អត្ថបទសិក្សា ១១
របៀបត្រៀមខ្លួនដើម្បីទទួលការជ្រមុជទឹក
«តើមានអ្វីដែលរារាំងខ្ញុំមិនឲ្យទទួលការជ្រមុជទឹក?»។—សកម្ម. ៨:៣៦
ចម្រៀងលេខ៥០ ខ្ញុំអធិដ្ឋានប្រគល់ខ្លួនជូនព្រះ
សេចក្ដីសង្ខេប a
ទាំងចាស់ទាំងក្មេងនៅទូទាំងផែនដីកំពុងរីកចម្រើនហើយទទួលការជ្រមុជទឹក (សូមមើលវគ្គ១-២)
១-២. បើអ្នកមិនទាន់ត្រៀមខ្លួនរួចហើយដើម្បីទទួលការជ្រមុជទឹក ហេតុអ្វីអ្នកមិនគួរធ្លាក់ទឹកចិត្ត? (សូមមើលរូបភាពនៅក្រប)
បើអ្នកចង់ទទួលការជ្រមុជទឹក អ្នកបានកំណត់គោលដៅដ៏អស្ចារ្យមួយសម្រាប់ខ្លួនឯង។ តើអ្នកត្រៀមខ្លួនទទួលការជ្រមុជទឹកនៅឥឡូវនេះឬទេ? បើអ្នកគិតថាអ្នកបានត្រៀមខ្លួនហើយ ហើយពួកអ្នកចាស់ទុំយល់ព្រម សូមកុំស្ទាក់ស្ទើរទទួលការជ្រមុជទឹកនៅឱកាសក្រោយឡើយ។ បើអ្នកធ្វើដូច្នេះ អ្នកនឹងមានជីវិតដ៏សប្បាយក្នុងកិច្ចបម្រើព្រះយេហូវ៉ា។
២ ចុះយ៉ាងណា បើពួកគេប្រាប់អ្នកឲ្យរីកចម្រើនថែមទៀតមុនទទួលការជ្រមុជទឹក? ឬតើអ្នកទទួលស្គាល់ចំណុចនេះដោយខ្លួនឯងឬទេ? បើដូច្នេះ សូមកុំធ្លាក់ទឹកចិត្តឡើយ។ អ្នកអាចរីកចម្រើនឈានទៅរកគោលដៅដ៏សំខាន់នេះ មិនថាអ្នកក្មេងឬចាស់ក្ដី។
«តើមានអ្វីដែលរារាំងខ្ញុំ?»
៣. តើមន្ត្រីជាន់ខ្ពស់ជនជាតិអេត្យូពីបានសួរភីលីពនូវសំណួរអ្វី ហើយតើនេះនាំឲ្យមានសំណួរអ្វី? (សកម្មភាព ៨:៣៦, ៣៨)
៣ សូមអាន សកម្មភាព ៨:៣៦, ៣៨។ មន្ត្រីជាន់ខ្ពស់ម្នាក់ពីស្រុកអេត្យូពីបានសួរភីលីពដែលជាអ្នកផ្សព្វផ្សាយដំណឹងល្អថា៖ «តើមានអ្វីដែលរារាំងខ្ញុំមិនឲ្យទទួលការជ្រមុជទឹក?»។ បុរសជនជាតិអេត្យូពីនោះចង់ទទួលការជ្រមុជទឹក ប៉ុន្តែតើគាត់ពិតជាបានត្រៀមខ្លួនដើម្បីធ្វើតាមជំហានដ៏សំខាន់នេះឬទេ?
មន្ត្រីជនជាតិអេត្យូពីបានតាំងចិត្តបន្តរៀនអំពីព្រះយេហូវ៉ា (សូមមើលវគ្គ៤)
៤. តើមន្ត្រីជនជាតិអេត្យូពីបង្ហាញយ៉ាងណាថាគាត់តាំងចិត្តបន្តរៀន?
៤ បុរសជនជាតិអេត្យូពី«បានទៅក្រុងយេរូសាឡិមដើម្បីគោរពបូជា»។ (សកម្ម. ៨:២៧) ដូច្នេះ គាត់ទំនងជាអ្នកចូលសាសនាយូដា។ គាត់ច្បាស់ជាបានរៀនអំពីព្រះយេហូវ៉ាពីសំណេរដ៏ពិសិដ្ឋនៃបទគម្ពីរភាសាហេប្រឺ។ ប៉ុន្តែគាត់ចង់រៀនថែមទៀត។ តាមពិត ពេលដែលភីលីពបានជួបមន្ត្រីនោះនៅតាមផ្លូវ តើភីលីពបានឃើញបុរសនោះកំពុងធ្វើអ្វី? គឺគាត់កំពុងអានរមូរអំពីសំណេររបស់អេសាយដែលជាអ្នកប្រកាសទំនាយ។ (សកម្ម. ៨:២៨) នោះគឺជាសេចក្ដីបង្រៀនដ៏ជ្រាលជ្រៅពីគម្ពីរ។ មន្ត្រីជាន់ខ្ពស់នោះមិនគ្រាន់តែពេញចិត្តនឹងការរៀនសេចក្ដីបង្រៀនបឋមក្នុងគម្ពីរប៉ុណ្ណោះទេ តែគាត់ក៏ចង់បន្តរៀនថែមទៀតដែរ។
៥. តើបុរសជនជាតិអេត្យូពីបានធ្វើអ្វីចំពោះអ្វីដែលគាត់បានរៀន?
៥ បុរសនោះជាមន្ត្រីជាន់ខ្ពស់របស់មហាក្សត្រីខាន់ឌីសនៃស្រុកអេត្យូពី។ គាត់‹ជាអ្នកមើលការខុសត្រូវលើឃ្លាំងទ្រព្យទាំងអស់របស់មហាក្សត្រីនោះ›។ (សកម្ម. ៨:២៧) ដូច្នេះ គាត់ច្បាស់ជាជាប់រវល់ ហើយមានភារកិច្ចជាច្រើន។ ប៉ុន្តែ គាត់បានលៃទុកពេលដើម្បីគោរពប្រណិប័តន៍ព្រះយេហូវ៉ា។ គាត់មិនស្កប់ចិត្តគ្រាន់តែរៀនសេចក្ដីពិតប៉ុណ្ណោះទេ គាត់ក៏ប្រព្រឹត្តតាមអ្វីដែលគាត់បានរៀនដែរ។ ដូច្នេះ គាត់បានធ្វើដំណើរពីស្រុកអេត្យូពីដើម្បីគោរពប្រណិប័តន៍ព្រះយេហូវ៉ានៅឯវិហារនាក្រុងយេរូសាឡិម។ ការធ្វើដំណើរនោះតម្រូវឲ្យចំណាយពេលនិងធនធានជាច្រើន ប៉ុន្តែបុរសនោះចង់គោរពប្រណិប័តន៍ព្រះយេហូវ៉ា ទោះជាគាត់ត្រូវធ្វើយ៉ាងណាក៏ដោយ។
៦-៧. តើសេចក្ដីស្រឡាញ់របស់បុរសជនជាតិអេត្យូពីចំពោះព្រះយេហូវ៉ាបានបន្តកើនឡើងយ៉ាងដូចម្ដេច?
៦ មន្ត្រីជនជាតិអេត្យូពីនេះបានរៀនពីភីលីពនូវសេចក្ដីបង្រៀនខ្លះដ៏សំខាន់ដែលថ្មីសម្រាប់គាត់ រួមមានអត្តសញ្ញាណរបស់មេស្ស៊ី។ (សកម្ម. ៨:៣៤, ៣៥) មន្ត្រីជាន់ខ្ពស់នេះទំនងជាសប្បាយចិត្តរៀនអំពីអ្វីដែលលោកយេស៊ូបានធ្វើសម្រាប់គាត់។ តើគាត់បានធ្វើអ្វីក្រោយពីគាត់បានរៀនអ្វីទាំងនោះ? គាត់អាចបន្តធ្វើជាអ្នកចូលសាសនាយូដាដែលមានគេគោរពក៏បាន។ ប៉ុន្តែ សេចក្ដីស្រឡាញ់របស់គាត់ចំពោះព្រះយេហូវ៉ានិងបុត្ររបស់លោកបានកើនឡើង។ នេះបានជំរុញចិត្តគាត់ឲ្យធ្វើការសម្រេចចិត្តដ៏សំខាន់ គឺគាត់បានទទួលការជ្រមុជទឹកធ្វើជាអ្នកកាន់តាមលោកយេស៊ូគ្រិស្ត។ ដោយឃើញថាបុរសនោះមានគុណសម្បត្តិគ្រប់គ្រាន់ ភីលីពបានជ្រមុជទឹកឲ្យគាត់។
៧ បើអ្នកធ្វើតាមគំរូរបស់មន្ត្រីជនជាតិអេត្យូពីនោះ អ្នកអាចត្រៀមខ្លួនដើម្បីទទួលការជ្រមុជទឹក។ អ្នកក៏នឹងអាចនិយាយដោយជឿជាក់ថា៖ «តើមានអ្វីដែលរារាំងខ្ញុំមិនឲ្យទទួលការជ្រមុជទឹក?»។ សូមពិចារណាអំពីរបៀបដែលអ្នកអាចធ្វើតាមអ្វីដែលបុរសជនជាតិអេត្យូពីម្នាក់នោះបានធ្វើ គឺគាត់បានបន្តរៀន បានប្រព្រឹត្តតាមអ្វីដែលគាត់រៀន ហើយបន្តបង្កើនសេចក្ដីស្រឡាញ់របស់គាត់ចំពោះព្រះ។
ចូរបន្តរៀន
៨. តើយ៉ូហាន ១៧:៣ចែងថាអ្នកត្រូវធ្វើអ្វី?
៨ សូមអាន យ៉ូហាន ១៧:៣និងកំណត់សម្គាល់។ តើពាក្យទាំងនេះរបស់លោកយេស៊ូបានជួយអ្នកឲ្យសម្រេចចិត្តសិក្សាគម្ពីរឬទេ? ពាក្យទាំងនេះបានជួយយើងជាច្រើននាក់ឲ្យធ្វើដូច្នេះ។ ប៉ុន្តែ តើពាក្យទាំងនេះក៏ប្រាប់យើងឲ្យបន្តរៀនឬទេ? គឺមែន។ យើងនឹងមិនឈប់ទទួល«ចំណេះអំពី . . . ព្រះពិតតែមួយ»ឡើយ។ (អទ. ៣:១១) យើងនឹងបន្តរៀនជារៀងរហូត។ កាលដែលយើងកាន់តែរៀន យើងនឹងកាន់តែចូលទៅជិតព្រះយេហូវ៉ា។—ចសព. ៧៣:២៨
៩. តើយើងត្រូវធ្វើអ្វីក្រោយពីបានរៀនសេចក្ដីបង្រៀនបឋមក្នុងគម្ពីរ?
៩ ពេលយើងចាប់ផ្ដើមរៀនអំពីព្រះយេហូវ៉ា យើងរៀនតែសេចក្ដីបង្រៀនបឋមៗក្នុងគម្ពីរប៉ុណ្ណោះ។ ក្នុងសំបុត្ររបស់សាវ័កប៉ូលទៅកាន់គ្រិស្តសាសនិកជនជាតិហេប្រឺ គាត់បានហៅសេចក្ដីបង្រៀននេះថា៖ «បឋមសេចក្ដី»។ គាត់មិនមើលងាយ«សេចក្ដីបង្រៀនជាមូលដ្ឋាន»ទេ ផ្ទុយទៅវិញគាត់បានប្រដូចសេចក្ដីបង្រៀនទាំងនោះទៅនឹងទឹកដោះដែលបំប៉នទារក។ (ហេ. ៥:១២; ៦:១) ប៉ុន្តែ គាត់ក៏បានដាស់តឿនគ្រិស្តសាសនិកទាំងអស់ឲ្យបន្តរៀនលើសពីសេចក្ដីបង្រៀនបឋមទាំងនោះដោយរៀនសេចក្ដីបង្រៀនដ៏ជ្រាលជ្រៅជាងក្នុងបណ្ដាំព្រះ។ តើអ្នកចង់រៀនសេចក្ដីបង្រៀនជ្រាលជ្រៅជាងក្នុងគម្ពីរឬទេ? តើអ្នកចង់បន្តរីកចម្រើននិងបន្តរៀនអំពីព្រះយេហូវ៉ា ព្រមទាំងគោលបំណងរបស់លោកឬទេ?
១០. ហេតុអ្វីការសិក្សាគឺមិនស្រួលសម្រាប់អ្នកខ្លះ?
១០ ប៉ុន្តែចំពោះយើងជាច្រើននាក់ ការសិក្សាគឺមិនស្រួលទេ។ ចុះយ៉ាងណាអ្នកវិញ? នៅសាលា តើអ្នកបានរៀនអាននិងសិក្សាយ៉ាងពូកែឬទេ? តើអ្នកចូលចិត្តសិក្សា ហើយមានអារម្មណ៍ថាអ្នកបានរៀនច្រើនឬទេ? ឬតើអ្នកគិតថាអ្នកមិនពូកែរៀនសៀវភៅផ្សេងៗឬ? បើដូច្នេះ សូមដឹងថាមនុស្សជាច្រើនមានអារម្មណ៍ដូចអ្នកដែរ។ ទោះជាយ៉ាងនោះក៏ដោយ ព្រះយេហូវ៉ាអាចជួយអ្នកបាន។ លោកជាបុគ្គលដ៏ល្អឥតខ្ចោះ និងជាគ្រូបង្រៀនដ៏ល្អបំផុត។
១១. តើព្រះយេហូវ៉ាបង្ហាញយ៉ាងណាថាលោកជា«គ្រូបង្រៀនដ៏ឧត្ដមបំផុត»?
១១ ព្រះយេហូវ៉ាហៅខ្លួនលោកថា៖ «គ្រូបង្រៀនដ៏ឧត្ដមបំផុត»របស់អ្នក។ (អេ. ៣០:២០, ២១) លោកជាគ្រូបង្រៀនដែលមានចិត្តអត់ធ្មត់ សប្បុរស និងយល់អារម្មណ៍។ លោករកមើលចំណុចល្អរបស់សិស្សលោក។ (ចសព. ១៣០:៣) ម្យ៉ាងទៀត លោកមិនតម្រូវឲ្យយើងធ្វើអ្វីដែលហួសពីសមត្ថភាពរបស់យើងឡើយ។ សូមចាំថា លោកបានបង្កើតខួរក្បាលរបស់យើងដែលជាអំណោយដ៏អស្ចារ្យមួយ។ (ចសព. ១៣៩:១៤) យើងមានសេចក្ដីប៉ងប្រាថ្នាចង់រៀនតាំងពីយើងកើតមក។ អ្នកបង្កើតរបស់យើងចង់ឲ្យយើងបន្តរៀនជារៀងរហូត ហើយសប្បាយនឹងការរៀននោះ។ ដូច្នេះ គឺជាការឈ្លាសវៃឲ្យយើង«បណ្ដុះការស្រេកឃ្លាន»ចំពោះសេចក្ដីពិតក្នុងគម្ពីរនៅឥឡូវនេះ។ (១ពេ. ២:២) សូមកំណត់គោលដៅដែលអ្នកអាចសម្រេចបាន ព្រមទាំងអាននិងសិក្សាគម្ពីរជាទៀងទាត់។ (យ៉ូស. ១:៨) ដោយមានជំនួយពីព្រះយេហូវ៉ា អ្នកនឹងរៀនឲ្យចេះចូលចិត្តអាននិងសិក្សាអំពីលោកកាន់តែច្រើនឡើង។
១២. ហេតុអ្វីយើងគួរសិក្សាអំពីជីវិតនិងកិច្ចបម្រើរបស់លោកយេស៊ូ?
១២ សូមចំណាយពេលជាទៀងទាត់ដើម្បីរំពឹងគិតអំពីជីវិតនិងកិច្ចបម្រើរបស់លោកយេស៊ូ។ គឺសំខាន់ចាំបាច់ដែលយើងយកតម្រាប់លោកយេស៊ូយ៉ាងដិតដល់ បើយើងចង់បម្រើព្រះយេហូវ៉ាជាពិសេសក្នុងអំឡុងគ្រាដ៏ពិបាកនេះ។ (១ពេ. ២:២១) លោកយេស៊ូបានប្រាប់ពួកអ្នកកាន់តាមលោកថា ពួកគេនឹងជួបប្រទះបញ្ហាផ្សេងៗ។ (លូក. ១៤:២៧, ២៨) ប៉ុន្តែ លោកជឿជាក់ថាពួកអ្នកកាន់តាមពិតលោកអាចរក្សាភាពស្មោះត្រង់ចំពោះព្រះ ដូចលោកយេស៊ូដែរ។ (យ៉ូន. ១៦:៣៣) សូមសិក្សាព័ត៌មានអំពីជីវិតរបស់លោកយេស៊ូនិងកំណត់គោលដៅធ្វើតាមគំរូរបស់លោកក្នុងជីវិតប្រចាំថ្ងៃរបស់អ្នក។
១៣. តើអ្នកគួរបន្តសុំអ្វីពីព្រះយេហូវ៉ា ហើយហេតុអ្វី?
១៣ ការមានចំណេះគឺមិនគ្រប់គ្រាន់ទេ។ មូលហេតុដែលអ្នកត្រូវការចំណេះគឺដើម្បីអ្នកអាចរៀនថែមទៀតអំពីព្រះយេហូវ៉ា ហើយបណ្ដុះឲ្យមានគុណសម្បត្តិដូចជាសេចក្ដីស្រឡាញ់ចំពោះលោកនិងជំនឿលើលោក។ (១កូ. ៨:១-៣) កាលដែលអ្នកបន្តរៀន សូមសុំព្រះយេហូវ៉ាជួយអ្នកឲ្យមានជំនឿថែមទៀត។ (លូក. ១៧:៥) លោកមិនកំណាញ់នឹងការតបឆ្លើយសេចក្ដីអធិដ្ឋានបែបនេះទេ។ ជំនឿពិតប្រាកដដែលមានមូលដ្ឋានលើចំណេះត្រឹមត្រូវអំពីព្រះរបស់យើងនឹងជួយអ្នកឲ្យរីកចម្រើន។—យ៉ា. ២:២៦
ចូរបន្តធ្វើតាមអ្វីដែលអ្នករៀន
មុនទឹកជំនន់ ណូអេនិងក្រុមគ្រួសារគាត់បានប្រព្រឹត្តតាមអ្វីដែលពួកគេបានរៀនយ៉ាងស្មោះត្រង់ (សូមមើលវគ្គ១៤)
១៤. តើសាវ័កពេត្រុសបានលើកបញ្ជាក់អំពីសារៈសំខាន់នៃការធ្វើតាមអ្វីដែលយើងរៀនតាមរបៀបណា? (សូមមើលរូបភាពផងដែរ)
១៤ សាវ័កពេត្រុសបានលើកបញ្ជាក់ថា គឺសំខាន់ណាស់ឲ្យពួកអ្នកកាន់តាមគ្រិស្តបន្តធ្វើតាមអ្វីដែលពួកគេរៀន។ គាត់បានលើកឡើងនូវកំណត់ហេតុក្នុងគម្ពីរអំពីណូអេ។ ព្រះយេហូវ៉ាបានប្រាប់ណូអេថាតាមរយៈទឹកជំនន់ លោកនឹងបំផ្លាញមនុស្សអាក្រក់នៅសម័យនោះ។ ការគ្រាន់តែដឹងថាទឹកជំនន់នឹងកើតឡើងគឺមិនអាចសង្គ្រោះណូអេនិងក្រុមគ្រួសារគាត់ទេ។ សូមកត់សម្គាល់ថាពេត្រុសកំពុងនិយាយអំពីគ្រាមុនទឹកជំនន់ និង«ខណៈដែលទូកធំកំពុងត្រូវសង់»។ (១ពេ. ៣:២០) មែនហើយ ណូអេនិងក្រុមគ្រួសាររបស់គាត់បានធ្វើតាមអ្វីដែលពួកគេបានរៀនពីព្រះដោយសង់ទូកធំមួយ។ (ហេ. ១១:៧) បន្ទាប់មក ពេត្រុសបានប្រដូចអ្វីដែលណូអេបានធ្វើទៅនឹងការជ្រមុជទឹក ដោយសរសេរថា៖ «ព្រឹត្តិការណ៍នោះជានិមិត្តរូបនៃអ្វីដែលកំពុងសង្គ្រោះអ្នករាល់គ្នានៅឥឡូវនេះ ពោលគឺការទទួលការជ្រមុជទឹក»។ (១ពេ. ៣:២១) ដូច្នេះ យើងអាចប្រដូចកិច្ចការដែលអ្នកកំពុងធ្វើនៅឥឡូវនេះឲ្យត្រៀមខ្លួនដើម្បីទទួលការជ្រមុជទឹក ទៅនឹងកិច្ចការសង់ទូកធំដែលណូអេនិងក្រុមគ្រួសារគាត់បានធ្វើអស់ជាច្រើនឆ្នាំ។ តើអ្នកត្រូវធ្វើអ្វីដើម្បីត្រៀមខ្លួនទទួលការជ្រមុជទឹក?
១៥. តើយើងបង្ហាញថាយើងប្រែចិត្តយ៉ាងស្មោះយ៉ាងដូចម្ដេច?
១៥ ក្នុងចំណោមអ្វីដំបូងដែលយើងត្រូវធ្វើ គឺយើងត្រូវប្រែចិត្តយ៉ាងស្មោះពីការខុសឆ្គងរបស់យើង។ (សកម្ម. ២:៣៧, ៣៨) ពេលយើងប្រែចិត្តយ៉ាងស្មោះ យើងនឹងធ្វើការកែប្រែពិតប្រាកដ។ តើអ្នកបានលះចោលការប្រព្រឹត្តណាដែលព្រះយេហូវ៉ាមិនពេញចិត្ត ដូចជារបៀបរស់នៅប្រាសចាកសីលធម៌ ការប្រើថ្នាំជក់ ឬការប្រើពាក្យគម្រក់ឬពាក្យប្រមាថមើលងាយហើយឬនៅ? (១កូ. ៦:៩, ១០; ២កូ. ៧:១; អេភ. ៤:២៩) បើអ្នកមិនទាន់ធ្វើដូច្នេះទេ សូមបន្តព្យាយាមធ្វើការផ្លាស់ប្ដូរ។ សូមនិយាយជាមួយអ្នកបង្រៀនគម្ពីរ ឬសុំពួកអ្នកចាស់ទុំក្នុងក្រុមជំនុំឲ្យជួយនិងផ្ដល់ការណែនាំដល់អ្នក។ បើអ្នកនៅក្មេងនិងរស់នៅក្នុងបន្ទុកគ្រួសារ សូមបន្តសុំជំនួយពីឪពុកម្ដាយរបស់អ្នកដើម្បីលះចោលទម្លាប់អាក្រក់ណាដែលអាចរារាំងអ្នកមិនឲ្យទទួលការជ្រមុជទឹក។
១៦. តើការមានកាលវិភាគល្អក្នុងការគោរពប្រណិប័តន៍ព្រះរួមបញ្ចូលអ្វីខ្លះ?
១៦ ការរក្សាទម្លាប់ល្អក្នុងការគោរពប្រណិប័តន៍ព្រះក៏សំខាន់ដែរ។ នេះនឹងរួមបញ្ចូលការចូលរួមកិច្ចប្រជុំគ្រិស្តសាសនិក និងការមានចំណែកក្នុងកិច្ចប្រជុំនោះ។ (ហេ. ១០:២៤, ២៥) ម្យ៉ាងទៀត នៅពេលដែលអ្នកមានគុណសម្បត្តិគ្រប់គ្រាន់ដើម្បីចូលរួមក្នុងកិច្ចបម្រើផ្សាយជាគ្រិស្តសាសនិក សូមធ្វើឲ្យប្រាកដថាអ្នកចូលរួមជាទៀងទាត់។ កាលដែលអ្នកកាន់តែរួមចំណែកក្នុងកិច្ចការផ្សព្វផ្សាយ អ្នកនឹងកាន់តែចូលចិត្តកិច្ចការនោះ។ (២ធី. ៤:៥) បើអ្នកនៅក្មេងនិងរស់នៅក្នុងបន្ទុកគ្រួសារ សូមសួរខ្លួនអ្នកថា ‹តើឪពុកម្ដាយខ្ញុំត្រូវរំលឹកខ្ញុំឲ្យចូលរួមកិច្ចប្រជុំឬកិច្ចការផ្សព្វផ្សាយឬទេ ឬតើខ្ញុំធ្វើដោយខ្លួនឯង?›។ ការដែលអ្នកចាត់វិធានការធ្វើដូច្នេះដោយខ្លួនអ្នកផ្ទាល់ អ្នកបង្ហាញជំនឿ ព្រមទាំងបង្ហាញសេចក្ដីស្រឡាញ់ និងចិត្តកតញ្ញូរបស់អ្នកចំពោះព្រះយេហូវ៉ា។ អ្វីទាំងនេះគឺជាអំណោយដែលអ្នកជូនទៅព្រះយេហូវ៉ាដែល«បង្ហាញពីភក្ដីភាពចំពោះព្រះ»។ (២ពេ. ៣:១១; ហេ. ១៣:១៥) អំណោយទាំងអស់ដែលយើងជូនទៅព្រះយេហូវ៉ាដោយស្ម័គ្រពីចិត្ត គឺនាំឲ្យលោកពេញចិត្ត។ (សូមពិនិត្យបន្ថែម កូរិនថូសទី២ ៩:៧) យើងធ្វើដូច្នេះ ដោយសារយើងសប្បាយជូនអ្វីដ៏ល្អបំផុតទៅព្រះរបស់យើង។
ចូរបន្តស្រឡាញ់ព្រះយេហូវ៉ាកាន់តែខ្លាំងឡើង
១៧-១៨. តើគុណសម្បត្តិដ៏សំខាន់ចាំបាច់អ្វីនឹងជួយអ្នកឲ្យរីកចម្រើនឈានទៅរកការជ្រមុជទឹក ហើយហេតុអ្វី? (សុភាសិត ៣:៣-៦)
១៧ កាលដែលអ្នកបន្តរីកចម្រើនឈានទៅដល់ការជ្រមុជទឹក អ្នកនឹងជួបការពិបាកផ្សេងៗ។ អ្នកខ្លះប្រហែលជាសើចចំអកអ្នកដោយសារជំនឿថ្មីរបស់អ្នក។ ពួកគេប្រហែលជាថែមទាំងប្រឆាំងឬបៀតបៀនអ្នក។ (២ធី. ៣:១២) កាលដែលអ្នកខំប្រឹងយកឈ្នះទម្លាប់អាក្រក់ អ្នកប្រហែលជានៅតែធ្វើខុសនោះម្ដងម្កាល ឬអ្នកប្រហែលជាខ្វះចិត្តអត់ធ្មត់និងធុញទ្រាន់ដោយសារគោលដៅរបស់អ្នកហាក់ដូចជានៅឆ្ងាយ។ តើអ្វីនឹងជួយអ្នកឲ្យស៊ូទ្រាំ? គុណសម្បត្តិដ៏សំខាន់មួយ ពោលគឺសេចក្ដីស្រឡាញ់ចំពោះព្រះយេហូវ៉ា។
១៨ សេចក្ដីស្រឡាញ់របស់អ្នកចំពោះព្រះយេហូវ៉ាគឺជាគុណសម្បត្តិដ៏ថ្លៃថ្លាបំផុតដែលអ្នកមាន។ (សូមអាន សុភាសិត ៣:៣-៦) សេចក្ដីស្រឡាញ់ខ្លាំងក្លាចំពោះព្រះអាចជួយអ្នកឲ្យមិនឈប់ព្យាយាមពេលមានការពិបាកក្នុងជីវិត។ គម្ពីរច្រើនតែលើកឡើងអំពីសេចក្ដីស្រឡាញ់ដ៏ស្មោះត្រង់របស់ព្រះយេហូវ៉ាចំពោះអ្នកបម្រើលោក។ សេចក្ដីស្រឡាញ់នេះមានន័យថាលោកនឹងមិនបោះបង់ចោលពួកអ្នកបម្រើរបស់លោក ឬឈប់ស្រឡាញ់ពួកគេទេ។ (ចសព. ១០០:៥) អ្នកបានត្រូវបង្កើតមកឲ្យមានភាពដូចលោក។ (ដក. ១:២៦) ដូច្នេះ តើអ្នកអាចបង្ហាញសេចក្ដីស្រឡាញ់បែបនេះយ៉ាងដូចម្ដេច?
អ្នកអាចប្រាប់ព្រះយេហូវ៉ារាល់ថ្ងៃអំពីចិត្តកតញ្ញូរបស់អ្នក (សូមមើលវគ្គ១៩) b
១៩. តើអ្នកអាចមានចិត្តកតញ្ញូកាន់តែខ្លាំងឡើងចំពោះអ្វីទាំងអស់ដែលព្រះយេហូវ៉ាបានធ្វើដើម្បីអ្នកតាមរបៀបណា? (កាឡាទី ២:២០)
១៩ ដំបូង សូមមានចិត្តកតញ្ញូ។ (១ថែ. ៥:១៨) រាល់ថ្ងៃ សូមសួរខ្លួនអ្នកថា ‹តើព្រះយេហូវ៉ាបានបង្ហាញសេចក្ដីស្រឡាញ់ចំពោះខ្ញុំតាមរបៀបណាខ្លះ?›។ បន្ទាប់មក សូមធ្វើឲ្យប្រាកដថាអ្នកអធិដ្ឋានអរគុណព្រះយេហូវ៉ាដោយលើកឡើងអំពីអ្វីជាក់លាក់ដែលលោកបានធ្វើសម្រាប់អ្នក។ សូមទទួលស្គាល់ថាព្រះយេហូវ៉ាធ្វើអ្វីល្អៗសម្រាប់អ្នកផ្ទាល់ដោយសារលោកស្រឡាញ់អ្នក ដូចដែលសាវ័កប៉ូលបានទទួលស្គាល់ចំណុចនេះ។ (សូមអាន កាឡាទី ២:២០) សូមសួរខ្លួនអ្នកថា ‹តើខ្ញុំចង់បង្ហាញលោកថាខ្ញុំស្រឡាញ់លោកវិញឬទេ?›។ សេចក្ដីស្រឡាញ់ចំពោះព្រះយេហូវ៉ានឹងជួយអ្នកឲ្យបន្តតយុទ្ធនឹងសេចក្ដីល្បួង ហើយស៊ូទ្រាំនឹងការពិបាកផ្សេងៗដោយមិនរួញរា។ នេះនឹងជំរុញចិត្តអ្នកឲ្យបន្តគោរពប្រណិប័តន៍ព្រះយេហូវ៉ាជាទៀងទាត់ដោយបង្ហាញលោកដែលជាបិតារបស់អ្នកថាអ្នកស្រឡាញ់លោករាល់ថ្ងៃ។
២០. តើការប្រគល់ខ្លួនជូនព្រះយេហូវ៉ារួមបញ្ចូលអ្វីខ្លះ ហើយតើការសម្រេចចិត្តនេះគឺសំខាន់យ៉ាងណា?
២០ នៅពេលក្រោយមក សេចក្ដីស្រឡាញ់របស់អ្នកចំពោះព្រះយេហូវ៉ានឹងជំរុញចិត្តអ្នកឲ្យពោលការអធិដ្ឋានពិសេសមួយ គឺអ្នកនឹងប្រគល់ខ្លួនជូនព្រះយេហូវ៉ា។ សូមចាំថា ពេលអ្នកប្រគល់ខ្លួនជូនព្រះយេហូវ៉ា អ្នកមានសេចក្ដីសង្ឃឹមដ៏អស្ចារ្យនេះគឺ៖ អ្នកជារបស់ព្រះយេហូវ៉ាជារៀងរហូត។ ពេលអ្នកប្រគល់ខ្លួនជូនព្រះយេហូវ៉ា អ្នកសន្យាថាអ្នកនឹងបម្រើលោកទាំងពេលសប្បាយ ទាំងពេលលំបាក។ នេះជាសេចក្ដីសន្យាដែលអ្នកធ្វើតែម្ដង មិនមែនម្ដងហើយម្ដងទៀតទេ។ ពិតមែនថា ពេលយើងប្រគល់ខ្លួនជូនព្រះ យើងធ្វើការសម្រេចចិត្តដ៏សំខាន់ណាស់។ ប៉ុន្តែ សូមគិតអំពីចំណុចនេះ៖ ក្នុងមួយជីវិត អ្នកនឹងធ្វើការសម្រេចចិត្តជាច្រើន ហើយមានការសម្រេចចិត្តខ្លះល្អមែន ប៉ុន្តែគ្មានការសម្រេចចិត្តណាដែលល្អជាងការសម្រេចចិត្តឲ្យប្រគល់ខ្លួនជូនព្រះយេហូវ៉ាឡើយ។ (ចសព. ៥០:១៤) សាថាននឹងព្យាយាមធ្វើឲ្យសេចក្ដីស្រឡាញ់របស់អ្នកចំពោះបិតាអ្នកថយចុះ ដោយសង្ឃឹមថាអ្នកនឹងលះចោលចិត្តស្មោះឥតងាករេចំពោះលោក។ ប៉ុន្តែសូមកុំឲ្យវាឈ្នះអ្នកឡើយ! (យ៉ូប ២៧:៥) ពេលអ្នកមានសេចក្ដីស្រឡាញ់ជាខ្លាំងចំពោះព្រះយេហូវ៉ា នោះនឹងជួយអ្នកឲ្យរស់នៅស្របតាមការប្រគល់ខ្លួនជូនលោក ហើយចូលកាន់តែជិតបិតារបស់អ្នកដែលនៅស្ថានសួគ៌។
២១. ហេតុអ្វីយើងអាចនិយាយថាការជ្រមុជទឹកមិនមែនជាទីបញ្ចប់ តែជាទីចាប់ផ្ដើមវិញ?
២១ ក្រោយពីអ្នកបានប្រគល់ខ្លួនជូនព្រះយេហូវ៉ា សូមនិយាយជាមួយអ្នកចាស់ទុំក្នុងក្រុមជំនុំរបស់អ្នកអំពីការធ្វើតាមជំហានបន្ទាប់ដ៏សំខាន់ចាំបាច់។ ប៉ុន្តែ សូមចាំជានិច្ចថាការជ្រមុជទឹកមិនមែនជាទីបញ្ចប់ទេ តែជាទីចាប់ផ្ដើមវិញ។ នេះជាទីចាប់ផ្ដើមនៃវិថីជីវិតជាអ្នកបម្រើព្រះយេហូវ៉ាជាដរាបតទៅ។ ដូច្នេះ សូមពង្រឹងសេចក្ដីស្រឡាញ់របស់អ្នកចំពោះបិតាអ្នកនៅឥឡូវនេះ។ សូមកំណត់គោលដៅដើម្បីអ្នកអាចមានសេចក្ដីស្រឡាញ់កាន់តែខ្លាំងឡើងពីមួយថ្ងៃទៅមួយថ្ងៃ។ ការធ្វើដូច្នេះនឹងជំរុញចិត្តអ្នកឲ្យទទួលការជ្រមុជទឹក។ នោះនឹងជាថ្ងៃដ៏អស្ចារ្យ! ប៉ុន្តែនេះគ្រាន់តែជាទីចាប់ផ្ដើម។ សូមឲ្យសេចក្ដីស្រឡាញ់របស់អ្នកចំពោះព្រះយេហូវ៉ានិងបុត្ររបស់លោកបន្តកើនឡើងជារៀងរហូត!
ចម្រៀងលេខ១៣៥ ពាក្យអង្វររបស់ព្រះយេហូវ៉ា៖ «កូនអើយ ចូរមានប្រាជ្ញា»
a ដើម្បីរីកចម្រើនរហូតដល់ទទួលការជ្រមុជទឹក យើងត្រូវមានបំណងចិត្តត្រឹមត្រូវ។ យើងក៏ត្រូវធ្វើអ្វីដែលត្រឹមត្រូវដែរ។ ដោយប្រើគំរូរបស់មន្ត្រីជាន់ខ្ពស់ជនជាតិអេត្យូពី យើងនឹងពិចារណាអំពីអ្វីដែលសិស្សគម្ពីរត្រូវធ្វើដើម្បីមានគុណសម្បត្តិគ្រប់គ្រាន់ទទួលការជ្រមុជទឹក។
b ការពណ៌នាអំពីរូបភាព: បងស្រីវ័យក្មេងម្នាក់អធិដ្ឋានប្រាប់ព្រះយេហូវ៉ាអំពីចិត្តកតញ្ញូរបស់គាត់ចំពោះអ្វីដែលលោកបានផ្ដល់ឲ្យ។
