តើអ្នកចាំឬទេ?
តើអ្នកបានអានទស្សនាវដ្ដីប៉មយាមនៅឆ្នាំនេះដោយយកចិត្តទុកដាក់ឬទេ? សូមសាកឆ្លើយសំណួរដូចតទៅនេះ៖
តើឃ្លានៅយ៉ាកុប ៥:១១ដែលចែងថា៖ «ព្រះយេហូវ៉ាមានមនោសញ្ចេតនាដ៏ជ្រាលជ្រៅ»និង«សេចក្ដីមេត្តាករុណា»ពង្រឹងទំនុកចិត្តរបស់យើងយ៉ាងដូចម្ដេច?
យើងដឹងថាព្រះយេហូវ៉ាមានសេចក្ដីមេត្តាករុណា ដូច្នេះលោកចង់អភ័យទោសឲ្យយើងពេលយើងធ្វើខុស។ យ៉ាកុប ៥:១១ពង្រឹងទំនុកចិត្តរបស់យើងថា លោកក៏ចង់ជួយយើង។ ជាការល្អឲ្យយើងបង្ហាញគុណសម្បត្តិនេះដូចលោក។—w២១.០១ ទំ.២១
ហេតុអ្វីព្រះយេហូវ៉ាបានរៀបចំឲ្យមានប្រមុខភាព?
លោកបានធ្វើដូច្នេះ ដោយសារលោកស្រឡាញ់យើង។ ការរៀបចំនេះធ្វើឲ្យក្រុមគ្រួសារដ៏ស្មោះត្រង់របស់លោកមានរបៀបរៀបរយនិងសេចក្ដីសុខសាន្ត។ សមាជិកម្នាក់ៗក្នុងក្រុមគ្រួសារដែលធ្វើតាមការរៀបចំនេះ ដឹងថាអ្នកណាមានភារកិច្ចធ្វើការសម្រេចចិត្ត និងនាំមុខក្នុងការធ្វើតាមការសម្រេចចិត្តទាំងនោះ។—w២១.០២ ទំ.៣
ហេតុអ្វីគ្រិស្តសាសនិកគួរប្រុងប្រយ័ត្នចំពោះការប្រើកម្មវិធីផ្ញើសារក្នុងគ្រឿងអេឡិចត្រូនិក?
បើបុគ្គលណាម្នាក់សម្រេចចិត្តប្រើកម្មវិធីបែបនេះ គាត់ត្រូវគិតពិចារណាអំពីការសេពគប់។ នេះគឺកាន់តែពិបាកពេលក្រុមផ្ញើសារមានគ្នាច្រើននាក់។ (១ធី. ៥:១៣) គាត់ក៏ត្រូវប្រុងប្រយ័ត្នថាគាត់មិនប្រាប់តគ្នាអំពីរឿងដែលគាត់មិនដឹងច្បាស់ ហើយថាគាត់មិនប្រើប្រាស់បងប្អូនធ្វើជាវិធីដើម្បីរកលុយឡើយ។—w២១.០៣ ទំ.៣១
តើមានមូលហេតុអ្វីខ្លះដែលព្រះបានឲ្យលោកយេស៊ូរងទុក្ខនិងស្លាប់?
មូលហេតុទី១គឺ ការដែលលោកយេស៊ូបានត្រូវគេព្យួរលើបង្គោលឈើ បានបើកឱកាសឲ្យជនជាតិយូដារួចពីបណ្ដាសាមួយ។ (កាឡ. ៣:១០, ១៣) មូលហេតុទី២គឺ ព្រះយេហូវ៉ាកំពុងបង្ហាត់បង្រៀនលោកយេស៊ូឲ្យបំពេញតួនាទីរបស់លោកជាសម្ដេចសង្ឃ។ មូលហេតុទី៣គឺ ភក្ដីភាពរបស់លោកយេស៊ូរហូតដល់ស្លាប់ បានបង្ហាញថាមនុស្សអាចរក្សាចិត្តស្មោះត្រង់ចំពោះព្រះ ទោះជាពួកគេទទួលការល្បងលខ្លាំងយ៉ាងណាក្ដី។ (យ៉ូប ១:៩-១១)—w២១.០៤ ទំ.១៦-១៧
តើអ្នកអាចធ្វើអ្វីបើអ្នកពិបាកជួបមនុស្សនៅតំបន់ផ្សាយរបស់អ្នក?
អ្នកអាចព្យាយាមជួបពួកគេ ដោយទៅផ្សព្វផ្សាយនៅពេលពួកគេទំនងជានៅផ្ទះ។ អ្នកក៏អាចសាកល្បងផ្សព្វផ្សាយនៅកន្លែងផ្សេង។ ម្យ៉ាងទៀត អ្នកអាចព្យាយាមប្រើវិធីផ្សេង ដូចជាការសរសេរសំបុត្រជាដើម។—w២១.០៥ ទំ.១៥-១៦
តើសាវ័កប៉ូលចង់មានន័យយ៉ាងណាពេលគាត់និយាយថា៖ «ដោយសារច្បាប់ ខ្ញុំបានស្លាប់ពីច្បាប់»? (កាឡ. ២:១៩, កំ.ស.)
ច្បាប់ម៉ូសេបង្ហាញយ៉ាងច្បាស់ថាមនុស្សគឺមិនល្អឥតខ្ចោះ ហើយច្បាប់នោះបាននាំជនជាតិអ៊ីស្រាអែលទៅដល់គ្រិស្ត។ (កាឡ. ៣:១៩, ២៤) នេះបាននាំឲ្យប៉ូលទទួលស្គាល់លោកយេស៊ូជាគ្រិស្ត។ យ៉ាងនេះ ប៉ូល«បានស្លាប់ពីច្បាប់» ក្នុងន័យថាច្បាប់នោះលែងមានអំណាចលើគាត់ទៀតហើយ។—w២១.០៦ ទំ.៣១
តើព្រះយេហូវ៉ាបានទុកគំរូអ្វីឲ្យយើងស្ដីអំពីការស៊ូទ្រាំ?
ព្រះយេហូវ៉ាបានស៊ូទ្រាំនឹងការតិះដៀលចំពោះនាមរបស់លោក ការប្រឆាំងចំពោះសិទ្ធិគ្រប់គ្រងរបស់លោក ការបះបោរនៃកូនខ្លះរបស់លោក ការភូតភររបស់មេកំណាច ការរងទុក្ខរបស់អ្នកបម្រើលោក ការបែកពីមិត្តសម្លាញ់របស់លោកដែលបានស្លាប់ ការសង្កត់សង្កិនលើមនុស្សជាតិ និងការបង្ខូចផែនដីដែលលោកបានបង្កើត។—w២១.០៧ ទំ.៩-១២
តើយ៉ូសែបបានទុកគំរូល្អអ្វីអំពីការបង្ហាញចិត្តអត់ធ្មត់?
គាត់បានរងអំពើអយុត្តិធម៌ពីបងប្អូនរបស់គាត់។ ជាលទ្ធផល គាត់បានត្រូវគេចោទប្រកាន់មិនពិត ហើយចាប់ដាក់គុកនៅស្រុកអេហ្ស៊ីបអស់ជាច្រើនឆ្នាំ។—w២១.០៨ ទំ.១២
តើហាកាយ ២:៦-៩, ២០-២២ប្រកាសទុកជាមុនអំពីការអង្រួនអ្វី?
ប្រជាជាតិនានាមានប្រតិកម្មមិនល្អចំពោះកិច្ចការផ្សព្វផ្សាយអំពីរាជាណាចក្រព្រះ តែមនុស្សជាច្រើននាក់បានត្រូវទាញនាំឲ្យចូលក្នុងសេចក្ដីពិត។ មិនយូរទៀត ប្រជាជាតិនានានឹងត្រូវអង្រួនជាលើកចុងក្រោយដើម្បីជាការបំផ្លាញ។—w២១.០៩ ទំ.១៥-១៩
ហេតុអ្វីយើងមិនគួរឈប់ព្យាយាមបំពេញកិច្ចបម្រើផ្សាយ?
ព្រះយេហូវ៉ាឃើញនិងពេញចិត្តការខំប្រឹងរបស់យើង។ បើយើងមិនរសាយចិត្ត ឬឈប់ព្យាយាម យើងនឹងទទួលជីវិតដែលគ្មានទីបញ្ចប់។—w២១.១០ ទំ.២៥-២៦
តើច្បាប់លេវី ជំពូក១៩អាចជួយយើងឲ្យ«ទៅជាមនុស្សបរិសុទ្ធក្នុងការប្រព្រឹត្តទាំងអស់»យ៉ាងដូចម្ដេច? (១ពេ. ១:១៥)
ពាក្យក្នុងខនេះទំនងជាបានត្រូវដកស្រង់ពីច្បាប់លេវី ១៩:២។ ជំពូក១៩លើកឡើងអំពីរបៀបផ្សេងៗដែលយើងអាចធ្វើតាមពេត្រុសទី១ ១:១៥ក្នុងជីវិតរបស់យើង។—w២១.១២ ទំ.៣-៤
