តើអ្នកចាំឬទេ?
តើអ្នកបានអានទស្សនាវដ្ដីប៉មយាមនៅឆ្នាំនេះដោយយកចិត្តទុកដាក់ឬទេ? សូមសាកឆ្លើយសំណួរដូចតទៅនេះ៖
តើយើងនឹងទទួលប្រយោជន៍យ៉ាងណាបើយើងចំណាយពេលនិយាយជាមួយព្រះយេហូវ៉ា ស្ដាប់លោក និងគិតអំពីលោក?
យើងនឹងធ្វើការសម្រេចចិត្តល្អជាង ទៅជាអ្នកបង្រៀនដ៏ល្អប្រសើរជាង មានជំនឿកាន់តែមាំមួនឡើង និងស្រឡាញ់ព្រះយេហូវ៉ាកាន់តែខ្លាំងឡើង។—w២២.០១ ទំ.៣០-៣១
តើយើងនឹងទទួលប្រយោជន៍យ៉ាងណាបើយើងរៀនឲ្យចេះមានទំនុកចិត្តទៅលើព្រះយេហូវ៉ា និងពួកអ្នកដែលលោកបានតែងតាំង?
ឥឡូវគឺជាពេលឲ្យរៀនទុកចិត្តថាព្រះយេហូវ៉ាតែងតែធ្វើអ្វីដែលត្រឹមត្រូវ ដោយមិនសង្ស័យលើការណែនាំឬការសម្រេចចិត្តរបស់ពួកអ្នកចាស់ទុំ។ ពេលគ្រាទុក្ខវេទនាជាខ្លាំងចាប់ផ្ដើម យើងនឹងឆាប់ធ្វើតាមការណែនាំ ទោះជានេះមើលទៅចម្លែក ឬមិនសមហេតុសមផលក្ដី។—w២២.០២ ទំ.៤-៦
តើទេវតាចង់មានន័យយ៉ាងណាពេលប្រាប់សាការីអំពី«ខ្សែប្រយោលនៅក្នុងដៃរបស់[អភិបាល]សេរ៉ូបាបិល»? (សាក. ៤:៨-១០)
ការបើកបង្ហាញឲ្យឃើញក្នុងគំនិតនេះពង្រឹងទំនុកចិត្តរាស្ត្ររបស់ព្រះថា វិហារសាមញ្ញនេះនឹងត្រូវសង់ឲ្យរួចរាល់ ហើយជាអ្វីដែលព្រះយេហូវ៉ាចង់បាន។—w២២.០៣ ទំ.១៦-១៧
តើយើងអាចធ្វើជា«គំរូល្អ . . . ក្នុងការនិយាយ»យ៉ាងដូចម្ដេច? (១ធី. ៤:១២)
យើងនិយាយដោយសប្បុរសនិងដោយគោរពក្នុងកិច្ចបម្រើផ្សាយ ច្រៀងដោយអស់ពីចិត្ត ឆ្លើយជាទៀងទាត់នៅកិច្ចប្រជុំ និយាយការពិត និងនិយាយតាមរបៀបដែលពង្រឹងកម្លាំងចិត្តអ្នកឯទៀត ព្រមទាំងជៀសវាងពីពាក្យប្រមាថមើលងាយ។—w២២.០៤ ទំ.៦-៩
ហេតុអ្វីលក្ខណៈរបស់សត្វសាហាវបួនក្បាល(រាជាណាចក្រ)ដែលបានត្រូវរៀបរាប់ក្នុងសៀវភៅដានីយ៉ែល ជំពូកទី៧ មាននៅក្នុងសត្វសាហាវតែមួយដែលបានត្រូវរៀបរាប់នៅការបើកបង្ហាញ ១៣:១, ២?
សត្វសាហាវនៅក្នុងសៀវភៅការបើកបង្ហាញ ជំពូកទី១៣ មិនមែនជាតំណាងរដ្ឋាភិបាលឬរាជាណាចក្រតែមួយ ដូចជារ៉ូមនោះទេ។ ផ្ទុយទៅវិញ វាជាតំណាងរដ្ឋាភិបាលទាំងអស់ដែលបានគ្រប់គ្រងលើមនុស្សជាតិ។—w២២.០៥ ទំ.៩
តើអ្វីជាវិធីសំខាន់មួយដើម្បីបង្ហាញថាយើងទុកចិត្តទៅលើយុត្តិធម៌របស់ព្រះយេហូវ៉ា?
បើអ្នកណាម្នាក់បានប្រមាថមើលងាយយើង ធ្វើឲ្យយើងទើសចិត្ត ឬធ្វើខុសនឹងយើង នោះយើងព្យាយាមលះចោលកំហឹងនិងការចងគំនុំ ដោយទុកឲ្យព្រះយេហូវ៉ាដោះស្រាយ។ លោកនឹងបំបាត់ចោលផលវិបាកទាំងអស់ដែលមកពីអំពើខុសឆ្គង។—w២២.០៦ ទំ.១០-១១
តើបងប្អូនប្រុសដែលអធិដ្ឋានតំណាងអ្នកឯទៀតនៅកិច្ចប្រជុំគួរចាំអំពីអ្វី?
ការអធិដ្ឋានមិនមែនជាពេលដើម្បីឲ្យឱវាទដល់ក្រុមជំនុំ ឬប្រាប់សេចក្ដីជូនដំណឹងទេ។ ជាពិសេសនៅពេលចាប់ផ្ដើមកិច្ចប្រជុំ គឺមិនចាំបាច់«ពោលពាក្យជាច្រើន»ឡើយ។ (ម៉ាថ. ៦:៧)—w២២.០៧ ទំ.២៤-២៥
តើពួកអ្នក‹ដែលបានប្រព្រឹត្តការអាក្រក់ជាទម្លាប់ នឹងរស់ឡើងវិញ ហើយទទួលការវិនិច្ឆ័យ›ក្នុងន័យយ៉ាងណា? (យ៉ូន. ៥:២៩)
ពួកគេនឹងមិនទទួលការកាត់ទោសស្របទៅតាមជីវិតនៅអតីតកាលរបស់ពួកគេទេ។ ពួកគេនឹងត្រូវពិនិត្យមើលតាមការប្រព្រឹត្តនិងចិត្តគំនិតរបស់ពួកគេក្រោយពីពួកគេបានត្រូវប្រោសឲ្យរស់ឡើងវិញ។—w២២.០៩ ទំ.១៨
តើបងចូសេហ្វ រ៉ូធើហ្វឺតបានផ្ដល់ការដាស់តឿនដ៏រំភើបចិត្តអ្វីនៅមហាសន្និបាតនាខែកញ្ញា ឆ្នាំ១៩២២?
នៅមហាសន្និបាតនាស៊ីដឺផូញ រដ្ឋអូហៃយ៉ូ សហរដ្ឋអាម៉េរិក គាត់បានប្រកាសថា៖ «ស្ដេចគ្រប់គ្រងហើយ! អ្នករាល់គ្នាជាអ្នកផ្សព្វផ្សាយអំពីលោក។ ដូច្នេះ ចូរផ្សាយ ចូរផ្សាយ ចូរផ្សាយអំពីស្ដេចនិងរាជាណាចក្ររបស់លោក!»។—w២២.១០ ទំ.៣-៥
យោងទៅតាមសៀវភៅអេសាយ ជំពូកទី៣០ តើព្រះជួយយើងឲ្យស៊ូទ្រាំតាមរបៀបបីយ៉ាងអ្វី?
ជំពូកនេះបង្ហាញថាលោក (១) ស្ដាប់និងតបឆ្លើយសេចក្ដីអធិដ្ឋានរបស់យើង (២) ផ្ដល់ការណែនាំផ្សេងៗឲ្យយើង និង(៣) ផ្ដល់ពរដល់យើងនៅឥឡូវនេះនិងនៅថ្ងៃអនាគត។—w២២.១១ ទំ.៩
ហេតុអ្វីយើងអាចសន្និដ្ឋានថាពាក្យនៅចម្រៀងសរសើរព្រះ ៣៧:១០, ១១, ២៩ បានត្រូវសម្រេចនៅសម័យបុរាណ ហើយក៏នឹងត្រូវសម្រេចនៅថ្ងៃអនាគត?
ពាក្យរបស់ដាវីឌរៀបរាប់យ៉ាងសមត្រឹមត្រូវអំពីភាពចម្រុងចម្រើននៅស្រុកអ៊ីស្រាអែល ដូចជាក្នុងអំឡុងរជ្ជកាលរបស់សាឡូម៉ូន។ លោកយេស៊ូបានដកស្រង់ខ១១ដើម្បីលើកឡើងអំពីសួនឧទ្យាននៅថ្ងៃអនាគត។ (ម៉ាថ. ៥:៥; លូក. ២៣:៤៣)—w២២.១២ ទំ.៨-១០, ១៤
