អត្ថបទសិក្សា ១០
ហេតុអ្វីអ្នកគួរទទួលការជ្រមុជទឹក?
«អ្នករាល់គ្នាម្នាក់ៗត្រូវទទួលការជ្រមុជទឹក»។—សកម្ម. ២:៣៨
ចម្រៀងលេខ៣៤ ចូររក្សាចិត្តស្មោះឥតងាករេជានិច្ច
សេចក្ដីសង្ខេប a
១-២. តើអ្វីច្រើនតែកើតឡើងពេលមនុស្សទទួលការជ្រមុជទឹក ហើយតើអ្នកគួរពិចារណាអំពីអ្វី?
តើអ្នកធ្លាប់ឃើញក្រុមបងប្អូនដែលនឹងទទួលការជ្រមុជទឹកឬទេ? អ្នកឮពួកគេនិយាយទាំងជឿជាក់ពេលដែលឆ្លើយសំណួរពីរ មុនទទួលការជ្រមុជទឹក។ អ្នកឃើញសមាជិកក្រុមគ្រួសារនិងមិត្តភក្ដិរបស់ពួកគេមានមោទនភាពជាខ្លាំងចំពោះពួកគេ។ ពេលដែលពួកអ្នកទាំងនោះងើបឡើងពីទឹក អ្នកឮសំឡេងទះដៃ ហើយឃើញទឹកមុខពួកគេពេញដោយអំណរ។ ជាមធ្យម រៀងរាល់សប្តាហ៍មនុស្សរាប់ពាន់នាក់ប្រគល់ខ្លួនជូនព្រះយេហូវ៉ា និងទទួលការជ្រមុជទឹកជាសាក្សីរបស់លោក។
២ ចុះយ៉ាងណាអ្នកវិញ? បើអ្នកកំពុងគិតអំពីការទទួលការជ្រមុជទឹក អ្នកគឺជាបុគ្គលពិសេសណាស់ក្នុងពិភពលោកដ៏អាក្រក់នេះ ដោយសារអ្នក«កំពុងស្វែងរកព្រះយេហូវ៉ា»។ (ចសព. ១៤:១, ២) អត្ថបទនេះបានត្រូវសរសេរសម្រាប់អ្នក មិនថាអ្នកក្មេងឬចាស់ក្ដី។ ប៉ុន្តែ យើងដែលបានទទួលការជ្រមុជទឹករួចហើយ ក៏ចង់ពង្រឹងការតាំងចិត្តរបស់យើងដើម្បីបម្រើព្រះយេហូវ៉ាជារៀងរហូតដែរ។ ដូច្នេះ សូមយើងពិចារណាជាមួយគ្នាអំពីមូលហេតុបីក្នុងចំណោមមូលហេតុជាច្រើនដែលយើងចង់បម្រើព្រះយេហូវ៉ា។
អ្នកស្រឡាញ់សេចក្ដីពិតនិងសេចក្ដីសុចរិត
សាថានបានបង្កាច់បង្ខូចនាមដ៏ល្អរបស់ព្រះយេហូវ៉ាអស់រាប់ពាន់ឆ្នាំ ហើយវាបន្ដធ្វើដូច្នេះ (សូមមើលវគ្គ៣-៤)
៣. ហេតុអ្វីអ្នកបម្រើព្រះយេហូវ៉ាស្រឡាញ់អ្វីដែលពិតនិងសុចរិត?(ចម្រៀងសរសើរព្រះ ១១៩:១២៨, ១៦៣)
៣ ព្រះយេហូវ៉ាបានបង្គាប់រាស្ត្រលោកឲ្យ«ស្រឡាញ់សេចក្ដីពិត»។ (សាក. ៨:១៩) លោកយេស៊ូបានដាស់តឿនពួកអ្នកកាន់តាមលោកឲ្យស្វែងរកសេចក្ដីសុចរិត។ (ម៉ាថ. ៥:៦) នេះមានន័យថាយើងត្រូវមានបំណងប្រាថ្នាខ្លាំងដើម្បីធ្វើអ្វីដែលល្អ ត្រឹមត្រូវ និងស្អាតស្អំតាមទស្សនៈរបស់ព្រះ។ តើអ្នកស្រឡាញ់អ្វីដែលពិតនិងសុចរិតឬទេ? យើងប្រាកដថាអ្នកស្រឡាញ់។ អ្នកស្អប់ពាក្យកុហក ព្រមទាំងអ្វីទាំងអស់ដែលខុសនិងអាក្រក់។ (សូមអាន ចម្រៀងសរសើរព្រះ ១១៩:១២៨, ១៦៣) ការកុហកបង្ហាញអំពីបុគ្គលិកលក្ខណៈរបស់សាថានដែលជាអ្នកគ្រប់គ្រងពិភពលោកនេះ។ (យ៉ូន. ៨:៤៤; ១២:៣១) គោលដៅមួយរបស់សាថានគឺបង្កាច់បង្ខូចនាមដ៏បរិសុទ្ធរបស់ព្រះយេហូវ៉ា។ សាថានបានផ្សាយពាក្យកុហកអំពីព្រះរបស់យើងតាំងពីការបះបោរក្នុងសួនអេដែន។ វាបានព្យាយាមធ្វើឲ្យមនុស្សគិតថាព្រះយេហូវ៉ាជាអ្នកគ្រប់គ្រងដែលគិតតែប្រយោជន៍ផ្ទាល់ខ្លួននិងមិនទៀងត្រង់ ហើយថាលោកលាក់របស់ល្អពីមនុស្សជាតិ។ (ដក. ៣:១, ៤, ៥) ការកុហករបស់សាថានអំពីព្រះយេហូវ៉ាបានធ្វើឲ្យមនុស្សគិតអាក្រក់អំពីលោក។ ពេលមនុស្សសម្រេចចិត្តមិន«ស្រឡាញ់សេចក្ដីពិត» សាថានអាចនាំឲ្យពួកគេប្រព្រឹត្តអំពើទុច្ចរិតនិងអាក្រក់គ្រប់បែបយ៉ាង។—រ៉ូម ១:២៥-៣១
៤. តើព្រះយេហូវ៉ាបានបង្ហាញយ៉ាងណាថាលោកជា«ព្រះនៃសេចក្ដីពិត»? (សូមមើលរូបភាពផងដែរ)
៤ ព្រះយេហូវ៉ាជា«ព្រះនៃសេចក្ដីពិត» ហើយដោយចិត្តទូលាយលោកបង្រៀនសេចក្ដីពិតដល់ពួកអ្នកដែលស្រឡាញ់លោក។ (ចសព. ៣១:៥) ដោយធ្វើដូច្នេះ លោកជួយពួកគេឲ្យលែងចាញ់បោកការកុហកពីសាថាន។ ព្រះយេហូវ៉ាក៏បង្រៀនអ្នកបម្រើលោកឲ្យធ្វើជាមនុស្សទៀងត្រង់និងសុចរិតដែរ។ នេះជួយពួកគេឲ្យតម្លៃខ្លួនឯងនិងមានសេចក្ដីសុខសាន្តក្នុងចិត្តច្រើនជាង។ (សុភ. ១៣:៥, ៦) តើលោកបានធ្វើអ្វីទាំងនេះចំពោះអ្នកកាលដែលអ្នកសិក្សាគម្ពីរឬទេ? អ្នកបានរៀនថាផ្លូវរបស់ព្រះយេហូវ៉ាគឺល្អបំផុតសម្រាប់មនុស្សទាំងអស់និងសម្រាប់អ្នកផ្ទាល់។ (ចសព. ៧៧:១៣) ដូច្នេះ អ្នកចង់គាំទ្រសេចក្ដីសុចរិតរបស់ព្រះ។ (ម៉ាថ. ៦:៣៣) អ្នកចង់ការពារសេចក្ដីពិត ហើយបង្ហាញថាអ្វីដែលសាថាននិយាយអំពីព្រះយេហូវ៉ាដែលជាព្រះរបស់យើងគឺមិនពិតទេ។ តើអ្នកអាចធ្វើដូច្នេះយ៉ាងដូចម្ដេច?
៥. តើអ្នកអាចគាំទ្រការពិតនិងសេចក្ដីសុចរិតតាមរបៀបណា?
៥ អ្នកអាចជ្រើសរើសវិថីជីវិតដែលហាក់ដូចជាអ្នកនិយាយថា «ខ្ញុំបដិសេធការកុហករបស់សាថាន និងកាន់ជំហរមាំមួនចំពោះការពិត។ ខ្ញុំចង់ឲ្យព្រះយេហូវ៉ាធ្វើជាអ្នកគ្រប់គ្រងរបស់ខ្ញុំ ហើយខ្ញុំចង់ធ្វើតាមអ្វីដែលលោកមានប្រសាសន៍ថាគឺត្រឹមត្រូវ»។ តើអ្នកធ្វើដូច្នេះយ៉ាងដូចម្ដេច? គឺដោយប្រគល់ខ្លួនជូនលោកក្នុងការអធិដ្ឋាន ហើយបន្ទាប់មកបង្ហាញអំពីការប្រគល់ខ្លួននោះជាសាធារណៈដោយទទួលការជ្រមុជទឹក។ ការស្រឡាញ់អ្វីដែលពិតនិងសុចរិត ជំរុញចិត្តយើងជាខ្លាំងឲ្យសម្រេចចិត្តទទួលការជ្រមុជទឹក។
អ្នកស្រឡាញ់លោកយេស៊ូគ្រិស្ត
៦. តើចម្រៀងសរសើរព្រះ ៤៥:៤ផ្ដល់មូលហេតុអ្វីខ្លះឲ្យអ្នកស្រឡាញ់លោកយេស៊ូគ្រិស្ត?
៦ ហេតុអ្វីអ្នកស្រឡាញ់លោកយេស៊ូគ្រិស្ត? សូមកត់សម្គាល់អំពីមូលហេតុល្អខ្លះៗដែលមាននៅចម្រៀងសរសើរព្រះ ៤៥:៤។ (សូមអាន) លោកយេស៊ូស្រឡាញ់អ្វីដែលពិត សុភាពរាបទាប និងសុចរិត។ បើអ្នកស្រឡាញ់អ្វីដ៏ពិតនិងសុចរិត គឺស្រួលយល់ថាអ្នកក៏ស្រឡាញ់លោកយេស៊ូគ្រិស្តដែរ។ សូមគិតអំពីរបៀបដែលលោកយេស៊ូបានបង្ហាញចិត្តក្លាហានដើម្បីការពារអ្វីដែលពិតនិងសុចរិត។ (យ៉ូន. ១៨:៣៧) ប៉ុន្តែ តើលោកយេស៊ូលើកស្ទួយចិត្តរាបទាបយ៉ាងដូចម្ដេច?
៧. តើអ្វីទាក់ទាញចិត្តអ្នកអំពីចិត្តរាបទាបរបស់លោកយេស៊ូ?
៧ លោកយេស៊ូលើកស្ទួយចិត្តរាបទាបតាមរយៈគំរូរបស់លោក។ ជាឧទាហរណ៍ លោកឲ្យការសរសើរតម្កើងទាំងអស់ទៅបិតាលោក មិនមែនខ្លួនលោកទេ។ (ម៉ាក. ១០:១៧, ១៨; យ៉ូន. ៥:១៩) តើចិត្តរាបទាបរបស់លោកយេស៊ូធ្វើឲ្យអ្នកមានអារម្មណ៍យ៉ាងណា? នេះជំរុញចិត្តអ្នកឲ្យស្រឡាញ់លោកដែលជាបុត្ររបស់ព្រះនិងកាន់តាមលោក មែនទេ? ច្បាស់ជាមែន។ ហេតុអ្វីលោកយេស៊ូមានចិត្តរាបទាប? ពីព្រោះលោកស្រឡាញ់និងយកតម្រាប់បិតាលោកដែលមានចិត្តរាបទាប។ (ចសព. ១៨:៣៥; ហេ. ១:៣) តើអ្នកចង់ចូលទៅជិតលោកយេស៊ូដែលបង្ហាញគុណសម្បត្តិដូចព្រះយេហូវ៉ាយ៉ាងល្អឥតខ្ចោះឬទេ?
៨. ហេតុអ្វីយើងស្រឡាញ់លោកយេស៊ូជាស្ដេចរបស់យើង?
៨ យើងស្រឡាញ់លោកយេស៊ូជាស្ដេចរបស់យើងដោយសារលោកជាអ្នកគ្រប់គ្រងដ៏ល្អបំផុត។ ព្រះយេហូវ៉ាផ្ទាល់បានបង្ហាត់បង្រៀននិងតែងតាំងបុត្រលោកឲ្យធ្វើជាអ្នកគ្រប់គ្រង។ (អេ. ៥០:៤, ៥) សូមគិតផងដែរអំពីសេចក្ដីស្រឡាញ់ដែលលះបង់ប្រយោជន៍ខ្លួនដែលលោកយេស៊ូបានបង្ហាញ។ (យ៉ូន. ១៣:១) ក្នុងនាមជាស្ដេចរបស់យើង លោកយេស៊ូពិតជាសមនឹងទទួលសេចក្ដីស្រឡាញ់ពីអ្នក។ លោកបានពន្យល់ថាពួកអ្នកដែលពិតជាស្រឡាញ់លោក ពោលគឺពួកអ្នកដែលលោកហៅថាជាមិត្តសម្លាញ់របស់លោក បង្ហាញសេចក្ដីស្រឡាញ់របស់ពួកគេដោយប្រព្រឹត្តតាមបញ្ញត្តិរបស់លោក។ (យ៉ូន. ១៤:១៥; ១៥:១៤, ១៥) ការធ្វើជាមិត្តសម្លាញ់របស់បុត្រព្រះយេហូវ៉ាពិតជាកិត្តិយសមែន!
៩. តើការជ្រមុជទឹករបស់គ្រិស្តសាសនិកគឺស្រដៀងនឹងការជ្រមុជទឹករបស់គ្រិស្តតាមរបៀបណា?
៩ បញ្ញត្តិមួយរបស់លោកយេស៊ូគឺថាពួកអ្នកកាន់តាមលោកទទួលការជ្រមុជទឹក។ (ម៉ាថ. ២៨:១៩, ២០) លោកបានទុកគំរូឲ្យយើង។ ការជ្រមុជទឹករបស់លោកខុសពីការជ្រមុជទឹករបស់ពួកអ្នកកាន់តាមលោកតាមរបៀបខ្លះៗ។ (សូមមើលប្រអប់ដែលមានចំណងជើងថា « តើការជ្រមុជទឹករបស់លោកយេស៊ូនិងការជ្រមុជទឹករបស់ពួកអ្នកកាន់តាមលោកខុសគ្នាយ៉ាងណា?») ប៉ុន្តែមានភាពស្រដៀងគ្នាខ្លះ។ ពេលលោកយេស៊ូបានទទួលការជ្រមុជទឹក លោកបង្ហាញថាលោកចង់ធ្វើតាមបំណងប្រាថ្នារបស់បិតាលោក។ (ហេ. ១០:៧) ស្រដៀងគ្នាដែរ ពេលពួកអ្នកកាន់តាមគ្រិស្តទទួលការជ្រមុជទឹក នោះបង្ហាញជាសាធារណៈថាពួកគេបានប្រគល់ខ្លួនជូនព្រះយេហូវ៉ា។ ឥឡូវ អ្វីដ៏សំខាន់បំផុតក្នុងជីវិតរបស់ពួកគេគឺការធ្វើតាមបំណងប្រាថ្នារបស់ព្រះ មិនមែនខ្លួនឯងឡើយ។ ដូច្នេះ ពួកគេកំពុងធ្វើតាមគំរូរបស់លោកម្ចាស់ពួកគេ។
១០. ហេតុអ្វីអ្នកស្រឡាញ់លោកយេស៊ូ ហើយតើសេចក្ដីស្រឡាញ់នេះគួរជំរុញចិត្តអ្នកឲ្យធ្វើអ្វី?
១០ អ្នកទទួលស្គាល់ថាលោកយេស៊ូជាបុត្រតែមួយគត់របស់ព្រះយេហូវ៉ា និងជាស្ដេចដែលព្រះបានតែងតាំងឲ្យគ្រប់គ្រងលើយើង។ អ្នកដឹងថាលោកយេស៊ូមានចិត្តរាបទាប និងយកតម្រាប់បិតាលោកយ៉ាងល្អឥតខ្ចោះ។ អ្នកបានរៀនថាលោកបានផ្ដល់អាហារឲ្យអ្នកដែលស្រេកឃ្លាន សម្រាលទុក្ខអ្នកដែលធ្លាក់ទឹកចិត្ត ហើយថែមទាំងធ្វើឲ្យមនុស្សដែលឈឺជាសះស្បើយ។ (ម៉ាថ. ១៤:១៤-២១) អ្នកបានឃើញរបៀបដែលលោកដឹកនាំក្រុមជំនុំរបស់លោកនៅសព្វថ្ងៃនេះ។ (ម៉ាថ. ២៣:១០) ម្យ៉ាងទៀត អ្នកដឹងថាលោកនឹងធ្វើច្រើនជាងនេះទៅទៀតនៅថ្ងៃអនាគតក្នុងនាមជាស្ដេចនៃរាជាណាចក្រព្រះ។ តើអ្នកអាចបង្ហាញថាអ្នកស្រឡាញ់លោកតាមរបៀបណា? គឺដោយធ្វើតាមគំរូរបស់លោក។ (យ៉ូន. ១៤:២១) អ្នកអាចចាប់ផ្ដើមធ្វើដូច្នេះដោយប្រគល់ខ្លួនជូនព្រះយេហូវ៉ានិងទទួលការជ្រមុជទឹក។
អ្នកស្រឡាញ់ព្រះយេហូវ៉ា
១១. តើអ្វីជាមូលហេតុដ៏សំខាន់បំផុតឲ្យទទួលការជ្រមុជទឹក ហើយហេតុអ្វី?
១១ តើអ្វីជាមូលហេតុសំខាន់បំផុតឲ្យទទួលការជ្រមុជទឹក? លោកយេស៊ូបានរៀបរាប់ថាបញ្ញត្តិដ៏សំខាន់បំផុតរបស់ព្រះគឺថា៖ «អ្នកត្រូវស្រឡាញ់ព្រះយេហូវ៉ាជាព្រះរបស់អ្នក ឲ្យអស់ពីដួងចិត្ត អស់ពីជីវិត អស់ពីសមត្ថភាពរិះគិត និងអស់ពីកម្លាំងកាយ»។ (ម៉ាក. ១២:៣០) តើអ្នកស្រឡាញ់ព្រះដូចដែលពាក្យទាំងនេះរៀបរាប់ឬទេ?
ព្រះយេហូវ៉ាជាប្រភពនៃគ្រប់ទាំងរបស់ល្អដែលអ្នកបានទទួល ហើយនឹងទទួលនៅថ្ងៃខាងមុខ (សូមមើលវគ្គ១២-១៣)
១២. ហេតុអ្វីអ្នកស្រឡាញ់ព្រះយេហូវ៉ា? (សូមមើលរូបភាពផងដែរ)
១២ មានមូលហេតុជាច្រើនឲ្យស្រឡាញ់ព្រះយេហូវ៉ា។ ជាឧទាហរណ៍ អ្នកបានយល់ថាលោកជា«ប្រភពនៃជីវិត» ហើយថាលោកជាអ្នកផ្ដល់«គ្រប់ទាំងរបស់ល្អនិងអំណោយដ៏ល្អឥតខ្ចោះ»។ (ចសព. ៣៦:៩; យ៉ា. ១:១៧) គ្រប់ទាំងរបស់ល្អដែលអ្នកទទួលគឺមកពីព្រះរបស់យើងដែលប្រកបដោយសេចក្ដីស្រឡាញ់និងចិត្តទូលាយ។
១៣. ហេតុអ្វីថ្លៃលោះគឺជាអំណោយដ៏អស្ចារ្យមួយ?
១៣ ថ្លៃលោះគឺជាអំណោយដ៏អស្ចារ្យមួយដែលព្រះយេហូវ៉ាបានផ្ដល់ឲ្យយើង។ ហេតុអ្វីយើងអាចនិយាយដូច្នេះ? សូមគិតអំពីចំណងមិត្តភាពជិតស្និទ្ធរវាងព្រះយេហូវ៉ានិងបុត្ររបស់លោក។ លោកយេស៊ូបានមានប្រសាសន៍ថា៖ «បិតានៅស្ថានសួគ៌ស្រឡាញ់ខ្ញុំ» ហើយ«ខ្ញុំស្រឡាញ់បិតានៅស្ថានសួគ៌»។ (យ៉ូន. ១០:១៧; ១៤:៣១) ចំណងមិត្តភាពរវាងលោកទាំងពីរកាន់តែជិតស្និទ្ធ ពេលដែលលោកទាំងពីរនៅជាមួយគ្នាអស់រាប់ពាន់លានឆ្នាំ។ (សុភ. ៨:២២, ២៣, ៣០) ឥឡូវ សូមគិតថាតើព្រះឈឺចាប់យ៉ាងណាពេលលោកបានអនុញ្ញាតឲ្យបុត្រលោករងទុក្ខនិងស្លាប់។ ព្រះយេហូវ៉ាស្រឡាញ់មនុស្សជាតិខ្លាំងដល់ម្ល៉េះរួមទាំងអ្នកផងដែរ បានជាលោកសុខចិត្តឲ្យបុត្រជាទីស្រឡាញ់របស់លោកជាគ្រឿងបូជាដើម្បីអ្នកនិងអ្នកឯទៀតអាចរស់ជារៀងរហូត។ (យ៉ូន. ៣:១៦; កាឡ. ២:២០) នេះជាមូលហេតុដ៏សំខាន់បំផុតដែលយើងស្រឡាញ់ព្រះ។
១៤. តើអ្នកអាចសម្រេចចិត្តមានគោលដៅជីវិតដ៏ល្អបំផុតអ្វី?
១៤ សេចក្ដីស្រឡាញ់របស់អ្នកចំពោះព្រះយេហូវ៉ាបានកើនឡើងកាលដែលអ្នករៀនថែមទៀតអំពីលោក។ អ្នកទំនងជាចង់ចូលកាន់តែជិតលោកនៅឥឡូវនេះនិងជារៀងរហូត ហើយអ្នកអាចធ្វើដូច្នេះបាន។ ដោយសេចក្ដីសប្បុរស លោកលើកទឹកចិត្តអ្នកឲ្យធ្វើឲ្យចិត្តរបស់លោករីករាយត្រេកអរ។ (សុភ. ២៣:១៥, ១៦) អ្នកអាចធ្វើដូច្នេះ មិនគ្រាន់តែតាមរយៈពាក្យសម្ដីប៉ុណ្ណោះទេ តែក៏តាមរយៈការប្រព្រឹត្តផងដែរ។ របៀបរស់នៅរបស់អ្នកនឹងបង្ហាញថាអ្នកពិតជាស្រឡាញ់ព្រះយេហូវ៉ា។ (១យ៉ូន. ៥:៣) ការជ្រើសរើសរបៀបរស់នៅដែលនាំឲ្យព្រះយេហូវ៉ាពេញចិត្តគឺជាគោលដៅជីវិតដ៏ល្អបំផុត។
១៥. តើអ្នកអាចបង្ហាញអំពីសេចក្ដីស្រឡាញ់របស់អ្នកចំពោះព្រះយេហូវ៉ាតាមរបៀបណា?
១៥ តើអ្នកអាចបង្ហាញអំពីសេចក្ដីស្រឡាញ់របស់អ្នកចំពោះព្រះយេហូវ៉ាតាមរបៀបណា? ដំបូង អ្នកជម្រាបលោកតាមរយៈសេចក្ដីអធិដ្ឋានពិសេសមួយថាអ្នកប្រគល់ខ្លួនជូនលោកដែលជាព្រះពិតតែមួយ។ (ចសព. ៤០:៨) បន្ទាប់មក អ្នកបង្ហាញជាសាធារណៈអំពីការប្រគល់ខ្លួនរបស់អ្នកដោយទទួលការជ្រមុជទឹក។ ដូចយើងបានពិចារណានៅខាងលើក្នុងអត្ថបទនេះ ការជ្រមុជទឹករបស់អ្នកគឺជាពេលដ៏សប្បាយនិងសំខាន់ក្នុងជីវិតរបស់អ្នក។ អ្នកចាប់ផ្ដើមមានរបៀបរស់នៅតាមជីវិតថ្មី មិនមែនសម្រាប់ខ្លួនឯងទេ តែសម្រាប់ព្រះយេហូវ៉ា។ (រ៉ូម ១៤:៨; ១ពេ. ៤:១, ២) នេះប្រហែលជាស្ដាប់ទៅដូចជាការសម្រេចចិត្តដ៏ធំ ហើយនោះគឺពិតមែន។ ប៉ុន្តែ នេះបើកផ្លូវឲ្យអ្នកមានជីវិតដ៏ល្អបំផុត។ តើតាមរបៀបណា?
១៦. តើចម្រៀងសរសើរព្រះ ៤១:១២បង្ហាញថាព្រះយេហូវ៉ានឹងធ្វើអ្វីសម្រាប់ពួកអ្នកដែលប្រើជីវិតរបស់ពួកគេដើម្បីបម្រើលោក?
១៦ ព្រះយេហូវ៉ាជាបុគ្គលដែលមានចិត្តទូលាយជាងគេបំផុត។ មិនថាអ្នកឲ្យអ្វីទៅលោកក៏ដោយ លោកនឹងតែងតែឲ្យអ្នកវិញនូវអ្វីច្រើនជាងនោះទៅទៀត។ (ម៉ាក. ១០:២៩, ៣០) លោកនឹងឲ្យអ្នកមានជីវិតដ៏គួរឲ្យចាប់អារម្មណ៍ ដ៏សប្បាយ និងដែលមានន័យខ្លឹមសារបំផុតដែលអ្នកអាចមាននៅក្នុងពិភពលោកដ៏អាក្រក់នេះ ហើយនេះគ្រាន់តែជាទីចាប់ផ្ដើម។ ជីវិតដែលចាប់ផ្ដើមដោយទទួលការជ្រមុជទឹក មិនមែនត្រូវតែមានទីបញ្ចប់ទេ។ អ្នកអាចបន្ដបម្រើបិតាជាទីស្រឡាញ់របស់អ្នកជារៀងរហូត។ សេចក្ដីស្រឡាញ់រវាងអ្នកនិងបិតាអ្នកនឹងបន្ដកើនឡើង ហើយអ្នកនឹងរស់ជារៀងរហូតដូចលោក។—សូមអាន ចម្រៀងសរសើរព្រះ ៤១:១២
១៧. តើអ្នកអាចឲ្យអ្វីដល់ព្រះយេហូវ៉ាដែលលោកមិនទាន់មានរួចហើយ?
១៧ ពេលអ្នកប្រគល់ខ្លួនជូនព្រះនិងទទួលការជ្រមុជទឹក អ្នកមានឯកសិទ្ធិឲ្យអ្វីដែលពិតជាមានតម្លៃដល់បិតារបស់អ្នក។ គ្រប់ទាំងរបស់ល្អនិងគ្រាដ៏សប្បាយដែលអ្នកធ្លាប់មានក្នុងជីវិតរបស់អ្នក គឺមកពីលោក។ យ៉ាងនេះ អ្នកអាចឲ្យម្ចាស់នៃមេឃនិងផែនដីនូវអ្វីដែលលោកមិនទាន់មាន គឺកិច្ចបម្រើដ៏ស្មោះត្រង់និងស្ម័គ្រពីចិត្តរបស់អ្នក។ (យ៉ូប ១:៨; ៤១:១១; សុភ. ២៧:១១) នេះជារបៀបរស់នៅដ៏ល្អបំផុត។ ច្បាស់ណាស់ សេចក្ដីស្រឡាញ់របស់អ្នកចំពោះព្រះយេហូវ៉ាគឺជាមូលហេតុល្អបំផុតឲ្យទទួលការជ្រមុជទឹក។
តើអ្នកត្រៀមខ្លួនទទួលការជ្រមុជទឹកហើយឬនៅ?
១៨. តើអ្នកអាចសួរខ្លួននូវសំណួរអ្វីខ្លះ?
១៨ ដូច្នេះ តើអ្នកនឹងទទួលការជ្រមុជទឹកឬទេ? មានតែអ្នកប៉ុណ្ណោះអាចឆ្លើយសំណួរនេះ។ ប៉ុន្តែ អ្វីមួយដែលប្រហែលជានឹងជួយអ្នកគឺបើអ្នកសួរខ្លួនឯងថា ‹តើខ្ញុំត្រៀមខ្លួនទទួលការជ្រមុជទឹកហើយឬនៅ?›។ (សកម្ម. ៨:៣៦) សូមចាំអំពីមូលហេតុបីដែលយើងបានពិចារណា។ ទី១ អ្នកស្រឡាញ់អ្វីដែលពិតនិងសុចរិត។ សូមសួរខ្លួនអ្នកថា ‹តើខ្ញុំចង់ឃើញថ្ងៃដែលមនុស្សទាំងអស់នឹងនិយាយអ្វីដែលពិតនិងធ្វើអ្វីដែលត្រឹមត្រូវឬទេ?›។ ទី២ អ្នកស្រឡាញ់លោកយេស៊ូគ្រិស្ត។ សូមសួរខ្លួនអ្នកថា ‹តើខ្ញុំចង់ឲ្យបុត្ររបស់ព្រះធ្វើជាស្ដេចរបស់ខ្ញុំ ហើយតើខ្ញុំចង់ធ្វើតាមគំរូរបស់លោកឬ?›។ ទី៣ អ្វីដ៏សំខាន់បំផុត អ្នកស្រឡាញ់ព្រះយេហូវ៉ា។ សូមសួរខ្លួនអ្នកថា ‹តើខ្ញុំចង់ធ្វើឲ្យព្រះយេហូវ៉ាមានចិត្តត្រេកអរ ដោយបម្រើលោកជាព្រះរបស់ខ្ញុំឬទេ?›។ បើចម្លើយរបស់អ្នកចំពោះសំណួរទាំងនេះគឺមែន តើអ្នកមានមូលហេតុអ្វីមិនទទួលការជ្រមុជទឹកនៅឥឡូវនេះ?—សកម្ម. ១៦:៣៣
១៩. ហេតុអ្វីអ្នកមិនគួរស្ទាក់ស្ទើរទទួលការជ្រមុជទឹក? សូមលើកឧទាហរណ៍។ (យ៉ូហាន ៤:៣៤)
១៩ បើអ្នកស្ទាក់ស្ទើរទទួលការជ្រមុជទឹក សូមគិតអំពីឧទាហរណ៍មួយដែលលោកយេស៊ូបានប្រើ។ (សូមអាន យ៉ូហាន ៤:៣៤) សូមកត់សម្គាល់ថាលោកយេស៊ូបានប្រដូចការធ្វើតាមបំណងប្រាថ្នារបស់បិតាលោកទៅនឹងអាហារ។ ហេតុអ្វី? ពីព្រោះអាហារគឺល្អសម្រាប់យើង។ លោកយេស៊ូដឹងថាអ្វីទាំងអស់ដែលព្រះយេហូវ៉ាសុំយើងឲ្យធ្វើគឺល្អសម្រាប់យើង។ ព្រះយេហូវ៉ាមិនចង់ឲ្យយើងធ្វើអ្វីដែលនឹងនាំទុក្ខដល់យើងទេ។ តើបំណងប្រាថ្នារបស់ព្រះយេហូវ៉ាចំពោះអ្នករួមបញ្ចូលការទទួលការជ្រមុជទឹកឬទេ? គឺមែន។ (សកម្ម. ២:៣៨) ដូច្នេះ អ្នកអាចជឿជាក់ថាការធ្វើតាមបង្គាប់ដែលឲ្យទទួលការជ្រមុជទឹក នឹងមានប្រយោជន៍ដល់អ្នក។ បើអ្នកមិនស្ទាក់ស្ទើរបរិភោគម្ហូបអាហារដ៏ល្អបំផុត តើមានហេតុឲ្យអ្នកស្ទាក់ស្ទើរទទួលការជ្រមុជទឹកឬទេ?
២០. តើយើងនឹងពិចារណាអ្វីក្នុងអត្ថបទបន្ទាប់?
២០ ហេតុអ្វីអ្នកខ្លះមិនទាន់ទទួលការជ្រមុជទឹក? ពួកគេជាច្រើននាក់ប្រហែលជាឆ្លើយថា «ខ្ញុំមិនទាន់ត្រៀមខ្លួនទេ»។ តាមពិត ការសម្រេចចិត្តប្រគល់ខ្លួនជូនព្រះយេហូវ៉ានិងទទួលការជ្រមុជទឹក គឺជាការសម្រេចចិត្តដ៏សំខាន់បំផុតដែលអ្នកនឹងធ្វើ។ ដូច្នេះ អ្នកត្រូវគិតយ៉ាងយកចិត្តទុកដាក់ចំពោះការសម្រេចចិត្តនេះ ហើយនេះនឹងត្រូវការពេលនិងការខំប្រឹងដើម្បីមានគុណសម្បត្តិគ្រប់គ្រាន់។ ប៉ុន្តែ បើអ្នកមានបំណងចិត្តយ៉ាងស្មោះឲ្យទទួលការជ្រមុជទឹក តើអ្នកអាចធ្វើអ្វីនៅឥឡូវនេះដើម្បីត្រៀមខ្លួន? យើងនឹងពិចារណាចម្លើយចំពោះសំណួរនេះក្នុងអត្ថបទបន្ទាប់។
ចម្រៀងលេខ២៨ ការចងមិត្តភាពជាមួយនឹងព្រះយេហូវ៉ា
a ការជ្រមុជទឹកគឺជាជំហានដ៏សំខាន់សម្រាប់សិស្សគម្ពីរទាំងអស់។ តើអ្វីអាចជំរុញចិត្តសិស្សគម្ពីរឲ្យធ្វើតាមជំហាននេះ? គឺសេចក្ដីស្រឡាញ់។ ប៉ុន្តែ តើសេចក្ដីស្រឡាញ់ចំពោះអ្វី និងចំពោះអ្នកណា? ក្នុងអត្ថបទនេះ យើងនឹងទទួលចម្លើយចំពោះសំណួរទាំងនេះ ហើយពិចារណាថា តើយើងអាចមានជីវិតបែបណាពេលដែលយើងទទួលការជ្រមុជទឹកជាគ្រិស្តសាសនិក?
