សូមឲ្យលោកធ្វើឲ្យគ្រប់ទាំងគម្រោងរបស់អ្នកបានសម្រេច
«ចូរយកព្រះយេហូវ៉ាជាសេចក្ដីអំណររបស់អ្នក នោះទ្រង់នឹងប្រទានឲ្យអ្នកបានដូចបំណងចិត្ដ»។—ទំនុកតម្កើង ៣៧:៤
ចម្រៀងលេខ: ៨៩, ១៤០
១. តើប្អូនៗវ័យក្មេងត្រូវធ្វើការសម្រេចចិត្ដអ្វីចំពោះអនាគតរបស់ពួកគេ? តើអ្វីអាចជួយពួកគេមិនឲ្យព្រួយបារម្ភខ្លាំងពេក? (សូមមើលរូបភាពនៅដើមអត្ថបទ)
ប្អូនៗវ័យក្មេងទំនងជានឹងយល់ស្របថា មុនចាប់ផ្ដើមធ្វើដំណើរទៅកន្លែងណាមួយ គឺជាការឈ្លាសវៃឲ្យអ្នកធ្វើគម្រោងអំពីកន្លែងដែលអ្នកចង់ទៅ។ ជីវិតគឺប្រៀបដូចជាការធ្វើដំណើរមួយ ហើយពេលវេលាដើម្បីធ្វើគម្រោងអំពីកន្លែងដែលអ្នកចង់ទៅគឺពេលដែលអ្នកនៅក្មេង។ ការធ្វើគម្រោងនោះប្រហែលជាមិនស្រួលទេ។ ប្អូនស្រីម្នាក់ឈ្មោះហេធើនិយាយថា៖ «ពេលដែលយើងត្រូវសម្រេចចិត្ដអំពីគោលដៅជីវិត នោះគឺជាអ្វីដែលគួរឲ្យភ័យខ្លាច»។ បើអ្នកមានអារម្មណ៍បែបនេះ សូមចាំថាព្រះយេហូវ៉ាមានប្រសាសន៍ថា៖ «កុំឲ្យស្រយុតចិត្ដឲ្យសោះពីព្រោះអញជាព្រះនៃឯង អញនឹងចំរើនកំឡាំងដល់ឯង អើអញនឹងជួយឯង»។—អេសាយ ៤១:១០
២. តើអ្នកដឹងយ៉ាងដូចម្ដេចថាព្រះយេហូវ៉ាចង់ឲ្យអ្នករៀបគម្រោងសម្រាប់អនាគតដ៏សប្បាយ?
២ ព្រះយេហូវ៉ាលើកទឹកចិត្ដអ្នកឲ្យរៀបគម្រោងដ៏ឈ្លាសវៃសម្រាប់ពេលអនាគត។ (សាស្តា ១២:១; ម៉ាថាយ ៦:២០) លោកចង់ឲ្យអ្នកមានជីវិតសប្បាយរីករាយ។ អ្នកអាចដឹងដូច្នេះពេលដែលអ្នកមើល ស្តាប់ និងភ្លក់អ្វីៗដែលលោកបានបង្កើត។ ព្រះយេហូវ៉ាក៏យកចិត្ដទុកដាក់ចំពោះយើងតាមរបៀបផ្សេងទៀតដែរ។ លោកផ្ដល់ការណែនាំដល់យើង ហើយបង្រៀនយើងអំពីរបៀបរស់នៅដ៏ល្អបំផុត។ ដូច្នេះ ពេលមនុស្សមិនព្រមទទួលការណែនាំពីលោកដែលប្រកបដោយប្រាជ្ញា នោះនាំឲ្យលោកមិនពេញចិត្ដទេ។ លោកប្រាប់ពួកអ្នកដែលមិនធ្វើតាមការណែនាំពីលោកថា អ្នក«បានរើសយករបស់ដែលអញមិនចូលចិត្ដ . . . មើល! ពួកអ្នកបំរើអញនឹងអរសប្បាយ តែឯងរាល់គ្នានឹងត្រូវខ្មាស។ មើល! ពួកអ្នកបំរើអញនឹងច្រៀងដោយមានចិត្ដអំណរ»។ (អេសាយ ៦៥:១២-១៤) ពេលយើងធ្វើការសម្រេចចិត្ដដ៏ឈ្លាសវៃក្នុងជីវិតរបស់យើង យើងនាំឲ្យព្រះយេហូវ៉ាទទួលការសរសើរ។—សុភាសិត ២៧:១១
គម្រោងដែលនឹងនាំឲ្យអ្នកសប្បាយរីករាយ
៣. តើព្រះយេហូវ៉ាលើកទឹកចិត្ដអ្នកឲ្យធ្វើអ្វី?
៣ តើព្រះយេហូវ៉ាលើកទឹកចិត្ដអ្នកឲ្យមានគម្រោងអ្វី? ដើម្បីមានជីវិតដ៏សប្បាយរីករាយ អ្នកត្រូវស្គាល់ព្រះយេហូវ៉ានិងបម្រើលោក។ ព្រះយេហូវ៉ាបានបង្កើតមនុស្សឲ្យមានសេចក្ដីត្រូវការបែបនេះ។ (ទំនុកតម្កើង ១២៨:១; ម៉ាថាយ ៥:៣) សត្វចេះតែស៊ី ផឹក និងបង្កើតកូន។ ប៉ុន្ដែ ព្រះយេហូវ៉ាចង់ឲ្យអ្នករៀបគម្រោងសម្រាប់ជីវិតដើម្បីឲ្យអ្នកមានសុភមង្គលនិងជីវិតដែលមានន័យខ្លឹមសារ។ អ្នកបង្កើតរបស់អ្នកគឺជា«ព្រះនៃសេចក្ដីស្រឡាញ់»និងជា«ព្រះដែលមានសេចក្ដីសប្បាយ» ហើយលោកបានបង្កើតមនុស្ស«ឲ្យមានភាពដូច»លោក។ (កូរិនថូសទី២ ១៣:១១; ធីម៉ូថេទី១ ១:១១; លោកុប្បត្ដិ ១:២៦) ពេលអ្នកយកតម្រាប់ព្រះរបស់យើងដែលប្រកបដោយសេចក្ដីស្រឡាញ់ នោះអ្នកនឹងសប្បាយរីករាយ។ គម្ពីរចែងថា៖ «ការឲ្យគេ នោះនឹងផ្ដល់សុភមង្គលច្រើនជាងការទទួល»។ (សកម្មភាព ២០:៣៥) តើអ្នកបានឃើញថានេះជាការពិតឬទេ? បទគម្ពីរនេះបញ្ជាក់អំពីការពិតមួយនៃជីវិត។ ដូច្នេះ ព្រះយេហូវ៉ាចង់ឲ្យអ្នករៀបគម្រោងសម្រាប់អនាគតដោយមានមូលដ្ឋានលើសេចក្ដីស្រឡាញ់ចំពោះអ្នកឯទៀតនិងចំពោះលោក។—សូមអាន ម៉ាថាយ ២២:៣៦-៣៩
ពេលអ្នកបង្ហាញសេចក្ដីស្រឡាញ់ អ្នកនឹងសប្បាយរីករាយ
៤, ៥. តើអ្វីបានធ្វើឲ្យលោកយេស៊ូសប្បាយរីករាយ?
៤ លោកយេស៊ូគ្រិស្ដបានទុកគំរូដ៏ល្អឥតខ្ចោះឲ្យប្អូនៗវ័យក្មេង។ ពេលលោកនៅក្មេង លោកច្បាស់ជាបានលេងសប្បាយដូចក្មេងៗឯទៀត។ ដូចបណ្ដាំរបស់ព្រះចែងថា មាន«ពេលសើច»និង«ពេលសំរាប់លោតកញ្ឆេង»។ (សាស្តា ៣:៤) លោកយេស៊ូក៏បានចូលទៅជិតព្រះយេហូវ៉ាដោយសិក្សាបទគម្ពីរ។ ពេលលោកមានអាយុ១២ឆ្នាំ ពួកគ្រូនៅវិហារបាន‹នឹកអស្ចារ្យក្នុងចិត្ដដោយសារការយល់ដឹងនិងចម្លើយរបស់លោក›។—លូកា ២:៤២, ៤៦, ៤៧
៥ ពេលលោកយេស៊ូជាមនុស្សពេញវ័យ ការធ្វើអ្វីដែលព្រះបានសុំលោកឲ្យធ្វើបាននាំឲ្យលោកសប្បាយរីករាយ។ ជាឧទាហរណ៍ ព្រះចង់ឲ្យលោក«ប្រកាសដំណឹងល្អដល់អ្នកក្រីក្រ»និង«ប្រាប់អ្នកដែលងងឹតភ្នែកអំពីការមើលឃើញឡើងវិញ»។ (លូកា ៤:១៨) ទំនុកតម្កើង ៤០:៨រៀបរាប់អំពីអារម្មណ៍របស់លោកយេស៊ូថា៖ «ឱព្រះនៃទូលបង្គំអើយ ទូលបង្គំមានសេចក្ដីអំណរនឹងធ្វើតាមព្រះហឫទ័យទ្រង់»។ លោកយេស៊ូចូលចិត្ដបង្រៀនមនុស្សអំពីបិតារបស់លោក។ (សូមអាន លូកា ១០:២១) នៅពេលមួយ ក្រោយពីលោកយេស៊ូបានសន្ទនាជាមួយនឹងស្ដ្រីម្នាក់អំពីការគោរពប្រណិប័តន៍ពិត លោកបានមានប្រសាសន៍ទៅពួកអ្នកកាន់តាមលោកថា៖ «អាហាររបស់ខ្ញុំ គឺខ្ញុំធ្វើតាមបំណងប្រាថ្នារបស់លោកដែលបានចាត់ខ្ញុំឲ្យមក ព្រមទាំងបង្ហើយកិច្ចការដែលលោកបានផ្ដល់ឲ្យ»។ (យ៉ូហាន ៤:៣១-៣៤) ដោយសារលោកយេស៊ូបានបង្ហាញសេចក្ដីស្រឡាញ់ចំពោះព្រះនិងចំពោះអ្នកឯទៀត នេះនាំឲ្យលោកសប្បាយចិត្ដ។ បើអ្នកធ្វើដូច្នេះ អ្នកក៏នឹងសប្បាយរីករាយដែរ។
៦. ហេតុអ្វីការពិគ្រោះជាមួយនឹងអ្នកឯទៀតអំពីគម្រោងរបស់អ្នកសម្រាប់ថ្ងៃអនាគតគឺជាការល្អ?
៦ គ្រិស្ដសាសនិកជាច្រើនបានចាប់ផ្ដើមធ្វើជាអ្នកត្រួសត្រាយពេលនៅវ័យក្មេង ហើយនេះបាននាំឲ្យពួកគេសប្បាយរីករាយ។ តើអ្នកអាចពិគ្រោះជាមួយនឹងពួកអ្នកត្រួសត្រាយខ្លះទាំងនេះអំពីគម្រោងរបស់អ្នកឬទេ? «ទីណាគ្មានការប្រឹក្សា នោះមិនបានតាមចិត្ដប៉ងទេ តែបើមានអ្នកជួយគំនិតជាច្រើន នោះនឹងកើតការវិញ»។ (សុភាសិត ១៥:២២) បងប្អូនទាំងនេះទំនងជានឹងប្រាប់អ្នកថាការត្រួសត្រាយផ្ដល់ឲ្យយើងនូវការអប់រំដែលនឹងជួយយើងពេញមួយជីវិត។ ពេលលោកយេស៊ូនៅស្ថានសួគ៌ លោកបានរៀនអ្វីៗជាច្រើនពីបិតារបស់លោក។ ក្រោយមក លោកបានបន្ដរៀនក្នុងអំឡុងកិច្ចបម្រើរបស់លោកនៅផែនដី។ លោកមានអំណរពេលលោកផ្សព្វផ្សាយដំណឹងល្អ ហើយពេលលោកបានរក្សាចិត្ដស្មោះគ្រប់លក្ខណៈនៅក្នុងកាលៈទេសៈដ៏ពិបាក។ (សូមអាន អេសាយ ៥០:៤; ហេប្រឺ ៥:៨; ១២:២) ហេតុអ្វីកិច្ចបម្រើពេញពេលអាចនាំឲ្យអ្នកសប្បាយរីករាយ? សូមយើងពិចារណាអំពីចំណុចនេះ។
មូលហេតុដែលការបង្រៀនមនុស្សឲ្យក្លាយទៅជាអ្នកកាន់តាមលោកយេស៊ូគឺជាកិច្ចការដ៏ល្អបំផុត
៧. ហេតុអ្វីមនុស្សវ័យក្មេងជាច្រើននាក់ចូលចិត្ដជួយអ្នកឯទៀតឲ្យក្លាយទៅជាអ្នកកាន់តាមលោកយេស៊ូ?
៧ លោកយេស៊ូបានប្រាប់យើងឲ្យ‹ទៅបង្រៀនមនុស្សឲ្យក្លាយទៅជាអ្នកកាន់តាមលោក›។ (ម៉ាថាយ ២៨:១៩, ២០) បើអ្នកមានគម្រោងចាត់ទុកកិច្ចការនេះជាអាជីពរបស់អ្នក អ្នកនឹងមានជីវិតដ៏គាប់ចិត្ដ ហើយដែលលើកតម្កើងព្រះ។ ដូចអាជីពផ្សេងៗ អ្នកត្រូវការពេលដើម្បីមានជំនាញ។ ធីម៉ូថេដែលជាបងប្រុសម្នាក់ដែលបានចាប់ផ្ដើមធ្វើជាអ្នកត្រួសត្រាយនៅពេលដែលគាត់មានវ័យជំទង់ បាននិយាយថា៖ «ខ្ញុំចូលចិត្ដបម្រើព្រះយេហូវ៉ាពេញពេលដោយសារនេះជារបៀបដែលខ្ញុំបង្ហាញសេចក្ដីស្រឡាញ់របស់ខ្ញុំចំពោះលោក។ នៅដំបូង ខ្ញុំមិនបានជួបអ្នកណាដែលចង់រៀនគម្ពីរទេ ប៉ុន្ដែក្រោយមកខ្ញុំបានរើទៅតំបន់ផ្សាយផ្សេង ហើយក្នុងខែដំបូងនៅទីនោះខ្ញុំបានចាប់ផ្ដើមបង្រៀនគម្ពីរដល់មនុស្សមួយចំនួន។ សិស្សគម្ពីរម្នាក់បានចាប់ផ្ដើមចូលរួមកិច្ចប្រជុំ។ ក្រោយពីខ្ញុំបានចូលសាលាបង្ហាត់បង្រៀនបងប្អូនប្រុសនៅលីវខាងគម្ពីរអស់ពីរខែ ខ្ញុំបានទទួលភារកិច្ចថ្មី ហើយនៅកន្លែងថ្មីនោះខ្ញុំបានចាប់ផ្ដើមបង្រៀនគម្ពីរដល់មនុស្សបួននាក់។ ខ្ញុំពិតជាចូលចិត្ដបង្រៀនមនុស្សដោយសារខ្ញុំអាចឃើញថាសកម្មពលបរិសុទ្ធកំពុងកែប្រែពួកគេ» * (សូមមើលកំណត់សម្គាល់)។—ថែស្សាឡូនិចទី១ ២:១៩
៨. តើប្អូនៗវ័យក្មេងខ្លះបានធ្វើអ្វីដើម្បីផ្សព្វផ្សាយដល់មនុស្សកាន់តែច្រើន?
៨ មនុស្សវ័យក្មេងខ្លះបានរៀនភាសាមួយទៀត។ ជាឧទាហរណ៍ បងប្រុសចេកុបដែលមកពីសហរដ្ឋអាម៉េរិកសរសេរថា៖ «ពេលខ្ញុំមានអាយុ៧ឆ្នាំ សិស្សរួមថ្នាក់របស់ខ្ញុំជាច្រើននាក់គឺជាជនជាតិវៀតណាម។ ខ្ញុំចង់ប្រាប់ពួកគេអំពីព្រះយេហូវ៉ា ដូច្នេះក្រោយមក ខ្ញុំចាប់ផ្ដើមរៀនភាសារបស់ពួកគេ។ ពាក្យភាគច្រើនដែលខ្ញុំបានរៀនជាភាសាវៀតណាមគឺដោយប្រៀបធៀបទស្សនាវដ្ដីប៉មយាមជាភាសាអង់គ្លេស ជាមួយនឹងទស្សនាវដ្ដីប៉មយាមជាភាសាវៀតណាម។ ខ្ញុំក៏បានទៅជាមិត្ដភក្ដិរបស់បងប្អូននៅក្រុមជំនុំភាសាវៀតណាមដែលនៅជិតផ្ទះខ្ញុំដែរ។ ពេលខ្ញុំមានអាយុ១៨ឆ្នាំ ខ្ញុំចាប់ផ្ដើមធ្វើជាអ្នកត្រួសត្រាយ។ ក្រោយមក ខ្ញុំបានចូលសាលាបង្ហាត់បង្រៀនបងប្អូនប្រុសនៅលីវខាងគម្ពីរ។ សាលានោះជួយខ្ញុំនៅសព្វថ្ងៃនេះក្នុងភារកិច្ចជាអ្នកត្រួសត្រាយ ហើយជាអ្នកចាស់ទុំតែម្នាក់របស់ក្រុមភាសាវៀតណាម។ ជនជាតិវៀតណាមជាច្រើននាក់ភ្ញាក់ផ្អើលដែលខ្ញុំបានរៀនភាសារបស់ពួកគេ។ ពួកគេអញ្ជើញខ្ញុំឲ្យចូលក្នុងផ្ទះរបស់ពួកគេ ហើយខ្ញុំច្រើនតែអាចចាប់ផ្ដើមសិក្សាគម្ពីរជាមួយនឹងពួកគេ។ អ្នកខ្លះបានរីកចម្រើនរហូតដល់ពួកគេបានទទួលការជ្រមុជទឹក»។—សូមពិនិត្យបន្ថែម សកម្មភាព ២:៧, ៨
៩. តើកិច្ចការបង្រៀនមនុស្សឲ្យក្លាយទៅជាអ្នកកាន់តាមលោកយេស៊ូបង្រៀនយើងអ្វី?
៩ កិច្ចការបង្រៀនមនុស្សឲ្យក្លាយទៅជាអ្នកកាន់តាមលោកយេស៊ូបង្រៀនយើងឲ្យមានទម្លាប់ល្អស្ដីអំពីការខំប្រឹងធ្វើការ របៀបប្រាស្រ័យទាក់ទងគ្នាយ៉ាងល្អ ហើយរបៀបមានទំនុកចិត្ដនិងមិនធ្វើឲ្យអ្នកឯទៀតអន់ចិត្ដ។ (សុភាសិត ២១:៥; ធីម៉ូថេទី២ ២:២៤) តែកិច្ចការនេះនាំឲ្យមានអំណរយ៉ាងខ្លាំងដោយសារយើងរៀនអំពីរបៀបប្រាប់អ្នកឯទៀតអំពីជំនឿរបស់យើងដោយផ្អែកទៅលើបទគម្ពីរ។ យើងក៏រៀនអំពីរបៀបរួមធ្វើការយ៉ាងជិតស្និទ្ធជាមួយនឹងព្រះយេហូវ៉ា។—កូរិនថូសទី១ ៣:៩
១០. សូម្បីតែមានមនុស្សតិចក្នុងតំបន់ផ្សាយរបស់អ្នកដែលចង់រៀនគម្ពីរក្ដី ហេតុអ្វីអ្នកអាចមានអំណរក្នុងកិច្ចការជួយមនុស្សឲ្យក្លាយទៅជាអ្នកកាន់តាមលោកយេស៊ូ?
១០ អ្នកអាចមានអំណរក្នុងការជួយមនុស្សឲ្យក្លាយទៅជាអ្នកកាន់តាមលោកយេស៊ូ សូម្បីតែមានមនុស្សតិចក្នុងតំបន់ផ្សាយរបស់អ្នកដែលចង់រៀនគម្ពីរក្ដី។ ក្រុមជំនុំទាំងមូលសហការគ្នាដើម្បីជួយមនុស្សឲ្យក្លាយទៅជាអ្នកកាន់តាមលោក។ ទោះជាមានតែបងប្អូនណាម្នាក់ដែលបានរកឃើញបុគ្គលដែលក្លាយទៅជាអ្នកកាន់តាមលោកក៏ដោយ យើងទាំងអស់គ្នាសប្បាយចិត្ដដោយសារយើងទាំងអស់គ្នាបានចូលរួមក្នុងការស្វែងរកមនុស្សបែបនោះ។ ជាឧទាហរណ៍ បងប្រុសប្រេនឌិនដែលបានធ្វើជាអ្នកត្រួសត្រាយអស់៩ឆ្នាំនៅតំបន់មួយដែលមិនសូវមានអ្នកសិក្សាគម្ពីរ និយាយថា៖ «ខ្ញុំចូលចិត្ដផ្សព្វផ្សាយដំណឹងល្អដោយសារនេះជាកិច្ចការដែលព្រះយេហូវ៉ាសុំឲ្យយើងធ្វើ។ ខ្ញុំបានចាប់ផ្ដើមត្រួសត្រាយមិនយូរក្រោយពីខ្ញុំបានរៀនចប់វិទ្យាល័យ។ ខ្ញុំចូលចិត្ដលើកទឹកចិត្ដបងប្អូនប្រុសវ័យក្មេងក្នុងក្រុមជំនុំយើង ហើយឃើញពួកគេរីកចម្រើនក្នុងសេចក្ដីពិត។ ក្រោយខ្ញុំបានចូលសាលាបង្ហាត់បង្រៀនបងប្អូនប្រុសនៅលីវខាងគម្ពីរ ខ្ញុំបានទទួលភារកិច្ចជាអ្នកត្រួសត្រាយនៅកន្លែងថ្មី។ គឺជាការពិតដែលខ្ញុំមិនដែលរកបានអ្នកណាម្នាក់ក្នុងតំបន់ផ្សាយដែលរីកចម្រើនរហូតដល់បានទទួលការជ្រមុជទឹកទេ ប៉ុន្ដែបងប្អូនឯទៀតរកបានមនុស្សបែបនោះ។ ខ្ញុំសប្បាយចិត្ដដែលខ្ញុំបានរៀបគម្រោងដើម្បីចូលរួមឲ្យបានពេញលេញក្នុងកិច្ចការជួយមនុស្សឲ្យក្លាយទៅជាអ្នកកាន់តាមលោកយេស៊ូ»។—សាស្តា ១១:៦
គម្រោងរបស់អ្នកអាចបើកឱកាសឲ្យទទួលភារកិច្ចថែមទៀត
១១. តើប្អូនៗវ័យក្មេងជាច្រើនបានចូលរួមក្នុងកិច្ចបម្រើអ្វីទៀត?
១១ មានឱកាសជាច្រើនដើម្បីបម្រើព្រះយេហូវ៉ា។ ជាឧទាហរណ៍ ប្អូនៗវ័យក្មេងជាច្រើនជួយក្នុងកិច្ចការសាងសង់។ យើងត្រូវការសាលប្រជុំថ្មីរាប់រយទៀត។ សាលប្រជុំទាំងនេះលើកតម្កើងព្រះយេហូវ៉ា ដូច្នេះការជួយសង់កន្លែងទាំងនេះអាចធ្វើឲ្យអ្នកមានចិត្ដសប្បាយ។ អ្នកក៏អាចមានអំណរដែលមកពីការរួមកិច្ចការជាមួយនឹងបងប្អូនរបស់អ្នក។ ម្យ៉ាងទៀត អ្នកអាចរៀនអ្វីៗជាច្រើន ដូចជារបៀបបំពេញកិច្ចការយ៉ាងល្អនិងតាមរបៀបដែលមានសុវត្ថិភាព ហើយរបៀបសហការជាមួយនឹងអ្នកត្រួតពិនិត្យ។
ពួកអ្នកដែលចូលរួមក្នុងកិច្ចបម្រើពេញពេលនឹងទទួលពរជាច្រើន (សូមមើលវគ្គ១១-១៣)
១២. តើការបម្រើជាអ្នកត្រួសត្រាយអាចបើកឱកាសអ្វីទៀត?
១២ បងប្រុសខេវិននិយាយថា៖ «តាំងពីខ្ញុំនៅតូច ខ្ញុំចង់បម្រើព្រះយេហូវ៉ាពេញពេលនៅថ្ងៃណាមួយ។ នៅទីបំផុតពេលខ្ញុំមានអាយុ១៩ឆ្នាំ ខ្ញុំបានចាប់ផ្ដើមធ្វើជាអ្នកត្រួសត្រាយ។ ខ្ញុំបានចិញ្ចឹមជីវិតដោយធ្វើការមិនពេញពេលឲ្យបងប្រុសម្នាក់ដែលជាអ្នកសាងសង់។ ខ្ញុំបានរៀនឲ្យចេះធ្វើដំបូល ហើយដាក់បង្អួចនិងទ្វារ។ ក្រោយមក ខ្ញុំបានចំណាយពេលអស់ពីរឆ្នាំជាមួយនឹងក្រុមផ្ដល់ជំនួយដល់បងប្អូនដែលរងគ្រោះដោយខ្យល់ព្យុះ ដើម្បីជួយសាងសង់ផ្ទះនិងសាលប្រជុំរបស់ពួកគេ។ ពេលខ្ញុំបានឮថាប្រទេសអាហ្វ្រិកខាងត្បូងមានសេចក្ដីត្រូវការខាងការសាងសង់ ខ្ញុំបានដាក់ពាក្យសុំ ហើយបានទទួលសេចក្ដីអញ្ជើញឲ្យចូលរួមក្នុងកិច្ចការនោះ។ នៅទ្វីបអាហ្វ្រិកនេះ ខ្ញុំរើពីកន្លែងសាងសង់សាលប្រជុំមួយទៅកន្លែងសាងសង់សាលប្រជុំមួយទៀតជារៀងរាល់ប៉ុន្មានសប្ដាហ៍។ ក្រុមសាងសង់របស់ខ្ញុំគឺដូចជាក្រុមគ្រួសារមួយ។ យើងរស់នៅជាមួយគ្នា សិក្សាគម្ពីរជាមួយគ្នា និងធ្វើការជាមួយគ្នា។ ខ្ញុំក៏ចូលចិត្ដផ្សព្វផ្សាយជាមួយនឹងបងប្អូននៅតំបន់នោះជារៀងរាល់សប្ដាហ៍ដែរ។ គម្រោងដែលខ្ញុំបានធ្វើពេលខ្ញុំនៅក្មេង បាននាំឲ្យខ្ញុំមានជីវិតសប្បាយតាមរបៀបផ្សេងៗដែលខ្ញុំនឹកស្មានមិនដល់»។
«គម្រោងដែលខ្ញុំបានធ្វើពេលខ្ញុំនៅក្មេង បាននាំឲ្យខ្ញុំមានជីវិតសប្បាយតាមរបៀបផ្សេងៗដែលខ្ញុំនឹកស្មានមិនដល់»
១៣. ហេតុអ្វីប្អូនៗវ័យក្មេងជាច្រើនសប្បាយបម្រើព្រះយេហូវ៉ានៅបេតអែល?
១៣ អ្នកខ្លះដែលធ្លាប់ត្រួសត្រាយ ឥឡូវកំពុងបម្រើនៅបេតអែល។ កិច្ចបម្រើនៅបេតអែលគឺជារបៀបរស់នៅដ៏សប្បាយដោយសារអ្វីៗទាំងអស់ដែលបានត្រូវធ្វើនៅទីនោះគឺដើម្បីព្រះយេហូវ៉ា។ ក្រុមគ្រួសារបេតអែលជួយក្នុងការផ្ដល់គម្ពីរនិងសៀវភៅផ្សេងៗដើម្បីឲ្យមនុស្សអាចរៀនសេចក្ដីពិត។ បងប្រុសដឺស្ទីនដែលជាសមាជិកបេតអែលនិយាយថា៖ «ពេលខ្ញុំមានអាយុ៩ឆ្នាំ ខ្ញុំមានគោលដៅចូលរួមក្នុងកិច្ចបម្រើពេញពេល ហើយខ្ញុំបានចាប់ផ្ដើមធ្វើជាអ្នកត្រួសត្រាយពេលខ្ញុំបានរៀនចប់វិទ្យាល័យ។ មួយឆ្នាំកន្លះក្រោយមក ខ្ញុំបានត្រូវអញ្ជើញឲ្យចូលបម្រើនៅបេតអែល។ នៅទីនោះខ្ញុំបានរៀនឲ្យចេះប្រើម៉ាស៊ីនបោះពុម្ព ហើយក្រោយមករៀនឲ្យចេះសរសេរកម្មវិធីកុំព្យូទ័រ។ នៅបេតអែល ខ្ញុំចូលចិត្ដឮដោយផ្ទាល់អំពីការរីកចម្រើនក្នុងកិច្ចការជួយមនុស្សនៅទូទាំងពិភពលោកឲ្យក្លាយទៅជាអ្នកកាន់តាមលោក។ ខ្ញុំពិតជាចូលចិត្ដការបម្រើនៅបេតអែលដោយសារអ្វីដែលយើងធ្វើនៅទីនេះ ជួយមនុស្សឲ្យកាន់តែចូលទៅជិតព្រះយេហូវ៉ា»។
តើអ្នកនឹងមានគម្រោងអ្វីសម្រាប់ពេលអនាគត?
១៤. តើអ្នកអាចធ្វើអ្វីនៅឥឡូវនេះដើម្បីត្រៀមខ្លួនសម្រាប់កិច្ចបម្រើពេញពេល?
១៤ តើអ្នកអាចត្រៀមខ្លួនយ៉ាងដូចម្ដេចសម្រាប់កិច្ចបម្រើពេញពេល? ដើម្បីបម្រើព្រះយេហូវ៉ាឲ្យបានល្អបំផុត អ្នកត្រូវបណ្ដុះឲ្យមានគុណសម្បត្ដិជាគ្រិស្ដសាសនិក។ ចូរសិក្សាបណ្ដាំរបស់ព្រះជាទៀងទាត់ រំពឹងគិតយ៉ាងជ្រាលជ្រៅអំពីបណ្ដាំរបស់លោក ហើយព្យាយាមបង្ហាញជំនឿរបស់អ្នកនៅកិច្ចប្រជុំក្នុងក្រុមជំនុំ។ ពេលដែលអ្នកនៅរៀន អ្នកអាចបង្កើនសមត្ថភាពរបស់អ្នកក្នុងការនិយាយជាមួយនឹងអ្នកឯទៀតអំពីដំណឹងល្អ។ សូមរៀនឲ្យចេះបង្ហាញការយកចិត្ដទុកដាក់ចំពោះមនុស្សដោយសួរអំពីទស្សនៈរបស់ពួកគេតាមរបៀបដែលមិនធ្វើឲ្យពួកគេទើសចិត្ដ ហើយដោយស្តាប់ចម្លើយរបស់ពួកគេ។ ម្យ៉ាងទៀត អ្នកក៏អាចជួយធ្វើអ្វីផ្សេងៗក្នុងក្រុមជំនុំដូចជាសម្អាតនិងជួសជុលសាលប្រជុំ។ ព្រះយេហូវ៉ាពេញចិត្ដប្រើអ្នកដែលមានចិត្ដរាបទាបនិងដែលធ្វើកិច្ចការដោយស្ម័គ្រពីចិត្ដ។ (សូមអាន ទំនុកតម្កើង ១១០:៣; សកម្មភាព ៦:១-៣) សាវ័កប៉ូលបានអញ្ជើញធីម៉ូថេឲ្យធ្វើជាសាសនទូតដោយសារ‹បងប្អូនតែងនិយាយល្អអំពីធីម៉ូថេ›។—សកម្មភាព ១៦:១-៥
ពេលដែលអ្នកនៅរៀន អ្នកអាចបង្កើនសមត្ថភាពរបស់អ្នកក្នុងការនិយាយជាមួយនឹងអ្នកឯទៀតអំពីដំណឹងល្អ
១៥. ដើម្បីមានការងារដែលនឹងជួយអ្នកឲ្យត្រួសត្រាយ តើអ្នកអាចធ្វើអ្វី?
១៥ អ្នកបម្រើពេញពេលភាគច្រើនត្រូវធ្វើការដើម្បីចិញ្ចឹមជីវិត។ (សកម្មភាព ១៨:២, ៣) ប្រហែលជាអ្នកអាចរៀនមុខជំនាញវិជ្ជាជីវៈណាមួយដែលនឹងជួយអ្នកឲ្យមានសមត្ថភាពរកការងារមិនពេញពេលនៅក្នុងតំបន់របស់អ្នក។ សូមនិយាយជាមួយនឹងអ្នកត្រួតពិនិត្យប្រចាំមណ្ឌលនិងអ្នកត្រួសត្រាយឯទៀតអំពីគោលដៅរបស់អ្នក ហើយសុំយោបល់ពីពួកគាត់។ ម្យ៉ាងទៀត ដូចគម្ពីរចែង សូម«ទុកដាក់អស់ទាំងការឯងនៅនឹងព្រះយេហូវ៉ាចុះ នោះអស់ទាំងគំនិត[ឬ«គំរោង»]របស់ឯងនឹងបានសំរេច»។—សុភាសិត ១៦:៣; ខ.ស.; ២០:១៨
១៦. តើកិច្ចបម្រើពេញពេលអាចជួយយើងត្រៀមខ្លួនយ៉ាងដូចម្ដេចសម្រាប់ភារកិច្ចផ្សេងទៀតនៅពេលអនាគត?
១៦ អ្នកអាចប្រាកដថាព្រះយេហូវ៉ាចង់ឲ្យអ្នក«ចាប់យ៉ាងជាប់»នូវអនាគតដ៏សប្បាយរីករាយ។ (សូមអាន ធីម៉ូថេទី១ ៦:១៨, ១៩) កិច្ចបម្រើពេញពេលបើកឱកាសឲ្យយើងសេពគប់ជាមួយនឹងអ្នកត្រួសត្រាយពេញពេលឯទៀត ហើយជួយយើងឲ្យទៅជាគ្រិស្ដសាសនិកដែលមានភាពចាស់ទុំ។ ម្យ៉ាងទៀត បងប្អូនជាច្រើនបានឃើញថាការចូលរួមក្នុងកិច្ចបម្រើពេញពេលកាលដែលពួកគេនៅវ័យក្មេងបានជួយពួកគេក្រោយមក ពេលដែលពួកគេបានរៀបការ។ ពួកអ្នកដែលបានត្រួសត្រាយមុនពួកគេបានរៀបការ ច្រើនតែបន្ដត្រួសត្រាយជាគូប្ដីប្រពន្ធ។—រ៉ូម ១៦:៣, ៤
១៧, ១៨. តើការរៀបគម្រោងសម្រាប់ពេលអនាគតជាប់ទាក់ទងយ៉ាងណានឹងចិត្ដរបស់អ្នក?
១៧ ទំនុកតម្កើង ២០:៤ចែងអំពីព្រះយេហូវ៉ាថា៖ «សូមឲ្យព្រះបានប្រោសដល់ទ្រង់តាមបំណងព្រះទ័យ ហើយធ្វើសំរេចតាមគ្រប់ទាំងគំនិត[ឬ«គំរោង»]របស់ព្រះករុណា»។ (ទំនុកតម្កើង ២០:៥; ខ.ស.) កាលដែលអ្នករៀបគម្រោងសម្រាប់ពេលអនាគត សូមគិតអំពីអ្វីដែលអ្នកពិតជាចង់ធ្វើក្នុងជីវិតរបស់អ្នក។ សូមគិតអំពីអ្វីៗដែលព្រះយេហូវ៉ាកំពុងធ្វើនៅសម័យយើង ហើយអំពីអ្វីដែលអ្នកអាចធ្វើដើម្បីចូលរួមក្នុងកិច្ចការរបស់លោក។ បន្ទាប់មក សូមរៀបគម្រោងដើម្បីធ្វើអ្វីដែលនាំឲ្យលោកពេញចិត្ដ។
១៨ ពេលដែលអ្នកប្រើជីវិតរបស់អ្នកដើម្បីបម្រើព្រះយេហូវ៉ាយ៉ាងពេញលេញនិងដើម្បីធ្វើឲ្យលោកទទួលកិត្ដិយស នោះអ្នកនឹងមានចិត្ដសប្បាយរីករាយ។ អ្នកនឹង«យកព្រះយេហូវ៉ាជាសេចក្ដីអំណររបស់អ្នក នោះទ្រង់នឹងប្រទានឲ្យអ្នកបានដូចបំណងចិត្ដ»។—ទំនុកតម្កើង ៣៧:៤
^ វគ្គ 7 សាលានេះបានត្រូវជំនួសដោយសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។
លោកអ្នកក៏ប្រហែលជាចូលចិត្តដែរ
ទស្សនៈពីមនុស្សស្រករប្អូន
ខេមរិនបានរកឃើញជីវិតដ៏មានន័យខ្លឹមសារបំផុត
តើប្អូនចង់មានជីវិតដែលមានន័យខ្លឹមសារឬទេ? សូមស្ដាប់ប្អូនស្រីខេមរិនរៀបរាប់នូវរបៀបដែលនាងបានរកឃើញជីវិតដ៏គាប់ចិត្តនៅកន្លែងដែលនាងមិននឹកស្មាន។
