តើការយកចិត្តទុកដាក់របស់ព្រះអាចជួយអ្នកយ៉ាងដូចម្ដេច?
ព្រះបានបង្កើតរូបកាយឲ្យមានសមត្ថភាពដ៏អស្ចារ្យដើម្បីព្យាបាលខ្លួនឯង។ ពេលមានរបួស ដូចជាមុត ឬរលាត់ជាដើម ភ្លាមៗរូបកាយធ្វើអ្វីមួយដើម្បីបញ្ឈប់ការហូរឈាម ជួសជុលដំបៅ និងភ្ជិតសាច់បន្តិចម្ដងៗ។
សូមពិចារណា: បើព្រះបានបង្កើតរូបកាយរបស់យើងឲ្យចេះព្យាបាលរបួស ដូច្នេះយើងក៏អាចមានទំនុកចិត្តទៅលើសេចក្ដីសន្យារបស់លោកដើម្បីព្យាបាលយើងឲ្យជាសះស្បើយពីរបួសផ្លូវចិត្តដែរ មែនទេ? អ្នកតែងចម្រៀងសរសើរព្រះម្នាក់បានសរសេរថា៖ «លោកមើលថែអ្នកដែលមានចិត្តខ្ទេចខ្ទាំ លោករុំរបួសឲ្យពួកគេ»។ (ចម្រៀងសរសើរព្រះ ១៤៧:៣) ប៉ុន្តែ បើអ្នកមានរបួសផ្លូវចិត្តយូរហើយ ឬនៅឥឡូវនេះក្ដី តើតាមរបៀបណាអ្នកអាចប្រាកដថាព្រះយេហូវ៉ានឹងរុំរបួសរបស់អ្នកនៅឥឡូវនេះនិងថ្ងៃអនាគត?
តើគម្ពីរបង្រៀនយើងអ្វីអំពីសេចក្ដីស្រឡាញ់របស់ព្រះ?
ព្រះសន្យាថា៖ «កុំខ្លាចឡើយ ព្រោះខ្ញុំនៅជាមួយនឹងអ្នក។ កុំបារម្ភឡើយ ព្រោះខ្ញុំជាព្រះរបស់អ្នក។ ខ្ញុំនឹងពង្រឹងកម្លាំងអ្នក ខ្ញុំនឹងជួយអ្នក»។ (អេសាយ ៤១:១០) បុគ្គលដែលដឹងថាព្រះយេហូវ៉ាយកចិត្តទុកដាក់ចំពោះគាត់មានសេចក្ដីសុខសាន្តក្នុងចិត្ត និងកម្លាំងដើម្បីស៊ូទ្រាំនឹងទុក្ខលំបាកផ្សេងៗ។ សាវ័កប៉ូលបានហៅភាពស្ងប់សុខក្នុងចិត្តនេះថា៖ «សេចក្ដីសុខសាន្តរបស់ព្រះដែលហួសពីការនឹកស្មាន»។ ប៉ូលបានបន្ថែមទៀតថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។—ភីលីព ៤:៤-៧, ៩, ១៣
បទគម្ពីរជួយពង្រឹងជំនឿរបស់យើងទៅលើសេចក្ដីសន្យារបស់ព្រះយេហូវ៉ាចំពោះអនាគតរបស់មនុស្សជាតិ។ ជាឧទាហរណ៍ ការបើកបង្ហាញ ២១:៤, ៥ប្រាប់យើងអំពីអ្វីដែលលោកនឹងធ្វើ និងមូលហេតុដែលយើងអាចទុកចិត្តថាលោកធ្វើដូច្នេះ:
-
«លោកនឹងជូតអស់ទាំងទឹកភ្នែកចេញ»ពីភ្នែករបស់មនុស្ស។ ព្រះយេហូវ៉ានឹងបំបាត់ចោលរាល់ទុក្ខលំបាកនិងទុក្ខកង្វល់ទាំងអស់របស់យើង សូម្បីតែការព្រួយបារម្ភដែលមើលទៅមិនសំខាន់ចំពោះអ្នកឯទៀតក្ដី។
-
ដោយ«អង្គុយលើបល្ល័ង្ក»ក្នុងសិរីរុងរឿងនៅឯស្ថានសួគ៌ នោះអ្នកបង្កើតអ្វីៗទាំងអស់និងជាស្ដេចដ៏មានឫទ្ធានុភាពខ្លាំងក្លាបំផុត នឹងបង្ហាញឫទ្ធានុភាពនិងអំណាចរបស់លោកក្នុងការទប់ស្កាត់ទុក្ខវេទនា ហើយផ្ដល់ឲ្យយើងនូវជំនួយដែលយើងត្រូវការ។
-
ព្រះយេហូវ៉ាធានាថាសេចក្ដីសន្យារបស់លោកគឺ«គួរឲ្យទុកចិត្ត ហើយក៏ពិតត្រង់»។ ដូច្នេះ លោកយកនាមនិងកេរ្ដិ៍ឈ្មោះរបស់លោកដើម្បីធានាសេចក្ដីសន្យារបស់លោក។
«‹លោកនឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ ក៏នឹងលែងមានទៀតដែរ។ អ្វីៗដែលធ្លាប់កើតឡើងពីមុន នោះបានកន្លងបាត់អស់ហើយ›។ លោកដែលអង្គុយលើបល្ល័ង្កមានប្រសាសន៍ថា៖ ‹មើល! ខ្ញុំកំពុងធ្វើអ្វីៗទាំងអស់ថ្មី›។ ម្យ៉ាងទៀត លោកមានប្រសាសន៍ថា៖ ‹ចូរសរសេរ ពីព្រោះពាក្យទាំងនេះគួរឲ្យទុកចិត្ត ហើយក៏ពិតត្រង់›»។—ការបើកបង្ហាញ ២១:៤, ៥
សកលលោកនិងគម្ពីរបង្ហាញអំពីបុគ្គលិកលក្ខណៈនិងគុណសម្បត្តិរបស់បិតាយើងដែលស្ថិតនៅស្ថានសួគ៌។ ការបង្កើតគឺប្រៀបដូចជាការអញ្ជើញមួយដើម្បីឲ្យស្គាល់ព្រះដូចជាមិត្តភក្ដិដ៏ជិតស្និទ្ធ។ មិនត្រឹមតែប៉ុណ្ណោះ គម្ពីរក៏បានអញ្ជើញយើងដោយចែងថា៖ «ចូរចូលទៅជិតព្រះ នោះលោកនឹងចូលមកជិតអ្នករាល់គ្នា»។ (យ៉ាកុប ៤:៨) សកម្មភាព ១៧:២៧ ចែងថា៖ «លោកមិននៅឆ្ងាយពីយើងម្នាក់ៗ»។
កាលដែលអ្នកលៃពេលដើម្បីស្គាល់ព្រះ អ្នកនឹងកាន់តែជឿជាក់ថា «លោករមែងគិតអំពីអ្នករាល់គ្នា»។ (ពេត្រុសទី១ ៥:៧) តើការទុកចិត្តទៅលើព្រះយេហូវ៉ាអាចទទួលប្រយោជន៍យ៉ាងណាខ្លះ?
សូមគិតអំពីបទពិសោធន៍របស់តូរូពីប្រទេសជប៉ុន។ គាត់បានត្រូវចិញ្ចឹមអប់រំដោយម្ដាយដែលជាគ្រិស្តសាសនិក ប៉ុន្តែគាត់បានចូលប្រឡូកក្នុងក្រុមហិង្សាពិភពលោកយ៉ាគូហ្សា ដែលជាក្រុមអ្នកលេងរបស់ជនជាតិជប៉ុន។ គាត់ប្រាប់ថា៖ «ខ្ញុំជឿថាព្រះស្អប់ខ្ញុំ ហើយខ្ញុំមានអារម្មណ៍ថាមនុស្សនៅជុំវិញខ្ញុំដែលស្លាប់ ជាពិសេសមនុស្សដែលខ្ញុំស្រឡាញ់ គឺជាការដាក់ទោសពីព្រះចំពោះខ្ញុំ»។ តូរូសារភាពថាស្ថានភាពអាក្រក់នេះនិងចិត្តគំនិតរបស់គាត់ បានធ្វើឲ្យគាត់ទៅជា«មនុស្សដែលគ្មានមេត្តានិងមិនចេះអាណិត»។ ស្ដីអំពីមហិច្ឆតារបស់គាត់ គាត់បាននឹកចាំថា «ខ្ញុំចង់ស្លាប់ពេលនៅវ័យក្មេងក្រោយសម្លាប់អ្នកណាម្នាក់ដែលល្បីជាងខ្ញុំ ដើម្បីធ្វើឲ្យខ្លួនខ្ញុំទៅជាល្បី»។
ទោះជាយ៉ាងនេះក្ដី ពេលតូរូនិងហាណាដែលជាប្រពន្ធរបស់គាត់បានសិក្សាគម្ពីរ តូរូបានធ្វើការកែប្រែធំៗនិងគោលបំណងក្នុងជីវិតរបស់គាត់។ ហាណានិយាយថា៖ «ខ្ញុំបានឃើញប្ដីរបស់ខ្ញុំកែប្រែដោយផ្ទាល់ភ្នែក»។ ឥឡូវនេះ តូរូនិយាយដោយជឿជាក់ថា៖ «មានព្រះដែលពិតជាយកចិត្តទុកដាក់នឹងយើងម្នាក់ៗ។ លោកមិនចង់ឲ្យអ្នកណាម្នាក់ស្លាប់នោះទេ ហើយលោកប្រុងប្រៀបជានិច្ចនឹងអភ័យទោសដល់អ្នកណាដែលប្រែចិត្តយ៉ាងស្មោះចំពោះកំហុសរបស់ខ្លួន។ លោកស្ដាប់យើង ទោះជារឿងដែលយើងមិនអាចប្រាប់អ្នកណាបាន និងដែលគ្មានអ្នកណាយល់បានក៏ដោយ។ នៅថ្ងៃអនាគតឆាប់ៗខាងមុខ ព្រះយេហូវ៉ានឹងបំបាត់ចោលរាល់បញ្ហា ទុក្ខវេទនា និងការឈឺចាប់។ សូម្បីតែឥឡូវនេះ លោកជួយយើងតាមរបៀបដែលមិននឹកស្មានទាល់តែសោះ។ លោកស្រឡាញ់និងជួយយើងពេលដែលយើងទន់ទាប»។—ចម្រៀងសរសើរព្រះ ១៣៦:២៣
ដូចដែលបទពិសោធន៍របស់តូរូបង្ហាញ ការដឹងថាព្រះមានសមត្ថភាព ហើយថាមិនយូរទៀតលោកនឹងបំបាត់ចោលទុក្ខវេទនាទាំងអស់ និងជូតអស់ទាំងទឹកភ្នែកចេញ មិនគ្រាន់តែផ្ដល់ឲ្យយើងនូវសេចក្ដីសង្ឃឹមមុតមាំសម្រាប់ថ្ងៃអនាគតប៉ុណ្ណោះទេ តែក៏ជួយយើងឲ្យមានជីវិតប្រសើរជាងនៅឥឡូវនេះផងដែរ។ មែនហើយ សូម្បីតែនៅក្នុងពិភពលោកដែលពេញដោយទុក្ខវេទនាក្ដី អ្នកអាចទទួលប្រយោជន៍ពីការយកចិត្តទុកដាក់ដែលប្រកបដោយសេចក្ដីស្រឡាញ់របស់ព្រះ។
លោកអ្នកក៏ប្រហែលជាចូលចិត្តដែរ
ការពន្យល់ខគម្ពីរ
ការពន្យល់ខគម្ពីរ ចម្រៀងសរសើរព្រះ ២៣:៤ «ទោះជាខ្ញុំដើរក្នុងជ្រលងងងឹតសូន្យសុងក៏ដោយ»។
ទោះជារាស្ត្ររបស់ព្រះកំពុងជួបការពិបាកបំផុតប្រៀបដូចជាភាពងងឹតសូន្យសុងក្ដី តើតាមរបៀបណាពួកគេបានទទួលការថែរក្សានិងការពារពីលោក?
ទស្សនាវដ្ដី
