សំណួរពីអ្នកអាន
តើសាក្សីព្រះយេហូវ៉ាគួរមានទស្សនៈយ៉ាងណាចំពោះការប្រើគេហទំព័រស្វែងរកគូអាពាហ៍ពិពាហ៍?
ព្រះយេហូវ៉ាពិតជាចង់ឲ្យមនុស្សពីរនាក់ដែលរៀបការមានសុភមង្គល និងមានចំណងមិត្តភាពជិតស្និទ្ធដ៏ស្ថិតស្ថេរជាមួយគ្នា។ (ម៉ាថ. ១៩:៤-៦) បើអ្នកចង់រៀបការ តើអ្នកអាចស្វែងរកគូអាពាហ៍ពិពាហ៍ដ៏ល្អម្នាក់តាមរបៀបណា? ដោយសារព្រះយេហូវ៉ាជាអ្នកបង្កើតយើង លោកដឹងអំពីអ្វីដែលនឹងនាំឲ្យការស្វែងយល់ចិត្តគ្នា និងអាពាហ៍ពិពាហ៍ទទួលជោគជ័យដូចបំណង។ ហេតុនេះហើយ បើអ្នកធ្វើតាមគោលការណ៍ដែលលោកបានផ្ដល់ឲ្យ នោះអ្នកនឹងទទួលលទ្ធផលល្អបំផុត។ សូមគិតអំពីគោលការណ៍ខ្លះៗទាំងនោះ។
មុនដំបូងយើងត្រូវយល់ចំណុចមួយអំពីខ្លួនថា៖ «ចិត្ត គឺពូកែបញ្ឆោតលើសអ្វីៗទាំងអស់ ហើយក៏អាក្រក់ក្រៃលែង»។ (យេ. ១៧:៩) ពេលបុគ្គលពីរនាក់ដែលចង់រៀបការជួបគ្នា និងចាប់ផ្ដើមស្វែងយល់ចិត្តគ្នា ពួកគេប្រហែលជាចាប់ផ្ដើមមានអារម្មណ៍ស្នេហាខ្លាំងចំពោះគ្នាយ៉ាងលឿន។ ពេលនេះកើតឡើងគឺពិបាកឲ្យពួកគេធ្វើការសម្រេចចិត្តឈ្លាសវៃ។ បើមូលហេតុចម្បងដែលបុគ្គលពីរនាក់សម្រេចចិត្តរៀបការ គឺដោយសារអារម្មណ៍ដែលពួកគេមានចំពោះគ្នា ពួកគេច្រើនតែខកចិត្តនៅពេលក្រោយមក។ (សុភ. ២៨:២៦) ហេតុនេះ គឺមិនមែនជាការឈ្លាសវៃឲ្យមនុស្សពីរនាក់ដាក់ចិត្តស្រឡាញ់គ្នាពេលដែលចាប់ផ្ដើមស្វែងយល់ចិត្តគ្នា ឬធ្វើសេចក្ដីសន្យាផ្សេងៗចំពោះគ្នាមុនពួកគេស្គាល់គ្នាច្បាស់ឡើយ។
សុភាសិត ២២:៣ចែងថា៖ «មនុស្សឈ្លាសវៃឃើញអន្តរាយមកក៏ពួនខ្លួន តែមនុស្សខ្វះបទពិសោធន៍បន្តដើរទៅទៀត ហើយរងផលពិបាក»។ តើការប្រើគេហទំព័រស្វែងរកគូអាពាហ៍ពិពាហ៍អាចនាំឲ្យមានគ្រោះថ្នាក់អ្វី? គួរឲ្យស្ដាយ អ្នកខ្លះបានឆ្លងកាត់បទពិសោធន៍ជូរចត់ ពេលពួកគេជួបបុគ្គលដែលមិនធ្លាប់ស្គាល់តាមប្រព័ន្ធអ៊ីនធឺណិត និងចាប់ផ្ដើមស្វែងយល់ចិត្តគ្នា ហើយក្រោយមកពួកគេទទួលស្គាល់ថាអ្នកនោះកំពុងបញ្ឆោតពួកគេ។ ម្យ៉ាងទៀត មនុស្សមិនទៀងត្រង់បានបង្កើតគណនីក្លែងក្លាយដើម្បីបោកបញ្ឆោតយកលុយពីជនស្លូតត្រង់។ មនុស្សដែលមិនទៀងត្រង់ទាំងនោះខ្លះបានអះអាងថាពួកគេជាសាក្សី។
សូមគិតអំពីគ្រោះថ្នាក់មួយទៀត។ គេហទំព័រស្វែងរកគូខ្លះ ប្រើកម្មវិធីកុំព្យូទ័រ ក្នុងគោលបំណងផ្សំផ្គុំបុគ្គលពីរនាក់ដែលសមគ្នា។ ប៉ុន្តែ គ្មានទីសំអាងដែលបង្ហាញថាវិធីបែបនេះពិតជាមានប្រយោជន៍ទេ។ គឺមិនមែនជាការឈ្លាសវៃទេឲ្យទុកចិត្តទៅលើកម្មវិធីកុំព្យូទ័រដែលមនុស្សបង្កើត ដើម្បីធ្វើការសម្រេចចិត្តអំពីរឿងដ៏សំខាន់ ដូចជាការជ្រើសរើសគូអាពាហ៍ពិពាហ៍ដ៏ល្អជាដើម។ កម្មវិធីកុំព្យូទ័រមិនអាចប្រៀបផ្ទឹមនឹងគោលការណ៍គម្ពីរទេ។—សុភ. ១:៧; ៣:៥-៧
គោលការណ៍មួយនៅសុភាសិត ១៤:១៥ចែងថា៖ «មនុស្សឆោតជឿគ្រប់ពាក្យទាំងអស់ តែមនុស្សឈ្លាសវៃរមែងគិតពិចារណាជាមុនសិន»។ មុនសម្រេចចិត្តយកបុគ្គលណាម្នាក់ជាគូអនាគត អ្នកត្រូវស្គាល់បុគ្គលនោះឲ្យបានច្បាស់។ ប៉ុន្តែគឺពិបាកឲ្យធ្វើដូច្នេះ បើជួបបុគ្គលណាម្នាក់តាមបណ្ដាញសង្គមសម្រាប់ទាក់ទងគ្នា។ ទោះជាអ្នកចែករំលែកព័ត៌មានអំពីខ្លួនឲ្យគ្នាទៅវិញទៅមក ហើយចំណាយពេលច្រើនក្នុងការផ្ញើសារឲ្យគ្នាក្ដី តើអ្នកពិតជាស្គាល់បុគ្គលនោះច្បាស់ឬទេ? អ្នកខ្លះដែលគិតថាពួកគេបានរកឃើញស្នេហ៍ពិត ក្រោយមកតក់ស្លុតពេលដែលពួកគេជួបបុគ្គលនោះដោយផ្ទាល់។
អ្នកតែងចម្រៀងសរសើរព្រះនិយាយថា៖ «ខ្ញុំមិនសេពគប់មនុស្សកុហកបោកប្រាស់ឡើយ ហើយខ្ញុំក៏មិននៅជិតមនុស្សលាក់ពុតដែរ»។ (ចសព. ២៦:៤) មនុស្សជាច្រើនគិតថាគឺជារឿងធម្មតាទេឲ្យកុហកអំពីព័ត៌មានផ្ទាល់ខ្លួននៅលើគេហទំព័រស្វែងរកគូ ដើម្បីធ្វើឲ្យខ្លួនកាន់តែទាក់ទាញ។ ពួកគេប្រហែលជាលាក់ចរិតពិតរបស់ខ្លួន ឬមួយទៀត លក្ខណៈមិនល្អរបស់ពួកគេប្រហែលជាមិនងាយកត់សម្គាល់ក្នុងអំឡុងពេលផ្ញើសារគ្នាទៅវិញទៅមកទេ។ អ្នកខ្លះប្រហែលជាអះអាងថាពួកគេជាសាក្សីព្រះយេហូវ៉ា ប៉ុន្តែតើពួកគេពិតជាគ្រិស្តសាសនិកដែលបានទទួលការជ្រមុជទឹកឬទេ? តើពួកគេមានចំណងមិត្តភាពជិតស្និទ្ធជាមួយព្រះយេហូវ៉ាឬទេ? តើបងប្អូនក្នុងក្រុមជំនុំគោរពពួកគេ ឬតើពួកគេជាគំរូមិនល្អ ហើយថែមទាំងនៅក្នុងចំណោម«ការសេពគប់អាក្រក់»? (១កូ. ១៥:៣៣; ២ធី. ២:២០, ២១) តើពួកគេមានសិទ្ធិស្របតាមគម្ពីរដើម្បីរៀបការឬទេ? អ្នកត្រូវស្គាល់ចម្លើយចំពោះសំណួរទាំងនោះ ប៉ុន្តែអ្នកពិបាកដឹង បើអ្នកមិនបាននិយាយជាមួយសាក្សីឯទៀតដែលស្គាល់បុគ្គលនោះយ៉ាងច្បាស់។ (សុភ. ១៥:២២) អ្នកបម្រើដ៏ស្មោះត្រង់របស់ព្រះយេហូវ៉ានឹងមិនដែលគិតសោះអំពីការ«ផ្សំផ្គុំខ្លួនជាមួយនឹងអ្នកដែលមិនជឿ»។—២កូ. ៦:១៤; ១កូ. ៧:៣៩
ការប្រើគេហទំព័រដើម្បីស្វែងរកគូមានគ្រោះថ្នាក់ ដូច្នេះមានវិធីល្អប្រសើរជាងដើម្បីស្វែងរកនិងស្គាល់បុគ្គលណាម្នាក់ដែលអាចទៅជាគូអាពាហ៍ពិពាហ៍ល្អ។ តើមានឱកាសណាខ្លះដែលអ្នកអាចរកឃើញគូល្អ? ពេលយើងអាចជួបជុំគ្នា យើងអាចជួបអ្នកឯទៀតដោយផ្ទាល់នៅកិច្ចប្រជុំ សន្និបាត មហាសន្និបាត និងការជួបជុំឯទៀត។
កាលដែលអ្នកទាំងពីរនាក់ចំណាយពេលជាមួយគ្នា អ្នកនឹងឃើញកាន់តែច្បាស់ថាអ្នកទាំងពីរមានគោលដៅ និងគោលការណ៍ក្នុងជីវិតដូចគ្នាឬយ៉ាងណា
ពេលយើងមិនអាចជួបជុំគ្នាដូចជាក្នុងអំឡុងពេលមានជំងឺកូវីដ-១៩ យើងប្រើគ្រឿងអេឡិចត្រូនិកដើម្បីចូលរួមកិច្ចប្រជុំក្រុមជំនុំ ហើយនេះបើកឱកាសឲ្យយើងស្គាល់សាក្សីនៅលីវឯទៀត។ អ្នកអាចស្ដាប់សុន្ទរកថារបស់ពួកគេ និងស្ដាប់ចម្លើយដែលបង្ហាញអំពីជំនឿរបស់ពួកគេនៅកិច្ចប្រជុំ។ (១ធី. ៦:១១, ១២) អ្នកក៏ប្រហែលជាអាចចូលក្រុមតូចៗនិយាយគ្នាក្រោយពីកិច្ចប្រជុំ។ តាមរយៈការកម្សាន្តសេពគប់គ្នាតាមគ្រឿងអេឡិចត្រូនិកជាមួយក្រុមសាក្សីឯទៀត អ្នកអាចសង្កេតមើលអំពីរបៀបដែលបុគ្គលដែលអ្នកចាប់អារម្មណ៍សំណេះសំណាលនឹងអ្នកឯទៀត ហើយនេះអាចបង្ហាញអំពីចរិតពិតរបស់គាត់។ (១ពេ. ៣:៤) យូរៗទៅ ពេលដែលអ្នកស្គាល់បុគ្គលនោះច្បាស់ជាង អ្នកអាចដឹងថាអ្នកទាំងពីរមានគោលដៅដូចគ្នា ហើយអាចសមគ្នាជាគូអាពាហ៍ពិពាហ៍ដ៏ល្អឬយ៉ាងណា។
ពេលអ្នកនៅលីវស្វែងរកគូអាពាហ៍ពិពាហ៍តាមរបៀបដែលសមស្របតាមគោលការណ៍គម្ពីរ ពួកគេកាន់តែមានឱកាសឃើញថាពាក្យនៅសុភាសិតនេះជាការពិត ដែលចែងថា៖ «អ្នកណាដែលរកបានប្រពន្ធ[ឬប្ដី]ល្អ ប្រៀបដូចជារកបានទ្រព្យមានតម្លៃ ហើយគាត់ទទួលការពេញចិត្តពីព្រះយេហូវ៉ា»។—សុភ. ១៨:២២
