អត្ថបទសិក្សា ៧
ការយល់អំពីប្រមុខភាពក្នុងក្រុមជំនុំ
«គ្រិស្តជាប្រមុខនៃក្រុមជំនុំ ជារូបកាយរបស់លោកដែលលោកបានសង្គ្រោះ»។—អេភ. ៥:២៣
ចម្រៀងលេខ១៣៧ ស្ត្រីគ្រិស្តសាសនិកស្មោះត្រង់
សេចក្ដីសង្ខេប *
១. ហេតុអ្វីក្រុមគ្រួសាររបស់ព្រះយេហូវ៉ាមានសាមគ្គីភាព?
យើងសប្បាយចិត្តធ្វើជាសមាជិកក្រុមគ្រួសាររបស់ព្រះយេហូវ៉ា។ ហេតុអ្វីយើងមានសន្តិភាពនិងសាមគ្គីភាពខ្លាំងដល់ម្ល៉េះ? មូលហេតុមួយគឺថាយើងទាំងអស់គ្នាខំអស់ពីសមត្ថភាពដើម្បីបង្ហាញការគោរពចំពោះពួកអ្នកដែលព្រះយេហូវ៉ាបានឲ្យអំណាចមួយកម្រិត។ តាមការពិត បើយើងកាន់តែយល់អំពីប្រមុខភាពដែលជាការរៀបចំពីព្រះ នោះយើងកាន់តែមានសាមគ្គីភាព។
២. តើយើងនឹងឆ្លើយសំណួរអ្វីខ្លះក្នុងអត្ថបទនេះ?
២ ក្នុងអត្ថបទនេះ យើងនឹងពិចារណាអំពីប្រមុខភាពក្នុងក្រុមជំនុំ។ យើងក៏នឹងរកឃើញចម្លើយចំពោះសំណួរដូចតទៅនេះ៖ តើបងប្អូនស្រីមានតួនាទីអ្វី? តើជាការពិតឬទេដែលថាបងប្អូនប្រុសទាំងអស់គឺជាប្រមុខរបស់បងប្អូនស្រីទាំងឡាយ? តើអ្នកចាស់ទុំមានសិទ្ធិអំណាចលើបងប្អូនដូចប្រមុខគ្រួសារមានទៅលើប្រពន្ធកូនរបស់ពួកគេឬទេ? តែដំបូងបង្អស់ សូមយើងពិចារណាអំពីទស្សនៈដែលយើងគួរមានចំពោះបងប្អូនស្រី។
តើយើងគួរមានទស្សនៈយ៉ាងណាចំពោះបងប្អូនស្រី?
៣. តើអ្វីនឹងជួយយើងកាន់តែឲ្យតម្លៃចំពោះកិច្ចការរបស់បងប្អូនស្រី?
៣ យើងឲ្យតម្លៃចំពោះបងប្អូនស្រីដែលខំមើលថែក្រុមគ្រួសាររបស់ពួកគេ ផ្សព្វផ្សាយដំណឹងល្អ និងជួយអ្នកឯទៀតក្នុងក្រុមជំនុំ។ យើងអាចកាន់តែឲ្យតម្លៃចំពោះពួកគេដោយពិចារណាអំពីទស្សនៈដែលព្រះយេហូវ៉ានិងលោកយេស៊ូមានចំពោះពួកគេ។ យើងក៏នឹងទទួលប្រយោជន៍ពីការពិចារណាអំពីរបៀបដែលសាវ័កប៉ូលប្រព្រឹត្តទៅលើស្ត្រី។
៤. តើគម្ពីរបង្ហាញយ៉ាងណាថាព្រះយេហូវ៉ាឲ្យតម្លៃទាំងស្ត្រីទាំងបុរស?
៤ គម្ពីរបង្ហាញថាព្រះយេហូវ៉ាឲ្យតម្លៃទាំងស្ត្រីទាំងបុរស។ ជាឧទាហរណ៍ គម្ពីរបង្ហាញថានៅសតវត្សរ៍ទី១ ព្រះយេហូវ៉ាបានឲ្យសកម្មពលបរិសុទ្ធដល់ស្ត្រីនិងបុរស ហើយឲ្យពួកគេមានសមត្ថភាពធ្វើអព្ភូតហេតុដូចជានិយាយភាសាផ្សេងៗ។ (សកម្ម. ២:១-៤, ១៥-១៨) ទាំងស្ត្រីទាំងបុរសបានត្រូវរើសតាំងដោយសកម្មពលបរិសុទ្ធ ហើយមានសេចក្ដីសង្ឃឹមគ្រប់គ្រងជាមួយគ្រិស្ត។ (កាឡ. ៣:២៦-២៩) ម្យ៉ាងទៀត ស្ត្រីនិងបុរសនឹងទទួលជីវិតដែលគ្មានទីបញ្ចប់នៅលើផែនដី។ (បប. ៧:៩, ១០, ១៣-១៥) ទាំងបុរសទាំងស្ត្រីក៏មានភារកិច្ចផ្សព្វផ្សាយនិងបង្រៀនដំណឹងល្អ។ (ម៉ាថ. ២៨:១៩, ២០) ជាឧទាហរណ៍ សៀវភៅសកម្មភាពរៀបរាប់អំពីបងស្រីម្នាក់ឈ្មោះព្រីស៊ីល។ គាត់និងប្ដីរបស់គាត់អាគីឡា បានជួយអាប៉ូឡុសដែលជាអ្នកចេះដឹងខ្ពង់ខ្ពស់ ឲ្យយល់សេចក្ដីពិតបានត្រឹមត្រូវជាង។—សកម្ម. ១៨:២៤-២៦
៥. តើលូកា ១០:៣៨, ៣៩, ៤២បង្ហាញយ៉ាងណាអំពីទស្សនៈរបស់លោកយេស៊ូចំពោះស្ត្រី?
៥ លោកយេស៊ូគោរពនិងផ្ដល់កិត្តិយសដល់ស្ត្រី។ លោកមិនបានធ្វើតាមទំនៀមទម្លាប់របស់ពួកផារិស៊ីដែលមើលងាយ និងមិននិយាយរកស្ត្រីនៅទីសាធារណៈទេ។ ម្យ៉ាងទៀត ពួកផារិស៊ីមិននិយាយអំពីបទគម្ពីរជាមួយនឹងស្ត្រីឡើយ។ ផ្ទុយពីពួកគេ លោកយេស៊ូនិយាយអំពីសេចក្ដីបង្រៀនដ៏ជ្រាលជ្រៅក្នុងគម្ពីរជាមួយនឹងស្ត្រី ព្រមទាំងអ្នកកាន់តាមឯទៀតដែរ។ * (សូមអាន លូកា ១០:៣៨, ៣៩, ៤២) លោកក៏ឲ្យស្ត្រីធ្វើដំណើរជាមួយលោកពេលលោកផ្សព្វផ្សាយ។ (លូក. ៨:១-៣) មួយវិញទៀត លោកយេស៊ូឲ្យស្ត្រីមានកិត្តិយសប្រាប់ពួកសាវ័កថា លោកបានត្រូវប្រោសឲ្យរស់ឡើងវិញ។—យ៉ូន. ២០:១៦-១៨
៦. តើសាវ័កប៉ូលបានបង្ហាញយ៉ាងណាថាគាត់គោរពស្ត្រី?
៦ សាវ័កប៉ូលបានរំលឹកធីម៉ូថេឲ្យផ្ដល់កិត្តិយសដល់ស្ត្រី។ ប៉ូលបានប្រាប់គាត់ឲ្យប្រព្រឹត្តទៅលើ‹ស្ត្រីវ័យចាស់ដូចម្ដាយ› និងប្រព្រឹត្តទៅលើ‹ស្ត្រីវ័យក្មេងដូចបងស្រី›។ (១ធី. ៥:១, ២) ប៉ូលបានជួយធីម៉ូថេយ៉ាងច្រើនដើម្បីឲ្យទៅជាគ្រិស្តសាសនិកដែលមានភាពចាស់ទុំ ប៉ុន្តែគាត់ទទួលស្គាល់ថាគឺម្ដាយនិងយាយរបស់ធីម៉ូថេដែលបានបង្រៀន«ឯកសារបរិសុទ្ធនានា»ដល់ធីម៉ូថេនៅដើមដំបូង។ (២ធី. ១:៥; ៣:១៤, ១៥) ក្នុងសំបុត្ររបស់ប៉ូលទៅកាន់បងប្អូននៅក្រុងរ៉ូម គាត់បានសួរសុខទុក្ខបងប្អូនស្រីដោយលើកឈ្មោះពួកគេ។ គាត់មិនគ្រាន់តែកត់សម្គាល់អំពីកិច្ចការដែលបងប្អូនស្រីបានធ្វើប៉ុណ្ណោះទេ ប៉ុន្តែគាត់ក៏មានចិត្តកតញ្ញូចំពោះកិច្ចការរបស់ពួកគេផងដែរ។—រ៉ូម ១៦:១-៤, ៦, ១២; ភី. ៤:៣
៧. តើយើងនឹងពិចារណាសំណួរអ្វីខ្លះនៅឥឡូវនេះ?
៧ ដូចបានបង្ហាញនៅវគ្គមុនៗ គម្ពីរមិនចែងថាបងប្អូនស្រីគឺអន់ជាងបងប្អូនប្រុសទេ។ បងប្អូនស្រីជួយក្រុមជំនុំច្រើនណាស់ ដោយបង្ហាញសេចក្ដីស្រឡាញ់និងចិត្តទូលាយ។ ពួកអ្នកចាស់ទុំត្រូវការជំនួយពីពួកគេដើម្បីធ្វើឲ្យក្រុមជំនុំមានសន្តិភាពនិងសាមគ្គីភាព។ ប៉ុន្តែគឺសំខាន់ដែលយើងរកចម្លើយចំពោះសំណួរខ្លះដូចជា៖ ហេតុអ្វីព្រះយេហូវ៉ាតម្រូវឲ្យបងប្អូនស្រីពាក់អ្វីលើក្បាលនៅពេលខ្លះ? ដោយសារមានតែបងប្អូនប្រុសប៉ុណ្ណោះដែលបានត្រូវតែងតាំងជាអ្នកចាស់ទុំនិងជំនួយការខាងកិច្ចបម្រើ តើនេះមានន័យថាបងប្អូនប្រុសទាំងអស់ជាប្រមុខរបស់បងប្អូនស្រីទាំងឡាយក្នុងក្រុមជំនុំឬ?
តើបងប្អូនប្រុសទាំងអស់ជាប្រមុខរបស់បងប្អូនស្រីទាំងឡាយឬទេ?
៨. យោងទៅតាមអេភេសូរ ៥:២៣ តើបងប្អូនប្រុសទាំងអស់ជាប្រមុខរបស់បងប្អូនស្រីទាំងឡាយឬទេ? សូមពន្យល់។
៨ និយាយឲ្យចំទៅគឺមិនមែនទេ! បងប្អូនប្រុសមិនមែនជាប្រមុខរបស់បងប្អូនស្រីទាំងអស់ក្នុងក្រុមជំនុំទេ តែគឺជាគ្រិស្តវិញ។ (សូមអាន អេភេសូរ ៥:២៣) ក្នុងក្រុមគ្រួសារ ប្ដីមានសិទ្ធិអំណាចលើប្រពន្ធ។ កូនប្រុសដែលបានទទួលការជ្រមុជទឹករួចហើយ មិនមែនជាប្រមុខរបស់ម្ដាយគាត់ទេ។ (អេភ. ៦:១, ២) ក្នុងក្រុមជំនុំ អ្នកចាស់ទុំមានអំណាចមួយកម្រិតលើបងប្អូនប្រុសស្រី។ (១ថែ. ៥:១២; ហេ. ១៣:១៧) បងប្អូនស្រីនៅលីវដែលលែងរស់នៅជាមួយឪពុកម្ដាយបន្តគោរពពួកគាត់និងអ្នកចាស់ទុំ។ ប៉ុន្តែដូចបងប្អូនប្រុសក្នុងក្រុមជំនុំដែរ បងប្អូនស្រីទាំងនោះមានប្រមុខតែម្នាក់គត់គឺលោកយេស៊ូ។
បងប្អូននៅលីវ ដែលចាកចេញពីឪពុកម្ដាយ នៅក្រោមប្រមុខភាពរបស់លោកយេស៊ូ (សូមមើលវគ្គ៨)
៩. ហេតុអ្វីបងប្អូនស្រីត្រូវពាក់អ្វីលើក្បាលនៅពេលខ្លះ?
៩ ពិតមែនថាព្រះយេហូវ៉ាបានតែងតាំងបុរសឲ្យនាំមុខក្នុងការបង្រៀននិងការគោរពប្រណិប័តន៍ក្នុងក្រុមជំនុំ តែលោកមិនបានឲ្យបងប្អូនស្រីមានសិទ្ធិអំណាចនោះទេ។ (១ធី. ២:១២) ហេតុអ្វី? មូលហេតុគឺដូចគ្នានឹងមូលហេតុដែលលោកបានតែងតាំងលោកយេស៊ូឲ្យធ្វើជាប្រមុខនៃបុរស គឺដើម្បីរក្សាឲ្យមានរបៀបរៀបរយក្នុងក្រុមគ្រួសាររបស់ព្រះ។ បើបងប្អូនស្រីត្រូវបំពេញតួនាទីដែលតាមធម្មតាជាតួនាទីរបស់បងប្អូនប្រុស នោះព្រះយេហូវ៉ាតម្រូវឲ្យគាត់ពាក់អ្វីមួយលើក្បាល។ * (១កូ. ១១:៤-៧) ព្រះយេហូវ៉ាបានសុំឲ្យបងប្អូនស្រីធ្វើដូច្នេះមិនមែនដើម្បីឲ្យពួកគេអាប់ឱនកិត្តិយសទេ ប៉ុន្តែដើម្បីផ្ដល់ឱកាសឲ្យពួកគេបង្ហាញការគោរពចំពោះប្រមុខភាពដែលលោកបានរៀបចំ។ ដោយគិតអំពីចំណុចទាំងនេះ យើងនឹងឆ្លើយសំណួរថា៖ តើប្រមុខគ្រួសារនិងអ្នកចាស់ទុំមានសិទ្ធិអំណាចដល់កម្រិតណា?
តួនាទីរបស់ប្រមុខគ្រួសារនិងអ្នកចាស់ទុំ
១០. ហេតុអ្វីអ្នកចាស់ទុំណាម្នាក់ប្រហែលជាចង់បង្កើតច្បាប់ឲ្យក្រុមជំនុំ?
១០ ពួកអ្នកចាស់ទុំស្រឡាញ់គ្រិស្ត ហើយពួកគេស្រឡាញ់«ចៀម»ដែលព្រះយេហូវ៉ានិងលោកយេស៊ូបានឲ្យពួកគេមើលថែរក្សា។ (យ៉ូន. ២១:១៥-១៧) ដោយមានបំណងល្អ អ្នកចាស់ទុំណាម្នាក់ប្រហែលជាចាត់ទុកខ្លួនជាឪពុកនៃក្រុមជំនុំ។ គាត់ប្រហែលជាសន្និដ្ឋានថាបើប្រមុខគ្រួសារមានសិទ្ធិបង្កើតច្បាប់ដើម្បីការពារក្រុមគ្រួសាររបស់គាត់ នោះអ្នកចាស់ទុំក៏អាចបង្កើតច្បាប់ដែលគាត់គិតថានឹងការពារចៀមរបស់ព្រះដែរ។ ម្យ៉ាងទៀត បងប្អូនខ្លះប្រហែលជាសុំពួកអ្នកចាស់ទុំឲ្យធ្វើការសម្រេចចិត្តជំនួសពួកគេ ហាក់ដូចជាពួកគេចង់ឲ្យអ្នកចាស់ទុំធ្វើជាប្រមុខរបស់ពួកគេ។ ប៉ុន្តែ តើពួកអ្នកចាស់ទុំក្នុងក្រុមជំនុំនិងប្រមុខគ្រួសារមានសិទ្ធិអំណាចដូចគ្នាឬទេ?
ពួកអ្នកចាស់ទុំ ជួយបងប្អូនក្នុងក្រុមជំនុំឲ្យមានចំណងមិត្តភាពជិតស្និទ្ធជាមួយព្រះយេហូវ៉ា និងទទួលសេចក្ដីស្រឡាញ់។ ព្រះយេហូវ៉ាបានឲ្យពួកអ្នកចាស់ទុំមានភារកិច្ចរក្សាភាពស្អាតស្អំខាងសីលធម៌ក្នុងក្រុមជំនុំ (សូមមើលវគ្គ១១-១២)
១១. តើប្រមុខគ្រួសារនិងអ្នកចាស់ទុំមានភាពស្រដៀងគ្នាអ្វីខ្លះ?
១១ សាវ័កប៉ូលបង្ហាញថាមានភាពស្រដៀងគ្នាខ្លះរវាងប្រមុខគ្រួសារនិងអ្នកចាស់ទុំ។ (១ធី. ៣:៤, ៥) ជាឧទាហរណ៍ ព្រះយេហូវ៉ាចង់ឲ្យសមាជិកគ្រួសារស្ដាប់បង្គាប់ប្រមុខគ្រួសារ។ (កូឡ. ៣:២០) លោកក៏ចង់ឲ្យបងប្អូនក្នុងក្រុមជំនុំ ស្ដាប់បង្គាប់ពួកអ្នកចាស់ទុំដែរ។ ម្យ៉ាងទៀត ព្រះយេហូវ៉ាតម្រូវឲ្យទាំងប្រមុខគ្រួសារ ទាំងអ្នកចាស់ទុំ ធ្វើឲ្យប្រាកដថាពួកអ្នកដែលនៅក្រោមការមើលថែរបស់ពួកគេមានជំនឿរឹងមាំ។ ពួកអ្នកចាស់ទុំនិងប្រមុខគ្រួសារក៏យកចិត្តទុកដាក់ចំពោះសេចក្ដីត្រូវការខាងផ្លូវចិត្តរបស់ពួកអ្នកដែលនៅក្រោមអំណាចរបស់ពួកគេ។ មួយវិញទៀត ដូចប្រមុខគ្រួសារដ៏ល្អ អ្នកចាស់ទុំធ្វើឲ្យប្រាកដថា ពួកអ្នកដែលនៅក្រោមការថែទាំរបស់ពួកគេទទួលជំនួយពេលមានបញ្ហា។ (យ៉ា. ២:១៥-១៧) បន្ថែមទៅទៀត ព្រះយេហូវ៉ាតម្រូវឲ្យអ្នកចាស់ទុំនិងប្រមុខគ្រួសារលើកស្ទួយខ្នាតតម្រារបស់លោក ហើយមិន«ធ្វើលើសពីអ្វីដែលបានត្រូវសរសេរទុក»ក្នុងគម្ពីរ។—១កូ. ៤:៦
ប្រមុខគ្រួសារ បានទទួលសិទ្ធិអំណាចពីព្រះយេហូវ៉ាឲ្យនាំមុខក្រុមគ្រួសាររបស់ពួកគេ។ មុនធ្វើការសម្រេចចិត្ត ប្រមុខគ្រួសារដែលប្រកបដោយសេចក្ដីស្រឡាញ់នឹងពិភាក្សាជាមួយប្រពន្ធសិន (សូមមើលវគ្គ១៣)
១២-១៣. ដូចបានបង្ហាញនៅរ៉ូម ៧:២ តើមានភាពខុសគ្នាអ្វីរវាងប្រមុខគ្រួសារនិងពួកអ្នកចាស់ទុំ?
១២ ពួកអ្នកចាស់ទុំនិងប្រមុខគ្រួសារក៏មានភាពខុសគ្នាដែរ។ ជាឧទាហរណ៍ ព្រះយេហូវ៉ាបានតែងតាំងពួកអ្នកចាស់ទុំឲ្យធ្វើជាអ្នកវិនិច្ឆ័យ ហើយលោកបានឲ្យពួកគេមានភារកិច្ចដកអ្នកប្រព្រឹត្តអំពើខុសឆ្គងដែលមិនប្រែចិត្ត ចេញពីក្រុមជំនុំ។—១កូ. ៥:១១-១៣
១៣ ក៏ប៉ុន្តែ ព្រះយេហូវ៉ាបានឲ្យសិទ្ធិអំណាចខ្លះដល់ប្រមុខគ្រួសារដែលលោកមិនបានឲ្យដល់ពួកអ្នកចាស់ទុំ។ ជាឧទាហរណ៍ លោកបានឲ្យប្រមុខគ្រួសារមានសិទ្ធិបង្កើតច្បាប់ចំពោះក្រុមគ្រួសាររបស់គាត់ ហើយធ្វើឲ្យប្រាកដថាពួកគេធ្វើតាមច្បាប់ទាំងនោះ។ (សូមអាន រ៉ូម ៧:២) ប្រមុខគ្រួសារមានសិទ្ធិសម្រេចចិត្តថា ម៉ោងណាដែលកូនរបស់គាត់គួរមកដល់ផ្ទះវិញនៅពេលយប់។ គាត់ក៏មានសិទ្ធិប្រដៅកូនរបស់គាត់ បើពួកគេមិនធ្វើតាមច្បាប់នោះ។ (អេភ. ៦:១) ប្រមុខគ្រួសារដែលប្រកបដោយសេចក្ដីស្រឡាញ់ច្បាស់ជានឹងពិភាក្សាជាមួយប្រពន្ធមុនគាត់បង្កើតច្បាប់ក្នុងផ្ទះ ដោយសារពួកគេទាំងពីរនាក់ជា«សាច់ឈាមតែមួយ»។ *—ម៉ាថ. ១៩:៦
ចូរគោរពគ្រិស្តជាប្រមុខក្រុមជំនុំ
លោកយេស៊ូ ផ្ដល់ការណែនាំដល់ក្រុមជំនុំគ្រិស្តសាសនិកក្រោមប្រមុខភាពរបស់ព្រះយេហូវ៉ា (សូមមើលវគ្គ១៤)
១៤. (ក) សមស្របតាមអ្វីដែលបានចែងនៅម៉ាកុស ១០:៤៥ ហេតុអ្វីគឺសមត្រឹមត្រូវដែលព្រះយេហូវ៉ាបានតែងតាំងលោកយេស៊ូឲ្យធ្វើជាប្រមុខនៃក្រុមជំនុំ? (ខ) តើគណៈអភិបាលមានតួនាទីអ្វី? (សូមមើលប្រអប់ដែលមានចំណងជើងថា« តើគណៈអភិបាលមានតួនាទីអ្វី?»)
១៤ តាមរយៈថ្លៃលោះ ព្រះយេហូវ៉ាបានទិញបុគ្គលម្នាក់ៗក្នុងក្រុមជំនុំ។ (សូមអាន ម៉ាកុស ១០:៤៥; សកម្ម. ២០:២៨; ១កូ. ១៥:២១, ២២) ដូច្នេះគឺសមត្រឹមត្រូវដែលព្រះយេហូវ៉ាបានតែងតាំងលោកយេស៊ូជាអ្នកដែលបានប្រគល់ជីវិតខ្លួនជាថ្លៃលោះ ឲ្យធ្វើជាប្រមុខនៃក្រុមជំនុំ។ ក្នុងនាមជាប្រមុខរបស់យើង លោកយេស៊ូមានសិទ្ធិបង្កើតច្បាប់ចំពោះបុគ្គលម្នាក់ៗ ក្រុមគ្រួសារ និងក្រុមជំនុំទាំងមូលអំពីអ្វីដែលពួកគេគួរធ្វើ ហើយលោកមានសិទ្ធិធ្វើឲ្យប្រាកដថាយើងទាំងអស់គ្នាធ្វើតាមច្បាប់ទាំងនោះ។ (កាឡ. ៦:២) ប៉ុន្តែលោកយេស៊ូមិនគ្រាន់តែបង្កើតច្បាប់ប៉ុណ្ណោះទេ លោកក៏ចិញ្ចឹមនិងស្រឡាញ់ថ្នាក់ថ្នមយើងម្នាក់ៗដែរ។—អេភ. ៥:២៩
១៥-១៦. តើអ្នករៀនអ្វីពីពាក្យសម្ដីរបស់បងម៉ាលីនិងបងបេនយ៉ាមីន?
១៥ បងប្អូនស្រីបង្ហាញថាពួកគេគោរពគ្រិស្ត ដោយធ្វើតាមការណែនាំពីបងប្អូនប្រុសដែលលោកបានតែងតាំងឲ្យថែរក្សាពួកគេ។ បងស្រីម៉ាលីដែលរស់នៅសហរដ្ឋអាម៉េរិកមានអារម្មណ៍ដូចបងស្រីជាច្រើននាក់ទៀត ពេលគាត់និយាយថា៖ «ខ្ញុំពិតជាឲ្យតម្លៃចំពោះតួនាទីរបស់ខ្ញុំជាប្រពន្ធនិងជាបងស្រីក្នុងក្រុមជំនុំ។ តែខ្ញុំត្រូវបន្តខំព្យាយាមជានិច្ចដើម្បីមានទស្សនៈត្រឹមត្រូវចំពោះការរៀបចំរបស់ព្រះយេហូវ៉ាអំពីប្រមុខភាព។ ប្ដីខ្ញុំនិងបងប្អូនប្រុសក្នុងក្រុមជំនុំគោរពខ្ញុំនិងបង្ហាញចិត្តកតញ្ញូចំពោះកិច្ចការដែលខ្ញុំធ្វើ នោះធ្វើឲ្យខ្ញុំស្រួលបង្ហាញការគោរពចំពោះសិទ្ធិអំណាចរបស់ពួកគាត់ជាង»។
១៦ បងប្អូនប្រុសបង្ហាញថាពួកគេយល់អំពីការរៀបចំរបស់ព្រះស្ដីអំពីប្រមុខភាព ដោយគោរពនិងលើកកិត្តិយសបងប្អូនស្រី។ បងប្រុសបេនយ៉ាមីនដែលរស់នៅប្រទេសអង់គ្លេសនិយាយថា៖ «ខ្ញុំបានរៀនច្រើនពីចម្លើយរបស់បងប្អូនស្រីនៅកិច្ចប្រជុំនិងពីយោបល់របស់ពួកគេអំពីរបៀបបង្រៀនគម្ពីរ ព្រមទាំងរបៀបមានប្រសិទ្ធភាពក្នុងកិច្ចបម្រើផ្សាយ។ ខ្ញុំគិតថាកិច្ចការដែលពួកគេធ្វើពិតជាមានតម្លៃខ្លាំងណាស់»។
១៧. ហេតុអ្វីយើងគួរចុះចូលចំពោះការរៀបចំអំពីប្រមុខភាព?
១៧ ពេលគ្រប់គ្នានៅក្នុងក្រុមជំនុំ មិនថាបុរស ស្ត្រី ប្រមុខគ្រួសារ និងពួកអ្នកចាស់ទុំ យល់និងចុះចូលចំពោះការរៀបចំអំពីប្រមុខភាព នោះក្រុមជំនុំមានសន្តិភាព។ សំខាន់ជាងនេះទៅទៀត យើងធ្វើឲ្យព្រះយេហូវ៉ាដែលជាបិតានៅស្ថានសួគ៌ដែលប្រកបដោយសេចក្ដីស្រឡាញ់ទទួលការសរសើរ។—ទំនុក. ១៥០:៦
ចម្រៀងលេខ១២៣ ចុះចូលដោយស្មោះក្រោមការរៀបចំរបស់ព្រះ
^ វគ្គ 5 តើបងប្អូនស្រីមានតួនាទីអ្វីក្នុងក្រុមជំនុំ? តើបងប្អូនប្រុសទាំងអស់ជាប្រមុខរបស់បងប្អូនស្រីទាំងឡាយឬទេ? តើអ្នកចាស់ទុំនិងប្រមុខគ្រួសារមានសិទ្ធិអំណាចដូចគ្នាឬទេ? ក្នុងអត្ថបទនេះ យើងនឹងឃើញចម្លើយពីគម្ពីរចំពោះសំណួរទាំងនេះ។
^ វគ្គ 5 សូមមើលវគ្គ៦ក្នុងអត្ថបទដែលមានចំណងជើងថា«ចូរគាំទ្របងប្អូនស្រីគ្រិស្តសាសនិក» ដែលបោះពុម្ពផ្សាយក្នុងទស្សនាវដ្ដីប៉មយាម ខែកញ្ញា ឆ្នាំ២០២០។
^ វគ្គ 9 សូមមើលប្រអប់ដែលមានចំណងជើងថា« តើបងប្អូនស្រីគួរពាក់អ្វីលើក្បាលនៅពេលណាខ្លះ?»។
^ វគ្គ 13 ដើម្បីអានការពន្យល់អំពីអ្នកណាគួរសម្រេចចិត្តថាក្រុមគ្រួសារនឹងទៅក្រុមជំនុំមួយណា សូមមើលវគ្គ១៧-១៩នៃអត្ថបទដែលមានចំណងជើងថា«ចូរឲ្យតម្លៃចំពោះតួនាទីរបស់អ្នកឯទៀតក្នុងក្រុមជំនុំព្រះយេហូវ៉ា» ដែលបានបោះពុម្ពផ្សាយក្នុងទស្សនាវដ្ដីប៉មយាម ខែសីហា ឆ្នាំ២០២០។
^ វគ្គ 59 ដើម្បីទទួលព័ត៌មានថែមទៀតអំពីរឿងនេះ សូមមើលសៀវភៅ«ចូររក្សាខ្លួនជាមនុស្សដែលព្រះស្រឡាញ់» ទំព័រ២៣៩-២៤២។
^ វគ្គ 64 ដើម្បីទទួលព័ត៌មានថែមទៀតអំពីតួនាទីរបស់គណៈអភិបាល សូមមើលទស្សនាវដ្ដីប៉មយាម ថ្ងៃទី១៥ ខែកក្កដា ឆ្នាំ២០១៣ ទំព័រ២០-២៥។
