សុវត្ថិភាពស្ត្រី ទស្សនៈគម្ពីរ
ស្ត្រីនិងយុវតីរាប់លាននាក់នៅទូទាំងពិភពលោកបានត្រូវគេរំលោភបំពាន។ តើអ្នកក៏ជាជនរងគ្រោះដែរទេ? សូមស្វែងយល់អំពីមូលហេតុដែលព្រះចាត់ទុកសុវត្ថិភាពស្ត្រីជារឿងសំខាន់ ហើយតើលោកនឹងធ្វើយ៉ាងណាចំពោះការធ្វើបាបស្ត្រីភេទ។
ស្ត្រីម្នាក់ឈ្មោះមើឌូ a ដែលរស់នៅប្រទេសឥណ្ឌា បានរៀបរាប់ថា៖ «ពេលខ្ញុំនៅក្មេង បងប្រុសរបស់ខ្ញុំបានវាយធ្វើបាបខ្ញុំ ហើយតែងជេរស្ដីខ្ញុំជារៀងរាល់ថ្ងៃ។ ក្រោយខ្ញុំរៀបការ ឪពុកម្ដាយក្មេកខ្ញុំបានធ្វើបាបខ្ញុំឥតស្រាកស្រាន្ត ពួកគាត់ប្រព្រឹត្តមកលើខ្ញុំដូចជាខ្ញុំបម្រើអ៊ីចឹង។ ហើយខ្ញុំបានគិតចង់សម្លាប់ខ្លួន»។
អង្គការសុខភាពពិភពលោកបានបញ្ជាក់ថា៖ «អំពើហិង្សាទៅលើស្ត្រីគឺមាននៅទូទាំងពិភពលោក»។ តាមការប៉ាន់ស្មានបានឲ្យដឹងថាយ៉ាងហោចណាស់ស្ត្រីម្នាក់ក្នុងចំណោមបីនាក់បានរងអំពើហិង្សានិងត្រូវគេចាប់រំលោភ។ ក្នុងករណីខ្លះស្ទើរតែបាត់បង់ជីវិតទៀតផង។
បើអ្នកធ្លាប់ជួបរឿងដូចនោះមែន អ្នកប្រហែលជាមានអារម្មណ៍ថា នៅកន្លែងណាក៏ដោយដែលអ្នកទៅ អ្នកនឹងត្រូវគេជេរប្រមាថ វាយធ្វើបាប ឬចាប់រំលោភមិនខាន។ ជាលទ្ធផល អ្នកប្រហែលជាមានអារម្មណ៍ដូចមនុស្សភាគច្រើនគិតថា‹មនុស្សស្រីមិនសំខាន់ទេ›។ ប៉ុន្តែ តើស្ត្រីពិតជាមានតម្លៃចំពោះព្រះទេ?
គម្ពីរបង្ហាញថាសុវត្ថិភាពស្ត្រីគឺសំខាន់ចំពោះព្រះ
តើព្រះមានទស្សនៈយ៉ាងណាចំពោះស្ត្រី?
បទគម្ពីរ៖ «ព្រះបានបង្កើតមនុស្ស . . . ជាប្រុសជាស្រី»។—ដើមកំណើត ១:២៧
អត្ថន័យ៖ ព្រះបានបង្កើតបុរសនិងស្ត្រី។ លោកចាត់ទុកពួកគេទាំងពីរភេទថាសមនឹងទទួលការគោរព។ បន្ថែមទៅទៀត លោកបង្គាប់ប្ដីឲ្យ‹ស្រឡាញ់ប្រពន្ធរបស់ខ្លួន ដូចស្រឡាញ់ខ្លួនគាត់› មិនមែនដោយព្យាយាមគ្រប់គ្រងនាងទេ ជាពិសេសមិននិយាយទ្រគោះបោះបោកឬប្រព្រឹត្តអំពើហិង្សាលើនាងឡើយ។ (អេភេសូរ ៥:៣៣; កូឡុស ៣:១៩) ច្បាស់ណាស់ សុវត្ថិភាពរបស់ស្ត្រីគឺសំខាន់ចំពោះលោក។
ម៉ារៀដែលរស់នៅប្រទេសអាហ្សង់ទីន បានរៀបរាប់ថា៖ «ពេលខ្ញុំនៅក្មេង ខ្ញុំត្រូវសាច់ញាតិចាប់រំលោភ។ ពេលខ្ញុំមានអាយុ១៧ឆ្នាំ ចៅហ្វាយខ្ញុំបានគំរាមបញ្ឈប់ខ្ញុំពីការងារបើខ្ញុំមិនព្រមរួមដំណេកជាមួយគាត់។ ក្រោយខ្ញុំរៀបការហើយ ទាំងប្ដីខ្ញុំទាំងឪពុកម្ដាយខ្ញុំនិងអ្នកជិតខាងមិនសូវឲ្យតម្លៃខ្ញុំទេ។ ប៉ុន្តែ ក្រោយមកខ្ញុំបានរៀនអំពីព្រះយេហូវ៉ា b ហើយដឹងថាលោកជាអ្នកបង្កើត។ លោកចាត់ទុកស្ត្រីថាមានតម្លៃ។ នេះពង្រឹងទំនុកចិត្តខ្ញុំថាលោកស្រឡាញ់ខ្ញុំ ហើយថាខ្ញុំមានតម្លៃចំពោះលោក»។
តើអ្វីអាចជួយរបួសផ្លូវចិត្តអ្នកឲ្យជាសះស្បើយ?
បទគម្ពីរ៖ «មានមិត្តភក្ដិដែលស្រឡាញ់យើងខ្លាំងជាងបងប្អូនយើងទៅទៀត»។—សុភាសិត ១៨:២៤
អត្ថន័យ៖ មិត្តសម្លាញ់ពិតនឹងជួយអ្នក។ បើអ្នកគិតថាការប្រាប់អារម្មណ៍ដល់នរណាម្នាក់ដែលអ្នកទុកចិត្តអាចជួយអ្នកបាន សូមនិយាយប្រាប់គាត់។
អ៊ីលីពដែលរស់នៅប្រទេសតួកគីបានរៀបរាប់ថា៖ «ខ្ញុំជាជនរងគ្រោះដែលគេរំលោភបំពានខាងផ្លូវភេទ ហើយអស់រយៈពេល២០ឆ្នាំខ្ញុំមិនបានប្រាប់នរណាម្នាក់ទេ។ ជាលទ្ធផល ខ្ញុំបានក្លាយទៅជាមនុស្សដែលឆាប់ធ្លាក់ទឹកចិត្ត ព្រួយបារម្ភច្រើន និងមិនសប្បាយរីករាយសោះ។ ប៉ុន្តែ ពេលខ្ញុំប្រាប់រឿងរបស់ខ្ញុំដល់នរណាម្នាក់ដែលពិតជាយកចិត្តទុកដាក់ស្ដាប់ នោះខ្ញុំមានអារម្មណ៍ធូរស្រាលក្នុងចិត្តខ្លាំងណាស់»។
បទគម្ពីរ៖ «កាលដែលអ្នករាល់គ្នាផ្ទេរកង្វល់ទាំងអស់ទៅព្រះ ពីព្រោះលោករមែងគិតអំពីអ្នករាល់គ្នា»។—ពេត្រុសទី១ ៥:៧
អត្ថន័យ៖ ពេលអ្នកអធិដ្ឋានទៅព្រះ លោកពិតជាយកចិត្តទុកដាក់ស្ដាប់អ្នក។ (ចម្រៀងសរសើរព្រះ ៥៥:២២; ៦៥:២) ដោយសារលោករមែងគិតអំពីអ្នក នោះលោកអាចជួយអ្នកឲ្យដឹងថាអ្នកមានតម្លៃខ្លាំងប៉ុនណាចំពោះលោក។
អាណាដែលរស់នៅប្រទេសបេលី បានរៀបរាប់ថា៖ «ការរៀនអំពីព្រះយេហូវ៉ាបានធ្វើឲ្យរបួសផ្លូវចិត្តដ៏ជ្រៅរបស់ខ្ញុំរលុបទៅបន្តិចម្ដងៗ។ ឥឡូវខ្ញុំអាចអធិដ្ឋានទៅព្រះ ហើយជម្រាបលោកនូវអ្វីទាំងអស់ដែលមានក្នុងចិត្តខ្ញុំ។ លោកប្រៀបដូចជាមិត្តម្នាក់ដែលពិតជាយល់អារម្មណ៍ខ្ញុំខ្លាំងណាស់»។
តើព្រះនឹងបំបាត់ចោលអំពើហិង្សាទៅលើស្ត្រីភេទឬទេ?
បទគម្ពីរ៖ «ព្រះយេហូវ៉ា . . . នឹងផ្ដល់យុត្តិធម៌ដល់កូនកំព្រា និងអ្នកដែលត្រូវគេសង្កត់សង្កិន ដើម្បីកុំឲ្យមនុស្សនៅផែនដីធ្វើឲ្យពួកគេភ័យខ្លាចទៀត»។—ចម្រៀងសរសើរព្រះ ១០:១៧, ១៨
អត្ថន័យ៖ មិនយូរទៀត ព្រះនឹងបំបាត់ចោលអំពើអយុត្តិធម៌ទាំងអស់ រួមបញ្ចូលអំពើឃោរឃៅនិងអំពើហិង្សាទៅលើស្ត្រី។
រ៉ាបឺថឺដែលរស់នៅប្រទេសម៉ិកស៊ិក បានរៀបរាប់ថា៖ «ពេលដែលខ្ញុំដឹងថាព្រះយេហូវ៉ានឹងបំបាត់ចោលអំពើហិង្សាទៅលើស្ត្រីភេទ នោះប្រៀបដូចជាលោកលាបថ្នាំសះលើមុខរបួសខ្ញុំអ៊ីចឹង ព្រោះនោះធ្វើឲ្យខ្ញុំមានសេចក្ដីសុខសាន្តក្នុងចិត្តយ៉ាងខ្លាំង»។
ដើម្បីស្វែងយល់ថែមទៀតអំពីសេចក្ដីសង្ឃឹមក្នុងគម្ពីរ អំពីមូលហេតុដែលអ្នកអាចទុកចិត្តសេចក្ដីសង្ឃឹមនេះ និងអំពីរបៀបដែលសាក្សីព្រះយេហូវ៉ាផ្ដល់ជំនួយដល់អ្នកតាមរយៈបទគម្ពីរ ស្នើសុំសាក្សីព្រះយេហូវ៉ាមកជួប។
a ឈ្មោះខ្លះបានត្រូវប្ដូរ។
b យេហូវ៉ាគឺជានាមរបស់ព្រះ។ (ចម្រៀងសរសើរព្រះ ៨៣:១៨) សូមមើលអត្ថបទដែលមានចំណងជើងថា«តើព្រះយេហូវ៉ាជានរណា?»។