អត្ថបទសិក្សា ១

ចូររក្សាចិត្តស្ងប់ ហើយទុកចិត្តព្រះយេហូវ៉ា

លេង

បទគម្ពីរប្រចាំឆ្នាំសម្រាប់ឆ្នាំ២០២១គឺ: ‹អ្នករាល់គ្នានឹងមានកំឡាំងដោយនៅតែស្ងៀម ហើយមានទំនុកចិត្ត›។—អេ. ៣០:១៥

ចម្រៀងលេខ៣ ព្រះជាកម្លាំង ជាសេចក្ដីសង្ឃឹម និងជាទីពឹងរបស់យើង

សេចក្ដីសង្ខេប *

១. ដូចស្ដេចដាវីឌ តើយើងប្រហែលជាសួរសំណួរអ្វី?

យើងទាំងអស់គ្នាចង់រស់នៅដោយស្ងប់សុខ។ គ្មានអ្នកណាចង់ខ្វល់ខ្វាយទេ តែពេលខ្លះយើងប្រហែលជាខ្វល់ចិត្តយ៉ាងខ្លាំង។ តាមពិត អ្នកបម្រើមួយចំនួនរបស់ព្រះយេហូវ៉ា ប្រហែលជាសួរសំណួរដូចស្ដេចដាវីឌធ្លាប់សួរព្រះយេហូវ៉ា ថា៖ «តើត្រូវឲ្យទូលបង្គំពិគ្រោះនៅតែក្នុងខ្លួនដល់កាលណា ដោយមានចិត្តព្រួយវាល់ព្រឹកវាល់ល្ងាចដូច្នេះ?»។—ទំនុក. ១៣:២

២. តើយើងនឹងពិចារណាអ្វីក្នុងអត្ថបទនេះ?

^២ទោះជាយើងមិនអាចជៀសផុតពីការខ្វល់ខ្វាយក្ដី មានអ្វីខ្លះដែលយើងអាចធ្វើដើម្បីកាត់បន្ថយការខ្វល់ខ្វាយរបស់យើង។ ដំបូង ក្នុងអត្ថបទនេះ យើងនឹងលើកឡើងអំពីអ្វីខ្លះដែលអាចធ្វើឲ្យយើងព្រួយចិត្ត។ បន្ទាប់មក យើងនឹងពិចារណាអំពីរបៀប៦យ៉ាងដែលយើងអាចរក្សាចិត្តស្ងប់ កាលដែលយើងប្រឈមមុខនឹងបញ្ហា។

តើអ្វីខ្លះអាចនាំឲ្យយើងខ្វល់ខ្វាយ?

៣. តើអ្វីខ្លះប្រហែលជាធ្វើឲ្យយើងខ្វល់ចិត្ត ហើយតើយើងអាចគ្រប់គ្រងទៅលើអ្វីទាំងនេះដល់កម្រិតណា?

^៣មានអ្វីជាច្រើនដែលអាចធ្វើឲ្យយើងព្រួយចិត្ត ហើយមានអ្វីមួយចំនួនដែលយើងពុំអាចទប់ស្កាត់មិនឲ្យកើតឡើងបានឡើយ។ ជាឧទាហរណ៍ យើងមិនអាចដាក់កម្រិតទៅលើការឡើងថ្លៃជារៀងរាល់ឆ្នាំនៃម្ហូបអាហារ សម្លៀកបំពាក់ និងលំនៅឋានបានទេ។ យើងគ្មានសមត្ថភាពដាក់កម្រិតលើការល្បួងពីអ្នករួមការងារឬសិស្សរួមថ្នាក់ដែលចង់ល្បួងយើងឲ្យប្រព្រឹត្តមិនទៀងត្រង់ឬប្រព្រឹត្តអំពើប្រាសចាកសីលធម៌ជាដើម។ យើងក៏មិនអាចបញ្ឈប់ឧក្រិដ្ឋកម្មដែលកើតឡើងក្នុងតំបន់ដែលយើងរស់នៅឡើយ។ យើងមានបញ្ហាទាំងនេះ ដោយសារយើងរស់នៅក្នុងពិភពលោកដែលរបៀបគិតគូររបស់មនុស្សភាគច្រើនមិនមានមូលដ្ឋានលើគោលការណ៍គម្ពីរទេ។ មូលហេតុមួយទៀត គឺដោយសារសាថានគឺជាព្រះរបស់ពិភពលោកនេះ ហើយវាចង់ឲ្យយើង«ខ្វល់ខ្វាយអំពីជីវភាពនៅសម័យនេះ»ដើម្បីរារាំងយើងពីការបម្រើព្រះយេហូវ៉ា។ (ម៉ាថ. ១៣:២២; ១យ៉ូន. ៥:១៩) យើងមិនភ្ញាក់ផ្អើលទេ ដែលពិភពលោកនេះពោរពេញទៅដោយបញ្ហាដែលធ្វើឲ្យតានតឹងចិត្ត!

៤. តើអ្វីប្រហែលជានឹងកើតឡើង បើយើងព្រួយបារម្ភខ្លាំងអំពីរឿងផ្សេងៗ?

^៤យើងប្រហែលជាព្រួយចិត្តអំពីរឿងផ្សេងៗរហូតដល់លែងគិតអំពីអ្វីផ្សេងទៀត។ ជាឧទាហរណ៍ យើងប្រហែលជាបារម្ភថា យើងនឹងមិនរកប្រាក់ចំណូលគ្រប់គ្រាន់ដើម្បីផ្គត់ផ្គង់សេចក្ដីត្រូវការរបស់យើង ឬថាយើងនឹងធ្លាក់ខ្លួនឈឺនិងខានទៅធ្វើការ ឬថែមទាំងបាត់បង់ការងារទៀតផង។ យើងក៏ប្រហែលជាខ្លាចថា យើងនឹងមិនស្មោះត្រង់ពេលមានការល្បួងឲ្យបំពានច្បាប់របស់ព្រះ។ ម្យ៉ាងទៀត មិនយូរទៀតសាថាននឹងធ្វើឲ្យពួកអ្នកដែលនៅក្រោមអំណាចវាវាយប្រហាររាស្ត្ររបស់ព្រះ។ ដូច្នេះ យើងប្រហែលជាបារម្ភអំពីប្រតិកម្មរបស់យើងចំពោះការវាយប្រហារនោះ។ យើងប្រហែលជាឆ្ងល់ថា ‹តើការព្រួយបារម្ភអំពីរឿងទាំងនេះគឺខុសទេ?›។

៥. តើលោកយេស៊ូចង់មានន័យយ៉ាងណា ពេលលោកមានប្រសាសន៍ថា៖ «ឈប់ខ្វល់ខ្វាយ»?

^៥យើងដឹងថា លោកយេស៊ូបានប្រាប់ពួកអ្នកកាន់តាមលោកឲ្យ«ឈប់ខ្វល់ខ្វាយ»។ (ម៉ាថ. ៦:២៥) តើលោកយេស៊ូចង់បញ្ជាក់ថាយើងមិនគួរព្រួយបារម្ភអំពីអ្វីសោះឬទេ? មិនមែនទេ! សូមចាំថា អ្នកបម្រើដ៏ស្មោះត្រង់របស់ព្រះយេហូវ៉ាខ្លះនៅអតីតកាលក៏មានទុក្ខកង្វល់ដែរ ប៉ុន្តែពួកគេនៅតែទទួលការពេញចិត្តពីព្រះយេហូវ៉ា។ * (១ព. ១៩:៤; ទំនុក. ៦:៣) តាមពិត លោកយេស៊ូកំពុងពង្រឹងការជឿជាក់របស់យើង។ លោកមិនចង់ឲ្យយើងខ្វល់ខ្វាយហួសហេតុពេកអំពីសេចក្ដីត្រូវការក្នុងជីវិត រហូតដល់ការបម្រើព្រះយេហូវ៉ាមិនមែនជាអ្វីដ៏សំខាន់បំផុត។ ដូច្នេះ តើយើងអាចធ្វើអ្វីពេលយើងខ្វល់ខ្វាយ? (សូមមើលប្រអប់ដែលមានចំណងជើងថា« របៀបកាត់បន្ថយការខ្វល់ចិត្ត»)។

ចំណុច៦យ៉ាងដែលនឹងជួយយើងឲ្យរក្សាចិត្តស្ងប់

សូមមើលវគ្គ៦ *

៦. យោងទៅតាមភីលីព ៤:៦, ៧ តើអ្វីអាចជួយយើងឲ្យមានសេចក្ដីសុខសាន្តក្នុងចិត្ត?

^៦(១) ចូរអធិដ្ឋានជារឿយៗ។ ពេលអ្នកព្រួយបារម្ភអំពីបញ្ហាណាមួយ អ្នកអាចអធិដ្ឋានសុំជំនួយពីព្រះយេហូវ៉ា។ (១ពេ. ៥:៧) ព្រះយេហូវ៉ាអាចតបឆ្លើយសេចក្ដីអធិដ្ឋានរបស់អ្នក ដោយឲ្យអ្នកនូវ«សេចក្ដីសុខសាន្តរបស់ព្រះដែលហួសពីការនឹកស្មាន[របស់មនុស្ស]»។ (សូមអាន ភីលីព ៤:៦, ៧) ព្រះយេហូវ៉ានឹងផ្ដល់សេចក្ដីសុខសាន្តនេះឲ្យអ្នក តាមរយៈសកម្មពលបរិសុទ្ធដ៏ខ្លាំងក្លារបស់លោក។—កាឡ. ៥:២២

៧. តើយើងគួរចាំអំពីអ្វីពេលអធិដ្ឋានទៅព្រះ?

^៧ពេលអ្នកអធិដ្ឋានទៅព្រះយេហូវ៉ា សូមនិយាយអស់ពីចិត្ត ដោយប្រាប់លោកចំៗអំពីបញ្ហាដែលអ្នកមាន ព្រមទាំងប្រាប់លោកអំពីអារម្មណ៍របស់អ្នកចំពោះបញ្ហានោះ។ បើបញ្ហានោះអាចដោះស្រាយបាន ចូរសុំប្រាជ្ញាពីលោកដើម្បីដឹងអំពីអ្វីដែលអ្នកអាចធ្វើ ហើយចូរសុំកម្លាំងដែលអ្នកត្រូវការដើម្បីធ្វើអ្វីនោះ។ បើគ្មានអ្វីដែលអ្នកអាចធ្វើដើម្បីដោះស្រាយបញ្ហានោះ ចូរសុំព្រះយេហូវ៉ាឲ្យជួយអ្នកកុំឲ្យខ្វល់ខ្វាយហួសហេតុពេក។ ពេលអ្នកប្រាប់លោកចំៗក្នុងសេចក្ដីអធិដ្ឋានរបស់អ្នក នោះអ្នកនឹងឃើញច្បាស់ជាងអំពីរបៀបដែលលោកតបឆ្លើយចំពោះសេចក្ដីអធិដ្ឋានទាំងនោះ។ ប្រសិនបើអ្នកមិនទទួលចម្លើយភ្លាមៗក្រោយពីអធិដ្ឋាន សូមកុំឈប់ព្យាយាម។ ព្រះយេហូវ៉ាមិនគ្រាន់តែចង់ឲ្យអ្នកប្រាប់លោកចំៗប៉ុណ្ណោះទេ ប៉ុន្តែលោកក៏ចង់ឲ្យអ្នកតស៊ូក្នុងការអធិដ្ឋានដែរ។—លូក. ១១:៨-១០

៨. តើយើងគួររួមបញ្ចូលអ្វីក្នុងសេចក្ដីអធិដ្ឋានរបស់យើង?

^៨កាលដែលអ្នកផ្ទេរកង្វល់របស់អ្នកទៅព្រះយេហូវ៉ាក្នុងសេចក្ដីអធិដ្ឋាន សូមប្រាកដថាអ្នករួមបញ្ចូលពាក្យថ្លែងអំណរគុណ។ គឺជាការល្អដែលយើងគិតអំពីពរដែលយើងបានទទួល ទោះជាពេលដែលយើងជួបបញ្ហាជាច្រើនក្ដី។ បើពេលខ្លះ អ្នកមិនដឹងថាគួរនិយាយអ្វីដើម្បីរៀបរាប់អំពីអារម្មណ៍របស់អ្នក សូមចាំថាសូម្បីតែអ្នកគ្រាន់តែអធិដ្ឋានថា‹សូមលោកជួយផង!› ក៏ព្រះយេហូវ៉ាតបឆ្លើយដែរ។—២រប. ១៨:៣១; រ៉ូម ៨:២៦

សូមមើលវគ្គ៩ *

៩. តើយើងអាចមានសន្តិសុខដ៏ពិតប្រាកដយ៉ាងដូចម្ដេច?

^៩(២) ចូរពឹងផ្អែកទៅលើប្រាជ្ញារបស់ព្រះយេហូវ៉ា មិនមែនរបស់ខ្លួនទេ។ នៅសតវត្សរ៍ទី៨ មុនគ.ស. បណ្ដាជនយូដាភ័យខ្លាចថាជនជាតិអាសស៊ើរនឹងមកវាយប្រហារពួកគេ។ ដើម្បីកុំឲ្យនៅក្រោមអំណាចជនជាតិអាសស៊ើរ ពួកគេបានសុំជំនួយពីជនជាតិអេស៊ីប។ (អេ. ៣០:១, ២) ព្រះយេហូវ៉ាបានព្រមានពួកគេថា ការទុកចិត្តទៅលើជនជាតិអេស៊ីបនឹងនាំឲ្យអន្តរាយ។ (អេ. ៣០:៧, ១២, ១៣) តាមរយៈអេសាយ ព្រះយេហូវ៉ាបានប្រាប់ជនជាតិយូដាអំពីរបៀបដែលពួកគេអាចរកឃើញសន្តិសុខដ៏ពិតប្រាកដ។ គាត់បាននិយាយថា៖ ‹អ្នករាល់គ្នានឹងមានកំឡាំងដោយនៅតែស្ងៀម ហើយមានទំនុកចិត្ត›លើព្រះយេហូវ៉ា។—អេ. ៣០:១៥ខ

១០. តើយើងអាចបង្ហាញទំនុកចិត្តរបស់យើងទៅលើព្រះយេហូវ៉ាក្នុងករណីណាខ្លះ?

^១០តើយើងអាចបង្ហាញយ៉ាងណាថាយើងទុកចិត្តព្រះយេហូវ៉ា? សូមគិតអំពីឧទាហរណ៍មួយចំនួន។ ឧបមាថា គេស្នើឲ្យអ្នកនូវការងារដែលមានប្រាក់ខែខ្ពស់ជាង តែនោះនឹងតម្រូវឲ្យអ្នកធ្វើការថែមម៉ោង ហើយធ្វើឲ្យអ្នកមិនអាចបម្រើព្រះយេហូវ៉ាច្រើនដូចឥឡូវ។ ឬមួយទៀត មានបុគ្គលម្នាក់នៅកន្លែងធ្វើការសារភាពស្នេហ៍ប្រាប់អ្នក ប៉ុន្តែគាត់មិនមែនជាអ្នកបម្រើព្រះយេហូវ៉ាដែលបានទទួលការជ្រមុជទឹកទេ។ ឬចុះបើសមាជិកក្រុមគ្រួសារជាទីស្រឡាញ់របស់អ្នក ឲ្យអ្នកជ្រើសរើសរវាងគាត់និងព្រះ? ក្នុងករណីទាំងអស់នេះអ្នកនឹងត្រូវធ្វើការសម្រេចចិត្តដ៏ពិបាក ប៉ុន្តែក្នុងករណីនីមួយៗព្រះយេហូវ៉ានឹងផ្ដល់ការណែនាំដែលអ្នកត្រូវការ។ (ម៉ាថ. ៦:៣៣; ១០:៣៧; ១កូ. ៧:៣៩) តើទំនុកចិត្តរបស់អ្នកទៅលើព្រះយេហូវ៉ានឹងជំរុញអ្នកឲ្យធ្វើតាមការណែនាំពីលោកឬទេ?

សូមមើលវគ្គ១១ *

១១. តើយើងអាចសិក្សាកំណត់ហេតុអ្វីខ្លះក្នុងគម្ពីរ ដើម្បីរក្សាចិត្តស្ងប់ពេលមានការប្រឆាំង?

^១១(៣) ចូររៀនពីគំរូល្អនិងគំរូមិនល្អ។ កំណត់ហេតុជាច្រើនក្នុងគម្ពីររៀបរាប់អំពីប្រយោជន៍ដែលមកពីការរក្សាចិត្តស្ងប់ និងការបង្ហាញទំនុកចិត្តទៅលើព្រះយេហូវ៉ា។ កាលដែលអ្នកសិក្សាកំណត់ហេតុទាំងនេះ សូមកត់សម្គាល់អំពីអ្វីដែលបានជួយអ្នកបម្រើព្រះឲ្យរក្សាចិត្តស្ងប់ ពេលមានការបៀតបៀនយ៉ាងខ្លាំង។ ជាឧទាហរណ៍ ពេលក្រុមប្រឹក្សាជាន់ខ្ពស់របស់ជនជាតិយូដាបង្គាប់ពួកសាវ័កឲ្យឈប់ផ្សព្វផ្សាយ ពួកសាវ័កមិនបានភ័យខ្លាចទេ។ ផ្ទុយទៅវិញ ពួកគេបានប្រកាសយ៉ាងអង់អាចថា៖ «យើងត្រូវស្ដាប់បង្គាប់ព្រះជាអ្នកគ្រប់គ្រង ជាជាងមនុស្ស»។ (សកម្ម. ៥:២៩) សូម្បីតែក្រោយពីពួកសាវ័កបានត្រូវគេវាយនឹងរំពាត់ ក៏ពួកគេមិនភ័យរន្ធត់ដែរ។ ហេតុអ្វី? ពីព្រោះពួកគេដឹងថាព្រះយេហូវ៉ានៅខាងពួកគេ ហើយលោកពេញចិត្តនឹងពួកគេ។ ហេតុនេះ ពួកគេបន្តផ្សព្វផ្សាយដំណឹងល្អ។ (សកម្ម. ៥:៤០-៤២) ស្រដៀងគ្នាដែរ ពេលស្ទេផានដែលជាអ្នកកាន់តាមម្នាក់ប្រឈមមុខនឹងសេចក្ដីស្លាប់ គាត់រក្សាចិត្តស្ងប់រហូតដល់មុខគាត់«គឺដូចមុខទេវតា»។ (សកម្ម. ៦:១២-១៥) ហេតុអ្វី? ពីព្រោះគាត់ជឿជាក់ថាព្រះយេហូវ៉ាពេញចិត្តគាត់។

១២. តាមពេត្រុសទី១ ៣:១៤ និង៤:១៤ ហេតុអ្វីយើងអាចមានសុភមង្គលពេលយើងទទួលការបៀតបៀន?

^១២ពួកសាវ័កមានទីសំអាងដ៏ច្បាស់លាស់ថាព្រះយេហូវ៉ានៅជាមួយពួកគេ។ លោកបានឲ្យពួកគេមានសមត្ថភាពធ្វើអព្ភូតហេតុ។ (សកម្ម. ៥:១២-១៦; ៦:៨) នៅសព្វថ្ងៃនេះ ព្រះយេហូវ៉ាមិនផ្ដល់ឲ្យយើងនូវសមត្ថភាពធ្វើអព្ភូតហេតុទេ។ ទោះជាយ៉ាងនោះក៏ដោយ តាមរយៈបណ្ដាំរបស់លោក ព្រះយេហូវ៉ាពង្រឹងទំនុកចិត្តយើងថាពេលយើងរងទុក្ខដោយសារសេចក្ដីសុចរិត នោះលោកពេញចិត្តយើង ហើយសកម្មពលរបស់លោកនៅជាមួយយើង។ (សូមអាន ពេត្រុសទី១ ៣:១៤; ៤:១៤) ដូច្នេះ ជាជាងចេះតែបារម្ភអំពីអ្វីដែលយើងនឹងធ្វើពេលជួបការបៀតបៀនដ៏ខ្លាំងនៅថ្ងៃអនាគត យើងត្រូវផ្ដោតអារម្មណ៍ទៅលើអ្វីដែលយើងអាចធ្វើនៅឥឡូវនេះ ដើម្បីពង្រឹងទំនុកចិត្តរបស់យើងទៅលើសមត្ថភាពរបស់ព្រះយេហូវ៉ាក្នុងការគាំទ្រនិងសង្គ្រោះយើង។ ដូចអ្នកកាន់តាមនៅសម័យដើម យើងត្រូវទុកចិត្តទៅលើសេចក្ដីសន្យារបស់លោកយេស៊ូ ដែលថា៖ «ខ្ញុំនឹងផ្ដល់ឲ្យអ្នករាល់គ្នាមានពាក្យនិងប្រាជ្ញា ដែលពួកអ្នកប្រឆាំងរួមគ្នាពុំអាចជំទាស់ឬប្រកែកឈ្នះបានឡើយ»។ លោកយេស៊ូបានសន្យាថា៖ «បើស៊ូទ្រាំ នោះអ្នករាល់គ្នានឹងរក្សាជីវិតខ្លួន»។ (លូក. ២១:១២-១៩) សូមកុំភ្លេចថា ព្រះយេហូវ៉ាចងចាំទាំងអស់អំពីអ្នកបម្រើលោកដែលរក្សាចិត្តស្មោះត្រង់នឹងលោករហូតដល់ស្លាប់។ ដោយប្រើចំណេះដឹងនោះ លោកនឹងប្រោសពួកគេឲ្យរស់ឡើងវិញ។

១៣. តើយើងអាចទទួលប្រយោជន៍យ៉ាងណាពីការគិតអំពីបទពិសោធន៍របស់ពួកអ្នកដែលមិនបានរក្សាចិត្តស្ងប់និងមិនទុកចិត្តទៅលើព្រះយេហូវ៉ា?

^១៣យើងក៏អាចរៀនពីបទពិសោធន៍របស់បុគ្គលដែលមិនបានរក្សាចិត្តស្ងប់និងមិនទុកចិត្តព្រះយេហូវ៉ា។ ការសិក្សាអំពីគំរូមិនល្អទាំងនោះនឹងជួយយើងឲ្យជៀសវាងពីការធ្វើខុសដូចពួកគេ។ ជាឧទាហរណ៍ នៅដើមការគ្រប់គ្រងរបស់ស្ដេចអេសានៃស្រុកយូដា គាត់បានពឹងផ្អែកលើព្រះយេហូវ៉ាពេលកងទ័ពដ៏ធំមកច្បាំងនឹងគាត់ ហើយព្រះយេហូវ៉ាបានធ្វើឲ្យគាត់ទទួលជ័យជម្នះ។ (២រប. ១៤:៩-១២) ប៉ុន្តែក្រោយមក ពេលកងទ័ពតូចជាងរបស់ស្ដេចប្អាសានៃស្រុកអ៊ីស្រាអែលបានមកច្បាំងនឹងអេសា គាត់បានបង់ប្រាក់ឲ្យជនជាតិស៊ីរីដើម្បីជួយគាត់ ជាជាងពឹងផ្អែកទៅលើព្រះយេហូវ៉ាដើម្បីទទួលសេចក្ដីសង្គ្រោះដូចដែលគាត់ធ្លាប់ធ្វើពីមុន។ (២រប. ១៦:១-៣) ក្រោយមក ពេលគាត់មានវ័យចាស់ ហើយធ្លាក់ខ្លួនឈឺធ្ងន់ធ្ងរ គាត់មិនបានពឹងផ្អែកទៅលើព្រះយេហូវ៉ាឲ្យជួយគាត់ទេ។—២រប. ១៦:១២

១៤. តើយើងអាចរៀនអ្វីពីកំហុសរបស់អេសា?

^១៤នៅដើមដំបូង អេសាបានពឹងព្រះយេហូវ៉ាពេលគាត់មានបញ្ហា។ ប៉ុន្តែក្រោយមក គាត់មិនបានសុំជំនួយពីលោកទេ។ គាត់បែរជាបានខំដោះស្រាយបញ្ហាដោយខ្លួនឯង ដោយសុំជំនួយពីជនជាតិស៊ីរីឲ្យច្បាំងនឹងប្រជាជាតិអ៊ីស្រាអែល។ ដំបូង នេះប្រហែលជាមើលទៅមានលទ្ធផលល្អ។ ប៉ុន្តែ ស្រុកយូដាមិនមានសេចក្ដីសុខសាន្តជាយូរអង្វែងទេ។ ព្រះយេហូវ៉ាបានប្រាប់អេសាតាមរយៈអ្នកប្រកាសទំនាយម្នាក់ថា៖ «ដោយព្រោះទ្រង់បានពឹងដល់ស្ដេចស៊ីរី មិនបានពឹងដល់ព្រះយេហូវ៉ាជាព្រះនៃទ្រង់ នោះពួកពលទ័ពរបស់ស្ដេចស៊ីរី បានរួចពីកណ្ដាប់ព្រះហស្តទ្រង់ហើយ»។ (២រប. ១៦:៧) យើងត្រូវប្រុងប្រយ័ត្នមិនមានទំនុកចិត្តខ្លាំងពេកទៅលើសមត្ថភាពរបស់យើងក្នុងការដោះស្រាយបញ្ហាដោយខ្លួនឯង រហូតដល់យើងមិនស្វែងរកការណែនាំពីព្រះយេហូវ៉ាតាមរយៈបណ្ដាំរបស់លោក។ ទោះជាយើងជួបរឿងបន្ទាន់និងត្រូវធ្វើការសម្រេចចិត្តភ្លាមៗក្ដី យើងគួររក្សាចិត្តស្ងប់និងពឹងផ្អែកទៅលើព្រះយេហូវ៉ា ហើយលោកនឹងជួយយើងឲ្យទទួលជោគជ័យ។

សូមមើលវគ្គ១៥ *

១៥. តើយើងអាចធ្វើអ្វីពេលអានគម្ពីរ?

^១៥(៤) ចូរទន្ទេញចាំបទគម្ពីរ។ ពេលអ្នកអានចំបទគម្ពីរដែលបង្ហាញថាការរក្សាចិត្តស្ងប់និងការទុកចិត្តទៅលើព្រះយេហូវ៉ានាំឲ្យមានកម្លាំង សូមព្យាយាមទន្ទេញចាំបទគម្ពីរទាំងនោះ។ អ្នកនឹងទទួលប្រយោជន៍ បើអ្នកអានបទគម្ពីរទាំងនោះឮៗ ឬកត់ទុក ហើយមើលឡើងវិញជារឿយៗ។ ព្រះយេហូវ៉ាបានបង្គាប់យ៉ូស្វេឲ្យអានច្បាប់របស់លោកជារឿយៗដោយបញ្ចេញសំឡេងតិចៗ។ ការធ្វើដូច្នេះនឹងជួយគាត់ឲ្យប្រព្រឹត្តដោយប្រាជ្ញា។ អ្វីដែលគាត់អានក្នុងច្បាប់នោះក៏នឹងជួយគាត់មិនឲ្យភ័យខ្លាច តែមានចិត្តក្លាហានដើម្បីនាំមុខរាស្ត្ររបស់ព្រះ។ (យ៉ូស. ១:៨, ៩) ខគម្ពីរជាច្រើនក្នុងបណ្ដាំរបស់ព្រះអាចជួយអ្នកឲ្យមានសេចក្ដីសុខសាន្តក្នុងចិត្តពេលអ្នកស្ថិតនៅក្នុងស្ថានភាពដែលតាមធម្មតាធ្វើឲ្យខ្វល់ចិត្តឬភ័យខ្លាច។—ទំនុក. ២៧:១-៣; សុភ. ៣:២៥, ២៦

សូមមើលវគ្គ១៦ *

១៦. តើព្រះយេហូវ៉ាប្រើក្រុមជំនុំដើម្បីជួយយើងឲ្យរក្សាចិត្តស្ងប់និងទុកចិត្តលើលោកយ៉ាងដូចម្ដេច?

^១៦(៥) ចូរសេពគប់ជាមួយរាស្ត្ររបស់ព្រះ។ ព្រះយេហូវ៉ាប្រើបងប្អូនរបស់យើង ដើម្បីជួយយើងឲ្យរក្សាចិត្តស្ងប់និងទុកចិត្តលើលោក។ នៅកិច្ចប្រជុំរបស់យើង យើងទទួលប្រយោជន៍ពីសុន្ទរកថា ចម្លើយរបស់អ្នកឯទៀត និងការសន្ទនាដ៏លើកទឹកចិត្តជាមួយបងប្អូនរបស់យើង។ (ហេ. ១០:២៤, ២៥) យើងក៏អាចទទួលការលើកទឹកចិត្តយ៉ាងខ្លាំងដែរ ពេលយើងប្រាប់អំពីអារម្មណ៍របស់យើងទៅមិត្តភក្ដិដែលគួរឲ្យទុកចិត្តក្នុងក្រុមជំនុំ។ «ពាក្យល្អ»ពីមិត្តភក្ដិអាចកាត់បន្ថយការខ្វល់ខ្វាយរបស់យើង។—សុភ. ១២:២៥

សូមមើលវគ្គ១៧ *

១៧. តើហេប្រឺ ៦:១៩ បង្ហាញយ៉ាងណាថាសេចក្ដីសង្ឃឹមរបស់យើងអំពីរាជាណាចក្រអាចជួយយើងឲ្យរក្សាចិត្តស្ងប់ក្នុងគ្រាពិបាក?

^១៧(៦) ចូររក្សាសេចក្ដីសង្ឃឹមរបស់អ្នកឲ្យមាំមួន។ សេចក្ដីសង្ឃឹមរបស់យើងអំពីរាជាណាចក្រព្រះគឺដូចជា«យុថ្កាសម្រាប់ជីវិតយើង» ក្នុងន័យថានោះធ្វើឲ្យយើងមានអារម្មណ៍នឹងនរ ទោះជាយើងខ្វល់ខ្វាយឬមានស្ថានភាពពិបាកក្ដី។ (សូមអាន ហេប្រឺ ៦:១៩) សូមគិតអំពីសេចក្ដីសន្យារបស់ព្រះយេហូវ៉ាសម្រាប់ថ្ងៃអនាគត។ នៅពេលនោះ គ្មានអ្វីធ្វើឲ្យយើងព្រួយបារម្ភសោះ។ (អេ. ៦៥:១៧) សូមស្រមៃឃើញខ្លួនអ្នកនៅក្នុងពិភពលោកថ្មីដ៏សុខសាន្ត ជាកន្លែងដែលគ្មានរឿងអាក្រក់កើតឡើងឡើយ។ (មីកា ៤:៤) អ្នកក៏នឹងធ្វើឲ្យសេចក្ដីសង្ឃឹមរបស់អ្នកកាន់តែមាំមួនឡើង កាលដែលអ្នកប្រាប់អ្នកឯទៀតអំពីសេចក្ដីសង្ឃឹមនោះ។ ចូរខំអស់ពីសមត្ថភាពក្នុងកិច្ចការផ្សព្វផ្សាយនិងបង្រៀនមនុស្សឲ្យក្លាយទៅជាអ្នកកាន់តាមលោកយេស៊ូ។ បើអ្នកធ្វើដូច្នេះ អ្នកអាច«មានសេចក្ដីសង្ឃឹមយ៉ាងពិតប្រាកដរហូតដល់ទីបញ្ចប់»។—ហេ. ៦:១១

‹អ្នករាល់គ្នានឹងមានកំឡាំងដោយនៅតែស្ងៀម ហើយមានទំនុកចិត្ត›។—អេ. ៣០:១៥

របៀបកាត់បន្ថយការខ្វល់ចិត្ត

១. អធិដ្ឋានជារឿយៗ
២. ពឹងផ្អែកលើប្រាជ្ញារបស់ព្រះយេហូវ៉ា
៣. រៀនពីគំរូនៅអតីតកាល
៤. ទន្ទេញចាំបទគម្ពីរ
៥. សេពគប់ជាមួយរាស្ត្ររបស់ព្រះ
៦. រក្សាសេចក្ដីសង្ឃឹមរបស់អ្នកឲ្យមាំមួន

១៨. តើយើងអាចរំពឹងថាយើងនឹងជួបការពិបាកអ្វីខ្លះនៅថ្ងៃអនាគត ហើយតើយើងអាចធ្វើអ្វី?

^១៨កាលដែលរបៀបរបបពិភពលោកនេះកាន់តែជិតមកដល់ទីបញ្ចប់ យើងនឹងជួបការពិបាកកាន់តែច្រើនឡើងដែលអាចនាំឲ្យយើងខ្វល់ខ្វាយ។ បទគម្ពីរប្រចាំឆ្នាំរបស់យើងសម្រាប់ឆ្នាំ២០២១ អាចជួយយើងឲ្យប្រឈមមុខនឹងការពិបាកទាំងនោះ ហើយរក្សាចិត្តស្ងប់ មិនមែនដោយកម្លាំងរបស់ខ្លួនទេ ប៉ុន្តែដោយសារយើងទុកចិត្តព្រះយេហូវ៉ា។ ក្នុងអំឡុងឆ្នាំ២០២១ សូមយើងបង្ហាញដោយការប្រព្រឹត្តរបស់យើងថា យើងមានជំនឿទៅលើសេចក្ដីសន្យារបស់ព្រះយេហូវ៉ា ដែលថា៖ ‹អ្នករាល់គ្នានឹងមានកំឡាំងដោយនៅតែស្ងៀម ហើយមានទំនុកចិត្ត›។—អេ. ៣០:១៥

ចម្រៀងលេខ៨ ព្រះយេហូវ៉ាជាទីពឹងពំនាក់របស់យើង

^ វគ្គ 5 បទគម្ពីរប្រចាំឆ្នាំរបស់យើងសម្រាប់ឆ្នាំ២០២១ លើកឡើងអំពីសារៈសំខាន់នៃការទុកចិត្តព្រះយេហូវ៉ា កាលដែលយើងប្រឈមមុខនឹងកាលៈទេសៈផ្សេងៗនៅសព្វថ្ងៃនេះនិងនៅពេលអនាគត ដែលនាំឲ្យតានតឹងចិត្ត។ ក្នុងអត្ថបទនេះ យើងនឹងពិចារណាអំពីរបៀបដែលយើងអាចធ្វើតាមយោបល់នៅក្នុងបទគម្ពីរប្រចាំឆ្នាំរបស់យើង។

^ វគ្គ 5 បងប្អូនដ៏ស្មោះត្រង់មួយចំនួនមានជំងឺតានតឹងចិត្តឬជំងឺថប់អារម្មណ៍។ ជំងឺនេះគឺជាបញ្ហាសុខភាពធ្ងន់ធ្ងរ ហើយខុសគ្នាពីការខ្វល់ខ្វាយដែលលោកយេស៊ូបានរៀបរាប់។

^ វគ្គ 63 ការពណ៌នាអំពីរូបភាព: (១) ពេញមួយថ្ងៃ បងស្រីម្នាក់អធិដ្ឋានអស់ពីចិត្តអំពីការខ្វល់ខ្វាយរបស់គាត់។

^ វគ្គ 65 ការពណ៌នាអំពីរូបភាព: (២) ក្នុងអំឡុងពេលសម្រាកបាយថ្ងៃត្រង់នៅកន្លែងធ្វើការ គាត់អានបណ្ដាំរបស់ព្រះដើម្បីបានប្រាជ្ញា។

^ វគ្គ 67 ការពណ៌នាអំពីរូបភាព: (៣) គាត់រំពឹងគិតអំពីគំរូល្អនិងគំរូមិនល្អដែលមានក្នុងគម្ពីរ។

^ វគ្គ 69 ការពណ៌នាអំពីរូបភាព: (៤) គាត់បិទបទគម្ពីរដ៏គួរឲ្យលើកទឹកចិត្តដែលគាត់ចង់ចាំភ្ជាប់លើទូទឹកកក។

^ វគ្គ 71 ការពណ៌នាអំពីរូបភាព: (៥) គាត់សប្បាយជាមួយបងប្អូនក្នុងកិច្ចបម្រើផ្សាយ។

^ វគ្គ 73 ការពណ៌នាអំពីរូបភាព: (៦) គាត់ធ្វើឲ្យសេចក្ដីសង្ឃឹមរបស់គាត់កាន់តែមាំមួនឡើងដោយគិតអំពីអនាគត។

ទស្សនាវដ្ដីប៉មយាម សម្រាប់សិក្សា