អត្ថបទសិក្សា ២៣

ឪពុកម្ដាយ ចូរជួយកូនរបស់អ្នកឲ្យស្រឡាញ់ព្រះយេហូវ៉ា

លេង

«អ្នកត្រូវស្រឡាញ់ព្រះយេហូវ៉ាជាព្រះរបស់អ្នក ឲ្យអស់ពីដួងចិត្ត អស់ពីជីវិត និងអស់ពីសមត្ថភាពរិះគិត»។—ម៉ាថ. ២២:៣៧

សេចក្ដីសង្ខេប *

១-២. ពេលស្ថានភាពផ្លាស់ប្ដូរក្នុងជីវិត ហេតុអ្វីគោលការណ៍គម្ពីរខ្លះកាន់តែសំខាន់ចំពោះយើង?

នៅថ្ងៃរៀបការ កូនកំលោះនិងកូនក្រមុំដ៏ស្រស់ស្អាត យកចិត្តទុកដាក់ស្ដាប់សុន្ទរកថាអំពីអាពាហ៍ពិពាហ៍។ គោលការណ៍គម្ពីរក្នុងសុន្ទរកថានោះ មិនមែនជាអ្វីថ្មីចំពោះពួកគេទេ។ ប៉ុន្តែចាប់ពីថ្ងៃនោះទៅ គោលការណ៍គម្ពីរទាំងនេះនឹងរឹតតែសំខាន់ចំពោះពួកគេ។ ហេតុអ្វី? ពីព្រោះពួកគេនឹងត្រូវធ្វើតាមគោលការណ៍ទាំងនេះជាគូប្ដីប្រពន្ធ។

^២ គឺស្រដៀងនឹងនោះដែរពេលប្ដីប្រពន្ធដែលជាគ្រិស្តសាសនិកទៅជាឪពុកម្ដាយ។ អស់ជាច្រើនឆ្នាំ ពួកគេបានស្ដាប់សុន្ទរកថាអំពីការចិញ្ចឹមអប់រំកូន។ ប៉ុន្តែឥឡូវ គោលការណ៍ដែលមាននៅក្នុងសុន្ទរកថាទាំងនោះ កាន់តែសំខាន់ចំពោះពួកគេ ដោយសារពួកគេផ្ទាល់នឹងត្រូវចិញ្ចឹមអប់រំកូន។ នេះគឺជាភារកិច្ចដ៏វិសេសមែន! ដូច្នេះ ពេលកាលៈទេសៈផ្លាស់ប្ដូរ គោលការណ៍គម្ពីរខ្លះនឹងកាន់តែសំខាន់ចំពោះយើង។ នេះជាមូលហេតុមួយដែលអ្នកគោរពប្រណិប័តន៍ព្រះយេហូវ៉ាអានគម្ពីរ«ជារៀងរាល់ថ្ងៃអស់មួយជីវិត»ដូចស្ដេចអ៊ីស្រាអែលបានត្រូវបង្គាប់ឲ្យធ្វើ ហើយពួកគេក៏រំពឹងគិតអំពីបទគម្ពីរទាំងនោះដែរ។—បច. ១៧:១៩

៣. តើយើងនឹងពិចារណាអ្វីខ្លះក្នុងអត្ថបទនេះ?

^៣ ឯកសិទ្ធិដ៏ធំបំផុតមួយដែលគ្រិស្តសាសនិកអាចមាន គឺបង្រៀនកូនរបស់ពួកគេអំពីព្រះយេហូវ៉ា។ បើអ្នកជាឪពុកម្ដាយ អ្នកមានឯកសិទ្ធិដ៏ធំនេះ។ ប៉ុន្តែ អ្នកមិនគ្រាន់តែចង់បង្រៀនព័ត៌មានអំពីព្រះរបស់យើងប៉ុណ្ណោះទេ អ្នកចង់ជួយកូនៗឲ្យស្រឡាញ់លោកយ៉ាងខ្លាំង។ តើអ្នកអាចធ្វើអ្វីដើម្បីជួយកូនរបស់អ្នកឲ្យស្រឡាញ់ព្រះយេហូវ៉ា? ក្នុងអត្ថបទនេះ យើងនឹងពិចារណាគោលការណ៍គម្ពីរបួនដែលអាចជួយអ្នកឲ្យធ្វើជាឪពុកម្ដាយដ៏ល្អ។ (២ធី. ៣:១៦) យើងក៏នឹងឃើញប្រយោជន៍ដែលឪពុកម្ដាយគ្រិស្តសាសនិកខ្លះបានទទួលពីការធ្វើតាមយោបល់ក្នុងគម្ពីរ។

គោលការណ៍គម្ពីរបួនដែលអាចជួយឪពុកម្ដាយ

បើអ្នកតែងតែស្វែងរកការណែនាំពីព្រះយេហូវ៉ានិងទុកគំរូល្អ តើនោះនឹងមានឥទ្ធិពលល្អយ៉ាងណាទៅលើកូន? (សូមមើលវគ្គ៤, ៨)

៤. តើគោលការណ៍មួយដែលអាចជួយឪពុកម្ដាយអប់រំកូនឲ្យស្រឡាញ់ព្រះយេហូវ៉ាគឺជាអ្វី? (យ៉ាកុប ១:៥)

^៤ គោលការណ៍ទី១: ចូរស្វែងរកការណែនាំពីព្រះយេហូវ៉ា។ ចូរសុំប្រាជ្ញាពីព្រះយេហូវ៉ាដែលអ្នកត្រូវការ ដើម្បីជួយកូនឲ្យស្រឡាញ់លោក។ (សូមអាន យ៉ាកុប ១:៥) លោកស័ក្ដិសមឲ្យយោបល់ជាងគេក្នុងរឿងនេះ។ មានមូលហេតុមួយចំនួនដែលយើងអាចនិយាយដូច្នេះ។ សូមគិតអំពីមូលហេតុពីរ។ ទី១ ក្នុងនាមជាបិតាយើង ព្រះយេហូវ៉ាមានបទពិសោធន៍ច្រើនជាងឪពុកម្ដាយទាំងឡាយ។ (ចសព. ៣៦:៩) ទី២ ការណែនាំពីលោកផ្ដល់ប្រយោជន៍ជានិច្ច។—អេ. ៤៨:១៧

៥. (ក) តើអង្គការព្រះយេហូវ៉ាផ្ដល់អ្វីខ្លះដើម្បីជួយឪពុកម្ដាយ? (ខ) ដូចបានបង្ហាញក្នុងវីដេអូ តើអ្នកបានរៀនអ្វីពីរបៀបដែលបងអេប៊ីលយូនិងបងអ៊ូលឡាចិញ្ចឹមអប់រំកូន?

^៥ តាមរយៈបណ្ដាំរបស់លោកនិងអង្គការលោក ព្រះយេហូវ៉ាផ្ដល់ព័ត៌មានជាច្រើនដែលអាចជួយអ្នកអប់រំកូនៗឲ្យស្រឡាញ់លោក។ (ម៉ាថ. ២៤:៤៥) ជាឧទាហរណ៍ អ្នកអាចរកឃើញយោបល់ជាច្រើនក្នុងអត្ថបទតភាគ«ជំនួយសម្រាប់ក្រុមគ្រួសារ» ដែលបានត្រូវបោះពុម្ពផ្សាយអស់ជាច្រើនឆ្នាំក្នុងទស្សនាវដ្ដីភ្ញាក់រឭក! ហើយឥឡូវមាននៅគេហទំព័ររបស់យើង។ ម្យ៉ាងទៀត វីដេអូជាច្រើនបានត្រូវចេញផ្សាយនៅគេហទំព័រjw.org/km ដែលជួយឪពុកម្ដាយឲ្យធ្វើតាមយោបល់ពីព្រះយេហូវ៉ាកាលដែលពួកគេចិញ្ចឹមអប់រំកូន។ *—សុភ. ២:៤-៦

៦. តើឪពុកម្នាក់មានអារម្មណ៍យ៉ាងណាចំពោះការណែនាំដែលគាត់និងប្រពន្ធរបស់គាត់ទទួលពីអង្គការព្រះយេហូវ៉ា?

^៦ ឪពុកម្ដាយជាច្រើនបានថ្លែងអំណរគុណចំពោះជំនួយដែលព្រះយេហូវ៉ាផ្ដល់ឲ្យតាមរយៈអង្គការរបស់លោក។ ឪពុកម្នាក់ឈ្មោះចូ និយាយថា៖ «ការចិញ្ចឹមអប់រំកូនបីនាក់ក្នុងសេចក្ដីពិតគឺមិនស្រួលទេ។ ខ្ញុំនិងប្រពន្ធខ្ញុំអធិដ្ឋានសុំជំនួយពីព្រះយេហូវ៉ាជានិច្ច។ យើងច្រើនតែមានអារម្មណ៍ថា អត្ថបទឬវីដេអូណាមួយចេញមកចំពេល ហើយចំនឹងអ្វីដែលយើងត្រូវការ។ យើងតែងតែងស្វែងរកការណែនាំពីព្រះយេហូវ៉ា»។ បងចូនិងប្រពន្ធរបស់គាត់ឃើញថាអត្ថបទនិងវីដេអូទាំងនេះ ជួយកូនរបស់ពួកគេឲ្យចូលកាន់តែជិតព្រះយេហូវ៉ា។

៧. ហេតុអ្វីគឺសំខាន់ដែលឪពុកម្ដាយខំអស់ពីសមត្ថភាពដើម្បីទុកគំរូល្អឲ្យកូនៗ? (រ៉ូម ២:២១)

^៧ គោលការណ៍ទី២: ចូរធ្វើជាគំរូល្អ។ កូនក្មេងពូកែសង្កេតមើលឪពុកម្ដាយ ហើយច្រើនតែយកតម្រាប់ពួកគេ។ ពិតមែន គ្មានឪពុកម្ដាយណាល្អឥតខ្ចោះទេ។ (រ៉ូម ៣:២៣) ប៉ុន្តែ ឪពុកម្ដាយគួរខំអស់ពីសមត្ថភាពដើម្បីទុកគំរូល្អឲ្យកូនៗ។ (សូមអាន រ៉ូម ២:២១) ស្ដីអំពីកូន ឪពុកម្នាក់និយាយថា៖ «ពួកគេគឺប្រៀបដូចជាអេប៉ុងដែលងាយបឺត»។ គាត់បន្ថែមថា៖ «ពួកគេនឹងប្រាប់យើង ពេលដែលយើងមិនធ្វើតាមអ្វីដែលយើងបង្រៀនពួកគេ»។ ដូច្នេះ បើយើងចង់ឲ្យកូនៗស្រឡាញ់ព្រះយេហូវ៉ា យើងផ្ទាល់ត្រូវស្រឡាញ់លោកឲ្យខ្លាំងនិងបង្ហាញឲ្យពួកគេឃើញ។

៨-៩. តើអ្នកបានរៀនអ្វីពីពាក្យសម្ដីរបស់ប្អូនអេនទ្រូនិងបងអេមម៉ា?

^៨ មានរបៀបជាច្រើនដើម្បីបង្រៀនកូនរបស់អ្នកឲ្យស្រឡាញ់ព្រះយេហូវ៉ា។ សូមកត់សម្គាល់ពាក្យសម្ដីរបស់ប្អូនប្រុសអាយុ១៧ឆ្នាំម្នាក់ឈ្មោះអេនទ្រូ។ គាត់និយាយថា៖ «ឪពុកម្ដាយរបស់ខ្ញុំតែងតែបង្រៀនថា ការអធិដ្ឋានគឺសំខាន់ណាស់។ រាល់យប់ ឪពុកខ្ញុំមកអធិដ្ឋានជាមួយខ្ញុំ ទោះជាខ្ញុំបានអធិដ្ឋានខ្លួនឯងហើយក៏ដោយ។ ពួកគាត់តែងតែរំលឹកខ្ញុំនិងប្អូនស្រីខ្ញុំថា៖ ‹កូនអាចអធិដ្ឋានទៅព្រះយេហូវ៉ាប៉ុន្មានដងក៏បានតាមចិត្តកូន›។ ហេតុនេះហើយ ការអធិដ្ឋានគឺសំខាន់ណាស់ចំពោះខ្ញុំ។ ឥឡូវ ខ្ញុំមានអារម្មណ៍ស្រួលអធិដ្ឋានទៅព្រះយេហូវ៉ា ហើយចាត់ទុកលោកជាបិតាដែលស្រឡាញ់ខ្ញុំ»។ ឪពុកម្ដាយទាំងឡាយ សូមចាំជានិច្ចថាសេចក្ដីស្រឡាញ់របស់អ្នកចំពោះព្រះយេហូវ៉ា អាចជួយកូនឲ្យស្រឡាញ់លោកដែរ។

^៩ សូមគិតផងដែរអំពីគំរូរបស់បងស្រីអេមម៉ា។ ពេលឪពុកគាត់បានចុះចោលក្រុមគ្រួសារ ឪពុកបានបន្សល់ទុកនូវបំណុលជាច្រើនឲ្យម្ដាយគាត់ត្រូវសងជំនួស។ បងអេមម៉ានិយាយថា៖ «មានពេលជាច្រើនដងដែលម្ដាយខ្ញុំគ្មានលុយគ្រប់គ្រាន់ទេ តែគាត់តែងតែប្រាប់អំពីរបៀបដែលព្រះយេហូវ៉ាមើលថែនិងផ្គត់ផ្គង់អ្នកបម្រើលោក។ ខ្ញុំអាចឃើញតាមរបៀបរស់នៅរបស់គាត់ថា គាត់ពិតជាជឿអ៊ីចឹងមែន។ ម្ដាយខ្ញុំបានធ្វើតាមអ្វីដែលគាត់បានបង្រៀនខ្ញុំ»។ តើមានមេរៀនអ្វី? ឪពុកម្ដាយអាចបង្រៀនកូនៗតាមរយៈគំរូរបស់ពួកគេ ទោះជាស្ថិតក្នុងស្ថានភាពពិបាកក្ដី។—កាឡ. ៦:៩

១០. តើឪពុកម្ដាយជនជាតិអ៊ីស្រាអែលអាចនិយាយជាមួយកូនអំពីព្រះយេហូវ៉ានៅពេលណាខ្លះ? (ការបំភ្លឺច្បាប់ ៦:៦, ៧)

^១០ គោលការណ៍ទី៣: ចូរនិយាយជាមួយកូនជារឿយៗ។ ព្រះយេហូវ៉ាបានណែនាំជនជាតិអ៊ីស្រាអែលសម័យបុរាណឲ្យបង្រៀនកូនរបស់ពួកគេអំពីព្រះយេហូវ៉ាជារឿយៗ។ (សូមអាន ការបំភ្លឺច្បាប់ ៦:៦, ៧) ឪពុកម្ដាយទាំងនោះមានឱកាសច្រើនក្នុងមួយថ្ងៃៗដើម្បីនិយាយជាមួយកូន និងជួយពួកគេឲ្យស្រឡាញ់ព្រះយេហូវ៉ា។ ជាឧទាហរណ៍ ក្មេងប្រុសជនជាតិអ៊ីស្រាអែលចំណាយពេលជាច្រើនម៉ោងក្នុងការជួយឪពុកគាត់ដាំដំណាំឬប្រមូលផល។ កូនស្រីចំណាយពេលភាគច្រើនជាមួយម្ដាយក្នុងការដេរប៉ាក់ ត្បាញ និងធ្វើកិច្ចការផ្ទះផ្សេងទៀត។ ពេលឪពុកម្ដាយនិងកូនរួមកិច្ចការជាមួយគ្នា ពួកគេអាចនិយាយគ្នាអំពីរឿងសំខាន់ៗជាច្រើន ដូចជាគុណធម៌របស់ព្រះយេហូវ៉ានិងរបៀបដែលលោកជួយក្រុមគ្រួសារជាដើម។

១១. តើឪពុកម្ដាយគ្រិស្តសាសនិកមានឱកាសអ្វីដើម្បីនិយាយជាមួយកូន?

^១១ សព្វថ្ងៃនេះ គឺខុសពីសម័យមុន។ នៅប្រទេសជាច្រើន ឪពុកម្ដាយនិងកូនមិនអាចចំណាយពេលជាមួយគ្នាពេញមួយថ្ងៃបានទេ។ ឪពុកម្ដាយប្រហែលជាទៅធ្វើការ ហើយកូនប្រហែលជាទៅសាលារៀន។ ដូច្នេះ ឪពុកម្ដាយត្រូវព្យាយាមរកពេលផ្សេងៗដើម្បីនិយាយជាមួយកូន។ (អេភ. ៥:១៥, ១៦; ភី. ១:១០) ការគោរពប្រណិប័តន៍ជាក្រុមគ្រួសារ គឺជាឱកាសមួយដើម្បីធ្វើដូច្នេះ។ ប្អូនប្រុសវ័យក្មេងម្នាក់ឈ្មោះអាឡិចសេនដឺ និយាយថា៖ «ឪពុកខ្ញុំតែងតែរៀបចំឲ្យមានការគោរពប្រណិប័តន៍ជាក្រុមគ្រួសារ ហើយគាត់មិនឲ្យអ្វីណាក៏ដោយរំខានពេលវេលានេះទេ។ ក្រោយពីសិក្សា យើងនិយាយគ្នាពីនេះពីនោះច្រើន»។

១២. តើប្រមុខគ្រួសារគួរចងចាំអំពីអ្វីក្នុងអំឡុងការគោរពប្រណិប័តន៍ជាក្រុមគ្រួសារ?

^១២ បើអ្នកជាប្រមុខគ្រួសារ តើអ្នកអាចធ្វើអ្វីដើម្បីឲ្យការគោរពប្រណិប័តន៍ជាក្រុមគ្រួសារជាពេលវេលាដ៏សប្បាយចំពោះកូនៗ? គឺជាការល្អដែលអ្នកសិក្សាសៀវភៅថ្មីសប្បាយនឹងជីវិតដែលគ្មានទីបញ្ចប់!ជាមួយកូន។ សៀវភៅនោះអាចជួយអ្នកនិងកូនរបស់អ្នកឲ្យមានការសន្ទនាល្អ។ អ្នកចង់ឲ្យកូនរបស់អ្នកនិយាយប្រាប់អំពីអារម្មណ៍និងការព្រួយបារម្ភរបស់ពួកគេ។ ដូច្នេះ សូមកុំយកពេលគោរពប្រណិប័តន៍ជាក្រុមគ្រួសារដើម្បីរិះគន់ឬស្ដីប្រដៅកូនឡើយ។ សូមព្យាយាមមិនផ្ទុះកំហឹង បើពួកគេប្រាប់អំពីទស្សនៈដែលខុសពីគោលការណ៍គម្ពីរ។ ផ្ទុយទៅវិញ សូមសប្បាយចិត្តដែលពួកគេនិយាយត្រង់ៗអំពីអារម្មណ៍របស់ពួកគេ ហើយសូមលើកទឹកចិត្តពួកគេឲ្យនិយាយអស់ពីចិត្ត។ លុះត្រាតែអ្នកស្គាល់អារម្មណ៍របស់ពួកគេយ៉ាងច្បាស់ ទើបអ្នកអាចជួយពួកគេច្រើនបំផុត។

តើឪពុកម្ដាយអាចប្រើអ្វីៗដែលព្រះយេហូវ៉ាបានបង្កើតយ៉ាងដូចម្ដេចដើម្បីបង្រៀនកូនអំពីគុណសម្បត្តិរបស់លោក? (សូមមើលវគ្គ១៣)

១៣. តើឪពុកម្ដាយមានឱកាសផ្សេងទៀតអ្វីដើម្បីជួយកូនរបស់ពួកគេឲ្យចូលទៅជិតព្រះយេហូវ៉ា?

^១៣ ឪពុកម្ដាយ សូមរកឱកាសផ្សេងៗក្នុងមួយថ្ងៃៗដើម្បីជួយកូនរបស់អ្នកឲ្យចូលទៅជិតព្រះយេហូវ៉ា។ អ្នកមិនចាំបាច់រង់ចាំដល់ពេលសិក្សាគម្ពីរ ដើម្បីបង្រៀនពួកគេអំពីព្រះដែលស្រឡាញ់យើងឡើយ។ សូមកត់សម្គាល់អំពីអ្វីដែលម្ដាយម្នាក់ឈ្មោះលីសានិយាយ។ គាត់ថា៖ «យើងបានប្រើអ្វីៗដែលនៅជុំវិញយើងដើម្បីបង្រៀនកូនៗអំពីព្រះយេហូវ៉ា។ ជាឧទាហរណ៍ ពេលដែលឆ្កែរបស់យើងធ្វើនេះធ្វើនោះ ហើយនាំឲ្យកូនៗសើច យើងប្រាប់កូនថា នេះបង្ហាញថាព្រះយេហូវ៉ាគឺជាព្រះដែលមានសេចក្ដីសប្បាយ ហើយលោកបង្កើតយើងឲ្យសើចសប្បាយដែរ»។

ឪពុកម្ដាយទាំងឡាយ តើអ្នកស្គាល់មិត្តភក្តិរបស់កូនៗឬទេ? (សូមមើលវគ្គ១៤) *

១៤. ហេតុអ្វីគឺសំខាន់ដែលឪពុកម្ដាយជួយកូនៗឲ្យជ្រើសរើសមិត្តល្អ? (សុភាសិត ១៣:២០)

^១៤ គោលការណ៍ទី៤: ចូរជួយកូនរបស់អ្នកឲ្យជ្រើសរើសមិត្តល្អ។ គម្ពីរប្រាប់យ៉ាងច្បាស់ថាមិត្តភក្តិមានឥទ្ធិពលមកលើយើង អាចល្អអាចអាក្រក់។ (សូមអាន សុភាសិត ១៣:២០) ឪពុកម្ដាយទាំងឡាយ តើអ្នកស្គាល់មិត្តភក្តិរបស់កូនៗឬទេ? តើអ្នកបានជួបនិងចំណាយពេលជាមួយពួកគេឬ? តើអ្នកអាចធ្វើអ្វីដើម្បីជួយកូនរបស់អ្នកឲ្យមានមិត្តភក្តិដែលស្រឡាញ់ព្រះយេហូវ៉ា? (១កូ. ១៥:៣៣) អ្នកអាចជួយកូនរបស់អ្នកឲ្យធ្វើការសម្រេចចិត្តដ៏ឈ្លាសវៃអំពីរឿងនេះ ដោយអញ្ជើញបងប្អូនខ្លះដែលមានចំណងមិត្តភាពល្អជាមួយព្រះយេហូវ៉ាឲ្យចំណាយពេលជាមួយអ្នកនិងកូនៗអ្នក។—ចសព. ១១៩:៦៣

១៥. តើឪពុកម្ដាយអាចធ្វើអ្វីដើម្បីជួយកូនឲ្យមានមិត្តភក្តិល្អ?

^១៥ សូមពិចារណាអំពីគំរូរបស់ឪពុកម្នាក់ឈ្មោះថូនី។ គាត់ពន្យល់អំពីអ្វីដែលគាត់និងប្រពន្ធគាត់បានធ្វើដើម្បីជួយកូនរបស់ពួកគេឲ្យរកបានមិត្តភក្តិល្អ។ គាត់និយាយថា៖ «អស់ជាច្រើនឆ្នាំ ខ្ញុំនិងប្រពន្ធខ្ញុំបានអញ្ជើញបងប្អូនផ្សេងៗ ទាំងក្មេងទាំងចាស់ឲ្យមកផ្ទះរបស់យើង។ យើងបានបរិភោគអាហារនិងធ្វើការគោរពប្រណិប័តន៍ជាក្រុមគ្រួសារជាមួយគ្នា។ នេះជារបៀបដ៏ល្អមួយដើម្បីស្គាល់ពួកអ្នកដែលស្រឡាញ់ព្រះយេហូវ៉ានិងបម្រើលោកដោយអំណរ។ យើងធ្លាប់ឲ្យអ្នកត្រួតពិនិត្យប្រចាំមណ្ឌល សាសនទូត និងបងប្អូនឯទៀតស្នាក់នៅផ្ទះយើង។ បទពិសោធន៍ ចិត្តខ្នះខ្នែង និងចិត្តគំនិតដែលលះបង់ប្រយោជន៍ខ្លួនរបស់ពួកគេ មានឥទ្ធិពលយ៉ាងខ្លាំងទៅលើកូនរបស់យើង ហើយបានជួយកូនៗឲ្យចូលទៅជិតព្រះយេហូវ៉ា»។ ឪពុកម្ដាយ សូមតាំងចិត្តជួយកូនរបស់អ្នកឲ្យមានការសេពគប់ល្អ។

សូមកុំអស់សង្ឃឹមឡើយ!

១៦. តើអ្នកគួរធ្វើអ្វីបើកូនប្រាប់ថាគាត់មិនចង់បម្រើព្រះយេហូវ៉ា?

^១៦ ចុះយ៉ាងណាបើអ្នកខំប្រឹងអស់ពីសមត្ថភាពរួចហើយ ប៉ុន្តែកូនម្នាក់ប្រាប់អ្នកថាគាត់មិនចង់បម្រើព្រះយេហូវ៉ា? សូមកុំគិតថានោះមកពីអ្នកអប់រំកូនមិនបានល្អឡើយ។ ព្រះយេហូវ៉ាបានឲ្យមនុស្សគ្រប់គ្នានូវអំណោយមួយដែលជាចិត្តសេរី ពោលគឺសមត្ថភាពសម្រេចចិត្តថាបម្រើលោកឬមិនបម្រើលោក។ កូនរបស់អ្នកក៏បានទទួលអំណោយនេះដែរ។ បើកូនរបស់អ្នកសម្រេចចិត្តចាកចេញពីព្រះយេហូវ៉ា សូមបន្តសង្ឃឹមជានិច្ចថាគាត់នឹងត្រឡប់មកវិញ។ សូមនឹកចាំអំពីកូនប្រុសដែលវង្វេងបាត់។ (លូក. ១៥:១១-១៩, ២២-២៤) បុរសវ័យក្មេងនោះបានធ្វើអំពើអាក្រក់ជាច្រើន ប៉ុន្តែនៅទីបំផុតគាត់បានត្រឡប់មកវិញ។ អ្នកខ្លះប្រហែលជានិយាយថា «នេះគ្រាន់តែជារឿងមួយ។ តើអាចកើតឡើងក្នុងជីវិតពិតបានឬទេ?»។ គឺអាច! តាមពិត បងប្រុសម្នាក់ឈ្មោះអ៊ីលីមានបទពិសោធន៍ដូចនេះ។

១៧. តើអ្នកបានទទួលការលើកទឹកចិត្តយ៉ាងណាពីបទពិសោធន៍របស់បងអ៊ីលី?

^១៧ បងអ៊ីលីនិយាយអំពីឪពុកម្ដាយគាត់ថា៖ «ពួកគាត់បានខំប្រឹងអស់ពីសមត្ថភាពដើម្បីជួយខ្ញុំឲ្យស្រឡាញ់ព្រះយេហូវ៉ានិងគម្ពីរដែលជាបណ្ដាំរបស់លោក។ ក៏ប៉ុន្តែ ពេលខ្ញុំមានវ័យជំទង់ ខ្ញុំចាប់ផ្ដើមប្រឆាំង»។ បងអ៊ីលីបានចាប់ផ្ដើមធ្វើអ្វីដែលមិនត្រឹមត្រូវដោយលួចលាក់។ ឪពុកម្ដាយរបស់គាត់បានព្យាយាមជួយគាត់ឲ្យនៅជាប់នឹងព្រះយេហូវ៉ា។ ប៉ុន្តែ គាត់មិនស្ដាប់ពួកគេទេ។ ក្រោយពីគាត់បានចាកចេញពីផ្ទះ គាត់បានចាប់ផ្ដើមប្រព្រឹត្តអំពើអបាយមុខ។ ទោះជាយ៉ាងនេះក្ដី ជួនកាលគាត់និយាយអំពីគម្ពីរជាមួយមិត្តភក្តិម្នាក់របស់គាត់។ បងអ៊ីលីនិយាយថា៖ «ពេលខ្ញុំនិយាយអំពីព្រះយេហូវ៉ាកាន់តែច្រើនជាមួយនឹងមិត្តរបស់ខ្ញុំ នោះធ្វើឲ្យខ្ញុំគិតអំពីលោកកាន់តែច្រើន។ បន្តិចម្ដងៗ គ្រាប់ពូជនៃសេចក្ដីពិតក្នុងគម្ពីរដែលមិនទាន់ដុះនៅក្នុងចិត្តរបស់ខ្ញុំ គឺជាគ្រាប់ពូជដែលឪពុកម្ដាយរបស់ខ្ញុំព្យាយាមដាំនោះ ចាប់ផ្ដើមដុះឡើងហើយ»។ ក្រោយមក បងអ៊ីលីបានត្រឡប់មកសេចក្ដីពិតវិញ។ * សូមស្រមៃគិតថាឪពុកម្ដាយគាត់សប្បាយចិត្តខ្លាំងយ៉ាងណាទៅ ពេលឃើញលទ្ធផលល្អ ដែលមកពីការព្យាយាមរបស់ពួកគេដើម្បីបង្រៀនគាត់តាំងពីក្មេងឲ្យស្រឡាញ់ព្រះយេហូវ៉ា!—២ធី. ៣:១៤, ១៥

១៨. តើអ្នកមានអារម្មណ៍យ៉ាងណាចំពោះឪពុកម្ដាយដែលខំប្រឹងបង្រៀនកូនឲ្យស្រឡាញ់ព្រះយេហូវ៉ា?

^១៨ ឪពុកម្ដាយទាំងឡាយ អ្នកបានទទួលឯកសិទ្ធិដ៏អស្ចារ្យ ពោលគឺចិញ្ចឹមអប់រំកូនឲ្យទៅជាអ្នកគោរពប្រណិប័តន៍ព្រះយេហូវ៉ាជំនាន់ក្រោយ។ (ចសព. ៧៨:៤-៦) នេះមិនមែនជាភារកិច្ចងាយស្រួលទេ។ យើងសូមសរសើរអ្នកដោយស្មោះចំពោះការខំប្រឹងព្យាយាមដើម្បីជួយកូនៗ! បើអ្នកបន្តខំអស់ពីសមត្ថភាពដើម្បីជួយកូនឲ្យស្រឡាញ់ព្រះយេហូវ៉ា និងអប់រំពួកគេទៅតាមការប្រៀនប្រដៅនិងការណែនាំរបស់លោក អ្នកអាចប្រាកដថាព្រះយេហូវ៉ាដែលជាបិតានៅស្ថានសួគ៌ដែលប្រកបដោយសេចក្ដីស្រឡាញ់នឹងពេញចិត្ត។—អេភ. ៦:៤

ចម្រៀងលេខ១៣៥ ពាក្យអង្វររបស់ព្រះយេហូវ៉ា៖ ‹កូនអើយ ចូរបង្ហាញប្រាជ្ញា›

^ វគ្គ 5 ឪពុកម្ដាយដែលជាគ្រិស្តសាសនិកស្រឡាញ់កូនរបស់ពួកគេខ្លាំងណាស់។ ពួកគេខំប្រឹងបំពេញសេចក្ដីត្រូវការប្រចាំថ្ងៃ និងសេចក្ដីត្រូវការខាងផ្លូវចិត្តរបស់កូនៗ។ សំខាន់ជាងនេះទៅទៀត ឪពុកម្ដាយទាំងនោះខំអស់ពីសមត្ថភាពដើម្បីជួយកូនរបស់ពួកគេឲ្យស្រឡាញ់ព្រះយេហូវ៉ា។ ក្នុងអត្ថបទនេះ យើងនឹងពិចារណាអំពីគោលការណ៍គម្ពីរបួនដែលអាចជួយឪពុកម្ដាយឲ្យសម្រេចគោលដៅនេះ។

^ វគ្គ 5 សូមមើលវីដេអូព្រះយេហូវ៉ាបានបង្រៀនយើងឲ្យចេះចិញ្ចឹមអប់រំកូននៅគេហទំព័រjw.org/km។

^ វគ្គ 17 សូមមើលអត្ថបទដែលមានចំណងជើងថា«គម្ពីរជួយមនុស្សឲ្យកែប្រែជីវិត»ក្នុងទស្សនាវដ្ដីប៉មយាម ថ្ងៃទី១ ខែមេសា ឆ្នាំ២០១២។

^ វគ្គ 57 ការពណ៌នាអំពីរូបភាព: ដើម្បីស្គាល់មិត្តភក្តិរបស់កូន ឪពុកម្នាក់លេងបាល់បោះជាមួយកូននិងមិត្តភក្តិរបស់គាត់។

ទស្សនាវដ្ដីប៉មយាម សម្រាប់សិក្សា