ចូរចាំយាម!
ការខ្វះស្បៀងអាហារនៅទូទាំងពិភពលោកដោយសារសង្គ្រាមនិងបម្រែបម្រួលអាកាសធាតុ តើគម្ពីរចែងយ៉ាងណា?
សង្គ្រាមនៅអ៊ុយក្រែននិងឥទ្ធិពលពីបម្រែបម្រួលអាកាសធាតុ បានបន្តធ្វើឲ្យមានការខ្វះស្បៀងអាហារនៅទូទាំងពិភពលោក។ ជាពិសេស នេះកើតឡើងនៅប្រទេសដែលកំពុងអភិវឌ្ឍន៍ ហើយមនុស្សជាច្រើននៅប្រទេសទាំងនោះមិនមានអាហារបរិភោគគ្រប់គ្រាន់ទេ។
កាលពីថ្ងៃទី១៧ ខែកក្កដា ឆ្នាំ២០២៣ អគ្គលេខាធិការអង្គការសហប្រជាជាតិ លោកអង់តូនីញ៉ូ គុថេរិស បានប្រាប់ថា៖«ការផលិតស្បៀងអាហារនិងអាហារដែលអាចប្រើប្រាស់បានគឺមានកម្រិត ដោយសាររងផលប៉ះពាល់ពីសង្គ្រាម បម្រែបម្រួលអាកាសធាតុ តម្លៃថាមពលប្រើប្រាស់ឡើងថ្លៃ និងកត្តាផ្សេងទៀត»។
កាលពីថ្ងៃទី២៣ ខែកក្កដា ឆ្នាំ២០២៣ គេហទំព័រមួយ(Atalayar.com)បានរៀបរាប់ថា៖«ពួកអ្នកជំនាញបានព្យាករថា កាលដែលរុស្ស៊ីដកខ្លួនចេញពីកិច្ចព្រមព្រៀងនៃការនាំចេញគ្រាប់ធញ្ញជាតិពីប្រទេសអ៊ុយក្រែន នោះបានបណ្ដាលឲ្យមានការខ្វះស្បៀងអាហារនៅទូទាំងពិភពលោក។ បន្ថែមទៅទៀត បញ្ហានោះបានធ្វើឲ្យទំនិញនៅគ្រប់ទីកន្លែងកាន់តែឡើងថ្លៃ ជាពិសេសនៅអាហ្វ្រិកខាងជើង និងប្រទេសដែលស្ថិតនៅមជ្ឈិមបូព៌ា»។
សូមពិចារណាអ្វីដែលគម្ពីរចែង ស្ដីអំពីវិបត្តិស្បៀងអាហារនិងអនាគតរបស់យើង។
គម្ពីរបានប្រកាសទុកជាមុនអំពីវិបត្តិស្បៀងអាហារ
លោកយេស៊ូបានប្រាប់ទុកជាមុនថា៖«ប្រជាជាតិមួយនឹងលើកទ័ពទៅច្បាំងនឹងប្រជាជាតិមួយ ហើយរាជាណាចក្រមួយនឹងលើកទ័ពទៅច្បាំងនឹងរាជាណាចក្រមួយ ក៏នឹងមានការអត់ឃ្លាន»។—ម៉ាថាយ ២៤:៧
សៀវភៅការបើកបង្ហាញបានរៀបរាប់អំពីអ្នកជិះសេះបួននាក់។ អ្នកជិះសេះម្នាក់តំណាងឲ្យសង្គ្រាម។ អ្នកជិះសេះមួយទៀតតំណាងឲ្យការអត់ឃ្លាន គឺជាពេលដែលស្បៀងអាហារមានកម្រិត និងតម្លៃស្បៀងអាហារថ្លៃហួសហេតុ។ «ខ្ញុំឃើញសេះមួយសម្បុរខ្មៅ ហើយអ្នកដែលជិះសេះនោះមានជញ្ជីងនៅដៃ។ រួចមក ខ្ញុំឮសំឡេងមួយ . . . ថា៖‹ស្រូវសាលីមួយឃ្វាត់តម្លៃស្មើនឹងប្រាក់ឈ្នួលមួយថ្ងៃ ឯស្រូវបាលីបីឃ្វាត់តម្លៃស្មើនឹងប្រាក់ឈ្នួលមួយថ្ងៃដែរ›»។—ការបើកបង្ហាញ ៦:៥, ៦, Contemporary English Version
ទំនាយអំពីវិបត្តិស្បៀងអាហារកំពុងកើតឡើងនៅសព្វថ្ងៃនេះ ដែលគម្ពីរហៅថា«គ្រាចុងក្រោយបង្អស់»។ (ធីម៉ូថេទី២ ៣:១) ដើម្បីរៀនថែមទៀតអំពី«គ្រាចុងក្រោយបង្អស់»និងអ្នកជិះសេះទាំងបួននៅក្នុងសៀវភៅការបើកបង្ហាញ សូមមើលវីដេអូពិភពលោកបានប្រែប្រួលតាំងពីឆ្នាំ១៩១៤ និងសូមអានអត្ថបទដែលមានចំណងជើងថា«អ្នកជិះសេះទាំងបួន តើពួកគេជាអ្នកណា?»។
របៀបដែលគម្ពីរអាចជួយ
គម្ពីរមានដំបូន្មានល្អៗដែលអាចជួយយើងស៊ូទ្រាំនឹងកាលៈទេសៈពិបាក រួមទាំងការឡើងថ្លៃទំនិញឬការខ្វះស្បៀងអាហារដែរ។ សូមមើលឧទាហរណ៍ខ្លះក្នុងអត្ថបទដែលមានចំណងជើងថា«របៀបកាត់បន្ថយចំណាយ»។
គម្ពីរក៏ផ្ដល់សេចក្ដីសង្ឃឹមដល់យើងដែរ គឺថាអ្វីៗនឹងល្អប្រសើរជាង។ គម្ពីរសន្យាថានឹងមានគ្រាមួយដែល«ផែនដីនឹងមានស្រូវជាបរិបូរ» ហើយគ្រប់គ្នានឹងមានអាហារបរិភោគគ្រប់គ្រាន់។ (ចម្រៀងសរសើរព្រះ ៧២:១៦) ដើម្បីរៀនថែមទៀតអំពីសេចក្ដីសង្ឃឹមនេះ និងមូលហេតុដែលលោកអ្នកអាចទុកចិត្តសេចក្ដីសន្យានេះបាន សូមអានអត្ថបទដែលមានចំណងជើងថា«សេចក្ដីសង្ឃឹមដ៏ពិតប្រាកដកំពុងរង់ចាំអ្នក»។