របៀបដែលវិភាគទានរបស់អ្នកបានត្រូវប្រើ
កម្មវិធីមហាសន្និបាតដែលពួកគេ«បានឮនិងបានឃើញ»
ថ្ងៃទី១ ខែកក្កដា ឆ្នាំ២០២៤
អស់រយៈពេលជាង១៣០ឆ្នាំមកហើយ ដែលសាក្សីព្រះយេហូវ៉ាបានជួបជុំគ្នានៅមហាសន្និបាតជារៀងរាល់ឆ្នាំ។ តាមធម្មតាកម្មវិធីមហាសន្និបាត មានសុន្ទរកថាជាង៤០ ហើយក៏មានបទភ្លេង បទសម្ភាសន៍ និងវីដេអូផងដែរ។ ដើម្បីឲ្យកម្មវិធីនេះផ្ដល់ប្រយោជន៍និងជំរុញចិត្តអ្នកដែលចូលរួម ពួកគេត្រូវ‹ឮនិងឃើញ›ព័ត៌មានក្នុងកម្មវិធីនោះយ៉ាងច្បាស់។ (លូកា ២:២០) ដូច្នេះ តើវិភាគទានរបស់អ្នកបានត្រូវប្រើយ៉ាងដូចម្ដេច ដើម្បីឲ្យមនុស្សទាំងអស់អាចទទួលប្រយោជន៍ពីមហាសន្និបាត មិនថាពួកគេរស់នៅកន្លែងណាក៏ដោយ?
ប្រព័ន្ធសំឡេងនិងវីដេអូគឺសម្របទៅតាមតំបន់ដែលមានមហាសន្និបាត
ពហុកីឡាដ្ឋាននិងតំបន់ជាច្រើននៅបណ្ដាប្រទេសភាគខាងលិច តែងតែមានប្រព័ន្ធសំឡេងនិងវីដេអូរួចហើយ។ ប៉ុន្តែ ពេលយើងជួលកន្លែងមួយសម្រាប់មហាសន្និបាត យើងច្រើនតែប្រើប្រព័ន្ធឧបករណ៍របស់យើង។ ហេតុអ្វី? បងដាវីឌដែលធ្វើការនៅមន្ទីរចាត់ការពិភពលាកផ្នែកខាងការចាក់ផ្សាយ បានពន្យល់ថា៖«អគារខ្លះដែលយើងជួល បានត្រូវរៀបចំឡើងដើម្បីឲ្យអ្នកចូលរួមអាចស្ដាប់យ៉ាងចិត្តទុកដាក់អស់ជាង៦ម៉ោងទៅលើអ្វីដែលកម្មវិធីនោះផ្សាយជាចម្បង។ ជាឧទាហរណ៍ កន្លែងលេងកីឡាខ្លះប្រើប្រព័ន្ធផ្សាយសាធារណៈដើម្បីជូនដំណឹងខ្លីៗនិងចាក់បទភ្លេងកំដរ។ អេក្រង់វីដេអូរបស់ពួកគេ ច្រើនតែបង្ហាញពិន្ទុរបស់ក្រុមកីឡា បញ្ចាំងការឃោសនាពាណិជ្ជកម្ម និងចាក់ផ្សាយការប្រកួតនោះសាឡើងវិញប៉ុណ្ណោះ។ ប៉ុន្តែ សម្រាប់កម្មវិធីមហាសន្និបាតរបស់យើងវិញ យើងចង់ឲ្យអ្នកចូលរួម ទស្សនាវីដេអូដែលមានរយៈពេលវែងជាង ហើយចង់ឲ្យពួកគេស្ដាប់ឮនិងយល់ច្បាស់នូវព័ត៌មានទាំងអស់ដែលបានត្រូវថ្លែងនៅលើវេទិកា»។
កន្លែងមហាសន្និបាតនីមួយៗគឺពិសេស ដូច្នេះប្រព័ន្ធសំឡេងនិងវីដេអូត្រូវសម្របទៅតាមកន្លែងនោះ។ ក្រោយពីជ្រើសរើសកន្លែងធ្វើមហាសន្និបាតរួចហើយ បងប្អូនដែលបម្រើនៅផ្នែកចាក់ផ្សាយនៅការិយាល័យសាខា បានសម្រេចថាកន្លែងណាដែលអ្នកចូលរួមត្រូវអង្គុយ ហើយនេះអាស្រ័យទៅលើចំនួនអ្នកចូលរួមនិងទំហំអគារនោះអាចដាក់បានមនុស្សប៉ុន្មាននាក់។ បន្ទាប់មក បងប្អូនទាំងនោះគណនាចម្ងាយទីតាំងដែលអ្នកថ្លែងត្រូវឈរ រួមទាំងទីតាំងសម្រាប់ដំឡើងអេក្រង់វីដេអូនិងឧបករណ៍ផ្សេងទៀត ដើម្បីធ្វើយ៉ាងណាឲ្យអ្នកចូលរួមទាំងអស់អាចឃើញនិងស្ដាប់ឮកម្មវិធីមហាសន្និបាត។
បងប្អូនពីផ្នែកខាងការចាក់ផ្សាយតាមតំបន់(LBD) កំពុងធ្វើតាមការណែនាំយ៉ាងយកចិត្តទុកដាក់
យ៉ាងណាមិញ ការរៀបចំប្រព័ន្ធសំឡេងនិងវីដេអូនៅមហាសន្និបាតគឺកាន់តែស្មុគស្មាញជាង ពេលដែលកម្មវិធីនោះមានច្រើនភាសា។ បើត្រូវបកប្រែទៅជាភាសាផ្សេង អ្នកបកប្រែត្រូវមើលនិងឮសំឡេងកម្មវិធីនោះ រួចព័ត៌មានបកប្រែត្រូវផ្សាយតាមប៉ុស្តិ៍វិទ្យុសម្រាប់ពួកអ្នកដែលយល់ភាសានោះអាចស្ដាប់បាន។ យើងពិតជាសប្បាយណាស់ ដោយសារមានអ្នកជួយខាងប្រព័ន្ធទាំងនោះ ទើបអ្នកដែលចូលរួមទាំងអស់អាចមើលនិងស្ដាប់វីដេអូនៅពេលដំណាលគ្នាជាង៨ភាសា។ បងដាវីឌបានរៀបរាប់ថា៖«ប្រព័ន្ធទាំងនេះស្មុគស្មាញណាស់ ហើយបងប្អូនដែលស្ម័គ្រចិត្តជួយក៏ទទួលការបង្ហាត់បង្រៀនច្រើនដែរ»។
ការិយាល័យសាខាភាគច្រើនមានឧបករណ៍សំឡេងនិងវីដេអូសម្រាប់ប្រើជារៀងរាល់ឆ្នាំ។ ហេតុនេះហើយ បងប្អូនរៀបចំឧបករណ៍នីមួយៗដើម្បីងាយស្រួលដឹកជញ្ជូនពីមហាសន្និបាតមួយទៅមហាសន្និបាតមួយ។ ឧទាហរណ៍ គ្រាន់តែការិយាល័យសាខាអាម៉េរិកប៉ុណ្ណោះបានចំណាយជាង២០០.០០០ដុល្លារ aជារៀងរាល់ឆ្នាំដើម្បីដឹកជញ្ជូនឧបករណ៍ទាំងនោះ។ ប៉ុន្តែ ការចំណាយនេះគឺថោកជាងតម្លៃដែលត្រូវចំណាយសម្រាប់ទិញនិងថែទាំឧបករណ៍បន្ថែម។ បងស្ទីវើនដែលជាអ្នកមើលការខុសត្រូវប្រព័ន្ធសំឡេងនិងវីដេអូនៅមហាសន្និបាតមួយក្នុងប្រទេសកាណាដា បានរៀបរាប់ថា៖«ក្រុមប្រព័ន្ធសំឡេងនិងវីដេអូខំអស់ពីសមត្ថភាពដើម្បីធ្វើឲ្យប្រាកដថាគ្រឿងខ្ចៅខ្យងនិងខ្សែផ្សេងៗ ត្រូវថែទាំនិងវេចខ្ចប់យ៉ាងត្រឹមត្រូវនិងមានសុវត្ថិភាព សម្រាប់ត្រៀមបញ្ជូនទៅមហាសន្និបាតមួយទៀត»។
ការមាននិងការថែទាំឧបករណ៍ទាំងនោះ
តាមធម្មតា តម្លៃជួលឧបករណ៍សំឡេងនិងវីដេអូគឺថ្លៃខ្លាំងណាស់ ហើយគុណភាពរបស់វាច្រើនតែអន់និងមិនសូវថែទាំបានល្អប៉ុន្មានទេ។ ម្ល៉ោះហើយ ជាទូទៅយើងទិញឧបករណ៍ដែលយើងត្រូវការ។ ថ្មីៗនេះ អេក្រង់វីដេអូសម្រាប់ព្យួរ(LEDវីដេអូ)ទំហំប្រាំម៉ែត្រគុណនឹងបីម៉ែត្រ មានតម្លៃ២៤.០០០ដុល្លារ ហើយសូម្បីតែខ្សែមេក្រូមួយដែលមានប្រវែង១៥ម៉ែត្រប៉ុណ្ណោះ មានតម្លៃប្រហែល២០ដុល្លារ។ ហេតុនេះ បងប្អូនដែលធ្វើការក្នុងផ្នែកខាងការចាក់ផ្សាយនិងផ្នែកទិញទំនិញ ត្រូវ«គិតគូរជាមុនសិន» មុននឹងទិញឧបករណ៍ណាមួយ។ (លូកា ១៤:២៨) ជាឧទាហរណ៍ ពួកគាត់បានសួរខ្លួនថា តើមនុស្សច្រើនប៉ុណ្ណានឹងទទួលប្រយោជន៍ពីឧបករណ៍ទាំងនេះ? តើការទិញឧបករណ៍ថ្មីជាវិធីល្អបំផុតឬទេ? តើយើងមានកន្លែងធំល្មមដើម្បីទុកឧបករណ៍នោះទេ? ហើយតើយើងមានឧបករណ៍ល្មមនិងមានបងប្អូនស្ម័គ្រចិត្តគ្រប់គ្រាន់ដែលបានទទួលការបង្ហាត់បង្រៀនក្នុងការថែទាំឧបករណ៍ទាំងនោះឬទេ?
ដើម្បីឲ្យឧបករណ៍សំឡេងនិងវីដេអូអាចប្រើប្រាស់បានយូរនិងសន្សំសំចៃប្រាក់វិភាគទាន យើងមានការថែទាំនិងជួសជុលជាទៀងទាត់។ ណាមួយទៀត ពេលយើងដឹកជញ្ជូននិងលើកដាក់ឧបករណ៍ទាំងនោះយើងត្រូវប្រុងប្រយ័ត្នមិនឲ្យមានការបាក់បែកឬខូចឡើយ។
ការថែទាំនិងជួសជុលឧបករណ៍សំឡេងជួយឲ្យប្រើប្រាស់បានយូរជាង
អ្នកឯទៀតសរសើរគុណភាពកម្មវិធីរបស់យើង
អ្នកខ្លះដែលមិនមែនជាសាក្សីព្រះយេហូវ៉ា បានស្ងើចសរសើរគុណភាពសំឡេងនិងវីដេអូនៅមហាសន្និបាតរបស់យើង។ ជាឧទាហរណ៍ នៅមហាសន្និបាតមួយ បុគ្គលិកម្នាក់នៃក្រុមហ៊ុនដ៏ធំបំផុតខាងប្រព័ន្ធចាក់ផ្សាយ បាននិយាយសរសើរគុណភាពនៃការរៀបចំឧបករណ៍របស់យើង។ បងចនណាថិនដែលជួយដំឡើងប្រព័ន្ធសំឡេងនិងវីដេអូនៅមហាសន្និបាត បានរៀបរាប់ថា៖«បុរសនោះនឹកអស្ចារ្យណាស់ពេលដឹងថាបងប្អូនក្នុងក្រុមរបស់យើងទាំងអស់សុទ្ធតែជាអ្នកស្ម័គ្រចិត្តនិងមិនមែនជាអ្នកជំនាញស្រាប់ទេ។ គាត់បាននិយាយថាក្រុមហ៊ុនគាត់ត្រូវចំណាយពេលអស់ប្រាំថ្ងៃដើម្បីដំឡើងប្រព័ន្ធទាំងនោះ តែបងប្អូនយើងចំណាយពេលតែមួយថ្ងៃកន្លះប៉ុណ្ណោះ»។ នៅមហាសន្និបាតមួយទៀត អ្នកគ្រប់គ្រងអគារដែលយើងជួលសម្រាប់មហាសន្និបាតនោះ បាននិយាយថា៖«នៅទីនេះមានអ្នកជំនាញខាងសំឡេងនិងវីដេអូជាច្រើន តែខ្ញុំមិនដែលឃើញអ្នកដែលធ្វើការយ៉ាងជំនាញនិងប៉ិនប្រសប់ដល់កម្រិតនេះទេ»។
បងប្អូនកំពុងសប្បាយស្ដាប់និងទស្សនាកម្មវិធីមហាសន្និបាត
តើអ្នកទទួលប្រយោជន៍ពីប្រព័ន្ធសំឡេងនិងវីដេអូនៅមហាសន្និបាតឬទេ? អ្នកប្រហែលជាមានអារម្មណ៍ដូចបងដាវីឌដែលរស់នៅប្រទេសអង់គ្លេស។ គាត់បាននិយាយថា៖«ខ្ញុំអាយុ៨៨ឆ្នាំ ហើយបានចូលរួមមហាសន្និបាតស្ទើរតែពេញមួយជីវិតខ្ញុំហើយ។ ប៉ុន្តែ ឥឡូវខ្ញុំស្រួលផ្ចង់អារម្មណ៍ជាងក្នុងកម្មវិធីមហាសន្និបាត ព្រោះរូបភាពក្នុងវីដេអូច្បាស់ល្អ ហើយខ្ញុំមានអារម្មណ៍ថាកម្មវិធីទាំងមូលកន្លងទៅលឿនណាស់»។ បងមីកឺលដែលរស់នៅប្រទេសនីហ្សេរីយ៉ា បាននិយាយថា៖«ដោយសារបងប្អូនរបស់យើងស្រួលស្ដាប់អ្នកថ្លែងនិងស្រួលមើលវីដេអូ នោះពួកគេអាចផ្ចង់អារម្មណ៍លើកម្មវិធីមហាសន្និបាត»។
ពេលដែលអ្នកចូលរួមមហាសន្និបាតតាមភូមិភាគនិងមហាសន្និបាតពិសេសចំណងជើងថា«ចូរប្រកាសដំណឹងល្អ!» សូមឆ្លៀតពេលបន្តិចដើម្បីគិតអំពីកិច្ចការទាំងអស់ដែលបានធ្វើឡើងដើម្បីជួយអ្នកស្រួលស្ដាប់និងមើលឃើញកម្មវិធីទាំងមូល។ យើងពិតជាដឹងគុណខ្លាំងណាស់ចំពោះវិភាគទានរបស់អ្នក។ មិនថាអ្នកជូនដោយផ្ទាល់ឬតាមរយៈគេហទំព័រdonate.pr418.comក្ដី វិភាគទានរបស់អ្នកធ្វើឲ្យកម្មវិធីមហាសន្និបាតអាចដំណើរការបាន។ សូមអរគុណចំពោះចិត្តទូលាយរបស់អ្នក។
a ប្រាក់ដុល្លារទាំងអស់នៅក្នុងអត្ថបទនេះសំដៅទៅលើដុល្លារអាម៉េរិក។
លោកអ្នកក៏ប្រហែលជាចូលចិត្តដែរ
មហាសន្និបាត
តើមានកម្មវិធីអ្វីខ្លះនៅមហាសន្និបាតរបស់យើង?
ជារៀងរាល់ឆ្នាំសាក្សីព្រះយេហូវ៉ានៅទូទាំងពិភពលោកចូលរួមកម្មវិធីមហាសន្និបាតដែលមានរយៈពេលបីថ្ងៃ។ ប៉ុន្តែតើមានកម្មវិធីអ្វីខ្លះនៅមហាសន្និបាតរបស់យើង។ សូមចូលរួមដើម្បីដឹង។
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើកិច្ចការរបស់សាក្សីព្រះយេហូវ៉ាទទួលប្រាក់ឧបត្ថម្ភយ៉ាងដូចម្ដេច?
យើងជៀសវាងមិនប្រើវិធីដូចដែលវិហារជាច្រើនប្រើទេ។
