«តើព្រះនៅឯណា?»
«ខ្ញុំតែងសួរថា តើព្រះនៅឯណា?»—នេះជាសម្ដីរបស់សម្ដេចប៉ាបបេណេឌិចទី១៦ កាលដែលគាត់បានទៅទស្សនកិច្ចនៅអតីតជំរំឃុំឃាំងអូឈ្វិត ប្រទេសប៉ូឡូញ។
ពេលមានសោកនាដកម្ម តើអ្នកធ្លាប់ឆ្ងល់ឬទេថា ‹តើព្រះនៅឯណា?› ឬក្នុងជីវិតរបស់អ្នកផ្ទាល់ តើរឿងខ្លោចផ្សាដែលកើតឡើងធ្វើឲ្យអ្នកឆ្ងល់ថា ព្រះយកចិត្តទុកដាក់នឹងអ្នកផ្ទាល់ឬទេ?
ប្រហែលអ្នកមានអារម្មណ៍ដូចហ្សិលា ដែលរស់នៅសហរដ្ឋអាម៉េរិក។ នាងធំឡើងក្នុងគ្រួសារដែលមានជំនឿសាសនាខ្លាំង នាងនិយាយថា៖ «តាំងពីតូចមក ខ្ញុំចង់ដឹងអំពីព្រះ ពីព្រោះលោកជាអ្នកបង្កើតយើង។ ក៏ប៉ុន្តែ ខ្ញុំមិនដែលមានអារម្មណ៍ជិតស្និទ្ធនឹងលោកទេ។ ខ្ញុំគិតថាលោកមើលខ្ញុំ តែមើលពីចម្ងាយប៉ុណ្ណោះ។ ខ្ញុំមិនមានអារម្មណ៍ថាព្រះស្អប់ខ្ញុំនោះទេ ប៉ុន្តែខ្ញុំក៏មិនជឿថាលោកស្រឡាញ់ខ្ញុំដែរ»។ ហេតុអ្វីហ្សិលាសង្ស័យដូច្នេះ? នាងពន្យល់ថា៖ «ក្រុមគ្រួសាររបស់ខ្ញុំជួបរឿងខ្លោចផ្សាមួយហើយមួយទៀត តែមើលទៅព្រះមិនជួយយើងទាល់តែសោះ»។
ដូចហ្សិលា អ្នកប្រហែលជាមានអារម្មណ៍ថាពិតជាមានព្រះដែលមានឫទ្ធានុភាពខ្លាំងក្លាបំផុតមែន។ ទោះជាយ៉ាងនេះក្ដី អ្នកប្រហែលជាឆ្ងល់ថា តើលោកពិតជាយកចិត្តទុកដាក់នឹងអ្នកឬយ៉ាងណា។ បុរសសុចរិតម្នាក់ឈ្មោះយ៉ូប ដែលជឿថាអ្នកបង្កើតមានឫទ្ធានុភាពនិងប្រាជ្ញា ក៏ធ្លាប់សង្ស័យដូច្នេះដែរ។ (យ៉ូប ២:៣; ៩:៤) ក្រោយពីយ៉ូបជួបទុក្ខញាំញីម្ដងហើយម្ដងទៀត គ្មានលោះសោះ គាត់បានសួរព្រះថា៖ «ហេតុអ្វីលោកបែរមុខចេញពីខ្ញុំ ហើយចាត់ទុកខ្ញុំជាសត្រូវរបស់លោកដូច្នេះ?»។—យ៉ូប ១៣:២៤
តើគម្ពីរចែងយ៉ាងណា? តើព្រះជាអ្នកបណ្ដាលឲ្យមានទុក្ខវេទនាឬ? តើមានភស្តុតាងដែលបង្ហាញថាព្រះយកចិត្តទុកដាក់នឹងមនុស្សទូទៅ និងយើងម្នាក់ៗឬទេ? តើមានអ្នកណាម្នាក់ពិតជាអាចដឹងថាលោកចាប់អារម្មណ៍នឹងយើង យល់អំពីយើង អាណិតអាសូរយើង ឬជួយយើងដោះស្រាយនូវគ្រប់បញ្ហារបស់យើងឬទេ?
នៅអត្ថបទបន្ទាប់ យើងនឹងពិចារណាថាអ្វីដែលព្រះបង្កើត បង្រៀនយើងអំពីការយកចិត្តទុកដាក់របស់លោកចំពោះយើង។ (រ៉ូម ១:២០) បន្ទាប់មក យើងនឹងវិភាគមើលអ្វីដែលគម្ពីរបង្ហាញប្រាប់អំពីការយកចិត្តទុកដាក់របស់ព្រះ។ កាលដែលអ្នកកាន់តែ«ស្គាល់លោក»តាមរយៈអ្វីដែលលោកបង្កើតនិងបណ្ដាំរបស់លោក អ្នកនឹងកាន់តែមានទំនុកចិត្តថា «លោករមែងគិតអំពីអ្នក»។—យ៉ូហានទី១ ២:៣; ពេត្រុសទី១ ៥:៧
លោកអ្នកក៏ប្រហែលជាចូលចិត្តដែរ
ទស្សនាវដ្ដី
តើព្រះចាប់អារម្មណ៍នឹងអ្នកឬទេ?
តើមានភ័ស្តុតាងអ្វីដែលបង្ហាញថាព្រះចាប់អារម្មណ៍យ៉ាងខ្លាំងចំពោះសុខុមាលភាពរបស់អ្នក?
