អត្ថបទសិក្សា ៣០
ចូរកាន់ខ្ជាប់តាមសេចក្ដីពិត
«គ្មានអ្វីធ្វើឲ្យខ្ញុំអរសប្បាយជាងការទទួលដំណឹងថា កូនៗរបស់ខ្ញុំកំពុងកាន់ខ្ជាប់តាមសេចក្ដីពិតនោះឡើយ»។—៣យ៉ូន. ៤
ចម្រៀងលេខ៥៤ ‹គឺផ្លូវនេះហើយ›
សេចក្ដីសង្ខេប *
១. ដូចបានឃើញនៅយ៉ូហានទី៣ ៣, ៤ តើអ្វីធ្វើឲ្យយើងសប្បាយចិត្ត?
តើអ្នកអាចស្រមៃឃើញឬទេថា សាវ័កយ៉ូហានមានអារម្មណ៍សប្បាយយ៉ាងណាទៅពេលដែលគាត់ឮថា ពួកអ្នកដែលគាត់បានជួយឲ្យរៀនសេចក្ដីពិតនៅតែបម្រើព្រះយេហូវ៉ាយ៉ាងស្មោះត្រង់? ពួកគេជួបបញ្ហាជាច្រើន ហើយយ៉ូហានបានខំប្រឹងពង្រឹងជំនឿរបស់គ្រិស្តសាសនិកដ៏ស្មោះត្រង់ទាំងនេះ ដែលគាត់ចាត់ទុកដូចកូន។ ស្រដៀងគ្នាដែរ យើងសប្បាយចិត្ត ពេលដែលកូនបង្កើតរបស់យើងឬពួកអ្នកដែលយើងបានជួយឲ្យរៀនសេចក្ដីពិត ប្រគល់ខ្លួនជូនព្រះយេហូវ៉ានិងបន្តបម្រើលោក។—សូមអាន យ៉ូហានទី៣ ៣, ៤
២. តើអ្វីជាគោលបំណងនៃសំបុត្រដែលយ៉ូហានបានសរសេរ?
២ នាឆ្នាំ៩៨ គ.ស. យ៉ូហានទំនងជាបានរស់នៅក្រុងអេភេសូរឬជិតក្រុងនោះ។ គាត់ប្រហែលជាបានរើទៅទីនោះក្រោយពីគាត់បានត្រូវដោះលែងពីគុកនៅកោះប៉ាត់ម៉ុស។ ប្រហែលជានៅពេលនោះ សកម្មពលបរិសុទ្ធរបស់ព្រះយេហូវ៉ាបានបណ្ដាលឲ្យគាត់សរសេរសំបុត្របី។ គោលបំណងនៃសំបុត្រទាំងនោះគឺជំរុញចិត្តគ្រិស្តសាសនិកដ៏ស្មោះត្រង់ឲ្យរក្សាជំនឿទៅលើលោកយេស៊ូ ហើយបន្តកាន់ខ្ជាប់តាមសេចក្ដីពិត។
៣. តើយើងនឹងឆ្លើយសំណួរអ្វីខ្លះ?
៣ យ៉ូហានគឺជាសាវ័កដែលរស់នៅចុងក្រោយគេ ហើយគាត់ព្រួយបារម្ភអំពីឥទ្ធិពលដែលគ្រូក្លែងក្លាយមានទៅលើក្រុមជំនុំ។ * (១យ៉ូន. ២:១៨, ១៩, ២៦) ពួកអ្នកក្បត់ជំនឿទាំងនោះបានអះអាងថាពួកគេស្គាល់ព្រះ ប៉ុន្តែពួកគេមិនធ្វើតាមបញ្ញត្តិរបស់ព្រះយេហូវ៉ាទេ។ សូមយើងពិចារណាអំពីយោបល់ដែលយ៉ូហានបានសរសេរក្រោមការដឹកនាំរបស់ព្រះ។ កាលដែលយើងធ្វើដូច្នេះ យើងនឹងឃើញចម្លើយចំពោះសំណួរបីគឺ៖ តើការកាន់ខ្ជាប់តាមសេចក្ដីពិតមានន័យយ៉ាងណា? តើអ្វីខ្លះអាចបញ្ឈប់យើងពីការកាន់ខ្ជាប់តាមសេចក្ដីពិត? តើតាមរបៀបណាយើងអាចជួយគ្នាទៅវិញទៅមកឲ្យនៅជាប់នឹងសេចក្ដីពិត?
តើការកាន់ខ្ជាប់តាមសេចក្ដីពិតមានន័យយ៉ាងណា?
៤. យោងទៅតាមយ៉ូហានទី១ ២:៣-៦ និងយ៉ូហានទី២ ៤, ៦ តើការកាន់ខ្ជាប់តាមសេចក្ដីពិតរួមបញ្ចូលអ្វីខ្លះ?
៤ ដើម្បីកាន់ខ្ជាប់តាមសេចក្ដីពិត យើងត្រូវស្គាល់សេចក្ដីពិតនៅក្នុងគម្ពីរដែលជាបណ្ដាំរបស់ព្រះ។ យើងក៏ត្រូវ«ប្រព្រឹត្តតាមបញ្ញត្ដិរបស់[ព្រះយេហូវ៉ា]»ដែរ។ (សូមអាន យ៉ូហានទី១ ២:៣-៦; យ៉ូហានទី២ ៤, ៦) លោកយេស៊ូបានទុកគំរូដ៏ល្អឥតខ្ចោះស្ដីអំពីការស្ដាប់បង្គាប់ព្រះយេហូវ៉ា។ ដូច្នេះរបៀបដ៏សំខាន់មួយដែលយើងស្ដាប់បង្គាប់ព្រះយេហូវ៉ា គឺដោយខំដើរតាមលំអានដានរបស់លោកយេស៊ូឲ្យបានដិតដល់តាមដែលអាចធ្វើបាន។—យ៉ូន. ៨:២៩; ១ពេ. ២:២១
៥. តើយើងត្រូវជឿជាក់អំពីអ្វី?
៥ ដើម្បីកាន់ខ្ជាប់តាមសេចក្ដីពិត យើងត្រូវជឿជាក់ថាព្រះយេហូវ៉ាគឺជាព្រះនៃសេចក្ដីពិត ក្នុងន័យថាអ្វីទាំងអស់ដែលលោកប្រាប់យើងក្នុងគម្ពីរដែលជាបណ្ដាំរបស់លោកគឺជាការពិត។ យើងក៏ត្រូវជឿជាក់ដែរថាលោកយេស៊ូគឺជាមេស្ស៊ីដែលព្រះបានសន្យា។ មនុស្សជាច្រើននៅសព្វថ្ងៃនេះសង្ស័យថាលោកយេស៊ូមិនបានត្រូវរើសតាំងជាស្ដេចនៃរាជាណាចក្ររបស់ព្រះទេ។ យ៉ូហានបានព្រមានថាមាន«អ្នកបោកបញ្ឆោតជាច្រើន»ដែលអាចបំភាន់ពួកអ្នកដែលមិនបានជឿយ៉ាងមុតមាំលើសេចក្ដីពិតអំពីព្រះយេហូវ៉ានិងលោកយេស៊ូ។ (២យ៉ូន. ៧-១១) យ៉ូហានបានសរសេរថា៖ «តើអ្នកណាជាអ្នកកុហក បើមិនមែនអ្នកដែលមិនព្រមទទួលស្គាល់លោកយេស៊ូថាជាគ្រិស្ត?»។ (១យ៉ូន. ២:២២) របៀបតែមួយគត់ដែលយើងអាចជៀសវាងមិនឲ្យគេបោកបញ្ឆោតយើងគឺដោយសិក្សាបណ្ដាំរបស់ព្រះ។ យ៉ាងនេះ យើងនឹងស្គាល់ព្រះយេហូវ៉ានិងលោកយេស៊ូ។ (យ៉ូន. ១៧:៣) លុះត្រាតែយើងធ្វើដូច្នេះ ទើបយើងនឹងជឿជាក់ថាយើងមានសេចក្ដីពិត។
តើអ្វីខ្លះអាចបញ្ឈប់យើងពីការកាន់ខ្ជាប់តាមសេចក្ដីពិត?
៦. តើប្អូនៗគ្រិស្តសាសនិកជួបការពិបាកអ្វី?
៦ គ្រិស្តសាសនិកទាំងអស់ត្រូវប្រុងប្រយ័ត្នកុំឲ្យចាញ់បោកទស្សនវិជ្ជារបស់មនុស្សឡើយ។ (១យ៉ូន. ២:២៦) ជាពិសេសគ្រិស្តសាសនិកវ័យក្មេងត្រូវប្រុងប្រយ័ត្នចំពោះអន្ទាក់នេះ។ បងស្រីជនជាតិបារាំងម្នាក់ឈ្មោះអាឡិចសៀ * ដែលមានអាយុ២៥ឆ្នាំនិយាយថា៖ «ពេលខ្ញុំនៅរៀន គេបង្រៀនអំពីការវិវត្តន៍និងទ្រឹស្ដីផ្សេងទៀត ហើយទ្រឹស្ដីទាំងនោះបានធ្វើឲ្យខ្ញុំចាប់ផ្ដើមសង្ស័យ។ ជួនកាល ទ្រឹស្ដីទាំងនោះទាក់ទាញចិត្តខ្ញុំ។ ខ្ញុំគិតថាគឺខុសបើខ្ញុំព្រងើយកន្តើយចំពោះអ្វីដែលគម្ពីរបង្រៀន ហើយជឿលើអ្វីទាំងអស់ដែលគ្រូបានបង្រៀននៅសាលាទៅវិញ»។ បងអាឡិចសៀបានសិក្សាសៀវភៅ ជីវិតបានកើតមានឡើងតាមរបៀបណា? តាមរបៀបវិវត្តន៍ឬតាមការបង្កើត? (Life—How Did It Get Here? By Evolution or by Creation?) ក្នុងរយៈពេលប៉ុន្មានសប្ដាហ៍ គាត់លែងមានការសង្ស័យទៀត។ បងអាឡិចសៀនិយាយថា៖ «ខ្ញុំបានធ្វើឲ្យខ្លួនជឿជាក់ថាអ្វីដែលគម្ពីរបង្រៀនគឺជាសេចក្ដីពិត។ ខ្ញុំក៏ទទួលស្គាល់ថាការរស់នៅស្របតាមខ្នាតតម្រាពីគម្ពីរនឹងធ្វើឲ្យខ្ញុំមានអំណរនិងសេចក្ដីសុខសាន្ត»។
៧. តើយើងត្រូវប្រុងប្រយ័ត្នមិនធ្វើអ្វី ហើយហេតុអ្វី?
៧ គ្រិស្តសាសនិកទាំងអស់ មិនថាចាស់ឬក្មេងក្ដី មិនត្រូវធ្វើជាមនុស្សដែលមានមុខពីរឡើយ។ យ៉ូហានបានលើកឡើងថាយើងមិនអាចកាន់ខ្ជាប់តាមសេចក្ដីពិត ហើយនៅដំណាលគ្នាមានរបៀបរស់នៅដែលប្រាសចាកសីលធម៌នោះទេ។ (១យ៉ូន. ១:៦) បើយើងចង់ឲ្យព្រះយេហូវ៉ាពេញចិត្តនឹងយើង យើងត្រូវចាំជានិច្ចថាលោកឃើញអ្វីទាំងអស់ដែលយើងធ្វើ។ មនុស្សប្រហែលជាមិនអាចឃើញអ្វីដែលយើងធ្វើក្នុងទីកំបាំងទេ តែនោះមិនអាចលាក់បាំងពីភ្នែករបស់ព្រះយេហូវ៉ាឡើយ។—ហេ. ៤:១៣
៨. តើយើងត្រូវជៀសវាងអ្វី?
៨ យើងត្រូវជៀសវាងមិនមានទស្សនៈដូចមនុស្សក្នុងពិភពលោកអំពីអំពើខុសឆ្គងឡើយ។ សាវ័កយ៉ូហានបានសរសេរថា៖ «ប្រសិនបើយើងនិយាយថា‹យើងគ្មានភាពខុសឆ្គងទេ› នោះយើងកំពុងបញ្ឆោតខ្លួនហើយ»។ (១យ៉ូន. ១:៨) នៅសម័យយ៉ូហាន អ្នកក្បត់ជំនឿអះអាងថាបុគ្គលម្នាក់អាចធ្វើខុស ហើយនៅតែមានចំណងមិត្តភាពជាមួយនឹងព្រះ។ សព្វថ្ងៃនេះ យើងកំពុងរស់នៅក្នុងចំណោមមនុស្សដែលមានទស្សនៈស្រដៀងនឹងនេះ។ មនុស្សជាច្រើនអះអាងថាពួកគេជឿលើព្រះ ប៉ុន្តែពួកគេមិនយល់ស្របនឹងទស្សនៈរបស់ព្រះយេហូវ៉ាអំពីអំពើខុសឆ្គងទេ ជាពិសេសការប្រព្រឹត្តដែលជាប់ទាក់ទងនឹងរឿងផ្លូវភេទ។ មានការប្រព្រឹត្តមួយចំនួនខាងផ្លូវភេទ ដែលព្រះយេហូវ៉ាចាត់ទុកថាខុស ប៉ុន្តែមនុស្សទាំងនេះបែរជានិយាយថាបុគ្គលណាម្នាក់អាចធ្វើអ្វីទាំងនេះបាន បើគាត់ចង់ធ្វើ។
ប្អូនៗវ័យក្មេង ចូរស្វែងយល់អំពីមូលហេតុដែលព្រះយេហូវ៉ាមានប្រសាសន៍ថាអ្វីមួយគឺខុសឬត្រូវ។ យ៉ាងនេះ ប្អូននឹងអាចពន្យល់អំពីមូលហេតុដែលប្អូនសម្រេចចិត្តមិនធ្វើអ្វីដែលខុស (សូមមើលវគ្គ៩) *
៩. តើប្អូនៗវ័យក្មេងទទួលប្រយោជន៍យ៉ាងណាពីការកាន់ខ្ជាប់តាមគោលការណ៍គម្ពីរ?
៩ នៅពេលដែលអ្នករួមការងារឬសិស្សរួមថ្នាក់មិនយល់ស្របនឹងអ្វីដែលគម្ពីរចែងអំពីរឿងផ្លូវភេទ គ្រិស្តសាសនិកវ័យក្មេងប្រហែលជាពិបាករក្សាទស្សនៈត្រឹមត្រូវចំពោះរឿងនោះ។ នេះបានកើតឡើងចំពោះបងប្រុសអាឡិកសាន់ដា។ គាត់នឹកចាំថា៖ «សិស្សស្រីខ្លះបានព្យាយាមបង្ខំខ្ញុំឲ្យរួមភេទជាមួយនឹងពួកគេ។ ពេលខ្ញុំប្រកែក ពួកគេនិយាយថាខ្ញុំច្បាស់ជាប្រុសស្រឡាញ់ប្រុសដូចគ្នា»។ បើអ្នកជួបស្ថានភាពស្រដៀងនឹងនេះ សូមចាំថាពេលអ្នកកាន់ខ្ជាប់តាមគោលការណ៍គម្ពីរ អ្នករក្សាតម្លៃចំពោះខ្លួនឯង ការពារសុខភាពខាងផ្លូវកាយនិងផ្លូវចិត្តរបស់អ្នក ព្រមទាំងរក្សាចំណងមិត្តភាពល្អជាមួយព្រះយេហូវ៉ា។ រាល់ដងដែលអ្នកទប់ទល់នឹងការល្បួង នោះអ្នកកាន់តែស្រួលធ្វើអ្វីដែលត្រឹមត្រូវ។ សូមចាំដែរថាទស្សនៈមិនត្រឹមត្រូវរបស់ពិភពលោកនេះអំពីរឿងផ្លូវភេទគឺមកពីសាថាន។ ដូច្នេះ ពេលអ្នកមិនព្រមមានទស្សនៈដូចមនុស្សក្នុងពិភពលោកនេះ អ្នក«ឈ្នះមេកំណាច»។—១យ៉ូន. ២:១៤
១០. តើយ៉ូហានទី១ ១:៩ជួយយើងយ៉ាងណាឲ្យបម្រើព្រះយេហូវ៉ាដោយមានសមត្ថភាពវិនិច្ឆ័យដែលមិនផ្ដន្ទាទោស?
១០ យើងទទួលស្គាល់ថាព្រះយេហូវ៉ាមានសិទ្ធិប្រាប់យើងថាការប្រព្រឹត្តណាគឺខុសឆ្គង។ យើងក៏ខំអស់ពីសមត្ថភាពមិនប្រព្រឹត្តអំពើខុសឆ្គងដែរ។ ប៉ុន្តែពេលយើងប្រព្រឹត្តអំពើខុសឆ្គង យើងអធិដ្ឋានសារភាពទៅព្រះយេហូវ៉ាអំពីកំហុសឆ្គងរបស់យើង។ (សូមអាន យ៉ូហានទី១ ១:៩) ម្យ៉ាងទៀត បើយើងប្រព្រឹត្តអំពើខុសឆ្គងធ្ងន់ធ្ងរ យើងស្វែងរកជំនួយពីពួកអ្នកចាស់ទុំដែលព្រះយេហូវ៉ាបានតែងតាំងឲ្យថែរក្សាយើង។ (យ៉ា. ៥:១៤-១៦) ប៉ុន្តែ យើងមិនគួរបន្ទោសខ្លួនរហូត ចំពោះកំហុសដែលយើងបានធ្វើនៅអតីតកាលទេ។ ហេតុអ្វី? ពីព្រោះបិតាដែលស្រឡាញ់យើងបានផ្ដល់គ្រឿងបូជាលោះរបស់បុត្រលោក ដើម្បីឲ្យការខុសឆ្គងរបស់យើងអាចទទួលការអភ័យទោស។ ពេលព្រះយេហូវ៉ាមានប្រសាសន៍ថាលោកនឹងអភ័យទោសឲ្យអ្នកប្រព្រឹត្តអំពើខុសឆ្គងដែលប្រែចិត្ត នោះលោកពិតជាអភ័យទោសឲ្យមែន។ ដូច្នេះ ព្រះយេហូវ៉ាបើកឱកាសឲ្យយើងអាចបម្រើលោកដោយមានសមត្ថភាពវិនិច្ឆ័យដែលមិនផ្ដន្ទាទោស។—១យ៉ូន. ២:១, ២, ១២; ៣:១៩, ២០
១១. តើយើងអាចការពារគំនិតរបស់យើងពីសេចក្ដីបង្រៀនដែលអាចបង្ខូចជំនឿរបស់យើងយ៉ាងដូចម្ដេច?
១១ យើងមិនព្រមទទួលយកសេចក្ដីបង្រៀនរបស់ពួកអ្នកក្បត់ជំនឿឡើយ។ តាំងពីក្រុមជំនុំគ្រិស្តសាសនិកចាប់ផ្ដើមបង្កើតឡើង មេកំណាចប្រើអ្នកបោកបញ្ឆោតជាច្រើននាក់ដើម្បីធ្វើឲ្យអ្នកបម្រើដ៏ស្មោះត្រង់របស់ព្រះមានចិត្តសង្ស័យ។ ដូច្នេះ យើងត្រូវចេះសម្គាល់អ្វីដែលជាការពិត និងអ្វីដែលជាការភូតភរ។ * សត្រូវរបស់យើងប្រហែលជាប្រើប្រព័ន្ធអ៊ីនធឺណិត ឬបណ្ដាញគេហទំព័រសម្រាប់ទាក់ទងគ្នា ដើម្បីព្យាយាមធ្វើឲ្យទំនុកចិត្តរបស់យើងទៅលើព្រះយេហូវ៉ាចុះខ្សោយ ហើយធ្វើឲ្យសេចក្ដីស្រឡាញ់របស់យើងចំពោះបងប្អូនរសាយទៅ។ សូមកុំជឿពាក្យភូតភរទាំងនេះ ព្រោះនេះមកពីសាថាន។—១យ៉ូន. ៤:១, ៦; បប. ១២:៩
១២. ហេតុអ្វីយើងគួរពង្រឹងជំនឿរបស់យើងទៅលើសេចក្ដីពិតដែលយើងបានរៀន?
១២ ដើម្បីទប់ទល់នឹងការវាយប្រហាររបស់សាថាន យើងត្រូវពង្រឹងទំនុកចិត្តរបស់យើងទៅលើលោកយេស៊ូ និងតួនាទីរបស់លោកក្នុងគោលបំណងរបស់ព្រះ។ យើងក៏ត្រូវទុកចិត្តទៅលើខ្សែរយៈតែមួយគត់ដែលព្រះយេហូវ៉ាកំពុងប្រើនៅសព្វថ្ងៃនេះដែរ។ (ម៉ាថ. ២៤:៤៥-៤៧) យើងពង្រឹងទំនុកចិត្តរបស់យើងដោយសិក្សាបណ្ដាំរបស់ព្រះជាទៀងទាត់។ យ៉ាងនេះ ជំនឿរបស់យើងនឹងប្រៀបដូចជាដើមឈើដែលចាក់ឫសជ្រៅក្នុងដី។ ប៉ូលបាននិយាយអ្វីស្រដៀងនឹងនេះ ពេលគាត់សរសេរសំបុត្រទៅក្រុមជំនុំនៅក្រុងកូឡុស។ គាត់បាននិយាយថា៖ «តាមរបៀបដែលអ្នករាល់គ្នាបានទទួលលោកម្ចាស់គ្រិស្តយេស៊ូហើយ ចូរបន្តដើរដោយរួបរួមជាមួយនឹងលោក។ ចូរចាក់ឫស និងទទួលការពង្រឹងក្នុងលោក ថែមទាំងតាំងខ្លួនឲ្យមាំមួនឡើងក្នុងជំនឿ»។ (កូឡ. ២:៦, ៧) បើយើងខំព្យាយាមពង្រឹងជំនឿរបស់យើង នោះសាថានឬអ្នកគាំទ្ររបស់វានឹងមិនអាចបញ្ឈប់យើងពីការកាន់ខ្ជាប់តាមសេចក្ដីពិតឡើយ។—២យ៉ូន. ៨, ៩
១៣. តើយើងគួររំពឹងអ្វី ហើយហេតុអ្វី?
១៣ យើងត្រូវរំពឹងថាពិភពលោកនឹងស្អប់យើង។ (១យ៉ូន. ៣:១៣) យ៉ូហានរំលឹកយើងថា៖ «ពិភពលោកទាំងមូលនៅក្រោមអំណាចរបស់មេកំណាច»។ (១យ៉ូន. ៥:១៩) កាលដែលរបៀបរបបពិភពលោកនេះកាន់តែជិតដល់ទីបញ្ចប់ សាថានកាន់តែមានកំហឹង។ (បប. ១២:១២) វាមិនគ្រាន់តែប្រើការវាយប្រហារមិនចំៗដូចជាការប្រព្រឹត្តអំពើប្រាសចាកសីលធម៌ខាងផ្លូវភេទ ឬពាក្យភូតភររបស់អ្នកក្បត់ជំនឿប៉ុណ្ណោះទេ តែវាក៏ប្រើការវាយប្រហារចំៗដែរ ដូចជាការបៀតបៀនយ៉ាងសាហាវ។ សាថានដឹងថាវាមានពេលតែបន្តិចបន្តួចដើម្បីព្យាយាមបញ្ឈប់កិច្ចការផ្សព្វផ្សាយរបស់យើង ឬបំផ្លាញជំនឿរបស់យើង។ ហេតុនេះ យើងមិនភ្ញាក់ផ្អើលទេដែលកិច្ចការរបស់យើងបានត្រូវដាក់កម្រិត ឬដាក់បម្រាមនៅប្រទេសមួយចំនួន។ ទោះជាយ៉ាងនេះក្ដី បងប្អូននៅប្រទេសទាំងនោះកំពុងតស៊ូព្យាយាម។ ពួកគេបង្ហាញថាទោះជាមេកំណាចធ្វើអ្វីក៏ដោយ យើងអាចទទួលជ័យជម្នះ!
ចូរជួយគ្នាទៅវិញទៅមក ឲ្យនៅជាប់នឹងសេចក្ដីពិត
១៤. តើយើងអាចជួយបងប្អូនរបស់យើងឲ្យនៅជាប់នឹងសេចក្ដីពិតតាមរបៀបណា?
១៤ ដើម្បីជួយបងប្អូនរបស់យើងឲ្យនៅជាប់នឹងសេចក្ដីពិត យើងត្រូវចេះយល់អារម្មណ៍ ឬបង្ហាញសេចក្ដីអាណិតមេត្តាចំពោះពួកគេ។ (១យ៉ូន. ៣:១០, ១១, ១៦-១៨) យើងត្រូវស្រឡាញ់គ្នាទៅវិញទៅមកមិនគ្រាន់តែនៅគ្រាសប្បាយប៉ុណ្ណោះទេ ប៉ុន្តែក៏នៅគ្រាមានទុក្ខដែរ។ ជាឧទាហរណ៍ តើអ្នកដឹងថាមានអ្នកណាម្នាក់ដែលមានបុគ្គលជាទីស្រឡាញ់ស្លាប់ ហើយត្រូវការការសម្រាលទុក្ខ ឬត្រូវការជំនួយតាមរបៀបផ្សេងៗឬទេ? ឬតើអ្នកបានឮថាបងប្អូនរួមជំនឿបានរងទុក្ខដោយសារគ្រោះមហន្តរាយធម្មជាតិ ហើយត្រូវការជំនួយដើម្បីសង់សាលប្រជុំឬផ្ទះរបស់ពួកគេឡើងវិញឬទេ? យើងបង្ហាញថាយើងមានសេចក្ដីស្រឡាញ់និងសេចក្ដីអាណិតមេត្តាខ្លាំងយ៉ាងណាចំពោះបងប្អូនរបស់យើង មិនគ្រាន់តែតាមរយៈពាក្យសម្ដីប៉ុណ្ណោះទេ ប៉ុន្តែសំខាន់ជាងនេះទៅទៀត តាមរយៈការប្រព្រឹត្តរបស់យើងផងដែរ។
១៥. តាមយ៉ូហានទី១ ៤:៧, ៨ តើយើងត្រូវធ្វើអ្វី?
១៥ ពេលយើងបង្ហាញសេចក្ដីស្រឡាញ់ចំពោះគ្នាទៅវិញទៅមក យើងយកតម្រាប់បិតានៅស្ថានសួគ៌ដែលប្រកបដោយសេចក្ដីស្រឡាញ់។ (សូមអាន យ៉ូហានទី១ ៤:៧, ៨) របៀបដ៏សំខាន់មួយដែលយើងបង្ហាញសេចក្ដីស្រឡាញ់គឺដោយអភ័យទោសឲ្យគ្នាទៅវិញទៅមក។ ជាឧទាហរណ៍ បុគ្គលម្នាក់ប្រហែលជាធ្វើឲ្យយើងឈឺចិត្ត ប៉ុន្តែក្រោយមកសុំទោសយើង។ យើងបង្ហាញសេចក្ដីស្រឡាញ់ដោយអភ័យទោសឲ្យគាត់ ហើយបំភ្លេចអ្វីដែលគាត់បានធ្វើមកលើយើង។ (កូឡ. ៣:១៣) បងប្រុសម្នាក់ឈ្មោះអាល់ដូបានជួបបញ្ហានេះ ពេលគាត់ឮបងប្រុសម្នាក់ដែលគាត់គោរពនិយាយមិនល្អអំពីវប្បធម៌របស់ជាតិសាសន៍គាត់។ បងអាល់ដូនិយាយថា៖ «ខ្ញុំបានអធិដ្ឋានឥតឈប់ទៅព្រះយេហូវ៉ាដើម្បីជួយខ្ញុំកុំឲ្យមានទស្សនៈមិនល្អចំពោះបងប្រុសនោះ»។ បងអាល់ដូមិនគ្រាន់តែធ្វើដូច្នេះប៉ុណ្ណោះទេ តែគាត់ក៏បានសុំបងប្រុសនោះឲ្យទៅផ្សព្វផ្សាយជាមួយគាត់។ ពេលផ្សព្វផ្សាយ បងអាល់ដូបានប្រាប់ថាគាត់ឈឺចិត្តយ៉ាងណាចំពោះអ្វីដែលបងប្រុសនោះបាននិយាយ។ បងអាល់ដូនិយាយថា៖ «ពេលបងប្រុសនោះឮថាខ្ញុំឈឺចិត្តដោយសារពាក្យសម្ដីមិនល្អរបស់គាត់ គាត់បានសុំទោសខ្ញុំ។ តាមរយៈតុងសំឡេងរបស់គាត់ ខ្ញុំអាចដឹងថាគាត់ពិតជាស្ដាយក្រោយចំពោះអ្វីដែលគាត់បាននិយាយមែន។ ក្រោយមក យើងបានទៅជាមិត្តល្អនឹងគ្នាម្ដងទៀត»។
១៦-១៧. តើយើងគួរតាំងចិត្តធ្វើអ្វី?
១៦ សាវ័កយ៉ូហានស្រឡាញ់បងប្អូនរួមជំនឿរបស់គាត់ខ្លាំងណាស់ ហើយចង់ឲ្យពួកគេមានជំនឿរឹងមាំ។ សេចក្ដីស្រឡាញ់និងការយកចិត្តទុកដាក់របស់គាត់អាចសឲ្យឃើញច្បាស់តាមយោបល់ដែលគាត់បានផ្ដល់ឲ្យពួកគេក្នុងសំបុត្រទាំងបីរបស់គាត់។ យើងសប្បាយចិត្តណាស់ដោយដឹងថា បុរសស្ត្រីដែលនឹងគ្រប់គ្រងជាមួយនឹងលោកយេស៊ូនៅស្ថានសួគ៌ ក៏មានសេចក្ដីស្រឡាញ់និងការយកចិត្តទុកដាក់ដូចយ៉ូហាន។—១យ៉ូន. ២:២៧
១៧ សូមយើងធ្វើតាមយោបល់ដែលយើងបានពិចារណាក្នុងអត្ថបទនេះ។ ចូរយើងតាំងចិត្តកាន់ខ្ជាប់តាមសេចក្ដីពិតដោយស្ដាប់បង្គាប់ព្រះយេហូវ៉ាក្នុងគ្រប់ការទាំងអស់។ ចូរសិក្សាបណ្ដាំរបស់ព្រះ និងទុកចិត្តបណ្ដាំនោះ។ ចូរមានជំនឿរឹងមាំលើលោកយេស៊ូ។ ចូរជៀសវាងពីទស្សនវិជ្ជានិងសេចក្ដីបង្រៀនរបស់ពួកអ្នកក្បត់ជំនឿ។ ចូរកុំធ្វើពុតជាអ្នកបម្រើព្រះយេហូវ៉ា ហើយនៅដំណាលគ្នាធ្វើអ្វីដែលខុស ព្រមទាំងកុំស្ដាប់ពួកអ្នកដែលព្យាយាមអូសទាញអ្នកឲ្យធ្វើអ្វីដែលខុស។ ចូរមានរបៀបរស់នៅសមស្របតាមខ្នាតតម្រាដ៏ខ្ពង់ខ្ពស់របស់ព្រះយេហូវ៉ា។ ចូរជួយបងប្អូនឲ្យនៅមាំមួន ដោយអភ័យទោសឲ្យពួកអ្នកដែលធ្វើឲ្យយើងឈឺចិត្ត ហើយជួយពួកអ្នកដែលត្រូវការជំនួយ។ យ៉ាងនេះ ទោះជាយើងមានការពិបាកអ្វីក៏ដោយ យើងនឹងកាន់ខ្ជាប់តាមសេចក្ដីពិត។
ចម្រៀងលេខ៤៩ ធ្វើឲ្យព្រះយេហូវ៉ាមានចិត្តរីករាយ
^ វគ្គ 5 យើងរស់នៅក្នុងពិភពលោកដែលគ្រប់គ្រងដោយសាថានជាឪពុកនៃការភូតភរ។ ដូច្នេះ យើងពិបាកកាន់ខ្ជាប់តាមសេចក្ដីពិតណាស់។ គ្រិស្តសាសនិកដែលរស់នៅចុងសតវត្សរ៍ទី១ គ.ស. ក៏មានការពិបាកដូចនេះដែរ។ ដើម្បីជួយពួកគេនិងយើង ព្រះយេហូវ៉ាបានដឹកនាំសាវ័កយ៉ូហានឲ្យសរសេរសំបុត្របី។ ពីសំបុត្រទាំងនោះ យើងនឹងរៀនអំពីអ្វីដែលអាចនាំឲ្យយើងឈប់កាន់ខ្ជាប់តាមសេចក្ដីពិត និងអ្វីដែលយើងអាចធ្វើដើម្បីយកឈ្នះបញ្ហាទាំងនោះ។
^ វគ្គ 3 សូមមើលប្រអប់ដែលមានចំណងជើងថា« មូលហេតុមួយដែលយ៉ូហានសរសេរសំបុត្រ»។
^ វគ្គ 6 ឈ្មោះខ្លះបានត្រូវផ្លាស់ប្ដូរ។
^ វគ្គ 11 សូមមើលអត្ថបទសិក្សាដែលមានចំណងជើងថា«តើអ្នកមានព័ត៌មានពិតឬទេ?» ក្នុងទស្សនាវដ្ដីប៉មយាម ខែសីហា ឆ្នាំ២០១៨។
^ វគ្គ 59 ការពណ៌នាអំពីរូបភាព: នៅសាលា ប្អូនស្រីវ័យក្មេងម្នាក់តែងតែឃើញនិងឮគេឃោសនាអំពីការស្រឡាញ់ភេទដូចគ្នា។ (នៅប្រទេសខ្លះ ពណ៌ឥន្ទធនូបានត្រូវប្រើដើម្បីបង្ហាញអំពីការស្រឡាញ់ភេទដូចគ្នា) ក្រោយមក គាត់លៃទុកពេលស្រាវជ្រាវដើម្បីពង្រឹងជំនឿរបស់គាត់ទៅលើអ្វីដែលព្រះយេហូវ៉ាចាត់ទុកថាត្រឹមត្រូវ។ នេះជួយគាត់ឲ្យធ្វើការសម្រេចចិត្តល្អ។
