អត្ថបទសិក្សា ៣២
ប្អូនៗវ័យក្មេង ចូរបន្តរីកចម្រើនក្រោយពីជ្រមុជទឹក
«ចូរឲ្យយើង . . . បង្ហាញសេចក្ដីស្រឡាញ់ នោះយើងអាចពេញវ័យក្នុងគ្រប់ការទាំងអស់»។—អេភ. ៤:១៥
ចម្រៀងលេខ៥៦ ចូរសម្រេចចិត្តកាន់តាមសេចក្ដីពិត
សេចក្ដីសង្ខេប *
១. តើប្អូនៗវ័យក្មេងជាច្រើននាក់បានសម្រេចអ្វីខ្លះរួចហើយ?
ជារៀងរាល់ឆ្នាំ គ្រិស្តសាសនិកវ័យក្មេងរាប់ពាន់នាក់ទទួលការជ្រមុជទឹក។ តើអ្នកបានធ្វើដូច្នេះឬទេ? បើមែន បងប្អូនរួមជំនឿសប្បាយរីករាយ ហើយព្រះយេហូវ៉ាក៏ត្រេកអរផងដែរ! (សុភ. ២៧:១១) សូមគិតអំពីអ្វីៗជាច្រើនដែលអ្នកបានសម្រេចរួចហើយ។ អ្នកបានសិក្សាគម្ពីរយ៉ាងយកចិត្តទុកដាក់ ហើយប្រហែលជាបានធ្វើដូច្នេះអស់ជាច្រើនឆ្នាំ។ ការសិក្សារបស់អ្នកបានធ្វើឲ្យអ្នកជឿជាក់ថាគម្ពីរគឺជាបណ្ដាំរបស់ព្រះ។ ប៉ុន្តែលើសពីនេះទៅទៀត អ្នកបានស្គាល់និងស្រឡាញ់អ្នកនិពន្ធគម្ពីរ។ អ្នកស្រឡាញ់ព្រះយេហូវ៉ាកាន់តែខ្លាំងឡើង រហូតដល់អ្នកប្រគល់ខ្លួនជូនលោក ហើយទទួលការជ្រមុជទឹក។ អ្នកបានធ្វើការសម្រេចចិត្តល្អណាស់!
២. តើយើងនឹងពិចារណាអ្វីក្នុងអត្ថបទនេះ?
២ មុនអ្នកទទួលការជ្រមុជទឹក អ្នកទំនងជាបានជួបបញ្ហាផ្សេងៗដែលធ្វើឲ្យអ្នកពិបាករក្សាភាពស្មោះត្រង់ចំពោះព្រះយេហូវ៉ា។ ប៉ុន្តែ កាលដែលអ្នកមានអាយុច្រើនទៅៗ អ្នកនឹងជួបការល្បងលថ្មី។ សាថាននឹងព្យាយាមធ្វើឲ្យសេចក្ដីស្រឡាញ់របស់អ្នកចំពោះព្រះយេហូវ៉ាចុះខ្សោយ ហើយឲ្យអ្នកថយចេញពីលោក។ (អេភ. ៤:១៤) អ្នកមិនត្រូវឲ្យរឿងនេះកើតឡើងឡើយ។ តើអ្វីអាចជួយអ្នកឲ្យរក្សាភាពស្មោះត្រង់ចំពោះព្រះយេហូវ៉ា និងធ្វើតាមពាក្យសម្បថរបស់អ្នកក្នុងការប្រគល់ខ្លួនជូនព្រះ? គឺអ្នកត្រូវបន្ដរីកចម្រើន ពោលគឺ«ខំប្រឹងឈានទៅរក»ភាពចាស់ទុំជាគ្រិស្តសាសនិក។ (ហេ. ៦:១) ប៉ុន្តែ តើអ្នកអាចធ្វើដូច្នេះយ៉ាងដូចម្ដេច?
តើអ្នកអាចធ្វើអ្វីដើម្បីទៅជាគ្រិស្តសាសនិកដែលមានភាពចាស់ទុំ?
៣. តើគ្រិស្តសាសនិកទាំងអស់ត្រូវធ្វើអ្វីក្រោយពីទទួលការជ្រមុជទឹក?
៣ ក្រោយពីជ្រមុជទឹក យើងទាំងអស់គ្នាត្រូវធ្វើតាមយោបល់ដែលសាវ័កប៉ូលបានឲ្យបងប្អូនរួមជំនឿនៅក្រុងអេភេសូរ។ គាត់បានលើកទឹកចិត្តពួកគេឲ្យទៅជាគ្រិស្តសាសនិក«ពេញវ័យ»។ (អេភ. ៤:១៣) នេះមានន័យថាពួកគេត្រូវ‹បន្តរីកចម្រើន›។ ប៉ូលបានប្រដូចការរីកចម្រើនរបស់យើងជាគ្រិស្តសាសនិក ទៅនឹងការធំលូតលាស់របស់កូនក្មេង។ ឪពុកម្ដាយស្រឡាញ់និងអួតអំពីទារកដែលទើបតែកើត។ ប៉ុន្តែ កូននោះមិនអាចនៅជាទារករហូតទេ។ យូរៗទៅ គាត់នឹងត្រូវបំបាត់«លក្ខណៈដែលដូចកូនក្មេង»។ (១កូ. ១៣:១១) គឺស្រដៀងគ្នាចំពោះគ្រិស្តសាសនិក។ ក្រោយពីទទួលការជ្រមុជទឹក យើងត្រូវបន្ដរីកចម្រើន។ សូមយើងពិចារណាយោបល់ខ្លះដែលនឹងជួយយើងឲ្យធ្វើដូច្នេះ។
៤. តើគុណសម្បត្តិអ្វីអាចជួយអ្នកឲ្យរីកចម្រើន? សូមពន្យល់។ (ភីលីព ១:៩)
៤ ចូរស្រឡាញ់ព្រះយេហូវ៉ាឲ្យកាន់តែខ្លាំងឡើង។ អ្នកស្រឡាញ់ព្រះយេហូវ៉ាខ្លាំងណាស់រួចហើយ ប៉ុន្តែអ្នកអាចស្រឡាញ់ព្រះយេហូវ៉ាឲ្យកាន់តែជ្រាលជ្រៅជាងនេះ។ តើតាមរបៀបណា? សាវ័កប៉ូលបានរៀបរាប់អំពីរបៀបមួយនៅភីលីព ១:៩។ (សូមអាន) ប៉ូលបានអធិដ្ឋានសូមឲ្យគ្រិស្តសាសនិកនៅក្រុងភីលីព«មានសេចក្ដីស្រឡាញ់កាន់តែខ្លាំងឡើង»។ យ៉ាងនេះ យើងអាចបង្កើនសេចក្ដីស្រឡាញ់របស់យើង។ យើងអាចធ្វើដូច្នេះ ដោយទទួល«ចំណេះត្រឹមត្រូវនិងសមត្ថភាពវែកញែកដ៏ពេញលេញ»។ កាលដែលយើងកាន់តែស្គាល់ព្រះយេហូវ៉ា យើងកាន់តែស្រឡាញ់លោក ហើយឲ្យតម្លៃចំពោះបុគ្គលិកលក្ខណៈនិងការប្រព្រឹត្តរបស់លោក។ យើងកាន់តែមានចិត្តចង់ធ្វើឲ្យព្រះយេហូវ៉ាពេញចិត្ត មិនមែនចង់ធ្វើអ្វីណាដែលនាំឲ្យលោកខកចិត្តទេ។ យើងខំស្វែងយល់អំពីបំណងប្រាថ្នារបស់លោក ហើយអំពីរបៀបដែលយើងអាចធ្វើតាមបំណងប្រាថ្នានោះ។
៥-៦. តើយើងអាចមានសេចក្ដីស្រឡាញ់កាន់តែខ្លាំងឡើងចំពោះព្រះយេហូវ៉ាយ៉ាងដូចម្ដេច? សូមពន្យល់។
៥ លោកយេស៊ូមានបុគ្គលិកលក្ខណៈដូចព្រះយេហូវ៉ាទាំងស្រុង។ ដូច្នេះ ពេលយើងស្គាល់លោកយេស៊ូច្បាស់ជាង យើងនឹងស្រឡាញ់ព្រះយេហូវ៉ាកាន់តែខ្លាំង។ (ហេ. ១:៣) របៀបល្អបំផុតដើម្បីស្គាល់លោកយេស៊ូ គឺដោយសិក្សាសៀវភៅដំណឹងល្អទាំងបួន។ បើអ្នកមិនទាន់មានទម្លាប់ល្អក្នុងការអានគម្ពីរជារៀងរាល់ថ្ងៃទេ សូមចាប់ផ្ដើមអានពីឥឡូវនេះ។ កាលដែលអ្នកអានកំណត់ហេតុអំពីលោកយេស៊ូ សូមផ្ដោតអារម្មណ៍ទៅលើគុណសម្បត្តិរបស់លោក។ លោកស្រួលទាក់ទង។ លោកបង្ហាញសេចក្ដីស្រឡាញ់ដោយឱបកូនក្មេង។ (ម៉ាក. ១០:១៣-១៦) លោកសប្បុរសនិងរួសរាយ ហើយពួកអ្នកកាន់តាមលោកមិនខ្លាចប្រាប់លោកអំពីអារម្មណ៍របស់ពួកគេទេ។ (ម៉ាថ. ១៦:២២) ស្ដីអំពីរឿងនេះ លោកយេស៊ូយកតម្រាប់បិតារបស់លោកនៅស្ថានសួគ៌។ ព្រះយេហូវ៉ាក៏ស្រួលទាក់ទងណាស់ដែរ។ យើងអាចអធិដ្ឋានទៅលោក ដោយប្រាប់លោកអំពីអ្វីទាំងអស់ដែលមាននៅក្នុងចិត្តរបស់យើង។ យើងជឿជាក់ថាលោកនឹងមិនផ្ដន្ទាទោសយើងទេ។ លោកស្រឡាញ់យើង ហើយរមែងគិតអំពីយើង។—១ពេ. ៥:៧
៦ លោកយេស៊ូមានចិត្តអាណិតអាសូរចំពោះមនុស្ស។ សាវ័កម៉ាថាយប្រាប់ថា៖ «ពេលដែលឃើញបណ្ដាជន លោកមានចិត្តក្ដួលអាណិតពួកគេ ពីព្រោះពួកគេបានត្រូវសង្កត់សង្កិន និងទុកចោលឲ្យនៅរាត់រាយប្រៀបដូចចៀមដែលគ្មានគង្វាល»។ (ម៉ាថ. ៩:៣៦) ចុះយ៉ាងណាព្រះយេហូវ៉ាវិញ? តើលោកមានអារម្មណ៍យ៉ាងណាចំពោះមនុស្សជាតិ? លោកយេស៊ូបានមានប្រសាសន៍ថា៖ «បិតារបស់ខ្ញុំដែលស្ថិតនៅស្ថានសួគ៌មិនចង់ឲ្យអ្នកតូចណាម្នាក់បែបនេះវិនាសឡើយ»។ (ម៉ាថ. ១៨:១៤) ពាក្យនេះគួរឲ្យកក់ក្ដៅណាស់! កាលដែលយើងស្គាល់លោកយេស៊ូច្បាស់ជាង យើងមានសេចក្ដីស្រឡាញ់កាន់តែខ្លាំងឡើងចំពោះព្រះយេហូវ៉ា។
៧. តើការចំណាយពេលជាមួយគ្រិស្តសាសនិកដែលមានភាពចាស់ទុំអាចជួយអ្នកយ៉ាងដូចម្ដេច?
៧ អ្នកក៏អាចរៀនឲ្យចេះបង្ហាញសេចក្ដីស្រឡាញ់កាន់តែច្រើន ហើយរីកចម្រើនជាគ្រិស្តសាសនិក ដោយចំណាយពេលនិងព្យាយាមស្គាល់បងប្អូនដែលមានភាពចាស់ទុំក្នុងក្រុមជំនុំរបស់អ្នក។ សូមកត់សម្គាល់អំពីអំណររបស់ពួកគេ។ ពួកគេមិនស្ដាយក្រោយចំពោះការសម្រេចចិត្តរបស់ពួកគេឲ្យបម្រើព្រះយេហូវ៉ាទេ។ សូមសុំពួកគេឲ្យប្រាប់អ្នកអំពីបទពិសោធន៍ខ្លះៗដែលពួកគេមានក្នុងកិច្ចបម្រើព្រះយេហូវ៉ា។ ពេលអ្នកត្រូវធ្វើការសម្រេចចិត្តសំខាន់ សូមសុំយោបល់ពីពួកគេ។ សូមចាំថា «បើមានមនុស្សច្រើននាក់ឲ្យយោបល់ នោះនឹងនាំឲ្យបានជោគជ័យ»។—សុភ. ១១:១៤
តើអ្នកអាចត្រៀមខ្លួនយ៉ាងដូចម្ដេច ពេលគេបង្រៀនទ្រឹស្ដីអំពីការវិវត្តន៍នៅសាលា? (សូមមើលវគ្គ៨-៩)
៨. តើអ្នកអាចធ្វើអ្វីបើអ្នកសង្ស័យសេចក្ដីបង្រៀនក្នុងគម្ពីរ?
៨ ចូរយកឈ្នះការសង្ស័យរបស់អ្នក។ ដូចបានត្រូវរៀបរាប់នៅក្នុង វគ្គ២ សាថាននឹងព្យាយាមរារាំងអ្នកមិនឲ្យរីកចម្រើនទៅមុខទៀតក្នុងកិច្ចបម្រើព្រះ។ របៀបមួយដែលវាប្រហែលជាធ្វើដូច្នេះ គឺដោយធ្វើឲ្យអ្នកសង្ស័យអំពីសេចក្ដីបង្រៀនខ្លះក្នុងគម្ពីរ។ ជាឧទាហរណ៍ ប្រហែលជាអ្នកខ្លះនឹងព្យាយាមធ្វើឲ្យអ្នកជឿជាក់ថាព្រះមិនបានបង្កើតយើងទេ តែយើងកើតមកពីការវិវត្តន៍។ ពេលអ្នកនៅក្មេង អ្នកទំនងជាមិនបានគិតអំពីរឿងនេះទេ ប៉ុន្តែប្រហែលជាឥឡូវ អ្នករៀនអំពីរឿងនេះនៅសាលា។ អ្វីដែលគ្រូរបស់អ្នកនិយាយដើម្បីគាំទ្រការវិវត្តន៍ ប្រហែលជាស្ដាប់ទៅសមហេតុសមផលនិងគួរឲ្យជឿ។ ប៉ុន្តែ ពួកគេប្រហែលជាមិនដែលគិតពិចារណាយ៉ាងដិតដល់អំពីទីសំអាងដែលបង្ហាញថាមានអ្នកបង្កើតឡើយ។ សូមចាំគោលការណ៍នៅសុភាសិត ១៨:១៧ដែលថា៖ «អ្នកដែលនិយាយមុនក្នុងរឿងក្ដី មើលទៅដូចជាត្រឹមត្រូវ តែលុះភាគីម្ខាងទៀតមកដល់ ក៏ចោទសួរគាត់រកការពិត»។ ជាជាងទទួលយកសេចក្ដីបង្រៀនដែលអ្នកឮនៅសាលាដោយងងឹតងងល់ សូមគិតពិចារណាយ៉ាងដិតដល់អំពីសេចក្ដីបង្រៀននៅក្នុងគម្ពីរដែលជាបណ្ដាំរបស់ព្រះ។ សូមធ្វើការស្រាវជ្រាវក្នុងសៀវភៅផ្សេងៗរបស់យើង។ សូមនិយាយជាមួយបងប្អូនដែលធ្លាប់ជឿលើការវិវត្តន៍។ សូមសួរពួកគេអំពីអ្វីដែលបានធ្វើឲ្យពួកគេជឿជាក់ថាមានអ្នកបង្កើតដែលស្រឡាញ់យើង។ ការសន្ទនាបែបនេះអាចជួយអ្នកឲ្យរកឃើញទីសំអាងដែលបង្ហាញថាមានអ្នកបង្កើត។
៩. តើអ្នករៀនអ្វីពីបទពិសោធន៍របស់ប្អូនមេលីសា?
៩ ប្អូនស្រីម្នាក់ឈ្មោះមេលីសា *បានទទួលប្រយោជន៍ជាច្រើនពីការស្រាវជ្រាវអំពីការបង្កើត។ គាត់និយាយថា៖ «នៅសាលា គ្រូពន្យល់អំពីការវិវត្តន៍តាមរបៀបមួយដែលធ្វើឲ្យសិស្សគិតថានោះជារឿងពិត។ ដំបូងខ្ញុំមិនចង់ធ្វើការស្រាវជ្រាវទេ ដោយសារខ្ញុំខ្លាចថាខ្ញុំនឹងរកឃើញថាការវិវត្តន៍គឺជារឿងពិត។ ប៉ុន្តែ ខ្ញុំបានវែកញែកថាព្រះយេហូវ៉ាមិនចង់ឲ្យយើងបម្រើលោកដោយងងឹតងងល់ទេ។ ដូច្នេះខ្ញុំចាប់ផ្ដើមធ្វើការស្រាវជ្រាវ។ ខ្ញុំអានសៀវភៅតើមានអ្នកបង្កើតដែលយកចិត្តទុកដាក់នឹងអ្នកឬទេ?(Is There a Creator Who Cares About You?) ព្រមទាំងសៀវភៅស្ដើងតើជីវិតទាំងឡាយមានអ្នកបង្កើតឬទេ? និងដើមកំណើតនៃជីវិត សំណួរទាំងប្រាំដែលយើងគួរឆ្ងល់។ នេះជាអ្វីដែលខ្ញុំត្រូវការ ហើយខ្ញុំស្ដាយដែលខ្ញុំមិនបានអានសៀវភៅទាំងនោះលឿនជាងហ្នឹង»។
១០-១១. តើអ្វីអាចជួយអ្នកឲ្យរក្សាភាពស្អាតស្អំខាងសីលធម៌? (ថែស្សាឡូនិចទី១ ៤:៣, ៤)
១០ ចូរបដិសេធការប្រព្រឹត្តខុស។ ក្នុងអំឡុងគ្រាយុវវ័យ ចំណង់ខាងផ្លូវភេទអាចមានខ្លាំង ហើយអ្នកប្រហែលជាជួបនឹងការបង្ខិតបង្ខំឲ្យប្រព្រឹត្តអំពើប្រាសចាកសីលធម៌ខាងផ្លូវភេទ។ សាថានចង់ឲ្យអ្នកចុះចាញ់នឹងសេចក្ដីប៉ងប្រាថ្នារបស់អ្នក។ តើអ្វីអាចជួយអ្នកឲ្យរក្សាភាពស្អាតស្អំខាងសីលធម៌? (សូមអាន ថែស្សាឡូនិចទី១ ៤:៣, ៤) ពេលអ្នកអធិដ្ឋានទៅព្រះយេហូវ៉ាម្នាក់ឯង សូមប្រាប់លោកអំពីអារម្មណ៍របស់អ្នក និងសុំលោកឲ្យពង្រឹងកម្លាំងអ្នក។ (ម៉ាថ. ៦:១៣) សូមចាំថាព្រះយេហូវ៉ាចង់ជួយអ្នក មិនមែនផ្ដន្ទាទោសអ្នកទេ។ (ចសព. ១០៣:១៣, ១៤) អ្នកក៏អាចទទួលជំនួយពីបណ្ដាំរបស់ព្រះដែរ។ ប្អូនស្រីមេលីសាដែលបានត្រូវរៀបរាប់នៅខាងលើបានតយុទ្ធនឹងគំនិតមិនស្អាតស្អំ។ គាត់និយាយថា៖ «ការអានគម្ពីររាល់ថ្ងៃ បានជួយខ្ញុំឲ្យបន្ដតយុទ្ធនឹងសេចក្ដីប៉ងប្រាថ្នាមិនត្រឹមត្រូវរបស់ខ្ញុំ និងបានរំលឹកខ្ញុំថាខ្ញុំជារបស់ព្រះយេហូវ៉ា ហើយថាខ្ញុំចង់បម្រើលោក»។—ចសព. ១១៩:៩
១១ សូមកុំព្យាយាមដោះស្រាយបញ្ហាដោយខ្លួនឯងឡើយ។ សូមនិយាយជាមួយឪពុកម្ដាយអំពីការពិបាករបស់អ្នក។ ពិតមែនថា គឺមិនស្រួលឲ្យនិយាយអំពីរឿងផ្ទាល់ខ្លួនបែបនេះទេ តែការធ្វើដូច្នេះគឺសំខាន់។ ប្អូនមេលីសានិយាយថា៖«ខ្ញុំបានអធិដ្ឋានសុំចិត្តក្លាហាន ហើយក្រោយមកខ្ញុំនិយាយជាមួយឪពុកខ្ញុំអំពីបញ្ហារបស់ខ្ញុំ។ ក្រោយពីនោះ ខ្ញុំធូរចិត្តជាខ្លាំង ហើយដឹងថាព្រះយេហូវ៉ាមានមោទនភាពចំពោះខ្ញុំ»។
១២. តើអ្នកអាចធ្វើការសម្រេចចិត្តល្អតាមរបៀបណា?
១២ ចូរឲ្យគោលការណ៍គម្ពីរណែនាំអ្នក។ កាលដែលអ្នកធំឡើងៗ ឪពុកម្ដាយរបស់អ្នកនឹងអនុញ្ញាតឲ្យអ្នកធ្វើការសម្រេចចិត្តកាន់តែច្រើនដោយខ្លួនឯង។ ប៉ុន្តែ អ្នកនៅតែមិនមានបទពិសោធន៍ច្រើនក្នុងជីវិតប៉ុន្មានទេ។ តើតាមរបៀបណាអ្នកអាចជៀសវាងពីការធ្វើខុសដែលនឹងមានឥទ្ធិពលលើចំណងមិត្តភាពរបស់អ្នកជាមួយព្រះយេហូវ៉ា? (សុភ. ២២:៣) បងស្រីម្នាក់ឈ្មោះខារីពន្យល់អំពីអ្វីដែលបានជួយគាត់ឲ្យធ្វើការសម្រេចចិត្តល្អប្រសើរ។ គាត់បានយល់ថា គ្រិស្តសាសនិកដែលមានភាពចាស់ទុំមិនចាំបាច់មានច្បាប់សម្រាប់ស្ថានភាពទាំងអស់ឡើយ។ គាត់និយាយថា៖ «ខ្ញុំត្រូវយល់គោលការណ៍គម្ពីរ ជាជាងចេះតែធ្វើតាមច្បាប់»។ ពេលអានគម្ពីរ សូមសួរខ្លួនអ្នកថា ‹តើខគម្ពីរនេះប្រាប់ខ្ញុំអ្វីអំពីទស្សនៈរបស់ព្រះយេហូវ៉ា? តើខគម្ពីរនេះមានគោលការណ៍ដែលអាចជួយខ្ញុំឲ្យធ្វើអ្វីដែលត្រឹមត្រូវឬទេ? បើមាន តើខ្ញុំនឹងទទួលប្រយោជន៍យ៉ាងណាពេលខ្ញុំធ្វើតាមគោលការណ៍ទាំងនោះ?›។ (ចសព. ១៩:៧; អេ. ៤៨:១៧, ១៨) ដោយអានគម្ពីរនិងរំពឹងគិតអំពីគោលការណ៍ក្នុងគម្ពីរ អ្នកនឹងងាយស្រួលជាងធ្វើការសម្រេចចិត្តដែលនាំឲ្យព្រះយេហូវ៉ាពេញចិត្ត។ កាលដែលអ្នកបន្ដរីកចម្រើន អ្នកនឹងឃើញថាអ្នកមិនត្រូវការច្បាប់ចំពោះគ្រប់ស្ថានភាពទេ ដោយសារអ្នកនឹងយល់ទស្សនៈរបស់ព្រះយេហូវ៉ាចំពោះរឿងផ្សេងៗ។
តើប្អូនស្រីវ័យក្មេងនេះបានជ្រើសរើសមិត្តភក្ដិបែបណា (សូមមើលវគ្គ១៣)
១៣. តើមិត្តល្អអាចជួយអ្នកយ៉ាងណា? (សុភាសិត ១៣:២០)
១៣ ចូរជ្រើសរើសមិត្តភក្តិដែលស្រឡាញ់ព្រះយេហូវ៉ា។ ដូចបានត្រូវរៀបរាប់នៅខាងលើ មិត្តភក្ដិដែលអ្នកជ្រើសរើសអាចជួយអ្នកឲ្យទៅជាគ្រិស្តសាសនិកដែលមានភាពចាស់ទុំ។ (សូមអាន សុភាសិត ១៣:២០) បងស្រីម្នាក់ឈ្មោះសារ៉ា ចាប់ផ្ដើមបាត់បង់អំណរ។ ប៉ុន្តែក្រោយមក គាត់មានអំណរឡើងវិញ។ តើអ្វីបានជួយគាត់? បងសារ៉ារៀបរាប់ថា៖ «ខ្ញុំបានរកឃើញមិត្តភក្ដិល្អនៅចំពេលដែលខ្ញុំត្រូវការតែម្ដង។ ខ្ញុំនិងប្អូនស្រីវ័យក្មេងម្នាក់បានសិក្សាទស្សនាវដ្ដីប៉មយាមជាមួយគ្នារាល់សប្ដាហ៍។ មិត្តភក្ដិម្នាក់ទៀត បានជួយខ្ញុំឲ្យចាប់ផ្ដើមឆ្លើយនៅកិច្ចប្រជុំ។ ដោយសារមានជំនួយពីមិត្តភក្ដិ ខ្ញុំបានចាប់ផ្ដើមយកចិត្តទុកដាក់ខ្លាំងជាងចំពោះការសិក្សាផ្ទាល់ខ្លួន និងការអធិដ្ឋាន។ ខ្ញុំចាប់ផ្ដើមមានចំណងមិត្តភាពរឹងមាំជាងជាមួយព្រះយេហូវ៉ា ហើយមានអំណរឡើងវិញ»។
១៤. តើតាមរបៀបណាបងជូលានបានរកឃើញមិត្តល្អ?
១៤ តើតាមរបៀបណាអ្នកអាចមានមិត្តភក្ដិដែលនឹងជះឥទ្ធិពលល្អមកលើអ្នក? បងប្រុសជូលាន ដែលបម្រើជាអ្នកចាស់ទុំនិយាយថា៖ «ពេលខ្ញុំនៅក្មេង ខ្ញុំមានមិត្តភក្ដិល្អៗដោយសារយើងបានផ្សព្វផ្សាយជាមួយគ្នា។ មិត្តទាំងនេះខ្នះខ្នែង ហើយពួកគេបានជួយខ្ញុំឲ្យដឹងថាកិច្ចបម្រើផ្សាយគឺនាំឲ្យមានអំណរខ្លាំង។ ដូច្នេះ ខ្ញុំបានចាប់ផ្ដើមមានគោលដៅបម្រើពេញពេល។ ខ្ញុំក៏យល់ថាមូលហេតុដែលខ្ញុំមិនសូវមានពួកម៉ាកល្អច្រើននាក់ គឺមកពីខ្ញុំស្វែងរកតែមិត្តដែលមានអាយុស្រករខ្ញុំ។ ក្រោយមក ពេលខ្ញុំទៅបេតអែល ខ្ញុំមានមិត្តភក្ដិល្អៗដែរ។ គំរូរបស់ពួកគេបានជួយខ្ញុំឲ្យចេះជ្រើសរើសការកម្សាន្តល្អប្រសើរជាង ហើយនេះនាំឲ្យខ្ញុំកាន់តែចូលទៅជិតព្រះយេហូវ៉ា»។
១៥. តើប៉ូលបានព្រមានធីម៉ូថេយ៉ាងណាអំពីការសេពគប់? (ធីម៉ូថេទី២ ២:២០-២២)
១៥ ចុះយ៉ាងណាបើអ្នកយល់ថាបុគ្គលណាម្នាក់ក្នុងក្រុមជំនុំមិនមែនជាបុគ្គលល្អឲ្យអ្នកសេពគប់? ប៉ូលបានដឹងថាបុគ្គលខ្លះនៅក្នុងក្រុមជំនុំគ្រិស្តសាសនិកនាសតវត្សរ៍ទី១ មិនមានគំនិតនិងការប្រព្រឹត្តដូចគ្រិស្តសាសនិកទេ ដូច្នេះប៉ូលបានព្រមានធីម៉ូថេឲ្យជៀសឆ្ងាយពីពួកគេ។ (សូមអាន ធីម៉ូថេទី២ ២:២០-២២) ចំណងមិត្តភាពរបស់យើងជាមួយព្រះយេហូវ៉ាមានតម្លៃណាស់។ យើងបានខំប្រឹងយ៉ាងខ្លាំងដើម្បីចូលទៅជិតព្រះយេហូវ៉ា ដូច្នេះយើងមិនគួរមានមិត្តភក្ដិដែលនឹងបង្ខូចចំណងមិត្តភាពនេះឡើយ។—ចសព. ២៦:៤
តើការកំណត់គោលដៅអាចជួយអ្នកយ៉ាងណាឲ្យរីកចម្រើន?
១៦. តើអ្នកគួរជ្រើសរើសគោលដៅអ្វីខ្លះ?
១៦ សូមកំណត់គោលដៅដែលមានប្រយោជន៍ចំពោះអ្នក។ សូមជ្រើសរើសគោលដៅដែលនឹងពង្រឹងជំនឿរបស់អ្នក ហើយជួយអ្នកឲ្យទៅជាគ្រិស្តសាសនិកដែលមានភាពចាស់ទុំជាង។ (អេភ. ៣:១៦) ជាឧទាហរណ៍ អ្នកអាចសម្រេចចិត្តសិក្សានិងអានគម្ពីរឲ្យបានទៀងទាត់ជាង។ (ចសព. ១:២, ៣) ឬអ្នកអាចព្យាយាមអធិដ្ឋានជាញឹកញាប់ជាងនិងអស់ពីចិត្ត។ ប្រហែលជាអ្នកត្រូវប្រុងប្រយ័ត្នជាងចំពោះការជ្រើសរើសការកម្សាន្ត និងរបៀបប្រើពេលវេលារបស់អ្នក។ (អេភ. ៥:១៥, ១៦) ពេលព្រះយេហូវ៉ាឃើញថាអ្នកកំពុងខំប្រឹងរីកចម្រើនទៅមុខទៀត លោកនឹងពេញចិត្ត។
តើប្អូនស្រីវ័យក្មេងនេះបានកំណត់គោលដៅអ្វីសម្រាប់ខ្លួនឯង? (សូមមើលវគ្គ១៧)
១៧. តើការជួយអ្នកឯទៀតមានប្រយោជន៍អ្វីចំពោះអ្នក?
១៧ អ្នកនឹងទៅជាគ្រិស្តសាសនិកដែលមានភាពចាស់ទុំកាន់តែខ្លាំង ពេលអ្នកជួយអ្នកឯទៀត។ លោកយេស៊ូបានមានប្រសាសន៍ថា៖ «ការឲ្យគេ នោះមានសុភមង្គលច្រើនជាងការទទួល»។ (សកម្ម. ២០:៣៥) អ្នកនឹងទទួលប្រយោជន៍យ៉ាងច្រើន បើអ្នកប្រើកម្លាំងនិងពេលវេលាខ្លះរបស់អ្នកដើម្បីជួយអ្នកឯទៀត។ ជាឧទាហរណ៍ អ្នកអាចកំណត់គោលដៅជួយបងប្អូនវ័យចាស់ និងបងប្អូនដែលមានសុខភាពមិនល្អក្នុងក្រុមជំនុំរបស់អ្នក។ ប្រហែលជាអ្នកអាចទៅផ្សារជួយទិញអីវ៉ាន់ឲ្យពួកគេ ឬជួយពួកគេឲ្យចេះប្រើគ្រឿងអេឡិចត្រូនិក។ បើអ្នកជាប្អូនប្រុស សូមកំណត់គោលដៅទៅជាជំនួយការខាងកិច្ចបម្រើ ដើម្បីអ្នកអាចជួយបងប្អូនរួមជំនឿឲ្យបានច្រើនជាង។ (ភី. ២:៤) អ្នកក៏បង្ហាញសេចក្ដីស្រឡាញ់ចំពោះពួកអ្នកដែលនៅខាងក្រៅក្រុមជំនុំ ដោយប្រាប់ដំណឹងល្អអំពីរាជាណាចក្រព្រះដល់ពួកគេ។ (ម៉ាថ. ៩:៣៦, ៣៧) បើអាចធ្វើបាន សូមកំណត់គោលដៅបម្រើព្រះយេហូវ៉ាពេញពេល។
១៨. តើកិច្ចបម្រើពេញពេលអាចជួយអ្នកឲ្យរីកចម្រើនយ៉ាងដូចម្ដេច?
១៨ កិច្ចបម្រើពេញពេលអាចផ្ដល់ឱកាសជាច្រើនឲ្យអ្នករីកចម្រើន។ ការបម្រើជាអ្នកត្រួសត្រាយ អាចបើកឱកាសឲ្យអ្នកចូលរួមសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។ អ្នកក៏ប្រហែលជាអាចបម្រើនៅបេតអែល ឬជួយកិច្ចការសាងសង់កន្លែងគោរពប្រណិប័តន៍ព្រះ។ បងស្រីវ័យក្មេងម្នាក់ឈ្មោះខេតលីនដែលជាអ្នកត្រួសត្រាយនិយាយថា៖ «ការចំណាយពេលក្នុងកិច្ចបម្រើផ្សាយជាមួយបងប្អូនដែលមានបទពិសោធន៍ បានជួយខ្ញុំឲ្យចូលកាន់តែជិតព្រះយេហូវ៉ាក្រោយពីខ្ញុំទទួលការជ្រមុជទឹក។ គំរូរបស់ពួកគេបានជំរុញចិត្តខ្ញុំឲ្យសិក្សាគម្ពីរច្រើនជាង និងបង្រៀនអ្នកឯទៀតដោយមានប្រសិទ្ធភាពច្រើនជាង»។
១៩. តើអ្នកនឹងទទួលពរអ្វីខ្លះកាលដែលអ្នកបន្ដរីកចម្រើន?
១៩ កាលដែលអ្នកបន្ដរីកចម្រើនក្នុងកិច្ចបម្រើព្រះ អ្នកនឹងទទួលពរជាច្រើន។ អ្នកនឹងមិនប្រើកម្លាំងរបស់អ្នកធ្វើអ្វីៗដែលឥតប្រយោជន៍ឡើយ។ (១យ៉ូន. ២:១៧) អ្នកនឹងជៀសផុតពីលទ្ធផលខ្លោចផ្សាដែលមកពីការសម្រេចចិត្តមិនល្អ។ ផ្ទុយទៅវិញ អ្នកនឹងបានជោគជ័យ និងមានសុភមង្គលពិតប្រាកដ។ (សុភ. ១៦:៣) គំរូល្អរបស់អ្នកនឹងលើកទឹកចិត្តបងប្អូនរួមជំនឿទាំងចាស់ទាំងក្មេង។ (១ធី. ៤:១២) សំខាន់បំផុត អ្នកនឹងមានសេចក្ដីសុខសាន្ត ព្រមទាំងមានការស្កប់ចិត្តដែលមកពីការធ្វើឲ្យព្រះយេហូវ៉ាពេញចិត្ត និងពីការមានចំណងមិត្តភាពជិតស្និទ្ធជាមួយលោក។—សុភ. ២៣:១៥, ១៦
ចម្រៀងលេខ៨៨ សូមឲ្យខ្ញុំស្គាល់ផ្លូវរបស់លោក
^ ពេលប្អូនៗវ័យក្មេងទទួលការជ្រមុជទឹក នោះធ្វើឲ្យអ្នកបម្រើទាំងអស់របស់ព្រះយេហូវ៉ាសប្បាយរីករាយ។ ក្រោយពីទទួលការជ្រមុជទឹក ពួកអ្នកកាន់តាមថ្មី ត្រូវបន្តរីកចម្រើនក្នុងកិច្ចបម្រើព្រះ។ អត្ថបទនេះនឹងជួយយើងទាំងអស់គ្នាឲ្យផ្ដោតអារម្មណ៍ទៅលើរបៀបដែលគ្រិស្តសាសនិកវ័យក្មេងដែលបានទទួលការជ្រមុជទឹកថ្មីៗនេះ អាចបន្តរីកចម្រើនទៅជាគ្រិស្តសាសនិកដែលមានភាពចាស់ទុំ។
^ ឈ្មោះខ្លះបានត្រូវផ្លាស់ប្ដូរ។
