អត្ថបទសិក្សា១៩
គ្មានអ្វីអាចធ្វើឲ្យមនុស្សសុចរិតជំពប់ដួលបានឡើយ!
«ពួកអ្នកដែលស្រឡាញ់ក្រិត្យវិន័យទ្រង់ នោះមានសេចក្ដីសុខដ៏លើសលប់ ហើយគ្មានហេតុនឹងចំពប់ដួលឡើយ»។—ទំនុក. ១១៩:១៦៥
ចម្រៀងលេខ១២២ ចូរពង្រឹងជំហរឲ្យមាំមួនឡើង!
សេចក្ដីសង្ខេប *
១-២. តើអ្នកនិពន្ធម្នាក់និយាយអ្វី ហើយតើយើងនឹងពិចារណាអ្វីខ្លះក្នុងអត្ថបទនេះ?
សព្វថ្ងៃនេះ មនុស្សរាប់លាននាក់អះអាងថាពួកគេជឿលើលោកយេស៊ូ ប៉ុន្តែពួកគេមិនធ្វើតាមអ្វីដែលលោកបានបង្រៀនទេ។ (២ធី. ៤:៣, ៤) អ្នកនិពន្ធម្នាក់ធ្លាប់និយាយថា៖ «បើមានបុរសម្នាក់ទៀតដូចលោកយេស៊ូនៅក្នុងចំណោមយើងសព្វថ្ងៃនេះ ដែលនិយាយអ្វីដូចលោកយេស៊ូធ្លាប់និយាយ . . . តើយើងនឹងបដិសេធមិនទទួលស្គាល់បុរសនោះដូចដែលមនុស្សបានធ្វើចំពោះលោកយេស៊ូកាលពី២.០០០ឆ្នាំមុនឬទេ? . . . ការប្រព្រឹត្តនិងចិត្តគំនិតរបស់មនុស្សភាគច្រើនបង្ហាញថាចម្លើយរបស់ពួកគេគឺថា៖ ‹មែន យើងនឹងបដិសេធមិនទទួលស្គាល់បុរសនោះដែរ›»។
២ មនុស្សជាច្រើននៅសតវត្សរ៍ទី១បានឮលោកយេស៊ូបង្រៀន និងឃើញអព្ភូតហេតុរបស់លោក ប៉ុន្តែពួកគេមិនព្រមជឿលើលោកទេ។ ហេតុអ្វី? ក្នុងអត្ថបទមុន យើងបានពិចារណាអំពីមូលហេតុបួនដែលមនុស្សបានជំពប់ដួលចំពោះពាក្យសម្ដីនិងការប្រព្រឹត្តរបស់លោកយេស៊ូ។ នៅឥឡូវនេះ សូមយើងពិចារណាមូលហេតុបួនថែមទៀត។ យើងក៏នឹងរៀនអំពីមូលហេតុដែលមនុស្សនៅសព្វថ្ងៃនេះមិនចង់ស្ដាប់អ្នកកាន់តាមលោកយេស៊ូ ព្រមទាំងអំពីរបៀបដែលយើងអាចជៀសវាងពីការជំពប់ដួល។
(១) លោកយេស៊ូមិនរើសមុខ
មនុស្សជាច្រើនជំពប់ដួលនឹងលោកយេស៊ូដោយសារការសេពគប់របស់លោក។ តើអ្វីទាំងនេះអាចធ្វើឲ្យអ្នកខ្លះនៅសព្វថ្ងៃនេះជំពប់ដួលតាមរបៀបណា? (សូមមើលវគ្គ៣) *
៣. តើលោកយេស៊ូបានធ្វើអ្វីដែលនាំឲ្យអ្នកខ្លះជំពប់ដួល?
៣ កាលដែលលោកយេស៊ូនៅផែនដី លោកបានចំណាយពេលជាមួយនឹងមនុស្សគ្រប់ប្រភេទ។ លោកមិនគ្រាន់តែបានបរិភោគអាហារជាមួយនឹងអ្នកមាននិងអ្នកមានអំណាចប៉ុណ្ណោះ តែលោកក៏បានចំណាយពេលជាច្រើនជាមួយនឹងអ្នកក្រនិងអ្នកដែលបានត្រូវគេជិះជាន់ផងដែរ។ លោកក៏មានចិត្តអាណិតមេត្តាចំពោះពួកអ្នកដែលបានត្រូវគេចាត់ទុកថាជា«អ្នកប្រព្រឹត្តអំពើខុសឆ្គង»។ មនុស្សខ្លះដែលមានអំណួត បានជំពប់ដួលនឹងការប្រព្រឹត្តរបស់លោកយេស៊ូ។ ពួកគេបានសួរអ្នកកាន់តាមលោកថា៖ «ហេតុអ្វីអ្នករាល់គ្នាផឹកនិងបរិភោគជាមួយនឹងអ្នកយកពន្ធនិងអ្នកប្រព្រឹត្តអំពើខុសឆ្គងដូច្នេះ?»។ លោកយេស៊ូតបឆ្លើយថា៖ «មនុស្សដែលមានសុខភាពល្អមិនត្រូវការគ្រូពេទ្យឡើយ តែអ្នកដែលឈឺទើបត្រូវការគ្រូពេទ្យ។ ខ្ញុំមិនបានមកដើម្បីហៅមនុស្សសុចរិតឡើយ តែបានមកដើម្បីហៅអ្នកប្រព្រឹត្តអំពើខុសឆ្គងឲ្យប្រែចិត្ដ»។—លូក. ៥:២៩-៣២
៤. យោងទៅតាមអ្វីដែលអេសាយបានប្រកាសទុកជាមុន តើជនជាតិយូដាគួររំពឹងអ្វីអំពីមេស្ស៊ី?
៤តើបទគម្ពីរចែងយ៉ាងណា? អស់ជាច្រើនឆ្នាំមុនមេស្ស៊ីបានមកដល់ អេសាយដែលជាអ្នកប្រកាសទំនាយរៀបរាប់ថាលោកត្រូវជាបុគ្គលដែលពិភពលោកមិនព្រមទទួលស្គាល់។ ទំនាយនោះចែងថា៖ «ទ្រង់ត្រូវគេមើលងាយ ហើយត្រូវមនុស្សបោះបង់ចោល។ . . . ទ្រង់ត្រូវគេមើលងាយ ដូចជាអ្នកណាដែលមនុស្សគេចមុខចេញ ហើយយើងរាល់គ្នាមិនបានរាប់អានទ្រង់សោះ»។ (អេ. ៥៣:៣) មេស្ស៊ីនឹង«ត្រូវមនុស្សបោះបង់ចោល» ដូច្នេះជនជាតិយូដានៅសតវត្សរ៍ទី១គួររំពឹងថាលោកយេស៊ូនឹងត្រូវគេបដិសេធមិនទទួលស្គាល់។
៥. តើមនុស្សជាច្រើននៅសព្វថ្ងៃនេះមានទស្សនៈយ៉ាងណាចំពោះអ្នកកាន់តាមលោកយេស៊ូ?
៥តើមានបញ្ហាស្រដៀងនឹងនោះនៅសព្វថ្ងៃនេះឬទេ? គឺមាន។ ពួកអ្នកដឹកនាំសាសនាជាច្រើនសប្បាយចិត្ត ទទួលអ្នកមាន អ្នកប្រាជ្ញ និងអ្នកមានមុខមានមាត់ក្នុងសង្គម ជាសមាជិកសាសនារបស់ពួកគេ។ ពួកគេធ្វើដូច្នេះ ទោះជាសមាជិកថ្មីនោះមានសីលធម៌និងរបៀបរស់នៅមិនសមស្របនឹងខ្នាតតម្រារបស់ព្រះក្ដី។ ផ្ទុយទៅវិញ ពួកអ្នកដឹកនាំសាសនាទាំងនោះមើលងាយអ្នកបម្រើដ៏ខ្នះខ្នែងរបស់ព្រះយេហូវ៉ា ដែលមានសីលធម៌ស្អាតស្អំ ដោយសារពួកគេមិនមានមុខមាត់ក្នុងសង្គម។ ដូចប៉ូលបាននិយាយ ព្រះជ្រើសរើសពួកអ្នកដែលគេ«មើលងាយ»។ (១កូ. ១:២៦-២៩) ប៉ុន្តែចំពោះព្រះយេហូវ៉ា អ្នកបម្រើដ៏ស្មោះត្រង់ទាំងអស់របស់លោកគឺមានតម្លៃ។
៦. តើលោកយេស៊ូបានមានប្រសាសន៍អ្វីនៅម៉ាថាយ ១១:២៥, ២៦ ហើយតើយើងអាចយកតម្រាប់លោកយ៉ាងដូចម្ដេច?
៦តើយើងអាចជៀសវាងពីការជំពប់ដួលយ៉ាងដូចម្ដេច? (សូមអាន ម៉ាថាយ ១១:២៥, ២៦) សូមកុំឲ្យទស្សនៈរបស់ពិភពលោកចំពោះរាស្ត្រព្រះជះឥទ្ធិពលលើអ្នកឡើយ។ ចូរទទួលស្គាល់ថាព្រះយេហូវ៉ាប្រើតែបុគ្គលដែលមានចិត្តរាបទាបប៉ុណ្ណោះ ឲ្យធ្វើតាមបំណងប្រាថ្នារបស់លោក។ (ទំនុក. ១៣៨:៦) ម្យ៉ាងទៀត សូមគិតអំពីអ្វីៗជាច្រើនដែលលោកបានសម្រេច ដោយប្រើពួកអ្នកដែលពិភពលោកនេះចាត់ទុកថាមិនមែនជាអ្នកប្រាជ្ញឬគ្មានចំណេះដឹង។
(២) លោកយេស៊ូបកអាក្រាតសេចក្ដីបង្រៀនមិនត្រឹមត្រូវ
៧. ហេតុអ្វីលោកយេស៊ូបានហៅពួកផារិស៊ីថាជាមនុស្សលាក់ពុត ហើយតើពួកគេមានប្រតិកម្មយ៉ាងណា?
៧ លោកយេស៊ូបានផ្ដន្ទាទោសយ៉ាងក្លាហានចំពោះអ្នកដឹកនាំសាសនានៅសម័យលោក ដោយសារពួកគេមិនបង្រៀនបណ្ដាជនឲ្យគោរពប្រណិប័តន៍ព្រះយេហូវ៉ាយ៉ាងត្រឹមត្រូវ។ ជាឧទាហរណ៍ លោកបានបកអាក្រាតភាពពុតត្បុតរបស់ពួកផារិស៊ី ដែលឲ្យតម្លៃទៅលើរបៀបលាងដៃ ច្រើនជាងការថែទាំឪពុកម្ដាយ។ (ម៉ាថ. ១៥:១-១១) អ្នកកាន់តាមលោកយេស៊ូប្រហែលជាភ្ញាក់ផ្អើលចំពោះពាក្យសម្ដីរបស់លោក។ ពួកគេសួរលោកថា៖ «តើលោកជ្រាបថាពួកផារិស៊ីបានជំពប់ដួលនឹងសម្ដីរបស់លោកឬទេ?»។ លោកយេស៊ូតបឆ្លើយថា៖ «គ្រប់រុក្ខជាតិដែលបិតារបស់ខ្ញុំនៅស្ថានសួគ៌មិនបានដាំ នោះនឹងត្រូវដកចេញ។ កុំអំពល់នឹងពួកគេឡើយ។ ពួកគេជាមនុស្សខ្វាក់ដែលកំពុងនាំផ្លូវអ្នកឯទៀត។ ប្រសិនបើមនុស្សខ្វាក់នាំផ្លូវមនុស្សខ្វាក់ដូចគ្នា ទាំងពីរនាក់នឹងធ្លាក់រណ្ដៅ»។ (ម៉ាថ. ១៥:១២-១៤) លោកយេស៊ូមិនឲ្យប្រតិកម្មមិនល្អរបស់ពួកអ្នកដឹកនាំសាសនាបញ្ឈប់លោកពីការនិយាយសេចក្ដីពិតឡើយ។
៨. តើលោកយេស៊ូបានបង្ហាញយ៉ាងណាថាមិនមែនជំនឿសាសនាទាំងអស់នាំឲ្យព្រះពេញចិត្ត?
៨ លោកយេស៊ូក៏បានបកអាក្រាតសេចក្ដីបង្រៀនមិនពិតរបស់សាសនាដែរ។ លោកមិនបានមានប្រសាសន៍ថា ជំនឿសាសនាទាំងអស់នាំឲ្យព្រះពេញចិត្តឡើយ។ ផ្ទុយទៅវិញ លោកបានពន្យល់ថា មនុស្សជាច្រើននឹងដើរលើផ្លូវធំទូលាយដែលនាំទៅដល់ការវិនាសជីវិត ប៉ុន្តែមានមនុស្សតិចណាស់ដែលដើរលើផ្លូវតូចចង្អៀតដែលនាំទៅឯជីវិត។ (ម៉ាថ. ៧:១៣, ១៤) លោកបញ្ជាក់ថាអ្នកខ្លះនឹងអះអាងថាពួកគេជាអ្នកបម្រើព្រះ ប៉ុន្តែតាមពិតពួកគេមិនបម្រើព្រះទេ។ លោកបានព្រមានថា៖ «ចូរប្រយ័ត្នចំពោះអ្នកប្រកាសទំនាយមិនពិត ដែលមកឯអ្នករាល់គ្នាដោយក្លែងខ្លួនជាសត្វចៀម ប៉ុន្តែតាមពិត ជាឆ្កែចចកអត់ឃ្លានវិញ។ អ្នករាល់គ្នានឹងស្គាល់ពួកគេដោយផលផ្លែរបស់ពួកគេ»។—ម៉ាថ. ៧:១៥-២០
មនុស្សជាច្រើនជំពប់ដួលនឹងលោកយេស៊ូដោយសារលោកបញ្ជាក់ថាការប្រព្រឹត្តនិងសេចក្ដីបង្រៀនមិនពិតគឺខុស។ តើអ្វីទាំងនេះអាចធ្វើឲ្យអ្នកខ្លះនៅសព្វថ្ងៃនេះជំពប់ដួលតាមរបៀបណា? (សូមមើលវគ្គ៩) *
៩. តើលោកយេស៊ូបានបកអាក្រាតសេចក្ដីបង្រៀនមិនពិតណាខ្លះរបស់សាសនា?
៩តើបទគម្ពីរចែងយ៉ាងណា? ទំនាយក្នុងគម្ពីរបានប្រាប់ទុកជាមុនថា មេស្ស៊ីនឹងពោរពេញទៅដោយសេចក្ដីខ្នះខ្នែងចំពោះកន្លែងគោរពបូជារបស់ព្រះយេហូវ៉ា។ (ទំនុក. ៦៩:៩; យ៉ូន. ២:១៤-១៧) សេចក្ដីខ្នះខ្នែងនោះជំរុញចិត្តលោកយេស៊ូឲ្យបកអាក្រាតការប្រព្រឹត្តនិងសេចក្ដីបង្រៀនមិនពិតរបស់សាសនា។ ជាឧទាហរណ៍ ពួកផារិស៊ីជឿថាព្រលឹងគឺអមតៈ ប៉ុន្តែលោកយេស៊ូបានបង្រៀនថាមនុស្សស្លាប់កំពុងដេកលក់។ (យ៉ូន. ១១:១១) ពួកសាឌូស៊ីមិនជឿទៅលើការប្រោសឲ្យរស់ឡើងវិញទេ តែលោកយេស៊ូបានប្រោសឡាសាដែលជាមិត្តសម្លាញ់របស់លោកឲ្យរស់ឡើងវិញ។ (យ៉ូន. ១១:៤៣, ៤៤; សកម្ម. ២៣:៨) ពួកផារិស៊ីជឿទៅលើព្រហ្មលិខិត ហើយថាអ្វីៗទាំងអស់ព្រះជាអ្នកកំណត់មករួចហើយ រីឯលោកយេស៊ូបានបង្រៀនថា មនុស្សអាចសម្រេចចិត្តបម្រើព្រះឬមិនបម្រើលោក។—ម៉ាថ. ១១:២៨
១០. ហេតុអ្វីមនុស្សជាច្រើននៅសព្វថ្ងៃនេះបដិសេធយើង ដោយសារអ្វីដែលយើងបង្រៀន?
១០តើមានបញ្ហាស្រដៀងនឹងនោះនៅសព្វថ្ងៃនេះឬទេ? គឺមាន។ មនុស្សជាច្រើនបដិសេធមិនទទួលស្គាល់យើង ដោយសារយើងប្រើគម្ពីរដើម្បីបង្ហាញមនុស្សថា សេចក្ដីបង្រៀនខ្លះរបស់សាសនាគឺមិនពិត។ ជាឧទាហរណ៍ អ្នកដឹកនាំសាសនាបង្រៀនអ្នកកាន់តាមពួកគេថា ព្រះដាក់ទោសមនុស្សអាក្រក់ក្នុងភ្លើងនរក។ ពួកគេប្រើសេចក្ដីបង្រៀនមិនពិតនោះដើម្បីកាន់កាប់លើមនុស្ស។ ក្នុងនាមជាអ្នកបម្រើរបស់ព្រះយេហូវ៉ាដែលគោរពប្រណិប័តន៍ព្រះនៃសេចក្ដីស្រឡាញ់ យើងបកអាក្រាតសេចក្ដីបង្រៀនមិនពិតនោះ។ អ្នកដឹកនាំសាសនាក៏បង្រៀនថា ព្រលឹងគឺអមតៈ។ បើសេចក្ដីបង្រៀននោះពិត គ្មានអ្នកណានឹងត្រូវប្រោសឲ្យរស់ឡើងវិញឡើយ។ យើងបង្ហាញថាសេចក្ដីបង្រៀននេះគឺមិននៅក្នុងគម្ពីរទេ។ ម្យ៉ាងទៀត ទោះជាសាសនាជាច្រើនបង្រៀនអំពីព្រហ្មលិខិត ឬថាព្រះជាអ្នកកំណត់អ្វីៗទាំងអស់ទុកជាមុនក្ដី យើងបង្រៀនថាមនុស្សមានចិត្តសេរីនិងអាចសម្រេចចិត្តថាចង់បម្រើព្រះឬមិនចង់។ តើអ្នកដឹកនាំសាសនាមានប្រតិកម្មយ៉ាងណា? ពួកគេច្រើនតែខឹងសម្បា!
១១. យោងទៅតាមប្រសាសន៍របស់លោកយេស៊ូនៅយ៉ូហាន ៨:៤៥-៤៧ តើព្រះតម្រូវអ្វីពីរាស្ត្ររបស់លោក?
១១តើយើងអាចជៀសវាងពីការជំពប់ដួលយ៉ាងដូចម្ដេច? បើយើងស្រឡាញ់សេចក្ដីពិត យើងត្រូវជឿនិងធ្វើតាមប្រសាសន៍របស់ព្រះ។ (សូមអាន យ៉ូហាន ៨:៤៥-៤៧) ខុសពីមេកំណាចសាថាន យើងកាន់ជំហរខាងសេចក្ដីពិត។ យើងមិនធ្វើអ្វីណាក៏ដោយដែលខុសពីជំនឿរបស់យើងទេ។ (យ៉ូន. ៨:៤៤) ព្រះតម្រូវឲ្យរាស្ត្ររបស់លោក«ស្អប់ខ្ពើមអ្វីៗដែលទុច្ចរិត ហើយកាន់ខ្ជាប់អ្វីៗដែលល្អ» ដូចលោកយេស៊ូបានធ្វើ។—រ៉ូម ១២:៩; ហេ. ១:៩
(៣) លោកយេស៊ូបានត្រូវគេបៀតបៀន
មនុស្សជាច្រើនជំពប់ដួលនឹងលោកយេស៊ូដោយសារការស្លាប់របស់លោកនៅលើបង្គោលឈើ។ តើអ្វីទាំងនេះអាចធ្វើឲ្យអ្នកខ្លះនៅសព្វថ្ងៃនេះជំពប់ដួលតាមរបៀបណា? (សូមមើលវគ្គ១២) *
១២. ហេតុអ្វីរបៀបដែលលោកយេស៊ូស្លាប់នាំឲ្យជនជាតិយូដាជាច្រើនជំពប់ដួល?
១២ តើមានមូលហេតុអ្វីទៀតដែលជនជាតិយូដាខ្លះបដិសេធមិនព្រមទទួលស្គាល់លោកយេស៊ូ? ប៉ូលនិយាយថា៖ «យើងផ្សព្វផ្សាយអំពីគ្រិស្តដែលបានត្រូវព្យួរ ជាអ្វីដែលធ្វើឲ្យជនជាតិយូដាជំពប់ដួល»។ (១កូ. ១:២៣) ហេតុអ្វីរបៀបដែលលោកយេស៊ូបានស្លាប់នាំឲ្យជនជាតិយូដាជាច្រើនជំពប់ដួល? ចំពោះពួកគេ ការស្លាប់របស់លោកយេស៊ូនៅលើបង្គោលទារុណកម្ម ធ្វើឲ្យលោកមើលទៅជាឧក្រិដ្ឋជននិងជាអ្នកប្រព្រឹត្តអំពើខុសឆ្គង មិនមែនជាមេស្ស៊ីទេ។—ចោ. ២១:២២, ២៣
១៣. តើពួកអ្នកដែលជំពប់ដួលនឹងលោកយេស៊ូមិនបានទទួលស្គាល់អ្វីខ្លះ?
១៣ ជនជាតិយូដាដែលជំពប់ដួលនឹងលោកយេស៊ូមិនបានទទួលស្គាល់ថាលោកគ្មានទោស និងបានត្រូវគេចោទប្រកាន់មិនពិត ហើយថាលោកបានត្រូវគេប្រព្រឹត្តដោយអយុត្តិធម៌។ ពួកអ្នកកាត់ក្ដីលោកយេស៊ូមិនបានរកយុត្តិធម៌ឲ្យលោកទេ។ តុលាការជាន់ខ្ពស់នៃជនជាតិយូដាឆាប់ជួបជុំគ្នាដើម្បីកាត់ក្ដីលោកយេស៊ូ ហើយមិនធ្វើតាមច្បាប់អំពីការកាត់ក្ដីឡើយ។ (លូក. ២២:៥៤; យ៉ូន. ១៨:២៤) ជាជាងស្ដាប់ការចោទប្រកាន់និងទីសំអាងអំពីលោកយេស៊ូដោយមិនលម្អៀង ពួកចៅក្រមបានរកសាក្សី«ឲ្យចោទប្រកាន់លោកយេស៊ូដោយមិនពិត ដើម្បីមានហេតុប្រហារជីវិតលោក»។ ពេលគម្រោងនេះបរាជ័យ សម្ដេចសង្ឃព្យាយាមឲ្យលោកយេស៊ូនិយាយអ្វីខុសដើម្បីមានហេតុដាក់ទោសលោក។ នេះគឺខុសច្បាប់តែម្ដង។ (ម៉ាថ. ២៦:៥៩; ម៉ាក. ១៤:៥៥-៦៤) ម្យ៉ាងទៀត ក្រោយពីលោកយេស៊ូបានត្រូវប្រោសឲ្យរស់ឡើងវិញ ពួកចៅក្រមទុច្ចរិតទាំងនោះបានឲ្យ«កាក់ប្រាក់មួយចំនួនល្មម»ដល់ពួកទាហានរ៉ូមដែលយាមផ្នូរលោកយេស៊ូ ដើម្បីឲ្យផ្សាយរឿងមិនពិតអំពីមូលហេតុដែលផ្នូរនោះនៅទទេ។—ម៉ាថ. ២៨:១១-១៥
១៤. តើបទគម្ពីរបានប្រកាសអ្វីទុកជាមុនអំពីការស្លាប់របស់មេស្ស៊ី?
១៤តើបទគម្ពីរចែងយ៉ាងណា? ទោះជាជនជាតិយូដាជាច្រើននៅសម័យលោកយេស៊ូមិនបានរំពឹងថាមេស្ស៊ីនឹងត្រូវស្លាប់ក្ដី សូមកត់សម្គាល់អំពីអ្វីដែលបានត្រូវប្រកាសទុកជាមុនក្នុងបទគម្ពីរដែលចែងថា៖ «ទ្រង់បានច្រួចព្រលឹងចេញរហូតដល់ស្លាប់។ គេបានរាប់ទ្រង់ទុកជាអ្នកទទឹងច្បាប់ ប៉ុន្តែទ្រង់បានទទួលរងទោសនៃអំពើបាបរបស់មនុស្សជាច្រើន ហើយបានអង្វរជំនួសមនុស្សដែលទទឹងច្បាប់វិញ»។ (អេ. ៥៣:១២) ដូច្នេះ ជនជាតិយូដាគ្មានហេតុឲ្យជំពប់ដួល ពេលគេប្រហារជីវិតលោកយេស៊ូជាអ្នកប្រព្រឹត្តអំពើខុសឆ្គងឡើយ។
១៥. តើការចោទប្រកាន់អ្វីខ្លះអំពីសាក្សីព្រះយេហូវ៉ាបាននាំឲ្យអ្នកខ្លះជំពប់ដួល?
១៥តើមានបញ្ហាស្រដៀងនឹងនោះនៅសព្វថ្ងៃនេះឬទេ? ពិតជាមាន។ លោកយេស៊ូបានត្រូវគេចោទប្រកាន់និងកាត់ក្ដីដោយអយុត្តិធម៌ ហើយសាក្សីព្រះយេហូវ៉ាបានត្រូវគេប្រព្រឹត្តដោយអយុត្តិធម៌ស្រដៀងនឹងនេះ។ សូមគិតអំពីឧទាហរណ៍ខ្លះៗដែលបាននាំឲ្យអ្នកខ្លះជំពប់ដួល។ នៅសហរដ្ឋអាម៉េរិករវាងឆ្នាំ១៩៣០និងឆ្នាំ១៩៥០ មានរឿងក្ដីជាច្រើនបានត្រូវលើកទៅតុលាការ ដើម្បីការពារសេរីភាពរបស់យើងក្នុងការគោរពប្រណិប័តន៍ព្រះ។ ចៅក្រមខ្លះលម្អៀងប្រឆាំងយើងដោយឥតអៀនខ្មាស។ នៅខេត្តកេបិក ប្រទេសកាណាដា ពួកបព្វជិតនិងរដ្ឋរួមដៃគ្នាប្រឆាំងកិច្ចការរបស់យើង។ អ្នកផ្សាយជាច្រើនបានត្រូវគេចាប់ដាក់គុក ដោយសារពួកគេបានផ្សព្វផ្សាយដល់អ្នកឯទៀតអំពីរាជាណាចក្ររបស់ព្រះ។ ក្នុងរបបណាត្ស៊ីប្រទេសអាល្លឺម៉ង់ បុរសវ័យក្មេងស្មោះត្រង់មួយចំនួនបានត្រូវពួកណាត្ស៊ីប្រហារជីវិត។ ម្យ៉ាងទៀត នៅប៉ុន្មានឆ្នាំថ្មីៗនេះ បងប្អូនរបស់យើងជាច្រើននាក់នៅប្រទេសរុស្ស៊ីបានត្រូវគេកាត់ក្ដីនិងដាក់គុក ដោយសារពួកគេនិយាយអំពីគម្ពីរ។ ពួកអាជ្ញាធរបានចោទប្រកាន់ថាកិច្ចការនេះជាសកម្មភាពជ្រុលនិយម។ សូម្បីតែសេចក្ដីបកប្រែពិភពលោកថ្មីពីបទគម្ពីរបរិសុទ្ធជាភាសារុស្ស៊ី ក៏បានត្រូវគេដាក់បម្រាមនិងបានត្រូវចាត់ទុកជាសៀវភៅជ្រុលនិយម ដោយសារសៀវភៅនោះប្រើនាមព្រះយេហូវ៉ា។
១៦. ដូចបានត្រូវលើកឡើងនៅយ៉ូហានទី១ ៤:១ ហេតុអ្វីយើងមិនគួរចាញ់បោករឿងមិនពិតអំពីរាស្ត្ររបស់ព្រះយេហូវ៉ា?
១៦តើយើងអាចជៀសវាងពីការជំពប់ដួលយ៉ាងដូចម្ដេច? សូមស្វែងយល់អំពីហេតុការណ៍ពិត។ ក្នុងសុន្ទរកថារបស់លោកយេស៊ូនៅលើភ្នំ លោកបានព្រមានអ្នកស្ដាប់ថា អ្នកខ្លះនឹង«និយាយរឿងអាក្រក់គ្រប់បែបយ៉ាង ដើម្បីបង្កាច់បង្ខូច»ពួកគេ។ (ម៉ាថ. ៥:១១) ប្រភពនៃការកុហកទាំងនេះមកពីសាថាន។ វាបណ្ដាលឲ្យពួកអ្នកប្រឆាំង ផ្សព្វផ្សាយការកុហកដ៏ព្រៃផ្សៃអំពីពួកអ្នកស្រឡាញ់សេចក្ដីពិត។ (បប. ១២:៩, ១០) យើងត្រូវបដិសេធការកុហកពីអ្នកប្រឆាំង។ យើងមិនគួរឲ្យការកុហកបែបនេះធ្វើឲ្យយើងមិនហ៊ានបម្រើព្រះ ឬធ្វើឲ្យជំនឿរបស់យើងចុះខ្សោយឡើយ។—សូមអាន យ៉ូហានទី១ ៤:១
(៤) លោកយេស៊ូបានត្រូវគេក្បត់និងបោះបង់ចោល
មនុស្សជាច្រើនជំពប់ដួលនឹងលោកយេស៊ូដោយសារយូដាសក្បត់លោក។ តើអ្វីទាំងនេះអាចធ្វើឲ្យអ្នកខ្លះនៅសព្វថ្ងៃនេះជំពប់ដួលតាមរបៀបណា? (សូមមើលវគ្គ១៧-១៨) *
១៧. តើព្រឹត្តិការណ៍ដែលកើតឡើងមុនលោកយេស៊ូស្លាប់ប្រហែលជាធ្វើឲ្យអ្នកខ្លះជំពប់ដួលយ៉ាងដូចម្ដេច?
១៧ បន្តិចមុនលោកយេស៊ូស្លាប់ សាវ័កម្នាក់ក្នុងចំណោមសាវ័ក១២នាក់បានក្បត់លោក។ សាវ័កម្នាក់ទៀតបានបដិសេធមិនទទួលស្គាល់លោកយេស៊ូអស់បីដង ហើយសាវ័កទាំងអស់បានបោះបង់ចោលលោកនៅយប់មុនលោកស្លាប់។ (ម៉ាថ. ២៦:១៤-១៦, ៤៧, ៥៦, ៧៥) លោកយេស៊ូមិនភ្ញាក់ផ្អើលឡើយ។ លោកថែមទាំងបានប្រាប់ទុកជាមុនថាអ្វីៗទាំងនោះនឹងកើតឡើង។ (យ៉ូន. ៦:៦៤; ១៣:២១, ២៦, ៣៨; ១៦:៣២) ពេលឃើញអ្វីទាំងនេះកើតឡើង អ្នកខ្លះប្រហែលជាជំពប់ដួល ហើយនិយាយថា‹បើពួកសាវ័ករបស់លោកយេស៊ូប្រព្រឹត្តបែបនេះ ខ្ញុំមិនចង់ពាក់ព័ន្ធជាមួយពួកគេទេ!›។
១៨. តើទំនាយអ្វីខ្លះបានត្រូវសម្រេចមុនលោកយេស៊ូស្លាប់?
១៨តើបទគម្ពីរចែងយ៉ាងណា? រាប់រយឆ្នាំមុននោះ ព្រះយេហូវ៉ាបានបង្ហាញក្នុងបណ្ដាំរបស់លោកថា មេស្ស៊ីនឹងត្រូវគេក្បត់ដើម្បីបានប្រាក់៣០កាក់។ (សាក. ១១:១២, ១៣) អ្នកក្បត់ជាមិត្តជិតស្និទ្ធម្នាក់របស់លោកយេស៊ូ។ (ទំនុក. ៤១:៩) សាការីដែលជាអ្នកប្រកាសទំនាយក៏បានសរសេរថា៖ «ចូរវាយអ្នកគង្វាល នោះហ្វូងចៀមនឹងត្រូវខ្ចាត់ខ្ចាយទៅ»។ (សាក. ១៣:៧) ការឃើញទំនាយទាំងនេះបានកើតឡើងដល់លោកយេស៊ូ គួរពង្រឹងជំនឿរបស់បុគ្គលដែលមានចិត្តស្មោះ ជាជាងធ្វើឲ្យពួកគេជំពប់ដួល។
១៩. តើបុគ្គលដែលមានចិត្តស្មោះទទួលស្គាល់អ្វី?
១៩តើមានបញ្ហាស្រដៀងនឹងនោះនៅសព្វថ្ងៃនេះឬទេ? គឺមាន។ នៅសម័យយើង សាក្សីមួយចំនួនដែលបងប្អូនជាច្រើនស្គាល់បានចាកចេញពីសេចក្ដីពិត ទៅជាអ្នកក្បត់ជំនឿ ហើយព្យាយាមអូសទាញបងប្អូនឯទៀតឲ្យបែរចេញពីសេចក្ដីពិត។ ពួកគេផ្សាយព័ត៌មានមិនល្អ ឬបោកប្រាស់និងកុហកអំពីសាក្សីព្រះយេហូវ៉ា តាមកាសែត វិទ្យុ ទូរទស្សន៍ និងប្រព័ន្ធអ៊ីនធឺណិត។ ប៉ុន្តែ បុគ្គលដែលមានចិត្តស្មោះមិនជំពប់ដួលចំពោះរឿងទាំងនេះទេ។ ផ្ទុយទៅវិញ ពួកគេទទួលស្គាល់ថា គម្ពីរបានប្រកាសទុកជាមុនថាអ្វីៗទាំងនេះនឹងកើតឡើង។—ម៉ាថ. ២៤:២៤; ២ពេ. ២:១៨-២២
២០. តើយើងអាចជៀសវាងពីការជំពប់ដួលនឹងពួកអ្នកដែលបានចាកចេញពីសេចក្ដីពិតយ៉ាងដូចម្ដេច? (ធីម៉ូថេទី២ ៤:៤, ៥)
២០តើយើងអាចជៀសវាងពីការជំពប់ដួលយ៉ាងដូចម្ដេច? យើងត្រូវរក្សាជំនឿរបស់យើងឲ្យរឹងមាំ ដោយសិក្សាជាទៀងទាត់ អធិដ្ឋានជារឿយៗ និងបន្តជាប់រវល់ក្នុងកិច្ចការដែលព្រះយេហូវ៉ាបានប្រគល់ឲ្យយើង។ (សូមអាន ធីម៉ូថេទី២ ៤:៤, ៥) បើយើងបង្ហាញជំនឿ យើងនឹងមិនភ័យតក់ស្លុត ពេលយើងឮព័ត៌មានមិនល្អអំពីសាក្សីព្រះយេហូវ៉ា។ (អេ. ២៨:១៦) សេចក្ដីស្រឡាញ់របស់យើងចំពោះព្រះយេហូវ៉ា បណ្ដាំរបស់លោក និងបងប្អូនរួមជំនឿនឹងជួយយើងឲ្យជៀសវាងពីការជំពប់ដួលនឹងពួកអ្នកដែលបានចាកចេញពីសេចក្ដីពិត។
២១. ទោះជាមនុស្សជាច្រើននៅសព្វថ្ងៃនេះមិនព្រមទទួលដំណឹងដែលយើងផ្សព្វផ្សាយក្ដី តើយើងអាចមានទំនុកចិត្តអ្វី?
២១ នៅសតវត្សរ៍ទី១ មនុស្សជាច្រើនបានជំពប់ដួល ហើយបដិសេធមិនព្រមទទួលស្គាល់លោកយេស៊ូ។ ប៉ុន្តែ មនុស្សជាច្រើនទៀតបានទទួលស្គាល់លោក យ៉ាងហោចណាស់នេះរួមបញ្ចូលសមាជិកម្នាក់នៃក្រុមប្រឹក្សាជាន់ខ្ពស់ជនជាតិយូដា ហើយថែមទាំង«សង្ឃមួយក្រុមធំ»ទៀតផង។ (សកម្ម. ៦:៧; ម៉ាថ. ២៧:៥៧-៦០; ម៉ាក. ១៥:៤៣) ស្រដៀងគ្នាដែរ នៅសព្វថ្ងៃនេះ មនុស្សរាប់លាននាក់មិនបានជំពប់ដួលទេ។ ហេតុអ្វី? ពីព្រោះពួកគេស្គាល់និងស្រឡាញ់សេចក្ដីពិតក្នុងបទគម្ពីរ។ បណ្ដាំរបស់ព្រះចែងថា៖ «ពួកអ្នកដែលស្រឡាញ់ក្រិត្យវិន័យទ្រង់ នោះមានសេចក្ដីសុខដ៏លើសលប់ ហើយគ្មានហេតុនឹងចំពប់ដួលឡើយ»។—ទំនុក. ១១៩:១៦៥
ចម្រៀងលេខ១២៤ ចូរមានភក្ដីភាពជានិច្ច
^ វគ្គ 5 ក្នុងអត្ថបទមុន យើងបានពិចារណាអំពីមូលហេតុបួនដែលមនុស្សបដិសេធមិនព្រមទទួលស្គាល់លោកយេស៊ូនៅអតីតកាល និងមូលហេតុដែលពួកគេបដិសេធអ្នកកាន់តាមលោកនៅសព្វថ្ងៃនេះ។ ក្នុងអត្ថបទនេះ យើងនឹងពិចារណាមូលហេតុបួនទៀត។ យើងក៏នឹងស្វែងយល់អំពីមូលហេតុដែលអ្នកស្រឡាញ់ព្រះយេហូវ៉ាដែលមានចិត្តស្មោះ មិនឲ្យខ្លួនជំពប់ដួលឡើយ។
