សំណួរពីអ្នកអាន
តើសាស្ដា ៥:៨សំដៅទៅលើអ្នកគ្រប់គ្រងដែលជាមនុស្សជាតិ ឬតើនេះរួមបញ្ចូលព្រះយេហូវ៉ាដែរ?
ខគម្ពីរដ៏គួរឲ្យចាប់អារម្មណ៍នេះចែងថា៖ «បើសិនជាឯងឃើញគេសង្កត់សង្កិនមនុស្សទាល់ក្រ ឬពួកច្រឡោតកំពុងតែបង្វែរសេចក្ដីយុត្តិធម៌ នឹងសេចក្ដីសុចរិតនៅក្នុងស្រុកណា នោះកុំឲ្យឆ្ងល់ពីការនោះឡើយ។ ដ្បិតមានអ្នកមួយដែលខ្ពស់ជាង គេត្រួតមើលអ្នកធំនោះ ហើយក៏មានដែលខ្ពស់ជាងគេទៅទៀតផង»។—សាស្ដ. ៥:៨
បើមិនគិតអំពីទស្សនៈរបស់ព្រះយេហូវ៉ា ខនេះអាចមើលទៅហាក់ដូចជារៀបរាប់អំពីមនុស្សដែលមានអំណាចក្នុងរដ្ឋាភិបាលប៉ុណ្ណោះ។ ប៉ុន្តែ បើយើងគិតស៊ីជម្រៅជាងអំពីខនេះ នេះក៏លើកឡើងអំពីសេចក្ដីពិតមួយស្ដីអំពីព្រះយេហូវ៉ា ដែលគួរសម្រាលទុក្ខនិងពង្រឹងទំនុកចិត្តយើងដែរ។
សាស្ដា ៥:៨ ចែងអំពីអ្នកគ្រប់គ្រងដែលជិះជាន់អ្នកក្រីក្រ ហើយមិនរកយុត្តិធម៌ឲ្យពួកគេ។ អ្នកគ្រប់គ្រងនេះគួរចាំថា មានបុគ្គលម្នាក់ដែលទំនងជាមើលគាត់ ហើយបុគ្គលនោះមានឋានៈ ឬអំណាចខ្ពស់ជាងគាត់។ តាមពិត ប្រហែលជាមានអ្នកឯទៀតដែលមានឋានៈខ្ពស់ជាងអ្នកនោះទៅទៀត។ គួរឲ្យស្ដាយ ក្នុងរដ្ឋាភិបាលរបស់មនុស្ស អ្នកគ្រប់គ្រងទាំងអស់នោះប្រហែលជាពុករលួយ ហើយប្រជារាស្ត្ររងទុក្ខដោយសារអំពើនេះ។
ប៉ុន្តែ ទោះជាមើលទៅបញ្ហានេះមិនអាចផ្លាស់ប្ដូរក្ដី យើងអាចទទួលការសម្រាលទុក្ខដោយដឹងថា ព្រះយេហូវ៉ាកំពុង«ត្រួតមើលអ្នកធំ»ក្នុងរដ្ឋាភិបាលផងដែរ។ យើងអាចអង្វរសុំជំនួយពីព្រះ ហើយផ្ទេរបន្ទុករបស់យើងទៅលោក។ (ទំនុក. ៥៥:២២; ភី. ៤:៦, ៧) យើងដឹងថា«ព្រះនេត្រនៃព្រះយេហូវ៉ាចេះតែទតច្រវាត់នៅគ្រប់លើផែនដីទាំងមូល ដើម្បីនឹងសំដែងព្រះចេស្ដា ជួយដល់អស់អ្នកណាដែលមានចិត្តស្មោះត្រង់ចំពោះទ្រង់»។—២រប. ១៦:៩
ដូច្នេះ សាស្ដា ៥:៨រំលឹកយើងថា ក្នុងរដ្ឋាភិបាលមនុស្ស តែងតែមានបុគ្គលដែលមានអំណាចខ្ពស់ជាងបុគ្គលផ្សេងទៀត។ សំខាន់ជាងនេះទៅទៀត ខគម្ពីរនេះអាចរំលឹកយើងថាព្រះយេហូវ៉ាមានអំណាចខ្ពង់ខ្ពស់ជាងគេបំផុត។ ឥឡូវនេះ លោកកំពុងគ្រប់គ្រងដោយប្រើលោកយេស៊ូគ្រិស្តជាបុត្ររបស់លោក ឲ្យធ្វើជាស្ដេចនៃរាជាណាចក្រលោក។ ព្រះដែលមានឫទ្ធានុភាពខ្លាំងក្លាបំផុត កំពុងមើលបុគ្គលគ្រប់រូបនិងអ្វីៗទាំងអស់ ហើយលោកយុត្តិធម៌ក្នុងគ្រប់ការទាំងអស់។ បុត្ររបស់លោកក៏ដូច្នេះដែរ។
