អត្ថបទសិក្សា ៣៤
ចូរ«ភ្លក់»គុណធម៌របស់ព្រះយេហូវ៉ា តើតាមរបៀបណា?
«ចូរភ្លក់មើលឲ្យដឹងថាព្រះយេហូវ៉ាជាព្រះល្អ អ្នកណាដែលពឹងជ្រកលោក អ្នកនោះមានសុភមង្គលហើយ»។—ចសព. ៣៤:៨
ចម្រៀងលេខ១១៧ គុណធម៌របស់ព្រះ
សេចក្ដីសង្ខេប *
១-២. យោងទៅតាមចម្រៀងសរសើរព្រះ ៣៤:៨ តើយើងអាចរៀនអំពីគុណធម៌របស់ព្រះយេហូវ៉ាយ៉ាងដូចម្ដេច?
សូមស្រមៃគិតថាគេឲ្យអាហារទៅអ្នកដែលអ្នកមិនធ្លាប់ភ្លក់។ អ្នកអាចដឹងអ្វីខ្លះអំពីអាហារនោះដោយមើលវា ហិតក្លិន មើលរូបមន្ត ឬដោយសួរមតិអ្នកឯទៀត។ ប៉ុន្តែ វិធីតែមួយគត់ដើម្បីដឹងប្រាកដថាអ្នកចូលចិត្តអាហារនោះឬក៏មិនចូលចិត្ត គឺភ្លក់វាដោយខ្លួនឯង។
២ យើងអាចរៀនខ្លះអំពីគុណធម៌របស់ព្រះយេហូវ៉ាដោយអានគម្ពីរនិងសៀវភៅផ្សេងៗរបស់យើង ព្រមទាំងដោយស្ដាប់អ្នកឯទៀតនិយាយអំពីពរដែលពួកគេបានទទួលពីព្រះយេហូវ៉ា។ ប៉ុន្តែ យើងនឹងយល់ច្បាស់ថាព្រះយេហូវ៉ាគឺល្អយ៉ាងណា ពេលយើងភ្លក់ឬពិសោធគុណធម៌របស់លោកដោយខ្លួនឯង។ (សូមអាន ចម្រៀងសរសើរព្រះ ៣៤:៨) សូមគិតអំពីឧទាហរណ៍មួយ ប្រហែលជាយើងចង់បម្រើព្រះយេហូវ៉ាពេញពេល។ ប៉ុន្តែ ដើម្បីសម្រេចគោលដៅនោះ យើងត្រូវធ្វើឲ្យជីវិតរបស់យើងសាមញ្ញជាង។ យើងប្រហែលជាបានអានច្រើនដងនូវសេចក្ដីសន្យារបស់លោកយេស៊ូដែលថា បើយើងស្វែងរករាជាណាចក្រជាមុន ព្រះយេហូវ៉ានឹងផ្ដល់អ្វីដែលយើងពិតជាត្រូវការ។ ប៉ុន្តែ យើងមិនដែលពិសោធដោយខ្លួនឯងថាសេចក្ដីសន្យានោះក្លាយទៅជាការពិតចំពោះយើងផ្ទាល់ទេ។ (ម៉ាថ. ៦:៣៣) ទោះជាយ៉ាងនេះក្ដី ដោយបង្ហាញជំនឿទៅលើសេចក្ដីសន្យានោះរបស់លោកយេស៊ូ យើងកាត់បន្ថយថ្លៃចំណាយរបស់យើង ធ្វើការតិចជាង និងផ្ដោតអារម្មណ៍ទៅលើកិច្ចបម្រើព្រះ។ ពេលយើងធ្វើដូច្នេះ យើងរៀនពីបទពិសោធន៍របស់យើងផ្ទាល់ថា ព្រះយេហូវ៉ាពិតជាផ្គត់ផ្គង់សេចក្ដីត្រូវការរបស់យើង។ យ៉ាងនេះ យើងភ្លក់គុណធម៌របស់លោកដោយផ្ទាល់។
៣. តើចម្រៀងសរសើរព្រះ ១៦:១, ២បង្ហាញថាព្រះយេហូវ៉ាប្រព្រឹត្តល្អចំពោះអ្នកណា?
៣ ព្រះយេហូវ៉ា«ប្រព្រឹត្តល្អចំពោះមនុស្សទាំងអស់» រួមទាំងពួកអ្នកដែលមិនស្គាល់លោកផងដែរ។ (ចសព. ១៤៥:៩; ម៉ាថ. ៥:៤៥) តែជាពិសេស ព្រះយេហូវ៉ាឲ្យពរជាច្រើនដល់ពួកអ្នកដែលស្រឡាញ់លោកនិងបម្រើលោកអស់ពីកម្លាំងកាយកម្លាំងចិត្ត។ (សូមអាន ចម្រៀងសរសើរព្រះ ១៦:១, ២) សូមកត់សម្គាល់ប្រយោជន៍ខ្លះដែលយើងទទួលពីគុណធម៌របស់ព្រះយេហូវ៉ា។
៤. តើព្រះយេហូវ៉ាបង្ហាញគុណធម៌របស់លោកយ៉ាងដូចម្ដេចចំពោះពួកអ្នកដែលចាប់ផ្ដើមចូលទៅជិតលោក?
៤ រាល់ដងដែលយើងធ្វើតាមអ្វីដែលយើងរៀនពីព្រះយេហូវ៉ា យើងឃើញថានេះមានឥទ្ធិពលល្អលើជីវិតរបស់យើង។ កាលដែលយើងបានរៀនអំពីលោកនិងចាប់ផ្ដើមស្រឡាញ់លោក លោកជួយយើងឲ្យយកឈ្នះរបៀបគិតគូរនិងការប្រព្រឹត្តដែលបានធ្វើឲ្យយើងនៅដាច់ឆ្ងាយពីលោក។ (កូឡ. ១:២១) ម្យ៉ាងទៀត ពេលយើងបានប្រគល់ខ្លួនជូនព្រះយេហូវ៉ានិងទទួលការជ្រមុជទឹក យើងឃើញថាលោកបានបង្ហាញគុណធម៌ចំពោះយើងកាន់តែច្រើន ដោយឲ្យយើងមានសមត្ថភាពវិនិច្ឆ័យដែលមិនផ្ដន្ទាទោស និងទាញនាំយើងឲ្យមានចំណងមិត្តភាពជិតស្និទ្ធជាមួយលោក។—១ពេ. ៣:២១
៥. តើព្រះយេហូវ៉ាបង្ហាញគុណធម៌ចំពោះយើងយ៉ាងដូចម្ដេចក្នុងកិច្ចបម្រើផ្សាយ?
៥ យើងបន្តទទួលគុណធម៌របស់ព្រះយេហូវ៉ាកាលដែលយើងចូលរួមក្នុងកិច្ចបម្រើផ្សាយ។ ជាឧទាហរណ៍ តើអ្នកជាមនុស្សអៀនឬទេ? រាស្ត្ររបស់ព្រះយេហូវ៉ាជាច្រើននាក់មានអារម្មណ៍បែបនេះ។ ដូចពួកគេ មុនដែលអ្នកក្លាយទៅជាអ្នកបម្រើព្រះយេហូវ៉ា អ្នកប្រហែលជាមិនដែលគិតថាអ្នកនឹងទៅផ្ទះរបស់បុគ្គលដែលអ្នកមិនស្គាល់ ហើយនិយាយជាមួយគាត់អំពីគម្ពីរឡើយ។ ប៉ុន្តែសព្វថ្ងៃនេះ អ្នកចូលរួមធ្វើកិច្ចការនោះជាទៀងទាត់។ មិនត្រឹមតែប៉ុណ្ណោះ ព្រះយេហូវ៉ាបានជួយអ្នកឲ្យមានអំណរក្នុងកិច្ចការផ្សព្វផ្សាយនោះ។ ព្រះយេហូវ៉ាក៏បានជួយអ្នកតាមរបៀបផ្សេងទៀតដែរ។ ជាឧទាហរណ៍ លោកបានជួយអ្នកឲ្យរក្សាចិត្តស្ងប់ពេលជួបអ្នកប្រឆាំង។ លោកក៏បានជួយអ្នកឲ្យនឹកឃើញបទគម្ពីរដែលត្រូវនឹងចិត្តរបស់ម្ចាស់ផ្ទះដែលចាប់អារម្មណ៍។ ម្យ៉ាងទៀត លោកបានឲ្យអ្នកកម្លាំងដើម្បីបន្តផ្សព្វផ្សាយ ទោះជាមនុស្សក្នុងតំបន់ផ្សាយមិនចាប់អារម្មណ៍ក្ដី។—យេ. ២០:៧-៩
៦. តើការបង្ហាត់បង្រៀនពីព្រះយេហូវ៉ាបង្ហាញយ៉ាងណាអំពីគុណធម៌របស់លោក?
៦ ព្រះយេហូវ៉ាក៏បានបង្ហាញយើងអំពីគុណធម៌របស់លោក ដោយបង្ហាត់បង្រៀនយើងសម្រាប់កិច្ចបម្រើផ្សាយ។ (យ៉ូន. ៦:៤៥) នៅកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិក យើងស្ដាប់ការសន្ទនាគំរូ ហើយយើងបានត្រូវលើកទឹកចិត្តឲ្យប្រើពាក្យនោះក្នុងកិច្ចបម្រើផ្សាយ។ ដំបូង យើងប្រហែលជាស្ទាក់ស្ទើរសាកល្បងពាក្យផ្សាយថ្មី។ ប៉ុន្តែ ពេលយើងធ្វើ យើងប្រហែលជាឃើញថាយោបល់នោះទាក់ទាញមនុស្សក្នុងតំបន់ផ្សាយយើង។ នៅកិច្ចប្រជុំនិងសន្និបាត យើងក៏បានត្រូវលើកទឹកចិត្តឲ្យចូលរួមផ្សព្វផ្សាយតាមវិធីផ្សេងៗ ដែលយើងប្រហែលជាមិនធ្លាប់ធ្វើពីមុន។ នេះក៏ប្រហែលជាធ្វើឲ្យយើងភ័យដែរ។ ប៉ុន្តែពេលយើងសាកធ្វើ យើងបើកឱកាសឲ្យព្រះយេហូវ៉ាផ្ដល់ពរដល់យើង។ ឥឡូវនេះ យើងនឹងពិចារណាអំពីពរមួយចំនួនដែលព្រះយេហូវ៉ានឹងផ្ដល់ឲ្យយើង ពេលយើងខំស្វែងរករបៀបថ្មីៗដើម្បីបម្រើលោកឲ្យអស់ពីសមត្ថភាព ទោះជាយើងស្ថិតក្នុងស្ថានភាពបែបណាក្ដី។ បន្ទាប់មក សូមយើងពិចារណាអំពីរបៀបដែលយើងអាចឈានទៅមុខក្នុងកិច្ចបម្រើរបស់យើង។
ព្រះយេហូវ៉ាឲ្យពរពួកអ្នកដែលទុកចិត្តលោក
៧. តើយើងនឹងទទួលពរអ្វីពេលយើងខំបង្កើនកិច្ចបម្រើរបស់យើង?
៧ យើងចូលកាន់តែជិតព្រះយេហូវ៉ា។ សូមគិតអំពីគំរូរបស់អ្នកចាស់ទុំម្នាក់ឈ្មោះសាំយូអែល *ដែលបម្រើជាមួយប្រពន្ធគាត់នៅប្រទេសកូឡុំប៊ី។ ពួកគេចូលចិត្តត្រួសត្រាយនៅក្រុមជំនុំដែលពួកគេបានចូលរួមអស់រយៈពេលជាយូរ។ ប៉ុន្តែ ពួកគេចង់បង្កើនកិច្ចបម្រើផ្សាយ ដោយជួយក្រុមជំនុំដែលមានសេចក្ដីត្រូវការច្រើនជាង។ ដើម្បីសម្រេចគោលដៅនោះ ពួកគេត្រូវធ្វើការលះបង់ខ្លះៗ។ បងសាំយូអែលនិយាយថា៖ «យើងបានធ្វើតាមម៉ាថាយ ៦:៣៣ ហើយឈប់ទិញអ្វីដែលមិនចាំបាច់។ ប៉ុន្តែ អ្វីដ៏ពិបាកបំផុតគឺរើចេញពីផ្ទះរបស់យើង ព្រោះវាបានត្រូវសង់ឡើងតាមដែលចិត្តយើងចង់បាន ហើយយើងមិនបានជំពាក់បំណុលដើម្បីទិញផ្ទះនោះទេ»។ ក្រោយពីពួកគេបានរើទៅក្រុមជំនុំថ្មី ពួកគេចាយតិចជាងមុនឆ្ងាយណាស់។ បងសាំយូអែលនិយាយថា៖ «យើងបានឃើញរបៀបដែលព្រះយេហូវ៉ាតម្រង់ជំហានរបស់យើង និងតបឆ្លើយសេចក្ដីអធិដ្ឋានរបស់យើង។ យើងមានអារម្មណ៍ថា លោកពេញចិត្តនិងស្រឡាញ់យើងតាមរបៀបដែលយើងមិនដែលពិសោធពីមុនឡើយ»។ តើអ្នកអាចបង្កើនកិច្ចបម្រើរបស់អ្នកតាមរបៀបណាមួយឬទេ? បើដូច្នេះ អ្នកអាចប្រាកដថាអ្នកនឹងចូលកាន់តែជិតព្រះយេហូវ៉ា ហើយថាលោកនឹងថែរក្សាអ្នក។—ចសព. ១៨:២៥
៨. តើអ្នករៀនអ្វីពីពាក្យសម្ដីរបស់បងអ៊ីវ៉ាននិងបងវិចតូរីយ៉ា?
៨ យើងមានអំណរក្នុងកិច្ចបម្រើរបស់យើង។ សូមកត់សម្គាល់ពាក្យសម្ដីរបស់ប្ដីប្រពន្ធមួយគូឈ្មោះអ៊ីវ៉ាននិងវិចតូរីយ៉ា ដែលបម្រើជាអ្នកត្រួសត្រាយនៅប្រទេសកៀហ្ស៊ីស៊ីស្ថាន។ ពួកគាត់បានរក្សាជីវិតឲ្យសាមញ្ញដើម្បីពួកគាត់អាចស្ម័គ្រចិត្តធ្វើកិច្ចការណាក៏ដោយក្នុងអង្គការរបស់ព្រះ រួមទាំងកិច្ចការសាងសង់។ បងប្រុសអ៊ីវ៉ាននិយាយថា៖ «យើងជក់ចិត្តទាំងស្រុងពេលបំពេញភារកិច្ចនីមួយៗ។ ទោះជាយើងអស់កម្លាំងក្រោយពីធ្វើកិច្ចការពេញមួយថ្ងៃក្ដី យើងស្កប់ចិត្តនិងមានសេចក្ដីសុខសាន្តក្នុងចិត្ត ដោយដឹងថាយើងបានប្រើកម្លាំងសម្រាប់កិច្ចការរាជាណាចក្រលោក។ យើងក៏សប្បាយចិត្តណាស់ ដោយសារយើងមានមិត្តភក្ដិថ្មីជាច្រើននិងមានអនុស្សាវរីយ៍ល្អៗ»។—ម៉ាក. ១០:២៩, ៣០
៩. តើបងស្រីម្នាក់ដែលស្ថិតក្នុងស្ថានភាពពិបាកបានធ្វើអ្វីដើម្បីបង្កើនកិច្ចបម្រើផ្សាយរបស់គាត់ ហើយតើនោះមានលទ្ធផលអ្វី?
៩ យើងមានអំណរក្នុងកិច្ចបម្រើព្រះយេហូវ៉ា ទោះជាយើងមានការពិបាកក្ដី។ ជាឧទាហរណ៍ បងស្រីម្នាក់ឈ្មោះមេរេ ជាស្ត្រីមេម៉ាយវ័យចាស់ដែលរស់នៅទ្វីបអាហ្វ្រិកភាគខាងលិច។ គាត់ចាប់ផ្ដើមត្រួសត្រាយក្រោយគាត់បានចូលនិវត្តន៍ពីការងាររបស់គាត់ជាពេទ្យ។ បងមេរេមានជំងឺសន្លាក់ឆ្អឹងដែលធ្វើទុក្ខគាត់យ៉ាងខ្លាំង ហើយគាត់អាចចេញទៅផ្សព្វផ្សាយពីផ្ទះមួយទៅផ្ទះមួយបានត្រឹមតែមួយម៉ោងទេ។ ប៉ុន្តែ គាត់អាចផ្សព្វផ្សាយសាធារណៈច្រើនជាងនោះបាន។ គាត់មានការត្រឡប់ទៅជួបនិងសិស្សគម្ពីរជាច្រើន ហើយគាត់ទាក់ទងពួកគេខ្លះតាមទូរស័ព្ទ។ តើអ្វីបានជំរុញចិត្តបងមេរេឲ្យឈានទៅមុខក្នុងកិច្ចបម្រើព្រះ? បងមេរេនិយាយថា៖ «ចិត្តរបស់ខ្ញុំពោរពេញទៅដោយសេចក្ដីស្រឡាញ់ចំពោះព្រះយេហូវ៉ានិងលោកយេស៊ូគ្រិស្ត ហើយខ្ញុំអធិដ្ឋានជារឿយៗសុំព្រះយេហូវ៉ាឲ្យជួយខ្ញុំបម្រើលោកអស់ពីសមត្ថភាព»។—ម៉ាថ. ២២:៣៦, ៣៧
១០. ដូចពេត្រុសទី១ ៥:១០បង្ហាញ តើពួកអ្នកដែលខំឈានទៅមុខទទួលអ្វីពីព្រះយេហូវ៉ា?
១០ យើងទទួលការបង្ហាត់បង្រៀនថែមទៀតពីព្រះយេហូវ៉ា។ បងប្រុសខេនីដែលបម្រើជាអ្នកត្រួសត្រាយម្នាក់នៅកោះម៉ូរីស បានឃើញដូច្នេះ។ ពេលគាត់រៀនសេចក្ដីពិត គាត់បានឈប់រៀននៅសកលវិទ្យាល័យ បានទទួលការជ្រមុជទឹក និងបានចាប់ផ្ដើមបម្រើព្រះយេហូវ៉ាពេញពេល។ គាត់និយាយថា៖ «ក្នុងជីវិតរបស់ខ្ញុំ ខ្ញុំព្យាយាមធ្វើតាមពាក្យរបស់អេសាយដែលជាអ្នកប្រកាសទំនាយថា៖ ‹ខ្ញុំនៅទីនេះហើយ! សូមចាត់ខ្ញុំ!›»។ (អេ. ៦:៨) បងខេនីបានជួយខាងកិច្ចការសាងសង់អគារមួយចំនួន ហើយក៏បានជួយបកប្រែសៀវភៅផ្សេងៗដែលមានមូលដ្ឋានលើគម្ពីរទៅជាភាសាកំណើតរបស់គាត់។ បងខេនីនិយាយថា៖ «ខ្ញុំបានទទួលការបង្ហាត់បង្រៀនដែលជួយខ្ញុំឲ្យមានសមត្ថភាពដែលខ្ញុំត្រូវការដើម្បីបំពេញភារកិច្ចរបស់ខ្ញុំ»។ ប៉ុន្តែ គាត់មិនគ្រាន់តែបានរៀនអំពីរបៀបធ្វើកិច្ចការផ្សេងៗប៉ុណ្ណោះទេ។ គាត់បន្ថែមថា៖ «ការបង្ហាត់បង្រៀននោះបានជួយខ្ញុំឲ្យដឹងអំពីកម្រិតសមត្ថភាពរបស់ខ្ញុំ និងគុណសម្បត្តិដែលខ្ញុំត្រូវមានដើម្បីបម្រើព្រះយេហូវ៉ាឲ្យបានល្អប្រសើរជាង»។ (សូមអាន ពេត្រុសទី១ ៥:១០) អ្នកក៏ប្រហែលជាអាចធ្វើការផ្លាស់ប្ដូរផ្សេងៗក្នុងជីវិតដើម្បីព្រះយេហូវ៉ាអាចបង្ហាត់បង្រៀនអ្នកឲ្យបានច្រើនជាងផងដែរ។
ប្ដីប្រពន្ធមួយគូផ្សព្វផ្សាយនៅកន្លែងដែលត្រូវការអ្នកផ្សាយច្រើនជាង បងស្រីវ័យក្មេងម្នាក់ជួយសាងសង់សាលប្រជុំ ហើយប្ដីប្រពន្ធវ័យចាស់មួយគូផ្សព្វផ្សាយតាមទូរស័ព្ទ។ បងប្អូនទាំងនេះទទួលអំណរខ្លាំងណាស់ពីកិច្ចបម្រើរបស់ពួកគេ (សូមមើលវគ្គ១១)
១១. តើបងស្រីបីនាក់នៅប្រទេសកូរ៉េខាងត្បូងបានធ្វើអ្វីដើម្បីចូលរួមក្នុងកិច្ចបម្រើផ្សាយ ហើយតើនោះមានលទ្ធផលយ៉ាងណា? (សូមមើលរូបភាពនៅក្រប)
១១ សូម្បីតែបងប្អូនជាសាក្សីអស់ជាច្រើនឆ្នាំ ក៏ត្រូវការការបង្ហាត់បង្រៀនពេលពួកគេសាកល្បងវិធីផ្សព្វផ្សាយថ្មីផងដែរ។ ក្នុងអំឡុងការផ្ទុះឡើងនៃជំងឺកូវីដ-១៩ អ្នកចាស់ទុំនៅក្រុមជំនុំមួយនាប្រទេសកូរ៉េខាងត្បូងបានសរសេរថា៖ «បងប្អូនខ្លះដែលធ្លាប់គិតថាពួកគេមិនអាចផ្សព្វផ្សាយបាន ដោយសារបញ្ហាសុខភាព ឥឡូវផ្សព្វផ្សាយតាមប្រព័ន្ធអ៊ីនធឺណិត។ បងស្រីបីនាក់ដែលមានអាយុ៨០ឆ្នាំជាងបានរៀនប្រើបច្ចេកវិទ្យាថ្មី ហើយចាប់ផ្ដើមចូលរួមផ្សព្វផ្សាយស្ទើរតែរាល់ថ្ងៃ»។ (ចសព. ៩២:១៤, ១៥) តើអ្នកចង់បង្កើនកិច្ចបម្រើផ្សាយរបស់អ្នក ហើយភ្លក់គុណធម៌របស់ព្រះយេហូវ៉ាថែមទៀតឬទេ? សូមពិចារណាអ្វីខ្លះដែលអ្នកអាចធ្វើដើម្បីសម្រេចគោលដៅនោះ។
របៀបដែលអ្នកអាចឈានទៅមុខ
១២. តើព្រះយេហូវ៉ាសន្យាអ្វីចំពោះពួកអ្នកដែលទុកចិត្តលោក?
១២ ចូររៀនឲ្យពឹងផ្អែកលើព្រះយេហូវ៉ា។ លោកសន្យាថាលោកនឹងឲ្យពរយើងយ៉ាងបរិបូរពេលយើងទុកចិត្តលោក ហើយជូនលោកនូវអ្វីដ៏ល្អបំផុត។ (ម៉ាឡ. ៣:១០) បងស្រីម្នាក់ឈ្មោះហ្វាបអ៊ីអូឡាដែលរស់នៅប្រទេសកូឡុំប៊ី បានឃើញរបៀបដែលព្រះយេហូវ៉ាធ្វើតាមពាក្យសន្យានេះចំពោះគាត់។ គាត់ចង់បម្រើជាអ្នកត្រួសត្រាយពេញពេល មិនយូរក្រោយពីគាត់បានទទួលការជ្រមុជទឹក។ ប៉ុន្តែ ប្ដីនិងកូនបីនាក់របស់គាត់ពឹងផ្អែកលើប្រាក់ចំណូលរបស់គាត់។ ដូច្នេះ ពេលដែលគាត់ដល់អាយុចូលនិវត្តន៍ គាត់បានអធិដ្ឋានអង្វរសុំជំនួយពីព្រះយេហូវ៉ា។ តើអ្វីបានកើតឡើងក្រោយមក? គាត់និយាយថា៖ «តាមធម្មតាត្រូវការពេលយូរដើម្បីចាប់ផ្ដើមទទួលប្រាក់ចូលនិវត្តន៍ ប៉ុន្តែខ្ញុំអាចទទួលប្រាក់ចូលនិវត្តន៍ត្រឹមតែមួយខែក្រោយពីខ្ញុំដាក់ពាក្យសុំ។ នេះប្រៀបដូចជាអព្ភូតហេតុមែន!»។ ពីរខែក្រោយមក គាត់ចាប់ផ្ដើមធ្វើជាអ្នកត្រួសត្រាយ។ ឥឡូវ គាត់មានអាយុ៧០ឆ្នាំជាង ហើយបានត្រួសត្រាយអស់ជាង២០ឆ្នាំ។ ក្នុងអំឡុងពេលនោះ គាត់បានជួយបុគ្គល៨នាក់ឲ្យទទួលការជ្រមុជទឹក។ គាត់និយាយថា៖ «ទោះជាជួនកាលខ្ញុំខ្សោយក្ដី ព្រះយេហូវ៉ាជួយខ្ញុំជារៀងរាល់ថ្ងៃឲ្យធ្វើតាមកាលវិភាគរបស់ខ្ញុំ»។
តើតាមរបៀបណាអាប្រាហាំនិងសារ៉ា យ៉ាកុប និងពួកសង្ឃដែលឆ្លងទន្លេយ៉ូដាន់បានបង្ហាញទំនុកចិត្តទៅលើព្រះយេហូវ៉ា? (សូមមើលវគ្គ១៣)
១៣-១៤. តើគំរូអ្វីខ្លះអាចជួយយើងឲ្យទុកចិត្តព្រះយេហូវ៉ានិងខំឈានទៅមុខ?
១៣ ចូររៀនពីគំរូរបស់ពួកអ្នកដែលបានពឹងផ្អែកលើព្រះយេហូវ៉ា។ គម្ពីរពោរពេញទៅដោយគំរូរបស់បុគ្គលដែលខំប្រឹងប្រែងក្នុងកិច្ចបម្រើព្រះយេហូវ៉ា។ ចំពោះពួកគេជាច្រើននាក់ ព្រះយេហូវ៉ាបានឲ្យពរពួកគេទាល់តែក្រោយពីពួកគេធ្វើអ្វីមួយដែលបង្ហាញថាពួកគេទុកចិត្តលោក។ ជាឧទាហរណ៍ គឺទាល់តែក្រោយពីអាប្រាហាំចាកចេញពីទីលំនៅរបស់គាត់ទាំង«មិនបានដឹងថាគាត់ទៅកន្លែងណា» ទើបព្រះយេហូវ៉ាបានឲ្យពរគាត់។ (ហេ. ១១:៨) ម្យ៉ាងទៀត លុះត្រាតែក្រោយពីយ៉ាកុបបោកចំបាប់ជាមួយទេវតា ទើបគាត់បានទទួលពរពិសេស។ (ដក. ៣២:២៤-៣០) មួយវិញទៀត ពេលប្រជាជាតិអ៊ីស្រាអែលហៀបនឹងចូលស្រុកសន្យា ពួកសង្ឃត្រូវតែបោះជើងចូលក្នុងទន្លេយ៉ូដាន់ជាមុនសិន ទើបបណ្ដាជនអាចដើរឆ្លងកាត់បាន។—យ៉ូស. ៣:១៤-១៦
១៤ អ្នកក៏អាចទទួលប្រយោជន៍ពីគំរូរបស់សាក្សីនៅសម័យនេះដែលបានពឹងផ្អែកទៅលើព្រះយេហូវ៉ា និងខំឈានទៅមុខ។ ជាឧទាហរណ៍ បងប្រុសម្នាក់ឈ្មោះផេថិននិងប្រពន្ធរបស់គាត់ដាយអាណា ចូលចិត្តអានអំពីបទពិសោធន៍របស់បងប្អូនដែលបានបង្កើនកិច្ចបម្រើរបស់ពួកគេចំពោះព្រះយេហូវ៉ា ដូចជាមានក្នុងអត្ថបទតភាគ«ពួកគេបានលះបង់ប្រយោជន៍ខ្លួនដោយស្ម័គ្រចិត្ត»។ * បងផេថិននិយាយថា៖ «ពេលយើងអានបទពិសោធន៍របស់ពួកគេ យើងមានអារម្មណ៍ហាក់ដូចជាយើងកំពុងមើលគេបរិភោគអាហារដ៏ឈ្ងុយឆ្ងាញ់។ យើងកាន់តែមើល យើងកាន់តែចង់‹ភ្លក់មើលឲ្យដឹងថាព្រះយេហូវ៉ាជាព្រះល្អ›»។ ក្រោយមក បងផេថិននិងបងដាយអាណាបានរើទៅបម្រើនៅកន្លែងដែលមានសេចក្ដីត្រូវការច្រើនជាង។ តើអ្នកធ្លាប់អានអត្ថបទតភាគនោះឬទេ? តើអ្នកធ្លាប់មើលវីដេអូដែលមានចំណងជើងថា«ផ្សព្វផ្សាយនៅតំបន់ដាច់ស្រយាលក្នុងប្រទេសអូស្ត្រាលី» និង«ការរើទៅបម្រើនៅកន្លែងដែលត្រូវការអ្នកផ្សាយច្រើនជាង» ដែលបានត្រូវចេញផ្សាយនៅគេហទំព័រjw.org/kmឬទេ? ព័ត៌មានទាំងនោះប្រហែលជានឹងជួយអ្នកឲ្យរកឃើញវិធីដែលអ្នកអាចបង្កើនកិច្ចបម្រើរបស់អ្នក។
១៥. តើការសេពគប់ល្អអាចជួយយើងយ៉ាងដូចម្ដេច?
១៥ ចូរមានការសេពគប់ល្អ។ យើងកាន់តែចង់ភ្លក់អាហារថ្មី បើយើងចំណាយពេលជាមួយពួកអ្នកដែលចូលចិត្តអាហារនោះ។ ស្រដៀងគ្នាដែរ បើយើងសេពគប់ពួកអ្នកដែលចាត់ទុកព្រះយេហូវ៉ាថាសំខាន់បំផុតក្នុងជីវិត យើងនឹងកាន់តែចង់ស្វែងរកវិធីដើម្បីបង្កើនកិច្ចបម្រើរបស់យើង។ នេះបានកើតឡើងចំពោះប្ដីប្រពន្ធមួយគូឈ្មោះខេននិងវឺរ៉ូនីកា។ បងប្រុសខេននិយាយថា៖ «មិត្តភក្ដិនិងក្រុមគ្រួសារលើកទឹកចិត្តយើងឲ្យសាកវិធីថ្មីៗក្នុងកិច្ចបម្រើ។ យើងឃើញថាការសេពគប់ពួកអ្នកដែលស្វែងរករាជាណាចក្រព្រះជាមុនបាននាំឲ្យយើងមានទំនុកចិត្តសាកធ្វើអ្វីថ្មី»។ ឥឡូវ បងខេននិងបងវឺរ៉ូនីកាបម្រើជាអ្នកត្រួសត្រាយពិសេសនៅប្រទេសស៊ែប៊ី។
១៦. ដូចបានបង្ហាញពីឧទាហរណ៍របស់លោកយេស៊ូនៅលូកា ១២:១៦-២១ ហេតុអ្វីយើងគួរសុខចិត្តធ្វើការលះបង់?
១៦ ចូរធ្វើការលះបង់ដើម្បីព្រះយេហូវ៉ា។ ដើម្បីធ្វើឲ្យព្រះយេហូវ៉ាពេញចិត្ត យើងមិនចាំបាច់លះចោលអ្វីៗទាំងអស់ដែលយើងចូលចិត្តទេ។ (អទ. ៥:១៩, ២០) ប៉ុន្តែ បើយើងស្ទាក់ស្ទើរមិនធ្វើច្រើនជាងក្នុងកិច្ចបម្រើព្រះ ដោយសារយើងមិនចង់ធ្វើការលះបង់ យើងអាចធ្វើខុសស្រដៀងនឹងកំហុសរបស់បុរសក្នុងឧទាហរណ៍របស់លោកយេស៊ូ ដែលធ្វើឲ្យជីវិតខ្លួនសុខស្រួល តែមិនបានអើពើនឹងព្រះទេ។ (សូមអាន លូកា ១២:១៦-២១) បងប្រុសម្នាក់ឈ្មោះគ្រីស្ទានដែលរស់នៅប្រទេសបារាំងនិយាយថា៖ «ខ្ញុំមិនបានប្រើពេលវេលានិងកម្លាំងរបស់ខ្ញុំឲ្យអស់ពីសមត្ថភាពដើម្បីព្រះយេហូវ៉ានិងក្រុមគ្រួសារខ្ញុំទេ»។ ក្រោយមក គាត់និងប្រពន្ធសម្រេចចិត្តត្រួសត្រាយ។ ប៉ុន្តែ ដើម្បីសម្រេចគោលដៅនោះ ពួកគេត្រូវលាឈប់ពីការងាររបស់ពួកគេ។ ដូច្នេះ ពួកគេបានចាប់ផ្ដើមមុខរបរតូចមួយជាអ្នកសម្អាតដើម្បីចិញ្ចឹមជីវិត ហើយពួកគេរៀនឲ្យចេះស្កប់ចិត្តនឹងប្រាក់ចំណូលតិចជាង។ តើការលះបង់នោះមានប្រយោជន៍ឬទេ? បងគ្រីស្ទាននិយាយថា៖ «កិច្ចបម្រើផ្សាយរបស់យើងមានន័យខ្លឹមសារជាងមុន ហើយយើងសប្បាយចិត្តឃើញសិស្សគម្ពីរនិងការត្រឡប់ទៅជួបរៀនអំពីព្រះយេហូវ៉ា»។
១៧. ហេតុអ្វីយើងប្រហែលជាពិបាកសាកល្បងវិធីផ្សព្វផ្សាយថ្មី?
១៧ ចូរសុខចិត្តសាកល្បងវិធីផ្សព្វផ្សាយថ្មី។ (សកម្ម. ១៧:១៦, ១៧; ២០:២០, ២១) បងស្រីស៊ើលីដែលជាអ្នកត្រួសត្រាយនៅសហរដ្ឋអាម៉េរិកត្រូវផ្លាស់ប្ដូររបៀបដែលគាត់ផ្សព្វផ្សាយ ក្នុងអំឡុងពេលការផ្ទុះឡើងនៃជំងឺកូវីដ-១៩។ ដំបូង គាត់ស្ទាក់ស្ទើរផ្សព្វផ្សាយតាមទូរស័ព្ទ។ ប៉ុន្តែ ក្រោយពីគាត់បានទទួលការបង្ហាត់បង្រៀនក្នុងអំឡុងទស្សនកិច្ចរបស់អ្នកត្រួតពិនិត្យប្រចាំមណ្ឌល គាត់ចាប់ផ្ដើមផ្សព្វផ្សាយតាមទូរស័ព្ទជារឿយៗ។ គាត់និយាយថា៖ «ដំបូងគួរឲ្យភ័យ តែឥឡូវខ្ញុំពិតជាចូលចិត្តផ្សព្វផ្សាយបែបនេះណាស់។ យើងជួបមនុស្សតាមទូរស័ព្ទច្រើនជាងផ្សព្វផ្សាយពីផ្ទះទៅផ្ទះមួយ»។
១៨. បើមានអ្វីធ្វើឲ្យយើងពិបាកបង្កើនកិច្ចបម្រើផ្សាយ តើអ្វីអាចជួយយើង?
១៨ ចូរកំណត់គោលដៅនិងចាត់វិធានការដើម្បីសម្រេចគោលដៅនោះ។ ពេលយើងមានបញ្ហា យើងអធិដ្ឋាន ហើយព្យាយាមប្រើសមត្ថភាពរិះគិតដើម្បីចាត់វិធានការ។ (សុភ. ៣:២១) បងស្រីសុនយ៉ាដែលបម្រើជាអ្នកត្រួសត្រាយពេញពេលនៅក្រុមភាសារ៉ូម៉ានីនាទ្វីបអឺរ៉ុប និយាយថា៖ «ខ្ញុំចូលចិត្តសរសេរគោលដៅរបស់ខ្ញុំនៅលើក្រដាស ហើយទុកក្រដាសនោះនៅកន្លែងដែលងាយស្រួលមើលឃើញ។ នៅលើតុរបស់ខ្ញុំមានរូបភាពផ្លូវបំបែក។ ពេលខ្ញុំត្រូវធ្វើការសម្រេចចិត្ត ខ្ញុំមើលរូបភាពនោះ ហើយគិតថាតើការសម្រេចចិត្តនោះនឹងនាំខ្ញុំទៅដល់ណា?»។ បងសុនយ៉ាព្យាយាមឲ្យមានទស្សនៈត្រឹមត្រូវចំពោះការពិបាកដែលគាត់ជួប។ គាត់និយាយថា៖ «កាលៈទេសៈថ្មីនីមួយៗអាចប្រៀបដូចជាជញ្ជាំងដែលបាំងខ្ញុំមិនឲ្យទៅមុខ ឬជាស្ពានដែលជួយចម្លងខ្ញុំ គឺអាស្រ័យលើចិត្តគំនិតរបស់ខ្ញុំ»។
១៩. តើយើងគួរតាំងចិត្តធ្វើអ្វី?
១៩ ព្រះយេហូវ៉ាឲ្យពរយើងតាមវិធីជាច្រើន។ យើងអាចបង្ហាញថា យើងឲ្យតម្លៃខ្លាំងយ៉ាងណាចំពោះពរទាំងនោះ ដោយខំអស់ពីសមត្ថភាពដើម្បីនាំឲ្យលោកទទួលការសរសើរ។ (ហេ. ១៣:១៥) នេះប្រហែលជារួមបញ្ចូលការស្វែងយល់អំពីរបៀបថ្មីៗដើម្បីបង្កើនកិច្ចបម្រើផ្សាយរបស់យើង ហើយព្រះយេហូវ៉ាប្រហែលជានឹងឲ្យពរយើងថែមទៀត។ រាល់ថ្ងៃ សូមយើងស្វែងរកវិធីផ្សេងៗដើម្បី«ភ្លក់មើលឲ្យដឹងថាព្រះយេហូវ៉ាជាព្រះល្អ»។ យ៉ាងនេះ យើងនឹងយកតម្រាប់លោកយេស៊ូដែលបានមានប្រសាសន៍ថា៖ «អាហាររបស់ខ្ញុំ គឺខ្ញុំធ្វើតាមបំណងប្រាថ្នារបស់លោកដែលបានចាត់ខ្ញុំឲ្យមក ព្រមទាំងបង្ហើយកិច្ចការដែលលោកបានផ្ដល់ឲ្យផង»។—យ៉ូន. ៤:៣៤
ចម្រៀងលេខ៨០ «សូមភ្លក់មើលឲ្យដឹងថា ព្រះយេហូវ៉ាលោកល្អ»
^ វគ្គ 5 អ្វីល្អៗទាំងអស់មកពីព្រះយេហូវ៉ា។ លោកផ្ដល់អ្វីល្អៗដល់មនុស្សគ្រប់រូប រួមទាំងមនុស្សទុច្ចរិតផងដែរ។ ប៉ុន្តែជាពិសេស លោកចង់ធ្វើអ្វីល្អៗចំពោះអ្នកគោរពប្រណិប័តន៍ដ៏ស្មោះត្រង់របស់លោក។ ក្នុងអត្ថបទនេះ យើងនឹងពិចារណាអំពីរបៀបដែលព្រះយេហូវ៉ាផ្ដល់អ្វីល្អដល់អ្នកបម្រើលោក។ យើងក៏នឹងពិចារណាអំពីរបៀបដ៏ពិសេសដែលពួកអ្នកដែលបង្កើនកិច្ចបម្រើរបស់ពួកគេទទួលគុណធម៌របស់ព្រះយេហូវ៉ា។
^ វគ្គ 7 ឈ្មោះខ្លះបានត្រូវផ្លាស់ប្ដូរ។
^ វគ្គ 14 អត្ថបទតភាគនេះធ្លាប់បោះពុម្ពផ្សាយនៅក្នុងទស្សនាវដ្ដីប៉មយាម ហើយឥឡូវមាននៅគេហទំព័រjw.org/km។ សូមចុច«អំពីយើង» ▸ «បទពិសោធន៍» ▸ «ការសម្រេចគោលដៅក្នុងកិច្ចបម្រើ»។
