របៀបដែលវិភាគទានរបស់អ្នកបានត្រូវប្រើ
អគារផ្សេងៗដែលជួយគាំទ្រកិច្ចផ្សព្វផ្សាយរបស់យើង
ថ្ងៃទី២០ ខែតុលា ឆ្នាំ២០២៣
គណៈអភិបាលពិតជាចង់ប្រើវិភាគទានដើម្បីធ្វើយ៉ាងណាឲ្យមានអគារផ្សេងៗដែលជួយយើងក្នុងកិច្ចការផ្សព្វផ្សាយអំពីរាជាណាចក្រព្រះ។ ជាឧទាហរណ៍ ក្នុងអំឡុងឆ្នាំកិច្ចបម្រើ២០២៣ សាជីវកម្មនៃការិយាល័យសាខារបស់សាក្សីព្រះយេហូវ៉ា បានចំណាយប្រាក់ជាង៥០០លានដុល្លារ ដើម្បីទិញ និងសាងសង់ ដើម្បីថែទាំនិងកែលម្អសាលប្រជុំនិងសាលសន្និបាតជាថ្មីដែលមាននៅទូទាំងពិភពលោក។ a ចំនួនទឹកប្រាក់នេះមិនរួមបញ្ចូលការចំណាយរបស់ក្រុមជំនុំផ្ទាល់ទៅលើការថែទាំសាលប្រជុំនោះទេ។
បន្ថែមទៅទៀត ប្រាក់វិភាគទានក៏បានត្រូវប្រើដើម្បីសាងសង់និងថែទាំអគារការិយាល័យសាខាផងដែរ ព្រោះនោះជួយចាត់ចែងនិងគាំទ្រកិច្ចការផ្សព្វផ្សាយនៅទូទាំងពិភពលោក។ ការសាងសង់នេះបានត្រូវធ្វើឡើងតាមរបៀបសាមញ្ញជាង ដើម្បីយើងអាចប្រើថវិកាមួយចំនួនក្នុងការសាងសង់និងកែលម្អសាលប្រជុំនិងសាលសន្និបាតនៅទូទាំងពិភពលោក។ ទោះជាយ៉ាងនោះក្ដី តម្លៃជួសជុលនិងកែលម្អ ឬការប្ដូរទីតាំងអគារការិយាល័យសាខា ក៏នៅតែត្រូវចំណាយច្រើនដែរ។ ហេតុអ្វីគម្រោងទាំងនេះសំខាន់ម្ល៉េះ? តើការិយាល័យសាខាគាំទ្រកិច្ចការផ្សព្វផ្សាយតាមរបៀបណា? សូមស្វែងរកចម្លើយ។
«ការកែលម្អជាថ្មី»
អគារការិយាល័យសាខាជាច្រើនបានត្រូវសាងសង់ជាង៣០ឬ៤០ឆ្នាំមកហើយ! បងនីកូឡាសដែលនៅផ្នែករចនាប្លង់និងសាងសង់ បានពន្យល់ថា៖«ទោះជាមានការថែទាំអគារចាស់បានយ៉ាងល្អក៏ដោយ ក៏អាចមានបញ្ហាធំនៅថ្ងៃក្រោយដែរ។ ដូច្នេះ ការកែលម្អជាថ្មីអាចជួយឲ្យអគារនោះប្រើប្រាស់បានយូរជាង»។
ចំនួនអ្នកផ្សាយនៅទូទាំងពិភពលោកចេះតែកើនឡើងជាលំដាប់ ដូច្នេះចំនួនការិយាល័យសាខាក៏មានកាន់តែច្រើនដែរ។ ម្ល៉ោះហើយ អគារបេតអែលត្រូវកែលម្អជាថ្មីដើម្បីស្របទៅតាមតម្រូវការរបស់អង្គការ។ ដើម្បីគាំទ្រការរីកចម្រើននេះ យើងត្រូវការបងប្អូនថែមទៀតបម្រើនៅការិយាល័យសាខា។ ដូច្នេះ អគារការិយាល័យសាខាជាច្រើនបានត្រូវពង្រីកឲ្យធំជាង!
សុវត្ថិភាពក៏ជាកត្តាសំខាន់ដែរ។ ដោយសារយើងកំពុងរស់នៅគ្រាចុងក្រោយបង្អស់នៃរបៀបរបបពិភពលោកនេះ យើងជួបគ្រោះមហន្តរាយធម្មជាតិកាន់តែច្រើនឡើងៗ។ (លូកា ២១:១១) ពេលយើងប្រើវិធីសាស្ត្រថ្មីក្នុងការជួសជុលកែលម្អ នោះនឹងផ្ដល់សុវត្ថិភាពច្រើនជាងដល់បងប្អូនដែលធ្វើការក្នុងអគារបេតអែល។ ការកែលម្អជាថ្មីក៏អាចជួយឲ្យបងប្អូនស្រួលប្រើអគារទាំងនោះក្នុងការចាត់ចែងកិច្ចការផ្ដល់ជំនួយ និងបន្តគាំទ្រកិច្ចការផ្សព្វផ្សាយបន្ទាប់ពីមានគ្រោះមហន្តរាយធម្មជាតិដែរ។
«ព្រះយេហូវ៉ាបានឲ្យពរដល់ការសម្រេចចិត្តនេះ»
ក្នុងអំឡុងឆ្នាំកិច្ចបម្រើ២០២៣ ក្រោមការដឹកនាំពីគណៈអភិបាល បងប្អូនបានធ្វើកិច្ចការមួយចំនួនទាក់ទងនឹងកិច្ចការសាងសង់នៅអគារការិយាល័យសាខា៤៣កន្លែង។ នេះមានន័យថាអគារការិយាល័យសាខាជិតពាក់កណ្ដាលនៅទូទាំងពិភពលោកកំពុងដំណើរការជួសជុលនិងសាងសង់។ សូមពិនិត្យមើលឧទាហរណ៍ខ្លះដែលបង្ហាញអំពីប្រយោជន៍នៃកិច្ចការនេះ។
អង់ហ្គោឡា។ បងម៉ាតដែលជាសមាជិកគណៈកម្មាធិការការិយាល័យសាខាអង់ហ្គោឡា បាននិយាយថា៖«យើងពិតជាមានឯកសិទ្ធិណាស់ដែលបានឃើញទំនាយនៅហាកាយ ២:៧ បានសម្រេចតាមរបៀបដ៏អស្ចារ្យ។ តើតាមរបៀបណា? គឺគ្រាន់តែក្នុងរយៈពេល១០ឆ្នាំប៉ុណ្ណោះ យើងឃើញថាចំនួនអ្នកផ្សាយបានកើនឡើងដល់ទៅ៦០ភាគរយ! ដូច្នេះ ដើម្បីគាំទ្រអ្នកផ្សាយទាំងនោះ យើងត្រូវការបងប្អូនបម្រើនៅបេតអែលច្រើនជាងមុនដល់ទៅបីដង។ ប៉ុន្តែ ដោយសារទំហំអគារបេតអែលមានកម្រិត នោះយើងមិនអាចអញ្ជើញបងប្អូនឲ្យមកធ្វើការនៅបេតអែលដូចដែលយើងត្រូវការទេ។ ហេតុនេះហើយ បងប្អូនបេតអែលជាច្រើនត្រូវធ្វើការនឿយហត់ជាងនិងច្រើនម៉ោងជាង»។
ទីតាំងការិយាល័យថ្មី(ស្ដាំ)ធ្វើឲ្យមានភាពងាយស្រួលក្នុងការធ្វើការ
បងប្អូនខ្លះបានត្រូវចាត់ឲ្យទៅការិយាល័យសាខាដើម្បីពិនិត្យមើលថាការិយាល័យសាខានោះត្រូវពង្រីកឲ្យធំប៉ុនណា។ ដំបូង ពួកគាត់យល់ថាការកែលម្អនិងជួសជុលអគារគឺជាជម្រើសដែលស្រួលនិងលឿនជាង។ ប៉ុន្តែ ក្រោយពីសិក្សាស្រាវជ្រាវ ពួកគាត់យល់ថាការធ្វើតាមវិធីនោះមិនមែនជាជម្រើសល្អដើម្បីប្រើវិភាគទានឲ្យកើតប្រយោជន៍ច្រើនបំផុតទេ។ ដូច្នេះ ពួកគាត់បានឲ្យយោបល់ទិញអគារដែលនៅក្បែរនោះ ហើយកែច្នៃឡើងវិញ។ បងម៉ាតបាននិយាយថា៖«ក្រោយពីបានស្នើឲ្យគណៈកម្មាធិការការិយាល័យសាខាទិញនិងជួសជុលអគារដែលមានស្រាប់នោះហើយក៏ដោយ ក៏យើងនៅតែបារម្ភថាតើអគារនោះត្រូវនឹងតម្រូវការរបស់បេតអែលឬយ៉ាងណា។ នៅទីបំផុត យើងឃើញថាការសម្រេចចិត្តនេះពិតជាសមស្របនឹងសេចក្ដីត្រូវការរបស់យើងមែន។ ព្រះយេហូវ៉ាបានឲ្យពរដល់ការសម្រេចចិត្តនេះ»។
ការមានបន្ទប់ស្នាក់នៅដោះចេញដោះចូលដែលដំឡើងលើដីរបស់ការិយាល័យសាខា គឺងាយស្រួលកែប្រែឬពង្រីកដើម្បីឲ្យអ្នកធ្វើការថែមទៀតអាចចូលរួមគាំទ្រកិច្ចការផ្សព្វផ្សាយដែលកំពុងរីកចម្រើន
ការិយាល័យសាខាអង់ហ្គោឡា ទំនងជាត្រូវការកន្លែងថែមទៀតនៅថ្ងៃអនាគត។ ដោយសារអគារថ្មីបានត្រូវសាងសង់ដែលមានបន្ទប់ស្នាក់នៅអាចដោះចេញដោះចូលបាន ហើយក៏មានអគារខាងក្រៅដែលបានជួលដើម្បីឲ្យបងប្អូនបេតអែលស្នាក់នៅដែរ ដូច្នេះការិយាល័យសាខាមានកន្លែងទូលាយជាងដើម្បីបន្តគាំទ្រកិច្ចការផ្សព្វផ្សាយដែលកំពុងរីកចម្រើន។
បងស្រីៗកំពុងសប្បាយធ្វើកិច្ចការក្នុងគម្រោងសាងសង់ការិយាល័យសាខាអង់ហ្គោឡា
ជប៉ុន។ អគារនៅការិយាល័យសាខាជប៉ុនបានត្រូវសាងសង់អស់ជិត៤០ឆ្នាំហើយ។ ម្យ៉ាងទៀត អគារភាគច្រើនមិនធ្លាប់មានការកែលម្អក្នុងទ្រង់ទ្រាយធំទេ។ ទោះជាបងប្អូនខំប្រឹងថែទាំអគារនោះក៏ដោយ ក៏យើងមិនអាចប្រើអគារនោះយូរអង្វែងទេ ព្រោះយើងបានប្រើអគារនោះយូរជាងអាយុកាលរបស់វា។ ហេតុនេះហើយបានជាយើងត្រូវធ្វើការកែលម្អជាថ្មីក្នុងទ្រង់ទ្រាយធំ។
ប៉ុន្មានឆ្នាំមកនេះ ជីវិតនៅបេតអែលក៏មានការផ្លាស់ប្ដូរដែរ។ រហូតមកដល់ឆ្នាំ២០១៥ មានការរៀបចំម្ហូបបីពេលសម្រាប់ក្រុមគ្រួសារបេតអែល។ ដូច្នេះ បន្ទប់ស្នាក់នៅជាច្រើនរបស់សមាជិកបេតអែលនៅជប៉ុន មានកន្លែងតូចមួយសម្រាប់ចម្អិនអាហារ។ ឥឡូវសមាជិកបេតអែលត្រូវរៀបចំម្ហូបភាគច្រើនដោយខ្លួនឯង។ ហេតុនេះ គម្រោងកែលម្អជាថ្មី បានរៀបចំឲ្យមានផ្ទះបាយធំជាងដើម្បីងាយស្រួលក្នុងការចម្អិនអាហារ។ បងស្រីគូមីកូដែលបម្រើនៅការិយាល័យសាខាជប៉ុន បាននិយាយថា៖«ការមានផ្ទះបាយក្នុងបន្ទប់ធ្វើឲ្យខ្ញុំមានអារម្មណ៍ដូចជានៅក្នុងផ្ទះខ្លួនឯងអ៊ីចឹង ហើយនេះបានជួយខ្ញុំឲ្យស្រួលសម្របខ្លួននឹងការរៀបចំថ្មីនៅបេតអែល»។
ផ្ទះបាយថ្មី(ស្ដាំ)ដែលមានភាពងាយស្រួលជាងសម្រាប់ក្រុមគ្រួសារបេតអែល
កិច្ចការដែលធ្វើនៅការិយាល័យសាខាជប៉ុនគឺជាផ្នែកដ៏សំខាន់មួយនៃកិច្ចការនៅទូទាំងពិភពលោក។ (ម៉ាថាយ ២៨:១៩, ២០) នៅទូទាំងពិភពលោកមានការិយាល័យសាខាពីរប៉ុណ្ណោះដែលបោះពុម្ពគម្ពីរ ហើយក្នុងនោះក៏មានការិយាល័យសាខាជប៉ុនដែរ។ ធម្មតានៅកន្លែងបោះពុម្ពមានកម្ទេចដែលមកពីការកាត់តម្រឹមក្រដាស។ ហេតុនេះហើយក្នុងគម្រោងសាងសង់ដែលកំពុងដំណើរការ ក៏មានការបំពាក់ប្រព័ន្ធបូមធូលីនិងកម្ទេច ដើម្បីការពារសុខភាពរបស់បងប្អូនដែលធ្វើការនៅរោងពុម្ព។ ការទិញនិងតម្កើងប្រព័ន្ធនោះគឺចំណាយជិតមួយលានដុល្លារ។ ប៉ុន្តែ ទោះជាត្រូវចំណាយថវិកាច្រើនដូចនេះក៏ដោយ យើងជឿជាក់ថាការិយាល័យសាខានឹងនៅតែបន្តបោះពុម្ពសៀវភៅផ្សេងៗដើម្បីពង្រឹងជំនឿរបស់យើង ជាពិសេសគម្ពីរដែលជាបណ្ដាំរបស់ព្រះ។
ប្រព័ន្ធបូមធូលីដែលមកពីការកាត់តម្រឹមក្រដាស នឹងធ្វើឲ្យមានសុវត្ថិភាពជាងដល់បងប្អូនដែលធ្វើការនៅរោងពុម្ព
ក្នុងអំឡុងពេលសាងសង់នោះ បងប្អូនរបស់យើងបានធ្វើឲ្យប្រាកដថា ការបោះពុម្ពគម្ពីរនៅតែបន្ត។ បងត្រេដែលជាគណៈកម្មាធិការការិយាល័យសាខាជប៉ុន បានរៀបរាប់ថា៖«អំឡុងពេលសាងសង់ អង្គការរបស់យើងបានចេញសេចក្ដីបកប្រែគម្ពីរជាច្រើន ពីព្រោះមនុស្សកាន់តែច្រើននៅទូទាំងពិភពលោកត្រូវការគម្ពីរ។ បងប្អូននៅផ្នែកផ្សេងៗបានសហការគ្នាដើម្បីរៀបចំកាលវិភាគសម្រាប់ដំឡើងប្រព័ន្ធថ្មីនិងសម្រាប់បោះពុម្ព»។ ទោះជាមានការពិបាកដូចនោះក៏ដោយ គម្ពីរប្រមាណ២២០.០០០ក្បាលបានត្រូវបោះពុម្ពជារៀងរាល់ខែ គឺចាប់ពីខែមីនារហូតដល់ខែសីហា ឆ្នាំ២០២៣។ ពេលវេលានោះគឺជាពេលដែលរវល់បំផុតក្នុងកិច្ចការសាងសង់នៅរោងពុម្ព។ កិច្ចការទាំងអស់នេះបានត្រូវសម្រេចយ៉ាងជោគជ័យ ដោយគ្មានការចំណាយលើសពីកំណត់នោះទេ។
ក្នុងគម្រោងកែលម្អជាថ្មី ក៏មានការកាត់បន្ថយថាមពលអគ្គីសនីដែរ។ ដូច្នេះ ការបំពាក់បន្ទះសូឡាថ្មី នឹងជួយសន្សំប្រាក់ប្រមាណ១២០.០០០ដុល្លារជារៀងរាល់ឆ្នាំ។ បន្ថែមទៅទៀត ការបំពាក់កញ្ចក់បង្អួចបីជាន់ ក៏ជួយកាត់បន្ថយការប្រើប្រាស់អគ្គីសនីដែរ ហើយជួយសន្សំប្រាក់ប្រមាណ១០.០០០ដុល្លារក្នុងមួយឆ្នាំ។ ថ្វីត្បិតតែការបំពាក់បន្ទះសូឡានិងបង្អួចកញ្ចក់បីជាន់មានតម្លៃថ្លៃមែន តែនេះអាចជួយសន្សំលុយជាង៣,៥លានដុល្លារ។ ការបំពាក់ឧបករណ៍ទាំងពីរនេះនឹងកាន់បន្ថយភាពក្ដៅនិងត្រជាក់ដែលមកពីបរិយាកាសខាងក្រៅ។
កញ្ចក់បង្អួចបីជាន់នឹងកាត់បន្ថយថាមពលអគ្គីសនី
«នៅមានកិច្ចការជាច្រើនទៀតដែលត្រូវធ្វើ»
តាមរយៈគម្រោងកែលម្អជាថ្មីនៅការិយាល័យសាខាទាំងពីរនេះ យើងឃើញថាមានកិច្ចការជាច្រើនដែលយើងត្រូវធ្វើនៅទីនោះដើម្បីគាំទ្រកិច្ចការផ្សព្វផ្សាយ។ ប៉ុន្តែ កិច្ចការនេះមិនទាន់រួចរាល់ទេ។ បងអេរ៉ុនដែលមកពីផ្នែករចនាប្លង់និងសាងសង់ទូទាំងពិភពលោកបានរៀបរាប់ថា៖«មានកិច្ចការជាច្រើនដែលយើងបានសម្រេច ប៉ុន្តែនៅតែមានកិច្ចការជាច្រើនដែលយើងត្រូវបង្ហើយ»។ តើកិច្ចការទាំងនេះនឹងសម្រេចយ៉ាងដូចម្ដេច? គាត់បន្តថា៖«វិភាគទានដែលបងប្អូនជូនដោយចិត្តទូលាយ បានជួយកិច្ចការដ៏សំខាន់នេះ។ ហើយយើងពិតជាមានចិត្តដឹងគុណចំពោះបងប្អូនដែលស្ម័គ្រចិត្តចូលរួមធ្វើកិច្ចការនេះពីមុន និងបងប្អូនដែលផ្លាស់ប្ដូររបៀបរស់នៅដើម្បីត្រៀមខ្លួនជួយកិច្ចការនេះនៅថ្ងៃអនាគត។ ការរួមចំណែកជួយទាំងកម្លាំងកាយទាំងធនធាន គឺជាភ័ស្តុតាងដែលបង្ហាញថាព្រះយេហូវ៉ាកំពុងឲ្យពរយើង»។—ចម្រៀងសរសើរព្រះ ១១០:៣
កិច្ចការសាងសង់និងកែលម្អជាថ្មីបានត្រូវគាំទ្រដោយវិភាគទានស្ម័គ្រចិត្ត។ វិភាគទានជាច្រើនបានជូនតាមគេហទំព័រdonate.pr418.com។ យើងសូមអរគុណចំពោះការជូនវិភាគទានដោយចិត្តទូលាយរបស់បងប្អូន។
a ប្រាក់ដុល្លារដែលបានរៀបរាប់ក្នុងអត្ថបទនេះ គឺសំដៅទៅលើដុល្លារអាម៉េរិក។
លោកអ្នកក៏ប្រហែលជាចូលចិត្តដែរ
របៀបដែលវិភាគទានរបស់អ្នកបានត្រូវប្រើ
អគារដែលលើកកិត្តិយសគ្រូដ៏ឧត្តមរបស់យើង
តើការប្រើអគារដើម្បីសាលាកិច្ចបម្រើផ្សេងៗមានប្រយោជន៍សម្រាប់អ្នកបង្រៀននិងសិស្សយ៉ាងដូចម្ដេច?
របៀបដែលវិភាគទានរបស់អ្នកបានត្រូវប្រើ
ការផលិតសៀវភៅដែលសំខាន់បំផុត
ការបកប្រែ ការបោះពុម្ព និងការចងក្រងសេចក្ដីបកប្រែពិភពលោកថ្មី រួមបញ្ចូលកិច្ចការច្រើនជាងអ្វីដែលអ្នកនឹកស្មាន។
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើកិច្ចការរបស់សាក្សីព្រះយេហូវ៉ាទទួលប្រាក់ឧបត្ថម្ភយ៉ាងដូចម្ដេច?
យើងជៀសវាងមិនប្រើវិធីដូចដែលវិហារជាច្រើនប្រើទេ។
