អត្ថបទសិក្សា ៥
«ប្រមុខរបស់បុរសទាំងឡាយគឺគ្រិស្ត»
«ប្រមុខរបស់បុរសទាំងឡាយគឺគ្រិស្ត»។—១កូ. ១១:៣
ចម្រៀងលេខ១២ ព្រះយេហូវ៉ាខ្លាំងក្លាមហិមា
សេចក្ដីសង្ខេប *
១. តើអ្វីខ្លះអាចមានឥទ្ធិពលទៅលើរបៀបដែលបុរសប្រព្រឹត្តចំពោះប្រពន្ធកូន?
ចំពោះអ្នក តើពាក្យ«ប្រមុខភាព»មានអត្ថន័យយ៉ាងណា? បុរសខ្លះឲ្យវប្បធម៌ ទំនៀមទម្លាប់ ឬប្រវត្តិគ្រួសារមានឥទ្ធិពលទៅលើរបៀបដែលពួកគេប្រព្រឹត្តចំពោះប្រពន្ធកូន។ បងស្រីយ៉ានីតាដែលរស់នៅទ្វីបអឺរ៉ុប និយាយថា៖ «នៅកន្លែងដែលខ្ញុំរស់នៅ មនុស្សជឿជាក់ថាស្ត្រីអន់ជាងបុរស ហើយគួរចាត់ទុកស្ត្រីជាអ្នកបម្រើ»។ បងប្រុសម្នាក់ឈ្មោះលូកដែលរស់នៅសហរដ្ឋអាម៉េរិក និយាយថា៖ «ឪពុកខ្លះបង្រៀនកូនប្រុសពួកគេថា បុរសមិនចាំបាច់យកមតិយោបល់របស់ស្ត្រីទេ ហើយថាស្ត្រីគួរនៅស្ងៀមស្ងាត់»។ ប៉ុន្តែ ព្រះយេហូវ៉ាមិនចង់ឲ្យបុរសប្រព្រឹត្តបែបនេះចំពោះប្រពន្ធទេ។ (សូមពិនិត្យបន្ថែម ម៉ាកុស ៧:១៣) ដូច្នេះ តើបុរសអាចរៀនឲ្យធ្វើជាប្រមុខគ្រួសារដ៏ល្អយ៉ាងដូចម្ដេច?
២. តើប្រមុខគ្រួសារត្រូវដឹងអំពីអ្វីខ្លះ ហើយហេតុអ្វី?
២ ដើម្បីទៅជាប្រមុខគ្រួសារដ៏ល្អ ដំបូងបុរសម្នាក់ត្រូវយល់ថាព្រះយេហូវ៉ាចង់ឲ្យគាត់ធ្វើអ្វី។ គាត់ក៏ត្រូវដឹងអំពីមូលហេតុដែលព្រះយេហូវ៉ារៀបចំឲ្យមានប្រមុខភាព ហើយរបៀបដែលគាត់អាចធ្វើតាមគំរូរបស់ព្រះយេហូវ៉ានិងលោកយេស៊ូ។ ហេតុអ្វីគឺសំខាន់ដែលបុរសដឹងអំពីអ្វីទាំងនេះ? ពីព្រោះព្រះយេហូវ៉ាឲ្យប្រមុខគ្រួសារមានអំណាចមួយកម្រិត ហើយលោកតម្រូវឲ្យពួកគេចេះប្រើអំណាចនោះយ៉ាងល្អ។—លូក. ១២:៤៨ខ
តើអ្វីជាប្រមុខភាព?
៣. តើយើងរៀនអ្វីអំពីប្រមុខភាពពីកូរិនថូសទី១ ១១:៣?
៣ សូមអាន កូរិនថូសទី១ ១១:៣។ ខគម្ពីរនេះរៀបរាប់អំពីរបៀបរៀបចំរបស់ព្រះយេហូវ៉ាចំពោះក្រុមគ្រួសាររបស់លោកនៅទូទាំងសកលលោក។ ប្រមុខភាពរួមបញ្ចូលអ្វីដ៏សំខាន់ពីរគឺអំណាចនិងការទទួលខុសត្រូវ។ ព្រះយេហូវ៉ាគឺជា«ប្រមុខ»ឬជាបុគ្គលដែលមានអំណាចខ្លាំងបំផុត ហើយកូនៗទាំងអស់របស់លោក ទាំងទេវតាទាំងមនុស្ស ត្រូវទទួលខុសត្រូវចំពោះលោក។ (រ៉ូម ១៤:១០; អេភ. ៣:១៤, ១៥) ព្រះយេហូវ៉ាបានឲ្យលោកយេស៊ូមានអំណាចលើក្រុមជំនុំ ប៉ុន្តែលោកយេស៊ូត្រូវទទួលខុសត្រូវចំពោះព្រះយេហូវ៉ាស្ដីអំពីរបៀបដែលលោកប្រព្រឹត្តទៅលើយើង។ (១កូ. ១៥:២៧) ព្រះយេហូវ៉ាក៏បានឲ្យប្ដីមានអំណាចលើប្រពន្ធកូន ប៉ុន្តែប្ដីត្រូវទទួលខុសត្រូវចំពោះព្រះយេហូវ៉ានិងលោកយេស៊ូ ស្ដីអំពីរបៀបដែលគាត់ប្រព្រឹត្តទៅលើក្រុមគ្រួសារ។—១ពេ. ៣:៧
៤. តើព្រះយេហូវ៉ានិងលោកយេស៊ូមានសិទ្ធិអ្វី?
៤ ក្នុងនាមជាប្រមុខនៃក្រុមគ្រួសារទូទាំងសកលលោក ព្រះយេហូវ៉ាមានសិទ្ធិបង្កើតច្បាប់អំពីការប្រព្រឹត្តរបស់កូនៗលោក ហើយលោកអាចតម្រូវឲ្យពួកគេធ្វើតាមច្បាប់ទាំងនោះ។ (អេ. ៣៣:២២) ក្នុងនាមជាប្រមុខក្រុមជំនុំគ្រិស្តសាសនិក លោកយេស៊ូក៏មានសិទ្ធិបង្កើតច្បាប់ ហើយអាចតម្រូវឲ្យអ្នកឯទៀតធ្វើតាមច្បាប់ទាំងនោះ។—កាឡ. ៦:២; កូឡ. ១:១៨-២០
៥. តើប្រមុខគ្រួសារដែលជាគ្រិស្តសាសនិកមានសិទ្ធិអំណាចអ្វី តែតើនោះដល់កម្រិតណា?
៥ ដូចព្រះយេហូវ៉ានិងលោកយេស៊ូ ប្រមុខគ្រួសារដែលជាគ្រិស្តសាសនិកមានសិទ្ធិបង្កើតច្បាប់ចំពោះក្រុមគ្រួសាររបស់គាត់។ (រ៉ូម ៧:២; អេភ. ៦:៤) ប៉ុន្តែ សិទ្ធិអំណាចរបស់គាត់មានកម្រិត។ ជាឧទាហរណ៍ ច្បាប់របស់គាត់គួរតែមានមូលដ្ឋានលើគោលការណ៍ក្នុងបណ្ដាំរបស់ព្រះ។ (សុភ. ៣:៥, ៦) ប្រមុខគ្រួសារមិនមានសិទ្ធិបង្កើតច្បាប់ចំពោះពួកអ្នកដែលមិនមែនជាសមាជិកក្រុមគ្រួសាររបស់គាត់ទេ។ (រ៉ូម ១៤:៤) ម្យ៉ាងទៀត ពេលកូនប្រុសកូនស្រីរបស់គាត់ធំឡើង ហើយចាកចេញពីផ្ទះ ពួកគេបន្តគោរពគាត់ តែគាត់លែងជាប្រមុខរបស់ពួកគេទៀតហើយ។—ម៉ាថ. ១៩:៥
ហេតុអ្វីព្រះយេហូវ៉ាបានរៀបចំឲ្យមានប្រមុខភាព?
៦. ហេតុអ្វីព្រះយេហូវ៉ាបានរៀបចំឲ្យមានប្រមុខភាព?
៦ ព្រះយេហូវ៉ាបានរៀបចំឲ្យមានប្រមុខភាព ដោយសារលោកស្រឡាញ់ក្រុមគ្រួសាររបស់លោក។ នេះគឺជាអំណោយមួយពីលោក។ ប្រមុខភាពធ្វើឲ្យក្រុមគ្រួសាររបស់ព្រះយេហូវ៉ាមានរបៀបរៀបរយនិងសេចក្ដីសុខសាន្ត។ (១កូ. ១៤:៣៣, ៤០) បើមិនមានការណែនាំច្បាស់លាស់ថាអ្នកណាជាប្រមុខ នោះក្រុមគ្រួសាររបស់ព្រះយេហូវ៉ានឹងមិនសប្បាយ ហើយខ្វះសណ្ដាប់ធ្នាប់។ ជាឧទាហរណ៍ យើងនឹងមិនដឹងថាអ្នកណាគួរធ្វើការសម្រេចចិត្ត និងអ្នកណាគួរនាំមុខក្នុងការធ្វើតាមការសម្រេចចិត្តទាំងនោះ។
៧. តើអេភេសូរ ៥:២៥, ២៨ ចែងថាព្រះយេហូវ៉ាចង់ឲ្យបុរសប្រព្រឹត្តយ៉ាងណាទៅលើប្រពន្ធ?
៧ បើការរៀបចំរបស់ព្រះអំពីប្រមុខភាពគឺជាអ្វីដ៏ល្អ ហេតុអ្វីស្ត្រីជាច្រើននៅសព្វថ្ងៃនេះមានអារម្មណ៍ថាប្ដីរបស់ពួកគេត្រួតត្រានិងជិះជាន់ពួកគេ? នេះគឺដោយសារបុរសជាច្រើនមិនអើពើនឹងខ្នាតតម្រារបស់ព្រះយេហូវ៉ាចំពោះក្រុមគ្រួសារ តែធ្វើតាមទំនៀមទម្លាប់ឬវប្បធម៌របស់ពួកគេទៅវិញ។ ពួកគេក៏ប្រហែលជាប្រព្រឹត្តអាក្រក់ទៅលើប្រពន្ធដើម្បីបំពេញចិត្តខ្លួនឯង។ ជាឧទាហរណ៍ ប្ដីប្រហែលជាត្រួតត្រាលើប្រពន្ធដើម្បីលើកខ្លួនថាសំខាន់ជាង ឬបង្ហាញអ្នកឯទៀតថាគាត់ជាបុរសពិត។ គាត់ប្រហែលជាគិតថា គាត់មិនអាចបង្ខំប្រពន្ធឲ្យស្រឡាញ់គាត់បានទេ តែគាត់អាចធ្វើឲ្យប្រពន្ធខ្លាចគាត់បាន។ ដូច្នេះ គាត់ប្រហែលជាធ្វើឲ្យប្រពន្ធខ្លាចគាត់ដើម្បីគាត់អាចគ្រប់គ្រងលើនាង។ * ការគិតគូរនិងការប្រព្រឹត្តបែបនេះ មិនលើកកិត្តិយសនិងមិនបង្ហាញការគោរពចំពោះស្ត្រីដូចដែលពួកគេសមនឹងទទួលទេ ហើយក៏ផ្ទុយស្រឡះពីបំណងចិត្តរបស់ព្រះយេហូវ៉ាដែរ។—សូមអាន អេភេសូរ ៥:២៥, ២៨
តើបុរសអាចរៀនធ្វើជាប្រមុខគ្រួសារដ៏ល្អយ៉ាងដូចម្ដេច?
៨. តើបុរសអាចរៀនឲ្យធ្វើជាប្រមុខគ្រួសារដ៏ល្អយ៉ាងដូចម្ដេច?
៨ បុរសអាចរៀនឲ្យធ្វើជាប្រមុខគ្រួសារដ៏ល្អ ដោយធ្វើតាមគំរូរបស់ព្រះយេហូវ៉ានិងលោកយេស៊ូអំពីការប្រើអំណាច។ សូមគិតអំពីគុណសម្បត្តិពីរដែលព្រះយេហូវ៉ានិងលោកយេស៊ូបង្ហាញ ហើយរបៀបដែលប្រមុខគ្រួសារអាចបង្ហាញគុណសម្បត្តិទាំងនេះក្នុងការប្រព្រឹត្តរបស់គាត់ទៅលើប្រពន្ធកូន។
៩. តើព្រះយេហូវ៉ាបង្ហាញចិត្តរាបទាបតាមរបៀបណា?
៩ ចិត្តរាបទាប។ ព្រះយេហូវ៉ាគឺជាបុគ្គលដែលមានប្រាជ្ញាលើសជាងបុគ្គលណាទាំងអស់ តែលោកស្ដាប់មតិយោបល់របស់អ្នកបម្រើលោក។ (លោ. ១៨:២៣, ២៤, ៣២) លោកបានអនុញ្ញាតឲ្យពួកអ្នកដែលនៅក្រោមអំណាចរបស់លោកបញ្ចេញយោបល់។ (១ព. ២២:១៩-២២) ព្រះយេហូវ៉ាគឺល្អឥតខ្ចោះ តែលោកមិនតម្រូវឲ្យយើងធ្វើជាមនុស្សល្អឥតខ្ចោះទេ។ ផ្ទុយទៅវិញ លោកជួយអ្នកបម្រើរបស់លោកដែលមិនល្អឥតខ្ចោះឲ្យទទួលជោគជ័យ។ (ទំនុក. ១១៣:៦, ៧) តាមពិត គម្ពីរថែមទាំងចែងថាព្រះយេហូវ៉ាជា«អ្នកជួយ»។ (ទំនុក. ២៧:៩; ហេ. ១៣:៦) ស្ដេចដាវីឌទទួលស្គាល់ថា គាត់អាចសម្រេចកិច្ចការដ៏ធំដែលគាត់បានទទួល ដោយសារតែចិត្តស្រទន់ឬចិត្តរាបទាបរបស់ព្រះយេហូវ៉ា។—២សាំ. ២២:៣៦
១០. តើលោកយេស៊ូបានបង្ហាញចិត្តរាបទាបយ៉ាងដូចម្ដេច?
១០ សូមគិតអំពីគំរូរបស់លោកយេស៊ូ។ ទោះជាលោកជាលោកម្ចាស់របស់ពួកអ្នកកាន់តាមក្ដី លោកបានលាងជើងឲ្យពួកគេ។ ហេតុអ្វីកំណត់ហេតុនេះបានត្រូវកត់ទុកក្នុងគម្ពីរ? មូលហេតុមួយគឺដើម្បីទុកជាគំរូឲ្យប្រមុខគ្រួសារនិងអ្នកឯទៀតធ្វើតាម។ លោកយេស៊ូបានមានប្រសាសន៍ថា៖ «ខ្ញុំបានធ្វើគំរូឲ្យអ្នករាល់គ្នា ដើម្បីឲ្យអ្នករាល់គ្នាធ្វើអ្វីដែលខ្ញុំបានធ្វើដល់អ្នករាល់គ្នា»។ (យ៉ូន. ១៣:១២-១៧) ទោះជាលោកយេស៊ូមានអំណាចខ្លាំងក្លាក្ដី លោកមិនតម្រូវឲ្យអ្នកឯទៀតបម្រើលោកទេ តែលោកបានបម្រើគេវិញ។—ម៉ាថ. ២០:២៨
ប្រមុខគ្រួសារអាចបង្ហាញចិត្តរាបទាបនិងសេចក្ដីស្រឡាញ់ ដោយធ្វើកិច្ចការផ្ទះនិងដោយបំពេញសេចក្ដីត្រូវការរបស់ក្រុមគ្រួសារគាត់ខាងការគោរពប្រណិប័តន៍ (សូមមើលវគ្គ១១, ១៣)
១១. តើប្រមុខគ្រួសារអាចរៀនអ្វីអំពីចិត្តរាបទាបពីគំរូរបស់ព្រះយេហូវ៉ានិងលោកយេស៊ូ?
១១ មេរៀនសម្រាប់យើង។ ប្រមុខគ្រួសារអាចបង្ហាញចិត្តរាបទាបតាមរបៀបជាច្រើន។ ជាឧទាហរណ៍ គាត់មិនតម្រូវឲ្យប្រពន្ធកូនរបស់គាត់ធ្វើជាមនុស្សល្អឥតខ្ចោះទេ។ គាត់ស្ដាប់មតិយោបល់របស់សមាជិកក្រុមគ្រួសារ ទោះជានោះមិនសមស្របនឹងទស្សនៈរបស់គាត់ក្ដី។ បងស្រីម៉ាលីដែលរស់នៅសហរដ្ឋអាម៉េរិកនិយាយថា៖ «ជួនកាល ខ្ញុំនិងប្ដីខ្ញុំមានគំនិតផ្សេងគ្នា។ ប៉ុន្តែ ខ្ញុំមានអារម្មណ៍ថាគាត់ឲ្យតម្លៃខ្ញុំនិងគោរពខ្ញុំ ដោយសារគាត់សុំមតិយោបល់ពីខ្ញុំ ហើយយកមតិយោបល់នោះមកគិតពិចារណា មុនគាត់ធ្វើការសម្រេចចិត្ត»។ ម្យ៉ាងទៀត ប្ដីដែលមានចិត្តរាបទាបសុខចិត្តធ្វើកិច្ចការផ្ទះ ទោះជានៅសហគមន៍ដែលគាត់រស់នៅ គេចាត់ទុកថាកិច្ចការនោះជាកិច្ចការស្ត្រីក៏ដោយ។ នេះប្រហែលជាមិនស្រួលចំពោះគាត់ទេ។ ហេតុអ្វី? បងស្រីម្នាក់ឈ្មោះរេឆឺលនិយាយថា៖ «នៅស្រុកខ្ញុំ បើប្ដីជួយប្រពន្ធលាងចានឬសម្អាតផ្ទះ អ្នកជិតខាងនិងសាច់ញាតិរបស់គាត់នឹងគិតថា គាត់មិនមែនជាបុរសពិតទេ។ ពួកគេក៏នឹងគិតថា គាត់មិនអាចគ្រប់គ្រងលើប្រពន្ធកូនដែរ»។ បើមនុស្សនៅតំបន់អ្នកមានទស្សនៈបែបនេះ សូមចាំថាលោកយេស៊ូបានលាងជើងអ្នកកាន់តាមលោក ទោះជានោះបានត្រូវគេចាត់ទុកថាជាកិច្ចការរបស់ខ្ញុំបម្រើក្ដី។ ប្រមុខគ្រួសារល្អមិនគិតអំពីការលើកខ្លួនឯងទេ ប៉ុន្តែគិតអំពីការធ្វើឲ្យប្រពន្ធកូនមានសេចក្ដីសុខ។ ក្រៅពីចិត្តរាបទាប តើប្រមុខគ្រួសារដ៏ល្អត្រូវមានគុណសម្បត្តិអ្វីទៀត?
១២. តើសេចក្ដីស្រឡាញ់ជំរុញព្រះយេហូវ៉ានិងលោកយេស៊ូឲ្យធ្វើអ្វី?
១២ សេចក្ដីស្រឡាញ់។ អ្វីៗទាំងអស់ដែលព្រះយេហូវ៉ាធ្វើគឺផុសចេញពីសេចក្ដីស្រឡាញ់។ (១យ៉ូន. ៤:៧, ៨) លោកបង្ហាញថាលោកស្រឡាញ់យើង ហើយចង់ឲ្យយើងធ្វើជាមិត្តសម្លាញ់របស់លោក ដោយផ្ដល់ឲ្យយើងគម្ពីរនិងអង្គការរបស់លោក។ លោកផ្គត់ផ្គង់សេចក្ដីត្រូវការខាងផ្លូវចិត្តរបស់យើង ដោយធ្វើឲ្យយើងជឿជាក់ថាលោកស្រឡាញ់យើង។ ចុះយ៉ាងណាអំពីសេចក្ដីត្រូវការប្រចាំថ្ងៃរបស់យើង? ព្រះយេហូវ៉ា«ផ្គត់ផ្គង់អ្វីៗទាំងអស់ដល់យើង ដើម្បីឲ្យយើងបានសប្បាយ»។ (១ធី. ៦:១៧) ពេលយើងធ្វើខុស លោកកែតម្រង់យើង តែលោកមិនឈប់ស្រឡាញ់យើងទេ។ ដោយសារព្រះយេហូវ៉ាស្រឡាញ់យើង លោកបានផ្ដល់ថ្លៃលោះឲ្យយើង។ លោកយេស៊ូក៏ស្រឡាញ់យើងខ្លាំងដល់ម្ល៉េះបានជាលោកឲ្យជីវិតរបស់លោកជាគ្រឿងបូជាដើម្បីយើង។ (យ៉ូន. ៣:១៦; ១៥:១៣) គ្មានអ្វីអាចកាត់ផ្ដាច់សេចក្ដីស្រឡាញ់ដែលព្រះយេហូវ៉ានិងលោកយេស៊ូមានចំពោះពួកអ្នកដែលស្មោះត្រង់នឹងលោកឡើយ។—យ៉ូន. ១៣:១; រ៉ូម ៨:៣៥, ៣៨, ៣៩
១៣. ហេតុអ្វីគឺសំខាន់ដែលប្រមុខគ្រួសារបង្ហាញសេចក្ដីស្រឡាញ់ចំពោះក្រុមគ្រួសារគាត់? (សូមមើលផងដែរនូវប្រអប់ដែលមានចំណងជើងថា « តើបុរសដែលទើបតែបានរៀបការអាចធ្វើអ្វីដើម្បីឲ្យប្រពន្ធគោរពគាត់?»)
១៣ មេរៀនសម្រាប់យើង។ អ្វីទាំងអស់ដែលប្រមុខគ្រួសារធ្វើគួរផុសចេញពីសេចក្ដីស្រឡាញ់។ ហេតុអ្វីនេះគឺសំខាន់ម្ល៉េះ? សាវ័កយ៉ូហានឆ្លើយថា៖ «អ្នកណាដែលមិនស្រឡាញ់បងប្អូន[ឬក្រុមគ្រួសារ]ដែលខ្លួនមើលឃើញ អ្នកនោះមិនអាចស្រឡាញ់ព្រះដែលខ្លួនមើលមិនឃើញឡើយ»។ (១យ៉ូន. ៤:១១, ២០) បុរសដែលស្រឡាញ់ក្រុមគ្រួសាររបស់គាត់ ហើយដែលចង់យកតម្រាប់ព្រះយេហូវ៉ានិងលោកយេស៊ូ នឹងបំពេញសេចក្ដីត្រូវការរបស់ក្រុមគ្រួសារគាត់ខាងការគោរពប្រណិប័តន៍ និងខាងផ្លូវចិត្ត ព្រមទាំងផ្គត់ផ្គង់សេចក្ដីត្រូវការប្រចាំថ្ងៃរបស់ពួកគេផងដែរ។ (១ធី. ៥:៨) គាត់នឹងបង្ហាត់បង្រៀននិងប្រៀនប្រដៅកូន។ គាត់ក៏នឹងតែងតែព្យាយាមធ្វើការសម្រេចចិត្តដែលលើកតម្កើងព្រះយេហូវ៉ានិងផ្ដល់ប្រយោជន៍ដល់ក្រុមគ្រួសារ។ សូមយើងគិតអំពីសេចក្ដីត្រូវការនីមួយៗនេះ ហើយឃើញរបៀបដែលប្រមុខគ្រួសារអាចយកតម្រាប់ព្រះយេហូវ៉ានិងលោកយេស៊ូ។
តើប្រមុខគ្រួសារគួរធ្វើអ្វី?
១៤. តើប្រមុខគ្រួសារជួយក្រុមគ្រួសាររបស់គាត់ឲ្យចូលទៅជិតព្រះយេហូវ៉ាយ៉ាងដូចម្ដេច?
១៤ ផ្គត់ផ្គង់សេចក្ដីត្រូវការរបស់ក្រុមគ្រួសារគាត់ខាងការគោរពប្រណិប័តន៍។ ដូចព្រះយេហូវ៉ា លោកយេស៊ូចង់ជួយអ្នកកាន់តាមលោកឲ្យរក្សាជំនឿមាំមួន។ (ម៉ាថ. ៥:៣, ៦; ម៉ាក. ៦:៣៤) ស្រដៀងគ្នាដែរ អ្វីដ៏សំខាន់បំផុតចំពោះប្រមុខគ្រួសារគឺជួយក្រុមគ្រួសារឲ្យចូលទៅជិតព្រះយេហូវ៉ា។ (ចោ. ៦:៦-៩) គាត់ធ្វើដូច្នេះ ដោយប្រាកដថាគាត់និងក្រុមគ្រួសាររបស់គាត់អាននិងសិក្សាបណ្ដាំរបស់ព្រះ ចូលរួមកិច្ចប្រជុំ ផ្សព្វផ្សាយដំណឹងល្អ ហើយរក្សាឲ្យមានចំណងមិត្តភាពជាមួយព្រះយេហូវ៉ា។
១៥. តើប្រមុខគ្រួសារអាចជួយក្រុមគ្រួសារឲ្យដឹងថាគាត់យកចិត្តទុកដាក់ចំពោះពួកគេយ៉ាងដូចម្ដេច?
១៥ បំពេញសេចក្ដីត្រូវការរបស់ក្រុមគ្រួសារគាត់ខាងផ្លូវចិត្ត។ ព្រះយេហូវ៉ាប្រាប់លោកយេស៊ូនៅមុខអ្នកឯទៀតថាលោកស្រឡាញ់លោកយេស៊ូ។ (ម៉ាថ. ៣:១៧) លោកយេស៊ូច្រើនតែបង្ហាញសេចក្ដីស្រឡាញ់ចំពោះអ្នកកាន់តាមលោក ដោយពាក្យសម្ដីនិងការប្រព្រឹត្តរបស់លោក ហើយពួកគេប្រាប់លោកថាពួកគេក៏ស្រឡាញ់លោកផងដែរ។ (យ៉ូន. ១៥:៩, ១២, ១៣; ២១:១៦) ប្រមុខគ្រួសារអាចបង្ហាញសេចក្ដីស្រឡាញ់ចំពោះប្រពន្ធកូនតាមរយៈអ្វីដែលគាត់ធ្វើ ដូចជាដោយសិក្សាគម្ពីរជាមួយពួកគេជាដើម។ គាត់ក៏គួរប្រាប់ពួកគេថាគាត់ស្រឡាញ់ពួកគេ ហើយថាពួកគេមានតម្លៃចំពោះគាត់។ ម្យ៉ាងទៀតពេលសមត្រឹមត្រូវ គាត់គួរសរសើរពួកគេនៅមុខអ្នកឯទៀតផងដែរ។—សុភ. ៣១:២៨, ២៩
ដើម្បីធ្វើឲ្យព្រះយេហូវ៉ាពេញចិត្ត ប្រមុខគ្រួសារត្រូវផ្គត់ផ្គង់សេចក្ដីត្រូវការប្រចាំថ្ងៃរបស់ក្រុមគ្រួសារគាត់ (សូមមើលវគ្គ១៦)
១៦. តើប្រមុខគ្រួសារត្រូវធ្វើអ្វីទៀត ហើយតើគាត់អាចរក្សាឲ្យមានតុល្យភាពក្នុងរឿងនេះតាមរបៀបណា?
១៦ ផ្គត់ផ្គង់សេចក្ដីត្រូវការប្រចាំថ្ងៃរបស់ក្រុមគ្រួសារគាត់។ សូម្បីតែនៅពេលដែលព្រះយេហូវ៉ាប្រៀនប្រដៅជនជាតិអ៊ីស្រាអែលដោយសារពួកគេមិនស្ដាប់បង្គាប់លោក ក៏លោកធ្វើឲ្យប្រាកដថាពួកគេមានអ្វីដែលពួកគេត្រូវការ។ (ចោ. ២:៧; ២៩:៥) នៅសព្វថ្ងៃនេះ លោកក៏ផ្គត់ផ្គង់សេចក្ដីត្រូវការប្រចាំថ្ងៃដ៏សំខាន់ចាំបាច់របស់យើងដែរ។ (ម៉ាថ. ៦:៣១-៣៣; ៧:១១) ស្រដៀងគ្នាដែរ លោកយេស៊ូបានផ្ដល់អាហារដល់ពួកអ្នកដែលទៅតាមលោក។ (ម៉ាថ. ១៤:១៧-២០) លោកក៏ធ្វើឲ្យមនុស្សជាច្រើនដែលឈឺជាសះស្បើយដែរ។ (ម៉ាថ. ៤:២៤) ដើម្បីធ្វើឲ្យព្រះយេហូវ៉ាពេញចិត្ត ប្រមុខគ្រួសារក៏ត្រូវផ្គត់ផ្គង់សេចក្ដីត្រូវការប្រចាំថ្ងៃរបស់ក្រុមគ្រួសារគាត់។ ប៉ុន្តែគាត់ត្រូវរក្សាតុល្យភាពក្នុងរឿងនេះ។ គាត់មិនគួរជាប់រវល់ខ្លាំងពេកក្នុងការផ្គត់ផ្គង់សេចក្ដីត្រូវការប្រចាំថ្ងៃរបស់ក្រុមគ្រួសារគាត់ រហូតដល់គាត់មិនបានបំពេញសេចក្ដីត្រូវការរបស់ក្រុមគ្រួសារខាងការគោរពប្រណិប័តន៍ព្រះនិងខាងផ្លូវចិត្តឡើយ។
១៧. តើព្រះយេហូវ៉ានិងលោកយេស៊ូទុកគំរូអ្វីក្នុងការបង្ហាត់បង្រៀននិងប្រៀនប្រដៅយើង?
១៧ បង្ហាត់បង្រៀនក្រុមគ្រួសាររបស់គាត់។ ព្រះយេហូវ៉ាបង្ហាត់បង្រៀននិងប្រៀនប្រដៅយើង ដោយសារលោកចង់ជួយយើង។ (ហេ. ១២:៧-៩) ដូចបិតាលោក លោកយេស៊ូបង្ហាត់បង្រៀនពួកអ្នកដែលនៅក្រោមអំណាចរបស់លោក ដោយសេចក្ដីស្រឡាញ់។ (យ៉ូន. ១៥:១៤, ១៥) លោកម៉ឺងម៉ាត់ តែសប្បុរស។ (ម៉ាថ. ២០:២៤-២៨) លោកយល់ថាយើងជាមនុស្សមិនល្អឥតខ្ចោះ ហើយថាយើងច្រើនតែធ្វើខុស។—ម៉ាថ. ២៦:៤១
១៨. តើប្រមុខគ្រួសារដ៏ល្អនឹកចាំអំពីអ្វី?
១៨ ប្រមុខគ្រួសារដែលយកតម្រាប់ព្រះយេហូវ៉ានិងលោកយេស៊ូចាំថា ប្រពន្ធនិងកូនរបស់គាត់មិនមែនជាមនុស្សល្អឥតខ្ចោះទេ។ ហេតុនេះ គាត់មិន«ក្រេវក្រោធ»នឹងប្រពន្ធឬកូនឡើយ។ (កូឡ. ៣:១៩) ផ្ទុយទៅវិញ គាត់ធ្វើតាមគោលការណ៍ដែលបានត្រូវកត់ទុកនៅកាឡាទី ៦:១ ហើយព្យាយាមកែតម្រង់ពួកគេ«ដោយចិត្តស្លូតបូត» ទាំងចាំថាគាត់ក៏ជាមនុស្សមិនល្អឥតខ្ចោះដែរ។ ដូចលោកយេស៊ូ គាត់ទទួលស្គាល់ថារបៀបដ៏ល្អបំផុតដើម្បីបង្រៀនអ្នកឯទៀត គឺតាមរយៈគំរូរបស់គាត់។—១ពេ. ២:២១
១៩-២០. ពេលធ្វើការសម្រេចចិត្ត តើប្រមុខគ្រួសារអាចយកតម្រាប់ព្រះយេហូវ៉ានិងលោកយេស៊ូយ៉ាងដូចម្ដេច?
១៩ ធ្វើការសម្រេចចិត្តដោយមិនរកប្រយោជន៍ខ្លួន។ ព្រះយេហូវ៉ាធ្វើការសម្រេចចិត្តដែលមានប្រយោជន៍ចំពោះអ្នកឯទៀត។ ជាឧទាហរណ៍ លោកបានសម្រេចចិត្តបង្កើតយើង មិនមែនដើម្បីជាប្រយោជន៍លោកទេ ប៉ុន្តែដោយសារលោកចង់ឲ្យយើងមានអំណរក្នុងការរស់នៅ។ គ្មានអ្នកណាបង្ខំលោកឲ្យប្រគល់បុត្ររបស់លោកដើម្បីគ្របបាំងការខុសឆ្គងរបស់យើងទេ។ ព្រះយេហូវ៉ាពេញចិត្តធ្វើការលះបង់នេះដើម្បីជាប្រយោជន៍យើង។ លោកយេស៊ូក៏បានធ្វើការសម្រេចចិត្តដែលមានប្រយោជន៍ជាពិសេសចំពោះអ្នកឯទៀត។ (រ៉ូម ១៥:៣) ជាឧទាហរណ៍ ទោះជាលោកយេស៊ូត្រូវការសម្រាកក្ដី លោកសម្រេចចិត្តបង្រៀនបណ្ដាជនវិញ។—ម៉ាក. ៦:៣១-៣៤
២០ ប្រមុខគ្រួសារដ៏ល្អដឹងថាអ្វីដ៏ពិបាកបំផុតមួយដែលគាត់ត្រូវធ្វើ គឺធ្វើការសម្រេចចិត្តដ៏ឈ្លាសវៃឲ្យក្រុមគ្រួសារគាត់ ហើយគាត់ចាត់ទុកភារកិច្ចនោះថាសំខាន់ណាស់។ គាត់ព្យាយាមជៀសវាងពីការធ្វើការសម្រេចចិត្តណាដែលគ្មានមូលហេតុល្អត្រឹមត្រូវ ឬដែលគ្រាន់តែតាមអារម្មណ៍របស់គាត់នៅពេលនោះប៉ុណ្ណោះ។ ផ្ទុយទៅវិញ គាត់អនុញ្ញាតឲ្យព្រះយេហូវ៉ាបង្ហាត់បង្រៀនគាត់។ * (សុភ. ២:៦, ៧) យ៉ាងនេះ គាត់នឹងគិតអំពីការរកប្រយោជន៍អ្នកឯទៀត មិនមែនប្រយោជន៍ខ្លួនឯងទេ។—ភី. ២:៤
២១. តើយើងនឹងពិចារណាអ្វីក្នុងអត្ថបទបន្ទាប់?
២១ ព្រះយេហូវ៉ាបានឲ្យប្រមុខគ្រួសារនូវភារកិច្ចដ៏ពិបាកមួយ ហើយលោកតម្រូវឲ្យពួកគេខំអស់ពីសមត្ថភាពដើម្បីបំពេញភារកិច្ចនោះ។ ប៉ុន្តែ បើប្ដីខំព្យាយាមធ្វើតាមគំរូរបស់ព្រះយេហូវ៉ានិងលោកយេស៊ូ គាត់នឹងធ្វើជាប្រមុខគ្រួសារដ៏ល្អ ហើយបើប្រពន្ធបំពេញតួនាទីរបស់គាត់ នោះអាពាហ៍ពិពាហ៍របស់ពួកគេនឹងមានសុភមង្គល។ តើប្រពន្ធគួរមានទស្សនៈយ៉ាងណាចំពោះប្រមុខភាព ហើយតើគាត់អាចមានការពិបាកអ្វីខ្លះ? សំណួរនេះនឹងត្រូវឆ្លើយក្នុងអត្ថបទបន្ទាប់។
ចម្រៀងលេខ១៦ ចូរសរសើរព្រះយេហូវ៉ាដែលបានរើសតាំងបុត្រលោក
^ វគ្គ 5 ពេលបុរសម្នាក់រៀបការ គាត់ទៅជាប្រមុខរបស់ក្រុមគ្រួសារថ្មីមួយ។ ក្នុងអត្ថបទនេះ យើងនឹងពិចារណាអំពីអ្វីជាប្រមុខភាព មូលហេតុដែលព្រះយេហូវ៉ាបានរៀបចំឲ្យមានប្រមុខភាព និងអ្វីដែលបុរសអាចរៀនពីគំរូរបស់ព្រះយេហូវ៉ានិងលោកយេស៊ូ។ ក្នុងអត្ថបទទី២ យើងនឹងពិចារណាអំពីអ្វីដែលប្ដីនិងប្រពន្ធអាចរៀនពីលោកយេស៊ូនិងគំរូឯទៀតក្នុងគម្ពីរ។ ក្នុងអត្ថបទទី៣ យើងនឹងពិចារណាអំពីប្រមុខភាពក្នុងក្រុមជំនុំ។
^ វគ្គ 7 ជួនកាលភាពយន្ត រឿងល្ខោន និងសៀវភៅតុក្កតាឆ្លុះបញ្ចាំងអំពីបុរសដែលធ្វើបាបប្រពន្ធ និងថែមទាំងប្រើអំពើហិង្សាទៅលើគាត់។ នេះធ្វើឲ្យមើលទៅទង្វើបែបនេះគឺជារឿងធម្មតា។ ដូច្នេះ បុគ្គលជាច្រើនប្រហែលជាគិតថាគឺមិនខុសទេ ដែលបុរសត្រួតត្រាលើប្រពន្ធ។
^ វគ្គ 20 ដើម្បីទទួលព័ត៌មានថែមទៀតអំពីរបៀបធ្វើការសម្រេចចិត្តល្អ សូមមើលអត្ថបទដែលមានចំណងជើងថា «ចូរធ្វើការសម្រេចចិត្តដែលលើកកិត្តិយសព្រះ» ដែលបានត្រូវបោះពុម្ពផ្សាយក្នុងទស្សនាវដ្ដីប៉មយាម ថ្ងៃទី១ ខែមេសា ឆ្នាំ២០១១ ទំព័រ ១៤-១៨។
