អ្វីដែលមនុស្សនិយាយអំពីសេចក្ដីអធិដ្ឋាន
ម៉ារៀបាននិយាយថា៖ «ពេលខ្ញុំអធិដ្ឋាន ខ្ញុំមានអារម្មណ៍ថាព្រះនៅក្បែរខ្ញុំ ហាក់ដូចជាលោកកាន់ដៃខ្ញុំហើយណែនាំខ្ញុំពេលខ្ញុំវង្វេង»។
រ៉ាអ៊ូលបានរៀបរាប់ថា៖ «ប្រពន្ធរបស់ខ្ញុំបានស្លាប់ក្រោយពីមានជំងឺមហារីកអស់រយៈពេល១៣ឆ្នាំ។ ខ្ញុំចាំថាខ្ញុំបានអធិដ្ឋានទៅព្រះរាល់ថ្ងៃ ហើយមានអារម្មណ៍ថាលោកកំពុងស្ដាប់ខ្ញុំពេលដែលខ្ញុំកំពុងឈឺចាប់។ ខ្ញុំមានអារម្មណ៍សុខសាន្ត»។
អារណឺក៏ប្រាប់ដែរថា៖ «សេចក្ដីអធិដ្ឋានគឺជាអំណោយដ៏អស្ចារ្យដែលព្រះបានឲ្យដល់មនុស្ស»។
សម្រាប់ម៉ារៀ រ៉ាអ៊ូល អារណឺ និងមនុស្សជាច្រើនទៀត ការអធិដ្ឋានគឺជាអំណោយដ៏ពិសេសមួយ។ ពួកគេមានអារម្មណ៍ថាតាមរយៈសេចក្ដីអធិដ្ឋាន ពួកគេអាចនិយាយទៅកាន់ព្រះ អរគុណលោក និងសុំជំនួយពីលោក។ ពួកគេជឿជាក់ទាំងស្រុងទៅលើអ្វីដែលគម្ពីរចែងស្ដីអំពីការអធិដ្ឋានទៅព្រះដែលថា៖ «យើងមានទំនុកចិត្តថា អ្វីក៏ដោយដែលយើងអធិដ្ឋានសុំ ដែលសមស្របតាមបំណងប្រាថ្នារបស់ព្រះ នោះព្រះនឹងស្ដាប់យើង»។—យ៉ូហានទី១ ៥:១៤
ផ្ទុយទៅវិញ មនុស្សជាច្រើនមិនជឿអ្វីដែលគម្ពីរចែងអំពីសេចក្ដីអធិដ្ឋានទេ។ ស្ទេវរៀបរាប់អំពីអារម្មណ៍របស់គាត់ស្ដីអំពីសេចក្ដីអធិដ្ឋាន៖ «ពេលខ្ញុំមានអាយុ១៧ឆ្នាំ មិត្តភក្ដិបីនាក់របស់ខ្ញុំបានស្លាប់ដោយសារគ្រោះថ្នាក់ផ្សេងៗ ម្នាក់បានស្លាប់ដោយសារគ្រោះថ្នាក់ចរាចរណ៍ ហើយពីរនាក់ទៀតបានលង់ទឹកសមុទ្រ»។ តើស្ទេវបានធ្វើអ្វី? គាត់ថា៖ «ខ្ញុំបានអធិដ្ឋានទៅព្រះដើម្បីរកចម្លើយចំពោះមូលហេតុដែលអ្វីទាំងនេះកើតឡើង។ ប៉ុន្តែព្រះមិនបានឆ្លើយតបនោះទេ ដូច្នេះខ្ញុំបានសួរខ្លួនឯងថា ‹អធិដ្ឋានធ្វើអី?›»។ ការអធិដ្ឋានដែលមើលទៅគ្មានការតបឆ្លើយនាំឲ្យមនុស្សជាច្រើនសួរថា តើគួរបន្តអធិដ្ឋានឬយ៉ាងណា?
មានមូលហេតុផ្សេងទៀតដែលមនុស្សខ្លះគិតថា សេចក្ដីអធិដ្ឋានគ្មានប្រយោជន៍ចំពោះពួកគេ។ អ្នកខ្លះនិយាយថា ដោយសារព្រះជ្រាបអំពីអ្វីៗទាំងអស់ នោះលោកដឹងអំពីអ្វីដែលយើងត្រូវការនិងបញ្ហារបស់យើងរួចទៅហើយ ដូច្នេះយើងមិនចាំបាច់ប្រាប់លោកអំពីរឿងទាំងនោះទេ។
អ្នកខ្លះទៀតជឿថា ព្រះមិនព្រមស្ដាប់សេចក្ដីអធិដ្ឋានរបស់ពួកគេទេដោយសារតែកំហុសដែលពួកគេធ្លាប់ធ្វើពីមុន។ ជេននីបាននិយាយថា៖ «ខ្ញុំមានអារម្មណ៍ថាខ្ញុំគ្មានតម្លៃ។ ខ្ញុំបានធ្វើរឿងដែលខ្ញុំសោកស្ដាយ ដូច្នេះខ្ញុំប្រាប់ខ្លួនថា គ្មានហេតុដែលព្រះគួរស្ដាប់សេចក្ដីអធិដ្ឋានរបស់ខ្ញុំទេ»។
តើអ្នកមានអារម្មណ៍យ៉ាងណាចំពោះការអធិដ្ឋាន? ប្រសិនបើអ្នកធ្លាប់មានកង្វល់និងការសង្ស័យស្រដៀងគ្នានេះអំពីការអធិដ្ឋាន អ្នកអាចទទួលការសម្រាលទុកដោយដឹងថាគម្ពីរអាចផ្ដល់ចម្លើយដែលធ្វើឲ្យអ្នកស្ងប់ចិត្ត។ យើងអាចទុកចិត្តអ្វីដែលគម្ពីរបានចែងអំពីការអធិដ្ឋាន * ហើយគម្ពីរក៏អាចជួយអ្នកឲ្យទទួលចម្លើយចំពោះសំណួរដូចតទៅនេះ៖
-
តើព្រះពិតជាស្ដាប់សេចក្ដីអធិដ្ឋានរបស់យើងឬទេ?
-
ហេតុអ្វីព្រះមិនតបឆ្លើយនឹងសេចក្ដីអធិដ្ឋានទាំងអស់?
-
តើអ្នកត្រូវអធិដ្ឋានតាមរបៀបណាដើម្បីឲ្យព្រះស្ដាប់?
-
តើសេចក្ដីអធិដ្ឋានអាចជួយអ្នកយ៉ាងដូចម្ដេច?
^ វគ្គ 9 គម្ពីរបានរៀបរាប់អំពីសេចក្ដីអធិដ្ឋានរបស់អ្នកបម្រើជាច្រើនរបស់ព្រះ រួមទាំងរបស់លោកយេស៊ូគ្រិស្តផងដែរ។ បទគម្ពីរភាសាហេប្រឺដែលជាទូទៅបានត្រូវហៅថា សញ្ញាចាស់ រួមបញ្ចូលសេចក្ដីអធិដ្ឋានជាង១៥០។
