អត្ថបទសិក្សា ៤១
របៀបដឹកនាំការសិក្សាគម្ពីរដែលនាំទៅដល់ការជ្រមុជទឹក ភាគទី១
«គឺជាក់ស្ដែងថាអ្នករាល់គ្នាជាសំបុត្ររបស់គ្រិស្ត ដែលយើងបានសរសេរក្នុងនាមជាអ្នកបម្រើ»។—២កូ. ៣:៣
ចម្រៀងលេខ៧៨ «ចូរបង្រៀនពួកគេអំពីបណ្ដាំរបស់ព្រះ»
សេចក្ដីសង្ខេប *
ក្រុមជំនុំទាំងមូលរំភើបចិត្តពេលឃើញសិស្សគម្ពីរម្នាក់ដែលពួកគេស្រឡាញ់ទទួលការជ្រមុជទឹក (សូមមើលវគ្គ១)
១. តើកូរិនថូសទី២ ៣:១-៣ជួយយើងយ៉ាងណាឲ្យយល់ថាយើងមានឯកសិទ្ធិដឹកនាំការសិក្សាគម្ពីរដែលនាំទៅដល់ការជ្រមុជទឹក? (សូមមើលរូបភាពនៅក្រប)
តើអ្នកមានអារម្មណ៍យ៉ាងណា ពេលឃើញសិស្សគម្ពីរពីតំបន់ផ្សាយរបស់ក្រុមជំនុំអ្នកទទួលការជ្រមុជទឹក? អ្នកច្បាស់ជាសប្បាយចិត្តជាខ្លាំង! (ម៉ាថ. ២៨:១៩) បើអ្នកបានបង្រៀនអ្នកថ្មីនោះ អ្នកទំនងជារំភើបចិត្ត ពេលឃើញគាត់ទទួលការជ្រមុជទឹក! (១ថែ. ២:១៩, ២០) អ្នកកាន់តាមថ្មីដែលទើបតែទទួលការជ្រមុជទឹកជា«សំបុត្របញ្ជាក់» មិនគ្រាន់តែចំពោះអ្នកដែលបង្រៀនគាត់ប៉ុណ្ណោះទេ តែចំពោះក្រុមជំនុំទាំងមូលដែរ។—សូមអាន កូរិនថូសទី២ ៣:១-៣
២. (ក) តើយើងត្រូវគិតអំពីសំណួរសំខាន់អ្វី ហើយហេតុអ្វី? (ខ) តើការសិក្សាគម្ពីរគឺជាអ្វី? (សូមមើលកំណត់សម្គាល់)
២ យើងសប្បាយចិត្តណាស់ពេលឃើញថាក្នុងអំឡុងបួនឆ្នាំកន្លងទៅនេះ សេចក្ដីរាយការណ៍របស់បងប្អូនបង្ហាញថាពួកគេដឹកនាំការសិក្សាគម្ពីរ *ជាមធ្យមប្រហែលជា១០លាន ជារៀងរាល់ខែនៅទូទាំងពិភពលោក។ ក្នុងអំឡុងឆ្នាំទាំងនោះ ជាមធ្យមជារៀងរាល់ឆ្នាំ មានបុគ្គលជាង២៨០.០០០នាក់បានទទួលការជ្រមុជទឹកជាសាក្សីព្រះយេហូវ៉ា និងជាអ្នកកាន់តាមថ្មីរបស់លោកយេស៊ូគ្រិស្ត។ តើតាមរបៀបណាយើងអាចជួយសិស្សគម្ពីររាប់លាននាក់ទៀតឲ្យទទួលការជ្រមុជទឹក? ដរាបណាដែលព្រះយេហូវ៉ាបង្ហាញចិត្តអត់ធ្មត់ដោយអនុញ្ញាតឲ្យមនុស្សមានពេលនិងឱកាសទៅជាអ្នកកាន់តាមគ្រិស្ត ដរាបនោះយើងចង់ខំប្រឹងអស់ពីសមត្ថភាពដើម្បីជួយពួកគេឲ្យរីកចម្រើនរហូតដល់ទទួលការជ្រមុជទឹក ហើយធ្វើដូច្នេះឲ្យបានឆាប់បំផុតតាមដែលអាចធ្វើបាន។ គឺនៅសល់ពេលតែបន្តិចទេ!—១កូ. ៧:២៩ក; ១ពេ. ៤:៧
៣. ស្ដីអំពីការដឹកនាំការសិក្សាគម្ពីរ តើយើងនឹងពិចារណាអ្វីក្នុងអត្ថបទនេះ?
៣ ដោយសារគឺសំខាន់ខ្លាំងណាស់ដែលយើងជួយមនុស្សឲ្យក្លាយទៅជាអ្នកកាន់តាមលោកយេស៊ូនៅឥឡូវនេះ គណៈអភិបាលបានសុំយោបល់ពីការិយាល័យសាខាអំពីអ្វីដែលយើងអាចធ្វើដើម្បីជួយសិស្សគម្ពីរកាន់តែច្រើនឲ្យរីកចម្រើនរហូតដល់ទទួលការជ្រមុជទឹក។ ក្នុងអត្ថបទនេះនិងអត្ថបទបន្ទាប់ យើងនឹងរៀនពីអ្នកត្រួសត្រាយ សាសនទូត និងអ្នកត្រួតពិនិត្យប្រចាំមណ្ឌលដែលមានបទពិសោធន៍។ * (សុភ. ១១:១៤; ១៥:២២) ពួកគេលើកឡើងអំពីអ្វីដែលអ្នកបង្រៀននិងសិស្សគម្ពីររបស់ពួកគេអាចធ្វើ ដើម្បីឲ្យការសិក្សាកាន់តែមានប្រយោជន៍។ ក្នុងអត្ថបទនេះ យើងនឹងពិចារណាអំពីអ្វីប្រាំយ៉ាងដែលសិស្សគម្ពីរម្នាក់ៗត្រូវធ្វើដើម្បីរីកចម្រើនរហូតដល់ទទួលការជ្រមុជទឹក។
ចូរបង្រៀនរាល់សប្ដាហ៍
ចូរសួរសិស្សគម្ពីរថា៖ «តើយើងអាចអង្គុយនិយាយអំពីគម្ពីរជាមួយគ្នាបានឬទេ?» (សូមមើលវគ្គ៤-៦)
៤. តើយើងគួរទទួលស្គាល់អ្វីអំពីការសិក្សាគម្ពីរនៅមាត់ទ្វារ?
៤ បងប្អូនរបស់យើងជាច្រើនកំពុងដឹកនាំការសិក្សាគម្ពីរនៅមាត់ទ្វារផ្ទះរបស់ម្ចាស់ផ្ទះ។ ទោះជានេះជាការចាប់ផ្ដើមល្អដើម្បីបង្កើនចំណាប់អារម្មណ៍ចំពោះគម្ពីរក្ដី ការសន្ទនានោះច្រើនតែខ្លី ហើយប្រហែលជាមិនធ្វើឡើងរាល់សប្ដាហ៍ទេ។ ដើម្បីបង្កើនចំណាប់អារម្មណ៍កាន់តែខ្លាំងឡើង បងប្អូនខ្លះសុំព័ត៌មានសម្រាប់ទាក់ទងពីបុគ្គលដែលចាប់អារម្មណ៍ ហើយទូរស័ព្ទឬផ្ញើសារទៅបុគ្គលនោះអំពីចំណុចខ្លីពីគម្ពីរនៅពេលផ្សេងទៀត។ ការសន្ទនាបែបនោះប្រហែលជាធ្វើឡើងអស់ជាច្រើនខែ តែមិនទៅជាការសិក្សាគម្ពីរដែលរីកចម្រើនឡើយ។ សិស្សគម្ពីរទំនងជាមិនរីកចម្រើនរហូតដល់ប្រគល់ខ្លួនជូនព្រះនិងទទួលការជ្រមុជទឹកទេ បើគាត់មិនលៃទុកពេលច្រើនជាងនិងមិនសូវខំប្រឹងសិក្សាបណ្ដាំរបស់ព្រះ។
៥. តើលោកយេស៊ូបានមានប្រសាសន៍អ្វីនៅលូកា ១៤:២៧-៣៣ ដែលយើងអាចប្រើដើម្បីជួយសិស្សគម្ពីររបស់យើង?
៥ នៅពេលមួយ លោកយេស៊ូបានលើកឧទាហរណ៍អំពីអ្វីដែលបុគ្គលម្នាក់ត្រូវធ្វើ បើគាត់ចង់ទៅជាអ្នកកាន់តាមលោក។ លោកបានមានប្រសាសន៍អំពីបុគ្គលម្នាក់ដែលចង់សង់ប៉ម និងអំពីស្ដេចដែលចង់ចូលធ្វើសង្គ្រាម។ លោកយេស៊ូបានមានប្រសាសន៍ថាអ្នកសង់ត្រូវ«អង្គុយគិតគូរជាមុនសិនឲ្យដឹងថា ខ្លួនមានប្រាក់គ្រប់គ្រាន់ដើម្បីសង់ឲ្យបានរួចរាល់»ឬយ៉ាងណា ហើយស្ដេចត្រូវ«អង្គុយប្រឹក្សាជាមុនសិនឲ្យដឹងថា» ទាហានរបស់គាត់អាចសម្រេចគោលដៅរបស់គាត់បានឬមិនបាន។ (សូមអាន លូកា ១៤:២៧-៣៣) ស្រដៀងគ្នាដែរ លោកយេស៊ូដឹងថាបុគ្គលដែលចង់ទៅជាអ្នកកាន់តាមលោកគួរគិតពិចារណាយ៉ាងដិតដល់អំពីអ្វីដែលគាត់ត្រូវធ្វើដើម្បីទៅជាអ្នកកាន់តាមលោក។ ហេតុនេះ យើងត្រូវលើកទឹកចិត្តសិស្សគម្ពីរឲ្យសិក្សាជាមួយយើងរាល់សប្ដាហ៍។ តើយើងអាចធ្វើដូច្នេះយ៉ាងដូចម្ដេច?
៦. តើយើងអាចព្យាយាមធ្វើអ្វី ដើម្បីមានការសិក្សាដែលរីកចម្រើន?
៦ ចូរចាប់ផ្ដើមសិក្សាជាមួយសិស្សគម្ពីរយូរជាង។ រាល់ដងដែលអ្នកទៅជួបគាត់នៅមាត់ទ្វារផ្ទះគាត់ ជាជាងលើកបទគម្ពីរមួយប៉ុណ្ណោះ អ្នកប្រហែលជាអាចលើកបទគម្ពីរពីរ។ ពេលម្ចាស់ផ្ទះមានអារម្មណ៍ស្រួលក្នុងការសន្ទនាយូរជាង សូមសួរគាត់ថា៖ «តើមានកន្លែងណាដែលអាចអង្គុយ ហើយបន្តពិភាក្សាជាមួយគ្នាទេ?»។ ចម្លើយរបស់ម្ចាស់ផ្ទះនឹងបង្ហាញថាគាត់ពិតជាចង់រៀនគម្ពីរឬយ៉ាងណា។ ក្នុងបំណងចង់ជួយគាត់ឲ្យរីកចម្រើនលឿនជាង ក្រោយពីអ្នកបានសិក្សាជាមួយគាត់អស់មួយរយៈពេល អ្នកថែមទាំងអាចសួរសិស្សគម្ពីរថា តើគាត់ចង់សិក្សាគម្ពីរពីរដងក្នុងមួយសប្ដាហ៍ឬទេ? ប៉ុន្តែ មានអ្វីខ្លះដែលត្រូវការលើសពីនេះទៅទៀត។
ចូររៀបចំរាល់ដងសម្រាប់បង្រៀនគម្ពីរ
ចូររៀបចំឲ្យបានល្អសម្រាប់ការបង្រៀនគម្ពីរ ហើយបង្ហាញសិស្សអំពីរបៀបដែលគាត់អាចរៀបចំ (សូមមើលវគ្គ៧-៩)
៧. តើអ្នកបង្រៀនអាចធ្វើអ្វីរាល់ដងដែលគាត់រៀបចំសម្រាប់ការបង្រៀនគម្ពីរ?
៧ ក្នុងនាមជាអ្នកបង្រៀន អ្នកត្រូវរៀបចំយ៉ាងល្អសម្រាប់ការបង្រៀនគម្ពីររាល់ដង។ អ្នកអាចចាប់ផ្ដើមដោយអានព័ត៌មានដែលអ្នកនឹងសិក្សាជាមួយសិស្ស ហើយបើកមើលបទគម្ពីរនីមួយៗ។ ចូរដឹងថាអ្វីជាចំណុចសំខាន់។ សូមគិតអំពីចំណងជើងនៃមេរៀន ចំណងជើងតូច សំណួរសិក្សា បទគម្ពីរសូមអាន រូបភាព និងវីដេអូណាដែលអាចជួយពន្យល់ប្រធានបទនោះ។ បន្ទាប់មក សូមគិតអំពីសិស្សគម្ពីរ ហើយរបៀបដែលអ្នកនឹងពន្យល់ព័ត៌មាននោះយ៉ាងសាមញ្ញនិងច្បាស់ ដើម្បីឲ្យគាត់ស្រួលយល់និងធ្វើតាម។—នេហ. ៨:៨; សុភ. ១៥:២៨ក
៨. តើពាក្យរបស់សាវ័កប៉ូលនៅកូឡុស ១:៩, ១០បង្រៀនយើងអ្វីអំពីការអធិដ្ឋានទៅព្រះយេហូវ៉ាអំពីសិស្សគម្ពីរ?
៨ ក្នុងការរៀបចំរបស់អ្នក សូមអធិដ្ឋានទៅព្រះយេហូវ៉ាអំពីសិស្សនិងសេចក្ដីត្រូវការរបស់គាត់។ ចូរសុំព្រះយេហូវ៉ាជួយអ្នកឲ្យបង្រៀនពីគម្ពីរតាមរបៀបមួយដែលនឹងធ្វើឲ្យព័ត៌មានជ្រួតជ្រាបក្នុងចិត្តរបស់បុគ្គលនោះ។ (សូមអាន កូឡុស ១:៩, ១០) សូមពិចារណាថា តើមានអ្វីណាដែលសិស្សនោះប្រហែលជាពិបាកយល់ឬពិបាកទទួលយកឬទេ? សូមចាំថាគោលដៅរបស់អ្នកគឺជួយគាត់ឲ្យរីកចម្រើនរហូតដល់ទទួលការជ្រមុជទឹក។
៩. តើតាមរបៀបណាអ្នកបង្រៀនអាចជួយសិស្សឲ្យរៀបចំសម្រាប់ការសិក្សា? សូមពន្យល់។
៩ យើងសង្ឃឹមថាពេលសិស្សសិក្សាគម្ពីរជាទៀងទាត់ គាត់នឹងឲ្យតម្លៃចំពោះអ្វីដែលព្រះយេហូវ៉ានិងលោកយេស៊ូបានធ្វើ ហើយចង់រៀនថែមទៀត។ (ម៉ាថ. ៥:៣, ៦) ដើម្បីទទួលប្រយោជន៍ពេញលេញពីការសិក្សា សិស្សគម្ពីរត្រូវផ្ចង់អារម្មណ៍ទៅលើអ្វីដែលគាត់កំពុងរៀន។ យ៉ាងនេះ សូមពន្យល់អំពីមូលហេតុដែលសំខាន់ណាស់ឲ្យគាត់រៀបចំទុកជាមុនសម្រាប់រាល់ដងដែលគាត់សិក្សា ដោយអានមេរៀននិងគិតអំពីរបៀបដែលគាត់អាចអនុវត្តអ្វីដែលគាត់រៀន។ តើអ្នកអាចជួយគាត់យ៉ាងណាឲ្យចេះរៀបចំ? ចូររៀបចំមេរៀនជាមួយសិស្សដើម្បីបង្ហាញអំពីរបៀបដែលគាត់អាចធ្វើដូច្នេះ។ * សូមបង្ហាញគាត់អំពីរបៀបរកចម្លើយចំពោះសំណួរ ហើយពន្យល់ថាការគូសតែប៉ុន្មានពាក្យប៉ុណ្ណោះនឹងជួយគាត់ឲ្យចាំចម្លើយ។ បន្ទាប់មក ចូរសុំគាត់ឲ្យឆ្លើយចេញពីចិត្តតាមអ្វីដែលគាត់បានរៀន។ យ៉ាងនេះ អ្នកអាចដឹងថាគាត់យល់ព័ត៌មាននោះច្បាស់ឬមិនសូវយល់ទេ។ ប៉ុន្តែ មានអ្វីមួយទៀតដែលអ្នកអាចលើកទឹកចិត្តសិស្សឲ្យធ្វើ។
ចូរបង្រៀនគាត់ឲ្យប្រាស្រ័យទាក់ទង ជាមួយព្រះយេហូវ៉ារាល់ថ្ងៃ
ចូរបង្រៀនសិស្សគម្ពីររបស់អ្នកអំពីរបៀបប្រាស្រ័យទាក់ទងជាមួយព្រះយេហូវ៉ា (សូមមើលវគ្គ១០-១១)
១០. ហេតុអ្វីការអានគម្ពីររាល់ថ្ងៃគឺសំខាន់? តើសិស្សគម្ពីរត្រូវធ្វើអ្វីដើម្បីទទួលប្រយោជន៍ច្រើនបំផុតពីការអានគម្ពីរ?
១០ ក្រៅពីការសិក្សារាល់សប្ដាហ៍ជាមួយអ្នកបង្រៀន សិស្សនឹងទទួលប្រយោជន៍ បើគាត់ធ្វើអ្វីមួយចំនួនដោយខ្លួនឯងជារៀងរាល់ថ្ងៃ។ គាត់ត្រូវប្រាស្រ័យទាក់ទងជាមួយនឹងព្រះយេហូវ៉ា។ តើគាត់អាចធ្វើដូច្នេះយ៉ាងដូចម្ដេច? គឺដោយស្ដាប់ព្រះយេហូវ៉ានិងនិយាយទៅលោក។ គាត់អាចស្ដាប់ព្រះដោយអានគម្ពីរជារៀងរាល់ថ្ងៃ។ (យ៉ូស. ១:៨; ទំនុក. ១:១-៣) ចូរបង្ហាញគាត់អំពីរបៀបប្រើឯកសារ«កាលវិភាគអំណានគម្ពីរ»នៅគេហទំព័រjw.orgដែលគាត់អាចបោះពុម្ពបាន។ * ដើម្បីជួយគាត់ឲ្យទទួលប្រយោជន៍ច្រើនបំផុតពីការអានគម្ពីរ ចូរលើកទឹកចិត្តគាត់ឲ្យរំពឹងគិតទៅលើអ្វីដែលគាត់អាចរៀនពីគម្ពីរអំពីព្រះយេហូវ៉ា និងរបៀបដែលគាត់អាចធ្វើតាមអ្វីដែលគាត់រៀន។—សកម្ម. ១៧:១១; យ៉ា. ១:២៥
១១. តើសិស្សអាចរៀនអំពីរបៀបអធិដ្ឋានយ៉ាងត្រឹមត្រូវតាមរបៀបណា ហើយហេតុអ្វីគឺសំខាន់ឲ្យគាត់អធិដ្ឋានទៅព្រះយេហូវ៉ាជារឿយៗ?
១១ ចូរលើកទឹកចិត្តសិស្សរបស់អ្នកឲ្យនិយាយទៅព្រះយេហូវ៉ាដោយអធិដ្ឋានទៅលោករាល់ថ្ងៃ។ ចូរអធិដ្ឋានអស់ពីចិត្តរាល់ដងពេលអ្នកចាប់ផ្ដើមនិងបញ្ចប់ការសិក្សា ដោយអធិដ្ឋានជាមួយគាត់និងអំពីគាត់។ កាលដែលគាត់ស្ដាប់សេចក្ដីអធិដ្ឋានរបស់អ្នក គាត់នឹងដឹងអំពីរបៀបអធិដ្ឋានដោយស្មោះអស់ពីចិត្តទៅព្រះយេហូវ៉ាក្នុងនាមលោកយេស៊ូគ្រិស្ត។ (ម៉ាថ. ៦:៩; យ៉ូន. ១៥:១៦) សូមគិតទៅមើល ការអានគម្ពីរជារៀងរាល់ថ្ងៃ(ការស្ដាប់ព្រះយេហូវ៉ា) និងការអធិដ្ឋាន(ការនិយាយទៅព្រះយេហូវ៉ា)នឹងជួយសិស្សរបស់អ្នកឲ្យចូលកាន់តែជិតព្រះ! (យ៉ា. ៤:៨) បើគាត់ធ្វើដូច្នេះជារៀងរាល់ថ្ងៃ នេះនឹងជួយគាត់ឲ្យរីកចម្រើនរហូតដល់ប្រគល់ខ្លួនជូនព្រះនិងទទួលការជ្រមុជទឹក។ តើអ្វីទៀតអាចជួយគាត់?
ចូរជួយគាត់ឲ្យមានចំណងមិត្តភាព ជាមួយព្រះយេហូវ៉ា
១២. តើអ្នកបង្រៀនអាចជួយសិស្សឲ្យមានចំណងមិត្តភាពជាមួយព្រះយេហូវ៉ាយ៉ាងដូចម្ដេច?
១២ យើងមិនគ្រាន់តែចង់ឲ្យសិស្សយល់អ្វីដែលគាត់រៀនពីការសិក្សាគម្ពីរប៉ុណ្ណោះទេ ប៉ុន្តែក៏ចង់ឲ្យអ្វីដែលគាត់រៀននោះជ្រាបចូលក្នុងចិត្តរបស់គាត់ដែរ។ ហេតុអ្វី? ពីព្រោះចិត្តរបស់យើងដែលរួមបញ្ចូលបំណងប្រាថ្នានិងអារម្មណ៍ ជំរុញយើងឲ្យមានការប្រព្រឹត្ត។ លោកយេស៊ូបានបង្រៀនអ្វីៗជាច្រើនដល់អ្នកឯទៀត ហើយពួកគេចូលចិត្តរៀនពីលោក។ តែមូលហេតុដែលមនុស្សបានទៅតាមលោក គឺដោយសារសេចក្ដីបង្រៀនរបស់លោកបានជ្រាបចូលក្នុងចិត្តរបស់ពួកគេ។ (លូក. ២៤:១៥, ២៧, ៣២) សិស្សរបស់អ្នកត្រូវយល់ថាព្រះយេហូវ៉ាជាបុគ្គលពិតមួយរូបដែលគាត់អាចចូលទៅជិត ហើយអាចចាត់ទុកលោកជាបិតា ជាព្រះ និងជាមិត្តសម្លាញ់របស់គាត់។ (ទំនុក. ២៥:៤, ៥) ក្នុងអំឡុងការសិក្សាគម្ពីរ ចូរលើកឡើងអំពីបុគ្គលិកលក្ខណៈរបស់ព្រះ។ (និក្ខ. ៣៤:៥, ៦; ១ពេ. ៥:៦, ៧) មិនថាអ្នកពិភាក្សាអំពីប្រធានបទណាក្ដី សូមលើកបញ្ជាក់ថាព្រះយេហូវ៉ាជាបុគ្គលបែបណា។ ចូរជួយសិស្សឲ្យស្គាល់និងឲ្យតម្លៃចំពោះគុណសម្បត្តិដ៏ប្រសើររបស់ព្រះយេហូវ៉ាដូចជាសេចក្ដីស្រឡាញ់ សេចក្ដីសប្បុរស និងសេចក្ដីមេត្តាករុណា។ លោកយេស៊ូបានមានប្រសាសន៍ថា៖ «បញ្ញត្ដិទីមួយ ហើយជាបញ្ញត្ដិសំខាន់ជាងគេ»គឺត្រូវ«ស្រឡាញ់ព្រះយេហូវ៉ាជាព្រះរបស់អ្នក»។ (ម៉ាថ. ២២:៣៧, ៣៨) ចូរព្យាយាមជួយសិស្សឲ្យស្រឡាញ់ព្រះយេហូវ៉ាកាន់តែខ្លាំង។
១៣. សូមលើកឧទាហរណ៍មួយអំពីរបៀបជួយសិស្សឲ្យរៀនអំពីបុគ្គលិកលក្ខណៈរបស់ព្រះយេហូវ៉ា។
១៣ ចូរពន្យល់សិស្សអំពីមូលហេតុដែលអ្នកស្រឡាញ់ព្រះយេហូវ៉ា។ នេះប្រហែលជាជួយគាត់ឲ្យដឹងថាគាត់ក៏ត្រូវធ្វើជាមិត្តសម្លាញ់របស់ព្រះយេហូវ៉ា ហើយរៀនស្រឡាញ់លោក។ (ទំនុក. ៧៣:២៨) ជាឧទាហរណ៍ តើមានឃ្លាមួយក្នុងសៀវភៅសិក្សាឬក្នុងបទគម្ពីរ ដែលបង្ហាញអំពីសេចក្ដីស្រឡាញ់ ប្រាជ្ញា យុត្តិធម៌ ឬឫទ្ធានុភាពរបស់ព្រះយេហូវ៉ា ដែលមានឥទ្ធិពលទៅលើចិត្តរបស់អ្នកឬទេ? ចូរប្រាប់ឃ្លានោះដល់សិស្សរបស់អ្នក ហើយឲ្យគាត់ដឹងថានេះគឺជាមូលហេតុមួយក្នុងចំណោមមូលហេតុជាច្រើនដែលអ្នកស្រឡាញ់បិតារបស់យើង ដែលនៅស្ថានសួគ៌។ ប៉ុន្តែ មានអ្វីផ្សេងទៀតដែលសិស្សគម្ពីរទាំងអស់ត្រូវធ្វើដើម្បីរីកចម្រើនរហូតដល់ទទួលការជ្រមុជទឹក។
ចូរលើកទឹកចិត្តគាត់ឲ្យចូលរួមកិច្ចប្រជុំក្រុមជំនុំ
ចូរលើកទឹកចិត្តសិស្សគម្ពីរឲ្យចាប់ផ្ដើមចូលរួមកិច្ចប្រជុំឲ្យបានឆាប់បំផុតតាមដែលអាចធ្វើបាន! (សូមមើលវគ្គ១៤-១៥)
១៤. តើហេប្រឺ ១០:២៤, ២៥ចែងយ៉ាងណាអំពីកិច្ចប្រជុំក្រុមជំនុំដែលអាចជួយសិស្សគម្ពីរឲ្យរីកចម្រើន?
១៤ យើងគ្រប់គ្នាចង់ឲ្យសិស្សគម្ពីររបស់យើងរីកចម្រើនរហូតដល់ទទួលការជ្រមុជទឹក។ របៀបសំខាន់មួយដែលយើងអាចជួយពួកគេ គឺដោយលើកទឹកចិត្តពួកគេឲ្យចូលរួមកិច្ចប្រជុំក្រុមជំនុំ។ អ្នកបង្រៀនដែលមានបទពិសោធន៍និយាយថា សិស្សដែលចូលរួមកិច្ចប្រជុំភ្លាមៗរីកចម្រើនលឿនបំផុត។ (ទំនុក. ១១១:១) អ្នកបង្រៀនខ្លះពន្យល់សិស្សគម្ពីរថា ពួកគេនឹងទទួលការអប់រំពីគម្ពីរពាក់កណ្ដាលពីការសិក្សា ហើយពាក់កណ្ដាលទៀតពីកិច្ចប្រជុំ។ សូមអាន ហេប្រឺ ១០:២៤, ២៥ជាមួយសិស្សរបស់អ្នក ហើយពន្យល់គាត់អំពីប្រយោជន៍ដែលគាត់នឹងទទួលបើគាត់ចូលរួមកិច្ចប្រជុំ។ សូមបង្ហាញគាត់នូវវីដេអូតើមានកម្មវិធីអ្វីខ្លះនៅសាលប្រជុំរបស់យើង? * សូមជួយសិស្សរបស់អ្នកឲ្យតាំងចិត្តមិនខកខានចូលរួមកិច្ចប្រជុំរាល់សប្ដាហ៍។
១៥. តើយើងអាចធ្វើអ្វីដើម្បីលើកទឹកចិត្តសិស្សគម្ពីរឲ្យចូលរួមកិច្ចប្រជុំជាទៀងទាត់?
១៥ តើអ្នកអាចធ្វើអ្វីបើសិស្សគម្ពីររបស់អ្នកមិនទាន់ចូលរួមកិច្ចប្រជុំ ឬមិនចូលរួមជាទៀងទាត់? សូមប្រាប់គាត់ដោយចិត្តរំភើបអំពីអ្វីដែលអ្នកបានរៀននៅកិច្ចប្រជុំថ្មីៗនេះ។ ពេលគាត់ឃើញអារម្មណ៍របស់អ្នកចំពោះកិច្ចប្រជុំ នោះគាត់ប្រហែលជាចង់ចូលរួមដែរ។ សូមឲ្យគាត់ទស្សនាវដ្ដីប៉មយាម ឬឯកសារកិច្ចបម្រើនិងជីវិត កំណត់សម្រាប់កិច្ចប្រជុំ ដែលកំពុងរៀននៅកិច្ចប្រជុំ។ សូមបង្ហាញគាត់អំពីអ្វីដែលនឹងត្រូវរៀននៅប្រជុំបន្ទាប់ ហើយសួរគាត់ថាគាត់ចាប់អារម្មណ៍ផ្នែកមួយណាជាងគេ។ អ្វីដែលសិស្សរបស់អ្នកឃើញនិងឮពេលដែលគាត់ចូលរួមកិច្ចប្រជុំជាលើកដំបូង នឹងប្រសើរជាងការជួបជុំរបស់សាសនាណាទាំងអស់ដែលគាត់ធ្លាប់ចូលរួម។ (១កូ. ១៤:២៤, ២៥) គាត់នឹងជួបបុគ្គលដែលជាគំរូល្អសម្រាប់គាត់ ហើយដែលនឹងជួយគាត់ឲ្យរីកចម្រើនរហូតដល់ទទួលការជ្រមុជទឹក។
១៦. តើតាមរបៀបណាយើងអាចដឹកនាំការសិក្សាគម្ពីរដែលនាំទៅដល់ការជ្រមុជទឹក ហើយតើយើងនឹងរៀនអ្វីក្នុងអត្ថបទបន្ទាប់?
១៦ តើតាមរបៀបណាយើងអាចដឹកនាំការសិក្សាគម្ពីរដែលនាំទៅដល់ការជ្រមុជទឹក? យើងអាចជួយសិស្សគម្ពីរម្នាក់ៗឲ្យយល់ថាការសិក្សាគម្ពីរជាមួយយើងគឺសំខាន់ណាស់ ដោយលើកទឹកចិត្តគាត់ឲ្យសិក្សារាល់សប្ដាហ៍ ហើយរៀបចំទុកជាមុនសម្រាប់រាល់ដងដែលគាត់សិក្សាគម្ពីរ។ យើងក៏ចង់លើកទឹកចិត្តគាត់ឲ្យប្រាស្រ័យទាក់ទងជាមួយព្រះយេហូវ៉ារាល់ថ្ងៃ ហើយបណ្ដុះឲ្យមានចំណងមិត្តភាពជាមួយលោក។ យើងចង់ជំរុញចិត្តសិស្សឲ្យចូលរួមកិច្ចប្រជុំក្រុមជំនុំ។ (សូមមើលប្រអប់ដែលមានចំណងជើងថា« អ្វីដែលសិស្សត្រូវធ្វើដើម្បីរីកចម្រើនរហូតដល់ទទួលការជ្រមុជទឹក») អត្ថបទបន្ទាប់នឹងពន្យល់អំពីអ្វីប្រាំយ៉ាងដែលអ្នកបង្រៀនគម្ពីរអាចធ្វើដើម្បីជួយសិស្សឲ្យរីកចម្រើនរហូតដល់ទទួលការជ្រមុជទឹក។
ចម្រៀងលេខ៧៦ តើអ្នកសប្បាយចិត្តទេ?
^ វគ្គ 5 ការបង្រៀនបុគ្គលណាម្នាក់មានន័យថាយើងជួយគាត់ឲ្យមានគំនិត អារម្មណ៍ ឬការប្រព្រឹត្ត ដែលថ្មីឬដែលខុសពីមុន។ ម៉ាថាយ ២៨:១៩ ដែលជាបទគម្ពីរប្រចាំឆ្នាំសម្រាប់ឆ្នាំ២០២០បានរំលឹកយើងថា គឺសំខាន់ឲ្យយើងសិក្សាគម្ពីរជាមួយមនុស្ស និងបង្រៀនពួកគេអំពីអ្វីដែលពួកគេត្រូវធ្វើដើម្បីទទួលការជ្រមុជទឹកជាអ្នកកាន់តាមលោកយេស៊ូគ្រិស្ត។ ក្នុងអត្ថបទនេះនិងអត្ថបទបន្ទាប់ យើងនឹងរៀនអំពីរបៀបដែលយើងអាចរីកចម្រើនក្នុងកិច្ចការដ៏សំខាន់នេះ។
^ វគ្គ 2 ការពន្យល់ពាក្យ: បើអ្នកនិយាយអំពីគម្ពីរជាមួយបុគ្គលណាម្នាក់តាមមេរៀនជាទៀងទាត់ អ្នកកំពុងដឹកនាំការសិក្សាគម្ពីរ។ អ្នកអាចរាប់ជាការសិក្សាក្នុងសេចក្ដីរាយការណ៍របស់អ្នក បើអ្នកបានបង្ហាញអំពីរបៀបសិក្សាគម្ពីរជាមួយគ្នា និងបានសិក្សាជាមួយគាត់ពីរដងទៀត ហើយបើអ្នកមានអារម្មណ៍ថាគាត់នឹងបន្តរៀនជាមួយអ្នក។
^ វគ្គ 3 អត្ថបទទាំងពីរនេះក៏រួមបញ្ចូលយោបល់ពីអត្ថបទតភាគដែលមានចំណងជើងថា«ដឹកនាំការសិក្សាព្រះគម្ពីរដែលរីកចំរើន» ដែលចេញផ្សាយក្នុងកិច្ចបំរើព្រះរាជាណាចក្រយើង ខែកក្កដា ឆ្នាំ២០០៤ រហូតដល់ខែឧសភា ឆ្នាំ២០០៥។
^ វគ្គ 9 សូមមើលវីដេអូដែលមានចំណងជើងថាការបង្រៀនសិស្សឲ្យចេះរៀបចំទុកជាមុន ដែលមានរយៈពេលបួននាទីជាង។ សូមបើកកម្មវិធីJWបណ្ណាល័យ [JW Library®] ហើយចុចMEDIA▸OUR MEETINGS AND MINISTRY▸IMPROVING OUR SKILLS។
^ វគ្គ 10 សូមចុច«សេចក្ដីបង្រៀនក្នុងគម្ពីរ» ▸ «ជំនួយសម្រាប់សិក្សាគម្ពីរ»។
^ វគ្គ 14 នៅក្នុងកម្មវិធីJWបណ្ណាល័យ [JW Library®] សូមចុចMEDIA▸OUR MEETINGS AND MINISTRY▸TOOLS FOR THE MINISTRY។
