូ ឆ្នាំ២០២២។
b អត្ថបទកម្មវិធីស្បៀងអាហារពិភពលោកចំណងជើងថា«វិបត្តិស្បៀងអាហារពិភពលោក»។
c អត្ថបទអង្គការសុខភាពJAMA ចំណងជើងថា«ការរស់នៅគ្រាដែលមានរោគរាតត្បាត គឺពីជំងឺកូវីដ-១៩ ដល់ជំងឺអ៊ុតស្វា ជំងឺស្វិតដៃជើង និងជំងឺX» សរសេរដោយឡរ៉េន ហ្គោស្ទីន ចុះថ្ងៃទី២២ ខែកញ្ញា ឆ្នាំ២០២២។
d អត្ថបទអង្គការEarth.Org ចំណងជើងថា«តើកត្តាអ្វីខ្លះដែលបង្កឲ្យមានអាកាសធាតុបំបែកកំណត់ត្រានៅរដូវក្ដៅក្នុងឆ្នាំ២០២២?» សរសេរដោយម៉ាទីណា អ៊ីជីនី ចុះថ្ងៃទី២៤ ខែតុលា ឆ្នាំ២០២២។
e អត្ថបទអង្គការសន្តិភាពអន្តរជាតិCarnegie ចំណងជើងថា«ការខឹងសម្បារអំពីបញ្ហាសេដ្ឋកិច្ចនាំឲ្យមានបាតុកម្មច្រើនជាងគេនៅទូទាំងពិភពលោកក្នុងឆ្នាំ២០២២» សរសេរដោយថូម៉ាស់ ខារ៉ូថឺ និងបេនយ៉ាមីន ហ្វែលមេន ចុះថ្ងៃទី៨ ខែធ្នូ ឆ្នាំ២០២២។
លោកអ្នកក៏ប្រហែលជាចូលចិត្តដែរ
សំណួរនិងចម្លើយពីគម្ពីរ
តើអ្វីជាសញ្ញាសម្គាល់នៃ«គ្រាចុងក្រោយបង្អស់» ឬ«ទីបញ្ចប់ពិភពលោក»?
គម្ពីរបានប្រាប់ទុកជាមុនអំពីព្រឹត្តិការណ៍ផ្សេងៗដែលរួមគ្នាជាសញ្ញាសម្គាល់នៃគ្រាចុងក្រោយបង្អស់។
ទស្សនាវដ្ដី
មិនយូរទៀត ព្រះនឹងបំបាត់ចោលទុក្ខវេទនាទាំងអស់
ក៏ប៉ុន្តែ តើតាមរបៀបណាយើងដឹងថាព្រះនឹងបំបាត់ចោលទុក្ខវេទនានិងភាពអយុត្តិធម៌ទាំងអស់?
សេចក្ដីបង្រៀនសំខាន់ៗក្នុងគម្ពីរ
តើរាជាណាចក្ររបស់ព្រះជាអ្វី?
ក្នុងអំឡុងកិច្ចបម្រើផ្សាយរបស់លោកយេស៊ូនៅផែនដី លោកបានបង្រៀនអំពីរាជាណាចក្រព្រះច្រើនជាងប្រធានបទផ្សេងទៀត។ អស់រាប់រយឆ្នាំមកហើយ អ្នកកាន់តាមលោកអធិដ្ឋានឲ្យរាជាណាចក្រនោះបានមកដល់។
សេចក្ដីបង្រៀនសំខាន់ៗពីគម្ពីរ
រាជាណាចក្រព្រះបានចាប់ផ្ដើមគ្រប់គ្រងនៅឆ្នាំ១៩១៤
ជាង២.៦០០ឆ្នាំមុន ព្រះបានឲ្យស្ដេចដ៏ខ្លាំងក្លាមួយរូបឃើញសុបិនដែលជាទំនាយ។ ទំនាយនេះកំពុងកើតឡើងនៅសព្វថ្ងៃនេះ។
ប្រធានបទឯទៀត
សេចក្ដីសង្ឃឹមដ៏ពិតប្រាកដកំពុងរង់ចាំអ្នក
ហេតុអ្វីសេចក្ដីសន្យាទាំងប៉ុន្មានដែលមានក្នុងគម្ពីរខុសពីសេចក្ដីសន្យាផ្សេងៗនិងការព្យាករណ៍របស់មនុស្ស?
