ចូរបង្រៀនសេចក្ដីពិត
«ឱព្រះយេហូវ៉ាអើយ . . . បូករួមអស់ទាំងព្រះបន្ទូលនៃទ្រង់ទៅឃើញថាពិតត្រង់ទាំងអស់»។—ទំនុកតម្កើង ១១៩:១៥៩, ១៦០
១, ២. (ក) តើអ្វីជាកិច្ចការដ៏សំខាន់បំផុតក្នុងជីវិតរបស់លោកយេស៊ូ ហើយហេតុអ្វី? (ខ) តើយើងត្រូវធ្វើអ្វីដើម្បីទទួលជោគជ័យក្នុងនាមជា«អ្នករួមការងារជាមួយនឹងព្រះ»?
ពេលលោកយេស៊ូគ្រិស្ដនៅផែនដីលោកជាជាងឈើ ហើយក្រោយមកបានទៅជាលោកគ្រូឬជាអ្នកបម្រើផ្សាយ។ (ម៉ាកុស ៦:៣; យ៉ូហាន ១៣:១៣) លោកបានធ្វើអ្វីទាំងពីរនេះយ៉ាងល្អឥតខ្ចោះ។ ក្នុងនាមជាជាងឈើ លោកបានរៀនអំពីរបៀបប្រើឧបករណ៍របស់លោកដើម្បីផលិតគ្រឿងឈើដែលមានប្រយោជន៍។ ម្យ៉ាងទៀត ក្នុងនាមជាអ្នកបម្រើផ្សាយ លោកបានប្រើចំណេះដ៏ជ្រាលជ្រៅដែលលោកមានអំពីបទគម្ពីរ ដើម្បីជួយមនុស្សឲ្យយល់សេចក្ដីពិតពីបណ្ដាំរបស់ព្រះ។ (ម៉ាថាយ ៧:២៨; លូកា ២៤:៣២, ៤៥) ពេលលោកយេស៊ូមានអាយុ៣០ឆ្នាំ លោកបានឈប់ធ្វើជាជាងឈើ ហើយបានទៅជាអ្នកបម្រើផ្សាយម្នាក់ ដោយសារលោកបានដឹងថាកិច្ចការនោះគឺជាកិច្ចការដ៏សំខាន់បំផុតដែលលោកអាចធ្វើ។ លោកបានមានប្រសាសន៍ថាការផ្សព្វផ្សាយដំណឹងល្អអំពីរាជាណាចក្ររបស់ព្រះគឺជាមូលហេតុមួយដែលព្រះបានចាត់លោកឲ្យមកផែនដី។ (ម៉ាថាយ ២០:២៨; លូកា ៣:២៣; ៤:៤៣) លោកយេស៊ូបានផ្ដោតអារម្មណ៍ទៅលើកិច្ចការផ្សព្វផ្សាយដំណឹងល្អ ហើយលោកចង់ឲ្យអ្នកឯទៀតធ្វើដូច្នេះដែរ។—ម៉ាថាយ ៩:៣៥-៣៨
២ យើងភាគច្រើនមិនមែនជាជាងឈើទេ ប៉ុន្ដែយើងទាំងអស់គ្នាជាអ្នកបម្រើដែលបង្រៀនអ្នកឯទៀតអំពីដំណឹងល្អ។ កិច្ចការនេះគឺសំខាន់ណាស់ ហេតុនេះហើយបានជាព្រះក៏ចូលរួមធ្វើកិច្ចការនេះដែរ។ តាមពិត យើងបានត្រូវហៅថា«អ្នករួមការងារជាមួយនឹងព្រះ»។ (កូរិនថូសទី១ ៣:៩; កូរិនថូសទី២ ៦:៤) យើងយល់ស្របនឹងអ្វីដែលអ្នកតែងទំនុកតម្កើងបាននិយាយ ពេលដែលគាត់សរសេរថា៖ «បូករួមអស់ទាំងព្រះបន្ទូលនៃទ្រង់ទៅឃើញថា ពិតត្រង់ទាំងអស់»។ (ទំនុកតម្កើង ១១៩:១៥៩, ១៦០) បណ្ដាំរបស់ព្រះយេហូវ៉ាគឺជាសេចក្ដីពិត។ ហេតុនេះក្នុងកិច្ចបម្រើផ្សាយរបស់យើង យើងចង់ធ្វើឲ្យប្រាកដថាយើង«បង្រៀននិងពន្យល់បណ្ដាំនៃសេចក្ដីពិតយ៉ាងត្រឹមត្រូវ»។ (សូមអាន ធីម៉ូថេទី២ ២:១៥) ដូច្នេះ យើងបន្ដព្យាយាមប្រើគម្ពីរឲ្យកាន់តែប៉ិនប្រសប់ជាង ដោយសារនេះជាឧបករណ៍ដ៏សំខាន់ចម្បងរបស់យើងដើម្បីបង្រៀនអ្នកឯទៀតអំពីព្រះយេហូវ៉ា លោកយេស៊ូ និងរាជាណាចក្រព្រះ។ ដើម្បីជួយយើងឲ្យទទួលជោគជ័យក្នុងកិច្ចបម្រើផ្សាយ អង្គការរបស់ព្រះយេហូវ៉ាបានផ្ដល់ឲ្យយើងនូវឧបករណ៍ផ្សេងទៀត ហើយយើងក៏ត្រូវដឹងអំពីរបៀបប្រើឧបករណ៍ទាំងនោះដែរ។ ឧបករណ៍ទាំងនោះបានត្រូវហៅថាឧបករណ៍ដើម្បីបង្រៀនគម្ពីរ។
៣. តើយើងគួរផ្ដោតអារម្មណ៍ទៅលើអ្វីក្នុងកិច្ចបម្រើផ្សាយរបស់យើង ហើយតើសកម្មភាព ១៣:៤៨ជួយយើងឲ្យធ្វើដូច្នេះយ៉ាងដូចម្ដេច?
៣ អ្នកប្រហែលជាឆ្ងល់ថាហេតុអ្វីយើងហៅថាឧបករណ៍ដើម្បីបង្រៀនគម្ពីរ មិនមែនហៅថាឧបករណ៍ដើម្បីផ្សព្វផ្សាយ។ នេះគឺដោយសារ«ការផ្សព្វផ្សាយ»មានន័យថាការប្រកាសផ្សាយដំណឹងណាមួយ ប៉ុន្ដែ«ការបង្រៀន»មានន័យថាការពន្យល់អំពីដំណឹងនោះដើម្បីឲ្យបុគ្គលណាម្នាក់យល់នូវអ្វីដែលគាត់បានឮ ហើយជំរុញចិត្ដគាត់ឲ្យធ្វើតាមអ្វីដែលគាត់បានរៀន។ ក្នុងអំឡុងពេលដ៏ខ្លីដែលនៅសល់សម្រាប់របៀបរបបពិភពលោកនេះ យើងត្រូវផ្ដោតអារម្មណ៍ទៅលើការចាប់ផ្ដើមការសិក្សាគម្ពីរ និងការបង្រៀនមនុស្សអំពីសេចក្ដីពិត ដើម្បីពួកគេអាចទៅជាអ្នកកាន់តាមគ្រិស្ដ។ នេះមានន័យថាយើងគួរមានចិត្ដខ្នះខ្នែងក្នុងការស្វែងរកអស់អ្នកដែល«មានចិត្ដគំនិតត្រឹមត្រូវឲ្យបានជីវិតដែលគ្មានទីបញ្ចប់» ហើយជួយពួកគេឲ្យចាប់ផ្ដើមបម្រើព្រះយេហូវ៉ា។—សូមអាន សកម្មភាព ១៣:៤៤-៤៨
៤. តើយើងអាចស្វែងរកពួកអ្នកដែល«មានចិត្ដគំនិតត្រឹមត្រូវឲ្យបានជីវិតដែលគ្មានទីបញ្ចប់»តាមរបៀបណា?
៤ តើយើងអាចស្វែងរកអស់អ្នកដែល«មានចិត្ដគំនិតត្រឹមត្រូវឲ្យបានជីវិតដែលគ្មានទីបញ្ចប់»តាមរបៀបណា? ចំពោះគ្រិស្ដសាសនិកនៅសម័យដើម វិធីមួយគត់ដើម្បីស្វែងរកមនុស្សដែលមានចិត្ដគំនិតបែបនោះគឺដោយផ្សព្វផ្សាយ។ លោកយេស៊ូបានប្រាប់អ្នកកាន់តាមលោកថា៖ «ពេលដែលអ្នករាល់គ្នាចូលក្នុងក្រុងឬភូមិណាមួយ ចូរស្វែងរកអ្នកណាដែលសមនឹងទទួលអ្នកជាភ្ញៀវ»។ (ម៉ាថាយ ១០:១១) នៅសព្វថ្ងៃនេះ យើងក៏ត្រូវធ្វើដូចគ្នាដែរ។ បើមនុស្សមិនមានចិត្ដស្មោះ មានអំណួត ឬមិនសូវយកចិត្ដទុកដាក់អំពីព្រះ យើងមិនរំពឹងថាពួកគេនឹងស្តាប់ដំណឹងល្អទេ។ យើងកំពុងស្វែងរកមនុស្សដែលមានចិត្ដស្មោះ មានចិត្ដរាបទាប និងដែលពិតជាចង់ស្គាល់សេចក្ដីពិត។ យើងអាចប្រៀបប្រដូចការស្វែងរកមនុស្សទៅនឹងអ្វីដែលលោកយេស៊ូបានធ្វើនៅពេលដែលលោកជាជាងឈើ។ មុនលោកអាចធ្វើទ្វារ នឹម គ្រឿងសង្ហារិមណាមួយ ឬអ្វីផ្សេងទៀត លោកត្រូវស្វែងរកឈើដែលសមត្រឹមត្រូវជាមុនសិន។ បន្ទាប់មក លោកយកឧបករណ៍ផ្ទាល់ខ្លួន ប្រើជំនាញរបស់លោក ហើយចាប់ផ្ដើមធ្វើរបស់របរផ្សេងៗ។ ស្រដៀងគ្នាដែរ នៅសព្វថ្ងៃនេះ ដំបូងយើងត្រូវស្វែងរកមនុស្សដែលមានចិត្ដស្មោះ ហើយក្រោយមកយើងប្រើឧបករណ៍និងជំនាញរបស់យើង ដើម្បីជួយពួកគេឲ្យក្លាយទៅជាអ្នកកាន់តាមលោកយេស៊ូ។—ម៉ាថាយ ២៨:១៩, ២០
៥. តើយើងត្រូវដឹងអ្វីអំពីឧបករណ៍នីមួយៗដើម្បីបង្រៀនគម្ពីរ? សូមឲ្យឧទាហរណ៍។ (សូមមើលរូបភាពនៅដើមអត្ថបទ)
៥ ក្នុងប្រអប់ឧបករណ៍របស់យើង ឧបករណ៍នីមួយៗបានត្រូវរៀបចំឡើងដោយមានគោលបំណងជាក់លាក់។ ជាឧទាហរណ៍ សូមគិតអំពីឧបករណ៍ដែលលោកយេស៊ូបានប្រើពេលលោកជាជាងឈើ។ លោកត្រូវការឧបករណ៍ដើម្បីវាស់ប្រវែង គូស កាត់ ខួង និងឆ្លាក់ឲ្យចេញជារូបរាងណាមួយ ព្រមទាំងឧបករណ៍ដើម្បីវាស់ស្ទង់ផ្ទាំងឈើឲ្យស្មើគ្នា ហើយផ្គុំឈើទាំងនោះបញ្ចូលគ្នា។ ស្រដៀងគ្នាដែរ ឧបករណ៍នីមួយៗដើម្បីបង្រៀនគម្ពីរ ក៏បានត្រូវរៀបចំឡើងដោយមានគោលបំណងជាក់លាក់ដែរ។ ដូច្នេះ សូមយើងស្វែងយល់អំពីរបៀបប្រើឧបករណ៍ដ៏សំខាន់ទាំងនេះ។
ឧបករណ៍ដែលប្រាប់មនុស្សថាយើងជាអ្នកណា
៦, ៧. (ក) តើអ្នកធ្លាប់ប្រើកាតវីស៊ីតយ៉ាងដូចម្ដេច? (ខ) ហេតុអ្វីយើងប្រើលិខិតអញ្ជើញសម្រាប់កិច្ចប្រជុំក្រុមជំនុំ?
៦ កាតវីស៊ីត: ឧបករណ៍នេះមានទំហំតូច ប៉ុន្ដែមានប្រសិទ្ធភាពណាស់ក្នុងការប្រាប់មនុស្សឲ្យស្គាល់ថាយើងជាអ្នកណា និងក្នុងការណែនាំពួកគេឲ្យចូលមើលគេហទំព័ររបស់យើង ពោលគឺjw.org។ ក្នុងគេហទំព័ររបស់យើង ពួកគេអាចរៀនថែមទៀតអំពីយើង ហើយថែមទាំងស្នើសុំរៀនគម្ពីរទៀតផង។ រហូតដល់សព្វថ្ងៃនេះ តាមគេហទំព័រjw.org មនុស្សជាង៤០០.០០០នាក់បានស្នើសុំរៀនគម្ពីរ ហើយជារៀងរាល់ថ្ងៃមានមនុស្សរាប់រយនាក់ទៀតដែលធ្វើដូច្នេះ! អ្នកអាចទុកកាតវីស៊ីតខ្លះនៅតាមខ្លួន ហើយប្រើវាកាលដែលអ្នកនិយាយជាមួយនឹងមនុស្សដែលអ្នកជួបក្នុងកិច្ចការប្រចាំថ្ងៃ។
៧ លិខិតអញ្ជើញ: លិខិតអញ្ជើញសម្រាប់កិច្ចប្រជុំរបស់យើងសរសេរថា៖ «យើងសូមអញ្ជើញលោកអ្នកចូលរួមរៀនគម្ពីរជាមួយនឹងសាក្សីព្រះយេហូវ៉ា»។ លិខិតអញ្ជើញនោះក៏រៀបរាប់ថាអ្នកអាចរៀនគម្ពីរ«នៅកិច្ចប្រជុំរបស់យើង» ឬ«រៀនគម្ពីរនៅផ្ទះរបស់លោកអ្នក»។ ដូច្នេះ លិខិតអញ្ជើញនេះជួយមនុស្សឲ្យដឹងថាយើងជាអ្នកណា ហើយក៏អញ្ជើញពួកអ្នកដែល«ស្រេកឃ្លានចំពោះការណែនាំពីព្រះ»ឲ្យសិក្សាគម្ពីរជាមួយនឹងយើង។ (ម៉ាថាយ ៥:៣) យើងស្វាគមន៍មនុស្សឲ្យមកចូលរួមកិច្ចប្រជុំរបស់យើង ទោះជាពួកគេព្រមសិក្សាគម្ពីរឬមិនព្រមក្ដី។ ពេលពួកគេចូលរួមកិច្ចប្រជុំរបស់យើង ពួកគេនឹងឃើញថាមានអ្វីជាច្រើនដែលពួកគេអាចរៀនពីគម្ពីរ។
៨. ហេតុអ្វីគឺសំខាន់ដែលមនុស្សមកចូលរួមកិច្ចប្រជុំរបស់យើងយ៉ាងហោចណាស់ម្ដង? សូមលើកឧទាហរណ៍មួយ។
៨ គឺសំខាន់ដែលយើងបន្ដអញ្ជើញមនុស្សឲ្យចូលរួមកិច្ចប្រជុំរបស់យើងយ៉ាងហោចណាស់ម្ដង។ ហេតុអ្វី? ពីព្រោះពេលដែលពួកគេមកចូលរួមកិច្ចប្រជុំ ពួកគេនឹងឃើញថាសាក្សីព្រះយេហូវ៉ាបង្រៀនសេចក្ដីពិតពីគម្ពីរនិងជួយមនុស្សឲ្យស្គាល់ព្រះ ហើយពួកគេនឹងឃើញថាសាសនាមិនពិតមិនធ្វើដូច្នេះទេ។ (អេសាយ ៦៥:១៣) ប៉ុន្មានឆ្នាំមុន បុរសម្នាក់ឈ្មោះរេនិងប្រពន្ធរបស់គាត់ឈ្មោះលីនដាដែលរស់នៅសហរដ្ឋអាម៉េរិកបានកត់សម្គាល់អំពីភាពខុសគ្នានេះ។ ពួកគាត់មានជំនឿលើព្រះ ហើយចង់ស្គាល់លោកយ៉ាងច្បាស់។ ដូច្នេះ ពួកគាត់បានសម្រេចចិត្ដទៅវិហារនីមួយៗនៅក្រុងដែលពួកគាត់រស់នៅ ហើយស្វែងរកអ្វីពីរយ៉ាងមុនដែលពួកគាត់ចូលសាសនាណាមួយ។ ទី១ វិហារនោះត្រូវជួយពួកគាត់ឲ្យរៀនអ្វីមួយ ហើយទី២ សមាជិកវិហារនោះត្រូវស្លៀកពាក់សមនឹងអ្នកដែលអះអាងថាខ្លួនជាអ្នកបម្រើព្រះ។ ដោយសារមានវិហារជាច្រើននៅក្រុងនោះ ពួកគាត់បានចំណាយពេលអស់ប៉ុន្មានឆ្នាំដើម្បីទៅគ្រប់វិហារនីមួយៗ។ ប៉ុន្ដែពួកគាត់ខកចិត្ដជាខ្លាំង។ ពួកគាត់មិនបានរៀនអ្វីសោះ ហើយសមាជិកវិហារមិនបានស្លៀកពាក់សមរម្យទេ។ ក្រោយពីពួកគាត់បានទៅវិហារចុងក្រោយ បងលីនដាទៅធ្វើការ រីឯបងរេបានត្រឡប់ទៅផ្ទះវិញ។ ពេលគាត់បើកឡានត្រឡប់ទៅផ្ទះវិញ គាត់បានជិះកាត់សាលប្រជុំមួយ។ គាត់បានគិតថា ‹ខ្ញុំចូលទៅមើលសិន តើគេធ្វើអីនៅទីនោះ›។ នេះគឺជាបទពិសោធន៍ដ៏ល្អជាងគេសម្រាប់គាត់! បងប្អូននៅសាលប្រជុំបង្ហាញសេចក្ដីសប្បុរសនិងបង្ហាញភាពរាក់ទាក់ ហើយបានស្លៀកពាក់យ៉ាងស្អាតបាត។ បងរេបានអង្គុយនៅជួរខាងមុខ ហើយគាត់ចូលចិត្ដអ្វីដែលគាត់បានរៀនខ្លាំងណាស់! នេះរំលឹកយើងអំពីពាក្យរបស់សាវ័កប៉ូលពេលគាត់បានរៀបរាប់អំពីបុគ្គលដែលមកចូលរួមកិច្ចប្រជុំជាលើកដំបូង បុគ្គលនោះនិយាយថា៖ «ព្រះនៅក្នុងចំណោមអ្នករាល់គ្នាមែន»។ (កូរិនថូសទី១ ១៤:២៣-២៥) ក្រោយមក បងរេបានមកកិច្ចប្រជុំជារៀងរាល់ថ្ងៃអាទិត្យ។ ក្រោយមកទៀត គាត់បានចាប់ផ្ដើមមកចូលរួមកិច្ចប្រជុំទាំងអស់របស់យើង។ បងលីនដាក៏បានមកចូលរួមកិច្ចប្រជុំដែរ។ ទោះជាពួកគាត់មានអាយុ៧០ឆ្នាំជាងក្ដី ពួកគាត់បានរៀនគម្ពីរនិងបានទទួលការជ្រមុជទឹក។
ឧបករណ៍សម្រាប់ចាប់ផ្ដើមការសន្ទនា
៩, ១០. (ក) ហេតុអ្វីខិត្ដប័ណ្ណរបស់យើងគឺស្រួលប្រើ? (ខ) សូមពន្យល់អំពីរបៀបប្រើខិត្ដប័ណ្ណដែលមានចំណងជើងថា តើព្រះមានរដ្ឋាភិបាលឬទេ?
៩ ខិត្ដប័ណ្ណ: យើងមានខិត្ដប័ណ្ណ៨ដែលជាឧបករណ៍ដើម្បីបង្រៀនគម្ពីរ។ ខិត្ដប័ណ្ណទាំងនោះគឺងាយស្រួលប្រើ ហើយជួយយើងឲ្យចាប់ផ្ដើមការសន្ទនា។ តាំងពីខិត្ដប័ណ្ណដំបូងក្នុងចំណោមខិត្ដប័ណ្ណទាំងនេះបានត្រូវចេញនៅឆ្នាំ២០១៣ យើងបានបោះពុម្ពប្រហែលជា៥ពាន់លានខិត្ដប័ណ្ណ! ខិត្ដប័ណ្ណទាំងអស់នេះមានលក្ខណៈដូចគ្នា។ ដូច្នេះ ក្រោយពីយើងរៀនអំពីរបៀបប្រើខិត្ដប័ណ្ណមួយ យើងអាចចេះប្រើខិត្ដប័ណ្ណទាំង៨នោះបាន! តើអ្នកអាចប្រើខិត្ដប័ណ្ណរបស់យើងដើម្បីចាប់ផ្ដើមសន្ទនាជាមួយនឹងបុគ្គលណាម្នាក់យ៉ាងដូចម្ដេច?
១០ ឧបមាថាអ្នកចង់ប្រើខិត្ដប័ណ្ណដែលមានចំណងជើងថា តើព្រះមានរដ្ឋាភិបាលឬទេ? សូមបង្ហាញសំណួរដែលនៅខាងមុខខិត្ដប័ណ្ណ ហើយសួរថា៖ «តើលោកអ្នកយល់យ៉ាងណា តើព្រះមានរដ្ឋាភិបាលឬទេ? តើលោកអ្នកនឹងឆ្លើយថា . . . ?»។ បន្ទាប់មក សូមសួរគាត់ថាក្នុងចំណោមចម្លើយទាំងបីដែលមានក្នុងខិត្ដប័ណ្ណនោះតើគាត់នឹងជ្រើសរើសចម្លើយមួយណា។ ជាជាងនិយាយថាចម្លើយរបស់គាត់ខុសឬត្រូវ សូមបើកខិត្ដប័ណ្ណនៅកន្លែងដែលថា«គម្ពីររៀបរាប់ថា» ហើយអានខគម្ពីរដែលមាននៅទីនោះ ពោលគឺដានីយ៉ែល ២:៤៤ និងអេសាយ ៩:៦។ ពេលបញ្ចប់ការសន្ទនា សូមសួរសំណួរនៅខាងក្រោយខិត្ដប័ណ្ណ ដែលនៅក្រោមចំណងជើងថា «សូមគិតអំពីសំណួរនេះ» ដែលថា៖ «ក្រោមការគ្រប់គ្រងនៃរាជាណាចក្រព្រះ តើជីវិតនឹងមានស្ថានភាពយ៉ាងណា?»។ អ្នកអាចឆ្លើយសំណួរនេះពេលអ្នកទៅជួបគាត់លើកក្រោយ។ ពេលនោះ អ្នកអាចប្រើមេរៀនទី៧នៃសៀវភៅស្ដើងព្រះមានដំណឹងល្អសម្រាប់យើង!ដែលជាឧបករណ៍មួយដើម្បីចាប់ផ្ដើមសិក្សាគម្ពីរ។
ឧបករណ៍ដែលធ្វើឲ្យមានចំណាប់អារម្មណ៍លើគម្ពីរ
១១. តើទស្សនាវដ្ដីរបស់យើងបានត្រូវរៀបចំឡើងដើម្បីអ្វី ហើយតើយើងគួរដឹងអ្វីអំពីទស្សនាវដ្ដីទាំងនោះ?
១១ ទស្សនាវដ្ដី: ទស្សនាវដ្ដីប៉មយាមនិងទស្សនាវដ្ដីភ្ញាក់រឭក! បានត្រូវបោះពុម្ពនិងបកប្រែច្រើនជាងទស្សនាវដ្ដីឯទៀតក្នុងពិភពលោកនេះ! ដោយសារមនុស្សដែលមកពីប្រទេសជាច្រើនអានទស្សនាវដ្ដីទាំងនេះ ប្រធានបទដែលនៅក្របខាងមុខបានត្រូវរៀបចំឡើងដើម្បីទាក់ទាញចំណាប់អារម្មណ៍របស់មនុស្សទូទៅ។ យើងគួរប្រើទស្សនាវដ្ដីទាំងនេះដើម្បីជួយមនុស្សឲ្យផ្ដោតអារម្មណ៍ទៅលើអ្វីដែលសំខាន់បំផុតក្នុងជីវិតនៅសព្វថ្ងៃនេះ។ ប៉ុន្ដែ មុនដំបូងយើងត្រូវដឹងថាទស្សនាវដ្ដីនីមួយៗបានត្រូវរៀបចំឡើងសម្រាប់បុគ្គលបែបណា។
១២. (ក) តើទស្សនាវដ្ដីភ្ញាក់រឭក!បានត្រូវរៀបចំឡើងសម្រាប់អ្នកណា ហើយដោយមានគោលបំណងអ្វី? (ខ) នៅថ្មីៗនេះ តើអ្នកមានបទពិសោធន៍ល្អអ្វីពេលអ្នកប្រើឧបករណ៍នេះ?
១២ ទស្សនាវដ្ដីភ្ញាក់រឭក! បានត្រូវរៀបចំឡើងសម្រាប់មនុស្សដែលមិនសូវស្គាល់ ឬដែលមិនស្គាល់ទាល់តែសោះអំពីគម្ពីរ។ ពួកគេប្រហែលជាមិនស្គាល់ទាល់តែសោះអំពីសេចក្ដីបង្រៀនរបស់គ្រិស្ដសាសនា ឬពួកគេប្រហែលជាមិនសូវទុកចិត្ដសាសនា ឬក៏ពួកគេប្រហែលជាមិនដឹងថាគម្ពីរអាចជួយពួកគេក្នុងជីវិតទេ។ គោលបំណងដ៏សំខាន់ចម្បងនៃទស្សនាវដ្ដីភ្ញាក់រឭក!គឺដើម្បីជួយអ្នកអានឲ្យជឿថាមានព្រះ។ (រ៉ូម ១:២០; ហេប្រឺ ១១:៦) ទស្សនាវដ្ដីនេះក៏ចង់ជួយអ្នកអានឲ្យជឿថាគម្ពីរពិតជា«បណ្ដាំរបស់ព្រះ»។ (ថែស្សាឡូនិចទី១ ២:១៣) ទស្សនាវដ្ដីភ្ញាក់រឭក!ចំនួនបីលេខសម្រាប់ឆ្នាំ២០១៨ មានចំណងជើងថា «របៀបរកផ្លូវដែលនាំឲ្យមានសុភមង្គល» «គន្លឹះ១២យ៉ាងសម្រាប់ក្រុមគ្រួសារ» និង«ជំនួយសម្រាប់អ្នកដែលកើតទុក្ខ»។
១៣. (ក) តើទស្សនាវដ្ដីប៉មយាមសម្រាប់ផ្សព្វផ្សាយបានត្រូវរៀបចំឡើងដោយមានគោលបំណងអ្វី? (ខ) នៅថ្មីៗនេះ តើអ្នកមានបទពិសោធន៍ល្អអ្វីពេលអ្នកប្រើឧបករណ៍នេះ?
១៣ គោលបំណងដ៏សំខាន់ចម្បងនៃទស្សនាវដ្ដីប៉មយាមសម្រាប់ផ្សព្វផ្សាយគឺដើម្បីពន្យល់អំពីសេចក្ដីបង្រៀនក្នុងគម្ពីរដល់មនុស្សដែលគោរពព្រះនិងគម្ពីរមួយកម្រិតរួចហើយ។ ពួកគេប្រហែលជាស្គាល់អ្វីមួយចំនួនអំពីគម្ពីរ ប៉ុន្ដែពួកគេមិនយល់អំពីសេចក្ដីបង្រៀនក្នុងគម្ពីរយ៉ាងត្រឹមត្រូវទេ។ (រ៉ូម ១០:២; ធីម៉ូថេទី១ ២:៣, ៤) ទស្សនាវដ្ដីប៉មយាមចំនួនបីលេខសម្រាប់ផ្សព្វផ្សាយនៅឆ្នាំ២០១៨ ផ្ដល់ចម្លើយចំពោះសំណួរថា៖ «តើគម្ពីរនៅតែមានប្រយោជន៍នៅសព្វថ្ងៃនេះឬទេ?» «តើអនាគតនឹងទៅជាយ៉ាងណា?» និង«តើព្រះយកចិត្ដទុកដាក់នឹងលោកអ្នកឬទេ?»។
ឧបករណ៍ដែលជំរុញចិត្ដ
១៤. (ក) តើវីដេអូបួនដែលជាឧបករណ៍ដើម្បីបង្រៀនគម្ពីរបានត្រូវរៀបចំឡើងដើម្បីអ្វី? (ខ) តើអ្នកមានបទពិសោធន៍ល្អអ្វីខ្លះពេលបង្ហាញវីដេអូទាំងនេះ?
១៤ វីដេអូ: នៅសម័យលោកយេស៊ូ ជាងឈើមិនមានម៉ាស៊ីនទេ មានតែឧបករណ៍ដែលប្រើដោយដៃប៉ុណ្ណោះ។ ប៉ុន្ដែ សព្វថ្ងៃនេះជាងឈើក៏មានឧបករណ៍ដែលប្រើអគ្គីសនីដែរដូចជា ម៉ាស៊ីនអារឈើ ម៉ាស៊ីនស្វាន និងម៉ាស៊ីនខាត់។ នៅសព្វថ្ងៃនេះពេលយើងផ្សព្វផ្សាយ ក្រៅពីសៀវភៅផ្សេងៗដែលបានត្រូវបោះពុម្ព យើងក៏មានវីដេអូល្អៗដើម្បីបង្ហាញមនុស្សដែរ។ ក្នុងចំណោមវីដេអូទាំងនោះ មានវីដេអូបួនដែលជាឧបករណ៍ដើម្បីបង្រៀនគម្ពីរ។ វីដេអូទាំងនេះមានចំណងជើងថា ហេតុអ្វីគួររៀនគម្ពីរ? តើកម្មវិធីរៀនគម្ពីរត្រូវធ្វើឡើងតាមរបៀបណា? តើមានកម្មវិធីអ្វីខ្លះនៅសាលប្រជុំរបស់យើង? និងសាក្សីព្រះយេហូវ៉ា តើយើងជាអ្នកណា? វីដេអូខ្លីអាចចាក់ក្នុងរយៈពេលតិចជាងពីរនាទី ហើយពិតជាមានប្រយោជន៍ពេលយើងប្រើសម្រាប់ការជួបជាលើកដំបូង។ វីដេអូវែងជាងអាចប្រើពេលយើងធ្វើការត្រឡប់ទៅជួប និងប្រើសម្រាប់អ្នកដែលមានពេលច្រើនជាង។ វីដេអូទាំងនេះគឺជាឧបករណ៍ដ៏មានប្រសិទ្ធភាពដោយសារវាអាចជំរុញចិត្ដមនុស្សឲ្យសិក្សាគម្ពីរ និងចូលរួមកិច្ចប្រជុំរបស់យើង។
១៥. តើការមើលវីដេអូរបស់យើងជាភាសាកំណើតអាចមានឥទ្ធិពលយ៉ាងណាលើមនុស្ស? សូមលើកឧទាហរណ៍។
១៥ ជាឧទាហរណ៍ បងស្រីម្នាក់បានជួបស្ដ្រីម្នាក់ដែលបានរើមកពីប្រជុំកោះមីក្រូណេស៊ី ហើយភាសាកំណើតរបស់ស្ដ្រីនោះគឺភាសាយេព។ បងស្រីយើងបានបង្ហាញគាត់នូវវីដេអូដែលមានចំណងជើងថា ហេតុអ្វីគួររៀនគម្ពីរ?ជាភាសាយេព។ ពេលវីដេអូចាប់ផ្ដើម ស្ដ្រីនោះបាននិយាយថា៖ «នេះជាភាសារបស់ខ្ញុំតើស។ ខ្ញុំពិបាកជឿមែនទែន! តុងសំឡេងរបស់គាត់ ធ្វើឲ្យខ្ញុំដឹងថាគាត់មកពីកោះដែលខ្ញុំធ្លាប់រស់នៅ។ គាត់និយាយភាសារបស់ខ្ញុំ!»។ ក្រោយមក ស្ដ្រីនោះបាននិយាយថាគាត់នឹងអាន ហើយមើលអ្វីៗទាំងអស់តាមគេហទំព័រjw.orgជាភាសារបស់គាត់។ (សូមពិនិត្យបន្ថែម សកម្មភាព ២:៨, ១១) ឧទាហរណ៍មួយទៀតគឺបងស្រីម្នាក់ដែលរស់នៅសហរដ្ឋអាម៉េរិក ដែលមានក្មួយប្រុសរស់នៅប្រទេសផ្សេង។ បងស្រីនោះបានផ្ញើអ៊ីមែលឲ្យគាត់ដោយភ្ជាប់វីដេអូហេតុអ្វីគួររៀនគម្ពីរ?ជាភាសារបស់គាត់។ គាត់បានមើលវីដេអូនោះ ហើយបានផ្ញើអ៊ីមែលទៅបងស្រីនោះវិញថា៖ «ខ្ញុំពិតជាចាប់អារម្មណ៍ចំណុចដែលថាមេកំណាចកំពុងកាន់កាប់ពិភពលោកទាំងមូល។ ដូច្នេះ ខ្ញុំបានសុំរៀនគម្ពីរ»។ នេះគឺគួរឲ្យរំភើបចិត្ដណាស់ ដោយសារគាត់រស់នៅប្រទេសដែលកិច្ចការរបស់យើងបានត្រូវគេដាក់កម្រិត!
ឧបករណ៍ដែលបង្រៀនសេចក្ដីពិត
១៦. សូមពន្យល់អំពីគោលបំណងនៃសៀវភៅស្ដើងដូចជា (ក) ចូរស្តាប់ព្រះដើម្បីរស់ជារៀងរហូត។ (ខ) ព្រះមានដំណឹងល្អសម្រាប់យើង! (គ) នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
១៦ សៀវភៅស្ដើង: តើតាមរបៀបណាយើងអាចបង្រៀនសេចក្ដីពិតដល់អ្នកណាម្នាក់ដែលមិនសូវចេះអក្សរ ឬដែលមិនមានសៀវភៅផ្សេងៗរបស់យើងអំពីគម្ពីរជាភាសារបស់គាត់? យើងអាចប្រើសៀវភៅស្ដើងដែលមានចំណងជើងថា ចូរស្តាប់ព្រះដើម្បីរស់ជារៀងរហូត។ * (សូមមើលកំណត់សម្គាល់) ឧបករណ៍ដ៏ល្អមួយដើម្បីចាប់ផ្ដើមបង្រៀនគម្ពីរគឺសៀវភៅស្ដើងដែលមានចំណងជើងថា ព្រះមានដំណឹងល្អសម្រាប់យើង! អ្នកអាចបង្ហាញបុគ្គលណាម្នាក់នូវប្រធានបទទាំង១៤ដែលមាននៅក្របខាងក្រោយនៃសៀវភៅស្ដើងនោះ ហើយសួរគាត់ថាតើគាត់ចាប់អារម្មណ៍ប្រធានបទមួយណាជាងគេ។ បន្ទាប់មក សូមចាប់ផ្ដើមបង្រៀនគាត់នូវមេរៀននោះ។ តើអ្នកបានសាកល្បងធ្វើដូច្នេះពេលអ្នកធ្វើការត្រឡប់ទៅជួបឬទេ? សៀវភៅស្ដើងមួយទៀតដែលជាឧបករណ៍ដើម្បីបង្រៀនគម្ពីរ មានចំណងជើងថា នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា? សៀវភៅស្ដើងនេះបានត្រូវរៀបចំឡើងដើម្បីបង្រៀនសិស្សគម្ពីរអំពីអង្គការរបស់ព្រះ។ ដើម្បីដឹងអំពីរបៀបដែលអ្នកអាចប្រើសៀវភៅស្ដើងនេះរាល់ដងដែលអ្នកបង្រៀនសិស្សគម្ពីរ សូមមើលកិច្ចបម្រើនិងជីវិតជាគ្រិស្ដសាសនិក កំណត់សម្រាប់កិច្ចប្រជុំ ខែមីនា ឆ្នាំ២០១៧។
១៧. (ក) តើសៀវភៅសិក្សានីមួយៗបានត្រូវរៀបចំឡើងក្នុងគោលបំណងអ្វី? (ខ) តើអស់អ្នកដែលទទួលការជ្រមុជទឹកត្រូវធ្វើអ្វី ហើយហេតុអ្វី?
១៧ សៀវភៅ: ក្រោយពីអ្នកចាប់ផ្ដើមបង្រៀនគម្ពីរដល់អ្នកណាម្នាក់ដោយប្រើសៀវភៅស្ដើងណាមួយ អ្នកអាចប្ដូរទៅសៀវភៅតើគម្ពីរអាចបង្រៀនយើងអំពីអ្វី? នៅពេលណាក៏បាន។ ឧបករណ៍នេះអាចជួយមនុស្សឲ្យរៀនថែមទៀតអំពីសេចក្ដីបង្រៀនបឋមៗក្នុងគម្ពីរ។ បើសិស្សគម្ពីរកំពុងរីកចម្រើន ហើយបានរៀនចប់សៀវភៅនេះ អ្នកអាចបន្ដបង្រៀនគាត់ដោយប្រើសៀវភៅ«ចូររក្សាខ្លួនជាមនុស្សដែលព្រះស្រឡាញ់»។ * (សូមមើលកំណត់សម្គាល់) ឧបករណ៍នេះនឹងជួយសិស្សគម្ពីរឲ្យរៀនអំពីរបៀបធ្វើតាមគោលការណ៍គម្ពីរក្នុងជីវិតប្រចាំថ្ងៃ។ សូមចាំថា សូម្បីតែក្រោយពីសិស្សគម្ពីរបានទទួលការជ្រមុជទឹក អ្នកក៏នៅតែត្រូវបន្ដសិក្សាជាមួយនឹងគាត់រហូតដល់គាត់រៀនចប់សៀវភៅទាំងពីរក្បាលនោះ។ នេះនឹងជួយគាត់ឲ្យមានជំនឿមាំមួនលើព្រះយេហូវ៉ា ហើយរក្សាចិត្ដស្មោះត្រង់ចំពោះលោក។—សូមអាន កូឡុស ២:៦, ៧
យើងមានឧបករណ៍មួយចំនួនដែលយើងត្រូវការដើម្បីបង្រៀនមនុស្សនូវដំណឹងល្អ
១៨. (ក) ក្នុងនាមជាអ្នកបង្រៀនសេចក្ដីពិត តើធីម៉ូថេទី១ ៤:១៦លើកទឹកចិត្ដយើងឲ្យធ្វើអ្វី ហើយតើនេះនាំឲ្យមានលទ្ធផលអ្វី? (ខ) តើយើងមានគោលដៅអ្វីពេលយើងប្រើឧបករណ៍ផ្សេងៗរបស់យើងដើម្បីបង្រៀនគម្ពីរ?
១៨ ក្នុងនាមជាសាក្សីព្រះយេហូវ៉ា យើងមានភារកិច្ចបង្រៀនមនុស្ស«អំពីសេចក្ដីពិត ពោលគឺដំណឹងល្អ» ដែលអាចជួយពួកគេឲ្យទទួលជីវិតដែលគ្មានទីបញ្ចប់។ (កូឡុស ១:៥; សូមអាន ធីម៉ូថេទី១ ៤:១៦) ដើម្បីជួយយើងឲ្យធ្វើដូច្នេះ យើងមានឧបករណ៍មួយចំនួនដែលយើងត្រូវការដើម្បីបង្រៀនគម្ពីរ។ (សូមមើលប្រអប់ដែលមានចំណងជើងថា « ឧបករណ៍ដើម្បីបង្រៀនគម្ពីរ») សូមយើងប្រើឧបករណ៍ទាំងនេះឲ្យមានប្រសិទ្ធភាពបំផុត។ យើងម្នាក់ៗអាចសម្រេចចិត្ដថាយើងនឹងប្រើឧបករណ៍ណាមួយ ហើយអំពីពេលណាដែលយើងនឹងប្រើឧបករណ៍នោះ។ ប៉ុន្ដែសូមចាំថា យើងមិនឲ្យសៀវភៅរបស់យើងដល់មនុស្សដែលមិនចាប់អារម្មណ៍ដំណឹងដែលយើងផ្សាយឡើយ ហើយថាគោលដៅរបស់យើងគឺមិនគ្រាន់តែចែកចាយសៀវភៅប៉ុណ្ណោះទេ។ គោលដៅរបស់យើងគឺបង្រៀនមនុស្សដែលមានចិត្ដស្មោះ ចិត្ដរាបទាប និងពិតជាចង់ស្គាល់ព្រះ ពោលគឺមនុស្សដែល«មានចិត្ដគំនិតត្រឹមត្រូវឲ្យបានជីវិតដែលគ្មានទីបញ្ចប់»ឲ្យក្លាយទៅជាអ្នកកាន់តាមលោកយេស៊ូ។—សកម្មភាព ១៣:៤៨; ម៉ាថាយ ២៨:១៩, ២០
