អត្ថបទសិក្សា ៣៥
ចូរឲ្យតម្លៃបងប្អូនវ័យចាស់ដ៏ស្មោះត្រង់
«សក់ស្កូវជាមកុដដ៏សែនស្អាត»។—សុភ. ១៦:៣១
ចម្រៀងលេខ១៣៨ សក់ស្កូវជាមកុដ
សេចក្ដីសង្ខេប *
១-២. (ក) យោងទៅតាមសុភាសិត ១៦:៣១ តើយើងគួរមានទស្សនៈយ៉ាងណាចំពោះបងប្អូនវ័យចាស់ដ៏ស្មោះត្រង់? (ខ) ក្នុងអត្ថបទនេះ តើយើងនឹងទទួលចម្លើយចំពោះសំណួរអ្វីខ្លះ?
នៅឧទ្យានជាតិមួយនារដ្ឋអារកាន់សាស់ សហរដ្ឋអាម៉េរិក ភ្ញៀវទេសចរអាចរកឃើញពេជ្រនៅលើដី។ ប៉ុន្តែ ពេជ្រទាំងនោះគឺមិនទាន់ច្នៃទេ។ ហេតុនេះ មនុស្សជាច្រើនដែលឃើញវាមិនសូវចាប់អារម្មណ៍ ហើយដើររំលងទៅ។
២ ដូចពេជ្រទាំងនោះ បងប្អូនវ័យចាស់របស់យើងគឺជាទ្រព្យវិសេស។ ប៉ុន្តែ ទ្រព្យទាំងនេះអាចស្រួលមើលរំលង។ បណ្ដាំរបស់ព្រះប្រដូចសក់ស្កូវរបស់ពួកគេទៅនឹងមកុដ។ (សូមអាន សុភាសិត ១៦:៣១; ២០:២៩) បងប្អូនវ័យក្មេងដែលយល់តម្លៃបងប្អូនវ័យចាស់ អាចទទួលអ្វីពិសេសជាងទ្រព្យសម្បត្តិ។ ក្នុងអត្ថបទនេះ យើងនឹងទទួលចម្លើយចំពោះសំណួរបី៖ ហេតុអ្វីព្រះយេហូវ៉ាចាត់ទុកបងប្អូនវ័យចាស់ដ៏ស្មោះត្រង់ជាទ្រព្យវិសេស? ហេតុអ្វីបងប្អូនវ័យចាស់មានតម្លៃចំពោះអង្គការរបស់ព្រះយេហូវ៉ា? តើយើងអាចធ្វើអ្វីដើម្បីទទួលប្រយោជន៍យ៉ាងពេញលេញពីគំរូរបស់ពួកគេ?
មូលហេតុដែលព្រះយេហូវ៉ាចាត់ទុកបងប្អូនវ័យចាស់ដ៏ស្មោះត្រង់ជាទ្រព្យវិសេស
បងប្អូនវ័យចាស់ដ៏ស្មោះត្រង់មានតម្លៃចំពោះព្រះយេហូវ៉ានិងចំពោះរាស្ត្ររបស់លោក (សូមមើលវគ្គ៣)
៣. សមស្របទៅតាមចម្រៀងសរសើរព្រះ ៩២:១២-១៥ ហេតុអ្វីបងប្អូនវ័យចាស់ដ៏ស្មោះត្រង់មានតម្លៃចំពោះព្រះយេហូវ៉ា?
៣ បងប្អូនវ័យចាស់ដ៏ស្មោះត្រង់មានតម្លៃចំពោះព្រះយេហូវ៉ា។ លោកដឹងថាពួកគេជាមនុស្សបែបណា ហើយឲ្យតម្លៃចំពោះគុណសម្បត្តិរបស់ពួកគេ។ លោកសប្បាយចិត្ត ពេលបងប្អូនវ័យចាស់ចែករំលែកបទពិសោធន៍ជីវិត និងគំនិតវាងវៃដែលពួកគេបានទទួលក្នុងអំឡុងកិច្ចបម្រើដ៏ស្មោះរបស់ពួកគេ ដល់បងប្អូនវ័យក្មេងជាង។ (យ៉ូប ១២:១២; សុភ. ១:១-៤) ព្រះយេហូវ៉ាក៏ឲ្យតម្លៃចំពោះការស៊ូទ្រាំរបស់ពួកគេដែរ។ (ម៉ាឡ. ៣:១៦) ទោះជាពួកគេមានបញ្ហាផ្សេងៗក្នុងជីវិតក្ដី ពួកគេបានរក្សាជំនឿមាំមួនលើព្រះយេហូវ៉ា។ ពួកគេមានសេចក្ដីសង្ឃឹមទៅលើសេចក្ដីសន្យាចំពោះថ្ងៃអនាគតខ្លាំងជាងពេលពួកគេរៀនសេចក្ដីពិតដំបូង។ ម្យ៉ាងទៀត ព្រះយេហូវ៉ាស្រឡាញ់ពួកគេដោយសារពួកគេបន្តប្រកាសនាមរបស់លោក មិនថា«ពួកគេមានវ័យចាស់»ក្ដី។—សូមអាន ចម្រៀងសរសើរព្រះ ៩២:១២-១៥
៤. តើអ្វីអាចលើកទឹកចិត្តបងប្អូនវ័យចាស់របស់យើង?
៤ បើអ្នកកាន់តែចាស់ទៅៗ សូមមានទំនុកចិត្តថាព្រះយេហូវ៉ាចាំអំពីកិច្ចការដែលអ្នកបានធ្វើកន្លងមក។ (ហេ. ៦:១០) អ្នកបានគាំទ្រកិច្ចការផ្សព្វផ្សាយយ៉ាងខ្នះខ្នែង ហើយនោះបានធ្វើឲ្យបិតារបស់យើងនៅស្ថានសួគ៌ពេញចិត្ត។ អ្នកបានស៊ូទ្រាំចំពោះបញ្ហានានា រួមទាំងបញ្ហាដែលធ្វើឲ្យអ្នកពិបាកចិត្តខ្លាំងណាស់។ អ្នកបានធ្វើតាមនិងកាន់ខ្ជាប់តាមខ្នាតតម្រាដ៏សុចរិតក្នុងគម្ពីរ បំពេញភារកិច្ចដ៏សំខាន់យ៉ាងស្មោះត្រង់ក្នុងអង្គការរបស់ព្រះយេហូវ៉ា ហើយបង្ហាត់បង្រៀនអ្នកឯទៀត។ អ្នកបានខំអស់ពីសមត្ថភាពដើម្បីសម្របខ្លួនទៅតាមការផ្លាស់ប្ដូរជាច្រើនដែលអង្គការរបស់ព្រះយេហូវ៉ាបានធ្វើ។ ម្យ៉ាងទៀត អ្នកបានគាំទ្រនិងលើកទឹកចិត្តអ្នកឯទៀតដែលនៅក្នុងកិច្ចបម្រើពេញពេល។ ព្រះយេហូវ៉ាស្រឡាញ់អ្នកខ្លាំងណាស់ ដោយសារអ្នកមានភក្ដីភាពចំពោះលោក។ លោកសន្យាថា៖ «លោកនឹងមិនបោះបង់អ្នកដែលមានភក្ដីភាពចំពោះលោកទេ»! (ចសព. ៣៧:២៨) លោកក៏សន្យាចំពោះអ្នកថា៖ «ខ្ញុំនឹងមើលថែអ្នកជានិច្ច រហូតដល់អ្នកចាស់សក់ស្កូវ»។ (អេ. ៤៦:៤) ដូច្នេះ សូមកុំគិតថាដោយសារអ្នកមានវ័យកាន់តែចាស់ អ្នកលែងមានតម្លៃចំពោះអង្គការរបស់ព្រះយេហូវ៉ាឡើយ។ អ្នកមានតម្លៃណាស់!
ព្រះឲ្យតួនាទីដល់បងប្អូនវ័យចាស់
៥. តើបងប្អូនវ័យចាស់គួរចាំអំពីអ្វី?
៥ បងប្អូនវ័យចាស់មានប្រយោជន៍ជាច្រើនចំពោះអង្គការរបស់ព្រះយេហូវ៉ា។ ពិតមែនថាពួកគេប្រហែលជាមិនមានកម្លាំងកាយដូចដែលពួកគេធ្លាប់មានពីមុន តែពួកគេមានបទពិសោធន៍ជាច្រើនអស់រយៈពេលជាច្រើនឆ្នាំ។ ព្រះយេហូវ៉ាអាចបន្តប្រើពួកគេតាមរបៀបផ្សេងៗ ដូចដែលយើងនឹងឃើញតាមរយៈគំរូពីអតីតកាលនិងបច្ចុប្បន្នកាលជាបន្តបន្ទាប់នេះ។
៦-៧. សូមលើកឧទាហរណ៍ពីគម្ពីរអំពីបុគ្គលវ័យចាស់ដែលបានទទួលពរចំពោះកិច្ចបម្រើដ៏ស្មោះភក្ដីរបស់ពួកគេ។
៦ យើងអាចឃើញគំរូល្អជាច្រើនក្នុងគម្ពីរអំពីពួកអ្នកស្មោះត្រង់ដែលបន្តបម្រើព្រះយេហូវ៉ាយ៉ាងសកម្ម ពេលពួកគេមានវ័យចាស់។ ជាឧទាហរណ៍ ម៉ូសេមានអាយុប្រហែលជា៨០ឆ្នាំ ពេលគាត់ចាប់ផ្ដើមបម្រើជាអ្នកប្រកាសទំនាយ និងជាតំណាងរបស់ព្រះយេហូវ៉ាចំពោះប្រជាជាតិអ៊ីស្រាអែល។ ព្រះយេហូវ៉ាក៏នៅតែប្រើដានីយ៉ែលជាអ្នកប្រកាសទំនាយ ពេលគាត់ទំនងជាមានអាយុជាង៩០ឆ្នាំ។ ម្យ៉ាងទៀត សាវ័កយ៉ូហានទំនងជាមានអាយុ៩០ឆ្នាំជាង ពេលព្រះយេហូវ៉ាដឹកនាំគាត់ឲ្យសរសេរសៀវភៅការបើកបង្ហាញ។
៧ អ្នកបម្រើដ៏ស្មោះត្រង់ជាច្រើននាក់ទៀតប្រហែលជាមិនសូវលេចធ្លោ ហើយប្រហែលជាងាយឲ្យអ្នកឯទៀតមើលរំលងពួកគេ។ ប៉ុន្តែព្រះយេហូវ៉ាកត់សម្គាល់ពួកគេ ហើយឲ្យរង្វាន់ចំពោះភក្ដីភាពរបស់ពួកគេ។ ជាឧទាហរណ៍ គម្ពីររៀបរាប់យ៉ាងខ្លីអំពីស៊ីម្មានដែលជា«មនុស្សសុចរិត និងជាអ្នកកោតខ្លាចព្រះ»។ ប៉ុន្តែព្រះយេហូវ៉ាស្គាល់គាត់ ហើយផ្ដល់ឯកសិទ្ធិឲ្យគាត់ឃើញកូនតូចយេស៊ូ ព្រមទាំងប្រកាសទំនាយអំពីកូនតូចនោះនិងអំពីម្ដាយ។ (លូក. ២:២២, ២៥-៣៥) សូមគិតផងដែរអំពីស្ត្រីមេម៉ាយអាណាដែលជាអ្នកប្រកាសទំនាយ។ ទោះជាគាត់មានអាយុ៨៤ឆ្នាំក្ដី «គាត់មិនដែលខានទៅវិហារឡើយ»។ ព្រះយេហូវ៉ាបានឲ្យពរគាត់ ដោយសារគាត់បានទៅវិហារជាទៀងទាត់ ហើយលោកក៏បានឲ្យគាត់ឃើញកូនតូចយេស៊ូ។ ទាំងស៊ីម្មាន ទាំងអាណាមានតម្លៃចំពោះព្រះយេហូវ៉ា។—លូក. ២:៣៦-៣៨
បងឡូអ៊ីសដែលឥឡូវមានអាយុ៨០ឆ្នាំជាងបន្តបម្រើព្រះយេហូវ៉ាយ៉ាងស្មោះត្រង់ (សូមមើលវគ្គ៨)
៨-៩. តើបងស្រីម្នាក់បានធ្វើអ្វីក្នុងអង្គការរបស់ព្រះយេហូវ៉ា ទោះជាគាត់ជាស្ត្រីមេម៉ាយក្ដី?
៨ នៅសម័យយើង បងប្អូនវ័យចាស់ដ៏ស្មោះត្រង់ជាច្រើននាក់ ទុកគំរូដ៏ល្អប្រសើរសម្រាប់បងប្អូនដែលមានវ័យក្មេងជាង។ សូមគិតអំពីបទពិសោធន៍របស់បងស្រីឡូអ៊ីស ឌីដា។ ពេលដែលគាត់បានចាប់ផ្ដើមបម្រើជាអ្នកត្រួសត្រាយពិសេសនៅប្រទេសកាណាដា គាត់មានអាយុត្រឹមតែ២១ឆ្នាំ។ ក្រោយមក គាត់និងប្ដីរបស់គាត់បងចន បានចំណាយពេលអស់ជាច្រើនឆ្នាំក្នុងកិច្ចការធ្វើដំណើរត្រួតពិនិត្យ។ ក្រោយមក ពួកគាត់បានបម្រើនៅបេតអែលកាណាដាជាង២០ឆ្នាំ។ ពេលបងឡូអ៊ីសមានអាយុ៥៨ឆ្នាំ គាត់និងបងចនបានត្រូវស្នើសុំឲ្យបម្រើនៅប្រទេសអ៊ុយក្រែន។ តើពួកគាត់បានសន្និដ្ឋានថាពួកគាត់ចាស់ពេកមិនអាចបម្រើនៅប្រទេសផ្សេងឬទេ? តើពួកគាត់សម្រេចចិត្តធ្វើអ្វី? ពួកគាត់បានព្រមទទួលភារកិច្ចនោះ ហើយបងចនបានត្រូវតែងតាំងជាសមាជិកគណៈកម្មាធិការការិយាល័យសាខានៅប្រទេសនោះ។ ប្រាំពីរឆ្នាំក្រោយមក បងចនបានស្លាប់ តែបងឡូអ៊ីសសម្រេចចិត្តបន្តបម្រើនៅទីនោះ។ ឥឡូវ បងឡូអ៊ីសមានអាយុ៨១ឆ្នាំ។ គាត់នៅតែបម្រើព្រះយេហូវ៉ាយ៉ាងស្មោះត្រង់ជាមួយក្រុមគ្រួសារបេតអែលអ៊ុយក្រែន ហើយពួកគេស្រឡាញ់គាត់ខ្លាំងណាស់។
៩ យើងប្រហែលជាមិនងាយកត់សម្គាល់ស្ត្រីមេម៉ាយដូចបងឡូអ៊ីស ដូចពេលដែលប្ដីរបស់ពួកគេនៅរស់ទេ ប៉ុន្តែពួកគេនៅតែមានតម្លៃ។ ព្រះយេហូវ៉ាឲ្យតម្លៃយ៉ាងខ្លាំងចំពោះបងប្អូនស្រីដែលគាំទ្រប្ដីរបស់ពួកគេអស់ជាច្រើនឆ្នាំ ហើយដែលបន្តបម្រើលោកដោយភក្ដីភាព។ (១ធី. ៥:៣) ម្យ៉ាងវិញទៀត ពួកគេលើកទឹកចិត្តបងប្អូនដែលមានវ័យក្មេងជាង។
១០. តើបងថូនីបានទុកគំរូដ៏ល្អប្រសើរអ្វី?
១០ បងប្អូនវ័យចាស់ដ៏ស្មោះត្រង់ជាច្រើននាក់ដែលមិនអាចចេញពីផ្ទះ ក៏ជាទ្រព្យវិសេសផងដែរ។ ជាឧទាហរណ៍ បងប្រុសម្នាក់ឈ្មោះថូនីរស់នៅមណ្ឌលថែទាំមនុស្សវ័យចាស់។ គាត់បានទទួលការជ្រមុជទឹកនៅខែសីហា ឆ្នាំ១៩៤២ នៅរដ្ឋប៉ិនស៊ីវ៉ានី សហរដ្ឋអាម៉េរិក ពេលដែលគាត់មានអាយុ២០ឆ្នាំ។ មិនយូរក្រោយមក គាត់បានត្រូវជាប់គុកអស់ពីរឆ្នាំកន្លះ ដោយសារគាត់កាន់ជំហរអព្យាក្រឹត។ គាត់និងប្រពន្ធរបស់គាត់បងអ៊ីលដាបានចិញ្ចឹមអប់រំកូនពីរនាក់ក្នុងសេចក្ដីពិត។ អស់ជាច្រើនឆ្នាំ បងថូនីបានបម្រើនៅក្រុមជំនុំបី ជាប្រធានត្រួតពិនិត្យ (ដែលឥឡូវហៅថាអ្នកចាត់ចែងកិច្ចការពួកអ្នកចាស់ទុំ) ព្រមទាំងបម្រើជាអ្នកត្រួតពិនិត្យសន្និបាតប្រចាំមណ្ឌល។ ម្យ៉ាងទៀត គាត់ធ្លាប់បង្រៀនគម្ពីរនិងដឹកនាំកិច្ចប្រជុំនៅពន្ធនាគារមួយ។ សព្វថ្ងៃនេះ បងថូនីមានអាយុ៩៨ឆ្នាំ ហើយគាត់នៅតែខ្នះខ្នែងធ្វើកិច្ចការឲ្យព្រះយេហូវ៉ា។ គាត់បន្តបម្រើព្រះយេហូវ៉ាអស់ពីសមត្ថភាពជាមួយបងប្អូននៅក្រុមជំនុំរបស់គាត់!
១១. តើយើងអាចបង្ហាញយ៉ាងណាថាយើងឲ្យតម្លៃចំពោះពួកអ្នកដែលមិនអាចចេញពីផ្ទះបាន?
១១ តើយើងអាចលើកកិត្តិយសបងប្អូនវ័យចាស់ដែលមិនអាចចេញពីផ្ទះយ៉ាងដូចម្ដេច? ពេលដែលអាចធ្វើបាន ពួកអ្នកចាស់ទុំអាចជួយពួកគេឲ្យចូលរួមឬស្ដាប់កិច្ចប្រជុំ និងផ្សព្វផ្សាយជាដើម។ យើងអាចបង្ហាញការយកចិត្តទុកដាក់ចំពោះពួកគេ ដោយទៅលេងពួកគេឬនិយាយជាមួយពួកគេតាមវីដេអូ។ បើយើងមិនប្រុងប្រយ័ត្នទេ យើងប្រហែលជាមិនចាប់អារម្មណ៍នឹងបងប្អូនវ័យចាស់ទាំងនេះ។ បងប្អូនវ័យចាស់ខ្លះប្រហែលជាមានអារម្មណ៍មិនស្រួលនិយាយអំពីខ្លួនឯង ឬពួកគេប្រហែលជាគិតថាការនិយាយអំពីខ្លួនគឺមិនសមទេ។ ប៉ុន្តែ យើងនឹងទទួលប្រយោជន៍ច្រើនណាស់ ពេលយើងលៃទុកពេលសួរសំណួរនិងស្ដាប់ពួកគេកាលដែលពួកគេប្រាប់អំពីអំណរដែលពួកគេមានក្នុងអង្គការរបស់ព្រះយេហូវ៉ា។
១២. តើយើងមានបងប្អូនបែបណានៅក្នុងក្រុមជំនុំរបស់យើង?
១២ យើងប្រហែលជាភ្ញាក់ផ្អើល ដោយដឹងថាមានបងប្អូនវ័យចាស់ដ៏ស្មោះត្រង់ក្នុងក្រុមជំនុំរបស់យើងដែលទុកគំរូដ៏ប្រសើរ។ បងស្រីម្នាក់ឈ្មោះហារីអេតបានបម្រើព្រះយេហូវ៉ាយ៉ាងស្មោះត្រង់អស់ជាច្រើនឆ្នាំនៅក្រុមជំនុំរបស់គាត់ នារដ្ឋនូជើហ្ស៊ី សហរដ្ឋអាម៉េរិក។ ក្រោយមក គាត់បានរើទៅរស់នៅជាមួយកូនស្រីរបស់គាត់។ បងប្អូននៅក្រុមជំនុំថ្មីបានលៃទុកពេលដើម្បីស្គាល់គាត់ ហើយពួកគេឃើញថាគាត់ជាមនុស្សដ៏មានតម្លៃខ្លាំងណាស់។ គាត់បានលើកទឹកចិត្តពួកគេដោយរៀបរាប់អំពីបទពិសោធន៍របស់គាត់ក្នុងកិច្ចបម្រើផ្សាយ ពេលគាត់ចាប់ផ្ដើមរៀនសេចក្ដីពិតដំបូងប្រហែលជានៅឆ្នាំ១៩២៥។ នៅពេលនោះ គាត់តែងតែយកច្រាសដុសធ្មេញទៅតាមខ្លួនពេលគាត់ចេញទៅផ្សព្វផ្សាយ ក្រែងលោគេចាប់ខ្លួនគាត់។ តាមការពិត នៅឆ្នាំ១៩៣៣ គាត់បានត្រូវគេចាប់ដាក់គុកអស់ពីរលើក ហើយក្នុងមួយលើកៗគាត់បានជាប់គុកអស់មួយសប្ដាហ៍។ ប្ដីរបស់បងហារីអេតដែលមិនមែនជាសាក្សីបានគាំទ្រគាត់ ហើយបានមើលថែកូនតូចទាំងបីរបស់ពួកគេ ពេលគាត់ជាប់គុក។ បងប្អូនវ័យចាស់ដ៏ស្មោះត្រង់ដូចបងហារីអេត ពិតជាសមនឹងទទួលការគោរពមែន!
១៣. តើបងប្អូនវ័យចាស់មានតម្លៃយ៉ាងណាក្នុងអង្គការរបស់ព្រះយេហូវ៉ា?
១៣ បងប្អូនវ័យចាស់របស់យើងគឺសំខាន់ណាស់ចំពោះព្រះយេហូវ៉ានិងអង្គការរបស់លោក។ ពួកគេបានឃើញរបៀបជាច្រើនដែលព្រះយេហូវ៉ាបានឲ្យពរដល់អង្គការរបស់លោកនិងដល់ពួកគេផ្ទាល់។ ពួកគេបានទាញយកមេរៀនសំខាន់ពីកំហុសដែលពួកគេបានធ្វើ។ សូមចាត់ទុកពួកគេជា«ប្រភពនៃប្រាជ្ញា» និងរៀនពីពួកគេ។ (សុភ. ១៨:៤) បើអ្នកលៃទុកពេលដើម្បីស្គាល់ពួកគេ អ្នកនឹងរៀនច្រើនពីពួកគេ ហើយជំនឿរបស់អ្នកនឹងកាន់តែរឹងមាំឡើង!
ចូរទទួលប្រយោជន៍ពេញលេញពីគំរូរបស់បងប្អូនវ័យចាស់
ដូចអេលីសេបានទទួលប្រយោជន៍ពីការសេពគប់ជាមួយអេលីយ៉ា បងប្អូនអាចទទួលប្រយោជន៍ពីការស្ដាប់បទពិសោធន៍របស់បងប្អូនដែលបម្រើព្រះយេហូវ៉ាជាយូរមកហើយ (សូមមើលវគ្គ១៤-១៥)
១៤. តើការបំភ្លឺច្បាប់ ៣២:៧ លើកទឹកចិត្តបងប្អូនវ័យក្មេងឲ្យធ្វើអ្វី?
១៤ សូមទៅនិយាយជាមួយបងប្អូនវ័យចាស់មុន។ (សូមអាន ការបំភ្លឺច្បាប់ ៣២:៧) ពិតមែនថា ភ្នែករបស់ពួកគេប្រហែលជាចុះខ្សោយ ដំណើររបស់ពួកគេយឺតៗ និងសំឡេងរបស់ពួកគេខ្សាវៗ។ ប៉ុន្តែ ក្នុងចិត្តរបស់ពួកគេគឺពុះកញ្ជ្រោល ហើយពួកគេមាន«កេរ្តិ៍ឈ្មោះល្អ»ចំពោះព្រះយេហូវ៉ា។ (អទ. ៧:១) សូមចាំអំពីមូលហេតុដែលព្រះយេហូវ៉ាឲ្យតម្លៃពួកគេ។ សូមបន្តបង្ហាញការគោរពចំពោះពួកគេ។ សូមធ្វើដូចអេលីសេ។ គាត់បានទទូចនៅជាមួយអេលីយ៉ានៅថ្ងៃចុងក្រោយដែលពួកគាត់នៅជាមួយគ្នា។ អេលីសេបាននិយាយអស់បីដងថា៖ «ខ្ញុំនឹងមិនចាកចេញពីលោកម្ចាស់ឡើយ»។—២បស. ២:២, ៤, ៦
១៥. តើយើងអាចសួរបងប្អូនវ័យចាស់នូវសំណួរអ្វីខ្លះ?
១៥ សូមបង្ហាញការយកចិត្តទុកដាក់យ៉ាងស្មោះចំពោះបងប្អូនវ័យចាស់ ដោយសួរសំណួរទៅពួកគេតាមរបៀបសប្បុរស។ (សុភ. ១:៥; ២០:៥; ១ធី. ៥:១, ២) សូមសួរសំណួរដូចជា៖ «ពេលបងនៅក្មេង តើអ្វីធ្វើឲ្យបងជឿជាក់ថាបងបានរកឃើញសេចក្ដីពិត?» «តើបទពិសោធន៍របស់បងបានទាញនាំបងឲ្យចូលកាន់តែជិតព្រះយេហូវ៉ាយ៉ាងដូចម្ដេច?» «តើអ្វីបានជួយបងឲ្យរក្សាអំណរក្នុងកិច្ចបម្រើព្រះយេហូវ៉ា?»។ (១ធី. ៦:៦-៨) បន្ទាប់មក សូមស្ដាប់ចម្លើយរបស់ពួកគេ។
១៦. តើការនិយាយគ្នាអាចមានប្រយោជន៍យ៉ាងណាចំពោះបងប្អូនវ័យចាស់និងបងប្អូនវ័យក្មេង?
១៦ ទាំងបងប្អូនវ័យចាស់ ទាំងបងប្អូនវ័យក្មេងទទួលប្រយោជន៍ពេលពួកគេនិយាយគ្នា។ (រ៉ូម ១:១២) បងប្អូនវ័យក្មេងទាំងឡាយ អ្នកនឹងកាន់តែជឿជាក់ថាព្រះយេហូវ៉ាថែរក្សារាស្ត្ររបស់លោក ហើយបងប្អូនវ័យចាស់នឹងមានអារម្មណ៍ថាអ្នកស្រឡាញ់គាត់។ គាត់នឹងមានចិត្តរីករាយប្រាប់អ្នកអំពីរបៀបដែលព្រះយេហូវ៉ាបានឲ្យពរគាត់។
១៧. ហេតុអ្វីយើងអាចនិយាយថាបងប្អូនវ័យចាស់ដ៏ស្មោះត្រង់កាន់តែស្រស់ស្អាតពីមួយឆ្នាំទៅមួយឆ្នាំ?
១៧ តាមធម្មតា សម្រស់កាន់តែអន់ថយពេលដែលចាស់ទៅៗ តែពួកអ្នកដែលមានចិត្តស្មោះភក្ដីចំពោះព្រះយេហូវ៉ាកាន់តែស្រស់ស្អាតចំពោះលោកពីមួយឆ្នាំទៅមួយឆ្នាំ។ (១ថែ. ១:២, ៣) ហេតុអ្វី? ពីព្រោះអស់ជាច្រើនឆ្នាំ ពួកគេបានឲ្យឫទ្ធានុភាពរបស់ព្រះបង្ហាត់បង្រៀននិងជួយពួកគេបណ្ដុះឲ្យមានគុណសម្បត្តិដ៏ល្អប្រសើរ។ កាលដែលយើងកាន់តែស្គាល់បងប្អូនវ័យចាស់ដ៏មានតម្លៃ លើកកិត្តិយសពួកគេ និងរៀនពីពួកគេ យើងនឹងកាន់តែចាត់ទុកពួកគេជាទ្រព្យដ៏មានតម្លៃដែលកាត់ថ្លៃពុំបាន!
១៨. តើយើងនឹងពិចារណាអ្វីក្នុងអត្ថបទបន្ទាប់?
១៨ ក្រុមជំនុំកាន់តែមាំមួន មិនគ្រាន់តែពេលបងប្អូនវ័យក្មេងឲ្យតម្លៃបងប្អូនវ័យចាស់ប៉ុណ្ណោះទេ តែក៏ពេលបងប្អូនវ័យចាស់ឲ្យតម្លៃបងប្អូនវ័យក្មេងដែរ។ ក្នុងអត្ថបទបន្ទាប់ យើងនឹងពិចារណាអំពីរបៀបដែលបងប្អូនវ័យចាស់អាចបង្ហាញថា ពួកគេឲ្យតម្លៃចំពោះបងប្អូនវ័យក្មេងជាងក្នុងក្រុមជំនុំ។
ចម្រៀងលេខ១៤៤ ចូរផ្ដោតអារម្មណ៍លើរង្វាន់!
^ វគ្គ 5 បងប្អូនវ័យចាស់ដ៏ស្មោះត្រង់គឺប្រៀបដូចជាទ្រព្យវិសេស។ អត្ថបទនេះនឹងលើកទឹកចិត្តយើងឲ្យតម្លៃកាន់តែខ្លាំងចំពោះពួកគេ ហើយយើងនឹងពិចារណាអំពីរបៀបដែលយើងអាចទទួលប្រយោជន៍យ៉ាងពេញលេញពីប្រាជ្ញានិងបទពិសោធន៍របស់ពួកគេ។ អត្ថបទនេះក៏នឹងពង្រឹងទំនុកចិត្តបងប្អូនវ័យចាស់ថា ពួកគេមានតួនាទីដ៏សំខាន់ក្នុងអង្គការរបស់ព្រះ។
