របៀបធ្វើឲ្យការសិក្សាគម្ពីរផ្ទាល់ខ្លួនកាន់តែសប្បាយរីករាយនិងមានប្រសិទ្ធភាព
យ៉ូស្វេមានភារកិច្ចដឹកនាំប្រជាជាតិអ៊ីស្រាអែលចូលក្នុងស្រុកសន្យា។ នេះជាអ្វីដែលពិបាកណាស់។ ទោះជាយ៉ាងនោះក៏ដោយ ព្រះយេហូវ៉ាបានពង្រឹងកម្លាំងនិងលើកទឹកចិត្ដគាត់ដោយមានប្រសាសន៍ថា៖ «[ចូរ]មានកំឡាំងនឹងចិត្ដក្លាហាន»។ លោកបានប្រាប់យ៉ូស្វេថា បើគាត់អាននិងធ្វើតាមច្បាប់របស់លោកគ្រប់ជំពូក នោះគាត់អាចធ្វើការសម្រេចចិត្ដដ៏ឈ្លាសវៃ ហើយនឹងទទួលជោគជ័យ។—យ៉ូស្វេ ១:៧, ៨
យើងរស់នៅគ្រាដែល«លំបាកណាស់» ដូច្នេះយើងក៏អាចមានជីវិតពិបាកដែរ។ (ធីម៉ូថេទី២ ៣:១) បើយើងចង់ទទួលជោគជ័យដូចយ៉ូស្វេ យើងត្រូវធ្វើតាមយោបល់ដែលព្រះយេហូវ៉ាបានប្រាប់គាត់។ យើងត្រូវអានគម្ពីរជាទៀងទាត់និងប្រើអ្វីដែលយើងរៀនដើម្បីធ្វើការសម្រេចចិត្ដល្អ។
ប៉ុន្ដែ ប្រហែលជាយើងមិនដឹងអំពីរបៀបសិក្សា ឬយើងប្រហែលជាមិនចូលចិត្ដសិក្សា។ តែការសិក្សាគម្ពីរផ្ទាល់ខ្លួនជាអ្វីដែលសំខាន់ណាស់។ កាលដែលអ្នកមើលប្រអប់ដែលមានចំណងជើងថា « សូមសាកល្បងធ្វើតាមយោបល់ទាំងនេះ» អ្នកនឹងឃើញចំណុចដែលនឹងជួយអ្នកឲ្យទទួលប្រយោជន៍ពីការសិក្សាផ្ទាល់ខ្លួន ហើយដែលនឹងជួយអ្នកឲ្យកាន់តែចូលចិត្ដការសិក្សានោះ។
អ្នកតែងទំនុកតម្កើងបានច្រៀងថា៖ «សូមបណ្ដាលឲ្យទូលបង្គំដើរទៅតាមផ្លូវច្រកនៃសេចក្ដីបង្គាប់របស់ទ្រង់ ដ្បិតទូលបង្គំមានសេចក្ដីរីករាយក្នុងផ្លូវនោះ»។ (ទំនុកតម្កើង ១១៩:៣៥) ដូចគាត់ អ្នកក៏អាចចូលចិត្ដសិក្សាបណ្ដាំរបស់ព្រះដែរ។ អ្នកនឹងរកឃើញព័ត៌មានល្អៗជាច្រើនកាលដែលអ្នកបន្ដសិក្សាគម្ពីរ។
ទោះជាអ្នកមិនមានភារកិច្ចដឹកនាំប្រជាជាតិមួយដូចយ៉ូស្វេក្ដី អ្នកច្បាស់ជាមានការពិបាកផ្ទាល់ខ្លួន។ ដូច្នេះ ដូចយ៉ូស្វេ ចូរសិក្សានិងធ្វើតាមអ្វីដែលបណ្ដាំរបស់ព្រះចែង។ បើអ្នកធ្វើដូច្នេះ អ្នកអាចធ្វើការសម្រេចចិត្ដដ៏ឈ្លាសវៃ ហើយនឹងទទួលជោគជ័យ។
