របៀបដែលវិភាគទានរបស់អ្នកបានត្រូវប្រើ
អគារដែលលើកកិត្តិយសគ្រូដ៏ឧត្តមរបស់យើង
ថ្ងៃទី១ ខែកក្កដា ឆ្នាំ២០២៣
ព្រះយេហូវ៉ាពេញចិត្តអប់រំរាស្ត្ររបស់លោក។ ហេតុនេះហើយបានជាអង្គការរបស់លោកមានសាលាផ្សេងៗដែលបង្ហាត់បង្រៀនសិស្សក្នុងការបំពេញភារកិច្ចរបស់ពួកគេ។ សាលាមួយក្នុងចំណោមសាលាទាំងនោះគឺសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។ នាប៉ុន្មានឆ្នាំកន្លងមកនេះ អង្គការរបស់លោកមិនគ្រាន់តែផ្ដោតអារម្មណ៍ទៅលើកម្មវិធីអប់រំប៉ុណ្ណោះទេ តែក៏ផ្ដោតអារម្មណ៍ទៅលើអគារសម្រាប់អប់រំដែរ។ គោលដៅចម្បងគឺដើម្បីបង្កើនបរិយាកាសល្អក្នុងការសិក្សាសម្រាប់សិស្សនិងអ្នកបង្រៀន។ តើវិភាគទានរបស់អ្នកអាចជួយយើងឲ្យសម្រេចគោលដៅនេះយ៉ាងដូចម្ដេច?
សិស្សច្រើនជាងក្នុងបរិយាកាសដែលល្អប្រសើរជាង
អស់ជាច្រើនឆ្នាំ សាលាកិច្ចបម្រើផ្សេងៗបានត្រូវរៀបចំឡើងនៅសាលប្រជុំនិងសាលសន្និបាត។ ហេតុអ្វីថ្មីៗនេះយើងសាងសង់និងជួសជុលអគារផ្សេងៗដែលទុកប្រើតែសម្រាប់សាលាកិច្ចបម្រើប៉ុណ្ណោះ? សូមពិចារណាចំណុចបីយ៉ាង។
មានសេចក្ដីត្រូវការច្រើនជាង។ បងគ្រិស្តតូហ្វើ មេវើ ដែលជាជំនួយការគណៈកម្មាធិការកិច្ចបម្រើនៃគណៈអភិបាល បាននិយាយថា៖«ការិយាល័យសាខាបានរាយការណ៍ថា ពួកគេត្រូវការបងប្អូនច្រើនថែមទៀតក្នុងកិច្ចបម្រើផ្សាយ។ ជាឧទាហរណ៍នៅឆ្នាំ២០១៩ ការិយាល័យសាខាប្រទេសប្រេស៊ីល បានប៉ាន់ស្មានថាត្រូវការសិស្សដែលបញ្ចប់វគ្គសិក្សាសាលាអ្នកផ្សាយដំណឹងល្អអំពីរាជាណាចក្រព្រះ ប្រហែល៧.៦០០នាក់ថែមទៀត ដើម្បីទៅផ្សព្វផ្សាយនៅតំបន់ដែលមានសេចក្ដីត្រូវការច្រើនជាង ហើយស្ថិតក្រោមការមើលខុសត្រូវនៃការិយាល័យសាខានោះ»។ នៅការិយាល័យសាខាអាម៉េរិក បានរាយការណ៍ថាត្រូវការអ្នកផ្សាយដែលមានគុណសម្បត្តិគ្រប់គ្រាន់ជាច្រើន ដើម្បីបង្ហាត់បង្រៀនអ្នកឯទៀតក្នុងកិច្ចផ្សព្វផ្សាយពិសេសនៅកន្លែងសាធារណៈដែលមានមនុស្សច្រើនកុះករ នៅកំពង់ផែ និងនៅពន្ធនាគារ។ បន្ថែមទៅទៀត យើងត្រូវការបងប្អូនជាច្រើន បម្រើនៅផ្នែករចនាប្លង់និងសាងសង់តាមតំបន់ និងបម្រើជាគណៈកម្មាធិការខាងសម្ព័ន្ធការពេទ្យ។ ដូច្នេះ សិស្សដែលបញ្ចប់សាលាអ្នកផ្សាយដំណឹងល្អអាចបំពេញសេចក្ដីត្រូវការទាំងនោះ។
មានការចុះឈ្មោះកាន់តែច្រើន។ ការិយាល័យសាខាជាច្រើនបានទទួលពាក្យសុំពីសិស្សកាន់តែច្រើនជាងមុន។ ជាឧទាហរណ៍ គ្រាន់តែមួយឆ្នាំប៉ុណ្ណោះនៅការិយាល័យសាខាប្រេស៊ីលបានទទួលពាក្យសុំប្រហែល២.៥០០ច្បាប់។ ប៉ុន្តែ ដោយសារចំនួនអគារសម្រាប់បង្ហាត់បង្រៀនមានកម្រិត ការិយាល័យសាខានោះអាចទទួលសិស្សបានតែ៩៥០នាក់ប៉ុណ្ណោះ។
កន្លែងស្នាក់នៅសមរម្យ។ ពេលដែលសិស្សចូលសាលានោះនៅសាលប្រជុំឬសាលសន្និបាត តាមធម្មតាពួកគេស្នាក់នៅផ្ទះបងប្អូនរួមជំនឿដែលនៅតំបន់នោះ។ ការរៀបចំនេះដំណើរការយ៉ាងរលូនក្នុងប្រទេសដែលមានសាលាអ្នកផ្សាយដំណឹងល្អប្រហែលពីរបីដងក្នុងមួយឆ្នាំ តែក្នុងប្រទេសដែលមានសាលានោះញឹកញាប់ជាង គឺពិបាកឲ្យអ្នកផ្សាយក្នុងតំបន់នោះទទួលសិស្សឲ្យស្នាក់នៅក្នុងផ្ទះរបស់ពួកគេអស់ជាច្រើនខែ។ ដូច្នេះ អគារផ្សេងៗបានត្រូវរៀបចំនៅជិតថ្នាក់រៀននោះ ហើយបានត្រូវរៀបចំជាពិសេសដើម្បីបំពេញតម្រូវការសិស្ស។
អគារដែលមានថ្នាក់រៀនមួយ មានកន្លែងស្នាក់នៅសម្រាប់អ្នកបង្រៀន និងសម្រាប់សិស្សប្រហែល៣០នាក់ អាចត្រូវចំណាយអស់រាប់លានដុល្លារអាម៉េរិក អាស្រ័យលើទីតាំងនិងកត្តាផ្សេងៗ។
ផ្នែកផ្សេងៗនៃអគារសាលា
តាមធម្មតា សាលាផ្សេងៗបានត្រូវរៀបចំឡើងនៅជាយក្រុង តែនៅជិតកន្លែងធ្វើដំណើរសាធារណៈ។ មុននឹងរៀបចំ ត្រូវគិតទុកជាមុនថា តើតំបន់នោះមានអ្នកផ្សាយច្រើនដែលអាចជួយឲ្យសាលានោះដំណើរការយ៉ាងរលូន និងជួយថែទាំអគារសាលានោះឬយ៉ាងណា។
អគារសាលានោះមានបណ្ណាល័យ កន្លែងសិក្សា កុំព្យូទ័រ ម៉ាស៊ីនបោះពុម្ព និងឧបករណ៍ផ្សេងទៀត។ អគារសាលាភាគច្រើនមានបន្ទប់ញ៉ាំបាយសម្រាប់សិស្ស និងអ្នកបង្រៀនបរិភោគជាមួយគ្នា ហើយមានបរិវេណទំនេរខ្លះសម្រាប់ហាត់ប្រាណនិងលម្ហែកាយ។
សូម្បីតែថ្នាក់រៀនក៏មានលក្ខណៈពិសេសដែរ។ បងត្រយដែលបម្រើនៅផ្នែករចនាប្លង់និងសាងសង់ទូទាំងពិភពលោកនៅវ័រវិក រដ្ឋញូវយ៉ក បាននិយាយថា៖«យើងបានពិភាក្សាជាមួយការិយាល័យខាងសាលាកិច្ចបម្រើឲ្យជួយយើងដើម្បីរៀបចំថ្នាក់រៀនឲ្យមានបរិយាកាសល្អ។ បងប្រុសៗនៅទីនោះបានឲ្យការណែនាំដល់យើងស្ដីអំពីទំហំបន្ទប់រៀន ការរៀបចំបន្ទប់ និងការដាក់អំពូលភ្លើង ព្រមទាំងឧបករណ៍សំឡេងនិងវីដេអូ»។ បងហ្សូលតានដែលជាអ្នកបង្រៀនម្នាក់ក្នុងសាលាអ្នកផ្សាយដំណឹងល្អនៅហុងគ្រីបាននិយាយអំពីការរៀបចំឧបករណ៍សំឡេងថា៖«ដំបូងយើងមិនមានមេក្រូសម្រាប់សិស្សឆ្លើយទេ ដូច្នេះយើងលើកទឹកចិត្តសិស្សឲ្យឆ្លើយចម្លើយឮៗ។ ប៉ុន្តែ ឥឡូវនេះយើងមានមេក្រូនៅតាមតុទាំងអស់របស់សិស្ស។ ដូច្នេះ បញ្ហាសំឡេងបានដោះស្រាយហើយ!»។
«ភ្ញៀវពិសេសរបស់ព្រះយេហូវ៉ា»
តើការមានអគារសាលាល្អជាងមានឥទ្ធិពលយ៉ាងណាទៅលើសិស្សនិងអ្នកបង្រៀន? បងអេនចឺឡាដែលជាសិស្សម្នាក់ក្នុងសាលាអ្នកផ្សាយដំណឹងល្អ នៅទីក្រុងផាមខូស រដ្ឋផ្លរីដា សហរដ្ឋអាម៉េរិក បាននិយាយថា៖«បរិយាកាសពិតជាសុខសាន្តណាស់។ អ្វីៗទាំងអស់មិនថាថ្នាក់រៀនឬបន្ទប់របស់យើងទេពិតជារៀបចំបានល្អណាស់។ ដូច្នេះ យើងស្រួលផ្ដោតអារម្មណ៍ទៅលើការសិក្សាជាង»។ នៅប្រទេសហុងគ្រី បងឆឹបឹដែលជាអ្នកបង្រៀនម្នាក់ពិតជាសប្បាយណាស់ដែលមានឱកាសបរិភោគអាហារជាមួយនឹងសិស្ស គាត់បាននិយាយថាឱកាសនោះ«ជួយសិស្សឲ្យមានអារម្មណ៍ស្រួលក្នុងការប្រាប់អារម្មណ៍របស់ពួកគេដល់យើងដែលជាអ្នកបង្រៀន ហើយពួកគេក៏ចែករំលែកនូវបទពិសោធន៍របស់ពួកគេដែរ។ ហេតុនេះហើយ យើងអាចស្គាល់សិស្សច្បាស់ជាង។ ជាលទ្ធផល យើងអាចប្រើកម្មវិធីបង្រៀនយ៉ាងមានប្រសិទ្ធភាពដែលស្របទៅតាមសេចក្ដីត្រូវការរបស់សិស្ស។
សិស្សនិងអ្នកបង្រៀនចាត់ទុកអគារសាលានោះ ជាពរពីព្រះយេហូវ៉ាដែលជា«គ្រូបង្រៀនដ៏ឧត្ដមបំផុត»។ (អេសាយ ៣០:២០, ២១) បងស្រីម្នាក់នៅប្រទេសហ្វីលីពីនដែលបានចូលសាលាអ្នកផ្សាយដំណឹងល្អ ហើយបានស្នាក់នៅអគារមួយដែលគេបានកែច្នៃធ្វើជាអគារសាលាបាននិយាយថា៖«បរិយាសកាសនៅសាលានោះបានរំលឹកយើងថាយើងមិនគ្រាន់តែជាសិស្សប៉ុណ្ណោះទេ តែយើងក៏ជាភ្ញៀវដ៏ពិសេសរបស់ព្រះយេហូវ៉ាដែរ។ លោកចង់ឲ្យយើងសប្បាយសិក្សាបណ្ដាំរបស់លោកយ៉ាងពេញលេញ»។
ដោយសារវិភាគទានរបស់អ្នក អគារផ្សេងៗសម្រាប់អប់រំពីគម្ពីរបានត្រូវសាងសង់ ជួសជុល និងថែទាំ។ វិភាគទានភាគច្រើនបានត្រូវជូនតាមរយៈគេហទំព័រdonate.pr418.com។ យើងអរគុណខ្លាំងណាស់សម្រាប់វិភាគទានដោយចិត្តទូលាយរបស់អ្នក។
ផ្លូវចូលអគារនៅក្រុងផាមខូស រដ្ឋផ្លរីដា សហរដ្ឋអាម៉េរិក
ប្លង់គំរូនៃវិហារនៅសម័យលោកយេស៊ូក្នុងបន្ទប់ទទួលភ្ញៀវនៅក្រុងផាមខូស រដ្ឋផ្លរីដា សហរដ្ឋអាម៉េរិក
ការមកដល់សាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ ប្រទេសប្រេស៊ីល
នៅក្នុងថ្នាក់រៀន ប្រទេសប្រេស៊ីល
ការមកដល់សាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ ប្រទេសហ្វីលីពីន
អ្នកបង្រៀននិងសិស្សកំពុងបរិភោគអាហារនៅបន្ទប់ញ៉ាំបាយយ៉ាងសប្បាយរីករាយ ប្រទេសហ្វីលីពីន
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើកិច្ចការរបស់សាក្សីព្រះយេហូវ៉ាទទួលប្រាក់ឧបត្ថម្ភយ៉ាងដូចម្ដេច?
យើងជៀសវាងមិនប្រើវិធីដូចដែលវិហារជាច្រើនប្រើទេ។
