អត្ថបទសិក្សា ២៨
រាជាណាចក្រព្រះកំពុងគ្រប់គ្រងហើយ!
«រាជាណាចក្រនៃពិភពលោកនេះបានក្លាយទៅជារាជាណាចក្រនៃម្ចាស់របស់យើងនិងគ្រិស្តរបស់លោក»។—បប. ១១:១៥
ចម្រៀងលេខ២២ សូមឲ្យរាជាណាចក្រព្រះមកដល់!
សេចក្ដីសង្ខេប a
១. តើយើងអាចជឿជាក់អំពីអ្វី ហើយហេតុអ្វី?
ពេលអ្នកឃើញស្ថានភាពពិភពលោក តើអ្នកពិបាករក្សាឲ្យមានទស្សនៈល្អឬទេ? សព្វថ្ងៃនេះ ក្រុមគ្រួសារបែកបាក់គ្នា មនុស្សជាទូទៅកាន់តែឃោរឃៅ គិតតែប្រយោជន៍ខ្លួនឯង និងកាចសាហាវ។ មនុស្សជាច្រើនពិបាកទុកចិត្តពួកអ្នកដែលមានអំណាច។ ប៉ុន្តែ ស្ថានភាពទាំងអស់នេះអាចផ្ដល់ទំនុកចិត្តដល់អ្នក។ ហេតុអ្វី? ពីព្រោះមនុស្សកំពុងប្រព្រឹត្តដូចដែលបានត្រូវប្រាប់ទុកជាមុនក្នុងទំនាយមួយពីគម្ពីរអំពី«គ្រាចុងក្រោយបង្អស់»។ (២ធី. ៣:១-៥) មនុស្សដែលមានចិត្តស្មោះមិនអាចប្រកែកថាទំនាយនេះមិនទាន់សម្រេចឡើយ។ ម្យ៉ាងទៀត ការសម្រេចទំនាយនេះបង្ហាញថា លោកយេស៊ូគ្រិស្តបានទៅជាស្ដេចនៃរាជាណាចក្ររបស់ព្រះ។ ប៉ុន្តែ នេះគ្រាន់តែជាទំនាយមួយក្នុងចំណោមទំនាយជាច្រើនអំពីរាជាណាចក្រព្រះ។ ការពិនិត្យមើលឡើងវិញអំពីទំនាយផ្សេងទៀតដែលបានត្រូវសម្រេចនៅសម័យនេះនឹងពង្រឹងជំនឿរបស់យើង។
២. តើយើងនឹងពិចារណាអ្វីខ្លះក្នុងអត្ថបទនេះ ហើយហេតុអ្វី? (សូមឆ្លើយអំពីរូបភាពនៅក្រប)
២ ក្នុងអត្ថបទនេះ យើងនឹងពិចារណា៖ (១) ទំនាយមួយដែលជួយយើងឲ្យដឹងថារាជាណាចក្ររបស់ព្រះបានត្រូវស្ថាបនាឡើងនៅពេលណា (២) ទំនាយដែលជួយយើងឲ្យដឹងអំពីវត្តមានដែលមនុស្សមើលមិនឃើញរបស់លោកយេស៊ូ ជាស្ដេចនៃរាជាណាចក្រព្រះ និង(៣) ទំនាយដែលបង្ហាញអំពីរបៀបដែលពួកសត្រូវរបស់រាជាណាចក្រព្រះនឹងត្រូវបំផ្លាញ។ យើងនឹងឃើញថាទំនាយទាំងនេះជាប់ទាក់ទងគ្នា ដូចបំណែករូបផ្គុំដែលគេរៀបបញ្ចូលគ្នាដើម្បីឃើញរូបភាពច្បាស់មួយថា យើងនៅគ្រាណាក្នុងលំដាប់ព្រឹត្តិការណ៍របស់ព្រះយេហូវ៉ា។
របៀបដឹងថាពេលណារាជាណាចក្ររបស់ព្រះបានត្រូវស្ថាបនាឡើង
៣. តើទំនាយនៅដានីយ៉ែល ៧:១៣, ១៤ ពង្រឹងទំនុកចិត្តយើងអំពីអ្វី?
៣ ទំនាយនៅដានីយ៉ែល ៧:១៣, ១៤ ពង្រឹងទំនុកចិត្តយើងថា លោកយេស៊ូគ្រិស្តគឺជាអ្នកគ្រប់គ្រងដ៏ល្អបំផុតនៃរាជាណាចក្រព្រះ។ មនុស្សពីគ្រប់ប្រជាជាតិនឹង‹បម្រើលោក›ដោយសប្បាយរីករាយ ហើយគ្មានអ្នកគ្រប់គ្រងណានឹងជំនួសលោកបានឡើយ។ ទំនាយមួយទៀតក្នុងសៀវភៅដានីយ៉ែលបានប្រាប់ទុកជាមុនថា លោកយេស៊ូនឹងចាប់ផ្ដើមគ្រប់គ្រងក្នុងរាជាណាចក្រនោះនៅដំណាច់គ្រាមួយដែលហៅថា៧គ្រា។ តើយើងអាចដឹងឬទេថាលោកយេស៊ូបានទៅជាស្ដេចនៅពេលណា?
៤. សូមពន្យល់របៀបដែលដានីយ៉ែល ៤:១០-១៧ ជួយយើងឲ្យយល់អំពីឆ្នាំដែលលោកយេស៊ូបានចាប់ផ្ដើមគ្រប់គ្រងជាស្ដេចនៃរាជាណាចក្រ។ (សូមមើលកំណត់សម្គាល់ផងដែរ)
៤ សូមអាន ដានីយ៉ែល ៤:១០-១៧។ «៧គ្រា»ជាតំណាងគ្រាមួយដែលមានរយៈពេល២.៥២០ឆ្នាំ។ គ្រានោះបានចាប់ផ្ដើមនៅឆ្នាំ៦០៧ មុនគ.ស. ពេលដែលជនជាតិបាប៊ីឡូនបានដកស្ដេចចុងក្រោយចេញពីបល្ល័ង្ករបស់ព្រះយេហូវ៉ានៅក្រុងយេរូសាឡិម។ គ្រានោះបានបញ្ចប់នៅឆ្នាំ១៩១៤ គ.ស. ពេលដែលព្រះយេហូវ៉ាឲ្យ«អ្នកដែលមានសិទ្ធិទទួល»ពោលគឺលោកយេស៊ូ អង្គុយលើបល្ល័ង្កជាស្ដេចនៃរាជាណាចក្ររបស់ព្រះ។ b—អេគ. ២១:២៥-២៧
៥. តើអ្វីជាប្រយោជន៍មួយដែលយើងអាចទទួលពីទំនាយអំពី«៧គ្រា»?
៥ តើយើងអាចទទួលប្រយោជន៍យ៉ាងណាពីទំនាយនេះ? ការដឹងអំពី«៧គ្រា»ពង្រឹងទំនុកចិត្តយើងថាព្រះយេហូវ៉ាសម្រេចសេចក្ដីសន្យារបស់លោកនៅពេលត្រឹមត្រូវ។ ដូចដែលលោកបានកំណត់ពេលដ៏ជាក់លាក់មួយសម្រាប់ការចាប់ផ្ដើមនៃការគ្រប់គ្រងរបស់រាជាណាចក្រលោក លោកក៏នឹងធ្វើឲ្យប្រាកដថាទំនាយទាំងអស់ឯទៀតនឹងត្រូវសម្រេចស្របតាមពេលកំណត់របស់លោកដែរ។ ពិតមែន ថ្ងៃរបស់ព្រះយេហូវ៉ានឹង«ឥតយឺតឡើយ»!—ហាប. ២:៣
របៀបដឹងថាគ្រិស្តបានចាប់ផ្ដើមគ្រប់គ្រងជាស្ដេចនៃរាជាណាចក្រព្រះ
៦. (ក) តើមានព្រឹត្តិការណ៍អ្វីខ្លះនៅផែនដីដែលបង្ហាញថាគ្រិស្តកំពុងគ្រប់គ្រងនៅស្ថានសួគ៌? (ខ) តើទំនាយនៅការបើកបង្ហាញ ៦:២-៨បញ្ជាក់យ៉ាងណាអំពីទីសំអាងនេះ?
៦ នៅជិតទីបញ្ចប់នៃកិច្ចបម្រើរបស់លោកយេស៊ូនៅផែនដី លោកបានប្រាប់ទុកជាមុនអំពីព្រឹត្តិការណ៍មួយចំនួនក្នុងពិភពលោក ដែលនឹងជួយពួកអ្នកកាន់តាមលោកឲ្យដឹងថាលោកបានចាប់ផ្ដើមគ្រប់គ្រងនៅស្ថានសួគ៌។ ព្រឹត្តិការណ៍ខ្លះក្នុងចំណោមព្រឹត្តិការណ៍ដែលលោកបានរៀបរាប់គឺសង្គ្រាម ការអត់ឃ្លាន និងរញ្ជួយដី។ លោកក៏បានប្រាប់ទុកជាមុនថា នឹងមានរោគរាតត្បាតឬជំងឺ«ពីកន្លែងមួយទៅកន្លែងមួយ» ហើយថ្មីៗនេះជំងឺកូវីដ-១៩គឺជាឧទាហរណ៍មួយអំពីបញ្ហានេះ។ ព្រឹត្តិការណ៍ទាំងនេះគឺជាផ្នែកនៃអ្វីដែលគម្ពីរហៅថា«សញ្ញាសម្គាល់»នៃវត្តមានរបស់គ្រិស្ត។ (ម៉ាថ. ២៤:៣, ៧; លូក. ២១:៧, ១០, ១១) ជាង៦០ឆ្នាំក្រោយពីលោកយេស៊ូបានស្លាប់និងបានឡើងទៅស្ថានសួគ៌វិញ លោកបានបញ្ជាក់ថែមទៀតដល់សាវ័កយ៉ូហានថាព្រឹត្តិការណ៍ទាំងនេះនឹងកើតឡើង។ (សូមអាន ការបើកបង្ហាញ ៦:២-៨) ព្រឹត្តិការណ៍ទាំងអស់នេះបានកើតឡើងតាំងពីលោកយេស៊ូចាប់ផ្ដើមគ្រប់គ្រងជាស្ដេចនៃរាជាណាចក្ររបស់ព្រះនាឆ្នាំ១៩១៤។
៧. ហេតុអ្វីការគ្រប់គ្រងរបស់លោកយេស៊ូធ្វើឲ្យវេទនាដល់ផែនដី?
៧ ហេតុអ្វីស្ថានភាពពិភពលោកអាក្រក់ជាងមុន នៅពេលដែលលោកយេស៊ូចាប់ផ្ដើមគ្រប់គ្រងជាស្ដេច? ការបើកបង្ហាញ ៦:២ប្រាប់ព័ត៌មានសំខាន់មួយគឺថា អ្វីដំបូងដែលលោកយេស៊ូបានធ្វើពេលដែលលោកចាប់ផ្ដើមគ្រប់គ្រងជាស្ដេចនៃរាជាណាចក្រព្រះគឺសង្គ្រាម។ តើលោកច្បាំងនឹងអ្នកណា? គឺលោកច្បាំងនឹងមេកំណាច និងពួកវិញ្ញាណកំណាចរបស់វា។ យោងទៅតាមការបើកបង្ហាញ ជំពូក១២ សាថានបានច្បាំងចាញ់ ហើយវានិងពួកវិញ្ញាណកំណាចរបស់វាបានត្រូវបោះទម្លាក់មកផែនដី។ សាថានបានបញ្ចេញ កំហឹងយ៉ាងខ្លាំងដាក់មនុស្សជាតិ ហើយនេះនាំឲ្យ«វេទនាដល់ផែនដី»។—បប. ១២:៧-១២
៨. តើយើងអាចទទួលប្រយោជន៍យ៉ាងណាពីការឃើញទំនាយអំពីរាជាណាចក្រព្រះកំពុងសម្រេច?
៨ តើយើងអាចទទួលប្រយោជន៍យ៉ាងណាពីទំនាយទាំងនេះ? ព្រឹត្តិការណ៍ពិភពលោក និងការផ្លាស់ប្ដូរនៃចិត្តគំនិតរបស់មនុស្ស ជួយយើងឲ្យដឹងថាលោកយេស៊ូបានចាប់ផ្ដើមគ្រប់គ្រងជាស្ដេច។ ដូច្នេះ ជាជាងទើសចិត្តពេលដែលយើងឃើញមនុស្សប្រព្រឹត្តយ៉ាងសាហាវនិងដោយគិតតែប្រយោជន៍ផ្ទាល់ខ្លួន យើងចាំថាការប្រព្រឹត្តរបស់ពួកគេកំពុងសម្រេចទំនាយក្នុងគម្ពីរ។ រាជាណាចក្រព្រះកំពុងគ្រប់គ្រងហើយ! (ចសព. ៣៧:១) ម្យ៉ាងទៀត យើងនឹងឃើញការពិបាកមានកាន់តែច្រើនឡើងក្នុងពិភពលោក កាលដែលយើងខិតចូលទៅដល់សង្គ្រាមអាម៉ាគេដូន។ (ម៉ាក. ១៣:៨; ២ធី. ៣:១៣) យើងសប្បាយចិត្តណាស់ដែលបិតានៅស្ថានសួគ៌ដែលស្រឡាញ់យើង ជួយយើងឲ្យយល់អំពីមូលហេតុដែលមានបញ្ហាជាច្រើនក្នុងពិភពលោកនេះ។
របៀបដែលសត្រូវនៃរាជាណាចក្ររបស់ព្រះនឹងត្រូវបំផ្លាញ
៩. តើទំនាយដែលបានត្រូវកត់ទុកនៅដានីយ៉ែល ២:២៨, ៣១-៣៥រៀបរាប់យ៉ាងណាអំពីមហាអំណាចចុងក្រោយ ហើយតើមហាអំណាចនោះបានចាប់ផ្ដើមគ្រប់គ្រងនៅពេលណា?
៩ សូមអាន ដានីយ៉ែល ២:២៨, ៣១-៣៥។ យើងឃើញទំនាយនេះកំពុងសម្រេចនៅសព្វថ្ងៃនេះ។ សុបិនរបស់នេប៊ូក្នេសាបង្ហាញអំពីអ្វីដែលនឹងកើតឡើង«នៅគ្រាចុងបញ្ចប់» ក្រោយពីទីចាប់ផ្ដើមនៃការគ្រប់គ្រងរបស់គ្រិស្ត។ ពួកសត្រូវរបស់លោកយេស៊ូនៅផែនដី រួមមានមហាអំណាចពិភពលោកចុងក្រោយដែលបានត្រូវប្រកាសទុកជាមុនក្នុងគម្ពីរ គឺជាមហាអំណាចដែលតំណាងដោយ«ប្រអប់ជើងធ្វើពីដែកលាយដីឥដ្ឋ»។ មហាអំណាចនេះកំពុងគ្រប់គ្រងរួចហើយ។ វាបានចាប់ផ្ដើមគ្រប់គ្រងជាមហាអំណាចអង់គ្លេសអាម៉េរិកក្នុងអំឡុងសង្គ្រាមលោកលើកទី១ ពេលដែលអង់គ្លេសនិងសហរដ្ឋអាម៉េរិកបានចាប់ផ្ដើមសហការគ្នាយ៉ាងជិតស្និទ្ធ។ រូបដ៏ធំសម្បើមក្នុងសុបិនរបស់នេប៊ូក្នេសា ក៏បង្ហាញ ទុកជាមុនអំពីយ៉ាងហោចណាស់អ្វីពីរយ៉ាងស្ដីអំពីមហាអំណាចពិភពលោកនេះ ដែលនឹងខុសគ្នាពីរាជាណាចក្រដែលបានគ្រប់គ្រងពីមុនៗ។
១០. (ក) តើមហាអំណាចអង់គ្លេសអាម៉េរិកគឺដូចគ្នាយ៉ាងណានឹងទំនាយរបស់ដានីយ៉ែល? (ខ) តើយើងត្រូវជៀសវាងពីគ្រោះថ្នាក់អ្វី? (សូមមើលប្រអប់ដែលមានចំណងជើងថា « ចូរប្រយ័ត្នចំពោះដីឥដ្ឋ!»)
១០ ទី១ ខុសពីមហាអំណាចពិភពលោកពីមុន ដែលបានត្រូវរៀបរាប់ក្នុងការបើកបង្ហាញឲ្យឃើញក្នុងគំនិតនោះ មហាអំណាចអង់គ្លេសអាម៉េរិកមិនបានត្រូវតំណាងដោយលោហៈសុទ្ធដូចជាមាសឬប្រាក់ទេ ប៉ុន្តែបានត្រូវតំណាងដោយដែកលាយនឹងដីឥដ្ឋ។ ដីឥដ្ឋនោះជាតំណាង«បណ្ដាជន» ឬមនុស្សសាមញ្ញធម្មតា។ (ដាន. ២:៤៣) សព្វថ្ងៃនេះយើងអាចឃើញច្បាស់ថាពួកគេមានឥទ្ធិពលទៅលើការបោះឆ្នោត សហជីព ការទាមទារសិទ្ធិពលរដ្ឋ និងបាតុកម្មធំៗ ហើយនេះធ្វើឲ្យពួកអ្នកដឹកនាំរបស់មហាអំណាចពិភពលោកនេះពិបាកសម្រេចអ្វីៗដែលខ្លួនចង់បាន។
១១. តើការគ្រប់គ្រងរបស់មហាអំណាចអង់គ្លេសអាម៉េរិកពង្រឹងទំនុកចិត្តរបស់យើងយ៉ាងដូចម្ដេចថា យើងកំពុងរស់នៅគ្រាចុងបញ្ចប់?
១១ ទី២ អង់គ្លេសអាម៉េរិកដែលបានត្រូវតំណាងដោយប្រអប់ជើងនៃរូបធំសម្បើម គឺជាមហាអំណាចពិភពលោកចុងក្រោយដែលបានត្រូវប្រកាសទុកជាមុនក្នុងគម្ពីរ។ គ្មានរដ្ឋាភិបាលផ្សេងទៀតរបស់មនុស្សនឹងលេចមកក្រោយមហាអំណាចនេះទេ។ ផ្ទុយទៅវិញ នៅសង្គ្រាមអាម៉ាគេដូន រាជាណាចក្ររបស់ព្រះនឹងបំផ្លាញចោលមហាអំណាចនេះ ព្រមទាំងរដ្ឋាភិបាលទាំងអស់ឯទៀតរបស់មនុស្ស។ c—បប. ១៦:១៣, ១៤, ១៦; ១៩:១៩, ២០
១២. តើទំនាយរបស់ដានីយ៉ែលផ្ដល់ទីសំអាងអ្វីទៀតដែលសម្រាលទុក្ខនិងផ្ដល់សេចក្ដីសង្ឃឹមឲ្យយើង?
១២ តើយើងអាចទទួលប្រយោជន៍យ៉ាងណាពីទំនាយនេះ? ទំនាយរបស់ដានីយ៉ែលផ្ដល់ទីសំអាងថែមទៀតដែលបង្ហាញថាយើងកំពុងរស់នៅគ្រាចុងបញ្ចប់។ ជាង២.៥០០ឆ្នាំមុន ដានីយ៉ែលបានប្រកាសទុកជាមុនថាក្រោយពីបាប៊ីឡូន មហាអំណាចបួនទៀតនឹងគ្រប់គ្រងលើរាស្ត្ររបស់ព្រះ។ បន្ថែមទៅទៀត គាត់បានរៀបរាប់ថាមហាអំណាចអង់គ្លេសអាម៉េរិកនឹងគ្រប់គ្រងចុងក្រោយគេ។ ដូច្នេះមិនយូរទៀត រាជាណាចក្រព្រះនឹងបំផ្លាញរដ្ឋាភិបាលទាំងអស់របស់មនុស្ស ហើយគ្រប់គ្រងលើផែនដីទាំងមូល។ នេះផ្ដល់ការសម្រាលទុក្ខនិងសេចក្ដីសង្ឃឹមដល់យើង។—ដាន. ២:៤៤
១៣. តើ«ស្ដេចទី៨»និង«ស្ដេច១០»ដែលបានត្រូវរៀបរាប់នៅការបើកបង្ហាញ ១៧:៩-១២ជាតំណាងអ្វី ហើយតើទំនាយនេះបានត្រូវសម្រេចយ៉ាងដូចម្ដេច?
១៣ សូមអាន ការបើកបង្ហាញ ១៧:៩-១២។ ដោយសារសង្គ្រាមលោកលើកទី១បានបណ្ដាលឲ្យមានការបំផ្លាញយ៉ាងខ្លាំង នេះធ្វើឲ្យទំនាយមួយទៀតក្នុងគម្ពីរស្ដីអំពីគ្រាចុងក្រោយបង្អស់បានសម្រេច។ ពួកអ្នកដឹកនាំពិភពលោកចង់ឲ្យពិភពលោកមានសន្តិភាព ដូច្នេះនៅខែមករា ឆ្នាំ១៩២០ ពួកគេបានបង្កើតអង្គការសម្ព័ន្ធប្រជាជាតិ ដែលបានត្រូវជំនួសដោយអង្គការសហប្រជាជាតិ នៅខែតុលា ឆ្នាំ១៩៤៥។ អង្គការនេះបានត្រូវហៅថា«ស្ដេចទី៨»។ ប៉ុន្តែ អង្គការនេះមិនមែនជាមហាអំណាចពិភពលោកទេ។ អង្គការនេះមានអំណាចដោយសារតែទទួលការគាំទ្រពីរដ្ឋាភិបាល។ គម្ពីរបានហៅរដ្ឋាភិបាលទាំងនោះថាជា«ស្ដេច១០»។
១៤-១៥. (ក) តើការបើកបង្ហាញ ១៧:៣-៥បង្ហាញយ៉ាងណាអំពី«បាប៊ីឡូនដ៏ខ្លាំងក្លា»? (ខ) តើអ្វីកំពុងកើតឡើងចំពោះការគាំទ្ររបស់សាសនាមិនពិត?
១៤ សូមអាន ការបើកបង្ហាញ ១៧:៣-៥។ ក្នុងការបើកបង្ហាញឲ្យឃើញក្នុងគំនិតពីព្រះ យ៉ូហានបានឃើញស្ត្រីពេស្យាម្នាក់គឺ«បាប៊ីឡូនដ៏ខ្លាំងក្លា» ដែលជាតំណាងសាសនាមិនពិតទាំងឡាយនៅទូទាំងពិភពលោក។ តើការបើកបង្ហាញឲ្យឃើញក្នុងគំនិតនោះបង្ហាញអំពីអ្វី? អស់ជាយូរមកហើយ សាសនាមិនពិតបានសហការយ៉ាងជិតស្និទ្ធជាមួយរដ្ឋាភិបាលរបស់ពិភពលោក ហើយគាំទ្រពួកគេ។ ប៉ុន្តែមិនយូរទៀត ព្រះយេហូវ៉ានឹងបណ្ដាលចិត្តរបស់រដ្ឋាភិបាលទាំងនោះឲ្យ«ធ្វើតាមគំនិតរបស់លោក»។ តើនោះមានលទ្ធផល អ្វី? រដ្ឋាភិបាលទាំងនោះដែលជា«ស្ដេច១០»នឹងវាយប្រហារសាសនាមិនពិត ហើយបំផ្លាញវាចោល។—បប. ១៧:១, ២, ១៦, ១៧
១៥ តើយើងដឹងយ៉ាងដូចម្ដេចថាទីបញ្ចប់នៃបាប៊ីឡូនដ៏ខ្លាំងក្លាគឺជិតមកដល់? ដើម្បីដឹងចម្លើយចំពោះសំណួរនេះ សូមចាំថាក្រុងបាប៊ីឡូនសម័យបុរាណបានត្រូវការពារដោយទឹកទន្លេធំគឺទន្លេអឺប្រាត។ សៀវភៅការបើកបង្ហាញ ប្រដូចអ្នកគាំទ្ររាប់លាននាក់របស់បាប៊ីឡូនដ៏ខ្លាំងក្លា ទៅនឹង«ទឹក»ដែលការពារ។ (បប. ១៧:១៥) ប៉ុន្តែ សៀវភៅនោះក៏បង្ហាញថា ទឹកនោះនឹង«រីងស្ងួតអស់» ហើយនោះបង្ហាញថាសាសនាមិនពិតទាំងឡាយនៅទូទាំងពិភពលោកនឹងបាត់បង់អ្នកគាំទ្រជាច្រើន។ (បប. ១៦:១២) សព្វថ្ងៃនេះ ទំនាយនោះកំពុងក្លាយទៅជាការពិត ដោយសារមនុស្សជាច្រើនមិនកាន់សាសនាទេ ហើយពួកគេស្វែងរកជំនួយដើម្បីដោះស្រាយបញ្ហារបស់ពួកគេនៅកន្លែងផ្សេងទៀត។
១៦. តើយើងអាចទទួលប្រយោជន៍យ៉ាងណាពីការយល់ទំនាយអំពីការលេចមកនៃអង្គការសហប្រជាជាតិ និងទីបញ្ចប់នៃបាប៊ីឡូនដ៏ខ្លាំងក្លា?
១៦ តើយើងអាចទទួលប្រយោជន៍យ៉ាងណាពីទំនាយទាំងនេះ? ការលេចមកនៃអង្គការសហប្រជាជាតិ និងការថយចុះនៃការគាំទ្រសាសនាមិនពិត ផ្ដល់ទីសំអាងថែមទៀតថា យើងកំពុងរស់នៅគ្រាចុងក្រោយបង្អស់។ ទោះជាមនុស្សជាច្រើនលែងគាំទ្របាប៊ីឡូនដ៏ខ្លាំងក្លាក្ដី នេះមិនមែន ជាអ្វីដែលបណ្ដាលឲ្យសាសនាមិនពិតទាំងឡាយត្រូវបំផ្លាញចោលឡើយ។ ដូចបានត្រូវរៀបរាប់នៅខាងលើ ព្រះយេហូវ៉ានឹងបណ្ដាលឲ្យចិត្តរបស់«ស្ដេច១០»ដែលជាតំណាងរដ្ឋាភិបាលដែលគាំទ្រអង្គការសហប្រជាជាតិឲ្យ«ធ្វើតាមគំនិតរបស់លោក»។ រដ្ឋាភិបាលទាំងនោះនឹងបំផ្លាញបាប៊ីឡូនដ៏ខ្លាំងក្លាភ្លាមៗ ហើយនោះនឹងធ្វើឲ្យពិភពលោកភ្ញាក់ផ្អើល។ d (បប. ១៨:៨-១០) ការដែលបាប៊ីឡូនដ៏ខ្លាំងក្លានឹងត្រូវបំផ្លាញចោល នឹងជះឥទ្ធិពលយ៉ាងខ្លាំងទៅលើពិភពលោកទាំងមូល ហើយនោះប្រហែលជានាំឲ្យមានការពិបាកផ្សេងៗ។ ប៉ុន្តែ យ៉ាងហោចណាស់រាស្ត្ររបស់ព្រះនឹងមានហេតុពីរឲ្យអរសប្បាយ។ សាសនាមិនពិតដែលធ្លាប់ជាសត្រូវរបស់ព្រះយេហូវ៉ាអស់រយៈពេលយូរនឹងមិនមានទៀតទេ ហើយមិនយូរទៀត យើងនឹងទទួលសេចក្ដីសង្គ្រោះពីពិភពលោកដ៏អាក្រក់នេះ!—លូក. ២១:២៨
ចូរមានទំនុកចិត្តថាព្រះយេហូវ៉ានឹងការពាររាស្ត្រលោក
១៧-១៨. (ក) តើយើងអាចបន្តពង្រឹងជំនឿរបស់យើងតាមរបៀបណា? (ខ) តើយើងនឹងពិចារណាអ្វីក្នុងអត្ថបទបន្ទាប់?
១៧ ដានីយ៉ែលបានប្រកាសទុកជាមុនថា៖ «ចំណេះពិតនឹងមានជាបរិបូរ»។ នេះបានកើតឡើងមែន! សព្វថ្ងៃនេះយើងយល់ទំនាយអំពីសម័យយើង។ (ដាន. ១២:៤, ៩, ១០) ទំនាយទាំងនេះចែងយ៉ាងត្រឹមត្រូវដល់ម្ល៉េះ បានជាយើងគោរពព្រះយេហូវ៉ាកាន់តែខ្លាំង ហើយកាន់តែឲ្យតម្លៃចំពោះបណ្ដាំរបស់លោក។ (អេ. ៤៦:១០; ៥៥:១១) ដូច្នេះ សូមបន្ដពង្រឹងជំនឿរបស់អ្នក ដោយសិក្សាបទគម្ពីរយ៉ាងយកចិត្តទុកដាក់ ហើយដោយជួយអ្នកឯទៀតបណ្ដុះឲ្យមានចំណងមិត្តភាពជាមួយព្រះយេហូវ៉ា។ លោកនឹងការពារអស់អ្នកដែលទុកចិត្តលោកទាំងស្រុង ហើយលោកនឹងផ្ដល់«សេចក្ដីសុខសាន្តដល់ពួកគេជានិច្ច»។—អេ. ២៦:៣
១៨ ក្នុងអត្ថបទបន្ទាប់ យើងនឹងពិចារណាទំនាយអំពីក្រុមជំនុំគ្រិស្តសាសនិកនៅគ្រាចុងបញ្ចប់។ ដូចដែលយើងនឹងរៀន ទំនាយទាំងនេះក៏បង្ហាញថាយើងកំពុងរស់នៅគ្រាចុងក្រោយបង្អស់។ យើងនឹងពិចារណាទីសំអាងថែមទៀតថា លោកយេស៊ូដែលជាស្ដេចរបស់យើងនៅឥឡូវនេះ កំពុងដឹកនាំពួកអ្នកកាន់តាមដ៏ស្មោះត្រង់របស់លោក។
ចម្រៀងលេខ៦១ សាក្សីទាំងឡាយអើយ! ចូរឈានទៅមុខ!
a យើងកំពុងរស់នៅគ្រាដ៏គួរឲ្យរំភើបចិត្តបំផុតមួយក្នុងប្រវត្តិសាស្ត្រ! រាជាណាចក្ររបស់ព្រះកំពុងគ្រប់គ្រងហើយ ដូចដែលទំនាយជាច្រើនក្នុងគម្ពីរបានប្រាប់ទុកជាមុន។ ក្នុងអត្ថបទនេះ យើងនឹងពិចារណាអំពីទំនាយខ្លះទាំងនេះដើម្បីពង្រឹងជំនឿរបស់យើងទៅលើព្រះយេហូវ៉ា ហើយជួយយើងឲ្យទុកចិត្តលោក និងរក្សាចិត្តស្ងប់ នៅឥឡូវនេះនិងនៅថ្ងៃខាងមុខ។
b សូមមើលមេរៀនទី៣២ ចំណុចទី៤ ក្នុងសៀវភៅសប្បាយនឹងជីវិតដែលគ្មានទីបញ្ចប់! និងវីដេអូរាជាណាចក្រព្រះបានចាប់ផ្ដើមគ្រប់គ្រងនៅឆ្នាំ១៩១៤ នៅគេហទំព័រjw.org/km។
c ដើម្បីបានព័ត៌មានថែមទៀតអំពីទំនាយរបស់ដានីយ៉ែល សូមមើលទស្សនាវដ្ដីប៉មយាម ថ្ងៃទី១៥ ខែមិថុនា ឆ្នាំ២០១២ ទំ.១៤-១៩។
d ដើម្បីបានព័ត៌មានថែមទៀតអំពីអ្វីដែលនឹងកើតឡើងនៅថ្ងៃអនាគតឆាប់ៗខាងមុខនេះ សូមមើលជំពូកទី២១នៃសៀវភៅរាជាណាចក្ររបស់ព្រះចាប់ផ្ដើមគ្រប់គ្រងហើយ!