សំណួរពីអ្នកអាន
ហេតុអ្វី«បុរសដែល . . . ជាសាច់ញាតិដែលមានសិទ្ធិលោះ»និយាយថានឹង«មានផលប៉ះពាល់»ដល់មត៌ករបស់គាត់បើគាត់រៀបការជាមួយរូថ? (រូថ ៤:១, ៦)
នៅសម័យគម្ពីរ បើបុរសដែលបានរៀបការហើយ ស្លាប់ដោយគ្មានកូន នោះនាំឲ្យមានសំណួរខ្លះគឺថា៖ តើនឹងមានអ្វីកើតឡើងចំពោះដីដែលជាកម្មសិទ្ធិរបស់គាត់? តើត្រកូលរបស់គាត់នឹងបាត់បង់រហូតឬ? យើងអាចដឹងចម្លើយចំពោះសំណួរទាំងនេះតាមរយៈច្បាប់ម៉ូសេ។
តើមានអ្វីកើតឡើងចំពោះដីរបស់បុរសដែលបានស្លាប់ ឬដែលធ្លាក់ខ្លួនក្រនិងលក់ដីរបស់គាត់? បងប្អូនប្រុសឬសាច់ញាតិជិតដិតរបស់គាត់ អាចលោះឬទិញដីនោះមកវិញ។ យ៉ាងនេះ ក្រុមគ្រួសាររបស់បុរសនោះនៅតែមានដីនោះ។—ចល. ២៥:២៣-២៨; ជប. ២៧:៨-១១
តើតាមរបៀបណាការរៀបចំនោះធ្វើឲ្យប្រាកដថាត្រកូលរបស់បុរសដែលបានស្លាប់នោះមិនសាបសូន្យទៅ? គឺតាមរយៈការរៀបចំឲ្យរៀបការជាមួយបងឬប្អូនថ្លៃ ដូចក្នុងករណីរបស់រូថ។ បុរសម្នាក់នឹងរៀបការជាមួយបងឬប្អូនថ្លៃរបស់គាត់ដើម្បីនាងអាចមានកូនជាមួយគាត់ តែកូននោះនឹងរាប់តាមឈ្មោះរបស់បុរសដែលបានស្លាប់ ហើយក៏នឹងទទួលមត៌ករបស់បុរសដែលបានស្លាប់នោះ។ ការរៀបចំដែលប្រកបដោយសេចក្ដីស្រឡាញ់នេះ ក៏បង្ហាញការយកចិត្តទុកដាក់ចំពោះស្ត្រីមេម៉ាយដែរ។—បច. ២៥:៥-៧; ម៉ាថ. ២២:២៣-២៨
សូមគិតអំពីគំរូរបស់ណាអូមី។ គាត់បានរៀបការជាមួយបុរសម្នាក់ឈ្មោះអេលីម៉ាឡេក។ ពេលអេលីម៉ាឡេកនិងកូនប្រុសពីរនាក់ស្លាប់ ណាអូមីមិនមានបុរសណាដែលគាត់អាចពឹងពាក់បានទៀតទេ។ (រូថ ១:១-៥) ក្រោយពីត្រឡប់ទៅស្រុកយូដាវិញ ណាអូមីបានប្រាប់រូថដែលជាកូនប្រសាស្រីរបស់គាត់ឲ្យសុំបូអូសទិញដីរបស់ពួកគាត់វិញ។ បូអូសគឺជាសាច់ញាតិជិតដិតម្នាក់របស់អេលីម៉ាឡេក។ (រូថ ២:១, ១៩, ២០; ៣:១-៤) ប៉ុន្តែ បូអូសដឹងថាមានសាច់ញាតិម្នាក់ទៀតដែលជិតដិតជាងគាត់។ ដូច្នេះ បុរសនោះមានឱកាសមុនដើម្បីសម្រេចចិត្តថាគាត់ចង់ធ្វើជាអ្នកដែលមានសិទ្ធិលោះឬយ៉ាងណា។—រូថ ៣:៩, ១២, ១៣
ដំបូង «សាច់ញាតិដែលមានសិទ្ធិលោះ»សុខចិត្តជួយ។ (រូថ ៤:១-៤) ទោះជានោះនឹងតម្រូវឲ្យគាត់ចំណាយលុយក្ដី គាត់ដឹងថាណាអូមីនឹងមិនអាចមានកូនដែលនឹងទទួលដីជាមត៌កពីអេលីម៉ាឡេកទេ។ បុរសជាសាច់ញាតិដែលមានសិទ្ធិលោះនោះនឹងទទួលដី ហើយដីនោះនឹងទៅជាចំណែកនៃមត៌ករបស់គាត់។ ដូច្នេះ នេះមើលទៅចំណេញដល់គាត់ដែរ។
ប៉ុន្តែ សាច់ញាតិដែលមានសិទ្ធិលោះនោះបានប្ដូរចិត្តរបស់គាត់វិញ ពេលដែលគាត់ដឹងថាគាត់ត្រូវរៀបការជាមួយរូថ។ គាត់និយាយថា៖ «ខ្ញុំមិនអាចលោះបានទេ ព្រោះខ្ញុំខ្លាចថាអាចមានផលប៉ះពាល់ដល់មត៌ករបស់ខ្ញុំ»។ (រូថ ៤:៥, ៦) ហេតុអ្វីគាត់ផ្លាស់ប្ដូរចិត្តដូច្នេះ?
បើសាច់ញាតិដែលមានសិទ្ធិលោះឬបុគ្គលផ្សេងទៀត បានរៀបការជាមួយនឹងរូថ ហើយនាងបង្កើតបានកូនប្រុសម្នាក់ កូននោះនឹងទទួលដីរបស់អេលីម៉ាឡេកជាមត៌ក។ តើនេះនឹង«មានផលប៉ះពាល់»យ៉ាងណាដល់«មត៌ក»របស់សាច់ញាតិដែលមានសិទ្ធិលោះ? គម្ពីរមិនចែងទេ ប៉ុន្តែអាចមានមូលហេតុមួយចំនួន។
ទី១ មើលទៅលុយដែលគាត់ប្រើដើម្បីទិញដីរបស់អេលីម៉ាឡេកត្រូវខាត ដោយសារនៅទីបំផុតដីនោះនឹងមិនទៅជារបស់គាត់ទេ។ ប៉ុន្តែនឹងទៅជាកម្មសិទ្ធិរបស់កូនប្រុសរូថវិញ។
ទី២ គាត់នឹងមានភារកិច្ចផ្គត់ផ្គង់និងថែរក្សាទាំងណាអូមីទាំងរូថ។
ទី៣ បើរូថមានកូនផ្សេងទៀតជាមួយបុរសនោះ ពួកគេនឹងត្រូវចែកកេរ្តិ៍មត៌កជាមួយកូនរបស់គាត់។
ទី៤ បើសាច់ញាតិដែលមានសិទ្ធិលោះមិនមានកូនបង្កើតផ្សេងទៀត កូនប្រុសរបស់រូថនឹងមានសិទ្ធិទទួលទាំងដីរបស់អេលីម៉ាឡេក ទាំងដីរបស់សាច់ញាតិដែលមានសិទ្ធិលោះនោះ។ ដូច្នេះ ពេលសាច់ញាតិដែលមានសិទ្ធិលោះស្លាប់ ដីរបស់គាត់នឹងទៅជាដីរបស់កូនដែលមានឈ្មោះរបស់អេលីម៉ាឡេក មិនមែនឈ្មោះរបស់គាត់ទេ។ សាច់ញាតិដែលមានសិទ្ធិលោះនោះ មិនសុខចិត្តប្រថុយបាត់បង់មត៌ករបស់គាត់ដើម្បីជួយណាអូមីឡើយ។ គាត់ចង់ឲ្យបូអូសដែលជាសាច់ញាតិដែលមានសិទ្ធិលោះបន្ទាប់ក្នុងសែស្រឡាយបំពេញភារកិច្ចនោះវិញ។ បូអូសបានធ្វើដូច្នេះ ដោយសារគាត់ចង់ឲ្យ‹នាងអាចមានកូនស្នងត្រកូលនិងស្នងមត៌ករបស់បុរសដែលបានស្លាប់ទៅនោះ›។—រូថ ៤:១០
តាមមើលទៅ សាច់ញាតិដែលមានសិទ្ធិលោះនោះចាប់អារម្មណ៍ចង់រក្សាឈ្មោះនិងកេរ្តិ៍មត៌ករបស់គាត់ច្រើនជាង។ គាត់គិតតែប្រយោជន៍ផ្ទាល់ខ្លួន។ ប៉ុន្តែ ទោះជាបុរសនោះខំព្យាយាមរក្សាឈ្មោះរបស់គាត់យ៉ាងណាក្ដី សព្វថ្ងៃនេះយើងមិនទាំងស្គាល់ឈ្មោះរបស់គាត់ផង។ គាត់ក៏បានបាត់បង់ឯកសិទ្ធិពិសេសដែលបូអូសបានទទួលដែរ ពោលគឺការមានឈ្មោះក្នុងបញ្ជីនៃពូជពង្សដែលនាំទៅដល់មេស្ស៊ី គឺលោកយេស៊ូគ្រិស្ត។ ដោយសារបុរសនោះគិតតែប្រយោជន៍ផ្ទាល់ខ្លួនដោយមិនព្រមជួយអ្នកដែលត្រូវការជំនួយ នោះគាត់បានទទួលលទ្ធផលដ៏សោកសៅមែន!—ម៉ាថ. ១:៥; លូក. ៣:២៣, ៣២
