អត្ថបទសិក្សា ២៩
ចូរគាំទ្រលោកយេស៊ូជាអ្នកត្រួតពិនិត្យរបស់យើង
«ខ្ញុំបានទទួលគ្រប់ទាំងអំណាចនៅស្ថានសួគ៌និងនៅផែនដី»។—ម៉ាថ. ២៨:១៨
ចម្រៀងលេខ១៣ គ្រិស្តជាគំរូរបស់យើង
សេចក្ដីសង្ខេប a
១. តើអ្វីជាបំណងប្រាថ្នារបស់ព្រះយេហូវ៉ានៅសព្វថ្ងៃនេះ?
សព្វថ្ងៃនេះ ព្រះយេហូវ៉ាចង់ឲ្យកិច្ចការផ្សព្វផ្សាយដំណឹងល្អអំពីរាជាណាចក្រធ្វើឡើងនៅទូទាំងផែនដី។ (ម៉ាក. ១៣:១០; ១ធី. ២:៣, ៤) នេះគឺជាកិច្ចការរបស់ព្រះ ហើយជាកិច្ចការដ៏សំខាន់ដល់ម្ល៉េះ បានជាលោកជ្រើសរើសបុត្រជាទីស្រឡាញ់របស់លោកឲ្យដឹកនាំកិច្ចការនេះ។ យើងអាចប្រាកដថាក្រោមការមើលខុសត្រូវរបស់លោកយេស៊ូ កិច្ចការផ្សព្វផ្សាយនឹងត្រូវសម្រេចតាមបំណងប្រាថ្នារបស់ព្រះយេហូវ៉ាមុនទីបញ្ចប់មកដល់។—ម៉ាថ. ២៤:១៤
២. តើយើងនឹងពិចារណាអ្វីខ្លះក្នុងអត្ថបទនេះ?
២ ក្នុងអត្ថបទនេះ យើងនឹងពិចារណាអំពីរបៀបដែលលោកយេស៊ូកំពុងប្រើ«ខ្ញុំបម្រើដ៏ស្មោះត្រង់ហើយចេះពិចារណា» ដើម្បីផ្ដល់សេចក្ដីបង្រៀនពីគម្ពីរដែលប្រៀបដូចជាអាហារ ហើយអំពីរបៀបដែលលោកប្រើខ្ញុំបម្រើនោះដើម្បីរៀបចំពួកអ្នកកាន់តាមលោកឲ្យធ្វើកិច្ចការផ្សព្វផ្សាយដ៏អស្ចារ្យបំផុតក្នុងប្រវត្តិសាស្ត្រ។ (ម៉ាថ. ២៤:៤៥) យើងក៏នឹងពិចារណាអំពីអ្វីដែលយើងម្នាក់ៗអាចធ្វើដើម្បីគាំទ្រលោកយេស៊ូនិងខ្ញុំបម្រើដ៏ស្មោះត្រង់នោះ។
លោកយេស៊ូដឹកនាំកិច្ចការផ្សព្វផ្សាយ
៣. តើលោកយេស៊ូបានទទួលអំណាចអ្វី?
៣ លោកយេស៊ូកំពុងមើលការខុសត្រូវលើកិច្ចការផ្សព្វផ្សាយ។ ហេតុអ្វីយើងអាចប្រាកដដូច្នេះ? មិនយូរមុនលោកយេស៊ូបានឡើងទៅស្ថានសួគ៌វិញ លោកបានជួបពួកអ្នកកាន់តាមដ៏ស្មោះត្រង់មួយចំនួនរបស់លោកនៅភ្នំមួយ នាស្រុកកាលីឡេ។ លោកបានប្រាប់ពួកគេថា៖ «ខ្ញុំបានទទួលគ្រប់ទាំងអំណាចនៅស្ថានសួគ៌និងនៅផែនដី»។ សូមកត់សម្គាល់ប្រសាសន៍របស់លោកនៅបន្ទាប់មក ដែលថា៖ «ដូច្នេះ ចូរទៅបង្រៀនមនុស្សគ្រប់ជាតិសាសន៍ឲ្យក្លាយជាអ្នកកាន់តាមខ្ញុំ»។ (ម៉ាថ. ២៨:១៨, ១៩) យើងឃើញថាភារកិច្ចមួយក្នុងចំណោមភារកិច្ចដែលលោកយេស៊ូបានទទួល គឺដឹកនាំកិច្ចការផ្សព្វផ្សាយ។
៤. ហេតុអ្វីយើងអាចដឹងប្រាកដថាលោកយេស៊ូនៅតែមើលការខុសត្រូវលើកិច្ចការផ្សព្វផ្សាយ?
៤ លោកយេស៊ូបានមានប្រសាសន៍ថា កិច្ចការផ្សព្វផ្សាយនិងបង្រៀនមនុស្សឲ្យក្លាយជាអ្នកកាន់តាមលោក នឹងត្រូវធ្វើឡើងនៅ«គ្រប់ជាតិសាសន៍» ហើយថាលោកនឹងនៅជាមួយនឹងពួកអ្នកកាន់តាមលោក«ជារៀងរាល់ថ្ងៃ រហូតដល់គ្រាចុងបញ្ចប់នៃរបៀបរបបពិភពលោកនេះ»។ (ម៉ាថ. ២៨:២០) ពាក្យទាំងនោះបញ្ជាក់យ៉ាងច្បាស់ថា កិច្ចការផ្សព្វផ្សាយនឹងបន្តនៅក្រោមការមើលខុសត្រូវរបស់លោកយេស៊ូ រហូតដល់សម័យយើង។
៥. តើយើងមានចំណែកអ្វីក្នុងការធ្វើឲ្យពាក្យនៅចម្រៀងសរសើរព្រះ ១១០:៣សម្រេច?
៥ លោកយេស៊ូមិនបានព្រួយបារម្ភថានឹងខ្វះអ្នកធ្វើការក្នុងអំឡុងគ្រាចុងបញ្ចប់នៃរបៀបរបស់ពិភពលោកនេះទេ។ លោកបានដឹងថា ពាក្យដែលអ្នកតែងចម្រៀងសរសើរព្រះបានប្រកាសទុកជាមុននឹងត្រូវសម្រេច ដែលថា៖ «រាស្ត្ររបស់លោកនឹងប្រគល់ខ្លួនដោយស្ម័គ្រចិត្តក្នុងថ្ងៃដែលលោកនាំកងទ័ពចេញទៅច្បាំង»។ (ចសព. ១១០:៣) បើអ្នកចូលរួមក្នុងកិច្ចការផ្សព្វផ្សាយដំណឹងល្អ អ្នកកំពុងគាំទ្រលោកយេស៊ូនិងខ្ញុំបម្រើដ៏ស្មោះត្រង់ ហើយក៏កំពុងជួយសម្រេចទំនាយនោះដែរ។ ទោះជាកិច្ចការនេះកំពុងជឿនទៅមុខក្ដី មានការពិបាកផ្សេងៗ។
៦. តើអ្នកផ្សព្វផ្សាយជួបការពិបាកអ្វីនៅសព្វថ្ងៃនេះ?
៦ ការពិបាកមួយដែលអ្នកផ្សព្វផ្សាយអំពីរាជាណាចក្រព្រះជួបប្រទះគឺការប្រឆាំង។ ពួកអ្នកក្បត់ជំនឿ ពួកអ្នកដឹកនាំសាសនា និងពួកអ្នកនយោបាយបានកុហកមនុស្សជាច្រើនអំពីកិច្ចការរបស់យើង។ បើសាច់ញាតិរបស់យើង អ្នកដែលយើងស្គាល់ និងអ្នករួមការងារបានត្រូវបំភាន់ដោយព័ត៌មានមិនពិតនេះ ពួកគេប្រហែលជាព្យាយាមបង្ខំយើងឲ្យឈប់បម្រើព្រះយេហូវ៉ានិងឈប់ផ្សព្វផ្សាយ។ នៅប្រទេសខ្លះ សត្រូវរបស់យើងបានគំរាមកំហែង វាយប្រហារ ឬចាប់ខ្លួនបងប្អូនរបស់យើង ហើយថែមទាំងដាក់គុកពួកគេទៀតផង។ យើងមិនភ្ញាក់ផ្អើលដែលគេប្រព្រឹត្តបែបនេះមកលើយើងទេ។ លោកយេស៊ូបានប្រាប់ទុកជាមុនថា៖ «ប្រជាជាតិទាំងឡាយនឹងស្អប់អ្នករាល់គ្នា ដោយសារអ្នករាល់គ្នាកាន់តាមខ្ញុំ»។ (ម៉ាថ. ២៤:៩) ដោយសារយើងបានត្រូវគេស្អប់បែបនេះ នោះជាភ័ស្តុតាងដែលបង្ហាញថាយើងធ្វើតាមគំរូរបស់លោកយេស៊ូ និងទទួលការពេញចិត្តពីព្រះយេហូវ៉ា។ (ម៉ាថ. ៥:១១, ១២) មេកំណាចគឺនៅពីក្រោយខ្នងការប្រឆាំងនេះ។ ប៉ុន្តែ លោកយេស៊ូមានឫទ្ធានុភាពខ្លាំងក្លាជាងវា! ដោយសារមានការគាំទ្រពីលោកយេស៊ូ មនុស្សពីគ្រប់ប្រជាជាតិកំពុងឮដំណឹងល្អ។ យើងនឹងពិចារណាអំពីទីសំអាងខ្លះៗ។
៧. តើអ្នកឃើញទីសំអាងអ្វីដែលបង្ហាញថាពាក្យនៅការបើកបង្ហាញ ១៤:៦, ៧កំពុងសម្រេច?
៧ ការពិបាកមួយទៀតដែលយើងជួបប្រទះពេលផ្សព្វផ្សាយ គឺថាមនុស្សនិយាយភាសាផ្សេងៗខុសពីយើង។ ក្នុងការបើកបង្ហាញដែលលោកយេស៊ូបានឲ្យសាវ័កយ៉ូហានឃើញក្នុងគំនិត លោកបានប្រាប់ទុកជាមុនថា នៅសម័យយើងដំណឹងល្អនឹងយកឈ្នះការពិបាកនេះ។ (សូមអាន ការបើកបង្ហាញ ១៤:៦, ៧) តើតាមរបៀបណា? យើងផ្ដល់ឱកាសឲ្យមនុស្សច្រើនបំផុតទទួលយកដំណឹងអំពីរាជាណាចក្រព្រះ។ នៅសព្វថ្ងៃនេះ មនុស្សនៅទូទាំងពិភពលោកអាចអានព័ត៌មានដែលមានមូលដ្ឋានពីគម្ពីរនៅគេហទំព័រjw.org ដោយសារគេហទំព័រនេះមានព័ត៌មានជាង១.០០០ភាសា។ យើងក៏បានទទួលការអនុញ្ញាតឲ្យបកប្រែសៀវភៅសប្បាយនឹងជីវិតដែលគ្មានទីបញ្ចប់!ជាង៧០០ភាសា ដែលជាសៀវភៅសិក្សាសំខាន់ចម្បងរបស់យើងសម្រាប់ជួយមនុស្សឲ្យក្លាយជាអ្នកកាន់តាមលោកយេស៊ូ! ការណែនាំដែលមានមូលដ្ឋានពីគម្ពីរ ក៏បានត្រូវរៀបចំជាវីដេអូសម្រាប់មនុស្សថ្លង់ និងសៀវភៅជាអក្សរផុសសម្រាប់មនុស្សងងឹតភ្នែក។ យើងកំពុងឃើញទំនាយពីគម្ពីរសម្រេច។ មនុស្ស«ពីគ្រប់ភាសាគ្រប់ប្រជាជាតិ» កំពុងរៀនឲ្យចេះនិយាយ«ភាសាបរិសុទ្ធ»នៃសេចក្ដីពិតពីគម្ពីរ។ (សាក. ៨:២៣; សេផ. ៣:៩) អ្វីទាំងអស់នេះកំពុងធ្វើឡើងនៅក្រោមការមើលខុសត្រូវដ៏ល្អប្រសើររបស់លោកយេស៊ូគ្រិស្ត។
៨. រហូតដល់សព្វថ្ងៃនេះ តើកិច្ចការផ្សព្វផ្សាយរបស់យើងបានទទួលលទ្ធផលយ៉ាងណា?
៨ នៅសព្វថ្ងៃនេះ មានមនុស្សជាង៨.០០០.០០០នាក់ នៅ២៤០ប្រទេសដែលនៅក្នុងអង្គការរបស់ព្រះយេហូវ៉ា ហើយជារៀងរាល់ឆ្នាំមានអ្នកទទួលការជ្រមុជទឹករាប់ម៉ឺននាក់! ប៉ុន្តែអ្វីដែលសំខាន់ជាងតួលេខនេះ គឺគុណសម្បត្តិឬ«បុគ្គលិកលក្ខណៈថ្មី» ដែលពួកអ្នកកាន់តាមថ្មីទាំងនេះបានបណ្ដុះឲ្យមាន។ (កូឡ. ៣:៨-១០) ពួកគេជាច្រើននាក់បានឈប់រើសអើង លែងប្រព្រឹត្តអំពើប្រាសចាកសីលធម៌ និងអំពើឃោរឃៅ ហើយឈប់ស្នេហាជាតិ។ ទំនាយដែលបានត្រូវកត់ទុកនៅអេសាយ ២:៤កំពុងសម្រេចគឺថា ពួកគេ«មិនរៀនធ្វើសង្គ្រាមទៀត»ទេ។ ដោយសារយើងខំប្រឹងពាក់បុគ្គលិកលក្ខណៈថ្មី យើងទាក់ទាញចិត្តមនុស្សឲ្យចង់មកអង្គការព្រះ ហើយយើងបង្ហាញថាយើងធ្វើតាមលោកយេស៊ូគ្រិស្តដែលជាអ្នកត្រួតពិនិត្យរបស់យើង។ (យ៉ូន. ១៣:៣៥; ១ពេ. ២:១២) នេះមិនមែនកើតឡើងដោយចៃដន្យទេ។ លោកយេស៊ូកំពុងផ្ដល់ជំនួយដែលយើងត្រូវការ។
លោកយេស៊ូតែងតាំងខ្ញុំបម្រើ
៩. តើអ្វីបានត្រូវប្រកាសទុកជាមុននៅម៉ាថាយ ២៤:៤៥-៤៧អំពីគ្រាចុងបញ្ចប់?
៩ សូមអាន ម៉ាថាយ ២៤:៤៥-៤៧។ លោកយេស៊ូបានប្រាប់ទុកជាមុនថាក្នុងអំឡុងគ្រាចុងបញ្ចប់ លោកនឹងតែងតាំង«ខ្ញុំបម្រើដ៏ស្មោះត្រង់ហើយចេះពិចារណា» ដើម្បីផ្ដល់សេចក្ដីបង្រៀនដែលប្រៀបដូចជាអាហារ។ ដូច្នេះ យើងអាចរំពឹងថាខ្ញុំបម្រើនោះនឹងជាប់រវល់នៅសម័យយើង។ នេះគឺពិតមែន។ លោកយេស៊ូដែលជាអ្នកត្រួតពិនិត្យរបស់យើង បានប្រើបុរសមួយក្រុមតូចដែលជាអ្នករើសតាំង ឲ្យផ្ដល់សេចក្ដីបង្រៀនដែលប្រៀបដូចជាអាហារ«នៅពេលត្រឹមត្រូវ» ដល់រាស្ត្រព្រះនិងពួកអ្នកចាប់អារម្មណ៍។ បុរសទាំងនេះមិនចាត់ទុកខ្លួនថាជាម្ចាស់លើជំនឿរបស់អ្នកឯទៀតទេ។ (២កូ. ១:២៤) ផ្ទុយទៅវិញ ពួកគេទទួលស្គាល់ថាលោកយេស៊ូគ្រិស្តគឺជា«អ្នកដឹកនាំ និងជាមេបញ្ជាការ»របស់រាស្ត្រលោក។—អេ. ៥៥:៤
១០. តើសៀវភៅមួយណាក្នុងរូបភាពបានជួយអ្នកឲ្យចាប់ផ្ដើមបម្រើព្រះយេហូវ៉ា?
១០ តាំងពីឆ្នាំ១៩១៩ ខ្ញុំបម្រើដ៏ស្មោះត្រង់បានរៀបចំសៀវភៅផ្សេងៗ ដែលបានផ្ដល់ឱកាសឲ្យពួកអ្នកចាប់អារម្មណ៍ថ្មីចាប់ផ្ដើមរៀនសេចក្ដីពិតពីបណ្ដាំព្រះ។ នៅឆ្នាំ១៩២១ ខ្ញុំបម្រើនេះបានរៀបចំសៀវភៅពិណរបស់ព្រះ (The Harp of God) ដើម្បីជួយពួកអ្នកចាប់អារម្មណ៍ឲ្យរៀនសេចក្ដីបង្រៀនបឋមពីគម្ពីរ។ ក្រោយមក មានសៀវភៅបន្ថែមទៀតបានត្រូវរៀបចំឡើង។ តើសៀវភៅមួយណាបានជួយអ្នកឲ្យចាប់ផ្ដើមស្គាល់និងស្រឡាញ់បិតារបស់យើងនៅស្ថានសួគ៌? តើនោះគឺសៀវភៅ«សូមឲ្យព្រះរាប់ជាពិត» (“Let God Be True”) សេចក្ដីពិតដែលនាំទៅដល់ជីវិតដែលគ្មានទីបញ្ចប់ (The Truth That Leads to Eternal Life) អ្នកអាចរស់នៅជានិរន្ដរ៍ក្នុងសួនមនោរម្យនៅលើផែនដី ចំណេះដែលនាំទៅដល់ជីវិតអស់កល្បជានិច្ច តើព្រះគម្ពីរពិតជាបង្រៀនយ៉ាងណា? តើគម្ពីរអាចបង្រៀនយើងអំពីអ្វី? ឬសប្បាយនឹងជីវិតដែលគ្មានទីបញ្ចប់!ដែលជាសៀវភៅថ្មីបំផុតរបស់យើង? ពេលសៀវភៅនីមួយៗទាំងនេះបានត្រូវចេញផ្សាយ សៀវភៅនោះគឺចំនឹងអ្វីដែលយើងត្រូវការតាមសម័យកាលនោះ។ ម្យ៉ាងទៀត សៀវភៅទាំងអស់នេះបានត្រូវរៀបចំឡើងដើម្បីជួយយើងឲ្យបង្រៀនអ្នកឯទៀតឲ្យក្លាយទៅជាអ្នកកាន់តាមលោកយេស៊ូ។
១១. ហេតុអ្វីគឺសំខាន់ចាំបាច់ដែលយើងទាំងអស់គ្នារៀនថែមទៀតអំពីព្រះយេហូវ៉ានិងគម្ពីរ?
១១ មិនមែនមានតែអ្នកចាប់អារម្មណ៍ថ្មីប៉ុណ្ណោះដែលត្រូវការអាហាររឹងទេ។ ផ្ទុយទៅវិញ នេះជាអ្វីដែលយើងទាំងអស់គ្នាត្រូវការ។ សាវ័កប៉ូលបានសរសេរថា៖ «អាហាររឹងគឺសម្រាប់មនុស្សពេញវ័យ»។ ប៉ូលបានបន្ថែមថា ការធ្វើតាមអ្វីដែលយើងរៀនពីគម្ពីរនឹងជួយយើងឲ្យចេះ«សម្គាល់អ្វីដែលខុសនិងអ្វីដែលត្រូវ»។ (ហេ. ៥:១៤) ក្នុងគ្រាលំបាកនេះ ពេលដែលសីលធម៌អន់ថយទៅយ៉ាងខ្លាំង ការធ្វើតាមខ្នាតតម្រារបស់ព្រះយេហូវ៉ាគឺមិនតែងតែស្រួលទេ។ ប៉ុន្តែ លោកយេស៊ូធ្វើឲ្យប្រាកដថាយើងទទួលចំណេះដែលយើងត្រូវការដើម្បីរក្សាជំនឿរបស់យើងឲ្យរឹងមាំ។ យើងទទួលការណែនាំនេះពីគម្ពីរដែលជាបណ្ដាំរបស់ព្រះ។ ខ្ញុំបម្រើដ៏ស្មោះត្រង់រៀបចំនិងចែកចាយសេចក្ដីបង្រៀននេះ ក្រោមការដឹកនាំរបស់លោកយេស៊ូ។
១២. ដូចលោកយេស៊ូ តើយើងបានលើកតម្កើងនាមរបស់ព្រះយ៉ាងដូចម្ដេច?
១២ ដូចលោកយេស៊ូ យើងធ្វើឲ្យនាមរបស់ព្រះទទួលការសរសើរតម្កើង ដែលនាមលោកសមនឹងទទួល។ (យ៉ូន. ១៧:៦, ២៦) ជាឧទាហរណ៍ នៅឆ្នាំ១៩៣១ យើងបានទទួលឈ្មោះដែលមានមូលដ្ឋានលើគម្ពីរ គឺសាក្សីព្រះយេហូវ៉ា។ ដោយធ្វើដូច្នេះ យើងបានបង្ហាញថានាមរបស់ព្រះគឺសំខាន់យ៉ាងណាចំពោះយើង ហើយថាយើងចង់ឲ្យគេសម្គាល់យើងដោយប្រើនាមរបស់បិតាយើងនៅស្ថានសួគ៌។ (អេ. ៤៣:១០-១២) ម្យ៉ាងទៀត តាំងពីខែតុលានៅឆ្នាំ១៩៣១នោះ នាមព្រះមាននៅលើក្របរបស់លេខនីមួយៗនៃទស្សនាវដ្ដីប៉មយាម។ បន្ថែមទៅទៀត គម្ពីរបរិសុទ្ធសេចក្ដីបកប្រែពិភពលោកថ្មី បានដាក់បញ្ចូលនាមរបស់ព្រះនៅកន្លែងត្រឹមត្រូវឡើងវិញក្នុងបណ្ដាំលោក។ នេះគឺខុសគ្នាស្រឡះពីពិភពគ្រិស្តសាសនាដែលបានដកនាមរបស់ព្រះយេហូវ៉ាចេញពីសេចក្ដីបកប្រែគម្ពីរជាច្រើនរបស់ពួកគេ!
លោកយេស៊ូធ្វើឲ្យពួកអ្នកកាន់តាមលោក មានរបៀបរៀបរយ
១៣. តើអ្វីធ្វើឲ្យអ្នកជឿជាក់ថាលោកយេស៊ូកំពុងប្រើ«ខ្ញុំបម្រើដ៏ស្មោះត្រង់ហើយចេះពិចារណា»នៅសព្វថ្ងៃនេះ? (យ៉ូហាន ៦:៦៨)
១៣ តាមរយៈ«ខ្ញុំបម្រើដ៏ស្មោះត្រង់ហើយចេះពិចារណា» លោកយេស៊ូបានតាំងឡើងអង្គការដ៏អស្ចារ្យមួយនៅផែនដីដើម្បីលើកស្ទួយការគោរពប្រណិប័តន៍ពិត។ តើអ្នកមានអារម្មណ៍យ៉ាងណាចំពោះអង្គការនេះ? ប្រហែលជាអ្នកមានអារម្មណ៍ដូចសាវ័កពេត្រុសដែលនិយាយទៅកាន់លោកយេស៊ូថា៖ «តើយើងនឹងទៅឯអ្នកណាវិញ? ប្រសាសន៍របស់លោកនាំឲ្យបានជីវិតដែលគ្មានទីបញ្ចប់»។ (យ៉ូន. ៦:៦៨) តើយើងទាំងអស់គ្នានឹងរសាត់អណ្ដែតទៅដល់ទីណាសព្វថ្ងៃនេះ បើយើងមិនបានស្គាល់អង្គការរបស់ព្រះយេហូវ៉ា? តាមរយៈអង្គការនេះ គ្រិស្តធ្វើឲ្យប្រាកដថាយើងមានអ្វីទាំងអស់ដែលយើងត្រូវការដើម្បីរក្សាភាពស្មោះត្រង់ចំពោះព្រះ។ លោកយេស៊ូក៏បង្ហាត់បង្រៀនយើងឲ្យបំពេញកិច្ចបម្រើផ្សាយដោយមានប្រសិទ្ធភាពដែរ។ បន្ថែមទៅទៀត លោកជួយយើងឲ្យពាក់«បុគ្គលិកលក្ខណៈថ្មី» ដើម្បីយើងអាចទទួលការពេញចិត្តពីព្រះយេហូវ៉ា។—អេភ. ៤:២៤
១៤. ក្នុងអំឡុងការផ្ទុះឡើងនៃជំងឺកូវីដ-១៩ តើអ្នកបានទទួលប្រយោជន៍យ៉ាងណាដោយសារអ្នកនៅក្នុងអង្គការរបស់ព្រះយេហូវ៉ា?
១៤ លោកយេស៊ូផ្ដល់ការណែនាំដែលប្រកបដោយប្រាជ្ញាក្នុងគ្រាពិបាក។ ប្រយោជន៍នៃការណែនាំនោះ គឺសឲ្យឃើញពេលដែលមានការផ្ទុះឡើងនៃជំងឺកូវីដ-១៩។ កាលដែលមនុស្សជាច្រើនក្នុងពិភពលោកនេះមិនដឹងច្បាស់អំពីអ្វីដែលពួកគេត្រូវធ្វើ លោកយេស៊ូធ្វើឲ្យប្រាកដថាយើងបានទទួលការណែនាំច្បាស់ដើម្បីជួយយើងឲ្យរក្សាសុវត្ថិភាព។ យើងបានទទួលការលើកទឹកចិត្តឲ្យពាក់ម៉ាស់ពេលចេញក្រៅនិងឲ្យរក្សាគម្លាត។ ពួកអ្នកចាស់ទុំបានត្រូវរំលឹកឲ្យបន្តទាក់ទងជាទៀងទាត់នឹងអស់អ្នកនៅក្នុងក្រុមជំនុំ ហើយដឹងអំពីអ្វីដែលពួកគេត្រូវការដើម្បីរក្សាសុវត្ថិភាព សុខភាព និងចំណងមិត្តភាពជិតស្និទ្ធជាមួយព្រះយេហូវ៉ា។ (អេ. ៣២:១, ២) យើងបានទទួលការណែនាំនិងការលើកទឹកចិត្តបន្ថែមទៀត តាមរយៈរបាយការណ៍ថ្មីៗពីគណៈអភិបាលផងដែរ។
១៥. តើយើងបានទទួលការណែនាំអ្វីសម្រាប់ការធ្វើកិច្ចប្រជុំនិងកិច្ចផ្សព្វផ្សាយក្នុងអំឡុងរោគរាតត្បាត ហើយតើនោះនាំឲ្យមានលទ្ធផលអ្វី?
១៥ ក្នុងអំឡុងរោគរាតត្បាតនេះ យើងក៏បានទទួលការណែនាំច្បាស់អំពីរបៀបធ្វើកិច្ចប្រជុំក្រុមជំនុំនិងកិច្ចការផ្សព្វផ្សាយ។ ភ្លាមៗ យើងបានចាប់ផ្ដើមចូលរួមកិច្ចប្រជុំគ្រិស្តសាសនិក សន្និបាត និងមហាសន្និបាតតាមរយៈប្រព័ន្ធអ៊ីនធឺណិត។ ភាគច្រើន យើងក៏បានចាប់ផ្ដើមផ្សព្វផ្សាយដោយសរសេរសំបុត្រនិងតាមទូរស័ព្ទ។ ព្រះយេហូវ៉ាបានឲ្យពរចំពោះការខំប្រឹងរបស់យើង។ ការិយាល័យសាខាជាច្រើនបានរាយការណ៍ថា ចំនួនអ្នកផ្សាយបានកើនឡើងយ៉ាងខ្លាំង។ តាមពិត បងប្អូនជាច្រើនមានបទពិសោធន៍ដែលគួរឲ្យលើកទឹកចិត្តក្នុងអំឡុងគ្រានេះ (សូមមើលប្រអប់ដែលមានចំណងជើងថា « ព្រះយេហូវ៉ាឲ្យពរលើកិច្ចការផ្សព្វផ្សាយរបស់យើង»)។
១៦. តើយើងអាចជឿជាក់អំពីអ្វី?
១៦ អ្នកខ្លះប្រហែលជាមានអារម្មណ៍ថាអង្គការព្រះប្រុងប្រយ័ត្នហួសហេតុពេក ស្ដីអំពីរោគរាតត្បាតនេះ។ ប៉ុន្តែម្ដងហើយម្ដងទៀត គឺសឲ្យឃើញថាការណែនាំដែលយើងបានទទួល ប្រកបដោយប្រាជ្ញា។ (ម៉ាថ. ១១:១៩) ម្យ៉ាងទៀត កាលដែលយើងរំពឹងគិតអំពីរបៀបដ៏កក់ក្ដៅដែលលោកយេស៊ូដឹកនាំរាស្ត្ររបស់លោក យើងជឿជាក់ថាមិនថាមានអ្វីកើតឡើងនៅថ្ងៃអនាគតក្ដី ព្រះយេហូវ៉ានិងបុត្រជាទីស្រឡាញ់របស់លោកនឹងនៅជាមួយយើង។—សូមអាន ហេប្រឺ ១៣:៥, ៦
១៧. តើអ្នកមានអារម្មណ៍យ៉ាងណាចំពោះការនៅក្រោមការត្រួតពិនិត្យរបស់លោកយេស៊ូ?
១៧ យើងសប្បាយចិត្តណាស់ដែលលោកយេស៊ូជាអ្នកដឹកនាំរបស់យើង! យើងនៅក្នុងអង្គការមួយដែលមានសាមគ្គីភាព ទោះជាយើងមានវប្បធម៌ ជនជាតិ និងភាសាខុសគ្នាក្ដី។ យើងទទួលការណែនាំជាច្រើនពីបណ្ដាំរបស់ព្រះ ហើយយើងទទួលការបង្ហាត់បង្រៀនដែលយើងត្រូវការដើម្បីបំពេញកិច្ចបម្រើផ្សាយ។ យើងម្នាក់ៗទទួលការបង្ហាត់បង្រៀនដើម្បីពាក់បុគ្គលិកលក្ខណៈថ្មី ហើយយើងកំពុងរៀនឲ្យចេះស្រឡាញ់គ្នាទៅវិញទៅមក។ យើងពិតជាមានមូលហេតុជាច្រើនឲ្យអួតអំពីលោកយេស៊ូដែលជាអ្នកត្រួតពិនិត្យរបស់យើង!
ចម្រៀងលេខ១៦ ចូរសរសើរព្រះយេហូវ៉ាដែលបានរើសតាំងបុត្រលោក
a នៅសព្វថ្ងៃនេះ មានបុរស ស្ត្រី និងកូនក្មេងរាប់លាននាក់ ដែលកំពុងផ្សព្វផ្សាយដំណឹងល្អយ៉ាងខ្នះខ្នែង។ តើអ្នកនៅក្នុងចំណោមពួកគេឬទេ? បើដូច្នេះ អ្នកកំពុងធ្វើកិច្ចការនោះនៅក្រោមការដឹកនាំពីលោកយេស៊ូគ្រិស្តដែលជាម្ចាស់របស់យើង។ ក្នុងអត្ថបទនេះ យើងនឹងពិចារណាអំពីទីសំអាងដែលបង្ហាញថា លោកយេស៊ូកំពុងដឹកនាំកិច្ចការផ្សព្វផ្សាយនៅសព្វថ្ងៃនេះ។ ការរំពឹងគិតអំពីព័ត៌មាននេះនឹងជួយយើងឲ្យតាំងចិត្តបន្តបម្រើព្រះយេហូវ៉ាក្រោមការដឹកនាំរបស់គ្រិស្ត។
