ចូរចាំយាម!
តើប្រជាជាតិនានាអាចសហការគ្នាបញ្ចៀសការបំផ្លិចបំផ្លាញយ៉ាងខ្លាំងដែលមកពីបម្រែបម្រួលអាកាសធាតុឬទេ? តើគម្ពីរចែងយ៉ាងណា?
កាលពីថ្ងៃអាទិត្យទី២០ ខែវិច្ឆិកា ឆ្នាំ២០២២ កិច្ចប្រជុំមួយស្ដីអំពីបម្រែបម្រួលអាកាសធាតុ(COP27) ដែលធ្វើឡើងដោយសម្ព័ន្ធប្រជាជាតិបានត្រូវបញ្ចប់។ ក្នុងកិច្ចប្រជុំនោះ ពួកអ្នកដឹកនាំនិងពួកអ្នកជំនាញ បានព្រមព្រៀងគ្នាផ្ដល់ជំនួយជាថវិកាដល់ប្រទេសក្រីក្រ ដើម្បីជួយពួកគេដោះស្រាយវិបត្តិដ៏ធ្ងន់ធ្ងរដែលបណ្ដាលមកពីបម្រែបម្រួលអាកាសធាតុ។ ប៉ុន្តែ មនុស្សជាច្រើនបានសារភាពថាការធ្វើដូច្នេះ នឹងមិនអាចដោះស្រាយទាំងស្រុងនូវបញ្ហាដែលមកពីបម្រែបម្រួលអាកាសធាតុនោះទេ។
កាលពីថ្ងៃទី១៩ ខែវិច្ឆិកា ឆ្នាំ២០២២ អគ្គលេខាធិការអង្គការសហប្រជាជាតិ លោកអង់តូនីញ៉ូ គុថេរិស បានប្រាប់ថា៖«ខ្ញុំរីករាយណាស់ដែលយើងបានធ្វើការសម្រេចចិត្តផ្ដល់ជំនួយជាថវិកា ដើម្បីជួយអស់អ្នកដែលរងទុក្ខដោយសារបម្រែបម្រួលអាកាសធាតុ។ ប៉ុន្តែ យើងដឹងថាជំនួយនេះនឹងមិនគ្រប់គ្រាន់ទេ . . . ព្រោះភពផែនដីយើងនៅតែស្ថិតក្នុងស្ថានភាពគ្រោះថ្នាក់ដដែល»។
កាលពីថ្ងៃទី២០ ខែវិច្ឆិកា ឆ្នាំ២០២២ លោកស្រីមេរី រ៉ូបីនសាន់ ដែលជាអតីតប្រធានាធិបតីនៃប្រទេសអៀរឡង់ និងជាអតីតឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានរៀបរាប់ថា៖«មិនយូរទៀត ភពផែនដីរបស់យើងប្រហែលជាជួបនឹងវិបត្តិធ្ងន់ធ្ងរដែលនឹងប៉ះពាល់យ៉ាងខ្លាំងដល់មនុស្សទាំងអស់»។
ពួកយុវវ័យព្រួយបារម្ភជាខ្លាំងអំពីអនាគតភពផែនដីរបស់យើង។ ប៉ុន្តែ តើប្រជាជាតិនានាអាចរួមគ្នាសម្រេចសេចក្ដីសន្យារបស់ពួកគេដើម្បីដោះស្រាយវិបត្តិបម្រែបម្រួលអាកាសធាតុឬទេ? តើគម្ពីរចែងយ៉ាងណា?
តើប្រជាជាតិនានានឹងរួបរួមគ្នា ហើយជោគជ័យឬទេ?
គម្ពីរប្រាប់យើងថាទោះជារដ្ឋាភិបាលនានាអាចដោះស្រាយវិបត្តិអាកាសធាតុមួយកម្រិតក្ដី តែពួកគេនឹងមិនអាចដោះស្រាយបញ្ហានោះទាំងស្រុងបានឡើយ។ សូមកត់សម្គាល់នូវមូលហេតុពីរយ៉ាង៖
«អ្វីដែលក្ងិចក្ងក់មិនអាចធ្វើឲ្យត្រង់វិញបានឡើយ»។—អ្នកទូន្មាន ១:១៥
មានន័យថា៖ សមត្ថភាពរបស់រដ្ឋាភិបាលនានាមានកម្រិត ព្រោះមនុស្សមិនអាចគ្រប់គ្រងខ្លួនឯងបានទេ។ (យេរេមា ១០:២៣) ទោះបីជាប្រជាជាតិនានាអាចរួបរួមគ្នាក៏ពិតមែន តែពួកគេនៅតែមិនអាចដោះស្រាយបញ្ហាក្នុងពិភពលោកនេះបានដដែល មិនថាពួកគេខំព្យាយាមយ៉ាងណាក៏ដោយ។
«ព្រោះមនុស្សនឹងស្រឡាញ់តែខ្លួនឯង ស្រឡាញ់ប្រាក់ . . . មិនព្រមស្រុះស្រួលគ្នា»។—ធីម៉ូថេទី២ ៣:២, ៣
មានន័យថា៖ គម្ពីរបានប្រកាសទុកជាមុនយ៉ាងច្បាស់ថាមនុស្សជាច្រើននៅសម័យយើងនឹងគិតតែប្រយោជន៍ខ្លួន ហើយមិនសុខចិត្តសហការគ្នាដើម្បីប្រយោជន៍អ្នកឯទៀតឡើយ។
មូលហេតុដែលយើងមានសង្ឃឹម
ប៉ុន្តែ អនាគតរបស់ភពផែនដីយើងមិនផ្អែកទៅលើសេចក្ដីសន្យារបស់រដ្ឋាភិបាលនានានោះទេ។ ព្រះឲ្យយើងនូវបុគ្គលម្នាក់ដែលមានសមត្ថភាពគ្រប់គ្រាន់គ្រប់គ្រងពិភពលោក គឺលោកយេស៊ូគ្រិស្ត។ គម្ពីរបានចែងអំពីលោកថា៖
«អំណាចគ្រប់គ្រងនឹងនៅលើស្មាគាត់។ គាត់នឹងត្រូវហៅថាទីប្រឹក្សាដ៏អស្ចារ្យ ព្រះដ៏ខ្លាំងក្លា បិតាជារៀងរហូត និងម្ចាស់នៃសេចក្ដីសុខសាន្ត»។—អេសាយ ៩:៦
លោកយេស៊ូជាស្ដេចនៃរាជាណាចក្រព្រះឬរដ្ឋាភិបាលនៅស្ថានសួគ៌។ (ម៉ាថាយ ៦:១០) លោកមានអំណាច ប្រាជ្ញា ហើយមានបំណងថែរក្សាភពផែនដីរបស់យើងនិងអស់អ្នកដែលរស់នៅផែនដី។ (ចម្រៀងសរសើរព្រះ ៧២:១២, ១៦) ក្រោមការគ្រប់គ្រងរបស់លោក រដ្ឋាភិបាលនៅស្ថានសួគ៌នេះនឹងបំផ្លាញអស់អ្នកដែល«កំពុងបង្ខូចផែនដី» ហើយធ្វើឲ្យបរិស្ថានផែនដីល្អប្រសើរឡើងវិញ។—ការបើកបង្ហាញ ១១:១៨; អេសាយ ៣៥:១, ៧
ដើម្បីស្វែងយល់ថែមទៀតអំពីដំណោះស្រាយដ៏ល្អបំផុតសម្រាប់បម្រែបម្រួលអាកាសធាតុ សូមអានអត្ថបទដែលមានចំណងជើងថា«ផលវិបាកពីបម្រែបម្រួលអាកាសធាតុ តើគម្ពីរចែងយ៉ាងណា?»។